افتكاسات دكتور مفروس

Tuesday, April 28, 2009

السلام عليكم ورحمة الله
يارب يكون كل الناس بخير
انا بجد متشكر اوي لكل الناس اللي حضرت بدري النهاردة
بجد الواحد مش عارف يشكرهم ازاي صحيح ان الوقت ما امهلناش نكمل
بس متعوضة ان شاء الله...و اتمنى الناس اللي فضلت بعد الرواند
يكون عجبها صوت زميلنا ابراهيم مطاوع اللي بجد كان يستاهل
ان شاء في اقرب فرصة هقول في المدرج لإن الناس هناك
أحرجوا الواحد بحسن استقبالهم الجميل ده...جزاهم الله كل خير
أسيبكم مع بوست النهاردة
نست اقول ان كل واحد لازم يختار جملة...رخامة كالعادة يعني
................................................

افتكاسات دكتور مفروس

.....................................
لدخول الطب فرحة ٌ لا تتكرر ..إلا عند التخرج منه

...................................................
لأن أشياءاً كثيرة ً في حياتك ستتأجل بسبب الطب

فهم يدربوك على ذلك من الفرقة الأولى

..................................................
يستطيع الطبيب أن ينتقل إلى أي مكان في العالم بتكلفة ٍ أقل من التكلفة

التي تنتقل بها الدبلة من يده اليمني إلى يده اليسرى

.............................................
" تحب تتسأل في ايه؟"...هو أسهل سؤال من الممتحن.. ولكنه أصعب سؤال على الطالب
............................................

يتكفل الآباء بإحضار الأقلام والكراريس والكشاكيل لأولادهم حتى

يدخلوا كلية الطب..فيتركوا ذلك لشركات الأدوية

......................................................
في الطب تصنّف تقديراتنا كالتالي
امتيــاز...حد أقصى

جيـــــد ...حد أدنى

مقبـول....حد ضحك عليك

.........................................
في لجنة الشفوي غالباً ينسي الطالب كل ماذاكره قبل ذلك

وغالبا ما ينسى الدكتور انه كان طالباً وكان ينسي أيضاً
................................................

الروشتة الناجحة هي محاولة مستميتة لعقد اتفاقية سلام

بين جيب المريض وفاتورةالصيدلي

...............................
امتحان التحريري هو محاولة مضنية من الطالب للخروج بأقل الخسائر

من الحرب الضارية بين كتب القسم ومذكرات الدروس

..........................................
امتحان العملي هو محاولة مستحيلة من الطالب للخروج بأكبر قدر

من الدرجات من الدكتور مقابل أقل نقود يدفعها للحالة

..........................................
نحن في الطب كالسمكة في الماء ..كلانا يموت على البر

الفرق أننا نموت في البحر أيضاً
..........................................

أحيانا يضطر الأطباء للتحدث مع بعضهم باللغة الإنجليزية ليعلم المريض أنهم

قد توصلوا لتشخيص حالته وأحياناً كثيرة لكي لا يعلم أنهم لم يستطيعوا
............................

امتحانات بعد التخرج
mcqهتتخصص ايه...أصعب سؤال

give account بتاعك... أصعب سؤالc.v الـ
أول مريض تكشف عليه...أصعب لجنة عملي
أول مرة تقعد مع أبوالعروسة...أصعب لجنة شفوي

..................................................
الفرق بين عدد الحضور في مدرج الفرقة الأولى ومدرج الفرقة السادسة

هو نفسه الفرقبين عدد الحضور في مباراة نهائي كأس العالم

وبين الحضور في مبارة انبي مع الترسانة

...............................................
غالباً ماتفضل الطبيبة أن تتزوج طبيبا مثلها وذلك

لأنها تعلم أنه لم يعد في عينيه بقايا نظر ينظر به إلى غيرها

........................................................
يحاول أساتذة الطب أن يرضوا المرضى.. ويحاول الطلاب أن يرضوا الأساتذة

ويحاول النائب أن يرضي الطلاب والمرضي والأساتذة معاً

................................
بعد دراسة مادة النسا في الفرقة السادسة ستكتشف

"لماذا يخشى كل الناس من كيد "النسا
....................

بعض دكاترة الشفوي يسألونا لكي يسمعوا اجاباتنا

والكثير منهم يسألونا لكي لا يسمعوها

...................................
إذا أردت أي مساعدة من طالب طب فاطلبها منه قبل لجنة الشفوي مباشرة

فهو على استعداد أن يساعدك بأي شئ ليساعده الله داخل اللجنة

....................................
كثير ٌ من الأطباء لا يراعي أن الناس لا يملكون نقوداً

ولكن كثيراً من الناس لا يراعون أن الاطباء لا يملكونها أيضاً

................................
كتب القسم والضرائب..كلاهما اجباري...كلاهما تدفع له على مضض..كلاهما

"يرفع ضغطك حينما يأخذوا نقودك بإبتسامة ٍ عريضة تحت شعار "مصلحتك أولا
............................................

اقتداءاً بجذمة بوش لو قذفنا كل مسئول عن الإهمال في المستفيات بجذمة

فقد نحل أزمة المستشفيات ولكن بالتأكيد ستحدث أزمة في الجذم

.........................

معظم الأطباء الذكور لا يهتمون بتصفيف شعرهم

إما لأنهم لا يملكون وقت..أو لأنهم لا يملكون شعر

كدبت عليك

Tuesday, April 21, 2009

السلام عليكم ورحمة الله

بعد قصيدة النهاردة اتمنى الناس بعد ما تقراها وتعلق عيها

و انا نفسي اسمع رأي كل الناس فيها

تقري الدعوة الصغيرة في البوست الصغير اللي تحت

.................................................

