استفتاء طبي جدا

Monday, December 22, 2008

السلام عليكم ورحمة الله
قد لا نلوم الطبيب إذا لم يستطع أن يوفر لمرضاه علاجاً ناجحاً
ولكن من حقنا أن نلومه إذا لم يوفر لهم حياة ً كريمة ً حتى النهاية
ان شاء الله هبدأ أولا بالاستفتاء وبعدين أٌقولكم ليه كتبته لو حد حابب يعرف
السؤال لينا احنا اللي هنكون دكاتره ان شاء الله
وللدكاتره اللي بقوا دكاتره رسمي دلوقتي ولكل حد له علاقه بمجال الطب..
واولهم الناس اللي ربنا بيكتبلهم يروحوا يكشفوا عند الدكاتره
هو ايه الصح؟؟
اننا نقول للمريض حقيقة مرضه زي ماهي و اقول الصورة واضحه و احطه جوة الصورة
ولا اني أهوّن عليه وما اصدموش واقوله انه كويس وانه مافيهوش حاجه
وانه ان شاء الله هيخف ودي شويه مشاكل بسيطه وهتروح
طبعا فيه أمراض عادية مش مستاهله الاستفتاء ده
انما فيه أمراض زي الكبد والسكر والأورام -ربنا يعافينا جميعا- محتاجه نوصل فيها لرأي واحد
أنا طرحت التساؤل ده كتير وسمعت آراء كتير
ناس قالت اني لازم أقول للعيان وأهله لأسباب كتيره
منها انه ممكن لو فهم من كلامي ان الموضوع بسيط ممكن يهمل في علاجه
وانا أبقى كده ضريته ماأفدتهوش
وممكن يروح لحد تاني ويعرف حقيقة مرضه وابقى كده فقدت مصداقيته عنده
والكل هيتهمني اني ماعرفتش اشخـّص..مش عرفت ومارضيتشي أقول
كمان انا كده بهيأه نفسيا -لو انت متوقع طبياً ان الحاله هتسوء-عشان مايتصدمش
وعشان كمان ماحدش يقوللك- واولهم العيان- انت ماقولتليش ليه يا دكتور
فيه كام حد قاللي رأي قاسي شويه بس فيه ناس كتير قالتهولي وناس كتير بتعمل بيه كمان
انه احيانا الحاله -طبيا-وبركز على كلمة طبيا لان الأعمار بيد الله طبعاً
احيانا الحاله بتبقى مافيش أمل طبي في العلاج وبيشوفه انه من الواجب
اني لازم أبلغ أهل العيان بكده لانه ممكن يروح
لدكاترة تانيه مستغله عايزه تاخد اللي أدامه واللي وراه ويبقى زي ما هما قالوا..موت وخراب ديار
ناس كمان قالتلي انه ابلاغ المريض بحالته جزء لا يتجزء من الأمانه الطبيه
و ان واجبنا كدكاترة اننا مانخدعشي العيان ولا نسيبه عايش في وهم عشان ماينصدمش
آراء كتير أوي كانت بالشكل ده
آراء كتيرة تانيه كانت العكس
ناس قالت ان المرضي-خصوصا في مصر مثلا-أهم حاجه في علاجهم الحاله النفسيه
يعني لو المريض طالع على رجليه
وانا قلتله انت عندك وعندك وعندك اكيد هينزل واللي معاه شايلينه
وقالوا كمان ان المريض هيوهم نفسه زياده فوق المرض اللي انت حكيتله عنه
و ده هيخليه هيتعب أكتر
ومادام فيه أمل لو واحد في المليار ليه أحرمه منه
لو حتى صرف اللي أدامه واللي وراه
انا عرضت جزء من وجهتين النظر بدون تحيز
ودلوقتي الكلام ليكوا انتو
السؤال التاني
لو اعتبرت ان الفتره اللي قضيتها في دراسه الطب او في شغله
حلم وانت صحيت منه دلوقتي وأدامك ورقة الرغبات...هتكتب فيها ايه
طبعا احنا كلنا مؤمنين بالقدر وكلنا هنكتب طب تاني طبعا
