أنا والريموت وغزة

Tuesday, January 6, 2009

السلام عليكم ورحمة الله
أنا مش هطول في المقدمة وهسيبها للآخر عشان لو حد عايز يقرى القصيدة بس
انا بس بعتذر لو فيه بعض ألفاظ غريبه شويه بس ماقدرتش أشيلها
لاني حبيت أبينها زي ما هي
أنا كان نفسي أنزلها بصوتي بس ماعرفتش
بس انتو أكيد ان شاء الله هتقروها زي ما اانا كتبتها وأحسن
بفضل الله
ماعادشي في بيتنا تليفزيون
لإن بتاعنا كان فرقع
وساب في البيت هدوء وسكون
قريّب رحت ازور صاحبي
قعدنا شوية نتكلم
وعلى حال غزة نتألم
ونستغرب ونسأل ليه
وبعد شوية جه تليفون
وقام صاحبي ورد عليه
رجعلى وقاللي متأسّف
أنا مضطر هستئذن
هروح مشوار وهرجع جري
يادوب ساعه وهرجعلك
وهنا في القوضة تلفزيون
قوم اتفرج عليه حبة
على بال ما آجي من برة
و شوف الدِش بالمرة
وقام صاحبي وسابني معاه
مسكت ريموته في ايديّا..وشغلته
وشغلت الطبق ويّاه
لاقيت فيه واحدة بتغني ومابتغنيش
لان الغنوة مش معموله للغنوة
دي غنوة بتتسمع بالعين
عشان تسرقلنا عقولنا
وكل الخلق تسمعها
!!!! ولو قافلة الودان الاتنين
تقوم تقعد تنط تشب
فجور واضح ..و إسمه..كليب
وتدلـّع وتتمايص
عشان يبقى الزبون هايص
وكانت لابسه لا مؤاخذه
أقل مساحة ممكن ست تلبسها
ومخرج ماشي بالكاميرا
بيتفحص ويتمحص
وخلى الجسم زي كتاب
!!!وخلى الكل يدرسها
أنا لو حتى صول غلبان
في أي بوليس في قسم آداب
دي أول واحدة هحبسها
و غيرت القناة تاني
لاقيت فيه فيلم عامل فيلم
وعـِلم السينما في بلدنا
صَبَح في بلدنا أكبر عـِلم
فلوس عالفاضي مصروفة
وناس عالفيلم ملهوفة
وفين الفكرة مش عارف
وفن القصة مش شايف
أنا مش لاقى غير قصة
على كل القيم بتدوس
بطل ومعاه كمان بطله
"ودول "أبطال" عشان كان مشيهم "بطال
وطول الفيلم نازلين بوس
على الفاضي وعلى ..الفاضي
"لان مافيش في ده "مليان
مادام منتج يكون كسبان
ماهيش فارقه وعلى استعداد
يقدم فيلم
مافيش فيه حد مش عريان
وغيرت القناة تاني
لاقيت استودوي تحليلي ...بتاع كورة
وجايب حد من نادي
وحد قصاده من نادي
ويشتد الخلاف عادي
!!!عشان كورة
يقولــّه سرقتوا لاعّيبنا
يقولــّه التاني مش عيبنا
يقولّه الدورى لفريقنا
يقوله اتهد وفارقنا
!!!ويتخانقم.. عشان كورة
وطبعا فيه شريط احمر
لنشر رسايل الجماهير
وخد عندك شتيمة كتير
فريقنا كبير..فريقكوا حمير
نزاع يغلب نزاع كشمير
وتطلع أقبح الألفاظ
أشوف أنا كل ده واتغاظ
ياتري لو كل نص جنيه
رماه الأخ في رساله
وصـَـل غزة..هيعمل ايه؟؟
أكيد هيغير الحالة
وغيرت القناه تاني
لاقيت فيه حاجه سياسية
يااااااااااااااااااااااااه
أخيرا حاجاة عن غزة
لكن ماكانتشي عن غزة
لاقيت طرفين
حكومة وضدها معارضة
بيتخانقم ولا المجانين