الكدب في حياتنا عمره ما كان انك تقول انك معاك وانت مامعاكشي

ولا انك تقول انه ما معاكشي وانت معاك

الكدب ممكن يكون في حاجات كتيرة اوي واشكال كتيرة اوي

الكدب ممكن يكون بكلمة واحدة.. بنظرة واحدة.. بوعد واحد وعدته

وانت عارف من جواك انك مش هتقدر توفيه

يمكن الانسانة اللي كتبت على لسانها القصيدة دي مالهاش وجود غير في خيالي

وماكانشي في ذهني تخيل معين للكدبة اللي هي كدبتها

بس هي كدبت وماعرفتش ترجع ولا تعترف بالكدبة دي غير دلوقت

انا نفسي كل الناس تعيش مشاعرها دي وتحط نفسها مطرحها

بس نفسي كمان كل حد بعد ما يقرا الكلام يحط نفسه مطرح الحد

الي اتقال ليه الكلام ده...يا تري لو كنت مطرحه

تقدر تسامح حد كدب عليك...وخصوصا لو كنت ..بتحبه

.........................................................................
كدبت عليك

كدِبــــت علــــيك وماقدرتش.........أقــــــــوللك قلبي كان كداب
مشيت ويّـاك مابـــــــين حبك.........وبـــــين حيرة و ألم وعذاب
لإني مــــــاكنـــــتش أتصور........هيـــــيجي اليوم ..نكون أحباب
كدبت عليك
كدبت عليك ومـــــش عارفة ........في إيــه خـــــلاني أكدب إيه
ماكانـــشي ساعتــــها جوايا.........أمـــل بيحــــــــابي قلبي عليه
ومن طـــــــــبع البشر تغلط .........وبعد الغــــــلطة تســــأل ليه
كدبت عليك
سـرَقــت بكـــــدبتي حــبــك.........لاقـــــيت حـــبك بيــــسرقني
بقيت بكــــــــدب وبتـــــألــّم .........ونــــار الكـــــــدب تحرقني
و أصـــــــعب مـِــن كده إني........بشــــــوف قلــبك...مصدقني
كدبت عليك
شربت الحــــــــب من إيدك.......عطـــــشت زيادة لمـّـــا شربت
وقلـــبك حـُــــبّـه خــــــلاني......عشان أفضل في حضنه..كدبت
وخـَبـّـيت في الدمـوع نفسي.......ومن نــــــار المواجـهة هربت
كدبت عليك
بقيت عايشة بضمير مشقوق.......ونــــــــار مزروعة جوة الشق
مابين احساس يقــــــول أيوة...... وبين احـــــساس بيصـــرخ لأ
وأحــــس بإني كـــــــــــدابة...... ولــــــو حـــــتى ...بقول الحق
كدبت عليك
لاقيتني مشيت معاك في طريق….ماكــــــــانشي رجوعه بإيديّا
وخفت أحكي الحقـــيقة في يوم…. ولو كــــــــان حـــتى بعيــنيـّا
أموت من شـــوقي ليك و انــتَ......تمـــــــوت من صدمتك فيـّا
كدبت عليك
وخفت وخــــــــــوفي خـــلاني......أعــــــيش العمر كله سكوت
وقلت إزاي نهـــــــــــون واحنا......بنــــينا في قلب بعض بيوت
وخفت اللي اتبنى في سنـــــــين......في لحظة ضعف كله يموت
كدبت عليك
ياتري عشـــــــرتنا هتخليك……..تســــــــــامح قلب بيــغشـّـك
ياتري نار كــدبي هتقسـّـيك……..و تــُطرد قلـــــبي من عشك
وهيموت الحنين في عينيك…….. ويـُســـــكنها الدموع والشك
كدبت عليك
بلاش تقــــتلني نــــار شكك..........وخـــبّـيني.. في نـــــور حبك
كفـــاية عليّا لــــــــــوم ذاتي..........و انا عايشة .. بــــنار ذنبك
لكن محتاجة مــــــــنك وعد..........لقلبي ...مهــمااا كــان دربك
سواء قــــــــــررت نتفـــارق……..سواء هتســيبني أعيش جنبك
ولو سبت في مشــــاعـرك نار.........برغـم النـــار ياريــت قلبك
يسامح قلــــــبي في الحالتيـــــن …....لإنــــه بجــــــــد ...بيــحبك

الدعوة عامة

السلام عليكم ورحمة الله وبركاته

انا آسف ان كنت حيرتكو معايا في المكان اللي ممكن اقول فيه شعر

ومتشكر لكل الناس اللي ردت هنا وطلبت مني اقول شعر عندهم هنا او على الميل
بجد دا شئ يشرفني وخصوصا رواند خامسة الي بعتز جدا اني واحد منه
انا بفكر في حل ممكن يرضي كل الناس اللي عايزة تسمع القصديتين دول
انا لو ربنا يسر ممكن اقولهم في مدرج الجراحة الساعة تسعة الا ربع قبل الشيفت الاولاني
يوم الأربع اللي زي بكرة
بحيث ان اي حد عايز يحضر يحضر ويكون المكان معروف وسهل الوصول اليه
وانا بجد بجد اتمنى كل الناس تحضر..انا كان نفسي اقول في
مجموعة خامسة بس المشكلة ان احنا كل يوم في مكان وكل يوم بميعاد
بس لاقيت ان الحل ده ممكن يرضي الجميع ويبقى الموضوع اختياري لكل حد حابب
ييجي بدري عشان يسمع القصيديتين وماأكونشي برضو فرضت نفسي مرة واحدة كده على الناس
يارب يكون الميعاده مناسب كل الناس
واتمنى ماحدش يتحرج ييجي من اي رواند ومن اي دفعة
احنا كلنا اخوات ودرجة الاحترام اللي بنا المفروض تلغي حتى الاحراج دي
الدكتورة غادة بتمتحن على فكرة ومحتاجة دعواتكم
انا كمان محتاجها جدا
ربنا يكرم الجميع ان شاء الله
اشوفكوا التلات اللي جاي هنا والاريع الي بعده هناك ان شاء الله

