كلمة أمل

Monday, June 9, 2008



يا خالقي

ماكــــــنت يوما يائساااااا

رغم الضنى..رغم الأسى

رغم الجـــــــراح الماضيهْ ْ

مادام نــــــــــــورك داخلي

مادام حـــــــــــــبك شاغلي

والنفــــــــــس نفسٌ راضيهْ

سيــــــظل قلـــــــبي باسماً

وتظـــــــــــل روحي دائماً

في درب حبّــــك ماضيهْ



يمكن يكون الاسبوع اللي قات ده من اصعب الأسابيع اللي أنا عشتها
شفت فيه مواقف كتير كانت صعبه جدا علي
كان آخرها امبارح بوفاة جوز عمتي
يس كنت مصمم آجي و اكتب النهارده
لاني محتاج جدا اني اتكلم
محتاج اقول لحد هنا وكفايه حزن
محتاج اعيش اليومين دول وفرح اختي اكتر حد بعزه واكتر حد قريب مني بعد امي وابويا وانا بكامل قوايا النفسية
محتاج ابعت كلمة امل لنفسي قبل أي حد
و أبعتها لكل ولأي حد


كتير بتمر علينا لحظات صعبة
لحظة بتحس فيها ان الدينا هتقف
لحظة تبقى خايف من الحظة اللي بعدها لانك مش عارف الللحظة الي بعدها هتبقى زيها ولا اوحش منها
لحظة يعصرك فيها ندمك على اللحظة اللي قبلها
ويعصرك خزنك في اللحظة الللي عشتها
ويقتلك خوفك من اللحظة اللي بعدها
يمكن تكون في اللحظة دي معذور لما تفقد ثقتك بنفسك
بس مش هتبقى معذور أبدا لو فقدت ثقتك في ربنا

لو أن حياتنا تقف عند كل جرح لما عشت أنا حتى أكتب هذه الجملة وماعشت أنت حتى تقرأها

كلمة امل لكل الناس
ماحدش عارف الخير فين
ماحدش عارف الحد اللي اتخلى عنك وسابك لو فضل في حياتك كان هيعمل فيها ايه
وماحدش يعرف الحاجه اللي ضاعت منك لو كانت فضلت معاك كانت هتبقى نعمة ولا نقمة
ويمكن يكون الحد اللي سابنا حد كويس ويمكن يبان لنا ان احنا مش هنقدر نعوضه بس ما دام ربنا اختار ان احنا نفترق دلوقتي يبقى اكيد الفراق ده كان فيه خير لينا وللحد ده

قد نفترق لا لعيبٍ فينا ولا لخطأ ٍ منا ولكنها إرادة القدر التي علينا أن نرضي بها ونسلم بحكمتها فقد نكون
كالخطوط المتوازية التي سارت وسوف تسير الى جوار بعضها الي الأبد ولكنها أبداً لن تلتقي

أما لو كان الحد ده حد قريب مننا بجد زي ايويا الله يرحمه بالنسبالي فأكيد ان الحد ده هيفضل جوانا
وهتفضل ذكراه هي اجمل شئ في حياتنا حتى لو كانت الذكري بتالمنا لانه مابقاش معانا
بس هتفضل الذكري هي اجمل شئ ممكن أي حد يسبهولنا...وخصوصا لما يبقى حد غالي علينا اوي

الذكري... هي الشئ الذي كلما ابتعدنا عنه اقترب منا أكثر
الذكري ..بقايا من الحنين في حنايا الروح وبقايا من الروح في ثنايا الحينين
الذكري...لقاء ٌ لن تمنعنا كل الحواجز عن الحضور في موعده....حتى ولو كان ذاك اللقاء في الماضي
الذكري..طريقٌ قطعناه حتي النهاية فاكتشفنا أن أمتع ما فيه كان خطواته الأولى
الذكرى...شجرة ٌ استطاعت أن تحتفظ بخضارها بعد أن استسلمت كل أشجاره لتيار الخريف
الذكري...هي الوجع الممتع...الذكري...هي الألم الجميل


