مجروح..ولكن

Tuesday, May 13, 2008

السلام عليكم ورحمة الله
الجرح...هو أشد أنواع العلاج ألما ولكنه....أقواها أثراً "

أنا فرحان أوي يا جماعه اني هنزل القصيده دي النهارده
لان ناس كتير اختارتها ولانها آخرحاجه كتبتها ولانها خدت مني وقت طويل اوي
خدت مني وقت لان اول ما حاولت اكتبه كنت بكتبه على لسان حبيب لحبيب
بس ماقدرتش اكمله بالاحساس ده
فحاولت اكتبه على لسان كل حد اتجرح
من حبيب...من صديق ..من قريب من اي حد
خصوصا الحد اللي يكون ليك فيه عشم
الجرح مش مجرد حد كان بيحب حد وسابه
يمكن ده يكون اقل انواع الجروح
الجرح لما تستني اللي بتحبه يقف جنبك ويمدلك ايده وماتلاقيهوش
ايا كان اللي بتحبه ده مين.. اخوك... صاحبك......المهم انه سابك في عز ما انت محتاجله
الجرح ممكن يكون كلمه واحده
نظره واحده حد بصهالك من فوق
ممكن يكون حتى من غير اي كلام
عارفين..انا كنت ناوي انزل القصيده دي بصوتي
بس حبيت ان كل واحد منكم يقراها باحساسه هو
حاجه واحده فاضل اقولها عشان ماتوقفكوش وانتو بتقروا القصيده كلمة"و لا"اللي هتلاقوها كتير
اللام عليها فتحه مش شده
عشان بس ماتكسرشي الوزن وتخليكوا تقفوا وانتو بتقرو القصيده
أخر حاجه قبل القصيده
انتي اقوي من جرحك ومن اللي جرحك
بس الحاجه الوحيدة اللي ناقصاك انك تعرف انك اقوى

" الماضي هو المعلم الذي علينا ان نتعلم درسه جيدا ونقبل يده...ثم ننساه الي الأبد"

مجروح ولكن
يا قلبي محــــــــتاج للــــــدوا .........لكــــــــن ماتنساش النصيب

مش كل بلــــــــــسم في الهوا ........ يتــــحط فوق جرحك يطيب

ولا كل قلب نكـــــــــون سوا...........يبــــقى خلاص هوّ الحبيب
ياما ناس كتــير بتـحب بعض

مش مكـــــتوبــين أبداً لبعض

ياما ناس كتـــــــــــير متفرقه

وهييجي يوم.. ويقـابلوا بعض
ايّـــاك تلـــــوم فـِعـْــل القدر..........ولا يـــــــوم تشك في حكمته

ولا تبكي يوم على مين غدر.........ولا تمــــــشي تاني في سكته

قبـــــل أما دمعي يسيل هدر..........صـــــــــبر الفـــؤاد هيسكته
مهما هكون مـــجــروح اوي

والجرح منــــقوش في الزمن

أنا خــــــدت درس كبير أوي

ومافيش دروس من غير تمن

لـمـلـم مشاعــرك لو شـَكـِت .........جرحـــــك بنار جرحك داويه

غـمّــض عيـونك لـو حـَكِت..........عـن طـول حنينها وشوقها ليه

ولو العـــــيون مـِـنـّـك بَكِت...........فبـــلاش يكون.... أدام عينيه

يمكن تكون نــــــارك وحيد

أهون من النـــار في اللـُـقــا

مش كل شئ يلــــــمع بعيد

دايما بيطــــــــــلع... لؤلؤه

مجروح ولكـــــن مش هقول.........ان الجـــــراح هتـــــــــهزّني

و هداوي جـرحي ولو يطول.........وههدّه مــــــش هيــــــــهدّني

وسفينتي قادرة على الوصول....... لو ألـــــف ســـــــــد هيـنبني

يا قلبي رفرف في السما

إيـــاك جـــــناحك ينكسِر

ماحناش هنخـــــسر انما

كل اللي باعـنا أكيد خسِر

مجروح ولكـــن مش هموت........ و لا هنـــــدفن وسط الجراح

لا هيتكتم جــــــــوايا صوت ........و لا هبكي عالعمر اللي راح

ومسير زمان الخوف يموت.........والقلب يطــــــلع للبــــــراح

مش فارقه أبــــداً جرحنا

في القلب يــــوجع أد ايه

بس اللي يفــــــــرق اننا

من جرحنا اتعلــــمنا ايه

43 comments:

Anonymous said...

