المشي على الحبال

Tuesday, March 31, 2009

السلام عليكم ورحمة الله
ممكن أبدا بالكومنت ده من واحد من اخواتي واصحابي بجد
رد بحبه أوي واتمنى تكون الفكرة دي مش عند احمد بس
الرد ده كان في بوست امتحان اجباري




لا طبعا مختلفين محمود فى الكليه مستعجل شويه حبايبه كتير مين زيه


انما هنا تحس انه صحبك انت لوحدك فهمك حسك ديما بيقول اللى نفسك فيه


بس ياجماعه دى ضريبة الشهره روح ياحوده ربنا يحبب فيك خلقه


بس تفضل برضه معنا دائم


اأحمد أنس


.............................................


انا محنوق اوي وحاسس اني محتاج اتكلم


ومن طول الحيرة اللي كنت الفترة اللي فاتت مالاقيتش حل


غير اني أحط كل الحيرة دي بين ايديكوا هنا


وكنت محتاج كلمة احمد دي ان هنا محمود صاحب كل واحد لوحده بس


ونفسي كل الناس تقرا الكلام اللي هكتبه دي-رغم اني مش عارف هكتب ايه-بالمبدأ ده


سؤال دلوقتي حاسس بيه وحااسس ان ناس كتير ممكن تسأله


انت عايز ايه تاني يا محمود


انت انسان ناجح ومحبوب من كل الل حواليك ويوم بعد يوم


بتاخد شهرة وناس اكتر بتحبك وتحب كلامك


اوعي تكون زعلت من خمس ست ردود جولك على المدونه من وسط


اكتر من ألف وخمسميت رد بيشجعوك لانك ساعتها تبقى ضعيف أوي


ويبقى كل الكلام اللي بتكتبه ده مالوش لازمة



لا والله أنا مش زعلان ولا حاجة


انا بس الردود البسيطة خليتني وقفت مع نفسي كتير وراجعت نفسي كتير


خفت يكون الكلام ده جوة ناس تانية وكانت خايفة او محروجة تقولهولي


انا والله عمري ما اتلكمت عن نفسي كويس قبل كده غير نادر جدا


والناس اللي حوليا يعرفوا كده


بس النهاردة محتاج ادافع عن نفسي ادام نفسي على الاقل


عارفين انا حاسس بإيه


حاسس زي ما اكون ماشي على حبل..والحبل رفيّع وطويل أوي


وواصل بين نقطتين بُعاد أوي عن بعض


مطلوب مني اكون طالب ناجح


وبعد كده دكتور ناجح أد أرواح الناس اللي هتبقى في ايده


وشاعر ناجح قادر يسعد بكلامه كل الناس اللي بتحب بكلامه


و أخ كبير ناجح أد المسؤليه اللي عليه ناحية اخواته


وابن ناجح يكون بار بوالدته وبروح والده ويقدر يعمللهم كل حاجة كان نفسهم فيها


وانسان ناجح أد ثقة الناس الكتيرة اللي بتحط ثقتها فيها وتحكيله او تطلب مساعدته


وصاحب ناجح قادر يكون وفي لأصحابه ويقدر يعملهم ترد جمايلهم عليه وتشجعيهم ليه

وكوني أجمع الحاجات دي كلها مع بعض شئ صعب على أوي

وكوني أتخلى عن أي حاجة منهم شئ مستحيل بالنسبالي

بقضي يومي كله وانا جوايا الحاجات دي كلها

مع ان ده ساعات كتيرة اوي بييجي على حساب نفسي بس انا مبسوط بالحياة دي

مبسوط اني قادر اعمل حاجة لحد او اكون حاجة في حياتة حد

ومش بإيدي اني اكون دايما مستعجل وواخد السكة رايح جاي

ومش بإبدي اني اكون جنب كل حد في كل وقت

والدايرة بتوسع مني وكل يوم بعرف ناس و كل يوم

ناس اكترربنا بيسوقني ليهم عشان امشي في مصالحهم

او مرضي من الناس الطيبة اللي عايزني اروح اكشف معاهم

أشهد الله اني مش بقول كده سمعه ولا رياء وهو وحده اللي يعلم

انا بقول كده لاني مش عارف اعمل ايه ومش عارف أخرج من الدايرة المفرغة دي

بس بحاول على اد ما أقدر اني أكون جنب كل حد محتاجني

وبزعل جدا جدا لما ألاقي حد عزيز على بيزعل لو شافني مستعجل

او ماقدرتش اقف معاه شوية او ماخرجناش سوا من مدة او ما مش قادر

أرد على رسالته على النت او مش لاقي وقت اتكلم اون لاين

لانه بجد بيبقى غصب عني وفي وسط الحياة المزحومة دي

ساعات مش بلقى وقت أقعد حتى مع نفسي

أنا مش بقول معلهشي ورايا حاجة

غير لحد انا متعشم فيه وكان ظني فيه إنه هيقدر الوضع اللي بحكم حاجات كتيرة اوي بتحط فيه

