مذكرات حوكشة

Tuesday, November 11, 2008

السللام عليكم ورحمة الله

حوكشه شخصية مش واقعية ومش خياليه
فيه كتير مني بس مش أنا
وكتير من المواقف اللي حصلتله حصلتلي انا كمان
وبالمناسبه حوكشه ده اسم دلع كانت أختي حنان احيانا بتقولهولي
والنهارده اول حلقه ولو عجبتكم هنزلها تاني على فترات كده ان شاء الله
بالمناسبه قبل البوست بوست النهادرة تقريبا كله حصللي بما فيها موقف المدرج


يااااااااااااااااااااااه
أخيرا هدخل طب
والله كبرت يا واد يا حوكشه وهتخش طب وتبقى دكتور أد الدنيا
وقلت مادام طب يبقى ماينفعشي عم عبد العظيم الترزي تاني بقى
بالبناطيل الواسعه الي كان بيفصلهالي دي اللي عامله زي بناطيل الصيادين
معلهشي بقى يا عم عبد العظيم...أنا في طب
خدت الست الوالده ورحت على شارع البورصه
هي معروفه كده مادام طب يبقى شارع البورصه
انا كنت واخد الحاجه عشان أنا أنقي وهي تفاصل
أنا ماينفعشي أفاصل ...انا في طب
و روحت بعد مانقيت الطقمين والجذمه السمرة ام بوز من أدام دي
اللي عامله زي مصباح علاء الدين
ويوم الكلية صحيت من النوم..شفتوا الاصرار...صحيت من النوم
لبست و روقت نفسي ولأول مرة احط القميص في البنطلون
ماهو لازم أحط القميص في البنطلون...أنا في طب
وشلت الكشكول أبو سلك أبو أربعه جنيه ونص و حطيت القلم أبو تكتيكه
في جيب القميص وشلت البالطو على ايدي
أنا عارف ان البالطو أكيد مالهوش لازمه من أول يوم بس أنا في طب
ولازم كل الناس تعرف ان أنا في طب ..ومشيت أتغندر و أنا شايل البالطو
عشان اللي ماعرفشي في حتتنا يشوفني وانا شايل البالطو
والناس شغاله اتفضل يا دكتر..مع السلامه يا دكتر....ربنا يوفقك يا دكتر
شفتوا.. دكتر من اول يوم كده..دا الواحد على سنه رابعه ممكن يعمل عمليات لوز بقى
و مراعاة ً لمشاعركم أنا مش هقدر أحكي عن مواصلة البلد بتاعتنا
انا بس هقولكم هي عباره عن عربية ربع نقل وعليها كبّوت ومحطوط فيه دكتين قصاد بعض
والمفروض انها يادوب بتاخد أربعه في كل دكة بس عمرها ما بتمشي غير سته وسته
هو كدا.... سته هنا وسته هنا
و في أول يوم- وكل يوم- كنا خمسه ولاقينا ست كبيرة جت رمت نفسها في النص
وقالت معلهشي نساع بعضنا والمطبات هتنزلني.....دول خمس دقايق كلنا نازلين ..
أنا أصلا نازله في السكه
و طلعت العربية لحد ما وصلنا السنطة ونزلت لاقيت خلق مالهمش اول من آخر
يادي السواد يا بلح...دي جمله اعتراضيه بيقولوها عندنا في البلد لما يستغربوا
يا دي السواد يابلح كل دي ناس عايزة تركب...أنا عمري ماشفت زحمه كده
بجد بجد ربنا يعين بابا حسني وماما سوزان
و ييجي الميكروباص من دول وتلاقي كل الناس بتجري وراه
بس أنا ماينفعشي أجري...أنا في طب
لكن لما عدى تمن تسع ميروباصات قلت لأ أنا كده لازم أزاحم وأجري وسامحني يا طب
ولازم الواحد يبقى يشترك في صالة جيم عشان الموضوع شكله هيطوّل بعد كده
و رحت أزاحم و أزق و اقاوم وعمال أصرخ بالراحه يا بشر
ماينفعشي كده أنا في طب..بالراحه دا أنا جايب الهدوم من شارع البورصة
لكن مافيش فايدة ونتج عن هذا التزاحم تمزيق واحد كشكول فئة أبوسلك
وفقد قلم أزرق جاف فئة أبوتكتيه و تمزيق واحد بالطو ماركة اللي ماشافشي يشوف
وبعض الجروح السطحيه...المهم ركبت في آخر كرسي