السلام عليكم اولا احب اشكرك انك ديمقراطى ونزلت القصيدة دى ثانيا هى جميلة جدا وعجبنى جدا مش كل شئ يلمع بعيد دايما بيطلع لؤلؤة وجزاك الله خيرا

Anonymous said...

,,السلام عليك
جميله جدا

اياك تلوم فعل القدر ولا يوم تشك في حكمته
الجمله دى هى مبدأى في الحياه
وبتفكرنى بكلمه الشيخ الشعراوى
اللهم انا نرضي بقضاؤك ايمانا منا بحكمتك

الى الامام وفي رعايه الله

pureblue

Anonymous said...

مش فارقه أبــــداً جرحنا

في القلب يــــوجع أد ايه

بس اللي يفــــــــرق اننا

من جرحنا اتعلــــمنا ايه

السلام عليكم ورحمه الله
جميله اوووي القصيده زي ماقلتلك قبل كده انت مش بتكتب حاجه وحشه ربنا يوفقك ويكرمك

semsema said...

مش فارقه أبــــداً جرحن
ا
في القلب يــــوجع أد ايه

بس اللي يفــــــــرق اننا

من جرحنا اتعلــــمنا ايه

برافو محمود
كما توقعناك دائما متألق بكلماتك ذات الاحساس العالي
ربنا يوفقك ويهديك
تقبل خالص مودتي وتحياتي

صناع المحلة الكبرى .. دواهم في غيدك said...

كان نفسي تشوفني و أنا قاعد أسقفلك
دلوقتي يا بو العزم


خلاصه الكلام أنك لازم تدي اللي يزعلك فوق دماغه ... و دماغ ناس تانيه كمان
:))

بجد .. الله عليك

شق القمر said...

هقول ايه بعد الكلام الجميل ده
انا قلت اجرى الحق اكون اول تعليق لك لاول مرة لكن برده محصلش نصيب
تسلم ايديك ويسلم عقلك وتسلم كل احاسيسك
مفيش كلام اقوله بس هركز على الجملتين اللى انت ذكرتهم قبل القصيدة
لانهم بجد تحفة

Little Angel said...

ماشاء الله عليك يا محمود ..ارفع لك القبعة .. كلام جوه الجون على طوووووول واحلى حاجة عجبتنى اخر جملة ايه اللى اتعلمناه من جرحنا اثرت فيا جدا وعبرت الى مع كل حرف من سطورك الرائعة ..وجميل احساسك القوى الرافض للجرح وعدم الندم ..سبحان الله فعلا وهاقولك كمان ان احيانا كل واحد فينا بيشعر ان نهايته مع فلان هى نهاية ا لحياة وبتبقى ده اقدار واكيد خير لان ربنا بيكتب لنا الخير والاصح مهما احنا شفناه وقتها مش كويس واعوذ بالله من كده وحمد لله على كل شئ ..كان نفسى كل مرة ابقى اول واحدة اكتب تعليق بس يالله ..متعوضة ..بانتظار ابداع جديد تمتعنا بيه ..ربنا معك فى الاطفال ..تحياتى

عندما تنهمر الدموع said...

