في البوست المائة..رثاء محمول..و..الضحكة المرة

Tuesday, May 19, 2009

السلام عليكم ورحمة الله
مش هطول في المقدمة ولا هقول اعتذارات كتير
انا هدخل في الموضوع علطول أهو
النهاردة البوست رقم مية على المدونة
ودي مناسبة دايما بيبقى ليها احتفال خاص على المدونات
انا هحتفل بس احتفال صغير بعملين اتنين بحيث يرضوا كل الأطراف ان شاء الله
عمل للناس كلها والتاني للناس اللي في طب بس
يارب يارب يعجبوكوا
........................................

رثاء محمول

يا جماعة هنــّـــــوني...يا اخوانــّا باركولي

يا جماعة لو تسمحوا...من بعــض لمـّــولي

أنا أصلي من لخــمتي...ضيـّـــعت محمولي

كااااااااااان حلو وبكاميرا.....ليه بس لـــــــيه سرقوه

دا انا بـَــعد منــِّـه خلاص.....تحــْـرم عليّــا ألــــــــوو

على بعد ميـــــــت كيلو.....كان يبـــــدأ البــــــلوتوث

كان فيه تلات كامــيرات.....و رفـــــرفين و فـــانوس

كان ميموري ميت جيجا.....والشاشة نوع مـِ الـ top

ناقصه يادوب رامــــتين......و يتـــــــــــقلب لاب توب

بيخش نــــــــــت وفـــيه.....راديــــــو وتليــــــــفزيون

كان ناقــــــــصه تلاجـة........ونـــروح نجيب مأذون

طول عمره عاش طاهـر......كــان بــركة في جيوبي

علشان لا حاطـــــط فيه......ولا هيــــــــفا ولا روبي

من بعد ما منـــــــبهّــه......سابني مافيش صــــحيان

وليــلاتي بتحـــــسـّـــر......على لعــــــــــــبة التعبان

ولا عمره بهـــــــــدلني......وتعـــــــــــبني بمـشاكله

ولا نوكيا ولا سامسونج.....راح يعملوووا شكــــــله

يااللي سرقـــته هعيـش..... طول عمري بَدعي عليك

مع كل طلـــــــعة صبح..... روح ياك يفــــــرقع فيك

ليه تســـــرقه وانا بــيه..... مالحقــــتش أتهـــــنــّى

وتسيبني قاعــــــــد هنا......لا رســـــالة ولا رنــــة

ياللي عــــشان تمَـــــنه.......بعـــــــناله نص قيراط

بـــــعدك هقـــضـــــّيها.......طول عمري سنــترالات

دلوقتـــــي ايه حـــــالك .....في غــُــــــربتك عــني

اوعي يكون فســـــدوك......وصبــــــــــحت بتغـنـي

يااااخــــوفي وانت هناك......مبــــــادئــنا تـنــساها

ويكونوا حطـّوا علـــــيك.....أفــــــلام مــــــــن اياها

ارجع يا محـــــــــمولي........يا مجـــمع الأحـــــباب

ازاي تسيـــــب عشرتي.....وتعــــيش في أي جراب

أنا هفضل أستنـــــــــاك.....ترجع في يوم يا أصـــيل

أنا مش هجيب غـــيرك....لو فتـــحوا ميت تــــوكيل

ولحد ماااااااااا تــرجع.....أنا مش هشيل محــــاميل

.......................................

على فكرة الموبايل ماضاعشي..أنابس كنت نسيته في الأتوبيس

وفاتت ساعة على ما لاقيته كنت كتبت فيها القصيدة دي وانا قاعد مستني

وقلت أنشرها كمشاركة وجدانية لكل حد موبايله ضاع أوهيضيع إن شاء الله

وهي فيها مبالغة شعرية شوية لإن أنا معايا عدة ألف مية واتناشر من بتاع الغلابة

...................................................

الضحكة المرة

"آفية الطب السياسي"

المشكلة اللي عندنا في مصر....اشمعني....upper motor

Auto immuneاحنا السرقة اللي فينا.....اشمعني....