ويومها حصلت الخناقه اللي الحمد لله دلوقتي اتعودت عليها بتاع أربعه ورا
بس الراجل التباع – بكل ذوق وادب احترام- طلعنا غصب عننا واحنا أربعه ورا
وقال جملته الشهيرة برضو.. يا جماعه ساعوا بعضكم دول خمس دقايق وكلكم نازلين
وفيه واحد نازل في نص السكه
لكن للأسف الشديد جه في نص السكه وركــّب واحد خامس معانا
المهم بسم الله ما شاء الله يعني اللهم لا حسد وصلت الجلاء
ووصول الجلاء ده حاجه صعبة جدا زي العيش المدعم واللبن
المدعم مش كل الناس بتوصلـّـها ولازم تضحيات كتيرة عشان توصل هناك
و جه الدور اني أركب السرفيس اللي رايح الجامعه وللأسف كانت نفس الزحمه
بجد بجد ربنا يعين بابا حسني وماما سوزان
والمرادي ما استنتش رحت زاحمت علطول وعملت ناصح وقلت بلاش أركب في الكراسي
اللي ورا اللي فيها اربعات دي وقمت راكب في ضهر السواق لوحدي
و فجأه لاقيت ست كبيرة طالعه ..خد مني يا ابني..هاتي يا حاجه
و حطت الطشط فوقي على ما تركب بس لما ركبت ماخدتشي الطشط
ويا دوبك قدرت أنادي..ياحاجه يا بتاعت الطشط خدي الطشط بالله عليكي
أيوة يا ابني انت فين...أنا تحت الطشط يا حاجة
وخدت الطشط بعد ما كان ساب ريحة جميله من الحاجات اللي كانت فيه
جبنه حادقة على سمنة بلدي على حاجات مش عارف ايه هي
بقيت خايف بعد ما انزل يكتبوا على ضهري
حوكشه ...بطعم وريحة السمنه البلدي...وتحدّي
بس المهم اني وصلت الجامعه ودا بقى في حد ذاته انجاز كبير لا يقل في حجمه
عن تحقيق ميداليه أولمبية أو كأس الأمم الافريقية
ودخلت جري لإني أتأخرت أوي ولما دخلت تهت..أروح فين..أروح فين
ونقيت واحد زي حالاتنا كده و سألته هما بتوع أولي طب بياخدوا فين
بصّلي بصة غريبة أوي و اللي أغرب من البصه دي ان لحد دلوقتي كل ما
حد يعرف اني في طب يبصلي البصة الغريبه دي
المهم الراجل مشكورا شاورلي على المدرج..ودخلت وباندفاع الشباب
دخلت على المدرج اللي تحت علطول
دخلت...مالاقيتشي دكتور بيشرح ولاقيت كل واحد قاعد مع واحده
يادي السواد يابلح...هو أنا اتأخرت أوي كده
ياخسارة الطقمين بتوع البورصة و جذمة علاء الدين
قعدت و أمري لله و فضلت أدور على أي حد أعرفه مش لاقي
شويه ولاقيت حد بيسأل اللي جنبه... ايه يا ابني عملت ايه
قاله الحمد لله طلعت بمادة واحدة
انا شكلي اتأخرت أوي أوي
وقبل ما ألحق أسئل لاقيت واحد جاي جري أنا جبت جدول المحاضرات
اتملـّوا معايا...من تمانيه لعشرة أحوال شخصيه
ومن عشرة لاتناشر قانون مدني
يانهار ابيض...قانون مدني واحوال شخصية
انا فين يا جماعه..قالولي انت في مدرج حقوق
امال بتوع الطب بياخدوا فين....في المدرج اللي فوق
طلعت جري...لاقيت المدرج مليان على آخره
والرجاله في جنب والحريم في جنب ونسبه كبيرة لابسين نضارات
وكل الناس بتكتب ورا الدكتور
قلت بس...أيوه كده... هو دا الطب
وقعدت أدور على حته أقعد فيها مالاقيتشي
قمت جاي على جماعه كده وحاشر نفسي في وسطهم
ولما سألوني ايه يا كابتن اللي بتعمله ده
قلتلتهم معلهشي ياجماعه نساع بعضنا... دول خمس دقايق وكلنا نازلين
أنا أصلا ً ...نازل في السكه

27 comments:

۩۝۩ Dr. Flavio ۩۝۩ said...

بحجز أول كومينت

شوف الرخامه يا أخي

بعد الغياب ده وجاي احجز برده

۩۝۩ Dr. Flavio ۩۝۩ said...

