بمنتهي الصراحة..تحديث

Tuesday, April 14, 2009



السلام عليكم ورحمة الله


تاااااااني....ايه اللي جابك

ياعم رد السلام الاول بس ..دا انت كرهتني في اللون الأحمر

وعليكم السلام ورحمة الله وبركاته ..هتكتي ايه تاني مش كفاية امبارح

لأا مش هكتب انا بس حسيت لما قريت البوست اللي تحت

حسيت انه مطلع الواحد في صورة كويسة زيادة عن اللزوم

بس انا والله ماقصدتش كده و بكلم وانا عارف ان الناس عارفين

اني مش قاصد كده بس هي الأسئلة لما تكون عن احلامك وليه بتدون

و صفاتك والحاجات اللي بتحبها وبتكرهها غصب عنك عتاخدك في السكة دي

حاجة تاني

اه...كنت عملت هدية صغيرة كده لزمايلي بمناسبة اني بقية خالو

والناس كلها عرفت..جمعت كل الجمل اللي كتبتها..وكتبتها في كام ورقة كده

بس مش عارف اسيبهم فين بحيث لو أي حد عايز يصورهم

بفكر اسيبهم في الرسالة أو في الشرقاوي ولا أعمل ايه..انتو ايه رأيكم

حاجة تالت؟؟...كفاية بقى

لا بس خلاص..انا بس حابب أشكر زمايلي في رواند خامسة

اللي منك منك برضو..بس هي بقت كده مافيش رواندات تانية

عايزاني اقول فيها اولا ايه


معلهشي الصورتين دول بحبهم_انا مش بحب الصور بتاعتي خالص
بس قلت لازم اخنق عليكوا واحطهم

ده كان بوست امبارح

السلام عليكم ورحمة الله وبركاته
ايه ده ايه اللي جابك النهاردة مش انت قلت كل اسبوعين مش كل تلات
طب ياعم رد السلام بس
وعليكم السلام ورحمة الله وبركاته...عايز تقول ايه..انجز
ياسيدي انا لاقيت نفسي فاضي شوية فقلت استغل الفرصة وادخل واكتب النهاردة
طب وهتكتب ايه....بس بالله عليك انجز من غير عك ولك
ياسيدي اانا قلت استغل الفرصة وارد على امتحان اتوجهلي من مدونة اخويا الصغير حسام غانم
وارد على الامتحان الاجباري اللي كنت عملته في المدونة هنا قبل كده
طب واحنا المفروض نقعد نقرا الكلام ده
مش عارف..بس هي الأسئلة لذيذة وصعبة و انا جيت ومش محضر اجابات اتمنى اقول
كلام يكون على نفس مستوى الأسئلة بس أوعدك اني هجاوب بمنتهي الصدق
هل لديك أي أقوال ٍ أخري
ايوة عندي قصيديتين عايز اقولهم أدام زمايلي لأول وآخر مرة بس مش عارف اقولهم فين
بس بفكر انه اكتر رواند هييجي منه تعليقات النهاردة هقول فيه ان شاء الله
عشان ما ابقاش حاسس ان انا فارض نفسي اوي


............................................................





نبدأ الامتحان الأول
بسم الله الرحمن الرحيم
اسمك
محمود سليمان عبدالوهاب سليمان أبوالعزم
المشهور بيه وسط أصحابك
سؤال في وقته عشان فيه ناس هنا ممكن تقول يا حودة وهي مش واخدة بالها ان
بقية الناس مش عارفة ان ده لقبي المفضل
انا وسط اصحابي مشهور من أيام الإبتدائي......ابوالعزم
بس والدي ووالدتي واخواتي وقرايبي وناس قريبين مني بيقولوا يا حودة ولحد دلوقتي
انا بصراحة مرتبط نفسيا باللقب ده...قولولي ليه
مش عارف بس يمكن شعان لما كنت بعمل حاجة غلط وانا صغير كان يقولولي


يا محمود عادي كده لحد ما يرجعوا يقولولي ياحودة اعرف ان الزعل راح خلاص
عشان كده فيه ناس بتقول ياحودة بحسن نية لانهم عارفين اني بحب الاسم ده
سنك
تلاتة وعشرين سنه و اتنين وخمسين يوم وشيوة ساعات فكة كده
اسم مدونتك
JOURNY TO MYSELF
مش عارف ليه الاسم ده بالذات من ضمن اسماْء كتيرة كانت في بالي
بس جاتلي فترة كنت بحلم فيها اني أعمل ديوان وكنت بفكر في اسم ايامها
وكنت مختار ليه الاسم ده ...مسافر إلى ذاتي...ليه؟...كنت بحلم ان كل حد يقرا كلامي
يوصل بالكلام ده لنفسه..او يلاقيه بيعبر عن حاجة جواه هو ماكانشي واخد باله منها
ولما أمير صاحبي كان بيعمل المدونه وقاللي عايز اسم طلع مني الاسم ده تلقائي
JOURNY TO MYSELF
..........................................