ماطيقتش نفسي بصراحة
و غيرت القناة تاني
لاقيت فيه حاجة مختلفة
وبرنامج كبير ديني
وقلت أكيد دا عن غزة
لكن ماطلعشي عن غزة
وطلعت ناس بتتخانق
!!!!بقينا في ديننا نتخانق
ومين سلفي..ومين اخوان..ومين صوفي
وكله في كله بيخبّط
ولاااحدّش بيسمع حد
وكله يهمه يطلع صح
ولو نغرق ووحدة صفـّـنااا تتهد
ولا افتكروا ان اسلامنا
دا دين نازل يجمّــعنا
ولو سيبناه
مافيش شئ تاني يرفعنا
ولااا فيه حاجة تنفعنا
ولا يكون للحياة معنى
وغيرت القناة تاني
لاقيت النشرة شغالة
وصورة بنت مدبوحة
وعايمة في دم ألف شهيد
وما سألتش ولا استغربت
لان ساعتها كنت فهمت
مادام الأمة ده حالها
فيبقوا بجد يستاهلوا
أكيد حاسة القلوب بيهم
وحالهم في القلوب واجع
وتبكي قلوبنا بعينيهم
ونتمني
أكيد النصر يوم راجع
هييجي النصر يوم لكن
هيرجع للي يستاهله
ولو فعلا بنتمناه
لابد احنا اللي نتغيّر
عشان نقدر نكون أهله
عشان نقدر ....نكون أهله
محمود سليمان أبوالعزم
أخيرا،القصيدة متاحه لو أي حد عايز يبعت اللينك او ينشرها على منتدى أو جروب
فاضل حاجه عايز أقولها
كل حد فينا بيفتح الاميل دلوقتي
هتلاقي رسايل اننا هنعمل حاجه معينه كلنا تضامنا مع غزة
هنصوم أو هنصلي..او هندعي..دا كويس ماقلتش حاجه
بس أنا شايف ان احنا لينا دور أكبر من كده
احنا اللي زي حالاتنا من أكتر الناس اللي اتظلمت في العدوان ده
ساعات بقول بيني وبين نفسي يا بختهم هما جاعوا واتبهدلوا واتقتلوا في سبيل ربنا
واكيد ان شاء الله ربنا هيعوضهم عن كل ده بأحسن منه مليار مرة
انما احنا لا قدرنا ننصرهم ولا ننصر نفسنا
وبقت حياتنا محبوسة مابين احساسنا بتانيب الضمير والاحساس بالععجز
ولما نقابل ربنا هنتحاسب على كل اللي حصلهم ده
تخيلوا معايا ان كل الوضع اللي احنا فيه ده زي بقعه سودة
مغطية كل الوطن العربي والاسلامي وكلنا واقفين عليها
انت لو بصيت للبقعه دي من بعيد هتحس انك مش قادر تعمل حاجه لنفسك
ولا تحوشها عن أهلك بس لو انا وانت وانتي
كل واحد نضف الحتة اللي تحته يبقى حتة جنب حته كل البقعه دي هتروح
هو ده اللي نقدر نعمله دلوقتي..غيّر نفسك
شوف حاجه كويسه ماكنتش بتعملها واعملها تضامنا مع غزة
لو مش بتصلي الفجر صليه حاضر في المسجد تضامنا مع غزة
لو مش بتصلي الصلاة في وقتها صليها تضامنا مع غزة
صوم زكـّي اعمل اي حاجه زي كده تضامنا مع غزة
او سيب اي حاجه وحشه كنت بتعملها برضو تضامنا مع غزة
أظن دي حاجه مش صعبة
احنا في النهاية هنكون برضو ماعملناش حاجه بس عشان بكرة لما نقابل ربنا
نقوله يارب احنا حاولنا نعمل حاجه
في النهاية دعاء قصير جسمي بيقشعر لما بسمعه
لازم كلنا ندعيه في كل وقت وفي كل مكان
اللهم استعملنا ولا تستبدلنا