حتى بين اصحابي انا حاسس اني ماشي على حبل

لاني بحبهم كلهم جدا من اول اللي فيهم بيحششوا لحد ناس ماشفتش

زيها في التزامها واحترامها ومنهم ناس شيوخ كبيرة

مش عايز اي حد في دول يبقى زعلان مني ومش عايز حد منهم يعوزني ومايلاقينيش

نفسي أرضيهم كلهم وقبل وبعد دا كله ارضي ربنا

حتى في الشعر انا اشتغلت مع زمايلنا في الاتحاد و في الجمعية العلمية

وفي الأسر وفي الجمعيات و وزمايلنا من الإخوان وشيوخ الجمعية الشرعيه

ماكانشي قصدي أبدا اني العب على كل الحبال

بس انا من جوايا مصدق الناس دي من جواها وحااسس انهم نفسهم يعملوا حاجة

وحاولت على اد ماقدرت اني أعمل حاجة تشرفهم وتساعد ولو بقدر بسيط في نجاحهم

بس الحبل مابين كل الحاجات دي طويل اوي وصعب أوي

أنا حاسس ان انا ماشي على حبل وانا بحاول اكون نفس الشخص وانا قاعد

مع الناس الفلاحين البسطا اللي على فطرتهم او وانا قاعد في مؤتمر كبير مع شخصات كبيرة

أنا حااسس اني ماشي على حبل وانا بحاول أوفق بين وعدي لأهلي

اني ماأخليش الشعر يشغلني عن مذاكرتي ومابين ناس كتير متعشمة في

وطالبة مشاركتي معاهم في مؤتمرات او في ندوات واحساسي اني لازم اكون أد الثقة دي

اونا والله عمري ماطلبت اني اقول في حاجة زي كده بس احب لما ينطلب مني

اكون اد المسئولية والثقه دي

ومعرفتي بالدكاترة مش هدف ولا غاية بالنسبالي

و فيه ناس منهخم متابغعين المدونة ويشهدوا اني عمري ماتملقت حد فيهم

ولا طلبت من حد فيهم يوصي على في لجنة لاني برفض المبدأ ده

كل اللي عملته اني حاولت اكون واسطة بين الدكاترة دول

وبين ناس متاجة للعلاج ومش قادرة على تمنه

حتى على المدونه حاسس اني ماشي على حبل

عايز ارضي كل أذواق الناس وعايز ماحدش يدخلها ويخرج زعلان

ساعات بحس اني قدرت اعمل كده وساعات بحس انه صعب..دا لو ماكانشي مستحيل

وخصوصا ان المدونه بيدخل عليها ناس كتير من مختلف الانتماءات

ومن مختلف الأذواق والأفكار والآراء ومن وسط الناس دي

ساعات بيظهر ناس ممكن تقول كلام يجرح وهي مش حاسة

يمكن يكونوا واحد ولا اتنين ولا تلاتة من وسط ناس كتير اوي

ومنهم حد ولا اتنين مايعرفونيش ولا انا اعرفهم وجرحوا اهلى بكلام مش كويس

والكلام ده كان بعد بوست عيد ميلاد المدونة من حوالي اربع شهور

ولاني مافهمتش ليه فيه ناس كده جالي وقت وقلت طب

ما أنا اجنب نفسي واجنب أهلي حاجة زي كده

لاني عايش طول عمري بحلم اكون سبب في سعادة اهلي دول

و صعب على أوي اني اكون سبب في ان حد يجرحهم بكلمة لاني اتكلمت على طبيعتي زيادة شوية

ولو كانت المدونه سبب في كده

بس قبل ما اروح اقفل المدونة صليت ركعتين استخارة وكان معايا احمد..واحد من أصدقاء عمري

