اشمعنى

Tuesday, October 21, 2008

بوست النهارده محاولة مستميته لرسم البسمة على وشوش كل الناس هنا
خصوصا زمايلي في سنه خامسه اللي الأجازة جت معاهم بأثر عكسي شويه
وعملت عندهم حالة من الملل والزهق
بس تعرفوا..أنا أكتر واحد كنت محتاج الأجازه دي وبشدة..تفتكروا ليه
لان الناس في الحتة عندنا افتكروني ساقط ورايح جاي بمتحن الملاحق
وليهم حق يعني..ماهو ماحدش هيروح في شهر تمانيه وتسعه يمتحن
الا واحد بملاحق
خصوصا بقى لما كانت رجلي مسكورة وكنت بركب الحمارة لحد الموقف
وببقى لابس ومتنهدم عشان الشفوي وحاطط الكتب أدامي و الجبس باين من تحت
بصراحه كان منظر يموت من الضحك
وكنت ببقى حاسس بيهم بيقولوا الواد ابوملحق الواد راح ابو ملحق جه
المهم القافيه حاجه كانوا بيعملوها زمان..يعني بيختاروا حاجه
ويعملوها فيها قافيه لبعض بحيث الموضوع يبقى منه فيه
يارب تكونوا سمعتوا عنها قبل كده
انا كنت كتبت واحده عن سنه خامسه وبعتها للجروب
انما قافيه النهارده عن الطب كله
كنت معدي مرة ولاقيت اتنين دكاترة امتياز قاعدين سوا
وجه في بالي لو دخلوا قافيه لبعض هيقولوا ايه
وكتبت القافيه دي في ساعتها كده مرة واحده
وكانت دي هتبقى العيديه بس قدر الله وما شاء فعل
يارب يارب يارب ولو سطر واحد بس من اللي تحت يخليكوا تبتسموا
لان ساعتها هحس اني عملت حاجه كبيرة اوي

انت بين الدكاترة.... اشمعني.....يا كبدي عليك
وانت دمــّـك..........اشمعني....كله سكر

انت الهــــــم اللي في حـــياتك...اشمعني...ممتد المفعول
وانت المشاكل اللي في حياتك...اشمعني...زايدة

هيزفــّوك انت ومراتك...اشمعني..على ترللي
وانتو هتاخدوا صور الفرح...اشمعنى...في معمل أشعة
وانت يوم الفرح هتلفــّوا البلد...في عربية اسعاف
هيكتبوا كتابكم....اشمعني...بعد الأكل
المطربه اللي هتغني في فرحكم.. اشمعنى..جفاف راضي
و يدخــّـلولكوا تورتة الفرح....اشمعنى...على شزلونج
وانتو هتقطعوا تورتة الفرح بتاعتكم...اشمعنى...بمشرطين
انتو هتقعدّوا المعازيم في فرحكم.....اشمعنى..بأرقام الجلوس
وانتو الناس هتيجي تزوركم...اشمعنى...في مواعيد الزيارة
هتقضوا شهر العسل...اشمعنى...في العناية المركزه
هتقسموا ا الشقه بتاعتكم.....اشمعنى....عنابر
وانتو هتقسموا شغل البيت بتاعكم... اشمعنى..طبنشيات
مراتك هتركب في البوتاجاز... اشمعنى..أنبوبة أوكسجين
وانت مراتك بعد ما تخيط الهدوم....اشمعني.. كل شويه تغيّر عالجرح
انتو ابنكوا هينزل بعد سبع شهور...اشمعنى..أصله قاطع مستعجل
وانتو ابنكوا هيزل بعد عشر شهور...اشمعني.. هيأجل
انتو قبل ما تبوسوا ابنكم...اشمعنى...هتعقمّوه
وانتو لما تخلفوا عيل مش هتهشتكوه...اشمعنى ...هترجّــوه

انتي مراتك هتنكد عليك...اشمعنى...على ريق النوم
وانت مراتك قبل ما تخلعك....اشمعنى..هتـبنـّــجك

يأكولك في شم النسيم... اشمعنى....ســــرنجة
وانت بتحب مرات السبع.....اشمعني ..عشان سبعة زيك
انت المفروض تتخصص نسا وولاده...اشمعني..عشان يبقى ليك وضع
البالطو بتاعك هياخد مخالفة...اشمعنى ..أصله من غير حزام
وانت هتحط في التانك بتاع عربيتك...اشمعنى..بيتادين تسعين

لما تخلــّـص هيعينوك.. اشمعني...في مستشفي الوداع الأخير
وانت لما تخلص هيعينوك...اشمعنى...في مستشفى شيّعني شكراً

في النهاية يارب تكونوا ابتسمتوا ولو ابتسامه صغيره
وانا مش قصدي أبدا أتريأ على الدكاترة اللي أنا منهم
بس حاولت أرسم ابتسامه منهم فيهم
وعلى فكرة انا مستني تعليقاتكم طول الاسبوع مش التلات بس
الثلاثاء القادم ان شاء الله....احنا مش جيل هفيّة

24 comments:

أحمد سعيد بسيوني said...

