دنيا الخوف

Sunday, December 2, 2007

يا دنيا الخوف أنا رافــــض... أبيـع حــــلمي أو أتنازل
ومش هرضي يكون بيني ... وبين كـل الوجود عازل
آديني يا دنيا بعلنها
لو الأحلام بقت سوده
أنا قادر بلون الحب ألونها
ولو كل القلوب خايفه
أنا قادر بصدق الحب أطمنها
آديكي يا دنيا أدامي
ضعيفه ومسرحك مكشوف
سنين سيبتك تخليني
صحيح عايش ..لكن ميت في جلد الخوف
بشوف حلم السنين ضايع ومن ضعفي
بغمض عيني لما بشوف
لكن دلوقتي مش هرضى
أتنّي في ملعبك أجري
وبعد دا كله يا دنيا
أشوط الكوره في العارضه
و آديني يا دنيا بتحداكي من تاني
ومش هرضى أكون مجني عليه وإنتي
تكوني القاضي والجاني
ومش هرضي أطاطي الراس عشان غيري
يئيد النار في وجداني
خلاص زمن الدموع ولّى.... وكلــــــــمة ضعف ممنوعه
ياعيش وكرامتي متصانه.... ياموت وأنا راسي مرفوعه
آديني يا دنيا بفتحلك شبابيكي
و أمد إيديّ يالأحلام و أناديكي
ولازم تعرفي إني
صحيح عايز أعيش فيكي
لكن برفــــض أعـيش ليكي
لإني يا دنيا مش عبدك
أنا عبد اللي سوّاكي
و سمّاكي...صحيح"دنيا"

مـحمــــــود سليمان أبوالعزم
Now_tears_smile@yahoo.com

3 comments:

last knight said...

الله عليك يا محمود
شعر جمييييييييييييل
ومبروك المدونة يا عم
اخيرا اتفتحت الكومنتات
علشان نباركلك ونشاركك
عالمدونة

loaihazem said...

الله عليك يا حودة
يا جاااااااااااااااامد

Anonymous said...

بجد محمود انا موهومة بموهبتك
بسم الله ماشاء الله عليك
تعبيرك عن الحلم اروع من انك تطلب من الف شخص يعبر عنه
عارف مشكلة الحلم اللى انت بتتكلم عنه وبتخرجة من جواك خرجته منى كمان بس باهدى من اى مرة بوصف بيها رفضي للناس اللى نفسها تضيع حلمى او تحبطة
ربنا يبارك فيك
انت حلم
واللى زيك امل لبكرة قليلين
حافظ على نفسك حلم وامل
ميرسي كثير لتعبيرك عن حاجات حسينها