ويادوبك دخلت النت ساعتها النت قطع عن مصر بحالها لما اتقطعت الكابلات

حسيت ان مافيش علامة من ربنا أكبر من كده اني أكمل..وكملت

و قلت انه مهما يحصل هكمل على المدونة ...و استغرب بيني وبين نفسي من

انتشار المدونه بالشكل ده يمكن ماتحسهوش هنا بس انا حسيته

لما دخلت بيوت ولاقيتها كل اللي فيها متابعينها

ولما رحت بلاد زي المنصورة واسكندرية

في ملتقيات الطلاب ولاقيت ناس متابعاها وحافظة حاجات منها

وحسيتها لما بدخل اي نت في الكلية والاقي ناس فاتحاها

وحسيتها لما لاقيت نادر انه يوم يعدي من غير ماحد ييجي يعرفني بنفسه

انا فلان الفلاني متابع المدونة بس معلهشي مش بعلق

كنت بفرح لاني حاسس ان ده مش نجاح لي لوحدي دا نجاح للمدونة اللي

انتو اهم حاجة فيها وانت اللي عملتوها معايا

كنت بفرح لما اشوف زمايلي في اي حتة بيشجعوني واولهم الناس اللي بكتب شعر

زي فرج وعلام ونادر وراجح مع انهم يمكن محتاجين الفرصة اكتر مني

بس كانوا دايما بيشجعوني وهما اللي يطلعوني اقول شعر

بس زي مافرج قال ان نجاح اي حد فينا نجاح لينا كلنا

يمكن عشان كل الكلام ده كان صعب على اوي اني اقفل المدونة دي مهما حصل ومهما اتقال

لانها مش بتاعتي زي ماكلكوا قلتوا قبل كده

انا مش بدور على شهرة والله ولا الموضوع ده يعنيني في شئ

بس ساعات بحس اني كتبت حاجة تستحق انها تتقري حتى ولو الناس ماعرفتش انها بتاعتي

يمكن اكتب حاجة تتحط في ميزان حسناتي او اكتب كلمة ربنا يرحمني يها

ويعفرلي كلام كتير خايف أكون أغضبته بيه

انا جوايا كلام كتير اوي

بس انا حاسس ان دلوقتي ارتحت بشكل كبير

في النهاية انا ماكتبتش الكلام ده لاني زعلان من حد

انا كتبته عشان مش عايز حد مهما كان يزعل مني

لانه بجد دا أوحشش ئ ممكن يحصللي انه يبقى فيه حد زعلان مني

انا كتبته لاني كان نفسي الناس تعرف ان الدنيا بالسنبالي اوسع بكتير من المدونه

بس بقت الساعات اللي بقضيها على المدونه هي اجمل وأمتع حاجة في الدنيا دي

انا كتبت الكلام ده عشان زي ماقلت كده انه كل ما الناس تحترمنا اكتر بيبقى صعب اكتر

اننا نحافظ على كده لان ساعتها عيوبنا بتبان بسهولة اكتر

بس اللي جواه احترام وتقدير ناحية محمود او ناحية كلام محمود

وساب كلمة تغير اللي جواه ده....يبقى انا كمان في غني عن اللي جواه ده

انا كتبته لاني مرة سألت زمايلي هو انا احسن في ايه

قالوي انك على طبيعتك اوي

طب اوحش حاجة في ايه

قاولي انك على طبيعتك أوي

عشان كده هفضل زي ما انا وهكتب وهقول كل اللي انا حاسس بيه ايا كان

حتى لو الناس افتكرت ان ده شئ يشبه الشيزوفرينيا

انا كتبت الكلام ده لانه كان خانقني وكان لازم أحكيه

ولأول ولآخر مرة بطلب منك انكوا ماتعلقوش علي البوست ده

بس بعد الكلام ده فيه طلب اتمنى تعذروني فيه

من التلات اللي جاي ان شاء الله هيبقى البوست كل تلاتين مش كل تلات

الكتابة في السيبرات بقت صعبة على اوي

و نفسي أركز في مذاكرتي شوية عشان اعمل حاجة تشرفكم انتو قبل اي حد

ده مش قرار ده رجاء مني ليكو اتمنى ماحدش يزعل منه ولا يزعل اني خدته لوحدي
أتمنى من ربنا ما اكونشي قلت كلمة ضايقت حد

واتمنى تعذروني لو كنت كئبتكوا شوية النهادرة

شكرا لانكوا دايما مستحملني

إني أحبكم في الله





8 comments:

Anonymous said...

