انت....بتقدر تسامح؟؟؟؟؟

Thursday, June 19, 2008

السلام عليكم ورحمة الله

ازيكم يا جماعه

يارب يكون الجميع بخير

وماتكونشي الامتحانات بدأت تعمل عمايلها

الفرح عدي على خير الحمد لله

أنا دايماً بشوف الفرح مش طبل ورقص وأكل وكده

الفرح انك تحس ان كل اللي حواليك فرحانينلك بجد

وهي دي أكتر حاجه أسعدتني في الفرح ده

الفرحه اللي شفتها في عيون زمايلي وقرايبي

وزمايلي اللي عمر ماهنسى وقفتهم معايا

والناس اللي سابت امتحانتها وجت

والناس اللي نقطتني ورفعوا راسي أدام أهلي

ماعدا بتوع المحله.....بالعند في فرج..اللي كان منور الفرح يعني

لا بجد انا بشكرهم كلهم

وبـتأسف لكل حد غصب عنب في وسط الزحمة اللي أنا كنت فيها غصب عني نسيت أدعيه

وكنت ناوي أنزل صورة لي من الفرح

بس قلت بلاش

أنا من أول ما عملت المدونه وانا قلت بلاش موضوع الصور

عشان ما أخسرشي الناس اللي بتحبني

أصل أنا بطلع وحش في الصور

"قال يعني الواد حلو في غير الصور"

دا مصطفي علام اللي هيقول كده

عقبالكوا كلكم يا جماعه

بس تبقوا تدعونا هنا على المدونه واحنا كلنا نيجي ان شاء الله


البوست بتاع النهارده أنا فشلت اني أكتبه

مش عشان الوقت بس لاقيت نفسي مش هقدر أكتبه لانه صعب جدا

واحد من أعز أصدقائي طلب مني اني أكتب عن التسامح

بس ماقدرتش

يمكن عشان انا رأيي في الموضوع ده هيكون عكس ما ناس كتير متوقعه

هو سألهالي واضحه وصريحه

لو حد جرجك جرح جامد أوي وخصوصا لما تكون بتحبه أوي

وبعدتوا بعدها وبعدين رجع هو بيطلب منك تسامحه وترجعوا زي زمان

هتسامحه وترجعوا زي زمان
؟؟؟؟؟؟؟؟؟؟؟؟؟؟

انا اجابتي برضو كانت واضحه وصريحه

أسماحه آه

نرجع زي زمان لأ

هو كان رد قاسي شوية

بس ده من كتر التجارب اللي عشتها واللي سمعتها في الموضوع ده

فيه أنواع من الجروح كده بتلتئم آه بس بتسيب أثر على جلدك

يعني مابتزفشي بس دايما بتفكرك باللي جرحك

هو ده الي كنت أقصده

انك ممكن تسامحه....انما ترجعوا زي زمان لا

عشان هيفضل الجرح ده سايب حساسيه ما بينكم مهما حاولتوا تنسوه

أنا مثلا حكيت حاجه لواحد من أعز أصحابي

وبعدين هو حكاها لناس تانيه

زعلت منه شويه....وبعدبن سامحته واتصالحنا

بس غصب عنب لحد دلوقتي مابقيتشي بقدر أحكيله ولا أفضفض معاه زي زمان

غصب عني مع اني واثق فيه تمام الثقه

أنا كمان جرحت حد بدون ما أقصد

وزعل مني واتاسفتله كتير لحد ما اتصالحنا

بس غصب عننا ماقدرناش نرجع زي الاول

عارفين لما قميصك اللي مدفيك ينقطع

وبعدين تجيب حته قماشة من قميص تاني وتكملها بيه

القميص هيرجع يدفيك انما مش هيرجع زي الاول

هيفضل شكل الحته الغريبه دي يفكرك ان القميص اتقطع

هو ده رايي اللي انا حاسس انه صعب شويه

عشان كده أنا سايب البوست ليكم انتو اللي تكتبوه

وتقولوا رأيكم وكلنا نسمعه

يمكن كلنا نوصل للرأي الصح

ماشي؟؟؟؟؟؟؟؟

أنا في النهايه بس حابب أهدي أربع أبيات كانوا مكتوبين في أول المدونة

حابب اهديهم لكل أصحابي وكل الناس اللي على المدونه هنا

ياما ناس بتكون قرايبك.....عمرهم مايشيلوا همك
ياما اكتر حد ظالمك.........يبقي خالك ولا عمك
ياما فيه انسان غريب.....تلقى حضنه بسرعه ضمّك
و أما يبقى ما بيكوا عشرة......يبقى من لحمك ودم

دعواتكوا يا جماعه أصل أنا مزنوق في المذاكرة زنقة الحرامي اللي اتمسك في المولد

ربنا يوفق الجميع

24 comments:

عندما تنهمر الدموع said...