Past history المصريين لسة ماشيين....اشمعنى....بالـ

Adecuate supplyلو مواردنا ما بتنسرقشي كانت عملت....

الفقرعامل مع المرض ......اشمعنى...co-infection

adaptationبس الشعب المصري عمل عليهم.........

diuretics آبار البترول بتاع العرب...اشمعنى......واخدة

Invitro بس للأسف كل فلوسها بتروح.........

By inspectionالفقر بقى باين في الشعب المصري...اشمعني...

Major criteriaلدرجة إنه بقى...............

Progressive courseوالمشكلة إنه واخد.......

Phagocytosis أحمد عز عامل للحديد.....اشمعنى…

gastric lavageالشعب المصري محتاج بعد كل أكلة....اشمعنى...

shunt الغاز الطبيعي بتاعنا.....اشمعني...عملوله

aphonia…اشمعنىنواب مجلس الشعب عندهم

Graft rejectionحتى الناس الكويسة اللي فيهم حصللهم....

Clinically undiscoveredالتدخل الأجنبي في شئونا.....اشمعني...

inhibatory effecy .....عشان الحكومة بتعمل عليهم

Draining lymph nodesعندنا ناس كويسة بس مش لاقيين.......

ectopic ومعظمهم ماسكين في حتت....اشمعنى...

Artificial stenosisالشوارع بتاعتنا واسعة بس فيها....اشمعني..

Non contaminatedجيوب الشعب المصري.....اشمعني....

Continous drainingعشان بيحصلها.......

Short actingعشان مرتب الحكومة.....اشمعنى....

False pregnancy حتى الكادر الجديد طلع.......

Recanalizatoinمواسير المية و الصرف عندنا محتاجة...اشمعنى...

Under weightرغيف العيش المصري......اشمعني....

increased uptake......عشان السوق السودة عملت على الدقيق

metastasisالعصافير باعتين في كل حتة ...اشمعنى...

immuno comromisedاحنا سايبين حتة مهمة أوي في بلدنا.......

susiptible to infectionمع إنها............

opportunistic organismعشان جنبها..........

similar attackوحصل فيها قبل كده.......

unsteady gaitالديمقراطية عندنا ماشية...اشمعني...

against resistanceلإنها بتتحرك..........

neonatal deathوخايفين يحصلها......

apperantly well لما المسؤلين بينزلوا الشوارع بيشوفوها....

false testمع إنهم عارفين إن ده......

rising titer....... يوم عن يوم الأسعار عندنا بتعمل

sporadicالناس المبدعين عندنا بيطلعوا.......

Suitable cultureمع إنهم كتير بس مش لاقيين......

Surgical removalالحكومة بتاعتنا محتاجة.........

Rest in bedوبعد كده نديهم......

Reblacement therapyونعمل......

Inner septums للأسف كل العرب مهتمين....بالـ

Referred pain لوحتى حد بينضرب فيهم ما بيحسوش.....بـ

Hyporeflexiaو بيحصل عندهم............

Broad spectrumمع إن العدو بتاعهم........

Immune complexوالغرب عامل عليهم........

retention.....أنا بعد الكلام ده ممكن يعملولي

behind the walls......ياريت تبقوا تسئلوا علي

....................................
كفاية كده عشان ايدي وجعتني من الكتابة
يارب يكون العملين عجبوكوا
ويارب تكون المدونة قدرت تقدم حاجة تسعدكم في الميت بوست دول
على فكرة انا حطيت ورق فيه كل الجمل اللي كتبتها قبل كده
في مكتبة الشرقاوي اللي جنب مكتبة الرسالة
هيبقى موجود من بكرة ان شاء الله
دا هدية مني لكل زمايلي اللي كانوا سبب في استمرراري في الكتابة
لما فتحوا قلوبهم للكلمات البسيطة دي رغم انها كانت في كثير من الاحيان لا تستحق
ملحوظة...الناس بتوع المكتبة مراهنيني ان ماحدش هييجي يصور الورق بتاعي ده
اوعوا تحرجوني
أخوكم/محمود أبوالعزم

30 comments:

د/محمد الخطيب said...
This comment has been removed by the author.
د/محمد الخطيب said...