في يوم كنت في السنطة ومتأخر جدا على الرواند
و كنا الصبح بدري أوي والعربيه بتاخد وقت على ماتحمل
وحاجه حصلت عطلتني عن عربيه كان فاضلها واحد وتمشي
واستنينت العربيه اللي بعدها وقعدت تحمل كتيييير اوي
وانا قاعد الوم في نفسي..ماكنتش خرجت بدري شويه..ماكنتش مشيت بسرعة شويه ولحقت العربيه الللي قبل دي
ومشيت العربيه اللي انا فيها لاقينا العربيه الاولانية عاملة حادثه في الطريق
ياااااااااااااااااه....بقى ربنا كان رحيم بي اوي كده وانا بتبتر على نعمته؟؟؟

مش هنقول بلاش تزعل على شئ راح مننا
بس على الاقل نبقى معترفين من جوانا بحكمة ربنا في كده
و يبقى فضل كبير اوي من ربنا لو عرفنا ان أي شئ يضيع مننا من متاع الدنا دي..فاكيد ربنا شايل لنا حاجة احسن ...ولو حتى الحاجه دي ماكانتشي في الدنيا
فاكيد ربنا هيعوضلها بكرمه وفضله في الآخرة

ما أوسع تلك الدنيا اذا عشت بداخلها ..وما أضيقها إذا عاشت بداخلك

حب حياتك من غير ماتحب دنيتك
يمكن تكون معادله ضعبة
بس تقدر تحققها

حب الدنيا هو أن تعيش لكي تعيش.. أما حب الحياة فهو أن تعيش كما تريد أن تعيش

كلمة أمل لكل حد حلمه ضاع وفضل بقية عمري بيكي عليه
الحلم اللي يهزمك يبقى مش حلم

الحلم يد ٌ تأخد بأيدينا نحو النور.... سواء حققناه أم لم نحققه
احنا مانعرفشي الخير فين
احنا دايما باصين تحت رجلينا
دايما بنلوم القدر

لا تلوم القدر إذا أضاع حلمك..فإن كان حلمك هو ما اخترته لنفسك...فان القدر
هو ما اختاره الله لك...فكيف لقلوبنا الجاهله أن تلوم الله على ما اختاره لنا؟


كلمة أمل لكل حد حزين
انت تقدر ماتبقاش حزين بثقتك في ربنا وقربك منه
سيدنا موسى كان البحر أدامه وفرعون من وراه و وبكل ثقة قال جملة المفروض تبقى شعارنا كلنا في الدنيا دي.....كلا إن ّ معي ربي سهيدين
احنا كمان لازم يكون عندنا الثقة دي في الله
ومهما كان الموقف اللي احنا فيه صعب فمافيش حاجه صعبة ولا مستحيلة على ربنا

في قوانين البشر – ممكن..صعب...مستحيل.- اما في قانون الله فلن تجد غير كن فيكون

احنا نقدر نبقى أقوى من أي جرح ومن أي حزن
لو احنا عايزين نكون كده فعلا

انك لا تستطيع أن تمنع الحزن أن يكون صيادا ًولكنك تستطيع ألا تكون الفريسة


كلمة أمل لكل الاطفال اللي قابلتهم في رواند الاطفال

ما اظنش ان ماحدش معانا في سنه خامسه ما اتأثرشي بالرواند ده

واظن انه لو كان جبل كان هيتاثر

قد يعجز الطبيب أن يعطي لمرضاه علاجا ناجحا ولكنه لن يعجز أن يعطي لهم أملا في حياة ً كريمة حتى النهاية

نفسي أقولهم ان اللي هما فيه ده اختبار وابتلاء من ربنا

يمكن ربنا عايز يختبر بيهم آبائهم ويكفر بالمرض ده عن ماضيهم

او يمكن بيكفر ذنوب المستقبل بتاع الأطفال دول

أكيد ربنا ليه حكمه في كده


حتى لو احنا عجزنا عن ان اننا نشوف الحكمة دي لازم نسلم بوجودها

سيدنا موسى رغم كل علمه ماقدرشي يعرف الحكمة اللي ربنا وضعها في افعال سيدنا الخضر

ويمكن تكون الجكمه دي لينا احنا
اللي معانا الصحة ومش حاسين بنعمة ربنا علينا
كلمة أمل على لسانهم
يمكن يبقى صعب عليهم يفهموها
بس اكيد حسوها في الايدين الممدوه ليهم والقلوب اللي بتحلم ليهم والعيون اللي كلها أمل في شفاهم
ماقيمة الدنيا اذا قلبي غـــــدا... يحيا بها صفراً على أقصى الشمالْ
لا بل سأحيا زهرة ً بين الندا....مهما يكون الحُــــلم قد أمسي محالْ