السلام عليكم ورحمة الله وبركاته
من حسن حظي النهارده اني اول كومنت اولا الف مبروك مرة تانية لأخت حضرتك وثانيا بالنسبة للبوست فأنا رأيي انه حتى لو مكنش قصيدة اوقصة فهو فعلا رائع لأنه وصلنا الرسالة او المعنى اللي كانت القصيدة هتوصله لأن القصيدة جمالها بيكون في قدرتها انها توصل لقلوب الناس بسرعة وتأثر فيهم لكن كلام حضرتك دايما بيأثر فينا
اما رأيي في التسامح فأنا شايفة ان اجمل حاجة في الدنيا انك تسامح انك تحس ان انت قادر تعاقب حد بس طيبة قلبك بتخليك بسرعة تسامحه والاجمل من كده انك تنام وتعيش وضميرك مستريح لانك مظلمتش حد ولا عاتبت حد على غلط عمله وندم عليه وزي ما بيقولوا يا بخت من نام مظلوم ولا نامش ظالم
يمكن يكون الاحساس بالظلم احساس صعب مؤلم واكيد هتتخيل في عز لحظة غضبك انك عمرك ما هتسامح الحد ده على اللي عمله فيك لكن لما تهدى وتستغفر ربنا وتستعيذ من الشيطان هتلاقي ان الزعل مش هيفيد لكن هيضر لانك مثلا لو شفت اللي زعلك مرة هتهرب منه وهتبقى خايف انك تواجهه او تجي عينك في عينه عشان خايف تضعف تاني ادامه وتسامحه بقلبك لكن عقلك رافضه وهتفضل طول عمرك عايش في عذاب وقلق وخوف من انك تكون ظلمته لما رفضت تسامحه عشان كده الزعل عمره ما هيفيد لكن بالتسامح والنفس الصافية هتعيش سعيد مرتاح اما بالنسبة بقى لكونك هتقدر تاني ترجع تعامله زي الاول فانا من رأيي ان ده بيتوقف على الشخص اللي زعلك على مدى قربه من قلبك على مدى احتياجك ليه وتعلقك بيه وكمان بيرجع لطبيعة الجرح او الالم اللي سببه يعني لو حاجة بسيطة اكيد مع الوقت هتتنسي لكن لو كان الجرح كبير بيقى صعب تضميطه وبتفضل ناره تحرق في القلب وهيبقى صعب عليك انك تآمن تاني لشخص خدعك او سابك في عز محنتك وتخلى عنك لأن اللي انكسر عمله مابيتصلح وهتفضل الجرح ده ذكرى تعيسة من بين ذكرياتك مهما حاولت تنساها مش هتقدر لكن اكيد كل ما تفتكرها هتفتكر الدرس اللي علمتهولك واللي عمرك ما هتنساه
ده كان رأيي وده المبدأ اللي بتعامل بيه محبش ازعل حد مني اللي يزعلني بسامحه عشان بس مشيلش ذنبه لكن عمري ما بنسى اللي عمله طالما كانت حاجة جامدة وجرحتني اوي وآلمتني
في الاخر انا بدعي لكل اللي بيمتحنوا ان ربنا يوفقهم ويجازيهم على قد تعبهم ويديهم اللي بيتمنوه
وبالتوفيق والنجاح دائما

Anonymous said...

السلام عليكم ورحمة الله وبركاته
انت عارف يامحمود انا ماليش في موضوع التعليقات ده بس الموضوع ده بالذات حسيت انى لازم أعلق عليه ويمكن انت عارف ليه
انا شايفة ان التسامح ده احلى حاجة في الدنيا لكن ساعات من كتر الجرح والظلم الواحد مبيقدرش يعفو ويسامح وينسى اما حكاية نرجع زي زمان فدي بتكون مستحيل اصلا تفكر فيها في بعض المواقف اللي بتحصل معانا
لكن ممكن يكون الزمن كفيل بمداواة الجروح وفي حديث للرسول صلى الله عليه وسلم فيه تسع وصايا.قال رسول الله صلى الله عليه وسلم((اوصاني ربي بتسع أوصيكم بها :: أوصاني بالإخلاص في السر و العلانية ..والعدل في الغضب والرضا .. والقصد في الفقر والغنى..وأن أعفو عمن ظلمنى..وأصل من قطعني..وأعطي من حرمني..وأن يكون صمتي فكرا.. ونطقي ذكرا.. وصمتي عبرة)) هذا الحديث يضم أرقى معاني التسامح
ربنا يرزقنا نقاء القلوب وصفاءها والقدرة على التسامح
وشكرا يامحمود على الوضوع الجميل ده
NAHNOHA

۩۝۩ Dr. Flavio ۩۝۩ said...

no comment

Anonymous said...

