إلى أن أراكي..إلى أن أراك

Tuesday, February 17, 2009


السلام عليكم ورحمة الله
حاجة غريبة أوي بتدفعني اني أأجل كل الكلام اللي كنت جاي أكتبه التلات ده
عشان أنشر البوست ده اللي برضو حاجة غريبة خليتني أدرو عليه بعنف في
كل أدراج مكتبي وكتبي القيدمة ومشاعري
واكسر حالة الجمود اللي بمر بيها عشان آجي أنشره النهارده
البوست ده اهداء لمعنى الحب اللي شفته بيتهان باسم الحب
اهداء لكل حد جواه مشاعر شايلها للانسان اللي ربنا سبحانه وتعالي كاتبهوله
اهداء لكل حد نفسه يحب..يحب بجد ...يحب صح..يحب بصدق
يحب من غير ما يغضب ربنا
بس عشان كل الناس تحس القصيدة زي ماكتبتها
القصيدة عامية,انا عملت همزة على كل ألف بتتنطق وماعملتشي
على اللي المفروض ماتتنطقش ومديت اللي المفروض يتمد
عشان مافيش حتت موسيقاها ولا احساسها يقع من حد
وبـاسف لو كنت طولت وكتبت قصيديتين
بس كنت بحلم ان كل حد هيدخل التلات ده
يحس قصيدة مكتوبة على لسانه وقصيدة مكتوبة ليه
البوست ده من البوستات اللي مستني رد فعل الناس عليها جدا
وبدعي بجد يكون ربنا وفقني فيه
..........................................
إلى أن أراكي
...............
شئ غريب اني أحبك
رغم إني.. ماشفتكيش
واللي أغرب إن حبك
رغم ده ..قادر يعيش
بس عارفة
رغم احساسي بهواكي
عمري مارسمتك في صورة
بس راسمك يا ملاكي
قلب صافي وروح طهورة
روح هموم الدنيا ديّة
لسة مامليتهاش دموع
شايلة أحلامها الأبيـّة
رافضة تسليم أو رجوع

انت مين... مااعرفشي لسة
انت فين...مااعرفشي لسة
بس حاسس قلبي بيكي
وانتي رغم البعد..حاسة
يمكن المسافات ما بنّا
خطوة واحدة
ولا يمكن ألف ميل
بس في الحالتين بحبك
بس في الحالتين لا يمكن
سكتي لغيرك تميل
يمكن الزمن اللي بنا
ثانية واحدة..أو سنين
بس مش ممكن لغيرك
قلبي هيحس بحنين
انتي عارفة
كنت ماشي زمان بدوّر
انتي فين وسط الوشوش
كنت خايف لما اقابل
وشك الصافي البرئ
يستخبي ومااعرفوش
بس قلبي..بطل التدوّير خلاص
أصله بقى دلوقتي عارف
انه لمّا يحين لقانا
اللـُقا هيكون يا عمري
غصب عنا وبرضانا
انتي عارفة؟؟
انتي علمتيني..أمشي
والعيون للأرض ناظرة
زي ماتكون العيون
حوشتلك كل نظرة
حلمها لو يبقى أول
حاجة تلمحهااا..ضياكي
حتى قلبي
من زمان لملم مشاعره
لفـّها وحوط عليها
في انتظار لحظة لقاكي
انتي عارفة؟؟
لو ألوف حوليـّـا غيرك
عند قلبي مايفرقوش
مهما لف ومهما شاف
لما حط في عشي طيرك
حبك اللي ماشفتهوش
علم القلب العفاف
انتي عارفة؟؟
اني مش خايف تضيعي
انه مهما هيجرى هفضل
في انتظار أزهار ربيعك
تيجي يوم تحضن ربيعي
عارفة ليه
أصلي حاسس
ان ربنا ليّ شايلك
حتى لو خطواتي بعدت
عن مكانك..برضو جايلك
قلب مطمن عشان
ربنا وحده اللي عالم
أد ايه محتاج لحب
حب يملى القلب حب
شئ يخلي القلب قلب
حب يقدر
ينزع الشوك اللي ساكن بين ورودي
شئ يحلي الدنيا من تاني في عينيّا
شئ يحسسني بوجودي
حب يمسح
دمعتي القاسية اللي عاشت
من زمان تحرق خدودي
شئ يزلزل أرض خوفي
يفتح البركان لنار
من سنين جوايا عايشة
نفسها تفارق حدودي
حب بيه أكسر خيوط
عنكبوت حزني اللي عشش
من سنين جوة المشاعر
وارسمك ألحان تخلى
عزف عودي يشد عودي
حب فيه الرقة تقدر
بالحنين تكسر قيودي
حد جنبي
حتى لو ماعملشي حاجة يبقى جنبي
هو عامل كل شئ بوجوده جنبي
شفتي ليه مستني قلبي
ياللي مارحلتيش تعودي
كل دي أحلام ولكن
عشتها معاكي بفؤادي
ساكنة في ّ وفيها ساكن
كنت بيتها..بقت بلادي
كل أحلامي ومشاعري
في انتظار اللحظة ديّة
كل يوم أحاسيسي تعمل
عيد ميلاد
والشموع ما بتنطفيش
واللي فاضل حاجه واحدة
اللي هدّيها الهديّة
اللي فاضل هو إنتي ..وانتي فيّا
اللي فاضل بس اشوفك
يرتوي خوفي بأماااانك
يرتوي بأمااااني خوفك
والحنين حوايا يصرخ
ضمي أحلامي بكفوفك
اللي فاضل بس اشوفك
فين وليه وازاي وامتى
أسئلة من غير اجابة
عايشة تستني الاجابة
اللي فاضل بس اشوفك
وانتي هتكوني الاجابة
والمشاعر يومها تكتب
قصة خالدة ماتتنسيش
بس حتى لحد لمـّا
تيجي بكرة الحظة ديّة
ماتخافيش
قلبي هيصون ليكي حبه
رغم اني ماشفتكيش