هههههههههههههههههههههههههههه

بجد هموت من الضحك

يارب ما تنزل أبدا في السكه يا حوده وتكملها للآخر علي خير


دمت بخير

موناليزا said...

هههههههه خمس دقائق ونازل وانت فى طب!!!!
وصدقوك

semsema said...

هههههههههه
حرام عليك هموت من كتر الضحك
ايون كده هم دول بتوع طب
بجد مذكرات جميلة ودمها خفيف اوي وهنتظرها دايمن
وتصدق ادتني امل
لاني مش انا لوحدي اللي بتبهدل في المواصلات وبعاني من ظاهرة اربعة ورا
وبكده هبطل حقد علي ميكروباصات السنطة وكترتهم
جو اون
تمنياتي بالتوفيق

Unknown said...

لا حول الله يا ربي
دا موصلات كفر الزيات رحمه بقي
داحنا في نعمه ومش عارفين
جميله يا محمود
مسنيه الباقي سلام

رحيل said...

برافو يا حوكشه اديك طبيت وماحدّش سمّى عليك ههههه الى الامــــــــــتتام يا دكتر D:

عمر said...

بسم الله الرحمن الرحيم

هههههههههههههههه

مضحكه ... آه ، دمها خفيف .. آه ، لكن فعلا حقيقية وأعتقد حصلت مع معظمنا

انا فاكر اول ما شفت على النت اني داخل طب نزلت سجدت شكر لربنا ، وانا رايح الكلية من كفر الزيات كنت لا أعرف كفر عصام ( اللي بننزل عندها عشان نخش المجمع ) فين وكنت معرف الأتوبيس كله اني نازل كفر عصام عشان يقولولي فين ( جاي من بره بقى ) وفضلت من ثمانية - ثمانية ونص بالف على مدرج طب واروح الكلية وارجع امشي تاني لحد ما وصلت .. فعلا أيام لا تنسى

بس علفكره حاليا مواصلات السنطة يا حوده احسن كتير من كفر الزيات ( باينها اتحسدت) والله اعلم

ننتظر بقية مذكرات حوكشة

تحياتي

dina said...

بسم الله
جميله جدا
ومعلش على كل التعب ده بكره تلاقيه بقايده باذن الله
بجد ضحكت جدا وكنت محتاجاها
ربنا يفرحك زى ما بتفرحنا
مستنيه الباقى

Anonymous said...

يمكن دي تعتبر اول مره ارد ع بوست لحضرتك د/محمود

بس فعلا في البدايه المدونه جميله بجد

اما بالنسبه للبوست ده فهو بجد جميل قوي

والاسلوب جميل

بس بجد ده بيحصل في المواصلات

انا ع كده لازم احمد بنا مليون مره

بس بصراحه مش متخيله قوي بس بجد فعلا صدقني والله انا مابهزر

مش متخيله ان ده بيحصل في المواصلات

بس كاسلوب حضرتك ممتاز بجد

امتعتنا

شكرا جزيلا

سالي ابو الاسعاد

أحمد سعيد بسيوني said...

والرجاله في جنب والحريم في جنب ونسبه كبيرة لابسين نضارات
وكل الناس بتكتب ورا الدكتور
قلت بس...أيوه كده... هو دا الطب

لحد هنا وما استحملتش
ووقعت على ظهري من الضحك

كلنا ذاك الرجل
كلنا كنا حوكشة

دمت بخير

Anonymous said...

مش هقول حاجه غير
هههههههههههههههههه
هههههههههههههههههههه
هههههههههههههههههههههه
هههههههههههههههههههههههه

Anonymous said...

خش هنا
http://sunlightatnight.blogspot.com/2008/11/blog-post.html
ضروري

Anonymous said...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه..........جامده

Anonymous said...

لذييييذ جداً

وخصوصاً الخمس سطور اللي في الآخر

ههههههههه
عسل أبيض



متابعين

quiet_storm said...

بجد بشكرك جدا على البوست الرائع ده
مع انك كنت هتعملى مشكله بسببه

بس حصل خير بقى

وفى حكايه المواصلات بقى مش هستغرب لاننا تقريبا نفس المعاناه

بجد موضوع تحفه رائع
مستنين باقى الحلقات بسرعه جدا

شق القمر said...

:))
=))
ماشاء الله محمود
كلها خمس دقايق ونازل هنا
هههههههههههههههه

هبهوبه said...

