بتحبها؟؟؟؟؟

Thursday, June 18, 2009

السلام عليكم ورحمة الله
يارب تكون كل الناس بخير
بدون مقدمات هكتب القصيدة علطول
زمايلي في سنة سادتة ليهم بوست اضافي تحت ده
وطلبي من الناس اللي هتقرا القصيدة
تحطوا نفسكوا مكان الانسان اللي كتبت على لسانه ده
ياترى هو كان صح في اللي عمله ولا لأ
..........................................

بتحبها؟؟؟؟
طلع السؤال منـّي بمرارة طفل بيخبّي الدموع
لما حكي
ما أعرفشي ليه قلبي اتقبض
مع إني عارف من زمان
إن اللي كان جوانا... كان
وإن الطريق اللي مشيناه...مافيهوش رجوع
كان جوة قلبي سؤال غريب
إزاي يعيش فيّا اللهيب
من بعد ما طفيت الشموع
شئ صعب لو تيجي الرياح
وتهد عش جميل بانيه
وتلاقي طيرك ساب فروعك وافترق
وتعيش سنين العمر بتدور عليه
فجأة تلاقيه
واقف على ...أقرب فروع
وبرغم شوقك ناحيته
هتخاف تقرب ناحيته
وساعتها بس هتكتشف
إنه عشان تشبع قلوب بنحبها
احنا ساعات ..لازم نجوع
لما لمح في عيوني شوقهم للبـُـكا
شفت في عيونه الهاربنين
نظرة ندم...إنه حكي
ورسمت فوق وشي إبتسامة بطعم خوف
وبدأت ألملم في الكلام
وكإني طفل يتيم نزل
للدنيا بس ماكانشي حد
ويّـاه يعلم قلبه ايه معنى الحروف
وكإني أعمي قالوله شوف لكن عشان
كان خايف النور يحرقه
غمّض عينيه الدبلانين ورفض يشوف
طب أقولّه ايه
احكي على الماضي اللي كان؟؟؟
طب هحكي ليه؟؟؟؟
أفتح طوفان الماضي ليه ؟والماضي راح
ليه لو هيبدأ قصته
يبدأها من وسط الجراح
ليه أحرم الليل الطويل
اللي بروحي غرقت فيه
يطلع عليه صبح يداويه
حتى ولو على ارضهم طلع الصباح
إيه ذنبه..طب ايه ذنبها
مش غلطته ولا غلطتي
ولا حتي غلطة قلبها
لو كنا – كنـّا – من سنين
بتحبني.....وبحبها
وحلمنا نبقي لبعضنا
وحاولنا لكن حبـنا
أدّام واقعنا المر تاه
والحزن داس على حلمنا
وحلفنا نبعد من سكات
من غير دموع...من غير آهات
لو حتى أجمل حب مات
ساب لينا أجمل ذكريات
ومشينا في دروب الحياة
تايهين وبنحاول نفوق
ونشوف لليلنا القاسي ضي
وبرغم إحساسنا اللي تاه
كان لسة جوة قلوبنا شوق
دافنينه جوة في روحنا حي
لما حكي ..فجأة اكتشفت
ان اللي عاش جواه حبيب
مهما حصل مابينسهوش
وكإن عمري طريق طويل
مشيت سنين العمر فيه
والقلب لسة ..مامشيهوش
وكإني ميـّـت سابوا روحه تعيش معاه
ولا طال يموت ولا طال يدوق طعم الحياة
وياريت قدر حتى يعيش بالشكل دا
فجأة لقى..وردُه بيغرق بين نداه
لما أعز صديق ناداه
ويرد بس يقولــّه ايه
كل الحروف متقيدة
هيموت إذا اختار السكوت
ويموت إذا رد الندا
خايف أوي
خايف أداري وييجي يوم
يحكيله حد على اللي كان
يومها الحقيقة هتألمه
شمس الحقيقة ورا الغيوم
خايف عليه لو يوم تبان
تيجي فـ نهاره..تضلــمه
خايف خياله يروح بعيد
لو شك إن ما بنــّا شئ
والشك يزرع نار تئيد
جوة القلوب مليون حريق
مع إننا والله كان
كل اللي بنــّا شعور برئ
بس انتهي و لمّـأ انتهي
راح كل واحد من طريق
لما حكي
شلت الدموع جوة العيون
وحاولت ياما لكن بكيت
وعشان ماتاخدوش الظنون
طلع الكلام مني وحكيت
ما أعرفشي ليه
لكن لاقيت ان الكلام
لو جاله من إنسان غريب
سوء ظنه فينا هيدبحه
والشك هيدمّع عينيه
قصتنا ممكن تجرحه
واحنا أعز اتنين عليه
وحكيت أنا
علشان لاقيت
الصدق أحسن ليه وليها وليّ انا
من غير رتوش
ولا مين ظلم ولا مين جنى
من غير ما اشوّه اسمها ولا رسمها
من غير ما اقول
كلمة تسئ ليها وتجرح قلبها
فهّمته ايه كل اللي كان
وان اللي كان بنــّا انتهي
دلوقتي في ايديه القرار
مع إنه صعب الإختيار
دلوقتي هبعد من هنا
هرحل بليل حزني الطويل
وهسيبلهم شمس النهار
همشي و انا بدعي ضمير
لو كان لقاهم لينا خير
يارب تكتبهم لبعض
يارب تهديهم لبعض
واكتبلنا
اللي انت شايفه الخير لنا
لو حتى كان مش ويّـا بعض
خلى القلوب مهما حصل
اتفرقت
اتجمعت
مش كارهة بعض
ماتخليناش
احنا التلاتة ضحايا بعض