بمنتهي الصراحة..تحديث

Tuesday, April 14, 2009



السلام عليكم ورحمة الله


تاااااااني....ايه اللي جابك

ياعم رد السلام الاول بس ..دا انت كرهتني في اللون الأحمر

وعليكم السلام ورحمة الله وبركاته ..هتكتي ايه تاني مش كفاية امبارح

لأا مش هكتب انا بس حسيت لما قريت البوست اللي تحت

حسيت انه مطلع الواحد في صورة كويسة زيادة عن اللزوم

بس انا والله ماقصدتش كده و بكلم وانا عارف ان الناس عارفين

اني مش قاصد كده بس هي الأسئلة لما تكون عن احلامك وليه بتدون

و صفاتك والحاجات اللي بتحبها وبتكرهها غصب عنك عتاخدك في السكة دي

حاجة تاني

اه...كنت عملت هدية صغيرة كده لزمايلي بمناسبة اني بقية خالو

والناس كلها عرفت..جمعت كل الجمل اللي كتبتها..وكتبتها في كام ورقة كده

بس مش عارف اسيبهم فين بحيث لو أي حد عايز يصورهم

بفكر اسيبهم في الرسالة أو في الشرقاوي ولا أعمل ايه..انتو ايه رأيكم

حاجة تالت؟؟...كفاية بقى

لا بس خلاص..انا بس حابب أشكر زمايلي في رواند خامسة

اللي منك منك برضو..بس هي بقت كده مافيش رواندات تانية

عايزاني اقول فيها اولا ايه


معلهشي الصورتين دول بحبهم_انا مش بحب الصور بتاعتي خالص
بس قلت لازم اخنق عليكوا واحطهم

ده كان بوست امبارح

السلام عليكم ورحمة الله وبركاته
ايه ده ايه اللي جابك النهاردة مش انت قلت كل اسبوعين مش كل تلات
طب ياعم رد السلام بس
وعليكم السلام ورحمة الله وبركاته...عايز تقول ايه..انجز
ياسيدي انا لاقيت نفسي فاضي شوية فقلت استغل الفرصة وادخل واكتب النهاردة
طب وهتكتب ايه....بس بالله عليك انجز من غير عك ولك
ياسيدي اانا قلت استغل الفرصة وارد على امتحان اتوجهلي من مدونة اخويا الصغير حسام غانم
وارد على الامتحان الاجباري اللي كنت عملته في المدونة هنا قبل كده
طب واحنا المفروض نقعد نقرا الكلام ده
مش عارف..بس هي الأسئلة لذيذة وصعبة و انا جيت ومش محضر اجابات اتمنى اقول
كلام يكون على نفس مستوى الأسئلة بس أوعدك اني هجاوب بمنتهي الصدق
هل لديك أي أقوال ٍ أخري
ايوة عندي قصيديتين عايز اقولهم أدام زمايلي لأول وآخر مرة بس مش عارف اقولهم فين
بس بفكر انه اكتر رواند هييجي منه تعليقات النهاردة هقول فيه ان شاء الله
عشان ما ابقاش حاسس ان انا فارض نفسي اوي


............................................................





نبدأ الامتحان الأول
بسم الله الرحمن الرحيم
اسمك
محمود سليمان عبدالوهاب سليمان أبوالعزم
المشهور بيه وسط أصحابك
سؤال في وقته عشان فيه ناس هنا ممكن تقول يا حودة وهي مش واخدة بالها ان
بقية الناس مش عارفة ان ده لقبي المفضل
انا وسط اصحابي مشهور من أيام الإبتدائي......ابوالعزم
بس والدي ووالدتي واخواتي وقرايبي وناس قريبين مني بيقولوا يا حودة ولحد دلوقتي
انا بصراحة مرتبط نفسيا باللقب ده...قولولي ليه
مش عارف بس يمكن شعان لما كنت بعمل حاجة غلط وانا صغير كان يقولولي


يا محمود عادي كده لحد ما يرجعوا يقولولي ياحودة اعرف ان الزعل راح خلاص
عشان كده فيه ناس بتقول ياحودة بحسن نية لانهم عارفين اني بحب الاسم ده
سنك
تلاتة وعشرين سنه و اتنين وخمسين يوم وشيوة ساعات فكة كده
اسم مدونتك
JOURNY TO MYSELF
مش عارف ليه الاسم ده بالذات من ضمن اسماْء كتيرة كانت في بالي
بس جاتلي فترة كنت بحلم فيها اني أعمل ديوان وكنت بفكر في اسم ايامها
وكنت مختار ليه الاسم ده ...مسافر إلى ذاتي...ليه؟...كنت بحلم ان كل حد يقرا كلامي
يوصل بالكلام ده لنفسه..او يلاقيه بيعبر عن حاجة جواه هو ماكانشي واخد باله منها
ولما أمير صاحبي كان بيعمل المدونه وقاللي عايز اسم طلع مني الاسم ده تلقائي
JOURNY TO MYSELF
..........................................


مجال دراستك
الفرقة السادتة طب طنطا...بكالوريوس يعني ان شاء الله...دعواتكم
الصورة الرمزية لمدونتك بتعير عن ايه
يعني ايه صورة رمزية..بيتهيألي مش عندي دي... بس فيه الهيدر بتاع
المدونة اللي فوق خالص ده..بتاع البنت اللي بتعيط دي ..أنا بحبه جدا
بالمناسبة...انتو زهقتوا منه...تحبوا أغبره
....................................
هل فكرت في اغلاق المدونة
مرتين....بدون الدخول في أسباب بس حسيت ان ده هيبقى
و ضعف وانهزام وانا مش بحب المعاني دي
................................................
ايه رد فعلك لو حد قل ادبه عليك في التعليق
برضو سؤال في وقته
بص يا سيدي عالم التدوين ده عبارة عن دنيا صغيرة او يمكن دنيا كبيرة
بيدخله ناس كتير وناس اكتر بتتابعه و زيها زي العالم الكبير فيه الحلو والوحش
وفيه اللي داخل ينقدك صح...وفيه اللي داخل ينقدك لمجرد النقد
من فضل ربنا على الواحد ان ده ماحصلشي معايا غير قليل جدا جدا
بس ماحذفتش الردود دي وسيبتها لاني مش بحب الحجر على الآراء ومادام سبت
الناس اللي بتكلم عني كويس لازم اسيب وجهة النظر التانية حتى برفض


الاشراف على التعليقات مع انه مفيد في احيان كتيرة
بس انا كلي ثقة ان الناس اللي بتدخل هنا ناس محترمة وعارفين بيقولا ايه
وانا راضي منهم بأي حاجة
..................................


