جزاكم الله خيراً

Tuesday, May 26, 2009

السلام عليكم ورحمة الله


أي كلام كنت هقوله لازم يتأجل


عشان أشكر كل التهاني والكلام الحلو اللي الناس قالته البوست اللي فات


وكمان كل الناس اللي بعتت على الميل او اللي كلمتني شخصيا


حقيقي تعجز الكلمات عن شكر الجميع


وكمان جالي هديتين غاليين على أوي



الأولى كان من اخويا عمر النجار اللي فاجئني بكلمات جميلة جدا


و بعيد عن المجاملة والمبالغة اللي في الكلام ..ماكنتش اعرف ان عمر بيكتب حلو كده


يعني قريب جدا هينافسنا


بجد مشتكر أوي أوي يا عمر


ومش تواضع ولا قلة ثقة.. بصدق أنا ما استحقش واحد على مية من كلامك ده



جزاك الله خير يا عمر


...........................


الهدية التانية كانت غاية في الروعة


فيديو هدية اشترك فيه ناس ربنا يكرمهم

لينك اليوتيوب


اتفاجئت بيه بصراحة بس فرحت بيه جدا..كفاية انهم فكروا في المبدأ بس


وكفاية ان كلهم اشتركوا فيه..وكمان اختاروا كلمات غالية عليا جدا عشان ينشدوها



كمان صوت ابراهيم جميل أوي ربنا يحميه ويبارك فيه
و اكتر حاجة هزتني مشاركة أحمد حسب الله في الفكرة دي


وانا بصراحة دي اول مرة اشوف احمد(في الفيديو ده) ولما سألت أحمد بسيوني قاللي


من فضل ربنا عليك ان ناس كتيرة بتحبك من غير انت ما تكون تعرفهم


اتمنى يكون ده حقيقي فعلا وماتكونشي الناس دي مخدوعة في الواحد


ومشتكر اوي ليهم كلهم


ابراهيم مطاوع


أحمد بسيوني


أحمد حسب الله..يارب تبقى بداية معرفة خير


تامر عزت


احمد سمير


ربنا يكرمك كلكم يارب ...مش عارف أقول ايه
.............................
كان فيه حد اقترح(أنا للأسف مش عارف الاسم) انه يبقى فيه بوست
و أي حد عايز يوجهلي أي سؤال فيه وانا أجاوب
أنا ماعنديش أي مشاكل و إن شاء الله إسالوا واناهجاوب بمنتهي الصراحة والأمانة
كل واحد ليه سؤال أو اتنين...بس ماتشدوش عليا أوي
مستني أسئلتكم
بالمناسبة كمان أنا متأسف لإني مش برد على الكومنتات كومنت كومنت
انا بنكسف لما أدخل على المدونات وألاقي المدونين بيردوا على كل كومنت
بس انتو مقدرين الظروف بقي
بس البوست ده ان شاء الله هرد على كل الكومنتات اللي فيه
لو حد عايز يطلب أو يقول أو يسأل على أي حاجة أنا تحت أمركم
..................................
فاضل بس حاجتين أاني أشكر أستاذي وأستاذنا كلنا أستاذ أشرف
حد من الناس اللي علمتني وربتني بجد و أثروا في شخصيتي جد
او كانت مفاجأة جميلة أوي لي اني أكتشف انه متابع المدونة
شكرا يا أستاذ أشرف
تاني حاجة فيه ناس انا قصرت في السؤال عن سبب غيابها
انا خايف أقول أسامي عشان ما أنساش حد
أميرة الحزن..هبهووبة..الحلم الجميل ...رحيل.همسات داعية...أنا
rose flower
shaimaa
elrousha
smile
butterfly
sluvswho
aqua blue
nahnoha
pure blue
emi_doc
little angle
mahoud_solliaman
يارب بس يكونوا بخير ومش مهم اي تعليق خالص
واتمنى انهم بس يفضلوا متابة المدونة دي ومدونات كل زمايلنا ان شاء الله
شكرا للجميع وفي انتظار أسئلتكم و تعليقاتكم
وبالتوفيق لكل الناس اللي بدأت واللي هتبدأ امتحانات ان شاء الله

42 comments:

semsema said...

بحجز اول كومنت
هقرا وراجع

semsema said...

رائعة كلمات دكتر عمر
وابداع دكتر أحمد سعيد ووأصحابه
ربنا يكرمكم جميعا ويديم بينكم الحب في الله
منتظرين جديدك
تحياتي

شق القمر said...

تستحق كل خير يا محمود
والمحبة نعمة
وأما بنعمة ربك فحدث
فلا تكن متواضعا امام حب الآخرين لك
ولكن لتجعله شيئا نقيا من أمور الحياة يرقى بروحك أكثر ويزيدك قربا لهم
دمت بكل الود أخى الطيب
ولهو فخر لى أنك أخى حقا
ربنا يديم الود دايما :)

Amatuallah said...