بسم الله

جميل البوست بجد يا حودة والله

انتو ابنكوا هينزل بعد سبع شهور...اشمعنى..أصله قاطع مستعجل
وانتو ابنكوا هيزل بعد عشر شهور...اشمعني.. هيأجل

جامدة جدا - طبعا بعد تصحيح ابكوا الى ابنكوا - منك يا ابو ملاحق
ههههههههههههه

باتخيل منظرك وانت رايح الامتحان على الحمارة ..... حاجة تحفة حقيقي هههه

ربنا يبارك فيك ويزيدك

تحياتي الخالصة

أحمد سعيد بسيوني said...

معذرة

كنت عاوز اضيف
انك بكرة تركب المرسيدس ان شاء الله وانت رايح المستشفى - بعد التخرج - وما تعبرش حد ، وتشوفني ماشي على رجلي في الشارع تقوم مشاور للدكتورة - زوجتك - اللي قاعدة نبك في العربية وتقول : يااااه .. الواد ده كنت اعرفه
كان معايا في الدفعة
هههههههههههه

دمتم

رحيل said...

احلى قافيه شوفتها صراحه وفي الصميم ههههههه

GEHAD said...

)بس حاولت أرسم ابتسامه منهم فيهم)
ما شاء الله....أبدعت...ههههههههه
حلو جدااااااااا
ربنا يسعدك
أضحك الله سنّك
وجزاك الله خيرا على إدخال السرور على قلوبنا
تحياتي وتقديري وامتناني

محمد عبد الباسط said...

المطربه اللي هتغني في فرحكم.. اشمعنى..جفاف راضي
لحد الكلمتين دول ومقدرتش اكمل شرب الشاى من كتر الضحك وسبت الكبايه من ايدى هههههههههههههه اه والله ياحوده
وكان قرار سليم انى اسيب الشاى لانى بجد ضحكت كتيييييييييييير اوى
تسلم يا حوده وربنا مايحرمنا منك ولا من كلامك ولا من عاطفتك
دمت سالما غانما تقبل تحياتى

حلم كبير

هبهوبه said...

اجمل حاجه في الدنيا انك تقدر ترسم بسمه على شفاه انسان وانا متأكده انك قدرت تعمل ده
بس الأجمل بقى انك مش مقدر ان اللي انت عملته ده هيجي عليك انت
لأن اول ما تفكر تتجوز اصحابك مش هيسبوك هيمسكوك قافيه بس انت اللي بدأت
انا عايزة اقولك اني حقيقي ابتسمت لمجرد انك رجعت تكتب يوم التلات واما قرأت البوست ضحكت بجد من قلبي
ربنا يسعدك دايماً زي ما بتحاول تسعد كل اللي حوليك.

dina said...

جميله جدا يا محمود
عن نفسى بدات اضحك من اول سطر
ربنا يكرمك

quiet_storm said...

بوست رائع يامحمود وفعلا دمه خفيف
ربنا يكرمك ويسعدك انت كمان
وعلى فكره الدكاتر يستهلوا كده برده
:D:D

عندما تنهمر الدموع said...

السلام عليكم ورحمة الله وبركاته
ازيك يا د/محمود يارب تكون بخير والحمد لله على رجوعك مرة تانية لبوست يوم الثلاثاء بجد كل بوست من الثلاثة اللي حضرتك كاتبهم احلى من التاني الاول فرحتنا بالدكتورة الغالية والاخت الجميلة همسات داعية والتاني رجوع حضرتك للكتابة خاصة ان القصيدة فيها روح الفكاهة عالية جدا وبجد هي خرجتنا من حالة المذاكرة والاكتئاب اللي احنا فيها بجد طول ما انا بقرأها وانا بضحك ومعلش متزعلش من اللي فكروا انك بعد الشر شايل مواد اصل محدش يعرف ان اللي بيدخل طب بيفضل طول عمره بين الكتب وكل وقته في امتحانات خاصة وان مهنة الطب مش سهلة وان كونك تكون طبيب ارواح الناس بين ايدك فهذا ليس بالامر الهين في الاخر احنا اللي اخترنا ان ده يكون مصيرنا واخترنا اننا نشيل مسؤولية يارب نكون ادها ويارب يوفقنا ويساعدنا ويقوينا .في النهاية شكرا مرة تانية على القصيدة واوعدك كل ماابقى عايزة اضحك هقرأ القصيدة وياريت متتأخرش علينا في الكتابة ومتزعلش عشان شغل شرم الشيخ اكيد مكنش فيه الخير ليك وكما قال المولى عزوجل –وعسى ان تكرهوا شيئا وهو خير لكم

Anonymous said...