بس تخيل..مجرد تخيل..من غير أي اعتراض على إرادة ربنا طبعا
السؤال التالت
هو الطب بيقسّي القلب
يعني قلبك دلوقتي زي قلبك قبل ماتدخل طب
على فكرة يمكن السؤال ده يحسوا اكتر الناس اللي خلصت واشتغلت
بحس انه من كتر التعود بقى عادي عندهم ان حد يموت أدامهم
أو ان حد يتألم أدامهم
فيه ناس بتشوف ده حمودية قلب وناس بتشوفه مسألة تعود
دكتور كبير مرة سألته
قاللي انه أول ما اشتغل كان بيرتبط أوي بكل حاله
و بيزعل أوي على كل حاله ربنا يكتبلها الوفاة بالمرض ده
بس يوم بعد يوم لقى نفسه كده مش هيقدر يكمل
وانه شويه شويه بقى الموضوع مش عادي بمعني عادي
بس هو ده شغله اللي لازم يشتغله ويكون أده وقادر على احتماله
مش عارف انتو حاسين بإيه
كده الاستفتاء خلص
لو حد حابب يقري لحد هنا
أما ليه كتبته
أنا بحب الأطفال الصغيره جدا زي ما كلنا بنحبهم
ومش عارف ليه بحب البنات الصغيره اكتر
والسنه اللي فاتت في الأطفال ناس كتير ارتبطت بأطفال مرضي هناك
خصوصا أطفال عنبر الدم..مش عارف ليه كانوا بيخشوا القلب كده علطول
ومنهم بنت صغيره ماكملتشي تلات سنين ونص
انا ارتبطت بيها جدا جدا جدا جدا اجدا
مش عارف ليه..ومش عارف ليه هي كمان ارتبطت بي وحبيتني أوي كده
انا كنت هنزل صورة لينا سوا وهحكيلكوا عنها كتير أوي
بس احتراما ًلخصوصيتها وخصوية المرض اللي كان عندها مش هينفع أعمل كده
هحكيلكوا بس أكتر موقف ربطني بيها
تاني يوم عرفت نتيجة التحليل بتاعها كان الموضوع صعب على جدا
ويمكن الناس القريبه مني تعرف الموضوع أثر على أد ايه
وكنت شايلها على كتفي و بنتمشي وبعدين رجعتها لوالدتها ونزلت
بعد كام خطوه كده لاقيت صوتها جاي من ورايا
انت هتمشي؟؟؟
أيوه-
وهتسيبني؟؟؟
موقف صغير أوي وكلمة صغيره أوي بس أثرت في جدا
لما رحت أسئل عليها قريب ما لاقيتهاش
والله كنت حاسس ان قلبي هيقف
وقابلت الدكتور عادل وسألته.. أول كلمة قالهالي.. قاللي خلاص
و قبل مايجرالي حاجه قاللي..لا ياعم خلاص خفت
كان من أسعد الأخبار اللي سمعتها في حياتي كلها
بجد بجد كنت في قمة السعاده
ربنا يتم شفاها على خير هي وكل الأطفال اللي هناك يارب
وفي الفتره دي قابلت النوعين دول من الدكاتره
بس ماعرفتش مين فيهم اللي صح
أنا مش عايز أطول عليكوا اكتر من كده
بس فيه كمان خبر سمعته وأسعدني جدا
فيه بنت من زوار المدونه أختها ولدت قريب
تفتكروا سموا البنت ايه
؟؟؟؟؟؟؟؟؟؟؟
سموها بلسم..على اسم بطلة قصة بلسم
بجد بجد متشكر ليها أوي
واتمنى ييجي اليوم أشوف بلسم الحقيقه شكلها ايه
في النهايه مستني آرائكم كلكم على التلات أسئله
وكمان ان شاء الله فيه دكاترة من الجامعه هيشاركوا معانا
سواء من متابعي المدونه او انا هنقل رأيهم هنا
وللناس اللي قالت انها مش بتعرف تلعق
هما ممكن يتكوا بالموس على كلمة أو دايرة غير معرف أو أنونيموس
وبعدين لو حابين ممكن يبقوا يكتبوا أساميهم تحت
في انتظاركم جميعا

11 comments:

مذكرات مشاغب said...