23 comments:

د/محمد الخطيب said...

احساس عالى جدا

وقصيدة جميلة بجد

وانا ده من وجهة نظرى طول عمرى

ان اللى بيحب بجد يفرح لحبيبه

حتى لو بعيد عنة
وحتى لو مش معاه

عبرت عن اللى جوايا يامحمود بأسلوب اكثر من الرائع

بجد انا بحبك فى الله

رحيل said...

وكإني ميـّـت سابوا روحه تعيش معاه
ولا طال يموت ولا طال يدوق طعم الحياة
وياريت قدر حتى يعيش بالشكل دا
فجأة لقى..وردُه بيغرق بين نداه
لما أعز صديق ناداه
ويرد بس يقولــّه ايه
كل الحروف متقيدة
هيموت إذا اختار السكوت
ويموت إذا رد الندا

ابدعت يا دكتور محمود ابدعت بكل ما في الكلمه من معنى .... تقبّل انحانئي تحيّه لقلمك الأنيق ...

منــار فايد said...

مش لاقيه كلام اقوله خالص
كلامك بجد اكتر من رائع
النبره اللي فيه نبره ندم؟؟نبره حنين؟
نبره خوف؟مش باين اوي
بس عايزه اقولك حاجه هو المفروض ان الكلام اللي بينه وبينها من زمان ومفروض اللي بينهم يكون مات مش بطول المده
بقرارهم هما؟صح
عشان كدا انا كنت هابقى معاك انهم يقفلوا على الموضوع اللي كان بينهم
عشان مايجرحوش صاحبهم الثالت..
بس اللي خلى الشخص ده يتكلم حاجه واحده بس
معاه حق انه اتكلم عشانها
وهي انه خايف يوصله الكلام من حد غيرهم... ودي هتعمل من لامشكله مشكله وكبيره كمان وهتحسس صاحبهم الثالت بالخيانه..
لكن لو هو كان متاكد انه مافيش حد ممكن يوصله كلام الماضي
فمتهيالي مفروض ماكانشي يقول لصاحبه حاجه لان اللي قال مش سهل خالص على حد يسمعه...

من الاخر القصيده تجنن ووصلت الاحساس بكفائه..زتسلم ايدك يامحمود

متمنية الفردوس said...

السلام عليكم ورحمة الله وبركاته
انا بجد يا حودة صعب اوصف اعجابى بالكلام الجميل ده والاحساس الرهيب ده
كلام اكتر من رائع والابداع كمان انك بتنقل احساس حد تانى يعنى مش انت اللى معاصر الموقف بنفسك
يارب مزيد من الجمال والروعه والتفوق يا حوده
وركز فمزاكرتك وخد بالك من روحك
F.A

Anonymous said...

