مش احنا كمان هنروح عند ربنا؟؟

Wednesday, August 5, 2009


إنا لله و إنا إليه راجعون
اللهم انا نشهدك أنا رضينا فإرض َ عنا
اللهم انا نشهدك أنا رضينا فارض عنا
اللهم إنا نشهدك انا رضينا فارض عنا
ان العين لتدمع وان القلب ليحزن
النهاردة بعد خمس أيام من اللي حصل حاسس اني محتاج اكتب
رغم احتياجي الشديد ان اكتب من يومها بس كنت مستني
عشان لما أكتب اكتب وانا متماسك وكويس واطمن الناس عليا
انا لسة حاسس اني مخنوق أوي
حاسس زي ما يكون كابوس طويل
ومستني اي حد يخبطني بالرجل ويقوللي اصحي بقى
والله مش قلة رضا ولا قلة صبر بس النبي صلي الله عليه وسلم
كان حاسس بينا لما قال ان القلب ليحزن
ماكانشي شئ سهل علينا انا اصحابي في البلد نلاقي
خمسة من أصحابنا مرة واحدة كده بيتسحبوا من حياتنا
اصحاب ضحكنا سوا زعلنا سوا لعبنا سوا اتخانقنا سوا صلينا سوا
اشتغلنا سوا سافرنا سوا بكينا سوا وقبل دا كله اتربينا سوا
ماكانشي سهل عليا أبدا اني أبص للخمسة دول الاقي منهم ابن عمي
وتلاتة من اعز صحابي حتى الوحيد اللي ما اعرفوش فيهم كنت بحبه جدا
ماكانشي سهل أبدا اني ألاقي منهم اول حد صاحبته في حياتي كلها
محمد ربنا يرحمه ..أعرفه من وانا عندي أربع سنين عشان كنا جيران في الارض
عشرين سنة أصحاب
لسة فاكره وهو راكب الحمارة ادام أبوه لما كانوا زارعين عنب زمان جنبنا
وكانوا جايبنلنا قفص عنب وحطوه ادام الباب ومشيوا
فاكر زي ما يكون لسة النهاردة
انا مش عارف أحكيلكم ايه.. دي عشرة عمر بحاله
بس بعد خمس أيام مادقتش فيهم طعم النوم انا دلوقتي بفتكرهم وبضحك
بفتكر محمد لما رحت اشتغل معاهم في الساحل وفلوسي خلصت ولسة ماقبضتش
واخترته من بين كل اصحابي اللي كانوا هناك
وقلتله انا محتاج خمسين جنيه يا محمد
طلع محفظته واداهالي وقاللي خد اللي انت عايزه وهاتها تاني
بفتكر فرحته بيـّا يوم ماجبت مجموع كبير في الثانوية العامة
مع ان مجموعه هو ماكانشي زي ما هو عايز
بفتكره يوم ما كان بيشل في عزال اختى
لما كان بينقى أتقل حاجة عشان يطلع بيها رابع دور على كتفه
بفتكره لما كان معدي رايح ارضهم قبل فرح اختي و امي نادت عليه
يامحمد عايزاكم تعلموا جو كده في الفرح
وقاللها عيب ما توصنيش دا فرح أختي
بفتكر محمد ابن عمي في آخر مرة شوفته وكنا بنلعب كورة
ولسة صوته بيرن في وداني لما دخلت جون حلو وقعد يقول
هو دا ابن عمي اي جماعه هو دا ابن عمي يا جماعة
وأيام الاتوبيس لما كنت برخم عليه و افضل طول السكة قاعد على رجله
وكامل ..ربنا يرحمك يا كامل.. اللي يمكن مابقيناش أصحاب بجد غير السنادي
بس حبيته جدا وكانت كل الناس بتحبه جدا وهيفضلوا يحبوه جدا
بوسامته وخفة دمه الشديدة جدا وقفشاته اللي ما بتبطلش
وباسم... واحد من اجدع الناس اللي شفتهم طول عمري
انا مش عارف أحكي ايه ولا ايه
دول جزء من حياتنا كلنا
ناس منقوشة جوانا
انا بس فيه حاجة وجعاني اوي بس مطمناني اوي
يمكن انا ومحمد بحكم الدراسة بعدنا شوية عن بعض بس فضل اللي جوانا جوانا
وعشان كده محمد ربنا يرحمه ما كانشي سره معايا
بس من حوالي شهرين لاقيت محمد بيخبط على و جالي وقعد معايا تلات ساعات
حكالي فيها كل حاجة عنه ..كل حاجة...
تلات ساعات لسة كلامهم عمال يتردد في وداني من ساعة اللي حصل
تلات ساعات انا قادر اني أًصون كل اللي اتقال فيهم واشيله جوايا
بس ساعتها كنت على أد ما كنت فرحان جدا بمحمد
على اد ما كنت مستغرب جدا ايه اللي خلى محمد يعمل كده وفي الوقت ده ليه
