دماغ امتحانات

Monday, July 7, 2008

السلام عليكم ورحمة الله



طـَموحاً و رغم دموع المآقي...سيبقى فؤادي طـَموحاً جرئْ
إذا كان حـُلم القـلوب اتـّهاما...أنا لست أرضي بقائي برئْ
لأن الحـــــــياة بدون الأماني...ودون الطموح انتحارٌ بطئ
ازيكم يا جماعه؟؟؟



أخباركم ايه؟؟؟؟



في اللحظه اللي انا فيها دي



انا مش عارف اكتب ايه



انا بكتب النهارده بعد امتحان الباطنه



انا مش عارف ان كنت حليت حلو ولا وحش في الامتحانين الي فاتوا دول



وعمري ماحاولت اراجع بعد اي امتحان



لان اللي حصل في الامتحان والدرجات اللي جبتها او فقدتها



هي في الاول وفي الآخر رزق من عند ربنا سبحانه وتعالي



انا زعلى من نفسي على تقصيري طول السنه وكل سنه



اللي مش عارف كان غير مبرر ولا كان غصب عني



تعرفوا

يمكن لما دخلت الطب كنت داخل مع الناس اللي داخله من غير ما اكون حابه ولا كارهه



بس دخلته بنية انها حاجه ممكن أرضي ربنا باني اخفف آلام المسلمين
واني ارضي والدي ووالدتي لان ده كان شئ يسعدهم



بس حصل موقف غير جوايا حاجات كتير اوي وغير نظرتي للطب



كنت في العنايه مع والدي الله يرحمه



وكان فيه مريض عنده غيبوبه كبد



والمرضي اللي في الغيبوبه دي غصبا عنهم بيضربوا ويزعقوا وهما مش حاسين



بس المريض ده كان الموضوع زايد عليه اوي



وكان بيزعق وبيكسر جامد جدا



والدكتوره مش عارف تعمله ايه



فقالت للمرضات يدّوله حقنة مهدأ



وفعلا ادوله حقنة مهدأ



مع ان كل الناس عارفه ان المهدأ غلط في الحالات دي



دخل بعدها في غيبوبه كامله لمده اربع ايام



انا شفت الدكتوره دي وهي واقفه جنب المريض ده وهي بتبكي وبترتعش



يمكن أهل المريض ماكانوش فاهمين ايه اللي حصل وماكانشي حد هيقولها حاجه



بس الخوف كان من جواها انها تكون سبب في ان حاله زي دي تتدهور بالشكل ده



وخايفه تفضل طول عمرها حاسه بالذنب في حق مريض مالوش اي ذنب



ويوم ما العيان ده فاق من الغيبوبه بعد اربع ايام



شفت الدكتوره دي وهي واقفه جنبه



بيتهيالي كان ممكن توطي علي ايده تبوسها وتقول سامحني على اللي عملته واللي كنت هعمله فيك



أد ايه صعب ان كلمة تقولها يبقى ليه تأثير في حياة انسان



واد ايه صعب انك تؤتمن على صحة انسان وماتقدرشي تعمله حاجه



واد ايه صعب ان العيان يتألم أدامك و ماتقدرشي تعمله حاجه




يمكن خرجت من الفتره دي وانا كل حلمي في الدنيا اكون دكتور



دكتور بجد



انا مش عارف ايه اللي خلاني اقول الكلام ده دلوقتي


الواحد مش في حالته خالص بعد الامتحان النهارده

مع انه كان كويس الحمد لله

النهارده وانا مروح

كنت راكب الجلاء ...وجينا في نص السكة

والراجل اللي جنبي كان هينزل فنزلت انا عشان انزله واركب تاني

ولما نزلت افتكرت حاجه كانت جايه في الامتحان وقعدت افتكر انا حليتها ايه..ايه....ايه