عاوزين رومانسي باه

Anonymous said...

عجبتني أوي
خصوصاً حتة التورتة على الشيزلونج والبيتادين تسعين

عسل يا محمود

شكراً على البسمة

Anonymous said...

كل يوم بشوف فية بوست ليك عالمدونة

ربنا يعلم انى بحترمك بعده قد اية

بحترم اسلوب كلامك

بحترم لباقتك

بحترم كل حاجة فيك

بجد بوست اكثر من رائع

وصحيح

انا بجد مبسوط اووووووووى انك ذكرت اسمى فى البوست التالت

مكنتش مصدق بجد انك بقيت عارفنى شخصيا كده

انا بجد يمكن لحد دلوقتى مش مصدق انى بقيت اعرف محمود ابو العزم شخصيا

وهو يعرفنى شخصيا

بعد لما كنت بسمع عن محمود كاسم كبير اوى وشاعر جامد

وكل اللى كان يربطنى بيه انه زميل فى الكلية

بجد بجد

اخى فى الله

احبك فى الله

استمر والى مراتب اعلى واعلى

ان شاء الله

Anonymous said...

السلام عليكم ازيك يا دكتور محمود
البوست حلو اوي وحلوه اوي حكايه القافيه دي وبجد ضحكنا جدا ومن قلبنا كمان والاحلي من كده كمان ان حضرتك هترجع تكتب كل ثلاثاء تاني ان شاء الله
ربنا يوفقك ويكرمك ويحفظك ويزيد من موهبتك وتكتبلنا كمان حاجات تضحكنا وتفرحنا دايما ان شاء الله

Amert Alhozn

Anonymous said...

الموضوع ده اكتر من رائع

وحلوه اوى القافيه دى

مش اى حد يعملها

وطبعا مش اى حد غير دكتور محمود

اتشرفت اوى بمعرفتك

ويعنى افتكرنا كده باى حاجه

محمود ابوالعزم said...

احمد سعيد

كده يا احمد
فرحان في
انتي مش كانت رجلك مكسورة برضو
بس كسر عن كسر

على الاقل احنا عندنا حماره وانت لأ

ربنا يكرمك يا ابوحميد
وتفضل منور المدونه
وتفضل مدونتك في تقدم دايما

محمود ابوالعزم said...

ابوحميد

بصراحه كده لما اركب المدونه
مش هعبرك
ههههههههههههه

انا بهزر طبعا
انت عارف غلاوتك

محمود ابوالعزم said...

رحيل

حتى ولو زيارتك سطر واحد
انما منك زي العسل
ربنا يخليكي

محمود ابوالعزم said...

محمد عبد الباسط

انت والله من الناس اللي انا منزل الموضوع علشانهم مخصوص

الحمد لله انه عجبك

ويارب دايما في تفوق وتقدم

محمود ابوالعزم said...

دينا

اسعدتني زيارتك كالعاده والله
ربنا يكرمك

محمود ابوالعزم said...

خالد سليم

شكرا انك نورت المدونه يا حبيبي

شكرا ليك انت على مرورك

محمود ابوالعزم said...

محمد الخطيب

ايه الكلام ده يا محمد
انا عيطت والله
انا اللي لي الشرف اني اعرف حد زيك يا محمد
واتمنى قريب يكون ليك مدونه
وكلنا ندخل عليها ان شاء الله

احبك الذي أحببتني فيه
يعلم الله كم أحبك فيه

محمود ابوالعزم said...

منار

احنا اللي اتشرفنا بمعرفتك والله
والمدونه اتشرفت بتعليقك
اتمنى ماتكونشي زياره خاطفه وتمشي
وتفضلي دايما معانا هنا

semsema said...

يااااااااااه
دانت شردت الدكاترة خالص يا محمود
دول غلابة والله ويستاهلوا الصدقة
جميلة ودمها خفيف
شكرا للبسمة اللي رسمتها علي شفاه كل اللي قرأ
تحياتي

عمر said...

مش بقولك انت فعلا بتبدع في ربط الطب باللغة العربية

ياريت ما تقطعش الموضوع ده ياحوده

وأضحكك الله وأسعدك كما أضحكتنا وأسعدتنا

تحياتي