كلمة أمل يارب تصحي ذرة أمل في كل قلب نسي الأمل


لأنـّها الحياة
ياقلب مالك قد بخــــلت َ ببــسمتي.........وأراك وقت الدمــــــع يا قلبي تجودْ
لا شئ في الدنيا يســــــاوي دمعة ً........قد صاغها طول الاسى فوق الخدودْ
دع ما مضى...ما راح راح وربما........يوما ً من الأيــــــام ثانـــية ً يعــــودْ
حر ٌ أنا وتـــركت حــزني قادني!!...... عجبا ً لنا والقائد الاعــــــــــمي يقود
ان كان في الازهار شوكا ً جارحا .......فلما تراهُ ولا تــــــري عطر الورودْ
من كان يســـــكن فيه قلب ٌ أسود ٌ.......فعيونه ُ دومـــــــــا ً ترى الايام سودْ
و إذا صفي صَفـَت الحياة ُ جميعها.......و كأنها لـــــحـن ٌعلى أوتـــــار عود
يا درة ً رغم الجــــــــــمال وحيدة ً...... تحلو اللآلئ حين تــُـنظم ُ في العقود
لولا شرود الظـــــــبي ُ عن خلانه........ماكانت اغـــــتالته أنــيـــاب الاسود
لا تطلب التخــــــــليد في دنيا الفنا........بل عـِشْ لتـفـنـى..إنّ ذاك هو الخلود
الفرح داخلنا يعــــــيش مع الاسي........الفــرق – كل الفرق- أيّهــــما يسود
لا للدموع وألـــف لا...ملــــــيار لا...... لا للحـــواجز والفواصـــل والحدود
وعد ٌ سأحيا يا فـــــــــؤادي باسماً....... وعد ٌ ولن أرضي بتغيير الوعــــود
عهد ٌ سأقتل دمعتي ومـــــرارتي....... إنّ الفؤاد الحــــــر لا ينسى العـــهود
و اذا أتى حزني لفـــــرحي غازيا ً...... ووجدت كلاً ً منهـــــما حشد الحشود
لا ترفع الرايات فـــوق مــدينتي...... واجعل حصون الحب عن روحي تزود
لن يستطيع الحزن حــــكم قضيتي ......مادام حلــــمي وابتســـــاماتي شهود
وإذا غدا كل الوجـــــود مُعــــادياً....... يكفيك أنـّــــك في حمى رب الوجود


16 comments:

Anonymous said...

بسم الله

مش عارفه بجد اقول لحضرتك ايه

ولا عارفه اختار جمله ولا بيت من الكلام الفوق الرائع

ربنا يكرمك بموهبتك

والله كلنا بنتعرض لمواقف في حياتنا زى الزفت

المهم الثقه في الله انه هيخرجنا منها
المهم ان احنا نبقي متيقنين من تمام الحكمه في اي شىء بيحصل لنا

وانا بلوم نفسي اشد اللوم لما بتحصلي حاجه وحشه وازعل فيها حتى ولو لثانيه

الحمد لله دايما بحط ادامى
اللهم انا نرضي بقضاؤك ايمانا منا بحكمتك

ه لاتبكى نفسي علي شىء قد ذهب ونفسي التي تملك كل شىء ذاهبه

بجد كلامك المحترم ده اللي مليان امل بحس ان ربنا بيبعته لاي حد بيسطر عليه شعور وحش او ندم او حزن

وصدقنى اى وقت بضيعه في كتابه الكلام ده مش بيضيع هباء وثوابه كبير عند ربنا

بالتوفيق في الامتحانات

والف مبروك لحنان وربنا يتمم لها علي خير

جزالك الله كل الخير

pure blue

semsema said...