......................................................

........................................................

إلى أن أراك

.................

أنااا حاساك

وليه بتقول أنا بعيدة

بعيد جسمي و روحي معاك

أنا حاساك

صحيح الذكريات بتكون

لناس في الماضي شفناهم

وانا من غير مااشوف قلبك

بشيل في القلب نور ذكراك

أنا حاساك

هنااا روحك ومش عارفة

حبيبي ازاي تكون روحك هنا وهناك

أنااا جنبك...أنااا حواليك

أنا الوردة اللي مزروعة في نور قلبك

وفاضل بس تقطفها في يوم بايديك

وتزرعها في قلبي البـِكـْر من تاني

عشان تطرح ورود في هواك

أنا حاساك

وفارد قلبي جناحاته

ومستني

يادوبك كلمة المأذون

عشان يقدر يطير في سماك

وأول ايد هتلمسني

تكون ايدك

ونهر الحب من قلبي

يصب الحب في وريدك

وتشبع من دفااا قلبي

يضمك قلبي ويزيدك

وترتاح غربتي في مرساك

وقلبي يبوووووووح

بشوق طول السنين مداريه

حنين الروح

يدوب فينا ندوب حواليه

و أي جروح

مادام مع بعض تفرق ايه

مادام الحب يا عمري

ملاني بالأمل وملاك

مافيش في الكون دموع يا ملاك

ومش فارقة..ولا أطيان ولا أملاك

مادام حاساك

تكون كوني هكون كونك

يكونلك قلبي ويكونك

ولو فكر في غير يومك

هيبقى كإنه بيخونك

لاني قفلته من قبلك ومن بعدك

عليك انت

ومفتاح قلبي سبته معاك

بلاش الحيرة في عيونك

لان ملامحك المرسومة فوق لوحتي

لا يمكن يوم يلوّنها

ولا يكملها غير لونك

لإني بضحكتك راسماك

أكيد الصورة مش زيك

ونورها شوية من ضيك

دي صورة بنت تلميذه

في مدرستك

وقاعده لوحدها في الفصل

بترسم فيك

ومش خايفة على الصورة

مادام هيكون معاها الأصل

لكن حاولت يكون وياها لو صورة

لحد ما ييجي وقت لقاك

وماتخافشي

لإن عينيا مهما تشوف

مابين العين ونظرتها أنا شايلاك

أنا حاساك

ومش زي البنات بحلم

تشيل قلبي على حصانك

أنا كل اللي بحلم بيه

أشوف في عينيك بصيص فرحة

بقلبي عشان

سنين رغم الجراح..صانك

وكان وياك ومش وياك

وبدعيلك

في كل دقيقة بدعيلك

ولو بإيديا والله

لكنت هجيب ضيا نهاري

وهغسل بيه ضلام ليلك

واكون نجماية مالية سماك

أنا حاساك

وقلت كتير وعدت كتير

وكل كلامي يا حبيبي

خلص في الحب ولا كفـّى

ميزان قلبي

في بعدك عني مستني

مشاعرك تعدل الكفة

سفينة قلبي بر وبحر ماشيالك

وعملت من هواك مجداف

وعملت ضحكتك دفــّة

وتفرح قلبي يفرح بيك

يكون زي الحصون حواليك

عشان تحميك

تكون على ضحكتك لافــّة

هتبكي..القلب هييشيلك وهيضمك

كإنك نونو في اللفة

وعفة قلبي هغسلها

في بحر هواك تزيد عفة