ببص مالاقيتشي الميكروباص

استني يا عم الحاج....انا كنت راكب معاكو

وهاتك جري ورا الميكروباص لحد ماحصلته

وسألني السؤال الشهير..ايه يا عم انت شارب حاجه

وجاوبته الاجابه الشهيره...لامؤاخذه أصل انا في طب

حتى وانا جاي دلوقتي واحنا المغرب كده

وقابلت عم ماجد اللي سبقني كالعاده وقاللي

سلامو عليكو...ازيك يا دكتر

وانا بكل براءه..اهلا يا عم ماجد صباح الخير

صباح الخير!..زمانه دلوقتي بيقول ايه الواد الأهطل ده

الموقفين دول فكروني بآخر مواضيع أحمد سعيد على مدونته الجميله أنا البحر

يبقى انت أكيد في طب

http://ana-elbahr.blogspot.com/

في النهايه
دعواتكم لينا يا جماعه



ومش عارف في النهايه انشر ايه



آخر حاجه كتبتها كانت جمل بس كانت حزينه شويه
وانا عارف ان الدنيا مش ناقصه اليومين دول
اسمحولي بس انشر جملتين منهم
فيهم معنيين نفسي اقولهم
أحيانا كثيرة نري كل الكون من حولنا ظلاماً فنظل نبحث عن السبب
طويلا ولا نجده...لنكتشف في النهايه انه كان خطأنا حينما نسينا أن نفتح أعيننا لتري النور
...............................................
ما أصعب أن تملك عينين لم يعرفا طعم الدموع
وما أصعب أن تملك عينين لا يكفان عن البكاء
وما أجمل أن تملك عينين لم يحرمهما الله من رحمة الدموع ولكنه أعطاها يدٌ
تستطيع أن تمسحها وقلب ٌيستطيع أن ينساها

واخيرا وبالصدفه وانا فاتح صفحة رسايلي

ايدي جت على ايقونه جابت اول الرسايل المبعوته من ايميلي

لاقيت فيه رساله اسمها عداد المية

فتحتها وافتكرتها

كان انسان عزيز على ناويين يفتحوا صيدليه

وفضلوا كام شهر متعطلين عشان عداد الميه ده

فحاولت أكتب وكانت من اول محاولاتي في كتابة الشعر ..العامي بالذات

خدتها كوبي من الرساله زي ما هي

عداد المية
يا ما فيـــــه حاجات غريبه.........في بلدنا الصعبة ديّه
عـــــــــــــــــداد الميه يقدر............يعطل صيدليه
.....................................
هو احنا في دوله ناميه
ولا احنا في دوله باميه
ولا احنا بقينا فين
موظف الحكومة
تلاقيه يسمع في ثومة
و يقولك الروتين
و فوت علينا بكره
و كأنه يا عيني يكره
في شغله يكون أمين
و موظفات كلامها
عن أكلها وهدومها
و في الشغل مطنشين
قاعده زي الجبلـّه
بتفرط في البسله
و تفكر في العجين
و طبعا الحقيقه
لو شئ عايزدقيقه
ياخدله جمعتين
تلاقيه مجعوص تمام
و يبلطج في الكلام
و يقولك انت مين
اقولك ابقى مين

.................................
انااااا يا مصر مش خوفو......... ولا خفرع ..ولا رمسيس
لكن مصري وليّ حقوق .....ومن حقي ما اروحشي فطيس
صحيح مش بيه ولا ابن وزير
ولا لي ّ ابن عم سفير
لكن بحلم وحلمي كبير
ومن حقي تساعديني
و آه لو كنت انا روبي
هتيجي وتمسكي في توبي
لكن علشان انا جيوبي
بقت فاضيه بتنسيني
أنا أوْلي ابشر فيكي

وليه حقي يضيع فيكي

لتوتو وسمسمه وميكي

وانا الغلبان بترميني

بحق غرامك السامي

خديني لبر أحلامي

وكوني الشمس أدامي

بلاش يا مصر تنسيني

بلاش يا مصر.. تنسيني

محمود سليمان ابوالعزم

now_tears_smile@yahoo.com



17 comments:

Anonymous said...

السلام عليكم ورحمة الله وبركاته
ايه ده انت بتتكلم في السياسة والا ايييييه؟؟
ماتخلينا في السياسة بتاعتنا(الاطفال والباطنة يعني) ودول كفاية علينا اوي دلوقتي
علي العموم الحال ده مش هايتغير الا لما الاساس يتصلح الاول
ما علينا
.....................
معلهش ابتديت من الاخر
بس موضوع الطب والغرض منه ده فعلا انا مابداتش اسال نفسي السؤال ده
الا السنة اللي فاتت بس
وكنت في الاول مختارة الطب عشان حبي للمواد العلمية وخصوصا الاحياء
بس بعد كده عرفت عظم الاختيار والمسئولية اللي احنا شايلنها
وانه مش زي اي كلية تانية حتي ولو كانت عملية برده
بتمني نكون قد المسئولية دي ونقدر نخفف الام كل مريض يلجالنا
ومانكونش سبب تاني في معاناتهم
اتمني تكون وفقت في الامتحانات اللي فاتت
وماتخليهاش تاثر عليك كده تاني
ربنا يكرمك ويوفقك دائما

سمر الشافعى said...