السلام عليكم ورحمة الله وبركاته
شوف باه يا سى حودة على الررغم منى انى كنت مقموصه لكن فعلا مقدرتش امنع نفسى ادخل واقرا كلامك النهارده
بجد بجد بجد انت حد يستاهل الخير كله فحياك الله وبياك وجعل الجنه مثوانا واياك يارب
كمان كلام جميل جدا للدكتور عمر وباقى اصحابك اللى مشاركين
ربنا يديم المحبه بينكم ويديم المعروف
وكالعاده والله يا دكتور حزدة مش عارفه اعبرلك عن مدى اعجابى بكلماتك واسلوبك ربنا يجمعنا واياك فالفردوس الاعلى ياااااااااااااااااارب
مع تمنياتى لك بمزيد من التقدم والتفوق وحب الناس وعشان ربنا يا حودة خد بالك من مزاكرتك وروحك
F.A

Amaatuallah said...

السلام عليكم
عارفه ياحودة انى غلست عليك اوى
بس بجد بجد بجد دى تالت مرة بسمع فيها كلمااااااااااااتك الجميله جدا اللى بصوت جميل ربنا يبارك فيكم يارب
والله يا حوده حسيتك بتتكلم على لسانى لمست قلبى بجد
ربنا يبارك فيك ويديمك بخير يا حوده والله
بس برده خد بالك من روحك ومن مزاكرتك F.A

Soul.o0o.Whisper said...

بالتوفيق ان شاء الله

pureblue said...

بسم الله

مبروك البوست المائة

ومن تقدم لاخر


بس محدش سأل ليه


هسأل انا


انت كاتب في البروفايل

انك من كفر كلا الباب وافتخر

هل الافتخار مجرد انتماء زى اى حد بينتمى لمكان نشأته
ولا فيه حاجة معينة تخليك مفتخر بيها

وردة said...

الف مبروك استاذ محمود
اولا علي البوست اللي فات
وثانيا علي حب الناس الذي لايقدر بثمن
بجد نعمة كبيرة اوووي ان في ناس تحبك من غير ماتشوفك ولاتعرفك
تحبك في الله من غير ما يكون الحب ده وراه هدف
ربنا يكرمك كمان وكمان بمحبة الناس
اسفة طبعا المباركة متأخرة
بس معلش
ظروف
سلام

محمود ابوالعزم said...

سمسة
متشكر أوي أوي
علي تعليقك الجميل
سواء البوست ده أوي بوست قبل كده
بس فين سؤالك

محمود ابوالعزم said...

شق القمر
متشكر جدا ليكي يا رنا
ربنا يجازيكي كل خير يارب على كلامك
وشكرا على نصيحتك الغالية
وربنا يديم الود يارب
بس فين سؤالك برضو

محمود ابوالعزم said...

أمة الله
من غير زعل ومن غير أي حاجة منورة المدونة
اتمنى يكون الكلام عجبك فعلا
وشكرا لكل كلامك الجميل على المدونة قبل كده
وهخلي بالي من مذاكرتي بس برضو فين سؤالك

محمود ابوالعزم said...

سول ويسبر
شكرا لمرورك الجميل
وشكرا على كلامك البوست اللي فات
يارب قريب نحتفل في مدونتك ان شاء الله
ربنا يكرمك

محمود ابوالعزم said...

بيور بلو
نورتي المدونة من جديد
وشكرا لإنك الوحيدة اللي سألتي
وربنامعاكي في امتحاناتك ان شاء الله
أما موضوع كفر كلا الباب ده
هو انا مش قصدي بلدنا كبلدنا يعني
أنا كنت أقصد الأرياف عامة ًو بلدنا خاصة
يعني كوني فلاح وكون اهلي فلاحين من الأرياف بشوفه ده شئ يدعو للفخر
لإني شفت بعيني ناس بتتنصل من كده لما يكبروا والناس تعرفهم
ورغم ان بلدنا فيها حاجات كتير مش كويسة بس برضو أنا بحبها
كفاية ان فيها أهلي واصحابي
متشكر جدا على السؤال ولعى المرور
ودعواتي ليكي في امتحاناتك

محمود ابوالعزم said...

وردة

نورتي المدونة
وشكرا على كلامك الجميل ده
أتمنى ان اكون كذلك
وان شاء الله ماتكونشي ىخر زيارة ليكي للمدونة

Anonymous said...

ماشاء الله عليك يامحمد...
ربنا يزيدك يارب ويحبب فيك خلقه اكتر واكتر انت بجد تستاهل كل خير..
الدنيا حلوه قدامك ياحوده
بتمنالك دنيا فيها تحقق كل اللي نفسك فيه....