مجال دراستك
الفرقة السادتة طب طنطا...بكالوريوس يعني ان شاء الله...دعواتكم
الصورة الرمزية لمدونتك بتعير عن ايه
يعني ايه صورة رمزية..بيتهيألي مش عندي دي... بس فيه الهيدر بتاع
المدونة اللي فوق خالص ده..بتاع البنت اللي بتعيط دي ..أنا بحبه جدا
بالمناسبة...انتو زهقتوا منه...تحبوا أغبره
....................................
هل فكرت في اغلاق المدونة
مرتين....بدون الدخول في أسباب بس حسيت ان ده هيبقى
و ضعف وانهزام وانا مش بحب المعاني دي
................................................
ايه رد فعلك لو حد قل ادبه عليك في التعليق
برضو سؤال في وقته
بص يا سيدي عالم التدوين ده عبارة عن دنيا صغيرة او يمكن دنيا كبيرة
بيدخله ناس كتير وناس اكتر بتتابعه و زيها زي العالم الكبير فيه الحلو والوحش
وفيه اللي داخل ينقدك صح...وفيه اللي داخل ينقدك لمجرد النقد
من فضل ربنا على الواحد ان ده ماحصلشي معايا غير قليل جدا جدا
بس ماحذفتش الردود دي وسيبتها لاني مش بحب الحجر على الآراء ومادام سبت
الناس اللي بتكلم عني كويس لازم اسيب وجهة النظر التانية حتى برفض


الاشراف على التعليقات مع انه مفيد في احيان كتيرة
بس انا كلي ثقة ان الناس اللي بتدخل هنا ناس محترمة وعارفين بيقولا ايه
وانا راضي منهم بأي حاجة
..................................


أسوأ مدونة دخلتها
لاني بقعد نت وقت قصير أوي مش بدور بس هي مرة واحدة اتكعبلت في مدونة
واحد ملحد -ربنا يعافينا جميعا- كان حد بعتلي اللينك وبيقوللنا أدخلوا ردوا
بس أأنا رأيي انه لو كده بلاش حد يبعت اللينك لاننا كده
بنساعد حد زي ده انه ينشر افكاره حتى ولو ماحدش هيصدقه
هيحصل ايه للإميل بتاعك بعد ماتموت
ناس كتير وانا منهم دايما عندهم احساس ان عمرهم قصير..اكيد منكو ناس كده
و جه في بالي السؤال الي فوق ده...بس دلوقتي ان شاء الله
لما ربنا يريد كل الناس هتعرف من المدونة ومن مدونات زمايلي
...........................................................
أديت الباس وورد بتاعك لحد قبل كده
بتاع المدونة؟؟؟؟؟؟؟؟؟؟؟
ايوة لأمير وفرج وعلام وشرف....كانوا بيعملوها ويظبطوا حاجات فيها
........................................
السفر بالنسبالك
أكيد بحبه رغم اني عمري ماطلعت رحلات غير مرة في تالتة ثانوي
بس كان لي تجربة في الساحل الشمالي في شغل هناك في اجازة اولي وتانية كلية
كنت مسافر مش عشان فلوس الحمد لله كنت مسافر عشان أختلط بالناس
واتعلم منهم واعرف ازاي اتعامل في كل المواقف ومع كل حد
وكانت تجربة مفيدة جدا لي أكيد هحكيلكوا عنها ان شاء الله
.......................................
المود بتاعك
مش لاقي رد....تقدر تقول بعيش احساسي مش عارف اوصلها ازاي بس هي كده
...................................................
بتعمل ايه في وقت فراغك
المفروض ان حياة المسلم أصلا مافيهاش وقت فراغ