بالنسبه للسؤال الاول وهقسم اجابته لقسمين
القسم الاول لو المرض ده ميئوس منه طبيا وفي الحاله دي انا مش هقوله على حقيقة مرضه عشان مش يعيش الجزء الباقي من حياته(الاعمار بيدي الله)متالم ومنتظر الموت حتى لو راح لغيري يبقى على الاقل انا عملت اللي عليه.
القسم التاني لو هو مرض مزمن ومحتاج عنايه شديده بس مش هياثر على حياته اذا اهتم بيه.
ففي الحاله دي لازم اقوله على الحقيقه عشان ميهملش في علاجه.

بالنسبه للسؤال لتاني هكتب اني اقعد في البيت واربي العيال
لا بجد اعتقد اني هكتب برده طب
لانها مهنه ساميه على الرغم من صعوبة المواقف اللي هتقابل الواحد
بس كل حاجه ليها تمن

بالنسبه للسؤال التالت معتقدش انه بيقسي القلب بشكل عام
يعني الدكتور برده بيفضل يحب ويكره ويتاثرويضحك
بس يمكن من كتر المواقف اللي بيشوفها بيتعود عليها

انا منساش برده ايام سنه اولى
اول مره قبل ما ادخل المشرحه كنت مرعوب بجد
بس يمكن لما شفت الجثث مخفتش اوي مش عارف ليه
يمكن من الرعب اللي كنت عامله بره
بس اللي انا فاكره اني في ايام الامتحانات كان ناقص اجيب معلقه واكل


تحياتي

Anonymous said...

السلام عليكم ورحمة الله وبركاته
معلش انا مقصرة اوي يامحمود انا عارفه
والراية المرة دي حلوة جداااااا والموضوع دا محير جدا برضه
في رأيي الشخصي انا شايفة ان المفروض المريض يعرف حقيقة مرضه بمنتهى الوضوح الا لو في حالات قليلة جدا هيكون صعب انسانيا على الطبيب انه يخبر المريض او الحالة سيئة لدرجة انها ممكن تصدم المريض او تهز ايمانه يبقا ساعتها المفروض اهله بس اللي يعرفو ومش لازم هو يعرف كل التفاصيل وعجبني جدا لما انت اشرت الى ان في اطباء مستغلين ممكن يستغلو يأس المريض وصعوبة حالته في انهم يستفيدو ماديا وحصلت مع حد من قرايبي وكان صيدلي ومع ذلك وقع ضحية لدكتور معندوش ضمير اقنعه انه واخد كذا دكتوراه في الطب البديل من الامارات واكتشف مصل لسرطان الكبد اللي كان عنده وكان بيبيعله الامبول الواحد ب500 جنيه واحنا اللي لسه مجرد طلبة لو سمعنا الكلام دا ممكن نضحك ونتريق ونقول في حد عاقل يصدق الكلام دا بس والله حصل وكان قريبي دا صيدلي يعني فاهم وعارف لكن الحالة النفسية واليأس ممكن يخلو الواحد يضحك على نفسه والناس تضحك عليه لمجرد امل بسيط في الشفاء واسترداد الصحة وقريبي دا مات قبل مايخلص تاني امبول من المصل الوهمي دا رحمه الله ورحم موتى المسلمين وشفا الله مرضانا ومرضى المسلمين
وتاني انا رايي ان الصراحة مهمة لكن لازم تكون باسلوب راقي ومحترم والكلام يكون فيه مشاعر وتعاطف مع المريض واهله مش اخبطهم بالخبر كده باسلوب جاف خالي من الانسانية والرحمة واعتقد ان الاسلوب هو اللي ممكن يخفف شوية من الصدمة لو المرض خطير والصحة والاعمار بيد الله

Anonymous said...