اول سؤال هيبقى سؤالي....
نفسك تسافر برا لما تتخرج ولا لا؟والسبب بالرفض او عدمه؟؟؟؟؟

تاني سؤال بقى...
انت ممكن تضحي بنفسك لأي درجه بغرض اسعاد اقرب الناس ليك؟؟؟

اخر سؤال بقى يامحمود
انت مقتنع بالصداقه بين الولد والبنت
حتى لو كانت بحدود وفي اطار المعقولولا لأ؟؟؟
يعني مثلا لو عرفت ان اختك عندها اصدقاء دراسه مثلا شايف دي حاجه كويسه ولا عادي ولا بلاش منها خالص؟؟؟؟
انا عندي اسئله كتير بس كفايه عليك كدا النهارده..
في حاجه كمان السؤال اللي مش عايز تجاوب عليه براحتك خالص قدم اعتذارك عن الاجابه بس ده احسن من انك تقول اجابه مش صادقه او مش مفهومه....


سلام
@@@@@@@@@

شق القمر said...

سعيدة جدا ان محمود تكرّم ورد :-p

عن انى أسأل
فانا فكرت لو سألت هسأل ايه

لقيت ان كل سؤال له عندى جواب
لانى الى حد كبير أعرف اخواتى ومن أتعامل معهم

لكن هسيبلك سؤال صغيور

الأستاذ الصغير عبد الرحمن ابن أختك أخباره ايه ؟؟

:)

Anonymous said...

محمود تحب تجيب ان شاء الله بنت ولا ولد؟واحلى الاسماء عندك ايه؟؟؟

رايك ايه يامحمود في حد عمل حاجات مش ولابد وشرب كام مره حاجات مش ولا بد برضو وبيقول ان دي كانت مرحله ولازم نجرب...وده يتصدق ولا لا وهل ممكن يرجع للي كان بيشربه وبيشمه تاني في لحظه ضعف ولا لا؟؟؟؟

لو ماطلعتش دكتور كنت تحب تطلع ايه؟

لو حسيت ان في حد بيحبك اوي ومستعد يعمل عشانك المستحيل وحاول يوصلك ده؟؟
هتفرح من جواك بس هتطنش
ولا هتسيب الموضوع للزمن جايز
ولا هتنهي الموضوع من الاول لانك مش بتفكر حاليا في ارتباط؟؟؟

شايف ان الاحسن ان الانسان يبقى عنده اصحاب كتير اوي بس كلهم اصحاب بس ولا يبقى عندك اتنين تلاته اصحاب بس تكونوا اصحاب على الحلوه والمره وتحكوا لبعض وتساعدوا بعض ؟؟؟


نقطه ضعف محمود؟؟؟؟؟؟

حاجه واحده بس شايفها ميزه فيك وحاجه واحده بس شايفها عيب فيك؟؟؟

سلام
@@@@@@@@

عندما تنهمر الدموع said...

السلام عليكم ورحمة الله وبركاته
ازيك ياد/حودة يارب تكون بخير
انا بجد فرحانة وسعيدة بكل الناس اللي بتحب حضرتك وبكل اللي هنوك بمناسبة المدونة حضرتك بجد تستاهل وتأكد ان ربنا هيحبب كل خلقه فيك طول ما حضرتك بتحب كل الناس ومبتكرهش حد ودايما بتحاول تساعد على قدر استطاعتك انا يمكن معرفش كل اللي على المدونة لكن انا متأكدة انهم فعلا بيحبوك وان فيه ناس اكتر بتحبك وبتحب كلامك وان غياب اي حد عن المدونة اكيد بعذر وسبب خارج عن ارادته ان بقول كلامي ده لأني سمحت لنفسي اشوف الفيديو واقرأ القصيدة اللي اهديت لك بمناسبة البوست 100 فعلا كلام جميل والاجمل انه احساس خارج من القلب احساس كله صدق وحب من صديق لصديقه ومن اخ لأخوه
ربنا يكرمك دايما ويحبب كل خلق فيك
عندي كام سؤال بسيط
اولا حضرتك عايز تتخصص ايه بعد التخرج ان شاء الله ؟وليه؟
ثانيا مين اكتر انسان بتحبه او بتعترف له بالجميل بعد والدتك واخواتك؟
ثالثا حضرتك بتعترف بالحب من اول نظرة؟وايه مفهوم الحب في وجهة نظر حضرتك؟
معلش لو طولت ربنا يكرمك ويوفقك

Anonymous said...

يارب تكون كويس يامحمود وكله تمام معاك وان شاء الله تجمع كل الاسئله اللي اتقدمتلك وتجاوب عليها المره الجايه..
انا لاقيه نفسي عندي اسئله كتير اوي
وبحاول على قد مااقدر اختصر....
بس معليشي بقى
استحمل....