عزيزى محمود سليمان ابو العزم قريت تعليقك عندى ورديت عليه قبل مااجى مدونتك ودلوقتى بس عرفت انت ليه مش عارف تنام عشان انت فى سنه خمسه طب وكمان بتركب الجلاء يعنى طنطاوى ياهلا يااهلا

بقى انت بقى فسنه خمسه وليك عيييين تطلب تنام يامفترى ركز فالباطنه والاطفال وبعدين اطلب الحاجات الهايفه بتاعت الناس العاديين دى هههههههه

ربنا معاك يارب ويعدى السنه الكبيسه دى على خير وتدخل على اختها اللى اكبس منها

semsema said...

ازيك يامحمود
الباطنة والاطفال واضح انهم فعلا عملوا عمايلهم بس زي ما انت قلت حلنا في الاخر ده رزق من ربنا ولازم نؤمن بالقدر خيره وشره
واللي مكتوبله شئ بيشوفه فعلشان ده كله لازم يكون بالنا طويل اوي احنا لسه بنسمي ونقول ياهادي
كنت لسه بتكلم مع اصحابي اليوم في الموضوع ده بعد الامتحان
كنا خارجين وشايفين الناس كلها وهي في اجازة ومستمتعين فقلتلهم كل ما اشوف كده بكتئب ردت حنان وقالتلي افتكري زمايلنا في طب واننا كلنا في مركب واحده وانتي مش هتزعلي
مع الارف والزهق واحساس اننا مش عايشين حياتنا زي باقي البشر الا انه احساس رائع احساس بالتميز علشان فعلا تعرف ان ربنا اخترلك حاجة كبيرة اوي ولازم نكون كلنا اد المسئولية دي
ربنا معانا ويجازينا بمجهودنا ده خير ويجعله ثواب في ميزان حسناتنا كلنا
وتتوالي الامتحانات تلو الامتحانات والمفاجئات تلو المفاجئات ونحن جميعا نؤمن بأن ما قدره الله حتما سيكون
ومن رزقه بيد الله فلا يحزن لانه عظيم لا يظلم عنده أحد
بس احنا كل اللي علينا ناخد بالاسباب وندعي كتييير
معلش ياشاعر طولت عليك بس بجد ده كلام بيدور في دماغنا كلنا دلواتي
يله جوو اون
ولا تدع الاكتئاب والقلق يجد طريقا اليك وان وجد فاصرفه سريعا لان العاقبة لن تكون سارة اذا تملكك اخي العزيز
معذرة للاطاله ثانيا
دعواااتك كتيييير وربنا يوفقنا كلنا

Anonymous said...

السلام عليكم

بجد جيت ع الوجيعه الامتحانات والنتيجه وطموحى انى اكون دكتور كويس برغم التقديرات الزباله اللي الواحد بيجبهاوبرغم الحاجات اللي الواحد بيشوفها احباطات فى الكليه ومستقبل غامض ودايما الواحد بيفكر في اللي جاي يا ترى هيحقق احلامه يا ترى هيفشل حاجات كتير

لولا ان الواحد عنده ايمان ويقين ان ربنا بيعمل للانسان احسن شىء كان احبط وجاله اكتئاب بس في نفس الوقت الواحد بيكون خايف انه يكون قصر ومعملشي اللي عليه
بجد ربنا يتولانا برحمته ويوفق كل اللي بيمتحن ويصبرناويقدرنا ع المسئوليه الكبيرة

اللهم انى اسألك علما نافعا وقلبا خاشعا وعينه دامعه وصدرا علي البلاء صابرا

اخيرا شكرا ع الموضوع الجميل

وبالتوفيق في الامتحانات
pure blue

Anonymous said...