وإذا غدا كل الوجـــــود مُعــــادياً....... يكفيك أنـّــــك في حمى رب الوجود
ياااااااه يامحمود
أد إيه البوست ده جاي في وقته
مهما قلتلك ووصفت مش هقدر أوصلك أد إيه كنت محتاجه الكلام ده
بجد فوق ما تتخيل
جزاك الله خيراً يامحمود

ياصاحب الهم إن الهم منفرجُ
أبشر بخيرٍِ فإن الفارج الله

كل الكلام اللي في البوست أكتر من رائع
لإني فعلا حاسة بقيمة كل كلمة فيه
نفعك الله بهذه الكلمات كما أزلت بعضاً من مسحات الحزن علي جبيني بها
تحياتي وألف مليون مبروك لدكتورة حنان صح كده؟

Anonymous said...

السلام عليكم ورحمه الله وبركاته
الف مبروك لاختك يادكتور محمود ربنا يفرحها ويفرحكو بيها
مش هعرف اقولك انبسطت قد ايه لما لقيتك حطيت بوست جديد وانبسطت اكتر لما قريته

مادام نــــــــــــورك داخلي

مادام حـــــــــــــبك شاغلي

والنفــــــــــس نفسٌ راضيهْ

سيــــــظل قلـــــــبي باسماً

وتظـــــــــــل روحي دائماً

في درب حبّــــك ماضيهْ

فعلا هو ده اللي احنا محتاجينه عشان نعرف نكمل ونعرف نعيش حياتنا ونواجه المواقف الصعبه اللي بتسيب في الواحد
اثر صعب يروح غير لما يكون ده مبدانا

لا تلوم القدر إذا أضاع حلمك..فإن كان حلمك هو ما اخترته لنفسك...فان القدر
هو ما اختاره الله لك...فكيف لقلوبنا الجاهله أن تلوم الله على ما اختاره لنا؟

فعلا الواحد بيتصرف بجهل لو حطينا الكلمه دي في دماغنا مش هنتعب ابدا

في الاخر انا اسفه اوووي اني طولت عليك بس كلامك خلاني اقف وافكر مع نفسي والرد ده ردي علي نفسي
بس حبيت اقوله معاكو علي المدونه
انا اسفه تاني علي التطويل
ربنا يوفقك في امتحاناتك ان شاء الله ويجازيك كل خير عننا

عمر said...

أخي الحبيب محمود
أدام الله عليك السعادة والسرور ، وأبعد عنك لحظات الهم والحزن

فعلا الابتلاءات لاتأتي فرادى أنا كنت قابلتك مع أول حزن وكنت رايح لتاني حزن وقضاء الله وقدره قد سبق ، ولا نملك إلا الرضا والتسليم لله بذلك

ألف ألف مبروك يامحمود ليك ولأختك وبأقول لأختك وزوجها كما علمنا صلى الله عليه وسلم : بارك الله لكما وبارك عليكما وجمع بينكما في خير ، وعقبالك كده قريب إن شاء الله

ده تعليقي على المحتوى ، لكن تعليقي على الأسلوب .. فبصراحة أنا حاسس إني بقرأ لواحد من شعراء زمان أو حكماء العرب قديما وكما قلت لك وأقول لك دوما أحبك في الفصحى أكثر وأعتقد أنك تبدع فيها أكثر ، فأكرمك الله وأعانك على تنمية موهبتك

في الختام .. أعانك الله في امتحان الأطفال وحاول ما تشغلشي نفسك إلا يوم الفرح بس وبعد كده ركز في الأطفال ربنا يكرمك ويعينك ويجعل ما مررت به آخر الأحزان
تحياتي

Anonymous said...