لو مريت يامحمود بتجربه حب قديمه وانتهت وخلاص وعدى وقت طويل اوي عليها
ودلوقتي انت مريت بتجربه جديده او قلبك خلاص ماعادشي ناحيته حاجه للشخص الاولاني لكن لقيت الماضي بيعيد نفسه والحدوته القديمه ماماتتشي ولا حاجه
هل هتقول؟؟
1-خلاص اللي فات مات وبماان مافيش جواك حاجه ناحيه التجربه القديمه فانت مش هتهتم
2-هتخليك في الوقت الحالي وتحاول على قد ماتقدر ماتتاثرشي باللي رجع تاني
3-تقول جايز ربنا عمل كدا عشان حاجه في باله او حاجه ماتعرفهاش وتنوي خير وتكمل مع القديم وتحن ليه

اسئله غريبه معليشي يامحمود
بس انا بحب اعرف رايك في كل حاجه


**ايه يامحمود اكتر صفه شايفها مفروض تكون في شريكه حياتك..يعني صفه مهمه جدا بالنسبه لك غير طبعا الدين والاخلاق مافيش خلاف على كدا..

###لو كنت ماشي مره في الكليه عادي وشفت واحده واعجبت بيها من شكلها بس وحسيت انها دخلت قلبك من اول مره كانه يعني حب من اول نظره..هل هتصدق قلبك ؟؟او هتحاول ماتفكرشي كتير فيها؟؟هل هتحاول تكلمها مبدئيا بس؟
ولا انت اساسا مش مقتنع خالص بالاعجاب اصلا من النظره الاولى؟؟؟

تحب شريكه حياتك يبقى فارق العمر بينكم قد ايه؟؟؟؟


اخر حاجه بقى ياحوده انت ايه رايك في النقاب؟؟هل هتلزم مراتك بيه؟هل هتسيبها براحتها مثلا في اللبس؟
او مش فارقه عندك النقاب اهم حاجه تكون لابسه كويس ومحتشمه...
بغض النظر خمار او نقاب...


معليشي بقى افتكرت سؤال تاني...
هل شايف انك في يوم من الايام ممكن تنضم للاخوان المسلمين؟

انا طولت عليك معليشي استحمل بقى
اتمنى لك كل الخير والتوفيق
وربنا معاك وواقف جنبك ان شاء الله

سلام
@@@@@@@@@@@@

Unknown said...

مبروك عليك المئويه محمود هي متأخره معلش بقي ظروف بالنسبه للاسئله الشباب قاموا بالواجب بس ممكن اسئلك عن العصبيه ايه اخبارها معاك و بتتصرف معاها ازاي و عايز ولادك كام ولد وكام بنت واسماءهم

Unknown said...

مبروك عليك المئويه محمود هي متأخره معلش بقي ظروف بالنسبه للاسئله الشباب قاموا بالواجب بس ممكن اسئلك عن العصبيه ايه اخبارها معاك و بتتصرف معاها ازاي و عايز ولادك كام ولد وكام بنت واسماءهم

Anonymous said...

انا عارفه انت اكيد زهقت مني ومن اسئلتي ......
بس هتستحمل طبعا لان انت قلبك كبير
والا ماتبقاش محمود...
يارب تكون كويس دايما
وكل حاجه ماشيه معاك تمام


انا عايزه اعرف رد فعلك يامحمود لو عرفت من بعيد ان اي حد زعلان منك بس الشخص ده ماقلكشي والاهم انك عرفت اللي مزعله حاجه مش صحيحه هتتصرف ازاي؟؟؟؟؟

بتعمل ايه يامحمود وقت الغضب؟؟

اكتر حاجه ممكن تأنب نفسك عليها؟؟

شايف ان الواحد يرتبط بواحده كان عارفها قبل الجواز احسن ولا يرتبط بحد مايعرفوش..

اغلى شخص في حياتك بعد والدتك طبعا واخواتك ربنا يخليهمللك..؟؟

لو قلتلك كمل الجمله دي::::
أنا ممكن اسامح في اي حاجه إلا.....؟؟

لو حسيت ياحوده انك متعلق بواحده ولسه جاي تقول لصاحبك لقيته قالك انه متعلق بيها...هتتصرف ازاي وانت بتحبها اوي وحاسس كمان انها بتحبك؟؟
وصاحبك ده صاحبك اوي..
هتسكت خالص وتنسى الموضوع
او هتحاول تنسي صاحبك حبه ليها
او هتقولها وتصارحها واللي يحصل يحصل
أو اي حاجه قولنا تصرفك هيبقى ايه؟؟


احنا فعلا تقلنا عليك اوي في الاسئله
يارب ولا سؤال يارب يضايقك
واوعدك خلاص ماعدتش هاسالك تاني
كفايه عليك كدا

في انتظار اجاباتك
(أدام الله محمود ابو العزم وادام حب الناس له))


في امان الله
@@@@@@@@@@@@@@

Anonymous said...