و أجمل زفة لما تكون

واقفلي امام

وانا واقفة بصلــّي وراك

وطايرة ملايكة حوالينا

أكيد في الكون مافيش أحلى

ولا اجمل من كده ..زفـّة

عشان كده هفضل استناك
يفوت العمر ولا بنساك
بلاش يقلق على الزمن الي جايْ بالك
أنا جايّة وجايبالك
حنين قلبي ينور بالأمل دنياك
وبكرة الدنيا تجـْمعنا
عشان تتفسر الأحلام
ماتستعجلشي يااا عمري
مافيش أقرب من الأيام
مادام ربك كتبنا لبعض
فمهما يكون هنبقى لبعض
لا ممكن تبقى لسوايا
ومش ممكن هكون لسواك
صحيح أنا لسة مش عارفاك
لكن حاساك
وهفضل مهما كان حاساك
أناااا حاساك

38 comments:

د/عرفه said...

يا سلام يا محمود
ايه الجمال ده يا بنى
والله مبدع

خصوصا أنك قولت كل كلمه أنا عايز أقولها

مشاعر صادقه جميله بجد

بس عندى سؤال بس
هى الدفعه كلها قلبت رومانسيه كده ليه أصل عبد الباسط كتب عن نفس المضمون قبلك
والسؤال التانى شكل الكلام طلع من الدرج يعنى قديم
يا ترى ايه السبب أنه يطلع دلوقت؟؟؟؟؟



المهم انك محرمتناش منه علشان بصراحه عجبنى اوى اوى

مهندس / على درويش said...

كلامك جميل جدا
واحساس عالي وجميل

جميل انك توصف الأنسان اللي انت محتاجه من غير ما تشوفه
والأجمل أن الأنسان اللي تتخيله يكون رسام بنفسه صورتك
الأجمل ان أخترت كلمات تعبر بدقه عن محتواها

أسلوبك جميل جدا
تقبل تحياتي وتمنياتي لك بالحب والتوفيق

Anonymous said...

اتمنى لك ولى ما تميته لى وما تمنيته لك

خال حبيبه

Anonymous said...

كلمات رائعه محمود
مجهود جبار
الي الامام
Dr.ShaboMania

Anonymous said...

جميل اوى ربنا يبارك فيك

خديجة عبدالله said...

يا الهى لكم هى رائعة كلماتك عزفت على أوتار قلوبنا نغمات جميلة

الكلمات الصادقة تعبر للقلوب والعقول مباشرة أدام الله عليك القلب الحى والعقل الفاهم

من يصدق الله يصدقه أسعد الله قلبك ورزقك قرة عين وأعانك لتبوح لحلالك بما تفيض به نفسك النقية

الحلال دوما راقى دمت بخير

أعجبتنى كلمات أيضا لعلها بنفس المضمون على مدونة الدكتور محمد عبدالباسط (قلم حالم)جميلة فعلا

quiet_storm said...

بصراحه موضوع رااااائع جدا
وانت عبرت عنه بطريقه جميله
وفعلا حسينا الكلام اوى

ربنا يحققلك كل ما تتمنى ويوفقك لكل خير ان شاء الله
نورت المدونه

Anonymous said...

كلمات رائعة وإحساس رقيق
ربنا يديلك اللي بتتمناه
وأتمنالك التوفيق

Unknown said...

يصراحه مش عارفه اقول ايه
طبعا جميل وطبعا رائغ وطبعا احساس واصل لقلوب الجميعوموجود في قلوب الجيع بردو
ربنا يكرمك ويوفقك

Anonymous said...