السلم عليكم ورحمة الله وبركاته مش عارفة ليه اول حاجة فكرت فيها لما قريت اللى حضرتك كاتبه وكنت لسه قاريه بريد الجمعة بتاع الاسبوع ده ان كل مشاكلنا فى الحياة جاية من قلة ارتباطنا بدينا وان احنا دايما بنفصلوه عن حياتنا حضرتك عارف ليه الست اللى بتقشر بسلة والراجل اللى بيقولك فوت علينا بكرة بيعملوا كده مش عشان هم مش مسلمين او مسيحيين لا ولكن علشان هم فصلوا دينهم عن حياتهم وعن معاملتهم ممكن تلاقى الواحد فيهم اول لما بيجى معاد الصلاة بيقوم بسرعة يصلى والواحدة فيهم لبسه طرحة طويلة ولكن مستعده تعطل مصالح الناس علشان تشترى شراب لابنها_موقف حصل معايا فى شون الطلبة_ الفكرة انهم فكروا فى الدين كرمز وكصورة على الحيطة او كصورة لزقوها فى القلب معرفوش ان ربنا اوجدهم فى المكان ده عشان عاوز لهم الخير وبيحبهم .....عشان يديهم حسنات كل يوم وكل ساعة وكل دقيقة وعشان كده بقول اد ايه ربنا بيحبنا لانه دخلنا الكلية دى لاسباب غريبة وفى الآخر لقينا نفسنا قدام مسئولية كبيرة ادام حد بيعانى والمطلوب نخفف عنه_ يارب نعرف_ فى زمن احنا اللى عملناه واحنا اللى بنعانى منه !!!!!!!هقولك ان ربنا عاوزنا نفرج عن مسلم كربة من كرب الدنيا علشان يفرج عننا كربة من كرب يوم القيامة هو ده السبب اللى خلى الدكتورة تعيط جنب المريض وهو نفسه السبب اللى خلى والدك رحمه الله يحب الدكتورة غادة وانا عايزة اقول لحضرتك انى متضايقة اوى من الامتحانات اللى فاتت بس بنصح حضرتك ونفسى ان احنا نعمل زى سيدنا يعقوب عليه السلام (انما اشكو بثى وحزنى الى الله)صدق الله العظيم معلش طولت

Anonymous said...

السلام عليكم ازيك يا دكتور محمود بقي الباطنه والاطفال يعملوا فيك كل ده برده هما بصراحه يعملوا اكتر من كده بس الحمد لله علي كل شئ احنا بس نعمل اللي علينا والباقي علي ربنا سبحانه وتعالي .
احنا مش متعودين من حضرتك علي التشاؤم ده يا دكتور محمود سيبها لله وان شاء الله كل حاجه هتبقي كويسه علي فكره انا في رايي ان الطب مش تقديرات خالص بالعكس هو احساس بالمسؤليه الكبيره تجاه كل مريض قدامك انك تحس باللي قدامك وتبذل اقصي ما عندك علشان تخفف الم مريض ده اعظم حاجه ممكن نتعلمها من الطب بس يا ريت نتعلمها بجد .
اما بالنسبه للامتحانات فده شئ متعودين عليه كل سنه وربنا يعينا عليها ان شاء الله وانك عملت كويس او لا فده بيبقي توفيق من عند ربنا سبحانه وتعالي انا هقول لحضرتك حاجه ولكل الناس وياريت كلنا نعمل بيها

استعن بالله ولا تعجز فالضيق يعقبه الفرج
ربنا يوفقك ويكرمك ويحفظك باذن الله ويكرمنا جميعا ويهون علينا الايام اللي جايه ان شاء الله
بالنسبه للسياسه والكلام ده والنظام اللي بلدنا عايشه فيه فده علشان تبقي عارف ان انت اكيد في مصر نحن لانملك الا احنا نقول يارب.ربنا يكرمنا ان شاء الله بالتوفيق دائما
Amert Alhozn

عمر said...

بسم الله الرحمن الرحيم

ازيك يا حوده ، والله واحشني جدا جدا .. كأني بقالي أكتر من سنة ماشفتكش ( يمكن عشان يوم مذاكرة الباطنةكأنه سنة ) بس فعلا واحشني والله جدا

علفكرة أثر في جدا الموضوع بتاع الدكتورة ده ، وربنا ما يحطنا في موقف زي ده

بالنسبة لموضوع الامتحانات وسنة خامسة ، فأنا هاكلمك بصراحة .. الواحد السنة دي بالذات الحمدلله حاسس انه اتأقلم على وضع الامتحانات ممكن يتعامل مع الناس كأنه مش في توتر امتحانات ( طبعا.. مش خمس سنين أشغال شاقة ) يبقى لازم الواحد يكون اتعود ، خصوصا لما الواحد بيستمتع بالمذاكرة ، بصراحة الحاجه الوحيدة اللي مزعلاني ان الواحد مش عارف يروح يصيف ومش مخلي البيت يصيف كمان وعقبال ما يخلصش إن شاء الله هيلاقي رمضان وكل سنة وهو طيب وكل صيف وهو طيب

بالنسبة بقى للقصيدة اللي انت منزلها دي دمها خفيف قوي خصوصا الحتة بتاعة

قاعده زي الجبلـّه
بتفرط في البسله
و تفكر في العجين

...................................
آخر حاجه : كان لي طلب لو تسمحلنا ياحوده ننزل الموضوع بتاع (اشمعنى) اللي انت نزلته في الجروب على مدونة سنة خامسة ( اهي حاجه تفرفش الناس الأيام دي ) ونكون لك من الشاكرين

۩۝۩ Dr. Flavio ۩۝۩ said...