انا بحجز أول بوست أهو

أخيييييييييييييييييييرا

انا مش مصدق نفسى بجد

حاجة مش معقولة فعلالالالالالا

د/محمد الخطيب said...

انا اللى كتبت اول بوست ومسحتة عشان مكنش فية الاكونت بتاعى بالصورة

المهم ماعلينا

بجد حاجة جميييييييييييييلة يامحمود

وبلاش يابنى الكلام الكبير ده هتروح خلف الاسوار بعد كده واحنا منقدرش نستغنى عنك

والف حمد الله على سلامة الموبايل ياجميل

انت انسان موهوب وانسان رائع

هبقى اروح اصور الورق عشان بس ميقولوش عليك كلمة وحشة

مش حباً فيك يعنى !!!

هههههههههههههه

ربنا يكرمك يامحمود ونفرح بيك يااااااااااااااارب

شق القمر said...

كل سنة وكل متابعينك طيبين يا محمود
والله يا أخى العزيز لسه النهاردة مصادفة بنوته حبيبتى بتقولى والله يارنا انا بدخل النت لو نفسيا مش محددة اتجاه ومش عارفه لنفسى حال بتوجه لمدونة أبو العزم لأنى دايما عارفه انى هلاقى فيها حاجة ترضينى أقراها
وحاجة جديدة وفى كل حاجة
يعنى بتوقع انى الاقى اللى يفيدنى ويوجهنى


ما شاء الله عليك يا محمود
ربنا يكرمك دايما ويوفقك
ويحبب فيك خلقه كمان وكمان

هـمـــــــــــسة said...

مناسبة الميت بوست دى حاجة سبيشل جدا طبعا يادوكتر كل سنة وحضرتك ومتابعين المدونة بخير وطيبين والمدونة ان شاء الله يوم بعد يوم تكبر اكتر واكتر

وان شاء الله اول لما انزل الكلية لازم اصور نسخة من كتاباتك لانها مش بس تستحق ان الواحد يقراها لا لازم كمان يحتفظ بيها لانها كلها صدق واحساس ماشاء الله

وبوست النهاردة جامد جداااااااا مالوش حل ربنا يحميك

جهاد said...

ماشاء الله لاقوة إلا بالله
ويارب دوما المدونة عامرة بروائعك
دوما عامرة بكل صدق ونقاء وبراءة وود ووفاء وصفاء
تظل تبث الأمل والتفاؤل والمرح
بارك الله فيكم
ونفع بكم وجعل قلمكم في ميزان حسناتكم
جزاكم الله خيرا

Anonymous said...

بصراااااااااااااحه اكتر من رااااااااااااااااااائع
الاتنين رائعين جدا مش عارفه اوصف فعلا
ربنا يكرمك و يوفقك
و متشكرين جدا على دياجرامات الدكتور مندوه
عشت فخرا لنا و لدفعتنا يا دكتور

docmero said...

السلام عليكم ورحمه الله

كل سنه والمدونه بخير يا رب وعقبال البوست المليون وعلى فكره عايزينك
تقول الطب السياسى عندنا فى الروند لو سمحت ويبقى الف شكر

د/عرفه said...

السلام عليكم
كيفك محمود
عقبال البوست المليون ان شاء الله
واوعدك هكون اول واحد

دايما مبدع يا محمود
بس
اللى مش فى طب محتجين ترجمة

semsema said...

كل سنة ومدونتك الحبيبة الي قلوبنا بكل خير وصحة جيدة ويبعد عنها
انفلونزا الخنازير ياااااارب
ومن بكرة ان شاء الله هجيب الورق من الشرقاوي واي حد هقابله من اصحابي هاخده معايه كمان يصوره بالعند في اصحاب المكتبة
بوستين اكتر من رائعين ربنا يبارك فيك وفي قلمك ياااارب
خالص ودي وتحياتي للمدونة العزيزة واهلها الكرام

محمد عبد الباسط said...