السلام عليكم ازيك يا دكتور محمود ازيك يا شاعرنا العظيم والله مش عارفه اقولك ايه والا ايه اولا انا بشكرك جدا جدا علي القصيده اللي قلتها في المدرج انهارده علي قد ماهي معلش يعني محبطه شويه الا انها جميله جدا جدا .ثانيا بقي الموضوع ده حلو اوي اوي ومن زمان كان نفسي حد يكتب فيه او يتكلم عنه لاني كان نفسي اعرف انا حكمي فيه او رأيي فيه انا لوحدي كده والا ده رأي ناس كتير زي .
التسامح ده كلمه كبيره اوي بجد للي يقدرها ويعرف معناها كويس بجد لانها اهم صفه موجوده في اسلامنا الحبيب واعتقد انها لازم تبقي موجوده بين كل الناس اما بقي عن موضوع ان لو حد جرحك هتقدر تسامحه اولا انا رأيي انه ده يتوقف علي علاقتك بالشخص نفسه وعلي الحاجه اللي عملها انا عن نفسي مش بقدر انسي لاي حد اي حاجه عملها فيه انا ممكن اسامحه عليهاجدا وبكل طيبه ومحبه وود اتعامل معاه عادي جدا بس مقدرش انساها لاني ببساطه انسانه وبحس وطبيعي كل اما اشوف الشخص ده اكيد هفتكرهادي حاجه غصب عننا مش بمزاجنا انا الحمد لله ليه اصحاب كتير جدا وبحبهم جدا جدا وهما كمان بيحبوني اوي الحمد لله بس هما دايما بيقولوا عليه اني انا طيبه زياده عن اللزوم ودي حاجه مبقتش موجوده دلوقتي بس الحاجه اللي انا شايفاها وحشه فيه اني حساسه زياده عن اللزوم يعني انا بحب الناس جدا والحمد لله عمري ما حد زعل مني لاني ببساطه طالما بحب حد يبقي عمري ما هزعله او هجرحه ابدا فمن الطبيعي كمان انه هو ما يعملش حاجه تجرحني ولو عملها انا هسامحه عليه بس عمري ما هقدر انساها ليه ابدااو نرجع زي زمان مع بعض انا بتكلم كده بالنسبه للصداقه بين اتنين اصحاب اوي اوي لاني بعتبرها اسمي واحسن علاقه في الدنيا كلها ورأيي ده ناتج عن تجربه انا عشتها واتجرحت منها اوي اوي واتعلمت منها اوي برده. لما تكون بتحب حد اكتر من نفسك ومعاه علي طول بتقضي معاه وقت اكتر من اللي بتقضيه مع اهلك في البيت وفجأه يعمل حاجه تجرحك اوي يا تري هتقدر تنسي؟؟؟؟
معلش يا دكتور محمود ده رأي ديكتاتوري اوي من واقع حاجه انا عشتها .وكمان عجبني تشبيه حضرتك اللي قلته اوي مهاما صلحت حاجه اتقطعت منك هتستفيد بيها برده بس عمرها ما هترجع زي الاول.
في النهايه لان حاسه اني طولت اوي تسامحوا يا جماعه لان في النهايه احنا كلنا بشر ومفيش حد مش بيغلط بس المه يبقي غصب عنه مش غلط هو قاصد يعمله.....
انا بس كنت عاوزه اسال حضرتك معلش سؤالين واطلب طلب
حضرتك عملت ايه في امتحان الاطفال العملي يارب يكون كويس ان شاء الله وربنا يوفقك ويعينك بجد علي الاطفال اللي جاي
السؤال التاني فين قصيده هكذا تمنيت ان احب انا مش لاقياها خالص
الطلب بقي لو سمحت ممكن تنزل القصيده اللي قلتها انهارده في المحاضره .
وربنا يعينك ويوفقك ويحفظك وجزاك الله كل خير .
Amert Alhozn

semsema said...

تسامحه آه لكن ترجع زي الأول لأ
الاول ازيك يامحمود ويارب بخير وربنا ييسرلنا جميعا
أنا معاك في رأيك وفي كلامك جدا لاني مجربة الموضوع ده جدا من شخص عزيز علي جرحني جامد جدا واعتذرلي وعمل حاجات صعبة بجد علشان اسامحه
سامحته اه لكن رجعت زي الاول لا خالص يامحمود
مع العلم ان الشخص ده كان اعز شخص عندي بعد والدي ووالدتي واخواتي
تصور بئه للدرجة دي
من ثقة عمياء فيه لوفاء واخلاص ومعزة ملهاش حد
لكن الجراح لما بتيجي من الناس القريبة اوي دي بتبقي معلمة اوي ومهما حاولت تداويها بتفضل بردو تألمك كل ما تيجي عالجرح
بس الحمد لله علي نعمة النسيان
ميرسي انك خرجتنا من الكآبة اليوم بعد المحاضرات
دمت بكل خير
خالص تحياتي وتقديري

Anonymous said...