اشهد ان لا اله الا الله وان سيدنا محمد رسول الله
والله يا جماعة متعرفوووووش فرحانه ازاى انى اول حد يكتب كومنت لحودة النهارده
اولا باه الســـــــــــــــــلام عليكم
ثانيا والله يا حوده انت جميل بجد مستحيل حد يزعل منك الا حد مش فاهمك
هكمل قرايه وارجع تانى بس كنت بحجز الكومنت
F.A

Anonymous said...

السلام عليكم
يــــــــــــا خواتى هموت مالفرح انى اول وتانى حد بيكتب كومنت
ما علينا بص يا دكتورى العزيز انت بجد بجد اكتر حد عرفته قرب منى جدا يمكن ده مش متعمد طبعا لكنه حصل بجد بجد يا حوده ارتحتلك جدا ومش متخيله ازاى ناس بتقدر تزعلك او تقولك كلام بيدايقك ده يبقى قلبهم جامد اوى
كمان مش معنى انك بتصاحب كل الناس وكل الانتماءات انك متملق او حد وحش بالعكس لانو كل فئه من الناس فيها جانب كويس وبيعجبنا جدا وبنتمنى نساهم معاهم ولو بالكلمه
وكمان مش معنى معرفتك بالدكاترة ومتابعتهم ليك انك برده حد متملق بالعكس ده دليل واضح لنجاحك وحب الناس ليك بعد حب ربنا طبعا لانو اللى يرضى عليه ربه يحبب فيه خلقه
ويا سيدى ما تقلقش بجد انت اولا طالب ناجح وده فضل الله عليك وان شاء الله انت دكتور ناجح وده من عطف ربنا عليك وانت بفضل الله ابن بار واكبر دليل لرضا والديك عنك انو كل الناس او معظمها بتحبك
وانت بالفعل اخ قدوة كل الناس تتشرف بيك
عارفه انى اتكلمت كتير جدا بس الفرحه باه يا حوده
وعايزة اقولك انى انا وحده من ضمن الناس اللى بتتشرف وتفخر انها عرفت حد زيك او انو حد زيك بيكلمها
ويارب دايما متفوق وناجح وفعال ومتنساااااااااش الغلابه اللى زينا يا احن واطيب واجمل وارقى حوده فالدنيا
F.A

د/عرفه said...

أحبك الذى أحببتنا فيه يا محمود
فعلا انا مش بعرف اكلمك كويس فى الكلية دايما حاسس انك تايه ومشغول بميت حاجة
وبعرف اكلمك كويس على المدونة
المهم صعب اوى يا محمود ترضى كل الأطراف ده شىء مستحيل
المهم أعمل اللى انت مقتنع بيه واللى انت عارف انه صح وميهمكش اى نقد
وان نفسى اعرف اركز فى المذاكرة زيك كده
والله المستعان
ربنا ميحرمناش من كتاباتك يا محمود

د/محمد الخطيب said...

يامحمود

نصيحة من أخوك الصغير

عيش الحياه ذى ماهى كده

بجد هتتعب اوى لو فكرت فى كل حاجة بالشكل ده

وذى ماقلت

ان دى ضريبة الشهرة

ربنا يسمعنا عنك خير يارب

۩۝۩ Dr. Flavio ۩۝۩ said...

السلام عليكم ورحمة الله وبركاته

يمكن بقالي فتره مش بعلق على المدونه ولكن ده لاينفي اني متابع واني قعدت ليلة امتحاني وجبتها من اولها وقعدت اقراها لأني شايف انها كلها كده هتطلعني من المود اللي انا فيه بالحاجات اللي تفرح فيها والحاجات اللي تبكي قبل اللي تفرح
كالعاده مش عارف ايه بيحصل لي وانا قدام مدونتك .. بحس انها بنتي رغم اني مش كتبت حرف فيها ولا حتى اعرف اكتب حرف فيها زيك .. البوست ده بكاني من كلامك عننا وبجد انا مازلت بفرح أوي لما الاقي حد فينا كتب حاجه كويسه والناس أثنت عليها وكأن النجاح ده نجاحي .. قريب كنت قلت لك بلاش القديم وقبلها كنت قايل لك اكتب اللي تحب تكتبه وميهمكش .. يمكن ظهر اني كنت متناقض بس انا مقصدتش إلا إني مش عاوز اشوف ردود تزعلك وتضايقك لأنها بتضايقني قبل ما تضايقك بس أقول لك .. اكتب يا محمود ومش تبص وراك ومش تدي بال أوي لأي حد يهاجمك ويتجنى عليك ..
يوم ما زعلت شويه مكنتش زعلان منك كنت زعلان من نفسي إني قلت حاجه ممكن تتفهم غلط ودي بجد حاجه بتهدني وبتلتخبط حياتي لفتره بس الحمد لله بحاول اعدي الفتره دي