15 comments:

Khaled Selim said...

دي أقمارنا الفضائية المتطورة الرهيبة الفظيعة
أفلام ومسلسلات وأغاني وكورة

ويشرب أهل غزة من البحر

أحمد سعيد بسيوني said...

بسم الله

مادام الأمة ده حالها
فيبقوا بجد يستاهلوا
أكيد حاسة القلوب بيهم
وحالهم في القلوب واجع
وتبكي قلوبنا بعينيهم
ونتمني
أكيد النصر يوم راجع
هييجي النصر يوم لكن
هيرجع للي يستاهله
ولو فعلا بنتمناه
لابد احنا اللي نتغيّر
عشان نقدر نكون أهله
عشان نقدر ....نكون أهله


شوف حاجه كويسه ماكنتش بتعملها واعملها تضامنا مع غزة

***
لقد قلت كل ما يمكن أن يقال
لقد تحدثت بألستنا
جزاكم الله كل خير
***

اللهم استعملنا ولا تستبدلنا

اللهم آمييييين

dina said...

بسم الله
جميله يامحمود بجد

وفعلا معظم قنوات الدش كده بس صدقنى فى قنوات تانيه كويسه
وانا شفت برنامج دينى الشيخ كان بيتكلم كويس والله

يعنى ده موجود وده موجود

بس الاكتر اللى يحرق الدم
بجد سواء اخبار ولا ايميلات بتوصل
الحال بقى صعب اوى
وجوانا مشاعر ضيق وجرح وغضب
لينا وعلينا وعليهم

كنت اكره احساس الخيانه اصعب احساس ممكن الواحد يحسه
لكن احساس العجز اسؤ بكتير

فى ناس كتير بدات تتكلم على اننا نصلح من نفسنا
يارب المره دى نعمل بجد مش نتكلم
يارب يكون فى المره دى تغيير

وجميل جدا منك تقترح علينا نعمل الكويس بنيه النصر لغزه
ربنا يتقبل
واللهم استخدمنا ولا تستبدلنا
شكرا

semsema said...

اللهم استعملنا ولا تستبدلنا

اللهم ااااااااامين

ازيك يا محمود؟؟يارب تكون بخير
في كلمات موجزة حكيت حالنا اللي بنعيشه وما اظنش حد فينا ينكر ده
واللي وصل لي من خلال كلماتك
ان الله لا يغير ما بقوم حتي يغيروا ما بأنفسهم
وانا بضم صوتي ليك ان فعلا افضل تضامنا لينا مع اهل غزة غير التبرع والمقاطعة والدعاء هو الاسطر الجميلة اللي كتبتها يدك
سلمت يمينك
اللهم اغفر لنا تقصيرنا تجاههم
دمت بود
تحياتي

Anonymous said...

انا لسه هقرا لاني مضطر اقوم دلوقتي
بس احب اقول وفقك الله في تدوين هذه الاحداث
محمد شلبي
الي امل اللقاء

Anonymous said...

ربنا يكرمك يامحمود بس التليفزيون اليومين دول فعلا كله خناقات في اي حاجة واللي يغيظ الناس سايبة اللي بيستشهدو كل يوم وماسكين في بعض


انا حطتلك لينك علي الفيس بوك

Anonymous said...

بسم الله الرحمن الرحيم
أخي الكريم محمود أبو العزم
السلام عليكم ورحمة الله وبركاته
الحقيقة أنا لن أعلق على هذه القصيده تحديدا ولكني سأشمل بتعليقي المتواضع كل ما قرأته هنا من أشعار فالحقيقة أنني لم أتمالك نفسي وظللت اقرأ وأقرأ اربع ساعات متواصلة دون انقطاع أو ملل وشعرت بكل معنى وبكل كلمة كتبتها وقد قرأت اشعارا كثيرة من قبل ولاحظت شيئا مختلفا هنا فما هو ياترى هل هي الموهبة أم الاخلاص و حب الناس فما لاحظته هناأنك لاتكتب الشعر من أجل الشعر
وانما تكتبه من اجل التعبير عن الاخرين وانفعالاتهم بصورة مبسطة وقريبة للجميع لمن يحب الشعر ومن لا يحبه ولعل هذا سبب جماله ووصوله للجميع
والمدهش ايضا أنني قرأت بعض هذه الاشعار من قبل على العديد من المنتديات وقد ساهمت أيضا في نشرها على منتديات اخرى ولكنني وللأسف لم أكن اعرف لمن هي الى ان اهدتني احدى صديقاتي قدرا هذا اللينك لأكتشف أنها لأحد أبناء دفعتي ولم أكن أعلم
يادي الكسوف
أتمنى لك دوام التوفيق والتقدم

محمد عبد الباسط said...