بس دلوقتي فهمت انه كان جاي يودعني وانا مش فاهم ويمكن هو كمان ماكانشي فاهم
بس اللي مريحني اني يومها قلتله انه من أكتر الناس اللي بحبها جدا في الله
واننا يمكن اتفرقنا شوية بحكم الدراسة بس معزته جوايا عمرها ما ااتغيرت
وهو قاللي نفس الكلام
نفس الموقف حصللي مع كامل في آخر مرة ركبنا فيها الاتوبيس
وجه قعد جنبي و خدنا السكة كلها بنحكي على كل حاجة ومش فاهمين ليه
بس انا حاسس ان ربنا عمل كده عشان آجي دلوقتي ادامكم و ادام كل الناس
واشهد شهادة حق اتحاسب عليها ادام ربنا
انهم من انضف و اجدع و اجمل وأرجل الناس اللي شفتهم في حياتي
و انهم نضاف اوي من جواهم وبيحبوا ربنا ومش شايلين حاجة وحشة لحد
وانهم حتى لو فيهم حاجات غلط فكانوا بيحلموا يغيروها للأحسن
ودي مش شهادتي لوحدي
دي شهادة بلد بحالها خرجت من أصغر لأكبر فيها عشان تودعهم وتدعيلهم
شهادة من كل أصحابهم اللي من يوم حادثتهم وكلنا عقلنا مشلول
بس كلنا صابريين وراضيين ومحتسبينهم عند ربنا شهداء ان شاء الله
بس خايفين
عشان عارفين ان السنين اللي ربنا مدها زيادة في عمرنا مش نعمة ولا فضل لينا
بالعكس دا الامتحان بقى صعب أوي
عارفين لما حد بيأجل الامتحان وبعدين يدخل للدكتور يسأله أسئلة صعبة اوي
ويقوله لازم كده مادام خدت وقت زيادة عن زمايلك كان لازم تذاكر فيه
خصوصا وانت شفت الناس بتمتحن قبلك
احنا كمان ربنا أجل لينا امتحانا بس ياتري الامتحان هيبقى عامل ازاي؟؟؟؟
فاضل كلمتين عايز اقولهم
كلمة احمد صاحبي لما عرف بعدها ونزل من مصر ورحنا نزروهم في المقابر
وكنت خايف على احمد اوي من اللحظة دي بس لما رحنا كان متماسك جدا
هو نفسه كان مستغرب من نفسه بس قاللي كلمة عمري ما هنساها
قاللي لما جيت هنا حسيت ان هما أصحاب البيت واحنا اللي مسافرين وراجعين
هما سبقونا على البيت اللي هيبقى بيتنا كلنا واحنا راحيين شوية وراجعين
احنا جايين هنا عشان هما يزورونا مش علشان احنا نزورهم
الأصل اننا نبقى هنا مش هناك
انتو حسيتوا الكلمة دي؟؟؟
الكلمة التاينة كانت كلمة طفل صغير عنده اربع سنين وكنا في عزاء ابن عمي
وهو كان يعرف محمد ابن عمي ربنا يرحمه ولقيناه مرة واحدة سأل أبوه
هو محمد راح فين يا بابا
ابوه قاله محمد راح عند ربنا
ورد عليه..طب يا بابا مش احنا كمان هنروح عند ربنا؟؟؟
كلمة صغيرة من طفل صغير بس هزت كل اللي سمعوها
لانه واجهنا بحقيقة كلنا عارفينها بس بنخاف نواجه نفسنا بيها
أصحابنا راحوا هناك عند ربنا اللي هو أرحم بيهم مننا ومن اهلهم وحتي من نفسهم
بس احنا....احنا فين
احنا ربنا ادانا نعمة النسيان بس طول عمرنا بنفهمها غلط
لاننا بننسي بيها اللي ماتوا وبننسى معاهم اننا هنموت زيهم
اللي ناس كتيرة ماتعرفوش اني انا وناس تانية
كنا المفروض هنروح معاهم نزور صاحبنا ده
بس هما لقوا نفسهم خمسة على اد العربية و ما بلغوناش الميعاد وراحوا لوحدهم
عشان هما ربنا كاتبلهم العربية تتقلب في المية ويموتوا شهداء بإذن الله
بس سابوا لينا سؤال كبير اوي....لو احنا؟؟؟؟؟
انا زعلان من نفسي اوي
زعلان على نفسي اوي
زعلان عشان عايز اتغير ومش قادر
زعلان عشان عارف اني هنسى زي ما طول عمرنا بننسي و مابنتغيرش
زعلان من نفسي عشان من فترة قريبة جدا ياسر الله يرحمه
كان راكب معايا الصبح
على مارجعت من الكلية لاقيتهم بينادوا اسمه في المساجد
وانهرت زي ما ناس كتيرة انهارت وبكيت عليه بحرقة زي ما كل الناس بكت
