دعبس سمير وانفلونزا الحمير

Tuesday, July 7, 2009

ياااااااااااااه...أربعتاشر ساعة نوم
آدي آخرة اللي يتعشي فول بعيش بلدي
خدت الوضع المناسب للتمطيعة الصباحية واتمطعت
ايه اللي جري ...التمطيعة دي مش تمطيعتي أبدا
تمطيعة مافيهاش حماس ولا جدية ولا لعب على الجون
أنا مال جسمي مكسر كده وعامل زي لاعيبة المنتخب في ماتش أمريكا
يكونشي عشان ذاكرت ساعة ونص جراحة قبل ما أنام؟؟؟
هما صحيح ساعة ونص كتير بس مايعملوش كده
طب ما فيه ناس – اللهم حسد – بيذاكروا ساعة واتنين وتلاتة وعادي
أنا مش عايز اأقوللكم ان فيه ناس بتخلص المنهج مذاكرة
ده فيه ناس ولا يعاذ بالله بتدخل لجنة التحريري ويحلوا الورقة كلها
مابيسيبوش ولا سؤال...وناس بتجيب النهاية في امتحان الإم سي كيو
بتحصل والله
لأ لأ أكدي التعب ده مش من الجراحة
آآ..آآ...آتسي ...ايه العطسة الجامدة دي أنا شكلي جالي برد
يكونشي عشان استحميت امبارح؟؟بس لأ برضو الحما مايعملشي كده
وبعدين أنا لازم أستحمي ... التجديد مطلوب برضو..
أع...أع...ايه ده أنا كمان رجعت
والأكل مااتهضمشي كمان ...الفول لسة بسوسُه
يكونشي جالي برد على فم المعدة..هو صحيح احنا ماخدناش
في الكلية يعني ايه برد على فم المعدة بس ماحدش عارف
الطب بيتطور وممكن لما أخلص طب انا اللي اكتشف المرض ده
أهو حتى ابقى أسميه على اسمي أو اسم حد من اخواتي
على العموم انا هقوم اصلي وافطر واروح الكلية يمكن ربنا يفرجها
قمت وصليت وفطرت و لبست وركبت ميكروباص يوديني طنطا
وعشان العطس كان شديد جدا قلت أركب جنب السواق
و أبعد عن زحمة الركاب في الكراسي اللي ورا وطلعت خمسة جنيه

لو سمحت واحد من الحمسة يا أسطي آآ...آآ...آآتسي
يرحمكم الله يا أستاذ حاضر .. شوية على ما الفكة تيجي من ورا
يرحمنا ويرحمكم الله ... ماشي يا أسطي
وبعد شوية
لو سمحت يا اسطي باقي الــ ....آتسي
يرحمكم الله
يرحمنا ويرحمكم الله بس عايز باقي ال..آتسي
يرحمكم الله
يا اسطي عايز بقى الـــ... آتسي
يرحمكم الله
آتسي
يرحمكم الله
آتسي
يافتاح يا عليم يا رزاق يا كريم ما خلاص بقى يا أستاذ
آتسي
والله دي آخر مرة أقوللك يرحمكم الله اعطس براحتك بقى
آتسي
انت كده هتخليني أقوللك...يأخدكم الله
آتسي
طب خد الحمسة كلها أهي بس بطل عطس
آتسي
طب خد أجرة العربية بس ماتعدنيش بالله عليك
آتسي..آتسي ....أع ....أع
كمان بترجّع في حجري..طب والله ما انا مكمل انزلوا يا جماعة
ونزلنا السواق قبل ما نوصل وعشان كنت خايف أعدي حد كملت
السكة مشي لحد ما وصلت الكلية والعطس مش راضي يبطل
هناك قابلت صاحبي شرارة ولقاني عمال أعطس جامد و سألني
مالك يا دعبس بتعطس كدليه
المشكلة مش في العطس..المشكلة أنا حاسس اني..اني
إنك ايه؟؟؟؟؟قول ما تتكسفش
أنا حاسس ان أنا عايز آكل حشيش
قصدك تشرب حشيش
لا أنا عايز آكل حشيش من الأخضر مش من بتاع الأفراح
حشيش..دا كده الموضوع خطير جدا
أمال لو عرفت اني اشتريت علبة مناديل
مناديل؟؟؟؟...للدرجادي
العيا بيذل يا صاحبي
تقوم تشتري علبة بحالها؟؟؟
أعمل ايه مالاقيتشي دكاكين بتبيع مناديل فرط
بس انت كده لازم تسلم نفسك
أسلم نفسي..ايه يا عم جو أفلام الأبيض والاسود ه..اسلم نفسي ليه
عشان مصر يا دعبس...انت كده ممكن تضر مصر
لازم تسلم نفسك عشان نعرف نوع الانفلونزا دي ايه
دي ممكن تبقى عادية أو طيور أو خنازير أو بالشطة والليمون
دي هتبقى خدمة كبيرة لبلدك ..انت مش أقل من أحمد زويل
ولا أسامة الباز ولا محمد البرداعي ولا محمد ابوتريكة
فعلا أنا مش أقل من اللاعيبة اللي انت قلت عليهم دول
أنا هسلم نفسي .....‘عشانك يا مصر