محمود .. انا اتكلمت كتير معلش بس كان لازم اتكلم بعد فتره كبيره من الصمت على المدونه
بالنسبه لبوست امتحان اجباري واللي انا مش رديت عليه
كان فيه حاجه كده زي ايه رايك في محمود ... اعذرني لو ناسي السؤال بالتحديد
محمود : هو أنجح انسان شفته
هو حسب قواعد الشعر : شاعر مطبوع يمتلك من الموهبه ما لا يمتلكه غيره
هو كطبيب : طيب القلب يداوي المرضى بقلبه قبل أن يقدم لهم الدواء
هو من ناحية العلاقات : (بتعبير التنميه البشريه) رجل اتصال ناجح .. بل هو انجح رجل اتصال رأيته
أنا معلش يا محمود باقول اللي شايفه ومش بامدحك ومش باجاملك ... وأنا لو هجاملك كنت كتبت الرد ده في البوست اول ما نزل لكن انا من عاداتي اللي معرفش حلوه ولا وحشه اني أخلى كل حاجه جوايا .. وعمري ما عرفت اعبر عن اللي جوايا بشكل كامل حتى في القصايد دايما بقفل القصيده من زهقي و لو فضلت كده هضيف لها بعد فتره بس باقول كفايه عليها كده
أنا قلت كلام كتير ومعلش يا محمود مش هاقدر انفذ طلبك بإن محدش يرد على البوست ده

أحبك في الله

عندما تنهمر الدموع said...

السلام عليكم ورحمة الله وبركاته
ازيك ياد/محمود يارب تكون بخير معلش حضرتك طلبت مننا اننا منعلقش على البوست ده بس كان لازم اقول لحضرتك اني مبسوطة انك لما بتضايق بتيجي وبتتكلم وبتحكي لنا على اللي مضايق وده معناه اننا بقينا فعلااكتر من اصدقاء كلنا هنا على المدونة وكمان كنت عايزة اقولك ربنا يجازيك خير ويقويك على كل الحمل اللي انت شايله انا عارفة انها مسؤولية كبيرة عليك لكن انت ادها وان شاء الله هتحقق كل اللي بتمناه وهتكون اد المسؤولية لأن اللي زي حضرتك ربنا بيحطهم في طريق الناس عشان ينوروها عشان يكونوا جانبهم ويساعدوهم لما يحتاجوا مساعدة
بجد بدعي لحضرتك من كل قلبي انه يعينك ويقويك ويحققلك كل امانيك ويجازيك الف خير

شبه إنسانه .....( سهوره ) said...

بجد يا محمود مش عارفه أأقول لك ايه
هفضل دايما طول عمرى أأقول انك انسان رائع وطيوب والله ما مجامله يا محمود وانته عارف تكفى وقفتك جنبى لما يبقى فى مشكله
ربنا يكرمك يارب ويريح بالك ويحبب فيك امه لا اله الا الله ولولا ان الدنيا كلها بتحبك

أدام الله عليك قلبك الجميل يا حوده

fatma atiya said...

اخى فى الله سلام من الله عليك ورحمته وبركاته
بوركت فيم كتبت

صدقنى الوقت اللى قريت فيه سطورك رجعلى امل ان امة محمد "ص "لسه الخيرمليها لسه جوانا حب الله وحب الوطن جزاك الله خيرا يا اخى فى الاسلام

بس سبحان الله ليه حاسة من بين سطورك ان الحزن مليك و ع الرغم من كده ربنا جعلك سبب فى رسمة البسمة ع الوجوه سبحان مسبب الاسباب صدقنى احساسك بالعجز هو دليل قوى على انك بجد انسان مؤمن

انا مش داخلة اجامل او امدح لان سطورك اى كلام يتقال عنها فهو لايجازيها حقها .
تمنياتى لك ان تكون انسان مؤمن ناجح ودكتور ناجح وصديق ناجح وولد بار بوالديه واخ ناجح ومربى فاضل وناجح واب ناجح وزوج ناجح.

يارب بكلامك دا يهدى بيه شباب مسلمة اتمنى من الله ان يملأقلوبنا بالإيمان وحب الغير
جزاك الله يا اخى خيرا ع ما كتبته والى الامام دائما وموفق باذن الله