فيه حديث ما معناه انهم لما سألوا أهل الجنة اذا كاوا ندمانين على حاجة


خلي بالكم اهل الجنة اللي بيتنعموا أصلا


قالوا على كل ساعة عدت في الدنيا وماذكرناش فيها ربنا
فيه ألف حاجة ممكن تعمل على الأقل ممكن نمسك مصحف نقرا او نسبح أي حاجة
لو بصينا للدنيا كده مش هنحس بوقت الفراغ
بس لو مع اصحابي ممكن العب كورة... بلاي استيشن..شطرنج
............................................
الاكلة المفضلة
ايوة كده اهي دي الأسئلة
انا معروف وسط اصحابي اني بحب الأكل
وحتة الأكل دي من الحتت اللي مافيهاش عندي أي رومانسية خالص
وانا فعلا أكيل شوية...بس في الأكلات اللي بحبها
اللي بييقولوا عليها ..حنطة..يارب تكون مفهومة...اكل الناس البـُسطا
زي الكشري والبطاطس المقلية والفول والبطاطس المهروسة والبامية والمسقعة
وبحب اللحمة والفراخ بشرط ما اشوفهاش وهي نية لاني لو شفتها قيل ماتنطبخ مابلكلهاش

قال يعني الواد رومانسي اوي


وفيه أكلات تانية مافيشهاش رومانسية بس مش عايز أوجع بطنكم


أنا جعت على فكرة
بس ماباكلشي المكرونة الا لو بالبشمل ولا محشي الكرنب
ولا الكرنبيت ولا الفاصوليا وحاجات تانية كده
وبحب اشرب شاي بالنعناع وعصير قصب ومابشربشي اللبن
بالمناسبة سنة بسيطة ممكن كلنا نتعلمها سوا عشان انا مابحبش حد يقولوله كل كذا
يقول لا اصل كذا مابحبنيش عشان يعني مايقولشي انا مابحبش كذا.
النبي صلى الله عليه وسلم في الموقف ده كان يقول..تعافه نفسي..كلمتين اتنين
والله عمري ماشفت رقة وادب اكتر من كده...صلى الله عليه وسلم
..........................................
الصفات اللي ورثتها من والدك
صعب السؤال ده أوي ومش هقدر أجاوب عليه
والدي كان مدرسة في كل حاجة ولو في حاجة كويسة فهي شئ صغير من اللي كان فيه
كفاية انه حببني في الكتابة واداني شئ صغير أوي من حكمته الكبيرة بكتب
بيه وبحاول امشي بيه في حياتي.... وعلمني معني الرضا


ربنا يرحمه ويغفرله ومايخلفشي ظنه فيا
.............................
الصفات اللي ورثتها عن والدتك
سؤال أصعب من اللي فات
كفاية اقولك اني خدت منها اللي خلاني طول عمري مااعملشي حاجة
تخلى حد يقوللي يا ابن كذا ولا بهزار ولا بجد والحمد لله عمر ماحد قالها
ولا حد يقول دا معرفوش يربوا لان حلم حياتي اكون دايماا مصدر فخر للناس
اللي اعرفهم واكيد والدتي اولهم طبعا
..................................................
اكتر ست حاجت بتكرهها
اشمعني سته يعني ..هو اللي حط الامتحان اهلاوي ولا ايه
هو اكيد يقصد ست حاجات بعد الحاجات المتفق عليها
بكره ايه ...بكره ايه


بكره الاحساس بالعجز خصوصا ناحية الناس اللي بحبهم
بكره الشخصية البارانويد "الناس اللي حاسة بنفسها أوي وحاسة ان مافيش حد زيها


...انا ممكن استحمل الرذل واللي دمه تقيل والبخيل
واللي عقله خفيف واللي واللي ...إلا ده ما استحملوش مع اني عمري ما اتعاملت


معاهم شخصيا بس لما اشوف حد منهم ولو حتى في التيفزين بتخنق جدا

بكره التكلف والمظاهر والناس اللي بتحب المظاهر
بكره الأحكام المسبقة والاحكام المتسرعة والاحكام التعميمية
بمعني ان مابحبش حد يقول دا السلفيين دول ناس متشددة ومتذمتة
ولا احب حد يقول دا الاخوان ناس بتوع سلطة كلهم
ولا احب حد يقول الصوفية ناس مبتدعة ومخرفة
او ان مثلا المنايفة كلهم وحشين وهكذا
كل حتة فيها الكويس والوحش وانا بحب احكم على الفرد من افعاله