السلام عليكم ورحمة الله وبركاته
جميل البوست اوى يادكتر وانا معاك فعلا ان لو حد جرحنا او اذانا ممكن نسامحه لكن صعب اوى ان احنا ننسى لان دى حاجه مش بايدينا بس انا اعتقد ان دى قدرات بشريه يعنى فى ناس ممكن تنسى وتسامح منهم الام والاب ياما بيشوفوا من ابنائهم عقوق وياما بينجرحوا منهم لكن مجرد ما بيعتذر الابن او حتى من غير ما بيعتذر بيكونور مسامحينه وناسين اللى عمله فيهم .
وممكن لو حد قريب منك اوى وجرحك من غير ما يقصد اكيد هتسامحه وتنسى
.
واكيد لو حد عمل فينا اى حاجه اكيد مش هيكون اكتر من اللى عملته قريش مع سيدنا محمد صلى الله عليه وسلم ومع ذلك كان يستغفر لهم الله اكيد طبعا احنا مش زى سيدنا محمد ولكن هو قدوة لنا .
واخيرا جزاك الله خيرا عنا .
n_e_m

شق القمر said...

أنا مش مسامحه
حتى بعد الاعتذار برده مش مسامحه :((
هو كده ومن غير نقاش
بس هسيب تعليق صغير


اللهم إنى سامحت كل من أساء لى فى حضورى أو غيابى لوجهك الكريم


الدعوة دى أتمنى أقدر عليها تماما
لكن غصب عنا هكذا نحن البشر
خلقنا من عجل وحكمنا عن جهل
نحب أنفسنا ونعترى لها اهتماما اكثر من الناس حولنا
نقبل الأعذار ممن نرغب ونسامح ولا نقبل من البعض

اتمنى نقدر نوصل للدرجة اللى لو ايه حصل نقول مفيش مشكلة مسامح
أظن انى برجع تانى اقف على كل فعل من الناس
مبقيتش بسامح كتير زى الاول
حتى اللى سامحت منهم بعض افعالهم برجعها تانى

ربنا يستر :)
واللى كان له موقف معايا يستسمحنى تانى احسن الفترة دى كله بحسابه

:)))))))))

سلام محمود ومسامحاك متقلقش
لانى اكيد مكنش ينفع اجى الفرح

Anonymous said...

بسم الله الرحمن الرحيم

عارفين لما قميصك اللي مدفيك ينقطع

وبعدين تجيب حته قماشة من قميص تاني وتكملها بيه

القميص هيرجع يدفيك انما مش هيرجع زي الاول

هيفضل شكل الحته الغريبه دي يفكرك ان القميص اتقطع

التشبيه دا جميل اوى بس
مش لازم ينطبق ع الموضوع دا اوى

لان مساله الصحوبيه دى حاجه كدة جميله اوى وحساسه جدا

والموضوع هيتوقف علي درجه الصحوبيه وشدتها

وكمان احنا بنقول كلام ومبنفزهوش يعنى بنقول لصاحبنا انت زى اخويه صح
معنى كده لو اخوك الحقيقي غلط فيك وكلنا بشر وبنغلط
علاقتك بيه مش هتبقي زى الاول
لا طبعا لانه اخوك

ولاننا بشر ومحدش معصوم
يبقي لازم نسامح بعض اما عن قوة العلاقه فيحددها هل الخطا دا كبير ولا بسيط
هل انا علاقتى بالشخص دا قويه
هل انا فعلا معتبره اخويه

بعد الاجابه ع الاسئله دى اقدر اقرر
العلاقه هتبقي زى زمان ولا لا

وفي الاخر والاول الموضوع نسبي جدا


دعواتكوا يا جماعه أصل أنا مزنوق في المذاكرة زنقة الحرامي اللي اتمسك في المولد

التشبيه ده بقي احلي واحلي لان كلنا حراااميه اتمسكنا في مولد

بالتوفيق في الامتحانات

pure blue

عمر said...

بسم الله الرحمن الرحيم

أنا مش هرد يا حوده على الكلام اللي انت قلته في أول البوست بتاع الناس اللي جت الفرح وعندها امتحانات ، لأني حاسس إنك بتأنبني وتزيد زعلي من نفسي ، لكن بإذن الله متعوضه وعلى رأي موضوعك - أرجو إنك تسامحني - بس نرجع زي زمان

ثانيا .. برضه شكر واجب وتهنئة على القصيدة اللي أبدعت فيها في المدرج ويارب دايما تمتعنا كده يا حوده