لاسف تقدير لشخص لا يستحق منه التقدير لانه اصلا لو كان حبه من الاول كان هيقدره وكان ممكن يستحق احساسك دا . خليه ينسى اللى فات ويدور على انسان فعلا يقدرة ويكون لية قلب ويحس يعنى اية حب وحرام احساسه دا يندفن تحت واحد مقدروش ويمكن فرحان بقلبوب كتير تحت رجلية حتى ولو كان يستاهل دا

نصيحة خلية يحب ويشترى اللى يحبه ويشترية

هبهوبه said...

السلام عليكم ورحمة الله
ايه اخبارك يا محمود؟ يارب تكون بخير
انا اعتقد اي كلمة على القصيدة هتكون ظالمة وعاجزة عن إعطائها حقها لانها بجد اجمل من كل جميل
واحساسها رائع ينطبق عليها اصعب حب بجد وخصوصاً انها بتجمع بين حب الحبيب وحب الصديق والوفاء للصديق واحترام المشاعر واحترام الحبيب حتى بعد مايبعد عنه يعني فيها معاني كتير جميله
بس اكيد انا لو مكانه يبقى لازم اصارحه بما اننا اصدقاء يبقى الكلام هيجي مني اخف كتير من الغريب ويمكن الغريب يوصل ليه الصورة غلط ووقتها هخسر حبي وهخسر صديقي
الصدق هو احسن طريق
واكيد اللي يكون صادق بالشكل ده واللي يتمنى لصديقه السعاده على حساب نفسه يبقى ربنا هيقف جنبه ويعوضه خير عن كل عذاب ويرزقه حب اصدق واجمل من الحب الاول
وفي النهايه انا بشكرك جداً يا محمود على كتاباتك اللي بتاخدنا بيها لدنيا تانيه وتعيشنا احداث قصتها بجد

Anonymous said...

اسمحلى انا مختلف معاك كل الاختلاف اللى يحب حد بيدافع عن حبه بكل ذرة من روحه لانه لو متاكد فعلا انه حبه الحقيقى كان هيعرف كويس اوى انه مستحيل يلاقيه تانى وهيبقى عارف انه اكتر حد ممكن يسعدها ده غير انه متاكد زى ما بتقول انها بتبادله نفس الشعور وهو كمان لسه بديل كل الحزن والخوف ده وبعدين خلينى اسألك سؤال لوصاحبه اتجوزها هيقدر يدخل بيته عادى كده طيب لوالاسرتين اتجمعوا هيقدر يوجه ليها الكلام عادى طب صاحبه مش هيغير ولا هيشك انا رايى لو نسيت فعلا الموضوع وخايفين على صداقتكم انكم الاتنين تبعدوا بس اسمحلى الحب مافيهوش ايثار

Al Bassam said...

دعنى أُقَبل يمينك

دعنى أقبل جبينك

ياسلام على الإحساس الراقى
فعلا أبدعت ياحوده، حقيقى مش لاقى كلام اقوله على رأى أختنا هبهوبه لما قالت : (اعتقد اي كلمة على القصيدة هتكون ظالمة وعاجزة عن إعطائها حقها لانها بجد اجمل من كل جميل)


بجد يا حوده يا حبيبى انت ماشاء الله عليك، موهوب موهبة حقيقية، وواحد عنده قلب زى قلبك ومشاعر صادقه زيك ،انا لا أتورع أبدا إنى أقبل يده ورأسه احتراما وتقديرا


بوركت ياأخى

docmero said...

السلام عليكم ورحمه الله

ازيك يا شاعرنا يا كبير يارب تكون بخير

بص بقى انا عايزه اتخانق معاك..
هعتبرك الحبيب المنسحب وهتكلم معاك عالاساس ده ماشى؟؟
اولا انت ما اخدتش رايها حتى لو كنت انت شايف انها ممكن تختار التانى او يمكن
ده اللى
بيقوله العقل

ما يمكن نظرك ضعيف؟؟
او ان فى الكلام عن المشاعر العقل
يعلن انسحابه ويسيب القلب يتكلم