السلام عليكم ازيك يا دكتور محمود اولا الف مليون مبروك للدكتوره حنان ربنا يسعدها ان شاء الله ويديم عليها وعليكوا الفرح دايما يارب وعقبال حضرتك ان شاء الله.
انا قلت لحضرتك قبل كده ان انا دايما نفسي اقول الكومنت بتاعي لحضرتك بس بحس ان انا بقدر اعبر اكتر وانا بكتبه لحضرتك هنا علي رابطه الحب بس الموضوع طلع اصعب من ما كنت متخيله لاني لما تحس انك مهما قلت من كلام عمرك ما هتكفي قيمه الكلام اللي قدامك ولا صاحب هذا الكلام اوبمعني اصح صاحب هذه الدرر واللالئ بجد دي حقيقه مش مجامله لانك بجد شاعر عظيم جدا جدا .
كلمه امل ياااه ما اجمله من عنوان لبوست كنا مستنينه فعلا بس برضه انا قلت لحضرتك ان كلامك بيبكيني كتير اوي اوي مع اني بقرألمعظم الناس علي المدونات التانيه بس بحس ان حضرتك بتكتب باحساسنا احنا بحس ان اللي بنقوله جوانا ومش عارفين نخرجه حضرتك بترجمه لينا وتسعدنا بيه جدا.
والبوست ده شمل كل حاجه انا قرأته تقريبا 5 مرات لانه حلو اوي في كل مره كنت بقرأه بشكل مختلف بس بجد حضرتك شاعر عظيم وهيكون لك شأن كبير اوي زي ما قال الدكتور فتحي عرفان قبل كده لو حضرتك فاكر واحنا كلنا متنبئينلك بكده ان شاء الله
اما بقي كلام القصيده ربنا يديم عليك موهبتك بجد انا عجبتني جدا انت بدأتها ونهيتها باروع بيتين انا قراتهم في حياتي
ياقلب مالك قد بخــــلت َ ببــسمتي.........وأراك وقت الدمــــــع يا قلبي تجودْ
وإذا غدا كل الوجـــــود مُعــــادياً....... يكفيك أنـّــــك في حمى رب الوجود
والله بجد كل كلام الشكر والثناء والمدح اللي في الدنيا كلهم فعلا مش هيقدروا يبقوا قد اي كلمه مما كتبت .
معلش انا طولت علي حضرتك وبرضه حاسه اني كلامي قليل بس هو مش بكتر الكلام المهم الاحساس اللي بنحسه لما بنقرالك كل ثلاثاء ربنا يكرمك ويحفظك ويعينك في امتحان الاطفال ان شاء الله يا دكتور محمود.ومبروك مره تانيه لاخت حضرتك
Amert Alhozn

أحمد سعيد بسيوني said...

بسم الله

الف الف مبروك يا حودة
وعقبال فرحك كده وتكون ساعتها في الكوشة زي الاسد وكلنا حواليييك فرحانيييييييين

ملاحظة : جميل جدا كتاب الدكتور عائض القرني كتاب " لا تحزن "... استفدت انا منه جامد

تحياتي

Anonymous said...

انا جايه النهارده مخصوص عشان اقول الف مبروك للدكتوره انا والله لسه اخوى معرفنى الخبر السعيد ده امبارح فقولت لازم ادخل المدونة واهنى اما بالنسبه للموضوع الجديد اللى انت كتبه انا ان شاء الله هاقراه بعد الامتحانات والف مبروك مره تانيه-------امضاء انسان

۩۝۩ Dr. Flavio ۩۝۩ said...

أولا .. عظم الله لك الأجر في وفاة زوج عمتك

وألهم الأسره الصبر والسلوان

ثانيا ... جميل قوي البوست وجاي في وقته فعلا يا حوده

كلامك كله جمييييل جدا وعجبني قوي البيتين بتوع صفر على الشمال .. فصحى متداوله ولذيذه

والقصيده الأخيره جميله جدا ولكن يا حبي ..اسم كان دايما مرفوع ... هو اتنصب عليه امتى؟؟

ان كان في الازهار شوكا ًجارحا...فلما تراهُ ولا تــــــري عطر الورودْ

شكل فرح أختك واخد عقلك خالص .. عموما نلتقى يومها بقه وادعي لنا بقه يارب نزاكر

سلام يا حبي

Anonymous said...

elrousha
السلام عليكم يا دكتور محمود
اولا احب اقول لحضرتك البقاء لله وفي نفس الوقت احب اقول لحضرتك الف مبروك لاختك ويارب تبقى سعيدة في حياتها وحضرتك تبقى علطول كده متفائل وسعيد في حياتك وتقدم لنا دايما طوق النجاة اللي بينقذنا من احزاننا ويدينا
الامل عشان نكمل حياتنا.
بجد فعلا عايزة اشكرك جدا لانك رجعت ليا الامل تاني وخليتنا احس ان ما فيش اي حاجة في الدنيا تتستاهل نبكي عليها او نندم عليها لان ربنا اكيد خدهامننا عشان ينفعنا مش يضرنا.

Anonymous said...