هتبكي..القلب هييشيلك وهيضمك

كإنك نونو في اللفة

وعفة قلبي هغسلها

في بحر هواك تزيد عفة

و أجمل زفة لما تكون

واقفلي امام

وانا واقفة بصلــّي وراك

وطايرة ملايكة حوالينا

مافيش في الدنيا شئ أحلى

ولا اجمل من كده ..زفـّة


عجبتنى اوي الحتة دي....بساطة في التعبير و رقة في الاسلوب

يا محمود يا جامد :)

استمر استمر ..هستنى الجديد هنا دايما

rose flower

Anonymous said...

بصراحه مش لاقى كلام يعبرلك عن جمالها وازاى اثرت فى
أحمد أنس

Anonymous said...

بجد يامحمود انا اتسمرت ومش ادر ارد

حرام عليك تحرمنا من الحاجات الجميلة دى

بجد احساس فوق الوصف

انا مش قادر الاقى كلام حلو عشان اقولة

لان القصيدتين احلى من اى كلام

بس هقولك كلمة واحدة بس

شكرا على امتاعك لينا بالحاجات الجميلة دى

شكرررررررررررررررا

Anonymous said...

ماشاء الله
زى ما تكون بتكتب عن اللى جوانا
ربنا يوفقك
وبجد شكرا على الكلام ده
متعرفش قد ايه احنا احتجاناه
وعقبال ما تلاقيها :)

Anonymous said...

السلام عليكم ورحمه الله وبركاته

صح صح صح قوى كل اللى قولته
وهيا دى طريقه الحب ومالوش طريقه
تانيه واى حاجه غير كده هنبقى
بنظلم نفسنا وبنقتل الاحساس جوانا
وبنكون أسأنا اليه زى ما كتير من الشباب بيعمل

نفسى بجد وبتمنى من ربنا ان ناس كتيييييير قوى تقرا القصيده دى وتفهمها علشان قلوبنا تفضل بكر

وعلى رأى المثل اللى يصبر ينول
وربنا يحققلك ولنا كل اللى بنتمناه
علشان نحس بمعنى الامل ونعيشه

امين يا رب العالمين

أنــا said...

أحيانا بيكون أبلغ تعبير هوا الصمت ..
حبيت التدوينه دي أوي
وفعلا سكت ومالقتش كلام..
بجد ربنا يباركلك في موهبتك .. بتمنالك التوفيق بجد

دمت بود ..

أحمد سعيد بسيوني said...

ملكٌ انت

سلمك الله من كل سوء

WiLdBiRd said...

مالهاش حل

بجد يامحمود روووووعة

مش قادرة اقولك عجبتنى قد اية

تسلم ايديك

واعذرنى علشان مش متابعة دايما

بنت الصالحين said...

جت في دماغي اني اقلب في التعليقات القديمه في مدونتي

ولقيت تعليق لحضرتك عندي قديم

فدخلت عند حضرتك وامتعتني بجد بقرائه التدوينه دي

هو ده الحب العفيف الصح
اللهم ارزق شباب وبنات المسلمين الحب الطاهر اللهم امين

بجد رااااااااااائعه

semsema said...

أحيانا يكون الصمت هو أبلغ تعبير
أمتعتني بقرائتها وبجد لساني عاجز عن الاشادة بجمالها
دمت مبدعا ودام قلمك معبرا عن ما يختلج في نفوسنا جميعا
تحياتي

Anonymous said...

الله الله الله ايه الجمال والحلاوة والروعه دى يادكتور
بجد انا ليا الشرف انى عرفتك
عبرت عن كل حاجة ومتهيألى بعد اللى انت قولته مفيش كلام يتقال
ومستنى منك المزيد وبالتوفيق ياحبيب قلبى ياريت كان فى منك فى صيدلة

صيدلى المستقبل
احمد خليفة

شبه إنسانه .....( سهوره ) said...

بصراحة .. مش عارفه أقول إيه ..
إحساسك الغير عادى دايما بيدخدنى لعالم كله حب
وده لانك فعلا شاعر رائع وقبل كل ده إنسان رائع جدا
وبصراحه القصيدة عجبتنى جدا
بس هناك سؤال يا واد يا دكتر ليه القصيدة دى بالذات خرجت من الدرج القديم
ليييييييه ...؟؟؟
يارب تكون فى أحلى أحسن وأروع زى ما انته دايما رائع
( سهوره )

Anonymous said...

بجد بجد يامحمود اكتر من رائع.دي اول ليا ارد لك فيها.بس متهيالي مافيش احساس جميل ممكن حد يكتب فيه ويصوره زي الاحساس اللي في القصيده
.انت حقا شاااااااااااااااعر موهوووووووب

emam said...