أنا فاكر واحنا بنشيله من نعشه
كان جوايا وعود كتير أوي لربنا اني هتغير
بس للأسف مااتغيرتش
نسيت زي ما كل الناس بتنسى انهم هما كمان رايحين هناك
حتى بعدها رينا كرمني برؤية ياسر في مكان أي حد فينا يحلم يشم عبيره بس
ورحت بشرت أهله
و كإن ربنا بيقوللي شوف اللي عاشوا عمرهم كله لربنا زي ياسر بيبقوا فين
وبرضو نسيت زي ما كل الناس بتنسى
اوعوا تفتكروا من كلامي هنا أو في أي حتة اني حاجة
أو اني قدرت أعمل حاجة
أنا ولا حاجة ولا أساوي حاجة
انا بقى كل دعايا ان ربنا يسترني أدامكم يوم القيامة
عشان الناس اللي بتحبني ما تتصدمشي فجأة إني كنت أكبر ممثل في حياتهم
كل واحد فينا عارف اخطائه فين.. مش محتاجين لكتب ولا لشيوخ
بس احنا بنخاف نواجه نفسنا
زي ما نكون بنعاند نفسنا
زي ما نكون بدون مانقصد بنعاند ربنا
زي ما نكون ناسيين ...أحصاه الله ونسوه
زي ما نكون ناسيين...واتقوا يوما ً ترجعون فيه إلى الله
زي ما نكون ناسيين...أن تقول نفس ٌيا حسرتى على ما فرطت في جنب الله
زي ما نكون ناسيين...يا أيها الناس أنتم الفقراء إلى الله
زي ما نكون ناسيين...وماقدروا الله حق قدره
زي ما نكون ناسيين...وبدا لهم من الله ما لم يكونوا يحتسبون
زي ما نكون ناسيين...وقدمنا إلى ما عملوا من عمل ٍ فجعلناه هباءا ً منثورا
زي ما نكون ناسيين....ولكن ظننتم أن الله لا يعلم كثيرا ًمما تعملون
زي ما نكون ناسيين... ويحذركم الله نفسه
انا حاسس ان احنا زي ما نكون نزلنا الدنيا دي لاقينا فيه اتوبيس ماشي
ولقينا كل الناس بتركب فيه قومنا راكبين فيه
من غير حتى ما نسأل هو رايح فين
عشان نبقى مع الناس مش اكتر
بنعمل زي كل الناس في الأتوبيس ما بيعملوا عشان ما يتريئوش علينا
حتى لما لقيناه ماشي في طريق غلط ماقدرناش ننزل
لاننا مش قادرين ننزل أو يمكن مش عايزين ننزل
خايفين لو نزلنا نبقى لوحدنا بعيد عن الناس
عشان ما اتعودناش نكون مع ربنا
ولا اتعودنا ان رضاه عنا سلعة لازم يندفعلها ضرايب كتير أوي
بس احنا مش عايزين ندفع...احنا عايزين ناخد....ناخد وبس
ربنا حاسس بينا وعارف أد ايه احنا بنعاني وعايز يرحمنا بس احنا مش عايزين
أنا حااسس ان ربنا لما هيحاسبنا مش بس هيحسب احنا مشينا أد ايه في طريقه
هيحسب كمان احنا تعبنا أد ايه عشان نمشي المسافة الصغيرة دي
عشان هو عارف ان فيه ألف طريق بيشدنا ناحيته
عشان هو عارف ان الدنيا من حولينا صعبة أوي
واننا حتى لما بقينا وحشين.. بقينا وحشين غصب عننا
عشان كده ربنا بيقول ....ففرّوا إلي الله
عشان هو عارف كمية الصراع اللي جوانا عاملة ازاي
عشان كده بيقول ...ويريد الله أن يتوب عليكم
لازم نستحي من نفسنا ان ربنا حاسس بينا وعايز يتوب علينا واحنا اللي مش عايزين
ربنا مش عايز مننا أكتر من اننا نروحله...نحاول نروحله...وهو هياخد بإيدنا بس نحاول بس
خلونا مرة واحدة بس نواجه نفسنا
خلونا مرة واحدة بس نحاول نتغير
خلونا مرة واحدة نعمل حاجة صح للآخر
خلونا نروح لربنا...نروح بس
انا بتأسف ان كنت كئيتكوا معايا كده النهاردة
وبعتذر لأي حد بعتلي عايز شرايط أو عشان موضوع التبرع بالدم
زمايلي هيبقوا مسؤلين عن كل حاجة الفترة دي
وبـتأسف لو كان ده هيبقى آخر بوست على المدونة الفترة دي
ادعولهم يا جماعة عشان خاطري ادعولهم ربنا يرحمهم ويصبر أهلهم
ادعولنا احنا كمان بالصبر وبالثبات
ادعولهم عشان خاطري بالله عليم كل حد يدعيلهم
وبالله عليكم كل واحد يلحق نفسه...ماحدش عارف الدور على مين