قد نفترق لا لعيبٍ فينا ولا لخطأ ٍ منا ولكنها إرادة القدر التي علينا أن نرضي بها ونسلم بحكمتها فقد نكون
كالخطوط المتوازية التي سارت وسوف تسير الى جوار بعضها الي الأبد ولكنها أبداً لن تلتقي


الحلم يد ٌ تأخد بأيدينا نحو النور.... سواء حققناه أم لم نحققه
احنا مانعرفشي الخير فين
احنا دايما باصين تحت رجلينا
دايما بنلوم القدر
مش هنقول بلاش تزعل على شئ راح مننا
بس على الاقل نبقى معترفين من جوانا بحكمة ربنا في كده

ربنا يكرمك يامحمود
LoneQueen

عندما تنهمر الدموع said...

السلام عليكم ورحمة الله وبركاته
انا بصراحة مش عارفة اقول لحضرتك البقاء لله وعظم الله اجرك ويارب تكون اخر الاحزان ان شاء الله ولا اهني وابارك لأخت حضرتك على فرحها يمكن يكون الغلط مني لأن التهنية جت متأخر بس اعذرني والله ده كان بسبب الامتحانات بس الكلمة الوحيدة اللي هتنفع في الحالة دي هي الحمد لله على كل شئ على الفرح وعلى الحزن على السعادة وعلى الالم اد ايه الكلمة دي بتريح وكما قال الله تعالى *ولما استحكمت حلقاتها فرجت*
انا قصدت اني اوصل لحضرتك رسالة مهمة من الاية الكريمة وهي ان اي حاجة بتحصلنا ربنا مقدرها لنا ومكتوبة لنا من قبل حتى ما نتولد وتتفتح عنينا على الدنيا عشان كده احنا من حقنا نزعل على حد عزيز علينا فارقنا وسابنا او على اي حاجة ضاعت مننا او حاجة كان نفسنا نعملها ومحصلتش لكن اللي مش من حقنا ابدا اننا ننكر حكمة ربنا وراء اي حاجة حصلت او نتخيل في يوم ان ربنا هيؤذينا بدون اي ذنب اقترفناه اذا كان ربنا رحمته وسعت كل شئ وبيسامحنا بمجرد ان نعود اليه ولايخذلنا اذا ما رجوناه فاحنا لازم نؤمن بقدره ومنشكش ابدا في حكمته لأن ربنا قال ان مش كل حاجة عقولنا تقدر تستوعبها خلاصة الكلام
*وعسى ان تكرهوا شيئا وهو خير لكم *
اما القصيدة فبجد اي كلمة اعجاب مش هتقدر توصفها او توفيها حقها دي مش مجاملة وياريت حضرتك متعتبرهاش كده وحاول تقراها كأنك مش انت اللي كتبها عشان متحسش ان اعجابك بيها ده غرور منك او تباهي او تقراها بعيد عن كونك محمود سليمان هتلاقي انها بينت ان ااحياة اللي احنا عيشينها مش دايمة لنا لكن اللي هيدوم هو ايماننا ده الحاجة الوحيدة اللي هتصبرنا عليها وعلى مصائبها وان كلما كنت قريبا من المولى_عز وجل_كلما هانت وحقرت في نظرك مشاكلك وهمومك لأن ساعتها هيكون كل همك هو الاستعداد للأخرة ورؤية وجه رب كريم
يمكن نكون كلنا بنخاف من الموت اللي هو حقيقة واقعة كلنا هنشوفها حتى لو حاولنا نهرب منها لانها قدر محدش بيهرب من قدره لكن اكيد خوفنا ده مش لأننا باقيين على الدنيا بس اكيد لأننا خايفين او مش عايزيين نبعد عن اهلنا واحبائنا لأن البعاد ده مش ممكن نستحمله لكن اكيد هيفضلوا وهنفضل عايشين جواهم والذكرى الحلوة دايما هتفكرنا بيهم واكيد هنفضل دايما عايشين وبنحلم باليوم اللي هنجتمع بيهم عند رب كريم
في النهاية احب ادعي بالرحمة للمسلمين جميعا احياءا واموات وارجو من الله تعالى ان يرزقنا الصبر وينير قلوبنا بنور الايمان
معلش نسيت اقول اد ايه انا فرحت واكيد كلنا فرحنا لما لقينا حضرتك لما كنت متضايق كتبت ومكتمتش حزنك جواك لكن خليتنا كلنا نشاركك فيه ونحاول نخفف عنك واكيد ده رد مناسب على الاخ او الاخت صاحب الكومنت في البوست اللي فات بيدل على اننا كلنا هنا اخوة لم تشأ الظروف ان تجمعهم معا وجها لوجه فجمعت بين افكارهم واذواقهم
ربنا يوفقك ويكلل جهودك دايما بالنجاح والدعوة دي عامة لكل الناس اللي بتبذل مجهود في سبيل تحقيق هدفها وزي ما بيقولوا الحي ابقى من الميت عشان كده ياريت حضرتك تحاول تركز في الامتحانات وربنا معاك