من غير ما اعمل عنه رأي مسبق
وهو يقدر يثبت الكلام اللي عليه ده او ينفيه من غير ما اكون انا ظلمته
وبعدين مش بحب الناس اللي بـتألــّه نفسها هي مكتوبة كده صح ..بتأله
يعني بيدي نفسه الحق انه يحكم على اللي في قلوب الناس
ودي حاجة ماحدش يعرفها غير ربنا ومالناش احنا اننا ندخل فيها
ماحدش عارف مين احسن عند ربنا
بكره الفلسفة اللي زي بتاعت ديكارت وسقراط والناس دي
بكره الناس اللي عايشة حياتها تصطاد أخطاء الآخرين
هضربلكوا مثل...لما ابوتريكة دخل الجون التاني في الزمالك وراح شور لجمهور


الزمالك يسكتوا عشان كانوا بيشتموه بوالدته..تاني يوم صحفيين كتير
مسكوه قطعوه وانهيار رمز ابوتريكة وازاي ابوتريكة يعمل كده وكلام كبير كده
مع اني كنت شايف ده من حقه وحتى لو مش من حقه انا مابحبش
الناس اللي بتتقلب بسرعة دي
بكره الكدب وبحس انه ممكن يهد في لحظة سنين طويلة من الصدق
بكره الناس الإنفة اللي بتكلم من طرف منخيرها و بتأرف من كل حاجة
بكره اشوف واحد ماشي مع مراته او بنته او اخته وهي لابسة لبس مش كويس
وهو ماشي عادي كده و كأنه مبسوط او كإن ده الطبيعي
انا بكره جدا الراجل اللي مش بيغير....أمال راجل ازاي

بكره لما نبقى في كتب كتاب في المسجد او في جنازة وألاقي ناس واقفة
برة مستنية الصلاه تخلص عشان يخشوا يهنوا او يمشوا في الجنازة
للدرجادي ممكن نفرط في ديننا...نبقى ادام الجامع والصلاة شغالة ومانصليش
................................................

أكتر ست حاجات بتحبها
اكيد برضو يقصد بعد ربنا والنبي صلي الله عليه وسلم واهلي وكده
بحب أصحابي أوي أوي كلهم بلا اسثناء
ومن فضل ربنا عليا انهم رغم كترهم كل واحد فيهم بيمثللي حاجة...ربنا يبارك في عمرهم كلهم
بحب صلاة الفجر وازعل اوي لما أضيعها بحس انها اجمل حاجة في اليوم
واحس ان اليوم اللي يعدي من غيرها يوم مهما حصل مالوش طعم
وده مش رياء ولا سمعة لإن المفروص
ان ده الأصل يعني ده مش فضل مننا أبدا.. حتى لو عملنا أد كده مليون مرة
فأكيد احنا مقصرين برضو


وده اللي خلاني اتكلم عن صلاة الفجر لانها حاجة ناس كتير سايباها
مع انها شئ ممتع وبييريح نفسية الواحد مهما كان اللي جواه
حد قاللي مرة كلمة شديدة اوي بخصوص الموضوع ده
قاللي لو صليت الفجر في البيت او صليته متأخر اختار لنفسك اسم حريمي
لإن الحريم هما اللي مسموح لهم يعملوا كده..انما الرجالة لأ
بحب الناس الطيبة البسطا اللي لسه قلبهم ابيض وبزعل لما أفقد حد منهم
بحب أكتب شعر بس مش بحب أقراه بس بحب شعر زمايلي
بحب رمزي اللي في راجل وست ستات..بيضحكني من قلبي