أسوأ مدونة دخلتها
لاني بقعد نت وقت قصير أوي مش بدور بس هي مرة واحدة اتكعبلت في مدونة
واحد ملحد -ربنا يعافينا جميعا- كان حد بعتلي اللينك وبيقوللنا أدخلوا ردوا
بس أأنا رأيي انه لو كده بلاش حد يبعت اللينك لاننا كده
بنساعد حد زي ده انه ينشر افكاره حتى ولو ماحدش هيصدقه
هيحصل ايه للإميل بتاعك بعد ماتموت
ناس كتير وانا منهم دايما عندهم احساس ان عمرهم قصير..اكيد منكو ناس كده
و جه في بالي السؤال الي فوق ده...بس دلوقتي ان شاء الله
لما ربنا يريد كل الناس هتعرف من المدونة ومن مدونات زمايلي
...........................................................
أديت الباس وورد بتاعك لحد قبل كده
بتاع المدونة؟؟؟؟؟؟؟؟؟؟؟
ايوة لأمير وفرج وعلام وشرف....كانوا بيعملوها ويظبطوا حاجات فيها
........................................
السفر بالنسبالك
أكيد بحبه رغم اني عمري ماطلعت رحلات غير مرة في تالتة ثانوي
بس كان لي تجربة في الساحل الشمالي في شغل هناك في اجازة اولي وتانية كلية
كنت مسافر مش عشان فلوس الحمد لله كنت مسافر عشان أختلط بالناس
واتعلم منهم واعرف ازاي اتعامل في كل المواقف ومع كل حد
وكانت تجربة مفيدة جدا لي أكيد هحكيلكوا عنها ان شاء الله
.......................................
المود بتاعك
مش لاقي رد....تقدر تقول بعيش احساسي مش عارف اوصلها ازاي بس هي كده
...................................................
بتعمل ايه في وقت فراغك
المفروض ان حياة المسلم أصلا مافيهاش وقت فراغ


فيه حديث ما معناه انهم لما سألوا أهل الجنة اذا كاوا ندمانين على حاجة


خلي بالكم اهل الجنة اللي بيتنعموا أصلا


قالوا على كل ساعة عدت في الدنيا وماذكرناش فيها ربنا
فيه ألف حاجة ممكن تعمل على الأقل ممكن نمسك مصحف نقرا او نسبح أي حاجة
لو بصينا للدنيا كده مش هنحس بوقت الفراغ
بس لو مع اصحابي ممكن العب كورة... بلاي استيشن..شطرنج
............................................
الاكلة المفضلة
ايوة كده اهي دي الأسئلة
انا معروف وسط اصحابي اني بحب الأكل
وحتة الأكل دي من الحتت اللي مافيهاش عندي أي رومانسية خالص
وانا فعلا أكيل شوية...بس في الأكلات اللي بحبها
اللي بييقولوا عليها ..حنطة..يارب تكون مفهومة...اكل الناس البـُسطا
زي الكشري والبطاطس المقلية والفول والبطاطس المهروسة والبامية والمسقعة
وبحب اللحمة والفراخ بشرط ما اشوفهاش وهي نية لاني لو شفتها قيل ماتنطبخ مابلكلهاش

قال يعني الواد رومانسي اوي


وفيه أكلات تانية مافيشهاش رومانسية بس مش عايز أوجع بطنكم


أنا جعت على فكرة
بس ماباكلشي المكرونة الا لو بالبشمل ولا محشي الكرنب
ولا الكرنبيت ولا الفاصوليا وحاجات تانية كده
وبحب اشرب شاي بالنعناع وعصير قصب ومابشربشي اللبن
بالمناسبة سنة بسيطة ممكن كلنا نتعلمها سوا عشان انا مابحبش حد يقولوله كل كذا
يقول لا اصل كذا مابحبنيش عشان يعني مايقولشي انا مابحبش كذا.
النبي صلى الله عليه وسلم في الموقف ده كان يقول..تعافه نفسي..كلمتين اتنين
والله عمري ماشفت رقة وادب اكتر من كده...صلى الله عليه وسلم
..........................................
الصفات اللي ورثتها من والدك
صعب السؤال ده أوي ومش هقدر أجاوب عليه
والدي كان مدرسة في كل حاجة ولو في حاجة كويسة فهي شئ صغير من اللي كان فيه
كفاية انه حببني في الكتابة واداني شئ صغير أوي من حكمته الكبيرة بكتب
بيه وبحاول امشي بيه في حياتي.... وعلمني معني الرضا


ربنا يرحمه ويغفرله ومايخلفشي ظنه فيا
.............................
الصفات اللي ورثتها عن والدتك
سؤال أصعب من اللي فات
كفاية اقولك اني خدت منها اللي خلاني طول عمري مااعملشي حاجة
تخلى حد يقوللي يا ابن كذا ولا بهزار ولا بجد والحمد لله عمر ماحد قالها
ولا حد يقول دا معرفوش يربوا لان حلم حياتي اكون دايماا مصدر فخر للناس
اللي اعرفهم واكيد والدتي اولهم طبعا
..................................................
اكتر ست حاجت بتكرهها
اشمعني سته يعني ..هو اللي حط الامتحان اهلاوي ولا ايه
هو اكيد يقصد ست حاجات بعد الحاجات المتفق عليها
بكره ايه ...بكره ايه


بكره الاحساس بالعجز خصوصا ناحية الناس اللي بحبهم
بكره الشخصية البارانويد "الناس اللي حاسة بنفسها أوي وحاسة ان مافيش حد زيها


...انا ممكن استحمل الرذل واللي دمه تقيل والبخيل
واللي عقله خفيف واللي واللي ...إلا ده ما استحملوش مع اني عمري ما اتعاملت