عقبال البوست المليون..اشمعنى..MORE HAPPINESS TO US

اسال الله ان يجمعنا فى مستقر رحمته مع النبيين والصديقين والشهداء والصالحين وحسن اؤلئك رفيقا

لاتنسانى من دعائك

حلم كبير

د.ميريهان said...

بداية مرحبا دكتور محمود..
العملين رائعين جدا...خصوصا الثاني...

عجبني اوي الوفاء للموبايل اللي واضح في قصيدتك...وعلى فكرة فعلا في ناس وافية كده ومش بتحب تجيب موبايل على موبايل...وفاء للقديم طبعا..

والعمل التاني..احلى شئ ربط كلمات الطب بالحال الاجتماعية..فكرة رهيبة والله...

سلمت يداك..ولا حرمناك

وكل عام والمدونة وحضرتك والأعضاء بخير..

ويارب مزيد من التقدم ليها يوم عن يوم..

في حفظ الله

snowwhite said...

السلام عليكم ورحمة الله
كل سنة والمدونة وصاحب المدونة بالف خير
وعقبال يا رب البوست 54671051573

البوستين بجد احلي من بعض ما شاءالله يا محمود
والسياسي ده جامد جدا

استمر.....

Anonymous said...

محمود كل سنه ومدونتك بخير

وانت يارب في خير علطول

ويكتر حبايبك
الرجاله بس

عايزاك تركز شويه في المذاكره ياحوده عشان خاطري

وفداك مليووووووون موبايل يااطيب قلب في الدنيا

Anonymous said...

لله درك من حباك بفضله
خلقا تجاوز في الثناء نشيدي
أوتيت قلبا كالنسائم رقه
قبل القريب عطاءه لبعيد
بيني وبينك الفه ومحبه
لو غاب صوتي فالدعاء بريدي

Anonymous said...

هنالك أناس ينحتون في أعماقنا مشاعر رائعه نحبهم ويخلدون فينا ذكرى لاتمحى

نهفو الى رؤياهم ويزدان الوجود بهم

لنا الفخر بحبهم فليحفظهم الله ويزيد بيننا الحب فيه

عندما تنهمر الدموع said...

السلام عليكم ورحمة الله وبركاته
ازيك يادكتور يارب تكون بخير وكل سنة والمدونة بخير وعقبال يارب البوست رقم.............بلاش احدد رقم عقبال يارب متفضل حضرتك دايما مجمعنا بكلامك الحلو وتفضل المدونة دايما رابطة الحب فيما بيننا
البوست النهاردة فعلا جميل ودمه خفيف واجمل مافي الجزء التاني منه واقعيته
ومدى معايشته للحال اللي احنا فيه
ياريت حضرتك متطولش علينا الغيبة عشان كلامك بيوحشنا ولو اني عذراك ودايما بدعيلك ان ربنا يوفقك ويكرمك ويوهنها عليك وكلى كل طلبة طب

عمر said...

بسم الله الرحمن الرحيم

تعليق وتهنئة – لا يكفيان – لصديقنا العزيز ، لذا أجد قلمي ، يكتب (ولأول مرة) بعض الكلمات بالعامية – التي يبدع فيها محمود دائما – محاولا التعبير عن مقدار الحب والتقدير والاعتزاز بـ (محمود) وبـ (مدونته) الحبيبة إلى قلبي جدا ..

وأترككم مع – فِـ عيد تدوينتك المِيّة -
إهداء لمحود أبو العزم
على مدونتي
بحب النور
www.bahebelnor.blogspot.com

تلميذة سلمان الفارسى said...

ماشاء الله
حضرتك موهوب فعلا
بارك الله فيك

Unknown said...

تـــــــــــــــــــــــسلم ايدك ياطبيب ويارب عمرك ابدا ولا اى حد موبايله يتسرق بتبقى لوصه وحوووووووسةبعيـــد
عنــــــــــــك

Unknown said...