مش عارف ليه شاكك في اهتمامك اني اعلق علي البوست ده يا حودة
بس انت حبييبي ومتاخرش عنك
وان علي فكرة قريته اول مانت كتبته مش محتاج انك تفكرني لانك في القلب والله
وبخصوص اللي انت كاتبه فاكثر من رائع
واجمل ما فيه لاني مش بحب الرومانسي اساسا انك علقت الموضوع وخصوصا في كلامها (هي) بالجواز والماذون وكده
وده اجمل ما فيه ان الواحد لما يحب يحب في اطار شرعي عشان الحب ده يكون مدعوم برضا الله وتوفيقه
ورائع جدا ان الواحد يحب اللي هيرتبط بيها قبل ما يعرفها عشان يجهز نفسه ويستعد من اولها ويرضي بنصيبه بقي مهما كان

اشوفك قريب يا ابو العزم
ومتنساش عمك عبد الرازق
سلام

عندما تنهمر الدموع said...

السلام عليكم ورحمة الله وبركاته
ازيك يا د/محمود يارب تكون بخير انا دخلت النهاردة مخصوص عشان اقرأ القصيدة الجميلة دي رغم ان عندي امتحانات بس اكيد مفيش حاجة اجمل منها ممكن تخفف شوية جو الامتحانات والكآبة اللي احنا فيه
رأيي فيها انها اجمل شئ ممكن يتقال عن الحب افضل شئ ممكن يوصف الحب الصادق الحقيقي قصيدة احساسها عالي جدا احساس وكلمات خارجة من القلب بتوصف احساس كل انسان او انسانة نفسهم يحبوا بجد يحبوا حب صادق شريف عفيف احساس الشاب اللي نفسه يلاقي الانسانة اللي هيكمل بيها نص دينه احساسه بأنه مهما طال الوقت فمسيره هيلاقيها هيلاقي القلب الطيب اللي ربنا كاتبله انه يعيش معاه احساس الفتاة التي ترغب في ان تجد من يحميها ويحافظ على عفتها وكرامتها ورغبتها انها تلاقي الحب الحقيقي اللي هيصونها من غدر الايام
بس ياترى لسه فيه حب زي ده دلوقتي انك تحب حد متعرفوش لكن تحبه لمجرد انك مسيرك في يوم تقابله وتعيش معاه الباقي من حياتك ؟
ياترى لسه في حد بيحب حب طاهر من غير ما يغضب ربنا او يدور على اللي هيجنيه من ورا الحب ده؟
لسه فيه حد مستعد يحب من غير ما يجرح اللي بيحبه او من غير ما يخدش حياء اللي بيحبها؟
ولا يمكن السؤال هو انه ياترى لسه فيه حب جميل صافي زي حب زمان ولا هو كمان الحب اتغيرت ملامحه ومعانيه زي ماتغيرت حاجات كتير حوالينا؟
المشكلة انهم اعتبروا الحب شئ مادي ممكن معناه يتغير ونسيوا ان الحب شئ معنوي معناه عمره مايتغير مهما اتبدلت العصور
ياريت كل شاب وكل شابة وياريت كل حد نفسه يحب انه يقرا القصيدة دي الاول عشان يعرف معنى الحب البرئ الصافي وعشان يعرف ان اللي بيحصل دلوقتي ان كتير لوثوا الحب باسم الحب وارتكبوا الجرائم في حق الحب وعشان يعرف انه لازم ميتسرعش في اختيار من يحب وانه لازم يتأكد ان ربنا كاتبله من قبل ما يولد امتى وفين ومين هيحب
بجد ربنا يكرمك وينميلك موهبتك وشكرا لأنك بتعبر عن مشاعرنا وكل اللي نفسنا نقوله بس مبنقدرش وربنا يوفقك

salma mohamed said...

السلام عليكم
بجد كلماتك هزت اوتار قلبي من جمالها
وانا باقرا كلماتك خلتني اتخيل الموقف واسمع صوت كل من الشاب والفتاه وكل منهم ينشد للاخر ويتغنى بالحان كلماتك الرائعة,
ربنا يرزقك بالزوجة الصالحة الرقيقة اللي تفهم مشاعرك وتكون معاك على الحلوه والمرة.

Anonymous said...

يارب تكون لاقيتها ومش لسه فى الخيال بسسسس

د. ياسر عمر عبد الفتاح said...

ايه الجمال والخيال ده كله
أول مرة أعدى
بس إن شاء الله مش هتبقى أخر مرة

Anonymous said...