معاهم شخصيا بس لما اشوف حد منهم ولو حتى في التيفزين بتخنق جدا

بكره التكلف والمظاهر والناس اللي بتحب المظاهر
بكره الأحكام المسبقة والاحكام المتسرعة والاحكام التعميمية
بمعني ان مابحبش حد يقول دا السلفيين دول ناس متشددة ومتذمتة
ولا احب حد يقول دا الاخوان ناس بتوع سلطة كلهم
ولا احب حد يقول الصوفية ناس مبتدعة ومخرفة
او ان مثلا المنايفة كلهم وحشين وهكذا
كل حتة فيها الكويس والوحش وانا بحب احكم على الفرد من افعاله


من غير ما اعمل عنه رأي مسبق
وهو يقدر يثبت الكلام اللي عليه ده او ينفيه من غير ما اكون انا ظلمته
وبعدين مش بحب الناس اللي بـتألــّه نفسها هي مكتوبة كده صح ..بتأله
يعني بيدي نفسه الحق انه يحكم على اللي في قلوب الناس
ودي حاجة ماحدش يعرفها غير ربنا ومالناش احنا اننا ندخل فيها
ماحدش عارف مين احسن عند ربنا
بكره الفلسفة اللي زي بتاعت ديكارت وسقراط والناس دي
بكره الناس اللي عايشة حياتها تصطاد أخطاء الآخرين
هضربلكوا مثل...لما ابوتريكة دخل الجون التاني في الزمالك وراح شور لجمهور


الزمالك يسكتوا عشان كانوا بيشتموه بوالدته..تاني يوم صحفيين كتير
مسكوه قطعوه وانهيار رمز ابوتريكة وازاي ابوتريكة يعمل كده وكلام كبير كده
مع اني كنت شايف ده من حقه وحتى لو مش من حقه انا مابحبش
الناس اللي بتتقلب بسرعة دي
بكره الكدب وبحس انه ممكن يهد في لحظة سنين طويلة من الصدق
بكره الناس الإنفة اللي بتكلم من طرف منخيرها و بتأرف من كل حاجة
بكره اشوف واحد ماشي مع مراته او بنته او اخته وهي لابسة لبس مش كويس
وهو ماشي عادي كده و كأنه مبسوط او كإن ده الطبيعي
انا بكره جدا الراجل اللي مش بيغير....أمال راجل ازاي

بكره لما نبقى في كتب كتاب في المسجد او في جنازة وألاقي ناس واقفة
برة مستنية الصلاه تخلص عشان يخشوا يهنوا او يمشوا في الجنازة
للدرجادي ممكن نفرط في ديننا...نبقى ادام الجامع والصلاة شغالة ومانصليش
................................................

أكتر ست حاجات بتحبها
اكيد برضو يقصد بعد ربنا والنبي صلي الله عليه وسلم واهلي وكده
بحب أصحابي أوي أوي كلهم بلا اسثناء
ومن فضل ربنا عليا انهم رغم كترهم كل واحد فيهم بيمثللي حاجة...ربنا يبارك في عمرهم كلهم
بحب صلاة الفجر وازعل اوي لما أضيعها بحس انها اجمل حاجة في اليوم
واحس ان اليوم اللي يعدي من غيرها يوم مهما حصل مالوش طعم
وده مش رياء ولا سمعة لإن المفروص
ان ده الأصل يعني ده مش فضل مننا أبدا.. حتى لو عملنا أد كده مليون مرة
فأكيد احنا مقصرين برضو


وده اللي خلاني اتكلم عن صلاة الفجر لانها حاجة ناس كتير سايباها
مع انها شئ ممتع وبييريح نفسية الواحد مهما كان اللي جواه
حد قاللي مرة كلمة شديدة اوي بخصوص الموضوع ده
قاللي لو صليت الفجر في البيت او صليته متأخر اختار لنفسك اسم حريمي
لإن الحريم هما اللي مسموح لهم يعملوا كده..انما الرجالة لأ
بحب الناس الطيبة البسطا اللي لسه قلبهم ابيض وبزعل لما أفقد حد منهم
بحب أكتب شعر بس مش بحب أقراه بس بحب شعر زمايلي
بحب رمزي اللي في راجل وست ستات..بيضحكني من قلبي


بحب التأمل


بحب الناس اللي عايشة عمرها عشان ناس تانية
بحب العيال الصغيرة اللي أقل من اربع خمس سنين كده
وخصوصا البنات لانهم مش بيفقدوا برائتهم بسرعة
بحب الراديو ومن اول تانية اعدادي لحد دلوقتي مابذاكرشي غير والراديو
مفتوح جنبي انا حتى بحب التمثيليلات اللي بتيجي فيه
كفاية ان خيالي بيكون هو المخرج بتاعها من غير الحاجات الهبلة بتاع التليفزيون دي
لاني بكره التليفزيون بحس انه كله تمثيل في تمثيل
حتي البرامج بيستضيفوا الناس اللي بتمثل والاعلانات بيعملها الناس اللي بتمثل
....ِشخصيتك نوعها ايه
شخصية محبة للحياة طموحة قادرة على تقبل الآخرين أياً كانوا
مترددة في أحياة كثيرة وقليلة الثقة بالنفس في أحيان اكتر
ساعات ممكن يبان ان جوايا تناقضات كتير بس انا بشوف ده لاني جوايا متسع
لحاجات وناس كتير
لماذا دخلت عالم التدوين
سؤال جاوبته كتير قبل كده
بإختصار عشان تبقى المدونة بيت صغير يجمع كل الناس اللي بيحبوني وبحبهم
واللي بيحترموني وبحترمهم و حاجة انشر فيها كل اللي بكتبه سواء حلو او وحش
واكلم وانا عارف ان فيه ناس كتيرة بتسمعني وبتشاركني مشاعري
.........................................
أجمل كلمة اتقاللت في وصف مدونتك
حقيقي والله كل الناس هنا كلامها أجمل من بعض
بس في وصف المدونة...رابطة الحب..اتمنى فعلا تكون كده
..............................
أهمية التعليق بالنسبة ليك
اهم حاجة في المدونة طبعا...الكلام الحلو اللي الناس بتقوله دايما هو اللي بيخليني
أكتب تاني.... كفاية اقوللك اني حافظ معظم التعليقات
واني لما اكون مخنوق بجيب المدونة من تحت خالص واقعد اقرا التعليقات من تاني
باختصار هو نبض المدونة
.......................
أحسن بوست كتبته وليه..حط اللينك
انا كل المواضيع اللي كتبتها مرتبط بيها جدا
بس لو بسوت واحد هيبقى...هدية ليلة القدر
لاني حسيت براحة غريبة بعد ما كتبته ولإني حسيت انه ساب أثر جوة ناس كتير


http://journy-to-myself.blogspot.com/2008/09/blog-post_26.html
.........................................