سلام عليكم اولا . انا كنت فعلا عايزه اهنيك علي حب الناس ليك وطبعا انت تستاهل لأنك بالفعل انسان كويس قبل ماتكون شاعر كويس
‏ ليا بس طلب واحد ممكن اعرف د /ابراهيم مطاوع ده في سنه كام وياريت نسمع له حاجات كتير في الكلية لأن بجد خساره الصوت ده مايستغلوش صح وعايزه اعرف اسم مدونته ياريت تكتب اللينك بتاعها يا د /محمود معلش طولت عليك
تحياتي

Anonymous said...

السلام عليكم ممكن نعرف ايه اللى حصل للقصيدة اللى قولتنا هتقولها فى راوند الجراحة؟والف مبروك المئوية

محمد عبد الباسط said...

بسم الله الرحمن الرحيم

انا فى الحقيقة مش عارف اقول اى حاجه يامحمود بجد ووالله ماهى اول مرة افتح صفحه التعليقات عشان اكتب بس مش بلاقى كلام

انى احبك فى الله

متنسانيش بالله عليك بدعوة منك لاخوك

حلم كبير

Anonymous said...

صدق رسول الله صلى الله عليه وسلم " إن من الشعر لحكمة ،وإن من البيان لسحرا"
أخويا وحبيبى دكتور محمود .. انت فعلا ساحر بهذا المعنى.
لأنى بقيت كل ماأكون فاضى شويه علشان افتح النت بقيت لازم أبدأ بمدونتك
الجميله
والله بجد مش هزار
ربنا يوفقك ويبارك فيك وفى صحبتك الصالحة احسبكم جميعا على خير ، ولا ازكى على الله احدا
على فكرة ،انا بكلمك من الإمارات، بس ان شاء الله مش ناوى أطول هنا كتير، بس ادعيلى.. و أول حاجه هعملها ان شاء الله اول مانزل مصر ،لازم آجى أزورك ، ده بعد إذنك طبعا

ختاما

إنى والله لأحبك فى الله

ربنا يوفقك ويشرح صدرك وييسر امرك
بسام biso_2007@yahoo.com

Anonymous said...

السلام عليكم اولا
معلش يادكتور محمود تقلنا عليك في الأسئله والطلبات بس ده طبعا علشان عشمنا فيك بس انا عايزه اعرف انت ليه مش بترد علي طلبي اللي انا طلبته منك اللي هوه عن الدكتور ابراهيم مطاوع عايزه اعرف اسم مدونته بس ياريت تكتبها في تعليق وجزاك الله خيرا

محمود ابوالعزم said...

السلام عليكم ورحمة الله
بيتهيالي نرد على الكومنتات الأول
ونخلى @@@@@ للآخر

شق القمر
أنا أسعد بالتأكيد
عبدالرحمن كويس الحمد لله وبكل صحة
بحلم انه يكبر ويكبر عشان يمسك المدونة من بعدي
دعواتك ليه
.....................................

محمود ابوالعزم said...

عندما تنهمر الدموع
منورة المدونة بردودك وكلامك الجميل كالعادة
وان شاء الله دايما منوراها كده
وشكرا وجزاكي الله خيرا على كل كلمة
حلوة قليتها في كل ردودك قبل كده
اتخصص ايه
سؤال مافكرتش فيه كتير
بس وانا داخل الطب كنت بحب الرمد جدا
ولما درسته حبيته اكتر
وفيه تخصص تاني مؤمن بيه جدا
الأمراض النفسية
بجد مافيش ألم في الدينا أقوي من الألم النفسي
حاسس ان التخصص ده مظلوم
مع ان ناس كتيرة محتاجاله
عندي حلم برضو كبير شوية
نفسي أشتغل في مستشفى أورام الأطفال
يمكن أكون سبب في علاج طفل
وأقدر أرجع الفرحة لأهله...يمكن

محمود ابوالعزم said...

أكتر انسان بحبه وبعترفله بالجميل بعد أسرتي
عمتي
.......................
الحب من أول نظرة ومفهوم الحب
مابعترفشي أوي بالحب من اول نظرة
ممكن تكون راحة انما كلمة حب كبيرة اوي
مفهوم الحب هسيبه لبوست كتبت جزء منه
مش عايز احرقه لحد ماييجي وقته ان شاء الله
......................
ربنا يجازيكي كل خير ويارب اكون عرفت اجاوب
....................................................

محمود ابوالعزم said...