ازيك يا واد .. نفسي اعرف بتروح فين بعد الامتحان؟

معلش .. معرفتش اتصل بيك لأني نمت زي القتيل ولسه صاحي دلوقتي .. فجر يوم الثلاثاء

بغض النظر عن الطب والكلام اللي بقينا بنتعب منه لما بنسمعه

انت يا واد أبدعت في البوست ده

أه والله

ايه يابني كم الشعر ده وايه الشغل العالي ده
أول تلت ابيات .. ماشاء الله .. وهم يعني

وقصيدة عداد الميه للشاعر الشعبي محمود عبد الرحيم .. قصدي محمود أبو العزم هههههههههههههههههههههه

انت فاهم قصدي لأنك انت اللي قلت لي على الحكايه دي زمان
اخترت اختار جمله بس عجبتني فيها لأن كلها عاجباني موووووووت

حاول تسجلها بقه يا حوده عشان متعملش زي اخواتها وتلاقيها منشوره باسم غير اسمك .. ولا تلاقي شعبولا بيغنيها .. تبقى مسخره هههههههههههههههههه

والجزء التاني بقه بتاع انا يا مصر

و آه لو كنت انا روبي
هتيجي وتمسكي في توبي
لكن علشان انا جيوبي
بقت فاضيه بتنسيني

فاصل من البكاء والدموع
عااااااااااا عااااااااااا عاااااااااا

dina said...

سلام عليكم
موضوع جميل كعادتك يا محمود
كلامك عن حلمنا قلته لنفسى كتير . ساعات كتير بانسى انا دخلت ليه
بس مجرد ما بكون فى المستشفى او اشوف حد بيتالم بفتكر انا فى مكانى ده ليه
بس احساسى بالتقصير هو اللى بيموت
بجد ربنا يهون علينا ويصبرنا ويجعلنا سبب للشفا
وبعدين مش تزعل لا على اطفال ولا على باطنه
وعلى رايك خرجنا من الامتحان واللى حصل حصل
بس تعرف اهم حاجه انك من جواك عارف انك حتى لو قصرت زمان بتحاول تعمل دلوقتى وتشد على نفسك
عن نفسى مش يهمنى راى حد قد ما يهمنى راى انا عن نفسى ولوم النفس اوجع من لوم الناس
اسفه على الاطاله

quiet_storm said...

ازيك يامحمود ...ان شاء الله يكون الامتحانين اللى فاتوا عدوا على خير معاك ويارب معانا كلنا

-------
لان اللي حصل في الامتحان والدرجات اللي جبتها او فقدتها

هي في الاول وفي الآخر رزق من عند ربنا سبحانه وتعالي...


ايوة انا بحب الكلام اللى يريح الضمير ده
-----------

انا زعلى من نفسي على تقصيري طول السنه وكل سنه

اللي مش عارف كان غير مبرر ولا كان غصب عني


ليه بقى الكلام اللى يوجع ده...ما كنا كويسين

--------

عموما ...ربنا يوفقنا كلنا.. وكل اللى ربنا يجيبه خير


الجملتين اللى كتبتهم بجد جامدبن اوى

وعداد الميه احنا عايزين نطمن عليه برده
هو ركب دلوقتى ولا لسه بكره مجاش

قصيده جميله ودمها خفيف مع انها واقعيه
تحياتى ودعواتى بالتوفيق والصبر ...

Anonymous said...

ازيك يا حودة يمكن اكون اول مرة بكتب لك تعليق لكن صدقنى مش اول مرة بقرأ لك وبستمتع بمواضيعك وكلماتك
ويمكن كمان متعرفش انا مين بس انا مش هطول عليك انا محمد عبدالباسط
معلش ياحوده والله انا مشكلتى انى بحب اقرأ جدا بس موضوع الكتابه والتعليق ده ماليش فيه لكن يبدو انى خلاص هبدأ اكتب خصوصا انى بعمل مدونة جديدة باسم حلم كبير يمكن ربنا ينفع بيها ان شاء اخيرا كم انت كبير بكلماتك واحساسك الصافى يا محمود

عمر said...