بحب التأمل


بحب الناس اللي عايشة عمرها عشان ناس تانية
بحب العيال الصغيرة اللي أقل من اربع خمس سنين كده
وخصوصا البنات لانهم مش بيفقدوا برائتهم بسرعة
بحب الراديو ومن اول تانية اعدادي لحد دلوقتي مابذاكرشي غير والراديو
مفتوح جنبي انا حتى بحب التمثيليلات اللي بتيجي فيه
كفاية ان خيالي بيكون هو المخرج بتاعها من غير الحاجات الهبلة بتاع التليفزيون دي
لاني بكره التليفزيون بحس انه كله تمثيل في تمثيل
حتي البرامج بيستضيفوا الناس اللي بتمثل والاعلانات بيعملها الناس اللي بتمثل
....ِشخصيتك نوعها ايه
شخصية محبة للحياة طموحة قادرة على تقبل الآخرين أياً كانوا
مترددة في أحياة كثيرة وقليلة الثقة بالنفس في أحيان اكتر
ساعات ممكن يبان ان جوايا تناقضات كتير بس انا بشوف ده لاني جوايا متسع
لحاجات وناس كتير
لماذا دخلت عالم التدوين
سؤال جاوبته كتير قبل كده
بإختصار عشان تبقى المدونة بيت صغير يجمع كل الناس اللي بيحبوني وبحبهم
واللي بيحترموني وبحترمهم و حاجة انشر فيها كل اللي بكتبه سواء حلو او وحش
واكلم وانا عارف ان فيه ناس كتيرة بتسمعني وبتشاركني مشاعري
.........................................
أجمل كلمة اتقاللت في وصف مدونتك
حقيقي والله كل الناس هنا كلامها أجمل من بعض
بس في وصف المدونة...رابطة الحب..اتمنى فعلا تكون كده
..............................
أهمية التعليق بالنسبة ليك
اهم حاجة في المدونة طبعا...الكلام الحلو اللي الناس بتقوله دايما هو اللي بيخليني
أكتب تاني.... كفاية اقوللك اني حافظ معظم التعليقات
واني لما اكون مخنوق بجيب المدونة من تحت خالص واقعد اقرا التعليقات من تاني
باختصار هو نبض المدونة
.......................
أحسن بوست كتبته وليه..حط اللينك
انا كل المواضيع اللي كتبتها مرتبط بيها جدا
بس لو بسوت واحد هيبقى...هدية ليلة القدر
لاني حسيت براحة غريبة بعد ما كتبته ولإني حسيت انه ساب أثر جوة ناس كتير


http://journy-to-myself.blogspot.com/2008/09/blog-post_26.html
.........................................

أجمل بوست قريته؟ وأجمل مدونة
انا مش بتجول كتير في المدونات بس انا شايفه عالم رائع جدا
واحيانا بقعد ادامه ومش باخد بالي ان ميعاد الاتوبيس فات
بس اأجمل بوست واجمل مدونة بجد مش في دماغي حاجة معينه دلوقتي
..........................
الانترنت بالنسبالك ايه
رغم اني مش من محبي التكنولوجيا اوي
بس النت كان فرصة ان اللي بكتبه يدخل بيوت الناس بطريقة محترمة
من غير دوشة ومن غير حساسيات و بفرح اوي لما بلاقي أسر بأفرادها المختلفة
بيتابعوا المدونة
تمرر التاج لمين
بص بما اني أكتر حد عنده زهايمر فأنا مش هقول اسامي عشان ما انساش حد
والاجابات مفتوحة لأي حد حابب يجاوب ولغير اصحاب المدونات اتمنى يردوا
على الأسئلة اللي مش عن المدونة


على الاقل اكتر حاجات بيحبها واكتر حاجات بيكرهها


........................................
انا طولت أوي عشان كده هأجل اجابات الامتحان الاجباري لأاي وقت تاني
معلشي تعبتكوا كالعادة


بس انا كمان مش هلحق الأتوبيس وهروح مواصلات بس فداكوا مرمطة المواصلات






ربنا يكرمكم ويعزكم ويصونكم جميعاً

ح

19 comments:

بنجاواتى said...

أول تعليق؟!!!!!
انا مش مصدق نفسى ياناس
هقرا وراجع.......

بنجاواتى said...

السلام عليكم
اولا: من ارض الكفاح المسلح نرسل لكم تحياتنا..

ثانيا: يا حووووووووووووودة

ثالثا: ايه بقى الشخصية البارانويد دى؟؟!!!

رابعا:نسيت تقول الكرشة فى الاكل

خامسا:تقبل فائق احترامى

د.ميريهان said...

نقطة النقد تكررت للمرة الثانية هنا...وماذكرت صحيح...هناك اناس لم يعتاد لسانهم على اخراج الحسن...لذا فلا تستغرب منهم حديثهم...ولا تعتبر به الا بقدر ان تعود لنفسك فتحاسبها ثم تكمل...