وأخيرا .. بقى نوصل للموضوع - انت .. بتقدر تسامح ؟؟؟ وتعليقي عليه حاجه واحده بس

القصة اللي ذكرهالنا حبيبنا صلى الله عليه وسلم ... لما كان جالس مع الصحابة وقال لهم : يدخل عليكم الآن رجل من أهل الجنة ، فيدخل عليهم رجل لا يعتبره الصحابة من كبارهم ، وتتكرر هذه القصة ثلاث مرات ويدخل عليهم نفس الرجل ، فيصر عبدالله بن عمرو بن العاص أن يعرف السر وراء دخول هذا الصحابي الجنة .. فيذهب ويبيت معه ثلاث ليال ويتحجج بأن بينه وبين والده عمرو بن العاص شجار ولا يستطيع المبيت في بيته ، ولا يرى تميزا في عبادة هذا الصحابي عما يفعلونه فيخبره عبدالله الحقيقه وأنه ما حدث بينه وبين أبيه شجار ولكنه أراد أن يعرف سر دخول هذا الرجل الجنة ، فيخبره الصحابي أنه لا يفعل شيئا إلا ما رآى غير أنه
لاينام وفي قلبه ضغينة على أحد

فأعتقد أن هذا ماعلمناه رسولنا صلى الله عليه وسلم وما ينبغي أن نكون عليه حتى نكون من أهل الجنة
عشان كده المفروض ... كلنا نقدر نسامح

وآسف جدا على الإطالة
تحياتي ودعواتي لك وللجميع

Anonymous said...

السلام عليكم
انا مش عارفة هاعمل ايه فى موقف زى اللى بتقول عليه ده
بس هو ساعتها اللى هاحس بيه هو اللى هاعمله
يعنى لو حسيت انى ممكن ارجع تانى يبقى احسن ولو مقدرتش يبقى نتصالح وخلاص

انا ليا طلب انك تنزل القصيدة اللى قلتها فى المدرج ضرووووووووووورى
ولو ما نزلتهاش هزعل ومش هاصالحك ولا هاسامحك ابدا

Anonymous said...

السلام عليكم ورحمة الله و بركاته
الحقيقة فعلا الواحد لما حد بيجرحه بيبقى ساعتها مصدوم ومش متخيل ازاي الشخص اللي هو امنله ده يجرحة كدا و ازاي هانت عليه الحاجات الحلوة اللي كانت بينهم انا هقولك اني كنت في الاول زمان يعني بيبقى صعب عليا شوية اني اسامح او انسى اساءة اي حد لكن لما كبرت وفهمت الدنيا اكتر لقيت ان التسامح ده اجمل حاجة فعلا يمكن كمان لأني قربت من ربنا اكتر من زمان لما حد بيغلط فيك و بيجرحك بيوجعك اه لكن لو انت حطيت نفسك مكانه و اد ايه احساسه بالندم اللي اجبره انه يتخلى عن كبرياؤه و غروره ويقول كلمة انا اسف و اد ايه بيتمنى انك تنساله غلطته دي صدقني هتسامح جدا احنا بشر وزي ما انا فلان غلط فيا و ندم و انا ما سامحتهوش ممكن انا كمان اغلط في حد تاني و اندم و ميرضاش يسامحني هي الدنيا كدا ساعتها هحس اني اتالمت مرتين مرة للندم على غلطي في حق اللي جرحته ومرة تانية لأنه مهمهوش كرامتى و مش راضي يقبل اعتذاري لو انا فكرت بالطريقة دي هقول اني بالعكس هسامح جدااااااااااا لأن جرحي الزمن داواه و ثوابه عند ربنا و انا افضل انه يكون ليا احسن ما يتحسب عليا دي نقطة اما اننا نرجع زي الاول تاني فدي ليا فيها رأيين الرأي الاول انه لو حسيت ان الانسان ده رجع بس مجرد ارضاء لضميره يبقى هسامحه بس علشان ربنا وهو ربنا يسهله بقى بس بعيد عني وحقي يبقى عند ربنا و هو لوحده اللي قادر يردلي حقي اما لو حسيت ان الانسان ده صادق فعلا في مشاعره و عايز يرجع زي الاول واحسن بجد انا كمان هتكون دي نفس مشاعري و هرجعله و نرجع زي الاول و احسن و انا هعدل على مثالك يا محمود لما يكون عندك قميص و يتقطع منه حته وتضطر انك تجيب حتة من قميص تاني علشان يفضل يدفيك انه ممكن الانسان ده يجيب وردة حلوة او حتة اكسسوار جميلة يحطها مكان الجرح مش بس تداريه لا كمان تخلي شكله اجمل وده هيكون افعال الشخص ده ومدى صدقه فيها و هقولك انه ده اجمل مراحل التسامح لأن ربنا بيقول "فمن عفا و أصلح فأجره على الله "و كمان البحتري بيقول
اقبل معاذير من يأتيك معتذرا ان بر عندك فيما قال او فجرا فقد اجلك من يعصيك ظاهره وقد اهابك من يعصيك مستترا و بيقولو في الامثال الشعبية مكتوب على ورق الحلاوة ما محبة الا بعد عداوة و مصايب الزمن والله بتنسي ساعة ما يمر بيك الزمن وتلاقي نفسك واقف لوحدك هتقول ياريتني سامحت اللي انا فيه دلوقتي اكبر بكتير من غلطة صغيرة غلطها انسان حبني بجد زمان واحنا بشر و عايشين الحياة نتعلم من اخطاءنا ولو ما غلطناش مش هنتعلم و كدا كدا انسان اللي طلب منك تسامحه و ترجعله تاني ده وانت رفضت حياته مش هتقف عندك بالعكس انت الخسران من كل ناحية دي وجهة نظري معلش طولت عليكم و السلام ختام
moony night

Anonymous said...