أجمل بوست قريته؟ وأجمل مدونة
انا مش بتجول كتير في المدونات بس انا شايفه عالم رائع جدا
واحيانا بقعد ادامه ومش باخد بالي ان ميعاد الاتوبيس فات
بس اأجمل بوست واجمل مدونة بجد مش في دماغي حاجة معينه دلوقتي
..........................
الانترنت بالنسبالك ايه
رغم اني مش من محبي التكنولوجيا اوي
بس النت كان فرصة ان اللي بكتبه يدخل بيوت الناس بطريقة محترمة
من غير دوشة ومن غير حساسيات و بفرح اوي لما بلاقي أسر بأفرادها المختلفة
بيتابعوا المدونة
تمرر التاج لمين
بص بما اني أكتر حد عنده زهايمر فأنا مش هقول اسامي عشان ما انساش حد
والاجابات مفتوحة لأي حد حابب يجاوب ولغير اصحاب المدونات اتمنى يردوا
على الأسئلة اللي مش عن المدونة


على الاقل اكتر حاجات بيحبها واكتر حاجات بيكرهها


........................................
انا طولت أوي عشان كده هأجل اجابات الامتحان الاجباري لأاي وقت تاني
معلشي تعبتكوا كالعادة


بس انا كمان مش هلحق الأتوبيس وهروح مواصلات بس فداكوا مرمطة المواصلات






ربنا يكرمكم ويعزكم ويصونكم جميعاً

ح

رساايل هدية ..من غير زيرو تسعمية

Tuesday, April 7, 2009

السلام عليكم مرة تانية
نسيت بس اقول ان معرض الكلية اتلغي السنادي
بجد خسارة انا كان اسبوع المعرض اجمل اسبوع في السنة بالنسبالي
بس الناس في علوم جزاهم الله خيروجهوولي دعوة اني اشترك في معرضهم
واشتركت هناك في الدور الارضي في كلية العلوم والمعرض ابتدي النهاردة
..........................................
السلام عليكم ورحمة الله
بقوللك ايه يا محمود بقالك شهرين كائبنا في المدونه
اكتب حاجة تفك الجو شوية بقى
حاضر
طب انجز بقى وبلاش تحنقنا بالمقدمة الطويلة بتاعة كل مرة دي
حاضر
بس بلاش تقولنا اختاروا جملة واحدة ولا بيت واحد والحركات الرخمة دي
حاضر
...............

س انا مش هكسر كلامه ان شاء الله وقعدت افكر في فكرة مختلفة للتلات ده
وخصوصا ان فيه مناسبة تستاهل ..بس رجاءا ماحدش يحرقها عشان
انا عايز اخليها للملتقى ..احتمال يبقى فيه ملتقى يوم التلات الجاي...احتمال
المهم انا جمعت عدد من الرسايل كتبتها في مواقف مختلفة وعلى لسان ناس كانت بتطلبها مني
معظمهم كانوا من اصحابي وفيه ناس منهم كانت خاطبة ومتجوزة
وعايزين يبعتوا رسايل تحمل معني معين
وقلت اجيبهالكم يمكن تحبوا تبعتوا منها رسايل خصوصا ان فيه ناس كتير طلبت مني كده
وانا كمان بتخنق من الرسايل الخليجيجة اوي بصراحة
على فكرة البوست ده اهداء خاص لصاحبي وحبيبي...محمد عبدالباسط
لان هو اللي اقترح على الفكرة
ياعم قلنا انجز بطل عك بقى
يا عم قلنا حااضر حاااااااضر هكتب أهو
................................................

عتاب
الرنة صحيح جميلة.....وقلـــبي بيها حس
بس انت لحــد إمتى.....تفـــضل ترن بس؟؟
...............
بلاش تروح وتغــيب عنّا ..لإن بُعدك حــاجة تجن
دا انت الوحيد اللي أتمنى...أفتح علـيه كل ما بيرن
............................
بلاش تفــضل علـيّا تغير.......بلاش تســرح بتفكيرك
عشان حبك في قلبي كبير ....ولا حبيت في يوم غيرك
"ولو شمـيت"ريحة" تغيير....أكيد العيب في"منخيرك
................................
لو انت مش شايف حـبي.....اسمحلى أقوللك يا خسارة
يا إما عايــز تجـــــرحني.... يا إماعــايز نــضــــــــارة
............................
وبرغــم البعد كنا...قريبــــــين زمـــــــان
دلوقتي ليه بعــدنا...واحنا في نفس المكان
...................
بخل
ترن هرن..هتطنش..هطـــــنـّش والزعل مرفوع
رسالة هرد برسالة....في محمولي الشكك ممنوع
...................................
غلـِــــــطتْ وبرنلك....تفــــــتح عليــّا ليه
ازاي ايدك طاوعتك...تتــــــكي عالأوكيه
صلح بقى غلـطـتك...وابعتلي خمسة جنيه
...............................
"رومانسي..مع اني مابحبش الكلمة دي"
من غيـر كده ولا كده....حبك دخل في القلب
انت اللي زيـــــك كده....مخلوق عشان يتحب
.......................................
أنا قلبي تمللي فاكرك....مهما الأحزان تشدّه
احـــنا اللي بـنـّـا أكبر....من إن شــــــئ يهده
.......................
لاقيت الحـــب ولاقيــــتك....وشــــــفت الدنيا حلوة بجد
عشان من يوم ما حبيتك ....خلاص مابقيتشي بَـكره حد
.............................