معلش ياحوده ، أنا آسف إني أخش مرة تانية

بس كان لي تعليق بسيط قوي
هو عنوان التدوينة دي ( دماغ امتحانات ) وأنا مش شايف النقطة ، ولا كانت هتبقى دماغ وبقت دماع عشان دموع الامتحانات قلبتها دماع ... أرجو ما يكونش السبب التاني

وأستغل اتعليق التاني بقى وارحب باخوي وحبيبي عبد الباسط في علام التدوين - سلام كبير قوي لكل المدونين -

...............................
وفي الآخر بافكرك مرة تاينة بالطلب اللي طلبته في التعليق الأولاني .. أرجو الرد سريعا

جزاكم الله خيرا

Little Angel said...

ازيك يا محمود وعملت ايه فى الامتحانات مش عارفة اوف لينى يوصلك ولا لا؟ ربنا يوفقك يا مبدع

بجد اسفة جدا متغيبة عن روعة كتباتك لفترة بس رغم عنى والله ولما قريت كلامك ده اللى هو لسان حالنا فعلا وكانك بتكتب اللى جوه قلب كل واحد فينا وترسم بدقة احساسه فى لوحة مكتملة اركان الجمال .. ما شاء الله عليك يعنى ويزيدك وتبدع اكتر
مش عارفة ارد والله بجد بس كلنا كده وانا كده برضه .. وكل اللى اقدر اقوله ربنا يعنا على نفسناا ويجعلنا متمسكين بالصح دوما ونرضيه وفى طاعته وهى ده مهتنا ..ويغفر لنا قصورنا فى العبادة او فى العمل ربنا ارحم بينا فعلا
تحياتى لك وامنياتى

kmt said...

السلام عليكم ورحمة الله وبركاته

كلامك يطمن ان فيه شباب في كلية الطب و بيتعاملوا معاها علي انهم مسئولين عن ارواح ناس
وان الدكتور بيصلح بني ادم مش بيصلح جرار
الجرار لو باظ اجيب غيره ولا اترفد لكن الانسان لو مات صحيح عندنا كتير لكن ازاي بعدها ممكن اعيش

ربنا يكون في عونك
تحياتي
الي اللقاء

Anonymous said...

elrousha
ازيك يا دكتور محمود يا رب تكون بخير وكويس ان امتحان الباطنة عدى على خير لاني بسمع عن الماده ديه بلاوي.
طبعا القصيده جميلة ولو انها بتتكلم عن السياسه شويه واحنا الصراحة واخدين عهد على نفسنا ان احنا ما ندخلش في اي حاجة الحكومة او الشعب بيعملوها علشان ما نوجعش دماغنا بمشاكل مالهاش حل عامة ياريت حضرتك تنضم لينا وتكبر دماغك من الحكومة علشان تعرف تعيش واما نروحش كلنا السجن (بعد الشر
على فكرة الجمل اللي حضرتك كاتبها جميلة جدا ومؤثرة جدا

dina said...

بجد و الله مهنة عظيمة و طول ما انت نيتك حلوة و كويسة ربنا حيوفقك و احلى حاجة
لأن الحـــــــياة بدون الأماني...ودون الطموح انتحارٌ بطئ

عندما تنهمر الدموع said...

السلام عليكم ورحمة الله وبركاته
ازيك يا د/محمود انا مش هاخد من وقت حضرتك كتير بس كنت عايزة اقول ان الجملة اللي حضرتك كاتبها حلوة اوي
ما أصعب أن تملك عينين لم يعرفا طعم الدموع
وما أصعب أن تملك عينين لا يكفان عن البكاء
وما أجمل أن تملك عينين لم يحرمهما الله من رحمة الدموع ولكنه أعطاها يدٌ
تستطيع أن تمسحها وقلب ٌيستطيع أن ينساها
فعلا الدموع حاجة دايما بتفرج عننا كربتنا لكنها بتعبر عن الحزن اللي جوانا والالم اللي بنعيشه لكن النسيان ده من نعم ربنا علينا لازم نشكره عليه اما القصيدة فاحنا محتاجين ننشرها في كل حته عشان نبين للموظفين انهم ميستحقوش الشغل ده وانهم زي البطالة المقنعة والاحسن نعين مكانهم اللي يستحقوا في النهاية ربنا معاكم ويارب الامتحانات تخلص على خير