السلام عليكم ورحمه الله وبركاته
أشكرك محمود علي طرح الموضوع
بجد الموضوع ده في دماغي باستمرار
وبجد فكرت فيه كتير جدا
بس ثق تماما ان ده كله بيعتمد علي الشخص وايمانه اذا كان المرض في شخص كبير وايمان اهله اذا كان طفل صغير
........................
وثق تماما برده ان ايمان الشخص بقضاء الله عز وجل هو ده اللي بيحكم ثقته بان مرضه ابتلاء من الله عز وجل وان ده اختبار ليس الا وان الحياه قصيرة مهما كانت وان له المثوبه علي صبره علي المرض وان ذلك في ميزان حسناته يوم القيامه...

حقيقي لو جينا نفكر شوية في الدنيا
اعتقد انها لا تساوي شيئا اطلاقا
ولكن افضل الاشياء هي ان تستثمرها في طاعه الله
وبجد لو الشخص المريض عرف النقطه دي الاول ....
نقدر بكل سهوله نقوله طبيعه مرضه كامله وده عن تجربه شخصيه حصل لخالي وكان هيباتيك وبجد كان متقبل قضاء الله بصدر رحب جدا....
وبرده مع والد اعز اصدقائي ...
ولاانسي كلمته "هو أنا يابني خايف من الموت " الفكرة كلها هو الايمان بالله....
وحقيقي موضوع والدتي ده خير مثال علي ذلك ... وانا حاليا معرفها كل كبيرة وصغيرة بالنسبه لمرضها وان ده اختبار من ربنا عز وجل....

اظن فكرتي وصلت دلوقتي
ربنا يشفي كل مبتلي
اللهم اشفي مرضانا ومرضي المسلمين

الحمد لله علي كل حال

dina said...

بسم الله
اسئله حلوه يا محمود
ودارت فى دماغى كتير
خصوصا التالت
بس التانى مش اوى
هههههههههههه
المهم

السؤال الاول
بصراحه يعتمد على حاجات كتير
يعنى لو المرض خفيف وهيعدى باذن الله
هقوله عادى وافهمه
عشان يواظب على العلاج ويتفادى رجوعه
لانه اكيد اذاه عشان يروح يكشف ف اكيد هيكون مبسوط لما يعرف انه هيخف منه وهيتعاون معايا

لو المرض جامد لا قدر الله
هحاول اقوله بوجه عام من غير تفاصيل اوى واهون شويه الصوره
لكن ابلغ اهله كويس عن المرض
واى احتمالات ممكن تحصل عشان يبقوا فى الصوره

واعتقد كده حاولت احافظ على نفسيه المريض
وكمان حطيت اهله فى السوره
عشان لا قدر الله لو حصل حاجه

اما لو المريض مفيش منه امل طبيا زى ما قلت
هبلغ اهله اكيد بكل التفاصيل
وهحاول اخبى عليه بصراحه على قد ما اقدر

ده اللى هحاول اعمله

السؤال التانى بقى

هتخيل انى رجعت اكتب الرغبات
امممممممممممممم

هكتب طب بردو :)

بس هختار كليه تانيه غير طنطا


السؤال التالت

ده انا نفسى عاوزه اعرف اجابته

لانى نزلت مستشفيات قبل كده وكان الاحساس ده بيكرهنى فى الناس لما بحس فيهم بالبرود

اعتقد يمكن يكون السبب تعود

لكن الله اعلم

ربنا ما يكتبه علينا اللا احساس ده

وبالنسبه للبنوته
الحمد لله انها خفت

وعشان انت حنين ربنا يمكن بعتك ليها لسبب ما

وبعتك بردو ليها عشانك انت
لسبب ما بردو

حكمه ربنا


معلش طولت
سلام

Anonymous said...