ناتشورال ماجيك
اولا وقبل كل حاجة يارب تكون الظروف دي خير
ردودك من الردود اللي بفرح بيها جدا
وافتخر انها منورة المدونة دايما
بالنسبة للعصبية
انا للحمد لله مش عصبي
رغم ان دي احيان كتيرة بتكون حاجة مش كويسة
لإن كتم المشاعر شئ صعب جدا
عشان كده بحب المدونة
اهو على الأقل الواحد بيطلع اللي جواه
أما بصرف معاها ازاي
لو من حد بحبه بستحمل شوية
لو حد بيتنطط كرامتي اهم من أي حاجة
...................................
الولاد والبنات كام وأسمائهم
كام....كتير ان شاء الله
فلاح بقى وبحب الخلفة الكتير
أسماؤهم
في الولاد بحب اسامي ياسين ومصطفي وعبدالرحمن
في البنات بحب أسامي ياسمين ونورا وبسمة وحنين
واتمنى يكون عندي بنت اسمها بلسم
و سمعت اسم مرة وعجبني اوي..ذكريات
...............
ربنا يعدي الظروف دي على خير
وتفضلي دايما منورة المدونة ومتابعاها
ربنا يوفقك ويكرمك ويحققلك كل اللي بتتمنيه
على فكرة في امتحان اجباري انتي اخترتي
نفس الاكلة اللي اأنا كنت هختارها
بامية باللحمة
كويس ان فيه حد بيحب البامية زيي
........................................

محمود ابوالعزم said...

غير معرف
شكرا جزيلا وربنا يبارك في عمرك
على الكلام الجميل ده
أتمنى أكون كده
دكتور ابراهيم مطاوع زميلنا
في دفعتنا وسمعته بالصدفة
وصوته ماشاء الله عليه
وحبيت ان كل زمايلنا يسمعوه
لان صوته خسارة فعلا
وان شاء الله في الفترة اللي جاية تسمعوه كتير اوي
بس هو للأسف ماعندوش مدونة
انما هبلغوا رأيكم ده ان شاء الله
جزاكي الله خيرا مرة تانية

محمود ابوالعزم said...

غير معرف 2
أنا والله كان نفسي جدا أقول في رواند ستة
دا شرف لي أنا
بس هي الظروف جت كده
احتمال ان شاء الله يوم الخميس الجاي بعد الرواند
أكون موجود انا وابراهيم ونقدر نقدمللكم حاجة تسعدكم
لو ربنا يسر ان شاء الله
شكرا ليكي جدا على سؤالك وعلى اهتمامك

محمود ابوالعزم said...

بسام
الكلام اللي انت بتقوله ده وسام على صدري
ربنا يجازيك كل خير
بجد أتمنى تعمل زي ما بتقول وتيجي تزرني
هأكلك أكل عمرك ما كلته في حياتك
أحبك الذي أحببتني فيه
ربنا يوفقك في شغلك وفي حياتك كلهاوترجع على خير ان شاء الله

محمود ابوالعزم said...

محمد عبدالباسط
انت مجرد زيارتك للمدونة حتى لو ماعلقتش شرف لي يا محمد
أحبك الذي أحببتني فيه
عقبال مانحتفل بتدونيتك المليون يارب

محمود ابوالعزم said...

@@@@@@@@
يااااااااااااااااااااااااااااه..كل دي أسئله
انا هجاوب برضو عشان انا وعدت أجاوب على كل حاجة
بس لي سؤال في ألآخر لازم تجاوبي عليه برضو
...................
نفسك تسافر برة لما تتخرج ولا لا؟والسبب بالرفض او عدمه
مانفسيش
بس مش كل حاجة بنعملها بيبقى نفسنا فيها
يعني ممكن أسافر عشان اكون نفسي
ممكن أسافر عشان اكمل تعليمي
هو اللي مش ممكن إني اسافر واقعد واستقر برة
لاني شخصية عشرية شوية
احب يبقى حوليا ناس احبهم ويحبوني
وبيتهيألي ده مش هيبقى موجود في الغربة الطويلة
................................................
انت ممكن تضحي بنفسك لأي درجه بغرض اسعاد اقرب الناس ليك
ممكن أعمل أي حاجة
هو رد مثالي شوية بس اتمنى اكون أده ان شاء الله
...............................
تالت سؤال ده الوحيد اللي بطلب تعفوني من اجابته
لإن اجابتي ممكن ماتكونشي مفهومة
انتي اللي اديتني الإذن ده
...................................

محمود ابوالعزم said...