السلام عليكم ورحمة الله وبركاته
انا دلوقتي بس وبعد ما قرأت القصيدة عرفت انه كان معايا حق في اني اخترها لأن اسمها فعلا شدني فما بالك بجوهرها؟ فعلا قصيدة جميلة بكل مافيها من معاني والفاظ واحاسيس بس كمان انا عجبني جدا كلام حضرتك اللي في الاول عن ان جرح الحبيب مش اصعب جرح انا من رأيي ان ممكن يكون جرح الاهل او جرح الصديق اقوى بكتير من اي جرح تاني لأن جرح الاهل ممكن يكون شئ بسيط وممكن يكون على شئ تافه لكنه بيأثر اوي فينا وبيبقى صعب جدا اننا ننساه او حتى نتناساه اما جرح الصديق فأنا بعتبره اقوى جرح يمكن لأنه ده الجرح اللي عشت كتير فيه واتكويت بناره ومفيش اي علاج او دوا عرف يداويه وهو ده عيب كليتنا بنتعلم فيها نداوي جروح الجسد وبننسى ان جرح النفس اصعب واقوى بكتير وممكن هو اللي يسبب جرح الجسد لكن كل ده مش مهم في سبيل اننا نتعلم درس وزي ما حضرتط قلت
انا خدت درس كبير اوي
ومفيش دروس من غير تمن
لكن اللي بجد نفسي اطبقه هو البيت اللي بيقول
ولاتبكي يوم على مين غدر
ولاتمشي تاني في سكته
يمكن يكون صعب ان ننسى صديق عاش معانا ايام ولحظات جميلة وياما اتشاركنا كتير لحظات مرة وحلوة صعب انك تنسى انسان وعدك في يوم يبقى دايما جانبك ولايوم يسيبك مهما حصل وفجأة تصحى من الحلم الجميل على وهم فعلا كان كبير وتلاقي اللي وعدك يفضل جنبك مشي وسابك وعايش حياته ومش همه بعدك لكن اكيد اللي حصل ده له حكمة هي اللي حضرتك وضحتها في البيت اللي بيقول
مش فارقةابداجرحنافي القلب يوجع ادايه
بس اللي يفرق اننا من جرحنااستفدناايه، الحكمة ده لازم كلنا نؤمن بيها ونعمل بيها
في النهاية شكرا لانك كتبت القصيدة ده باسم كل مجروح شكرا لانك حسيت بألام واوجاع ناس كتير شكرا لانك حاولت تساعدهم بكلامك اللي اكيد هيصحي فيهم الامل،انا اسفة على اطالتي فعلا انا اسفة لكن احب اختم بالأبيات
مجروح ولكن مش هقولا ان الجراح هتهزني
مجروح ولكن مش هموت ولاهندفن وسط الجراح
لاهينكتم جوايا صوت ولا هبكي على العمر اللي راح
في النهاية الجرح ذكرى اكيد هتفضل جوانا مش هتموت لكن لازم نستفيد منها
كان لي رجاء بسيط عند حضرتك اذا ممكن تنشر القصيدة التي بعنوان*رسالة الى قلبي*
وجزاك الله عنا كل خير ووفقك دائما لكل ما فيه الخير لك

Anonymous said...

السلام عليكم ازيك يا دكتور محمود
والله انا مش عارفه اقولك ايه خلاص مجرد الكلام بس مش هيوفيك حقك ابدا .انا بشكرك جدا جدا علي القصيده الرائعه دي ولو في كلمه اكتر من دي كنت قلتها .بالرغم من ان انامخترتهاش واخترت رساله الي قلبي وبصراحه خفت اختار القصيده دي لاني حسيت انها تبقي جامده اوي علينا .حضرتك بجد بيها صحيت فينا حاجات كانت مدفونه جوانامن زمان. بس احلي حاجه فعلا حضرتك قلتها ان الجرح فعلا مش من الحبيب للحبيب فعلا يمكن ده يكون من اخف الجروح ولكن الجرح اللي مش بينتهي ابدا واللي لازم يكون كل واحد او معظم الناس مرت بيه ومش عارفه فعلا تداويه هو جرح الصديق انسان تبقي عايش معاه كل وقتك وفاكر انه هو كل حاجه ليك وفجأه في موقف ما يبان قدامك انه........
انا بكتب الكلام ده والله وببكي لان حضرتك صحيت جوانا حاجات كانت مدفونه فعلا بس بجد القصيده جميله جدا والكلام اللي حضرتك قلته في الاول رائع وعجبني اوي الجمله اللي حضرتك عرفت فيها الجرح
الجرح...هو أشد أنواع العلاج ألما ولكنه....أقواها أثراً
مهما هكون مـــجــروح اوي

والجرح منــــقوش في الزمن

أنا خــــــدت درس كبير أوي

ومافيش دروس من غير تمن
مش فارقه أبــــداً جرحنا

في القلب يــــوجع أد ايه

بس اللي يفــــــــرق اننا

من جرحنا اتعلــــمنا ايه
بجد مش مجامله مفيش كلمه قرأتها في القصيده ما اتأثرتش بيها بس الكلمات دي اثرت فيه جامد اوي اوي واخر ابيات دي انا فعلا كنت بقعد اصبر نفسي بكلام زي كده
في النهايه انا بجد بشكر حضرتك جدا جدا وبشكر عندما تنهمر الدموع علي كلامها لان بحس انها بتقول اللي انا حاساه بس للاسف انا مش بعرف اعبر عنه وربنا يوفقك ويحفظك دايما وياريت ما تغيبش علينا في الكتابه وياريت القصيده اللي جايه تبقي رساله الي قلبي اللي انا نفسي اقرأها اوي وطلبتها قبل كده وربنا يوفقك دايما يا رب
Amert Alhozn

quiet_storm said...