ثانيا هوا صحييح صاحبك لكن ممكن ميقدرش يسعدها فانت مش المفروض تستسلم وتنسحب بالطريقه دى
وفى النهايه وحتى لو منسحبتش
الحاجات دى بتبقى نصيب
انا كان رايى انه ماكنشى لازم يقول لصاحبه اى حاجه يعنى هوا هيسمع من مين يعنى ؟!معتقدشى يعنى ان اللى هيقوله ده لو صاحبه وبيحبه زيك انه المفروض يقوله يسكت وفى الاخر الحل هيجى من
ناحيه تانيه خالص لا انت ولا هوا كنتوا تتوقعوها

فى دكتور كان قالنا حاجه ومعرفش ليه حسيت انى عايزه اصدقها او يمكن صدقتها فعلا بالرغم انى ما عيشتهاش ولا جربتهاش
ولكن يمكن عشان هو نفسه وهوا بيقولها كان مبسوط وسعيد وبالرغم انه كان مرتبط بزوجته بقصه حب ملتهبه قبل الزواج والكل عارفها

كان بيقول ان مفيش اجمل من العشره لاحب ولا غيره كله بيتنسى ويفضل المعامله الطيبه والحرص على اسعاد الطرف التانى"شريك الحياه"يعنى
يمكن صدقته علشان انا بتمنى انى اريح نفسى واريح قلبى اللى دايخ معايا ده

عالعموم كله فى الاخر نصيب

كفايه كده الا انا رغيت كتير قوى
بس انا على فكره بحب قوى القصيده اللى تخلينى غصب عنى لازم افكر فيها
وانا بشكرك بجد على كده

وشكرا على سؤالك ومننحرمش ابدا
استودعكم الله

Unknown said...

دوك ميرو داخله تتخانق بعد غياب
طيب بالراحه علينا شويه
انا متهيقلي هو مش مقصود انه انسحب
هي الحكايه ان موضوعهم انتهي مع بعض قبل ما صاحبه يرتبط بيها
يعني فعلا مفيش تصيب ليه معاها خلاص
بس هو بيسال المفروض يقوله انه كان مرتبط بيها ولا لاء
رايي بقي انه موضوع صعب اوي" لان في كلا الحالتين هو خسران
يعني خسران حبيبته وخسران صديقه لان متهيقلي صاحبه هيعرف هيعرف عاجلا ام اجلان
فتيجي منه احسن
واكيد لو هو صاحبه بجد وعارفه وعارف اخلاقه هيتفاهم الموقف
بس يعني بيني وبينك صعب اوي يتواجدوا في مكان هم التلاته مع بعض تاني
لان مهم كان مفيش مشاعر بتنتهي نهائيا في قلب الانسان
اكيد هيبقي باقي شويه مشاعر خاصه بيها في قلبه
بصراحه الموضوع صعب اوي الله يكون في عونه
مش عارفه بقي مين فينا اللي فهم صح انا والا ميرو
بس عموما مش هتفرق احنا واحد طبعا ههههههه
بس ما شاء الله علي اسلوب العرض سلسل جدا وتحس ان الجمله بتجبرك انك تقري الجمله اللب بعدها ربنا يكرمك ويحفظك

docmero said...

ماشى كلامك ناتشورال ماجيك مش هنخسر بعض على قصيده حتى ولو لدكتور محمود
بس لو فعلا حكايتهم انتهت فعلا وهوا واثق من جواه ان مافيش حاجه من ناحيته خلاص ميهموش من اى كلام ممكن يوصل لصاحبه لان ايه اللى يضمنله ان صاحبه هيفهمه صح وحتى لو فهمه صح مش هيقدر صاحبه ده يمنع نفسه انه يعيد نظر فى الموضوع من اول وجديد والشيطان مفيش اشطر منه

فكروا كده وحد يرد عليا هل اللى قولته ده ممكن يحصل فعلا ولا انا بيتهيألى؟

سلاااام

۩۝۩ Dr. Flavio ۩۝۩ said...

ايه كل ده..
انا مش قريت لك من زمان
شعر وكلام .. بالشكل ده


انا خليت اختي تقراها معايا ... عجبتها جدا لكن قالت دي معلقه مش قصيده

انا عموما عملت لها كوبي عشان اقراها براحتى في البيت
بس هيا مبدئيا جميله جدا


تسلم ايدك يا حوده

محاولة لكسر الصمت said...