محمود تحب تجيب ان شاء الله بنت ولا ولد؟واحلى الاسماء عندك ايه؟؟؟
من أحلامي في الدنيا إني أجيب بنت صغيرة
تبقى زي بنت خالي الصغيرة
و أسميها بلسم
الأسامي اللي بحبها قلتها فوق
...........................
رايك ايه يامحمود في حد عمل حاجات مش ولابد وشرب كام مره حاجات مش ولا بد برضو
وبيقول ان دي كانت مرحله ولازم نجرب...وده يتصدق ولا لا وهل ممكن يرجع للي كان
بيشربه وبيشمه تاني في لحظه ضعف ولا لا؟؟؟؟
على حسب الشخص
انا جربت الموضوع ده مع اتنين من أعز أصحابي
واحد ماقدرشي للأسف من انه كل مرة بيحاول
وواحد قدر
المهم الإرادة... والجو اللي حوليه بيفرق برضو
.........................
لو ماطلعتش دكتور كنت تحب تطلع ايه؟
كنت أحب أجيب جرار زراعي واشتغل عليه
هو حلم غريب شوية بس لسه بحلمه لحد دلوقتي
..........................
حسيت ان في حد بيحبك اوي ومستعد يعمل عشانك المستحيل وحاول يوصلك ده؟
هتفرح من جواك بس هتطنش
ولا هتسيب الموضوع للزمن جايز
ولا هتنهي الموضوع من الاول لانك مش بتفكر حاليا في ارتباط؟؟؟
أنا كان لي إجابة طويلة أوي على السؤال ده
هتلاقيها في بوست من أجندة تالتة ثانوي
كان أولها ساعات بيظهر في حياتنا انسان..إلى آخره
فيها كل الكلام اللي ممكن اقوله في اجابة السؤال ده
.......................................................

محمود ابوالعزم said...

شايف ان الاحسن ان الانسان يبقى عنده اصحاب كتير اوي بس كلهم
اصحاب بس ولا يبقى عندك اتنين تلاته اصحاب بس تكونوا اصحاب
على الحلوه والمره وتحكوا لبعض وتساعدوا بعض؟؟؟
وايه اللي يمنع نجمع بين الاتنين لإنهم مش عكس بعض أصلا
يعني يكون للواحد أصحاب كتير منهم ناس أصحاب وبس
ومنهم ناس يبقوا معانا وقت الشدة ونحكيلهم ويحكولنا؟؟؟
.................................
نقطه ضعف محمود؟؟؟؟؟؟
أهلي
مابطيقشي عليهم الهوا
حاجات كتير ممكن استحملها على نفسي لكن عليهم لأ
...............................
حاجه واحده بس شايفها ميزه فيك وحاجه واحده بس شايفها عيب فيك؟؟؟
ميزة.....بقدر أسمع كويس لو حد بيحكيلي حاجة
عيب....التردد وقلة الثقة بالنفس
..................................
لو مريت يامحمود بتجربه حب قديمه وانتهت وخلاص وعدى وقت طويل اوي عليها
ودلوقتي انت مريت بتجربه جديده او قلبك خلاص ماعادشي ناحيته حاجه
للشخص الاولاني لكن لقيت الماضي بيعيد نفسه والحدوته القديمه
ماماتتشي ولا حاجه؟؟؟؟

هختار الشخص التاني
اللي خدني وانا في عز كبوتي واشتراني و حاول يعالج جرحي
لإني لو نهيت القصة أبقى كده ضريت التلات اطراف
وهعيش أنا بنار الاولاني وذنب التاني
وماكسبتش حاجة في النهاية وخسرت الحد اللي اشتراني
حتى لو احساسي بالحب مش مية في المية ناحيته
كفاية احساسي بالمسئولية تجاهه وتجاه شعوره ناحيتي

محمود ابوالعزم said...

ايه يامحمود اكتر صفه شايفها مفروض تكون في شريكه حياتك
صفه مهمه جدا بالنسبه لك غير طبعا الدين والاخلاق مافيش خلاف على كدا؟؟
تبقى حنينة على أهلى و أي حد من طرفي
انا من بلد أرياف وشفت لما حد من قرايبي بيجوز من برة
فيه ناس تلاقيها باصة للناس هنا من فوق وبتتآلط عليهم أوي
وناس تلاقهيا ولاد ناس جدا وبتتعامل بمنتهي الذوق والاحترام
ما اتمناش ارتبط بانسانه وييجي حد يزورني و يطلع من بيتي
ويقول هي بتتنطط علينا كدليه
...............................
لو كنت ماشي مره في الكليه عادي وشفت واحده......
انا مش مؤمن بالحب بالطريقة دي ولو حتى اسمه اعجاب
......................
تحب شريكه حياتك يبقى فارق العمر بينكم قد ايه؟؟؟؟
دي مسألة للنصيب
بس لو عامة ً لازم يبقى الزوج أكبر شوية أربع خمس سنين مثلا
...........................
اخر حاجه بقى ياحوده انت ايه رايك في النقاب؟؟هل هتلزم مراتك
هتسيبها براحتها مثلا في اللبس؟
او مش فارقه عندك النقاب اهم حاجه تكون لابسه كويس ومحتشمه
بغض النظر خمار او نقاب؟؟؟؟
بفضل الله اخواتي البنات بينضرب بيهم المثل في لبسهم واحترامهم
اتمنى تبقى زيهم
ونقاب او خمار الاختيار ليها المهم حاجة ماتغضبشي ربنا
انتي عندك عروسة لي ولا ايه؟؟؟؟؟
................................
هل شايف انك في يوم من الايام ممكن تنضم للاخوان المسلمين؟
ايه السؤال الصعب ده
الاخوان المسلمين فيهم ناس بحترمهم جدا
وأغلبيتهم في البلد وفي الكلية أصحابي جدا
انا مش واحد منهم رغم اني مش شايف ده يدعو للخجل
دول ناس عندهم تفكير معين وعايزين يوصوله للناس
وانا ضد الحجر على تفكير أي حد مادام تفكيره مش ضد مبادئنا وقيمنا
وبضايق لما اشوف ناس منهم بتعتقل لمجرد انه صاحب فكرة وصاحب هدف
ولو احنا بلد ديمقراطية بصحيح
بقى نسيب كل واحد يقول فكره والناس هي اللي تختار
هي مش دي الحرية ولا الحرية اننا نسيب اللي بيهينوا دينا وقيمنا
ونقول لا قيود على التفكير اشمعني في دي؟؟؟
الناس مش هابلة واكيد هتعرف اللي أدامها ده بيخدعها باسم الدين فعلا
ولا بجد جواه نية التغيير
عجني تعبير قريته مرة في موضوع اسمه يبقى انت أكيد في مصر
بيقولوا ان المواطن المصري بيحب الاخوان فرد فرد انما يكرههم كتنظيم
انا مش اخوان ومش سلفي ومش صوفي بس فيا من الاخوان ومن السلف
ومن الصوفية ..بحاول-بحاول- اجمع الحاجة اللي شايفها كويسة في كل حد
.................................................................