طلعت على مستشفي الحميات وانا سامع النشيد الوطني بيزن في وداني
ودخلت عليهم هناك بروح غانا 2008 وقلتلهم
انا عايز أقابل المدير
المدير مرة واحدة ...ليه
عشان مصر
طب ما فيه نواب هنا في المستشفي
بقوللكم مصر ..انتو ايه ماشربتوش من نيلها..هو ماعادشي انتماء أبدا
المدير في عيادته برة وزمانه جاي اقعد استناه بقى
والحمد لله المدير ما اتأخرش زيادة عن تلات ساعات ودخل ودخلت رواه
إلحقني يا دكتر أنا عندي انفلونزا
ألف سلامة يا ننوس عين ماما ...طب ما أنا كمان عندي انفلونزا
لأ يا دكتور دي احتمال تكون انفلونزا طيور أو خنازيز
طيوووووور ...خنازير...؟؟؟انت متأكد؟؟؟
ايوة
طيور ...خنازير...ياااااااااااااه أخيرا هطلع في العاشرة مساءا
دكتر يا دكتر حضرتك رحت فين
لأا يا ابني مافيش حاجة ثانية واحدة يا عبده-
لازم الساعي يبقى اسمه عبده خلي السكرتيرة
تجمعلي أكبر الدكاترة عندك وبسرعة
وماتنساش تجيب كمامات وانت جاي يا عبده
قوم انت با دكتور مجدي خد منه عينة
ودردش معاه واعرف منه الحالة بالظبط
هيص يا عم الدكتور مجدي نكتة دا اظرف دكتور عندنا
وجه الدكتور اللي من أول ماقعدنا وهو عمال يضحك مش عارف ليه

انت اسمك ايه
دعبس سمير أبوالفتوح تامر
ايه الاسم الغريب ده .هههه.ِانت بتسمع المفتش كرومبو هههه ..و سنك؟؟؟
أربعة وعشرين سنه
و الجنسية؟
مصري
يبقي أكيد المستوي الاجتماعي برضو مصري هههه..وشغال ايه
طالب طب
يبقى أكيد الحالة الاجتماعية برضو طالب طب ههه ..وفي سنة كام
سادتة
هو انت من اللي سنة سادتة اتطبقت عليهم.....حلوة هههههههههه
حضرتك ظريف أوي فعلا
ربنا يخليك...وبتشتكي من ايه
عندي عطس شديد وجسمي مكسر وسخن جدا
وترجيع شديد واشتريت علبة مناديل
طب قوللي يا ابني انت ليك أي تعامل مع الطيور
لأ والله يا دكتور
مع ان شكلك مريش ...ههههه....حلوة.....هههههه
طب ولو من بعيد؟؟؟
آه عندنا في الحتة لما بيطبخوا فراخ بيرموا الريش في الشارع
عشان الناس تعرف انهم طابخين فراخ ..بيكيدوا بعض يعني
طب ليك أي تعامل مع الخنازير
أعوذ بالله لأ طبعا
ولا ليك أي تعامل مع حد لسة راجع من برة
لأ
أكيد لا دا انتو اللي اتغرب في بلدكم راح طنطاهههههه
طب ماعندكوش أي حيوانات في البيت؟؟؟

كان عندنا بهايم وبعناها مش فاضل عندنا غير حمارة غلبانة كده
وياتري أخبار علاقتكوا ايه
علاقتنا ؟؟ماتحترم نفسك بقى يا دكتر من الصبح نازل تريقة عليا
وانا ساكت وفي الآخر تقوللي علاقتنا

لا يا ابني هههه أقصد ههههه أقصد بتقرب منها
أيوة دا حتي امبارح وانا بحطلها عطست في وشي
عطست في وشك ؟؟؟انت متأكد؟؟؟؟
ايوة
وتعبت بعدها
أيوة..........
يبقى هي اللي نقلتلك الفيروس
هي دي الفرصة اللي كنت مستنيها طول عمري
مصر هتتشهر وسط العالم من غير مانوصل كاس العالم
والعالم كله هيتلكم عني وهيتفوا بإسمي
الدكتور مجدي نكتة مكتشف انفلونزا الحمير
الدكتور مجدي نكتة مكتشف انفلونزا الحمير
الدكتور مجدي نكتة مكتشف انفلونزا الحمير

.................................
قريب ان شاء الله بقية القصة
في انتظار تعليقاتكم

21 comments:

Anonymous said...

بسم الله

بجد جااااااااااااامدة

جدا

منتظربن الباقي

pure blue

بنجاواتى said...

حلوة يا حودة

بجد جامدة جدا
والدكتور مجدى ده عسولة:))

بس تفتكر لو الحاج تامر جد دعبس كان عايش كان سكت ع الوضع ده؟؟؟

ربنا يسعدك يا رب دايما

تحياتى

natural magic said...

حلوه وجميله جدا اوي خالص

وبالذات موضوع المناديل والدكتور مجدي دا ظريف رخامه0000

سوري يعني اصلي بتغاظ من اللي بيستظرفوا

مستنيين البافي
محتاجين المود دا بجد اليومين دول

Khaled Selim said...