نقطة اخرى عجبتني جدا...حديثك عن صلاة الفجر...صلاة الفجر من ضيعها لم يبارك الله في يومه...اعاننا الله على قضائها حاضرة...

النقطة الثالثة...هي صفة تعميم الشر...هناك مثل يقول الخير يخص والشر يعم...كم اكره هذا المثل...أيحاكم الجمع بذنب الفرد؟؟...(اللهم لاتؤاخذنا بما فعل السفهاء منا)...لكن هذا هو الطابع الغالب...
أما عن الحل..لااعتقد ان هناك حل مالم يتغير الناس...
قدجذبني رايك هنا...دكتور


ختاما...تحياتي
رزقك الله علما نافعا وعملا متقبلا
ورزقني واياك رضا الوالدين...
أتعلم...اكثر مااكره..عقوق الوالدين...

سلمت يمينك
ولا فض فوك

Unknown said...

اولاانا راوند خامسه
متهيقلي كل واحد يدخل يكتب راونده علشاان نفورز بالقصيدنين
ومستنيين نسمع القاصدتين
وانا عايزه ااكد علي حاجه انت قلتها
ان مش صح ان نحكم علي حد بسرعه او من خلال موقف يمكن خانوا التوفيق فيه
لازم تعاشر الانسان دا وتشوف تصرفه في كذا موقف
وبردو موضوع صلاه الفجر فعلا والله بتفرق في اليوم كله
ربنا يهدينا جميعا...

حسام غانم said...

إجابات جميلة يا ( حودة )

وشكرا على قبول التاج

محمد عبد الباسط said...

اجابابت دبلوماسيه من الدرجه الاولي

دمت مبدعا

لاتنسانى من دعائك

انا راوند 5 يا حوده

حلم كبير

۩۝۩ Dr. Flavio ۩۝۩ said...

أنا داخل أدعم راوند خامسه في السباق وأديله صوتي

وكلمة لآخر مره دي بايخه جدا جدا يا حوده.. انت عارف اننا نتمنى نسمعك على طووووووول


ولو سمحت أنا عاوز اسمع قصيدة عينا مها .. وانا طلبتها منك اكتر من مره ولغاية دلوقتي مش سمعتها .. لو مقلتهاش هزعل

سلااااااااااام .. دعواتك يا حوده

Anonymous said...

اولااناخامسه واحب انحنا كلنا نسمع القصيدتين دول في اقرب فرصه اما حته انك حاسس انك بتفرض نفسك علي حد اعتقد ان كل الناس بتكون فى قمه سعادها وهي بتسمعك ربنا يكرمك ويرزقك اياك وايانا الثبات علي صلاه الفجر من يتق اتته يجعل له مخرجا ويرزقه من حيث لا يحتسب

DiNa MaHmOuD said...

بالنسبة للقصديتين
فأى حد يسمع يبقى يسجل عشان نفسي اسمع قصيدة مرة


*********
لأول مرة في حياتى أقرأ إجابة حد عن مثل هذه الاسئلة بدون ما أشعر على رغم متابعتى لمدونات كثيرة
إلا اننى لا استطيع الاستمرار غالبا في قراءة اكثر من سطرين

لكن
ما شاء الله اجاباتك يا دكتور تعبر عن عقل واعى وانسان مسلم وفاهم الدنيا صح

وحضرتك بالشكل دا تعتبر الى حد كبير شخصية نموذجية - الكمال لله - وحب الناس ليك
دليل على حب ربنا ليك

ربنا يخليك لأهلك ولدينك ووطنك

dr_dina

semsema said...

ازيك يا محمود
عارفة اني مقصرة في حق المدونة كتير بس والله مش بقعد نت من فترات طويلة انت عارف بقي الكلية والكورسات حاجة تهد والله يا محمود
حوار صريح جدا استمتعت بيه
وبوست الرسايل بجد رااااااااائع ما شاء الله
سامحني علي الـتقصير والـتأخير
الف مبرووووووووك يا خالو
انا روند 3
خالص تحياتي ومودتي

شق القمر said...

ازيك يا محمود
شو أخبارك وأحوالك ؟؟
مبارك يا خال عبدالرحمن
:D
وبارك لحنان كتير
الحمد لله التدوينة بتبشر بانك تمام وبخير
وبجد سعيدة جدا بيها
لأنها اضافت جديد عن محمود
واضافت جديد لينا اتعلمناه
ربنا يزيدك ويبارك فيك
سلاااااااام

قلم رصاص said...