مش هنسي الحب عمري
ولا عمري في يوم نسيت
Your love come in the memory
With each heart beat
......................
فيه ناس بعد الفـــراق....تنسى اللي فات في ثانية
بس انت في قلبي حبك....بيــــــزيد في كــل ثانية
……………………..
كل ثانية تعدّي بيـّـا
وانت مش أدام عينيّا
مش بيبقى فراق بيبقى
حكم بالإعدام عليـّـا
............................
أنا قلت في بعدك هنساكي...وأتاري البعد طلع أخطر
حبيتك أوي و انا ويـــاكي....وفي بعــدك حبيتك اكتر
.......................
أيامنا مهما تفــــــوت....محنة ورااا محنة
هنكون كيان ليه صوت....ولا حزن جااارحنا
والحب يبــــــني بيوت...للنور في جوارحنا
كلمة "أنا" هتموت....علشان تعيش "احنا"
معلهشي هي الرسالة طويلة بس أنا بحبها
.....................
إذا كنا لا نختار من نحبهم..يكفي أن نختار ان نظل نحبهم
..........................
أنا بيك ضحكتي ترجع ليــّا....ودموعي قوام تهــرب مـِ العين
لو حتى حزين برضو عينيّا....عمرها ماتشوفك وابقى حزين
…………………….
Memories are like along road that when
we reach its end we discovered that the most
Beautiful thing in it was its first steps
……………………………
لو تبعد ماتخافشي عليّا.....هفتكرك مهما زمانّا يفوت
footلحد الـHead حبك هيعيش دايماً فيّا...من عند الـ
……………………………
لما حـــــس القلب بيك...فيه مشـــــاعر بيها حس
بس صعب أوصفها ليك....فيه حاجات تتحس بس
............................
ولك في داخلي حب ٌ.....كلام الكون لا يكفيه
إله الكون يعــــلمه ُ....ويدري كـم أحبك فيه

غصب عني لاقيتني راجع...ليك ورافع ألف راية
قلبي مااستحملشي بُعدك....والحـــنين احتار معايا
حتى لما داريت في نـَفسي....نفسي حنت من ورايا
………………………
your love became greater
than what can say the lips
there are more and more
“metshal” between the ribs
........................
رسايل خفيفة
حبك كـــــبر مــــــقامي...حبك عمـــــللي قيمة
ياللي غرامك في قلبي....بقى عاهة مستديمة
.....................
ولاعدت بنام في ليلة..ولا اذاكــــــــر بالنهار
حبك يا نـــن عيـــني....بقى موت وخراب ديار
يااللي انت سكنت قلبي...ومأخـــــــر الإيجار
......................
عسل أبيض نمرة واحد
ياغالبني ســـــتة واحد
حبك حقيــــــــقي ولا
ناوي تلـــــبسني حلـّة
وتقول علـــيكوا واحد
.......................
جوة كتاب المشاعر...حـــــبك سطر الــــبداية
ولا حبيت قبل منـّـك...ولا كانلي في يوم حكاية
جوة صحيفة سوابقى....حبك أول جـــــــناية
......................
enough for me معاك يرضيني لو كلمة...كلامك ده
please call me ويفرح قلبي برسالتك....ولو حتى
..........................
حبك سكـــــــن قلبي...وفي جتتي ملبـّـش
واللي في جمالك كده....إزاي مايتحبش؟؟
.............................
أرجوك حافظ عليّا...و راعيـــــني ليل نهار
ماتسيبنيش أبقى دايماً...على قايمة الانتظار
أصل القلب اللي زيّي...مالهــــوش قطع غيار
...........................
انت دايما ً جوة قلبي.....حتى وانـــت هناك بعيد
نفسي اقول مشتاق أشوفك...نفسي أقوللك عيد سعيد
نفسي أقول ميت ألف حاجة...انما معاييش رصيد
.........................
يااللي انتي دخلتي قلبي...من غير كارنيه دخول
ما تـُـــــردي عليّا مرة....ولا انــــتي واكلة فول
يااااه على الرومانسية

....................................
اللي جاية دي مش رسالة بس انا قلت احطها في الخباثة كده
يا حكومة ضايعة مضيّعة
الخلق قاعدة مصيّعة
ليه همنا بيسرّكم؟؟؟؟؟؟؟؟
انا مش هعيش زي الخروف
وهقولها ليكوا كفاية خوف
يشفي الطيور ويضركم
.............................
..........................
للأطباء فقط
Large doseمن حبك يا حبيبي....أنا واخد
anastamose ارجع علشان قلوبنا... تعمل
………………..
بدمــع عيني...يا حبـــــيبي بينغسلmy face
Vessel وفي الـ nerve حبك عمّال بيجري...في الـ
............................
rythmحبك لخبط كياني...وماعادشي في قلبي
Pulmonary embolism...خايف من كتره يعمل...
........................
من كتاب الرمد
حبك يا جمــيل جرحنى...وباعني لـــــيه بـــــــلاش
Rubbing lashزي الـ….irritation وعمللي
..........................
انا مهما شفت بعدك....رجالة أو حــــــريم
into blood stream...هيعيش حبك لوحده
..................................
حبك ٌ قــطعني خالص...ولاعمــــري في يوم يئست
positive regurge test..وبقيت من كتر دمعي
……………………
الحب لما اشوفك....بيرُج قــــــــلبي رج
drug رحت لكل الدكاترة...مانفعشي معاه
....................................
In my eyes the best...حبك دايــــــماً هيفضل.....
Dullness over the chestياللي انت هواك عمللي......
..............................
انا مهما شفت بعدك....رجالة أو حــــــريم
into blood stream...هيعيش حبك لوحده ....
................................
أنا هفضل برضو أحبك...مهما على قلبي دست
Host أنا هعمل قلبي….Organismولو انت