السلام عليكم ورحمه الله وبركاته
ازيك يادكتور محمود يارب تكون كويس وتكون امتحانات الا طفال عدت عليك كويسه

اولا انا ليا عندك طلب انك تحط القصيده اللي انت قولتها في المحاضره علي المدونه بجد كانت حلوه اووووي يمكن كانت احلي حاجه حصلت في اليوم ده


ثانيا بالنسبه لموضوع البوست ده انا اتحطيت في موقف شبهه مش هقدر اقولك انا اتجرحت ازاي من اللي عملت فيا الموقف هي صالحتني واعتذرتلي كتير لانها عارفه هي جرحتني ازاي وانا صالحتها وبقينا بنتكلم عادي بس دايما بحس وانا بكلمها اني في حاجز مش عارفه اتخطاه
يمكن مع الزمن انساه بس ساعات كتير برضه هي بتصعب عليا لان هيا بتحاول انها ترجعني معاها زي زمان وانا بحاول بس مش عارفه
في الاخر هي مقدره ولا يكلف الله نفس الا وسعها
اسفه علي التطويل وشكرا انك طرحت الموضوع ده
وفي النهايه ربنا يوفقك ويكرمك ويكرمنا كلنا الايام الجايه دي وادعيلنالاننا كلنا محتاجين الدعا ده

سنووايت said...

الف مبروك وعقبال الفرح الجاي

بالنسبة للتسامح انا شاية ان رايك سليم
تسامحه اه لكن ترجع لأأأأأأأأأ

هبهوبه said...

السلام عليكم
أنازعلانه منك جداًيادكتورمحمود فين القصيدةبتاعةفرح أختك وكمان فين صورة الفرح مش مهم الشكل الخارجي المهم الجوهروكمان إنت مش بقيت بترد على الكومنتات مش عارفه أزعل منك ولا من الإمتحانات اللي وخداك مننا ربنا يوفقك إن شاء الله
وبعدين رأيك في التسامح ده مزعلني منك
الإنسان اللي يكون رقيق كده ويكتب كلام جميل زيك بتكون مشاعره حساسه ورقيقة ولازم يكون متسامح معنى إنك وافقت تسامح يعني نسيت الجرح والغضب يعني تنسى الآثار الجانبية مش كل الجراح بتسيب علامه لو مقدرتش ترجع زي الأول يبقى إنت لسه شايل فقلبك يعني ماسمحتش وبعد فترة هتلاقي الآثار دي تراكمت فقلبك وساعتها هتلاقي نفسك لسه فاكر كل حد جرحك ويمكن من أقل موقف بينك وبينه بعد كده تلاقيك بتفكره باللي حصل يبقى فين بقى التسامح
التسامح مش مجرد كلمه تقولها المهم إنك تسامح من قلبك
إن الله غفور رحيم وأجمل صفة في الإنسان إنه يكون متسامح يعني لو موقف بينك وبين أخوك هتسامحه ومش هترجع معاه زي الأول طبعاً إستحاله لأنه أخوك طب ما تيجي تجرب تبقى كده مع كل الناس وخصوصاً لو حبيبتك أو زوجتك معنى إنك مش ترجع زي الأول يعني العلاقة بقت متوترة ومهدده خليك متسامح لأكتر درجه ممكنه عشان لما الغلط ييجي منك تلاقي اللي يسامحك ويرجع معاك زي الأول وأكترلو كل الناس قدرت تسامح وتنسى الجرح والزعل ورجعوا مع بعض زي الأول هتبقى الدنيا حلوه بجد .

Anonymous said...