السلام عليكم

احييك على المدونة الرائعة دي

واجاباتك جميلة جدا

تسلم ايدك

في حفظ الله

عندما تنهمر الدموع said...

السلام عليكم ورحمة الله وبركاته
ازيك يا د/محمود يارب تكون بخير انا قريت اسئلة الامتحان وراجعت الاجابات كويس بس بصراحة في حاجة محيراني اقول لحضرتك د/محمود ولاد/حودة هو انا عرفت ان حضرتك بتحب اسم حودة اكتر من محمود بس مش عارفة اذا كنت حضرتك هتوافق اني اناديك د/حودة لو دا هيضايق حضرتك قولي
اما بقيت الاجابات فهي عرفتنا على شخصية حضرتك اكتر على اللي بتحبه واللي بتكرهه الحاجة اللي بتفرحك واللي بيزعلك
على فكرة انا تقريبا بتفق مع حضرتك في حاجات كتير مبحبش الكدب والنفاق ولا الغرور واكتر حاجة مبحبهاش الحالة اللي وصلنالها الكره والحقد اللي بقى زي الوباء بين ناس كتير القيم اللي ضاعت الاخلاق اللي اندفنت والعادات الجديدة اللي ظهرت مبحبش التخاذل اللي بقينا فيه مبحبش اللي وصلناله من ضياع المروءة والنخوة بين الناس
اما اللي بحبه بعد الله تعالى ورسوله وكل اهلي واصحابي هو الاطفال بجد بموت فيهم وعشان كده نفسي اطلع دكتورة اطفال بحب الخير بحب احس ان كل اللي حواليه فرحانين بحب الدعوة اللي بسمعها من ماما وهي بتدعيلي ان ربنا يوفقني بحب المسؤولية اللي بابا حطني فيها وحملهالي بحب ثقته فيه وفي اني هحافظ دايما على اخواتي وارعاهم كاخت كبيرة خايفة على مصلحتهم وصديقة يلجأوا ليها لما يحتاجوها بحب نظرة الفرح اللي بشوفها في عين اي حد طلب مني حاجة وعملتها
ده تقريبا كلام مختصر عن اللي بحبه واللي بكرهه
المهم ربنا يكرمك ويوفقك وياريت متبخلش علينا بالقصايد اللي بتقولها في الراوند ولا هي محللة على الفرقة السادسة ومحرمة على باقي الفرق؟
انا بهزر بس بجد مبحبش افوت اي حاجة لحضرتك الا واقراها

quiet_storm said...

انا



روندى




اتنين


:D:D:D

quiet_storm said...

انا



برده





روندى




اتنين

:D:D:D

quiet_storm said...

وانا

كمان

روند

اتنين




*********

ومع كل الاصوات دى انا متاكده انك مش هتقول فى روند اتنين

طلبى انا بقى انك تعرفنا هتقول امتى وفين عشان نتشرف بالحضور

بالتوفيق يارب دايما والف مبروك عليك لقب خالو
وعقبال لقب بابا ان شاء الله
ربنا يبارك لهم فيه يارب ويجعله قره اعين لهم فى الدنيا والاخر


وكمان طلب
فين السبوع يامحمود؟؟؟؟؟؟

عبد الحميد محمود said...

أنا شفتك في اسبوع شباب الجامعات

حتي بالأمارة قلت القصيدة بتاعة الفوطه

العجيب

انه عندك قصايد أفضل منها ؟؟

أكيد معيارك مختلف

خاصة انك طبيب - مستقبلاً

ويبدو انك واخد الشعر هواية

عامة

تشرفت بمعرفتك

وربنا يوفقك

محمود ابوالعزم said...

انا آسف اني مشيت امبارح من غير ما أرد على ردود الناس هنا
انا متشكر اوي لكل الناس اللي ردت
بجد متشكر
و أكيد زي كل مرة مش هلحق أرد على واحد واحد
بس جزاكم الله خيرا جميعا
عندما تنهمر الدموع
دكتور محمود..دكتور حودة.. من غير دكتور خالص
أي حاجة منك حلوة
المهم تفضلي دايما متابعة المدونة علطول
ودايما تنوريها بتعليقاتك

شكرا ليكم جميعا

Anonymous said...

متغيرتش كتير
جميل جدا
ما شاء الله