سلام عليكم
اكتر حاجه عجبانى
تواضعك.
.ذكاءك المفرط فى اختيار المواضيع ولفت الانظار اليها باسلوب مهذب
يارب بس تحاول تبعد عن الشبهات بعدين
خلى دايما ربنا رقيب على كل حرف تكتبه
دى امانه وحمل تقيل اوى فى رقبتك يوم الدين
ان الذكرى تنفع المؤمنين
ربنا يباركلك فيما رزقك
ويوفقك الى ما يحبه ويرضاه
والله الهادى
سلام عليكم

Anonymous said...

1- مع الرأى الأول بالمصارحة التامة للمريض وأهله
وإنت اتكلمت فى البوست عن حيثيات الرأى ده كويس
أما عن المريض فى مصر بقى هيستحمل وللا هيوهم نفسه بزياده فدى بقى مش مسئوليتك كطبيب وماتقدرش تتحكم فيها
يعنى لو مثلا مريض عنده أى مرض خطير زى السكر أو الكبد وإنت ماقلتلوش على الحقيقه علشان صعب عليك هو وأهله وماحبتش تقولهم على خبر وحش زى ده .. بعد كده لو حصل للمريض أى مضاعفات خطيره كان ممكن السيطرة عليها ببعض الاهتمام والإدراك لحقيقة المرض , مش هتقدر تسامح نفسك كطبيب .. وهتبقى مسئوليتك قدام ربنا أكبر لأنك أسأت للمريض بعدم توعيته وكده ماقمتش بدورك صح ..
لكن لو قلت للمريض على حالته وفعلا انهار وأهله انهاروا واتقلب الموضوع لمأساة فده كده مش هيضايق ضميرك فى حاجه لأن كده المريض واعى بالظبط لخطورة مرضه وكيفية التعامل معاه .. كونه يصبر بقى هو وأهله على ابتلاء ربنا أو مايصبرش , دى مش مسئوليتك كطبيب .. ممكن هتتأثر كإنسان بكم المشاعر اللى عند المريض وأهله , لكن هتحاول تخفف عنهم وتقولهم إن الحاله بالتزام العلاج إنشاء الله هتكون أخف ومش مأساة للدرجة دى وإن ده اختبار من ربنا -زى ماشلبى قال- والصبر عليه من الإيمان ... إلخ
لكن عمرك ماهتلوم نفسك كطبيب أو هتحس إن ربنا ممكن يعاقبك على حاجه زى كده لأنك قمت بواجبك حتى وإن كان قاسى شوية


2- كنت اخترت آداب أو تربية !
ولو كنت واخد رياضة فى الثانوى كنت هاختار حاسبات أما الطب فلااااااااااااااا
كفاية إنك تشوف المرضى وأهاليهم وإنت ماشى فى المستشفى رايح محاضرة أو جاى من راوند .. مش هاقولك حتى ع اللى بنشوفه جوه العنابر .. بس يللا الحمد لله .. آدى نصيبنا وربنا يقدرنا ع المسئولية الكبيرة دى ويرحمنا

3- الحقيقة إن ده أرفع حبل من حبال كلية الطب اللى مضطر تمشى عليهم ..
فمن ناحية مطلوب منك ماتتأثرش عاطفيا بأى حاله علشان تقدر تشخصها وتعالجها صح ..وكمان علشان تقدر تعيش مع الحالات اللى هتخسرها وتموت منك
وعشان تقدر تواصل حياتك الشخصية بعيد عن المرضى والمستشفى وكل ده ...
من ناحية تانية فمطلوب منك تفضل إنسان وتتعامل مع المرضى وأهلهم على إنهم بشر زيهم زيك ..مش مجرد أسماء فى الكشف وحالات على السراير

مطلوب منك إنك تكون مهتم بالمريض اللى قدامك وماتكونش مهموم بيه

الله أعلم بقى هنتعامل مع الوضع ده إزاى وكام واحد مننا هيقدر يوفق بين الطريقين
ربنا معانا يامحمود !