وآخرتها؟؟؟؟؟؟

Friday, April 3, 2009

احمد...شاب عنده 18 سنة ..أمور ...طيب..بيتكلم كتير ودمه خفيف..مؤهل متوسط
أحمد بص لمستقبله لقىمافيش اي مستقبل ليه هنا
أحمد بص لقى كل الشباب في قريتنا الكبيرة مسافر برة
احمد دور على الراجل اللي بيهربهم عن طريق البحر
احمد هرب عن طريق ليبيا وركب المركب في عرض البحر
احمد غرق في البحر
قصة حصلت ادامي وعشت أحداثها لان احمد كان جارنا في الأرض
وكنت بشوفه كل يوم الصبح وانا رايح الكلية
يمكن تحسوا ان أحمد شاب لسة صغير
بس فيه غير أحمد تلاتة تانيين كلهم في تانية وتالتة اعدادي
أنا من بلد-كفر كلا الباب- مساحتها كبيرة واعداد سكانها كتير أوي
تسعين في المية او اكتر من شباب البلد دي مسافر
مش عشرة ولا عشرين ولا مية ولا ميتين
دول يتعدوا بالآلاف
كفاية اقولكم في منطقة المفروض ان لسة السكن فيها مش أوي
في شارع طوله أقل من خمسميت متر وفيه مساحات كتير خالية
فيه تلاتة وخمسين واحد مسافر من وسط حوالي 35 او اربعين بيت
لان معظم البيوت فيها اتنين او تلاتة مسافرين
ووسط كل كلام الناس عن الناس اللي ماتت دي انا مابقيتش عارف الصح فين
أكيد السفر بالطريقة دي غلط
أكيد مش صح ان الناس ترمي ولادها في ليبيا عشان لو نفدوا من الشرطة هناك
يركبوا مركبة..عبارة عن شوية خشب ماسكين في بعص..
في عرض البحر من ليبيا لايطاليا
و بعدمايشوفوا الموت بعيينهم يتمسكوا هناك
ويااما يعرفوا يهربوا يا اما يرجعوا مذلولين
وبعد داكله يعيدوا التجربة من تاني
مش هتصدقوا لو قلتلكوا ان جارنا خلى ابنه يسافر ايطاليا وهو في خامسة ابتدائي
والله العظيم في خامسة ابتدائي لسه عنده عشر سنين
بس هما بيسفروا العيال دي عشان هناك في ايطاليا مش هيرجعوهم
وبيدخلوهم المدرسة و الناس تفرح اوي ابني عدى ودخل المدرسة
زي فرحة الناس زمان لما ابنها يدخل طب او هندسة
وماحدش واخد باله انها مدرسة تنصير
وماحدش واخد باله ان الواد ده مايعرفشي يعني ايه اسلام ولا يعني ايه دين
ولا يعرفوا ان لو اي حد قاله اي حاجه هيصدقه لانه مايعرفشي الصح من الغلط
بس الناس بتنهبل وهي شايفة ابن فلان اللي جنبها عمال يبعت يورو
وفلان بني فيلا أربع ادوار وجاب عربية تويتا كوريلا وهو مش لقى اللضى لسة
بيتهيالي ان احنا اكتر قرية في مصر فيها فيلات وعربيات تويتا كوريللا
واغلي سعر للارض والمباني واغلى سعر للجواز حتى
لدرجة ان اللي مش مسافر مابيعرفشي يجوز فيها
اكيد مش صح ان الناس تسيب تعليمها وكلياتها عشان تسافر
وزمايل لي كتير كانوا في تجارة وحقوق وتربية عملوا كده
بس في نفس الوقت بفتكر بلدنا قبل ما يطلع موضوع ايطاليا ده
وكان ماليها شباب عاطل وكل يوم نسمع عن
جرايم قتل وسرقة و.....ماهوا شباب عاطل مش لاقي حاجة يعملها
وافتكر تجربة لواحد قريبي لما راح ايطاليا اول مافتحت سنة تسعين
بس خد قرار انه يرجع ويشتغل في بلده ويتجوز ويعيش زي الناس وخلاص
ويتقى ربنا ويبعد عن مواطن الشبهات
و من كتر التزامه وتدينه كان رافض يدفع فلوس لاي وظيفة عشان ماتبقاش رشوة
وفضل لمدة خمستاشر سنه في مصر هنا يتلطـّم من هنا لهنا
خمستاشر سنه بيدور على لقمة حلال ليه ولأسرته
و بعد الخمستاشر سنه...سافر تاني...تخيلوا
بس سافر تهريب المرادي
وافتكر كلمة واحد صاحبي كان عايز يسافر فخفت عليه
و قلتله وايه اللي يجبرك تشوف الموت بعينيك
قال اللي يجبرني ان انا هعيش ميت هنا برضو
وافتكر الناس اللي رفضت تسافر و كان جواها احلام وطموحات نفسها تعملها هنا
بس كل الاحلام دي مااتت جوة الأدراج على عتبة الاجراءات والرسوم
وكانه بيتحارب في بلده وكإنه ماحدش عايزه يعمل حاجة هنا
واتغاظ اوي لما يطلع الأخ المسئول بمنتهى البرود ويقول
اللي معاه تلاتين الف يسافر بيهم مايعمل بيهم مشروع احسن
ومايعرفشي ان الناس بايعة هدومها عشان توفر مبلغ زي ده
وما يعرفشي- وانا شفت بعيني- ان حتى اللي حاولوا يعلموا حاجة ماقدروش
معلهشي لو كنت منفعل شوية بس انا محروق من جوايا اوي على
العيال اللي ماتت دي وكان نفسي افرغ الشجنة دي
ومن زعلى لاني عاؤف ان النس مش هتبطل تعمل كده
وفي النهاية عايز قول لكل حد سرق ولو قرش واحد من البلد دي
انه هيتحاسب على روح الناس دي
لان البلد دي لو خيرها ما اتسرقشي كان قضانا وماكانشي حد
هيضطر يرمي ولاده في البحر لانه شايفهم كده او كده....هيموتوا