روح الفكاهة عالي أوي أوي في البوست ده

ومش عارف ليه حاسس إن فيه حاجة جديدة
مش عارف هيا إيه
بس متأكد إن فيه حاجة جديدة في روح الموضوع

ماعلينا
بس حلوة أوي حكاية هوا إنتا من اللي سنة سادسة إطبقت عليهم
ههههههههههههههههههههه


منتظرين الباقي يا جميل

عايش... ولكن !!!! said...

دمك خفيف كييك وربنا ....هتابعك بس تدينى منديل من العلبه

ليس فقيرا من يحب said...

السلام عليكم
بصراحه دمك زى العسل والدكتور مجدى ده بقه حكايه عايزة اتعرف عليه
بوست زى العسل منتظرين البقيه

docmero said...

هههههههههههه
ههههههههههههههههههه
هههههههههههههههههههههههه
الله يكرمك يا رب كده دايما سنه سته محتاجه اللى يفردها وميكلكعهاش
بس يا ترى الباقى ايه؟
؟
؟

::Exorcist:: said...

موز موز
_______
_______

ده تقريبا اليوم اللي شفتك فيه
ربنا يستر الواحد بيعطس برده
بس الواحد مطمن شوية
لاني موصلتش لمرحله الحشيش والنجيله دي
بالشفا يا حوده
وعبال الدبيحه
سلاموز باللبن

عندما تنهمر الدموع said...

السلام عليكم ورحمة الله وبركاته
ازيك ياد/محمود يارب تكون بخير حلوة اوي القصة واللهم احفظنا من انفلونزا الحمير والطيور والخنازير ومستنيين بقية القصة
ربنا يكرمك ويوفقك

هبهوبه said...

السلام عليكم ورحمة الله
ازيك يا دكتور محمود الف سلامة على دعبس بس ابعد انت عنه بقى ربنا يحفظك ويحفظنا جميعاً ويبعد عنا كل الشر
اللهم آمين
احنا مستنين بقيت القصه بس ربنا يستر ومايكونش فيها انواع جديدة من الانفلونزا لان الانفلونزا بعد ماكانت ابسط مرض ممكن يصيب الانسان بقى اخطر حاجه الانسان بيقلق منها
ربنا يحميك ويحمينا جميعاً

حبارير said...

رهيبة

الله يخزي شيطانك

متابع

وردة said...

ايه يا دكتور ده
جامدة جدا طبعا
تسلم ايدك
انا من اول سطر وانا فطست علي روحي من الضحك
ومحدش من اللي حواليا عارفين انا بضحك ليه
وبيحسبوني اتجننت
العلاج عليك بقي
امال دكتور ازاي
هههههههههه
ربنا يكرمك والله رااااائعة
سلام

فراشة said...

سيناريو رائع جدا

بحييك على طريقة سرد القصة
مرحة وجميلة جدا

بس هو احنا ناقصين
انفلونزا حمير

تحياتى

نهال عمر said...

حلوة اوى يا دكتور محمود ايوه كده بصراحة بقالك مدة منكدها علينا حبتين.للامام دايما وربنا يديم عليك الكوميديا.فى انتظار البقية

Anonymous said...

جميله يا محمود وحلوة الحبكه بتعتها بجدامتعتنا تسلم ايدك وفى انتظار الباقيه---------امضاء انسان

د.ميريهان said...

الله,,,,ده المرض الجاي باذن الله..
يارب اشفي الجميع...ونجينا من اي قادم شرس

حلوة جدا يادكتور...
الفكرة نفسها رائعة...

سلمت يداك

محمد عبد الباسط said...

تسلم ايدك يا دعبس

قصدى يا محمود

انا كمان عندى برد شدييييييد ادعيلى ربنا يشفينى


حلم كبير

أحمد سعيد بسيوني said...

بسم الله

رجعت من بورسعيد وعندي تقريبا نفس الاعراض

بعدها بيوم اتصل بي عبدالباسط وعنده نفس الدور برضه

ايوة

افتكرت

شفت حمار عدى من قدامنا واحنا بنكنس الشارع يوم الخدمة العامة بتاعتنا

بس تفتكر هو السبب

د/محمد الخطيب said...

انت فظيع بجد

خيالك عاااااااااااااالى

معتقدش ان حد فكر فى الموضوع ده قبل كده

وبعدين اسلوبك فى الحوار سهل وجميل جدا

كما تعودنا منك

ربنا يزيدك يارب

Al Bassam said...

حاجة حلوة.. حاجة بيوتيفول .. دي حاجة بالكريم شانتيه ، تسلم لينا ياغالي .. بس سامحني يا حوده معلش لاني إتأخرت المره دي في التعليق أصل الجهاز عطلان ..علي العموم انت وحشتنا والله وربنا يكرمك ويشفيلك عم دعبس

Anonymous said...

بسم الله
السلام عليكم

جميلة خالص ما شاء الله

ودايما كل موضوعاتك جنان
ربنا يحميك
للأمام ذائما