خلصوا كل الكلام اللى ممكن يتقال
انا هدعيلك بقى وخلاص
:):):)


فى انتظارك الثلاثاء القادم ان شاء الله مع بوست جديد يكون جميل ورائع شكل القصيده دى
ويارب دائما فى تقدم...سلمت

Anonymous said...

السلام عليكم ورحمه الله وبركاته
اسفه انى بتاخر دايما على التعليق بس النت بجد هو اللى بيفصل على العموم هاصدعك واعلقلك مره واحده
اولا كل انسان ناجح ساب علامه واثر مابين الناس اكيد هيكون له اعداء يهاجموا نجاحه ولو هو مش ناجح ومش ماثر فينا بجد مكنش حد هيفتكره حتى
وبعدين الحمد لله انك عدت لنفسك تانى لانك من وقت منشرت البوستات دى وانت مش ملك نفسك انت ملك كل الناس اللى بيحبوك وبينتظروك وبعدين تسيب رابطه الحب دى ازاى على العموم ربنا يوفقك وتستمر بامتاع نفسك قبل امتاعنا القصيده جميله جدا جدااااا ومعانيها جوانا لان اكيد كل حد فينا مر بجرح من حد عزيز عليه وكان نفسه يصرخ ويقول كل المعانى دى
استمر دايما من نجاح لنجاح واعرف ان اعظم حب الحب فى الله واحنا كلنا فى المدونه دى قاصدين فعلا حبكم فى الله
اسفه للتطويل
والسلام عليكم ورحمه الله وبركاته

Anonymous said...

السلام عليكم ورحمه الله وبركاته
اسفه انى بتاخر دايما على التعليق بس النت بجد هو اللى بيفصل على العموم هاصدعك واعلقلك مره واحده
اولا كل انسان ناجح ساب علامه واثر مابين الناس اكيد هيكون له اعداء يهاجموا نجاحه ولو هو مش ناجح ومش ماثر فينا بجد مكنش حد هيفتكره حتى
وبعدين الحمد لله انك عدت لنفسك تانى لانك من وقت منشرت البوستات دى وانت مش ملك نفسك انت ملك كل الناس اللى بيحبوك وبينتظروك وبعدين تسيب رابطه الحب دى ازاى على العموم ربنا يوفقك وتستمر بامتاع نفسك قبل امتاعنا القصيده جميله جدا جدااااا ومعانيها جوانا لان اكيد كل حد فينا مر بجرح من حد عزيز عليه وكان نفسه يصرخ ويقول كل المعانى دى
استمر دايما من نجاح لنجاح واعرف ان اعظم حب الحب فى الله واحنا كلنا فى المدونه دى قاصدين فعلا حبكم فى الله
اسفه للتطويل
والسلام عليكم ورحمه الله وبركاته

Anonymous said...

رررووووووووووعه جدا والله يا دكتور انا كان نفسى انك تنزل القصيدة دى وكنت متوقعه انها هتكون بالجمال ده فعلا قصيدة معبره جدا متجيش غير من شاعرنا الموهوب انا مش عرفه اقول حاجه لانى الناس اللى قبلى خلصوا كل الكلام عشان كده نفسى ارد مره الاول يلا بقى حظى كده ربنا يوفقك فى حياتك ومستقبلك وتحقق كل اللى نفسك فيه000000000000000000000 امضاء انسان

Anonymous said...

السلام عليكم
انا اول مرة ابعت تعليق
القصيدة دى جميلة بجد واحنا متعودين منك على كده ياما ناس كتـــــــــــير متفرقه

وهييجي يوم.. ويقـابلوا بعض

يمكن تكون نــــــارك وحيد

أهون من النـــار في اللـُـقــا

مش كل شئ يلــــــمع بعيد

دايما بيطــــــــــلع... لؤلؤه

دول اكتر جمل عجبتنى بس دة مايمنعش ان القصيدة كلها روعة
بحس دايما ان كلامك يعبر عنى بطرىقة مش طبيعية
الى الامام دايما وعاوزين جديد دايما

رحيل said...

رائع الاحساس بالقرب من الآخر ايا كانت صفته ..

رائع ان نكون مغلوبين افضل بكثير من ان نصبح معتدين ..

رائع ان يكون لدينا هن الحسّ الأكثر من مرهف حتى نعبّر عن مشاعرنا بهذه الطلاقه ..

الأروع وبلا منازع ان نخرج من تجربة الكره بالحب لانفسنا اولا وللمعتدي ثانيا وللعالم اجمع برغم قسوة التجربه...