عندما تنهمر الدموع said...

السلام عليكم ورحمة الله وبركاته
ازيك ياد/محمود يارب تكون بخير على فكرة البوست النهارده والاستفتاء ده لغاية دلوقتي هو اصعب استفتاء في المدونة كلها
السؤال الاول انا كنت كتير بسأله لنفسي خاصة لما جالي جواب التنسيق ولقيت حلمي اني اكون دكتورة ابتدت ملامحه توضح واول خطوة فيه خلاص قربت بعدين لقيت نفسي بتخيل لما ابقى دكتورة هكون ازاي هل هقدر اتحمل كل الحالات اللي بتمر عليا وخاصة حالات الاطفال وكبار السن المرضى حضرتك متتصورش انا بحب الناس دي اد ايه المشكلة بقى ان كل اللي حوليا اد ماكانوا فرحانين اني هدخل الطب اد محذروني كتير وقالولي مش هتقدري تتحملي وهتتعبي في نص الطريق خصوصا انهم عارفين ان انا حساسة جدا ومن اي حاجة بسيطة بتأثر جدا وممكن افضل مضايقة على حاجة صغيرة لمدة طويلة والمشكلة الاكبر اني عايزة ابقى د اطفال رغم اني بتعذب لما بشوفهم بيتألموا لكن في نفس الوقت عايزة اساعدهم المهم دي حاجة كانت قلقاني الحاجة التانية انا هكون اي نوع من الدكاترة النوع اللي بيقول للمريض حقيقة مرضه ولا النوع اللي بيخبي عليه عشان حالته النفسية متدهورش وبالتالي حالته الصحية وحاولت ادور على اجابة لسؤالي ملقتش لغاية لما في مرة كنا في محاضرة اللغة الانجيليزية في سنة اولى ولقيت الدكتور بيتكلم عن نفس النقطة وبيبين الفرق بينا وبين المجتمعات الغربية اللي دكاترتها معندهمش مجال للعواطف وبيشرحوا للمريض الحالة بكل وضوح يومها طلب منا اننا نكتب رأينا في الموضوع ده ونقدم له اجابة على نفس السؤال اللي حضرتك سألته انت هتعمل ايه مع المريض ؟بصراحة انا مكنتش عايزة ابقى اي نوع فيهم لكن كنت عايزة اخلي فيه نوع تالت نوع عنده مشاعر واحاسيس ومتعاطف مع المريض لكن في نفس الوقت واجبه وامانته كطبيب يحتم عليه مصارحة المريض بمرضه ولقيت ان ده صعب الا في حالة واحدة بس انك تستعين بربنا وتطلب منه انه يعينك بمعنى ان لو الحالة بسيطة فمفيش داعي اخوف المريض لكن اطلب منه انه ميستهترش بمرضه واحاول اشرح له ايه مضاعفات المرض ده لو اهمله اما لو الحالة وضعها حرج فطبعا كلنا مؤمنين ان الاعمار بيد الله وده اللي انا هطبقه يمكن مقدرش اشرح للمريض حقيقة وضعه لأن اكيد الموقف هيبقى صعب عليا وعليه لكن على الاقل لازم اقول لأهله حقيقة مرضه لكن في الوقت نفسه لو في امل ولو واحد في المليار ابشرهم بيه واقولهم ان الاعمار بيد الله وان محدش عارف ايه اللي هيحصل بكرة مش يمكن ربنا يكون بيحبه وعالم بحالته ويشفيه ويمكن يكتشفوا علاج لمرضه الطب كل يوم بيتقدم والافضل ان اقول لحد من اهله حكيم يعني يقدر يفهم انا هقول ايه وفي نفس الوقت يحاول يقول للمريض حالته بصورة مبسطة ويوضح له من غير ما يموته من الحزن هو اللي انا متأكدة منه اني مهما خدت شهادات ومهما عملت فعلمي مش هيديني القدرة على مصارحة المريض في نفس الوقت انا مقتنعة تماما انه لازم يعرف سبحان الله مايمكن عنده حاجة لازم يعملها قبل ما ربنا ياخد امانته يمكن عليه ذنب وعايز يكفر عنه يمكن عليه دين محدش يعرف عنه حاجة الا هو ولومات تفضل روحه متعلقة لحد مايكتشفوا دينه باختصار مهما الدكتور عمل فكله بيعتمد على النية اولا واخيرا لونيتك سليمة تأكد ربنا هيبقى معاك ويلهمك الخير والصواب
معلش طولت اوي في اجابة السؤال ده السؤال التاني اه لو كان دخولي الكلية حلم ولسه متحققش برده هختارها مش بس لأني من وانا صغيرة بحلم اكون دكتورة اطفال واحاول زي ما بحبهم اخفف عنهم واترجم الحب القولي لفعل بس كمان لأني بعد مادخلت الكلية وابتديت ادرس كل حاجة عن الجسم البشري زاد يقيني بعظمة الله عزوجل بجد اللي يدخل كليتنا ويدرس ازاي الانسان كان طين وبعدين بقى في اكمل صورة ويدرس قدرة ربنا ازاي كل حاجة ماشية بنظام دقيق معين لو اختل ينهار الكيان البشري وان كل ذرة في جسمنا ليها وظيفة معينة وبعد كل ده ايمانه ميزدش ويوقن بأن ربنا وحده هو القادر على كل شئ فكأنه متعلمش حاجة
اما السؤال التالت فالدكتور قلبه مش جامد ولا قاسي زي مابيقولوا بالعكس ده اكتر واحد بيتأثر بالحالة ويتعايش معاها وهو اكتر واحد بيتألم الف مرة لما بيفشل في انه يعالج مريض اولما مريض ينتهي اجله لكن لو ده مبنش عليه فده لأنه اكتر واحد عالم بحالة المريض وعارف ان الموت ممكن يكون في راحة ليه وبعدين كل مهنة ليها مميزاتها ومساوئها ومش عشان مهنتي بتفرض عليا اني اشوف كل يوم حاجات صعبة اني اسيب الناس تتعذب من المرض اواتخلى عن حلمي في مساعدتهم
كده تقريبا جاوبت على كل حاجة اسفة طولت على حضرتك جدا ربنا يوفقك ويكرمك