خلى القلوب مهما حصل
اتفرقت
اتجمعت
مش كارهة بعض
ماتخليناش
احنا التلاتة ضحايا بعض
______________________________________
قصيدة رائعة جدا..

د.ميريهان said...

القصيدة أكثر من رائعة يادكتور محمود....
بحق..قد اخترت كلمات تدل على مشاعر ينفطر لها القلب..
أعجبني جدا تمنيه السعادة لها ايا كان مكانها..وهذا مايفترض ان يكون منا جميعا..
لكن..ان يخبر صديقه عما كان بينهما قبل لقائه...فتلك لي مأخذ عليها لولا ماذكرت من خشية ان يخبره احدهم..فيزرع الشك..وهو اراد ان يستأذصل الشك باليقين ويضمن معرفة صديقه ان مابينهما قد مات نذ زمن...ولولا ذاك..فالأافضل ان لايخبره..لانه قدد انتهى بالفعل..وهي ليست مخطأة فيما مضى..هذا بحسب قصيدتك دكتور...
اما عن رايي في حب الانثى..فالذكر الطبيعي ان لا لوم عليه..لكني افضل شخصيا ان يقصر قلب الانثى على من سيكون من نصيبها..اعني بعد الخطبة والزواج..لان ماقبلهما ليس مضمونا انتهائه بالزواج..فقد تعوق الدنيا مسيرة مايرغبان..

سلم عقلك المفكر دكتور محمود...ودمت بخير

Anonymous said...

شل عقلى عن التفكير
كان الله فى عونك

Anonymous said...

قصيدة جامدةجدا بجد تسلم ايدك تعرف القصيدة دى من ناحية الموضوع فهي بتضرب على الوتر الحساس فى عود الحب الحب بكل فروعه وجوانبه اما عن راى فى موضوع القصيدة ان الصراحة حتى ولو كانت قاسية هى افضل شى بس عنوان القصيدة بيدل على ان الطرف الاول لسه فيه شى جواهولو لم يكون جواه شى ولو بسيط مكنش سئل السؤال دهوبعدين هو بكده رمى الكرة فى ملعب صحبه وما عليه انه يستنى قرار صحبه مهما كان القرار ده اما كلمات القصيدة جميله مرتبه منسقه فكرتنى بالبلاغة بتاع ثانوية ومدرس العربى بتاعى بس جمله ماكنشى حد وياه مش عجبانى اظن ان كانت ماكنشى حد -------تسلم ايدك انسان معاه افضل وفى الاخر

Anonymous said...

قصيدة جامدةجدا بجد تسلم ايدك تعرف القصيدة دى من ناحية الموضوع فهي بتضرب على الوتر الحساس فى عود الحب الحب بكل فروعه وجوانبه اما عن راى فى موضوع القصيدة ان الصراحة حتى ولو كانت قاسية هى افضل شى بس عنوان القصيدة بيدل على ان الطرف الاول لسه فيه شى جواهولو لم يكون جواه شى ولو بسيط مكنش سئل السؤال دهوبعدين هو بكده رمى الكرة فى ملعب صحبه وما عليه انه يستنى قرار صحبه مهما كان القرار ده اما كلمات القصيدة جميله مرتبه منسقه فكرتنى بالبلاغة بتاع ثانوية ومدرس العربى بتاعى بس جمله ماكنشى حد وياه مش عجبانى اظن ان كانت ماكنشى حد -------تسلم ايدك انسان معاه افضل وفى الاخر

Anonymous said...

معلش الكلام فوق دخل فى بعضه مكنش حد معاه افضلوده طبعا من وجهة نظرى امضاء انسان

Anonymous said...

لا يابنى لا يجوز

ميقولوش ولا هي تقوله لانه لو هيقوله يبقى الموضوع لسه حى..لكن لو موضوع مات و اتنسى يبقى يتقال ليه

القصيدة عجبتنى بس بصراحة كانت عايزه شغل اكتر من كده علشان فيها جمل مالهاش لزمة الا ا لاطالة او المبالغة في التعبير (ده نقد بناء اوعى تفهم حاجة مش كويسة )ياللا يابنى استمر و احنا متابعين اهوه

rose flower

عندما تنهمر الدموع said...