رائــــــــــع ايها الشاعر المتمّكن..

هبهوبه said...

السلام عليكم
أنا حقيقي حاسه إن لساني عاجز عن الكلام لأن أي كلام هقوله هيكون أقل كتيييير من اللي تستهله قد إيه وأنا بقرأ القصيدة حسيت إنك إنسان جميل أوي قادر تعبر عن كل اللي جوانا وقادر تشد الجراح من قلوبنا ترميها بعيد وتحط مكانها الحب والتفاؤل حرام عليك يعني لو كنت مشيت وسبتنا كان مين هيحس بينا غيرك
بس ياريت تكون إنت أول حد أستفاد من القصيدة دي وتكون رميت كل جراحك وطلعت قلبك للبراح وأنا كمان هحاول أسمع كلامك وأكون أقوى وأتحمل أي جراح وأصمد وأكمل في الحياة
ربنا يوفقك ويكون دايماً معاك

أحمد سعيد بسيوني said...

بسم الله
الحقيقة قصيدة غاية في الروعة والجمال
واحسن ما فيها احساسها العالي

الجملة بقى اللي تنفع تكون من الحكم والامثال تتداول بين الناس هي

الماضي هو المعلم الذي علينا ان نتعلم درسه جيدا ونقبل يده...ثم ننساه الي الأبد

تسلم يا حودة
دمتم بخير

محمود ابوالعزم said...

طيور الجنه

كم سعدت كثيرا أن تكوني أول رد
وجزاك الله خيرا مثله

محمود ابوالعزم said...

pureblue

بتسعدني اوي زيارتك الدائمه
وكلامك المجامل والجميل دايما
وجميل اوي ان ده مبدأك في الحياة
ربنا يكيرمك ويوفقك دايما

محمود ابوالعزم said...

انو نيموس

كنت اتمنى اعرف اسمك ولو حتى
اسم مستعار

بس بجد بشكرك على ردك الجميل
ربنا يكرمك ويحفظك

محمود ابوالعزم said...

سمسمه

ربنا يكرمك يارب يا سماح
ويوفقك ويهديكي انتي كمان
ومتشكر اوي على ردك البوست اللي فات واللي قبله
خالص مودتي وتحياتي ايضا

محمود ابوالعزم said...

!!!!

يا نهار ابيض يا عم مصطفي
التصفيق لما ييجي منك يبقى حاجه كبيرة اوي عندي يا مصطفي

ربنا يخليك لي

محمود ابوالعزم said...

شق القمر

يسلم قلمك انتي اللي كتب الرد الجميل ده
ومش عارف ليه كنت متأكد ان الجملتين دلو هيعجبكوكي

اكيد حد جميل زيك هيحسهم اوي
دمتي بكل خير يا رنا

محمود ابوالعزم said...

little angle

ربنا يكرمك ياب يا هدي
وكلامك عن الجرح جميل اوي
يمكن يكون اجمل من القصيده كمان

دمتى بكل خير

محمود ابوالعزم said...

عندما تنهمر الدموع

طلبت منك قبل كده ماتعتذريش عن الاطاله
لان كلامك الجميل بيكون دايما اضافه للموضوع
انا شخصيا بستمتع جدا بقرائه تعلقيك اللي بيكون فيه كلام رائع دايما

محمود ابوالعزم said...

اميرة الحزن

لا أجد من الكلمات ما أستطيع به أن أرد على كلماتك
جزاكي الله كل خير

محمود ابوالعزم said...

كويت ستورم

القلبو عند بعضها
انا كمان هدعيلك ان شاء الله

وانا كمان هستني ردك التلات الجاي ان شاء الله

محمود ابوالعزم said...

همسات داعيه

ولا يهمك
روحك كانت هنا حتى وانتي غايبه
وان شاء الله المدونه تفضل رابطة الحي زي ما نتي قلتي
متشكر اوي على ردك الجميل
ولا داعي للاعتذار عن التطويل

محمود ابوالعزم said...

انسان

انا اللي بشكرك جدا على كلامك الجميل اللي مش هعرف ارد عليه ده
وان شاء الله قريب انا اللي هفرح لما اشوفك اول تعليق

محمود ابوالعزم said...

انونيموس

متشكر اوي
وفرحان أوي بأول تعليق ليكي
واتمنى مايكونشي الاخير
واتمنى انك تسيبي اسم ولو مستعار

محمود ابوالعزم said...