طاعة من اجل غزة

ربنا يكرمك يا محمود ويبارك فيك

وان شاء الله دم اخوانا فى غزة مش هيروح هدر وهيكون سبب فى صحوة امه باكلمها وعودتها لدينها ولربها مردا جميلا

بورك بك ونفع بك وبكلماتك

ولا نمل من التذكير بالقضية ورد المفاهيم على صحتها والمقاطعة والجهاد بالمال والدعاء لاخواننا

والله اكبر من كل كبير ولله الحمد

Anonymous said...

السلام عليكم

كلامك جميل اوى وفعلا المفروض كل واحد
فينا يبدا من نفسه ويغير من نفسه اولا وزى ما ربنا قال( إن الله لايغير مابقوم حتى يغيروا مابأنفسهم) حتى عشان دعائنايستجاب وكمان نحاول نغير من اللى حولناعشان ما نبقاش زى ما النبى صلى الله عليه وسلم قال (( والذي نفسي بيده لتأمُرُنَّ بالمعروف ولَتَنْهَوُنَّ عن المنكر ، أو لَيُوشِكَنَّ الله يبعثُ عليكم عقاباً منه ، ثم تدعونه فلا يستجيبُ لكم )) . واكيد الناس نفسها باب الجهاد يفتح عشان نجهاد معاهم بس الناس دى فى منهم كتير بيعملوا معاصى او مش بيصلوا مثلا فانا بسال نفسى كتير يعنى دول مش قادرين يجاهدوا نفسهم فى صلاه فازاى هيقدرا يحاربوا ويضحوا بانفسهم زى مابيقولوا ؟؟؟؟؟؟

quiet_storm said...

ربنا يكرمك يامحمود على دعوتك
وصدقت فيما قولت
حتى الخناق فى الكره تخطى مرحله الكلام دلوقتى كمان

لنا ولهم الله ...0

Anonymous said...

بجد انت قلت كل حاجه ممكن تتقال
لا تعليق بعد كلامك
انت عبرت عن المشاكل اللى حولينا بكلمات بسيطه بس كانت قويه جدا فى معناها وثاثيرها كمان
ربنا يبارك فيك ويكرمك
ويهدينا جميعا للخير

عندما تنهمر الدموع said...

السلام عليكم ورحمة الله وبركاته
ازيك ياد/محمود يارب تكون بخير
فعلا قصيدة النهاردة جميلة واجمل مافيها انها واقعية بتوصف بالضبط الحالة اللي احنا وصلنالها استهتار وهيافة وانحلال حاجة بقت فوق الوصف ومحدش حاول يعمل حاجة عشان نوقفها وبعدين نرجع ندمع ونقول مش عارفين نعمل ايه عشان غزة فعلا ربنا مش هينصرنا ولا هيساعدنا الا لما نساعد نفسنا الاول كما قال تعالى *ان الله لايغير ما بقوم حتى يغيروا ما بأنفسهم*لازم نبدأالاول بتغيير نفسنا عشان ربنا يساعدنا حتى لو بدأنا بتغيير حاجات بسيطة يمكن متساعدهمش في غزة زي ما قلت لكن هتخفف عنا عذاب ربنا
فعلا شكرا على القصيدة وعلى الكلام لأنك بطريقة جميلة عبرت عن كل اللي كان نفسنا نقوله ويارب يكرمك ويوفقك ويساعدنا كلنا على عبادته وطاعته وان يستعملنا ولا يستبدلنا

wesoooooooooo said...

بجد انت اختصرت حياتنا كلها فى القصيده دى ربنا يوفقك يارب
واللهم استعملنا ولا تستبدلنا
آمين

Anonymous said...

فعلا يامحمود

انت مشكلة

الموقف بيمر على ناس كتير مننا

محدش بيقدر يعبر عنة بالجمال ده

ربنا يكرمك ويوفقك

أنــا said...

مش عارفة أقول اي حاجه خالص على فكرة ..

مش عارفة انا حاسة بالخجل من نفسي ولا بروعة اللي بتقولة ؟
تفكيرك مش عارفه الاقي كلام يوصفه ...
بجد ربنا يكرمك ويوفقك في حياتك .. لان لو انت كدا .. تستاهل اكتر من كدا ..
أنا لما ببدأ في قراية اي حاجه ليك .. مابعرفش اقف الا عند اخر كلمة في البوست ..
دا لا شعر ولا قصة ولا زجل ... ومع ذلك أثر فيا بشكل غريب ..
بحاول اقول حاجه او اكتب حاجه ..
بس بجد ابلغ رد هيكون سكوت ..