انا عايزه اعرف رد فعلك يامحمود لو عرفت من بعيد ان اي حد زعلان
منك بس الشخص ده ماقلكشي والاهم انك عرفت اللي مزعله حاجه مش
صحيحه هتتصرف ازاي؟؟؟؟؟
عارفة ابويا وامى كانوا بيعاقبوني ازاي وانا صغير
ما كانوش بيضربوني كانوا بيزعلوا مني
عشان عارفين ان دي نقطة ضعف كبيرة بالنسبالي
ودي مش حاجة كويسة لان خوفنا على زعل الناس اوي كده
ممكن يخلينا نعمل حاجات احنا مش عايزين نعملها
انما اللي زعلام مني وماقالشي ده
أنا مابحبش الطريقة دي في التعامل
أحب لما يبقى لي صاحب ويزعل مني ييجي يقول يا محمود
انت زعلتني في كذا وكذا على الأقل يديني فرصة أدافع عن نفسي
بس في الموقف اللي انتي بتقوليه هروح و أوضح موقفي

محمود ابوالعزم said...

بتعمل ايه يا محمود وقت الغضب؟؟؟
بدخل قوضتي
ممكن أقرا في المصحف شوية وممكن أطلع علبة الكومنتات
دي علبة فيها حوالي ألف كومنت من كل المعارض اللي دخلتها قبل كده
ممكن امسك ورقة وقلم واكتب
وومكن لو برة البيت هدخل المدونة
....
أكتر حاجة بـانب نفسك عليها
إني أزعل والدتي او والدي حتى بعد موته الله يرحمه
...............
شايف ان الواحد يرتبط بواحده كان عارفها قبل الجواز احسن ولا يرتبط بحد مايعرفوش؟؟؟؟
الشخصية الكويسة بتفرض نفسها
بس بيتهيألي كفاية انه يكون عنده فكرة ولو من بعيد عن الشخص ده
مش شرط يعرفه يعرفه يعني
وفي الآخر دي مسألة نصيب
...............
اغلى شخص في حياتك بعد والدتك طبعا واخواتك ربنا يخليهمللك
عمتي والدكتورة غادة
.....................
ممكن أسامح في كل حاجة إلا..الكدب
................
آخر سؤال ده هيبقى قصيدة هتشوفوها على المدونة قريب ان شاء الله
أنا كتبتها من فترة بس فاضل فيها جزء مش عارف أعبر عنه
......................
بيتهيألي كده كل الأسئلة خلصت
وشكرا على حرصك انك تعرفي رأيي في كل حاجة زي ماقلتي
انا كان عندي سؤال
انا مااعرفشي ناس كتير من رواد المدونة
بس عندي فضول شديد جدا اني أعرف بأي طريقة مين اللي سئلني كل الأسئلة دي

على العموم متشكر جدا ليكي ولكل الناس اللي علقوا واللي سئلوا
جزاكم الله خيرا جميعا

Anonymous said...

السلام عليكم ورحمة الله هو وقت الاسئلة خلص ولا ايه على العموم انا ماكنتش راوند 6

Anonymous said...

انا لسه متابعه يا دوك

عجبنى كل حاجة في المدونة دي ..اساسا انا مبتابعش غيرها

استمر

ربنا يوفقك و يكرمك و يدخل السرور لقلبك زي ما بتدخله لقلوبنا

rose flower