السلام عليكم ورحمة الله وبركاته
ازيك ياد/محمود يارب تكون بخير معلش انا عرفة اني جيت متأخر بس حضرتك عارف الامتحانات بقى
القصيدة حلوة اوي بكل كلامها واحاسيسها وبكل معاني النبل والاخلاق والحب الصادق اللي بقت حاجات صعب نلاقيها دلوقتي حلو اوي ان الانسان يفضل مخلص لحب قديم لكن اخلاصه للحب ده مدفعهوش ان يهدم حب جديد ويتعس قلب كان كل ذنبه انه حب
الاجمل كمان هي روح الصداقة والوفاء كون ان الانسان يحاول يفرح لمجرد انه يسعد اقرب الناس ليه حتى لو كان الالم بيعسره من جواه يحاول يداري دموعه ويكتم مشاعره في قلبه عشان محدش يحس بيه او يضايق بسببه
والرائع فعلا بقى ان الشخص ده رغم ادراكه انه ممكن باللي هيعمله انه يصدم صاحبه او ممكن يفقده للابد الا انه فضل انه يحكيله الحكاية من اولها بدون تزييف او تحريف عشان يحافظ على سمعة انسانة مغلطتش لما حبت ولما وقف الواقع في وش حبها قررت الابتعاد لكن مرة تانية رجع قلبها ينبض بالحياة بقصة جديدة ومش ذنبها ان حظها كان في اتنين اصحاب
كمان كونه اعترف لصاحبه بكل شئ فهو كده ريح ضميره وحافظ على عهد الصداقة اللي بينهم وبكده فهو اثبتله فعلا ان كل ده كان ماضي برئ وخلاص راح ولما بدأت ابواب المستقبل تفتح فهو موقفش في طريقها لكن حاول يوضح كل شئ عشان الطريق يبقى واضح من اوله ولو ربنا كتب لصاحبه السعادة مع البنت دي فتكون حياتهم مبنية على الصراحة والوضوح من الاول ولو ملوش فيها نصيب برده هيفضل صاحبه مقدر له انه فتح له قلبه وحكاله عن ماضي عدى وراح لمجرد انه يريح ضميره ويأدي حقوق الصداقة عليه
فعلا قصيدة اكثر من رائعة ربنا يكرمك ويوفقك ومستنيين حاجة جديدة

نهال عمر said...

ما شاء الله جميلة جدا يادكتور محمود.ده موقف صعب اوى والمواجهة شئ اصعب لكنها فى معظم الاحيان بتكون الحل الامثل.

د.آيه said...

بسم الله الرحمن الرحيم
قصيدة جميلة جدا يا دكتور ..
تحياتى..
و أكيد الوقت هينسي و هتبقي ذكري و بس و ربنا هيكرمه بحد تانى

محمود ابوالعزم said...

أنا بجد بشكر كل الناس اللي علقت
كاني نفسي أرد على حد حد لولا ظروف الامتحانات اللي فاتت دي
كل كلامكوا كنا جميل جدا
حتى الناس اللي ماعجبتهاش نهاية القصيدة
برضو منطقهم كان كويس
بس هما ماقدموش حل برضو
في النهاية الموضوع كان صعب جدا
يعني هو لو حكي او ماحكاش
هو في الحالتين خسران
بس هو كان شايف انه كده الصح
من وجهة نظره اللي ممكن تكون صح وممكن تكون غلط
وشايف صاحبه حد كويس جدا
والبنت برضو حد كويس جدا
وخايف انهم مايكونوش لبعض بسببه
انا شخصيا احترت جدا وماعرفتش ايه الصح
بس انا كنت مع بطل القصيدة ان كونه يحكي هيريح الكل
على الأقل هيريح ضميره
وكمان لما البنت تعرف ان صاحبه عارف هي كمان هترتاح
عشان مايعيشوش بذب انهم مخبيين حاجة طول عمرهم
وعشان ما يصغروش في نظر الانسان ده لو عرف في يوم من الأيام
هي قصة صعبة ومتشابكة
يارب بس تكون القصيدة عجبتكم فعلا
ومتشكر بجد لكل كلامكوا الجيمل عليها
جزاكم الله خيرا جميعا
و أدام هذا التواصل