Khaled Selim said...

إجاباتي نابعة من تجربتي الشخصية في الحياة
اللي هيا أكيد قصيرة جداً وقد تكون غير ناضجة

السؤال الأول
أعتقد إن الأقرب للصواب إنك تصارحه بحقيقة مرضه

وده لعدة أسباب

قد يكون الراجل ده من ذوي الديون وأكيد يحب يسدد اللي عليه قبل ما يقابل ربه
أو على الأقل يوصي حد من أقاربه بتسديد الدين عنه

ممكن كمان يحتاج يكتب وصية لأولاده أو زوجته تتفتح بعد موته

حاجات كتير ممكن المريض يهتم جداً إنه يعملها قبل ما يموت
وأنا مش شايف إن حالته النفسية لما هيعرف الحقيقة مبرر إني أخبي عليه

فكرتني بحتة في كتيب من إصدار الأزهر عن فضل الوقف الإسلامي على البيمارستانات في عصور الإسلام
ودي كلمة فارسية معناها المستشفيات
كان فيه ناس بتعمل ربح الوقف الإسلامي على أجرة شخصين

مهمة الشخصين دول إنهم يمثلوا دور إتنين بيتكلموا عن حالة مرضية مشابهة لحالة المريض
وإنه واحد قريبه كان عنده المرض وخف منه بعد ما كان كل الناس بيقولوا ده ميت ميت
طبعاً الحوار ده كله بدون ما المريض الحقيقي بتاعنا ما ياخد باله