السلام عليكم
طيبة قلب وخفة دم وصراحة رائعة ومشاعر رقيقة وجميلة
في إنسان في الدنيا أجمل من كده
أنا بعتذر جداًًًًً عن عدم تعليقي على موعد بغير موعد لأسباب فنية بالنت بس حقيقي كلماته خطفت قلبي
والنهارده البوست كان دمه خفيف جداً إحنا هنستنا باقي مذكرات حوكشة
بس الإسم ده مش ماشي مع بالطو طب وطقم شارع البورصة بس ماشي مع السمنه البلدي وتحدي.

shady gad said...

بسم الله الرحمن الرحيم
لو مكانك كل يوم هبيع حكاية انا فى طب دى خالص وبعدين فعلا شكلها خمس دقايق ونازلين فاضل منهم شويه صغيرين
بالتوفيق فى البقيه

باجوجو said...

معلش يا جماعة
أنا عارف إن التعليقات كتير
بس برضو لازم نساع بعضنا
وكلها خمس دقايق وماشى علطول
حبيبى يابو العزم
ربنا يخليك ويخلى ماما سوزان
تحياتى

Anonymous said...

بجد دمها خفيف اوووي بجد ضحكت من قلبي مستنيين باقي الاجزاء
متتأخرش علينا

عندما تنهمر الدموع said...

السلام عليكم ورحمة الله وبركاته
ازيك يا د/محمود يارب تكون بخير
بوست النهاردة جميل اوي ومضحك بشكل رغم انه حاجة بتحصل كل يوم وبنسمع عنها وشوفناها لكن اول مرة اضحك عليها كده فعلا كليتنا زي ما حضرتك وصفتها بالضبط مدرجات عاملة زي علبة السردين العدد اللي تساعه 400او500بالكتير لكن العدد الفعلي 900 1000 ولو حابب فهي بنت حلال هتشيل هتشيل هنعمل ايه يعني اما بقى نظرة الناس لطلبة طب فهي نظرة شفقة وعطف عشان مجرد انهم عارفين انها 7سنين فما بالك لما يشوفوا اللي بيحصل طول السبع سنين
تابع في كتابة المذكرات عشان نلاقي حاجة تضحكنا
ربنا يكرمك ويوفقك

Anonymous said...

قمت جاي على جماعه كده وحاشر نفسي في وسطهم
ولما سألوني ايه يا كابتن اللي بتعمله ده
قلتلتهم معلهشي ياجماعه نساع بعضنا... دول خمس دقايق وكلنا نازلين
أنا أصلا ً ...نازل في السكه


حلو اوي البوست ده بجد
تسلم ايدك وافكارك يا دكتور
وفي انتظار بقية المذكرات

بس انا عندي استفسار بسيط .........هو انت ناسيني ( د/شمس
ولا في ان في الموضوع ..........


منتظره رد حضرتك ضروري في الكومنت ده

walaa rizk said...

ههههههههههه

لا بجد حلوه اوى

كمل اليوميات

منتظرين

محمد عبد الباسط said...

تسلم يا حوكشة يا عسل....انا كمان بقول لاحمد اخويا (حبيب قلبي )الصغير احيانا حوكشة
معذرة للانقطاع والتاخير لظروف متعدده

GEHAD said...

أضحك الله سنك دكتور محمود
بجد ممتع للغاااااااااااااااية
مع إن اللي حكيته في الواااقع متعب ومرهق للغااااية برده
وبأقول لسالي..أولا منورة حبيبتي ..ثانيا لا اتخيلي..بيحصل ولو مش قادرة.. تعالي معانا يوم..ههههه
وبأقول لحنان ..مش تقريبا حبيبتي ..يمكن المعاناة عندنا زيادة شوية
ولاّ نبطل حقد زي ما سماح بتقول
وربنا يعينكم ويعينا ..هانت كلها...ههههههه

بُـوركت و وُفقت دكتور
وفي انتظار باقي هذا الابداع الرائع المميّز اللطيف
خالص تحياتي وتقديري

Anonymous said...

تحفة قوي يا محمود
اسلوبك جميل و الله جدا

ابن بلد بجد يا حوده

عايز اعرف باقي الحكايه

على فكره حوكشه ده هتعرفه اكتر السنه الجايه مع الدكتور محمد المطري في الجراحه

هيقولك كلام حلو قوي عليه

تبقى افتكرني ساعتها

:D :D :D :D

dr.Karim Nabil

Anonymous said...

جميل اوى البوست يا دكتور

ورحلة المعاناه اكيد هى دى اللى خلته ينسى الفوطه جوه العيان

ربنا يوفقك

اختك

منار