نسيت اقول مبروك للتدوينة المائــــــــــــــــــة

Anonymous said...

محمود
انا محضرالك مفاجاه كبيره اوي اوي
وان شاء الله يارب تعجبك....
بس انا مستنيه الوقت المناسب ياحوده.......
انت بجد تستاهلها وماحدش غيرك يستاهلها ابدا
طبعا مش هاقول عشان دي اسمها مفاجاه.......
دي رابع مره اكتب لك فيها رد على البوست بتاعك......

تحياتي
@@@@@@@@@

Anonymous said...

محمود انا عايزاك مره تعمل بوست
واحنا نكتب فيه كل الاسئله اللي عايزين نسالهالك

اي حد يكتب السؤال بتاعه وتحدد له مده معينه والبوست اللي بعده تجاوب على كل الأسئله......
اوك
ياريت تلبي طلبي

اتمنالك يارب التوفيق

تحياتي
@@@@@@@@@@@@@@

۩۝۩ Dr. Flavio ۩۝۩ said...

هيبقى موجود من بكرة ان شاء الله دا هدية مني لكل زمايلي اللي كانوا سبب في استمرراري في الكتابة ..... أي كلاااااااااام

لو عايز تحط هديه يا عمونا يبقى تصورها على حسابك

ههههههههههههههههههههههههههه


كل سنه وانت والمدونه طيبين يا حوده

quiet_storm said...

كل سنه وانت طيب يامحمود والمدونه بخير والف مبروك البوست 100 وعقبال 100سنه تدوين


بوستين المره دى جامدين وخصوصا الضحكه المره دى

وربنا يستر ومحدش يبكى على محموله :D

بالتوفيق يارب دايما وشكرا بجد على السؤال

Anonymous said...

احنا محضرين لك هديه في خلال 24 ساعه
هيما-حسب الله-بسيوني

هيما - حسب الله - بسيوني said...

بسم الله

وهي دي هديتنا البسيطة ومفاجئتنا ليك يا حودة

هنا اللينك على اليوتيوب

http://www.youtube.com/watch?v=VZ-t6K-tFBY

***
وهنا بوست
هديتنا ليك
على
مدونة البحر

http://ana-elbahr.blogspot.com/2009/05/blog-post_841.html

تحياتنا الخالصة

هيما - حسب الله - بسيوني

القلم السكندري said...

السلام عليكم ورحمة الله وبركاته

بداءة أشكر أخي الحبيب / أحمد صاحب مدونة "البحر".. أن عرفنا علي شاعرٍ موهوب متمكن من قلمه مثلك

فقد سعدت كثيرا بقصيدتك الأولي.. وبانسيابية فكرتها بين ثنايا أحرفك


زيارتي الأولي وليست الأخيرة إن شاء الله


تقبل موفور التحية

Soul.o0o.Whisper said...

السلام عليكم و رحمة الله و بركاته

أول زيارة لمدونتك
و المدونة جامدة بجد
ما شاء الله


مبروووووووك عليك التدوينة ال100
و كل 100 و أنت طيب

بس بجد أتخضيت من وصف الموبايل
و قلت إنا لله و إنا إليه راجعون

و كنت هأعمل يوم حداد على موبايلك
و ننزل نشرات بأوصافه بئا
و أى واجب يعنى


بس لقيتك فى الاخر بتقول "على فكرة الموبايل ماضاعشي..أنابس كنت نسيته في الأتوبيسوفاتت ساعة على ما لاقيته"

بصراحة ساعتها اتغظت

بس ياللا
الحمد لله انه ماضعش
:)

و حلوة القصيدة التانية
عجبتنى جدا



دمت بود

Israa El-sakka said...

بما أني مش في كلية طب أصلا فمعلش مش حصور الورق ..أولا أهنيك على التدوينة المية و الغريب أني أول مرة أزور المدونة و أنت بتحتفل بالمئوية :) لكن المدونة تستحق القراءة لأن مئة تدوينة معناها حاجة تستحق تتقرا عقبال إن شاء الله ما يبقوا متين