تسمحلى اعلق فى المدونه طبعا مفيش مانع اصلى عندى مفاجاه انا اخر حاجه كنت اوقعها انى اكتب شعر وعن ايه عن التسامح شوف ازاى ؟؟؟ اسمع ياسيدى ازاى بتقول جراح وانت عارف ان فى سماح!عارف ليه فى سماح عشان قلوبنا ترتاح!!!بس ليه القسيه ارحم شويه !! وان كان على القماش نشترى لك وبلاش ! بس كفايه يكون وصلك يعنى ايه كلمه سماح !! ليه دايما محتارين بين جراحنا وبين سماحنا!! يمكن عشان كرامتنا بقت اقوى من جراحنا!!! او يمكن عشان قلوبنا مليانه جراح كتير واى جرح جديد بيكون صعب اكيد!!!لكن لازم قلوبنا تحكمنا وقت جراحنا !! مانقولش اة ياجراح بس نقول ياسماح!! ايه رايكم ؟؟والله انا بخساره على البلد دى لاااااااااااا انا خساره فى البلد دى انا هزرت كتير والامتحان قرب مفيش دم خالص نتكلم جد شويه ...انا بصراحه ليا وجهخ نظر فى التسامح هى ايه؟؟فى نوعان من البشر ..نوع يجرحنى واديله فرصه تانيه وتالته كمان عشان يكمن يكون جرحنى فى الاول غصب عنه وده انا بسامحه ومش بشيل فى قلبى منه ...النوع التانى يفضل يجرح ويتلذذ بجرحى مهما اديته فرص وده بحول الحب اللى جوايا ليه الى كره هو مش كره اوى لانه ساعتها بيظهر لى منه حاجات حلوه وساعتها ممكن اسامحه بس ارجع زى زمان لاااااااااا ....بس هو ده مبدائى بس والله انت بتجبر الشخص اللى قدامك انه يسامحك يعنى بطلوا تكبر بقى !!مش قصدى حد طبعا يارررررررررررررب الامتحان يبقى سهل ويتحل !!!بالمناسبه اى حد هيسرق قصيدتى انا مسمحاه بس لو باعها مش مسمحاه طبعا عشان كان لازم يقسم بالنص سلاااااااام < لولا>

Anonymous said...

السلام عليكم ورحمة الله وبركاته
ازيك يا محمود؟ عامل ايه؟
اولا احب اباركلك علي شكل المدونة الجديد
رااااااااااائع
وكمان الابيات الجميلة اللي في البداية ...تحفة فعلا ماشاء الله
ثانيا الموضوع المهم اللي انت فتحته في البوست ده محتاج لكلام كتير فيه
لانه ليه اكتر من زاوية في الرؤية


فعلا زي مازملاءنا قالوا
بيتحددعلي حسب قوة العلاقة بين الاصدقاء
وحسب احساسك انت بيهم
في ناس تحس انهم صادقين معاك وعندهم رغبة في التسامح فعلا
ودول اكيد مايتعوضوش
لانهم بالبلدي كدة باقيين عليك واسمحلي اختلف معاك في رايك
ليه ماترجعوش زي الاول؟؟؟؟؟؟؟
بالعكس
انت المفروض تكون احسن منه
لان انت في موقف قوة .... اما هو الاضعف
هو انسان تنازل عن جزء من كبريائه عشان يحافظ عليك ويستردك كصديق
لازم تحافظ عليه برده وتشيله في عنيك
لان ممكن اوي تخسره بسهولة وماتقدرش تعوضه تاني
اديله فرصة واسمع منه ..ممكن يكون له العذر في افعاله
التسامح خلق رائع ,لكن الاروع انك مش تشيل في قلبك ضغينة لحد

الدنيا اقصر من ان نضيعها في الم لايفيد
الصداقة والاخوة الحقيقية لا تعوض
وحاجة اخيرة .......
نفسي اقول لكل حد انا ضايقته بدون قصد مني انه يسامحني
وانا كمان مسامحة كل انسان اساء فهمي ولم يعذرني



انا اسفة يا محمود اذا كان اسلوبي شديد شوية
ومعلهش طولت عليك اوي المرة دي
اتمني ان ربنا يوفقك ويكتبلك النجاح ولينا كلنا يارب في الامتحانات الجاية ان شاء الله
/n/

رحيل said...

لازمته ايه بس البوست ده قلبتوا علينا المواجع وفتحتوا حاجات الواحدكان فاكر انها اتقفلت من سنيــــــــن طويـــــــــــــله..

بصوا بقى الله يسامح الجميع طبعا كلنامحتاجين العفو والمغفرة لبعض ومن بعض بس فعلا مافيش حاجه بترجع زي الاول والبرواز لما بيتكسر مهما صلحته بيفضل مشروخ فعلا وبتفضل دايما فاكر انه مكسور وايه اللي كسره بس برده ارجع واقول ربنا غفور رحيم وربنا يلهمنا القدرة عالعفو عشان نستحق هذا العفو في يوم من الايام..

ملحوظه : من اكثر مواضيعك اللي آلمتني وكتبت الكلمتين دول بالعافيه وانا غاصة الانفاس ..

Anonymous said...

المسامحة يارحيل لا تقف فقط على قول إن الله غفور رحيم
ولكن مادمنا نعلم يقينا اننا جرحنا احدهم فلنسعى لنطمئن على انفسنا ونرجو مسامحتهم
لا تفوتى فرصك مع الناس
فالناس طيبون وسيتقبلون
واعلمى دائما انكِ ان جرحتى واحدا من وجهة نظرك فقد جرحتى كثيرين
وان شامحكِ الواحد فلن يغفر لك الباقون

محمود ابوالعزم said...