هبهوبه said...

دع ما مضى ماراح راح وربمايومامن الأيــــــام ثانـــية يعــــود
حرٌأناوتـــركت حــزني قادني عجباً لناوالقائدالاعمي يقود
ان كان في الازهار شوكا جارحافلما تراهُ ولا تــــــري عطرالورود
حقيقي بيمس كل أوتار المشاعر فعلاً إحنا دايماً بنفكر في الشوك وبننسى جمال الوردة حتى لما بنفرح بنبكي يمكن علشان الدموع بتغسل العين والقلب
إحنا ولله الحمدالإيمان بقضاءالله وقدره موجودجوانالكن الفراق بيكون صعب ومهما كان إستحاله نقدر نعيش من غير بكاءدي مشاعر يا محمودوالمشاعردايما بتتحرك مع الدموع أسرع من الإبتسامة
رسالتك المرة دي صعبة أوي تحقيقها بس لازم نحاول علشان إحنا فعلاً محتاجين نتفاءل بس لو قرأت الصحف اليومية وسمعت النشرة وشفت طلاب الثانوية العامة وحاجات تانية كتير هتعرف إن التفاؤل بقى صعب أوي
خلينا نقول لكل اللي يقرأ البوست إن يأخد على نفسه وعد إنه يرضى باللي مكتوب له وكلمة الحمدلله وقدر الله وماشاء فعل لاتفارق لسانه أبداً بس مش هقدر أخد وعد من حد إنه يمنع دموعه لأني أنا شخصياً مش هقدر أعمل ده
اللهم أجعل أنفسنا راضية
وأرزقنا التفاؤل دائماً
ربنا يجازيك خير ويوفقك في الإمتحان ومرة تانيةألف مبروك لحنون
وعقبالك .

رحيل said...

اصدقك القول حرفا وجملة يا دكتور محمود لكن لا نستطيع ان ننكر ابدا ان للحزن للوقفات ...

للحزن وقفات ...

عندما نختلف مع الآخرين قد نحزن ...

حين يضيع أحد احلامنا ... نحزن ..

حين نودّع عزيز ... نحزن ...

حين تختلّ القيم ... نحزن ..

عندما نضلّ الطريق ... نحزن ...

عندما نمرض .. نحزن ...

حين تنصهر وجوهنا داخل مرايا الآخرين .... نحزن ..


http://leave-of-roses-or-the-roses-leave.blogspot.com/

لكن مع كل هذا الحزن اقول :

ساصبر حتى يعجز الصبر عن صبري واصبر حتى ينظر الله في امري واصبر حتى يعلم الصبر اني صبرت على شيء امرّ من صبري...

ملحوظه: البقاء لله في زوج عمتك ...

إسلام هجرس said...

الله ينور يا محمود
بحب فيك روحك العالية دايما مهما كانت الظروف
ربنا يبارك لك

semsema said...

ما شاء الله يامحمود حلوة أوي الهيد الجديد بتاع البلوج
جميلة اوي
هفضل دايما جوه الميه
أنا مش عاوز أموت عالشط
تبارك الله
ومتنساش توصل السلام الخصوصي
تحياتي

عندما تنهمر الدموع said...

السلام عليكم ورحمة الله وبركاته
انا اسفة جدا بس مش هاخد من وقت حضرتك كتير بس كنت حابة اقول ان الشكل الجديد اللي بيظهر في بداية المدونة جميل جدا وخصوصا الابيات اللي فيه لانها بتحمل فيها عبير الامل وضياء القلوب المؤمنةالتي ترغب في التحرر من قيود الحزن والالم