انااغمن عليا من جمال الجمال عشان كده مقدرتش اكتب كومنت

بـسـمـــة صـــــلاح said...

السلام عليكم
طيب اقول ايه بجد مش عارفه
دي تحفه فنيه
بجد قمة في الجمال
والله ماعارفه اوصفها بإيه
ماشاء الله عليك
ربنا يرزقك بملكة تسعدك وتخليك ملك جوا قلبها
ويحققلك كل اللي انت عايزة
سعيدة جدا بمروري هنا وميرسي لزيارتك ليا
وان شاء الله دي مش زيارتي الأخيرة
دمت بكل ود
تحيـــــــاتي(:

حياتى نغم said...

السلام عليكم / الله عليك أخى محمود
شعر رائع ربنا يثبتك ويهدى كل الشباب فعلاً جميل إنك تحب زوجتك من الآن وتؤمن إن لا مكان للحب الحقيقى إلا بالزواج
بعيداً عن كل ما يبثه الإعلام الهدام
من أن الحب شىء والزواج شىء آخر
أو أن الزواج يقتل الحب
أؤكد لك كلامك السعاده والحب يأتوا لمن يتقى الله
رزقك الله الزوجه الصالحه والحياة السعيده مع نصيبك الذى يحفظه لك الله

موناليزا said...

مشاعر واقعية وقرأت نفس الفكرة مسبقا عند كذا حد
وده معناه ان الكل فعلا مشتاق للحب الحلال والعلاقة السليمة
بالتوفيق دائما

quiet_storm said...

تعليق رقم 2

كل سنه وانت طيب وبخير
ويارب عقبال 100سنه فى طاعه الله والقرب منه وتنعم فيها بحب الله ورضاه
وحب الناس

عقبال السنه الجايه وتكون اتخرجت من كلينا العزيزه وتحقق اللى بتحلم بيه

KEBLAWYAT said...

رائع يا دكتور كالعاده

يمكن ده أول رد ليا فى مدونتك

بس أنا متابع أعمالك من زمان

محمود ابوالعزم said...

السلام عليكم ورحمة الله
انا متشكر جدا ..متشكر اوي
لكل الناس اللي علقت هنا
مش عارف أرد على كل الكلام الجميل ده
حقيقي انا اللي مش عارف اقول ايه
بس لازم أرد على سئال اتسألته كتير جدا
ايه اللي خلى القصدية دي تطلع من الدرج
كنت بمر بحالة نفسية صعبة شوية
بصارحة كنت محتاج احس الاحساس ده في الوقت ده
ساعتها افتكرت القصدية دي وصممت اني ألاقيها وانزلها
لانه أكيد مش انا لوحدي اللي بمر باللحظاات دي
جزاكم الله كل خير جميعا
مش لاقي رد غير اني اواصل الكتابة
واحاول اكتب اي حاجه تسعدكم او تعبر عنكم
دعواتكم دايما

Anonymous said...

انتي علمتيني..أمشي
والعيون للأرض ناظرة
زي ماتكون العيون
حوشتلك كل نظرة
حلمها لو يبقى أول
حاجة تلمحهااا..ضياكي
حتى قلبي
من زمان لملم مشاعره
لفـّها وحوط عليها
في انتظار لحظة لقاكي
......................................................................

و أجمل زفة لما تكون
واقفلي امام
وانا واقفة بصلــّي وراك
وطايرة ملايكة حوالينا
أكيد في الكون مافيش أحلى
ولا اجمل من كده ..زفـّة

......................................................................

احساس عالي ومشاعر راقية

قلما وجدت في هذا الزمان

اللهم اهدنا وسائر شباب المسلمين

الى سبيل الخير والرشاد

نور الاسلام said...

بصراحة فى منتهى الروعة. كلمات ذات معانى قوية...وأجمل ما فيها أنه حب لا يمكن أن يكون إلا فى رضا الله عز وجل...وجزاكم الله خيرا

Anonymous said...

جميلة جدا
بجد تحفة
حضرتك كتاباتك رائعة بجد
ربنا يوفقك

soliman_sarhan said...

للاسف اول مره ازور المدونه بس اكيد مش اخرمره ان شاء الله بصراحه كلام روعه والاحساس اروع
قمه في الخيال يصاحبه روعه التصوير
وهذه المدونه كانك تحس ما بداخلي وما يدور في افكاري
وربنا يوفقك