السلام عليكم ورحمة الله
فضيت نفسي عشر دقايق مخصوص والله عشان آجي أرد على البويت ده
شكرا شكرا لكل الناس ردت
سعيد اوي ان الناس فتحت قلبها واتكلمت
وكل الناس اللي اعلنت انها سامحت كل حد جرحها
وطلبت من كل حد يسامحها
وبضم صوتي لصوتهم

انا اسعد يا عندما تنهمر الدموع انك اول رد ومتشكر اوي على كلامك الجميل
اللي أثري الموضوع وزاده جمال

ناهنونه
اتمنى تكوني سامحتي بجد
وزي ماقلتي ان حديث النبي صلى الله عليه وسلم فيه ارقي معاني التسامح
يارب كلنا نكون كده بجد



اميرة الحزن
دايما مش بلاقي كلام ارد بيه على كلامك الجميل
متشكر اوي على اريك في الموضوع
انا امتحنت مع بتوع الاستيفا
وقصيده هكذا تمنيت أن احب
أنا شلتها معلهشي
كان فيه ردود مضايقاني
وبعترف ان انا كنت السبب في كده
ويارب اكون حققتي طلبك


سماح
أنا اللي متشكر اوي يا سماح
متشكر على تشجعيك الدائم
وعلى كلامك الجميل دايما ومتشكر لانك فهمتي وجهة نظري صح
ومتشكر ليكوا كلكم على تشجيعي يومها

ان اي ام
سعيد انك بقيتي بتزوري المدونه باستمرار
وتنوريها يآرائك الجميله
وفعلا مافيش مثل أروع من اللي قلتيه
ماتحريميناش ابدا من زيارتك

شق القمر
يارب كلنا نعلن تسامحنا مع كل اللي فات كده زيك كده يارنا
ويارت تكوني سامحتنين بجد وقدرتي موقفي في موضوع الفرح ده

بيور بلو

فيه تشبيه اجمل
لما فيه حد يكون عنده مشاعر جميله اوي
وحد بيقدر يفهم ويقدر مشاعر الناس
يبقى اكيد هو بيور بلو

عمر
منور والله العظيم
والشكر واجب على انا ليكو
وشكرا لاثرائك الموضوع بكلامك الجميل يا عمر

انونيموس

متشكر اوي على رايك
وانا نزلت القصيده اهو
بس اتمنى دي تبقى ىخر مرة ليكي من غير اسم
ياري لو اسم مستعار ختى نعرفك بيه بين اصدقاء المدونه

موني لايت
كلامك اجمل من كلامي
نو كومنت

محمود ابوالعزم said...

اكوا بلو
اهلا بيكي صديقه جميله للمدونه ان شاء الله
انا نزلت القصيدهه اهو زي ماقلتو
وشكرا لحكايتك اللي يمكن وصلت وجهة نظري للناس
انا هدعيلكم والله
بس انتو كمان كلكم ادعولي
انا محتاج الدعوات دي اوي والله

سنو وايت
نورتي المدونه شكرا لرايك
الله يبارك فيكي
مش عارف اقول عقبالك ولا ايه
ماعنديش فكرة

محمود ابوالعزم said...

هبهوبه
يارب اكون كده صالحتك بالبوست اللي فوق
اما موضوع التسامح ده
فانا مش بقول بلاش نتسامح
مش قصدي ابدا والله
هي كانت كل المشكله في الرجوع
واكيد علاقه الابن والاب
او الزوج والزوجه
او الاخ واخوه
ليها معايير تانيه خالص في الحكم
يارب تكوني فاهماني
وهحاول اوضح وجهة نظري اكتر في اقرب فرصه

محمود ابوالعزم said...

مش مهم الاسم

نورتي المدونه والله
وشرف لينا يا ستي ان اول شعر ليكي يتنشر عندنا
وماتخافيش ماحدش هيسرق القصده الا اما يستئذن
يارب ددايما منورانا كده

ان

فرحت اوي ان شكل المدونه الجديد عجبك
ومتشكر على رايك الجميل
بس برضو انا ماقلتش بلاش نتسامح
كل الفكرة ان احنا لو هنرجع ويفضل الجرح موجود
يبقى نبعد والذكري الجميله موجوده
دي كان قصدي

يارب يوفقنا كلنا في الامتحانات
ونشوف اسمك في اول الناس المرتبين ان شاء الله
دعوه من قلبي والله

محمود ابوالعزم said...

رحيل
آسق والله ان كام كلامي سبب لي الم ليكي
بس انا عارف اتك اقوي من كده
ومتشكر لرايك اوي
وشكرا لاليس على ردها الجميل اوي
جزاكم الله كل خير جميعا

Anonymous said...

ميرسي اوي يا محمود علي دعوتك لي
بجد والله انا كمان هادعيلك باخلاص تطلع من العشرة الاوائل
ياااااااااااااااارب
شوفت بقي اد ايه.......
يالا شد حيلك
وربنا معاك
/n/