رحيل

ردك هو الرائع بجد
جزاك الله كل خير
ربنا يكرمك

محمود ابوالعزم said...

هبهوبه

ماتتخيليش كمية سعادتي بردك ده
وآسف اني مادريتشي على ردك في بوست آخر بوست

حسيت انه احسن رد اني ارجع للتدوين
جزاكي الله كل خير

محمود ابوالعزم said...

احمد سعيد

كلمتك دي كبيرة اوي عندي يا احمد
تسلم لي يا ابوحميد
بس فيت التمر
انت نسيت ولا ايه
؟؟؟؟؟؟؟؟؟؟؟؟؟

Anonymous said...

elrousha
السلام عليكم طبعا مش هقول لحضرتك ان القصيده جميلة لان كلمة جميلة قليلة عليها اوي بس كل اللي احب اقوله ان حضرتك بقصيدتك خليت الامل يرجع ليا ولاي حد انجرح لان ان احنا فعلا لازم نتعلم ان نكوك اقوياء ومانخليش دموعنا تنزل على حد مايستهلش لان اللي جرحنا مايستاهلش ان احنا نبكي عليه اونفتكره

محمود ابوالعزم said...

elrousha

تشكر اوي على كلامك الحلو ده
وفعلا اللي جرحنا مايستحقش مننا ولو دمعه واحده
واتمنى انك تفضلي تزوري المدونه كده علطول

Anonymous said...

انا مش عارفه اذا كانت دى تهيؤات ولا لا فاذا كنت ناديت على فوالله مااخدت بالى اسفه واذا كانت تهيؤات فانا اسفة برده

محمود ابوالعزم said...

انونيموس

؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟
انا مش فاهم حاجه

۩۝۩ Dr. Flavio ۩۝۩ said...

ازيك يا واد يا أبو العزم

عامل ايه

قصيده جميله جدا .. ولكن يا حوده
انا اشتقت اني اقرأ لك حاجه بالفصحى

أنا عارف انك مش هتكسفني وبعد الاربع قصايد دول هتنزل فصحى .. مش كده ولا ايه؟

يلا سلام يا صاحبي ودعواتك

عمر said...

أنا آسف جدا يا حودة إني اتأخرت في التعليق ، بس أنا قلت ألحق أعلق انهاردة قبل ماتنزل بوست جديد بكرة بإذن الله

فعلا يا محمود انت تحدثت في هذه القصيدة بلسان أي واحد انجرح من أي أحد ومن أي شيء ، ولكن

أنا حسيت وأنا بأقرأها بإحساس مختلف تماما متهيألي ما حديش حس بيه .. بصراحة أنا حسيت كأن ( غزة ) أو فلسطين عموما هي اللي بتتحدث وتحكي جراحها وتشكو ألمها ولكنها تمتلئ بالعزة والإباء والتخلي عن من تخلى عنها أو ضحى بها .. أو حتى باعها ، خصوصا في كلماتك

مجروح ولكـــــن مش هقول.........ان الجـــــراح هتـــــــــهزّني

و هداوي جـرحي ولو يطول.........وههدّه مــــــش هيــــــــهدّني

وسفينتي قادرة على الوصول....... لو ألـــــف ســـــــــد هيـنبني

يا قلبي رفرف في السما

إيـــاك جـــــناحك ينكسِر

ماحناش هنخـــــسر انما

كل اللي باعـنا أكيد خسِر

صدقا .. هذا ما شعرت به ، وآثرت أن أخبرك به ، وعارف إنك لم تقصد هذا المعنى ( عشان ما جيلكشي بعيش وحلاوة بعد كده ) ، وتحياتي لك على إبداعك وننتظر منك المزيد

Anonymous said...

هو فين البوست الجديد؟؟؟؟؟؟؟؟؟؟؟؟؟؟؟

محمود ابوالعزم said...

فرج

ربنا يخليك لي يا حوده
وانا زلت فصحي النهارده اهو
بس على أدي
مش عايزين نقد من التقيل
ها؟؟؟؟؟؟؟
أنت عارف انه مش ملعبي

محمود ابوالعزم said...

عمر

مش عارف اقوللك ايه
كنت هزعل اوي لما ماعلقتش المرادي
تعرف...بعد كلامك الجميل ده
انا حبيت القصيدة دي اوي
ربنا يكرمك ويجازيك كل خير يا عمر

محمود ابوالعزم said...

انونيموس

معلهشي اتاخرت بس البوست فوق اهو