و كده يبقى عرف حقيقة مرضه وفي نفس الوقت يبقى عنده أمل في الشفاء

وإما يموت بروح مستبشرة بالخير والأمل
أو يساعده أمله على الشفاء
وكلنا سمعنا عن حالات زي دي


وأعتقد على الإقل إنه ليه الحق في معرفة نهايته المتوقعة مادام ده متاح

أما الرأي القائل بإن المفروض نخبي عليه
فأنا شايف إن ضرره أكتر من نفعه


السؤال التاني
فكرت فيه كتير في أول سنتين في الكلية
وإكتشفت إني أكيد هكتب طب تاني
رغم اللي شفته فيها
واللي لسة هشوفه
بس هوا كده بقى



السؤال التالت
أعتقد إنه نوع من التأقلم

وخيار التأقلم مع الحالات اللي بتتوفى هو أكيد أفضل بمراحل من خيار الإنهيار مع كل حالة تتوفى وفي النهاية إعتزال المهنة تماماً

-----------
أحييك يا محمود على أسئلتك اللي فعلاً في دماغنا كلنا
ومستنيين منك أكتر وأكتر

Anonymous said...

بسم الله الرحمن الرحيم
اولا احب اقول ان الموضوع جميل جدا وفكره جميله منك يا محمود
ثانيا بالنسبه للسؤال الاول وهو ان احنا نبلغ الميرض واهله ولا لأ انا رايى اني ابلغهم ولكن بشروط او باسلوب معين وعلي فكره ده موضوع مهم جدا ومفعل في جامعات كتير يعني ماده الطلبه بتدرسها وفيها كورسات خاصه يعني امتي اقول للمريض شخصيا وازاي وامتي اقول لأهله بس وامتي اهون عليهم وامتي اقولهم الحقيقه كامله
يعني باختصار انا مع الرايين اللي بيقول اقوله واللي بيقول اهون عليه بس ابقي فاهم امتي استخدم دي وامتي استخدم دي
وعلي فكره من احد خطط قسم الجوده اللي موجود عندنا في الكليه ان الجزء ده يفعل عندنا يعني ندرس الموضع ده
وبالنسبه للسؤال التاني لو الزمن رجع لورا هختار طب اسنان كليه سهله قصيره هطلع منها دكتور
اما للسؤال التالت ان الطب بيقسي القلوب هو لأ طبعا (من وجهت نظري)لأنه مهنه زي اي مهنه تعتاد عليها هسأل انا سؤال * هل الدكتور اللي كل يوم بيشوف حاله بتموت وهو دكتور باطنه مثلا بس في يوم قابل طفل بيحتضر هيتأثر ولا لأ؟
اكيد اكيد هيتأثر معني كده ان قلبه مامتش
وده كان رأي الشخصي اللي من حق اي حد انه يتفق او يختلف معاه واخيرا اسف علي الاطاله
وشكر

Anonymous said...

يمكن انا شفت التوبيك اول واحد

ولحد دلوقت مش قادر ارد

فعلا موضوع صعب وحيرة اكبر

انا مجرد انى بقرأ آراء الناس

معلش يامحمود

فعلا سؤالك محير جداااااااا

Anonymous said...

انا شايفه ان من حق الواحد انه يعرف ايه اللى عنده بالظبط,مش المفروض انى احرمه من ابسط حقوقه,عارف انا بحس انى عايزه اعمل تشيك اب كل اسبوع,صحيح انا موسوسه بس عشان كده انا بحس قد ايه الواحد بيحب يعرف ايه النظام فاهمنى؟
صحيح فى ناس هستريك بس مش هما القاعده اكيد و الدكتور لو ناصح ممكن ياخد باله من الناس دى و يعمل حسابه لكن انا مع حق المعرفه .
اما لو بكتب تنسيق جديد..هكتب طب برده.
اما موت القلب ده اكيد مش صحيح واللى قلبه كده اكيد دى كانت طبيعتو اصلا. يمكن فيه حرفيه و تعود من تكرار الحالات لكن مش قسوه ابدا