15 comments:

Anonymous said...

يمكن يكون ده أصعب بوست قريته على مدونتك يا محمود
أبكيتني بشدة
ربنا يرحمهم ويغفرلهم ويثبتكم ويثبت أهلهم
بس قولنا احنا ممكن نعمللك ايه يا محمود
انت جمايلك مغرقانا كلنا ونفسنا نعمللك أي حاجة
انت حتى رفضت ان احنا نجيلك
قولنا بالله عليك على حاجة ممكن نعملهالك او نعملهالهم
بالله عليك

فجر اخر said...

البقاء لله يادكتور محمود ربنا يرحمهم ويغفرلهم ويسكنهم فسيح جناته هما فعلا هما الي سبقونا علي البيت اللي هيبقي بيتنا كلنا واحنا الي قاعدين شويه وهنروحلهم يارب قدرنا علي عمل حاجه في دنيتنا تخلينا نستاهل ان احنا ننال رحمتك يارب
رب اغفر لي ولوالدي ولمسلمين والمسلمات الاحياء منهم والاموات امين يارب العالمين
ربنا يكرمك ويصبر قلبك

Anonymous said...

اللهم ارحمهم رحمه واسعه واغفر لهم وجافى الارض عن جنوبهم ووسع مدخلهم
والحقنا بهم على خير
بجد احنا ممكن نسمى الشهر دا شهر الحزن
حصل حاجات كتير قوى فيه ...........ربنا يصبرنا
ياااااااااااااااه يا دكتور جيت على الوجيعه اللى كلنا بنحاول نخيبى نفسنا منها
ربنا عامل يدينا فى رسايا عشان لما يسالنا يوم القيامه ما يبقاش لنا حجه
محتاجين نفوق ورمضان جايلنا فرصه
اللهم اهدينا وثبتنا على دينيك
وانشلنا من الضياع اللى احنا فيه ياااااااااااااااااااااارب

Anonymous said...

والله يادكتور محمود مش عارفة اقولك ايه وربنا عالم انى بدعيلكم ربنا يصبركم ويرحم اصحابكم انا مروة من طب المنوفيه بس كلنا اخوات ف الله ومتابعه كل حاجة عندكم ومن اشد المعجبين بكتاباتك اللى مش بس كتابات دى فيها احنا بافكارنا بكل حاجة بنعيشها علشان كده نصيحة من أخت اكتب حتى لو منشرتش اللى بتكتبه اكتب لنفسك صدقنى دى بتخلى الواحد ينسى همومه والكتابة اكتر حاجة بتخفف عننا
وبدعى ربنا يرزق الصبر ويرزق اهاليهم واصحابهم الصبر
ويرزقنا الفوقةمن اللى بيحصلنا ده
ولايسعنى ان اقول الا ان لله ماأعطى وله مااخذ
وان لله وان اليه راجعون

Anonymous said...

ربنا يرحمهم يا رب كلهم و يجعل قبورهم روضة من رياض الجنة و يصبر أهلهم يا رب
انا مش عارفة اقول ايه بجد
بس كل كلمة انت قولتها انا حاسة بيها جدا جدا لأني تقريبا بمر دلوقتي بظروف مشابهه
فقدت ناس كتير بحبهم و خايفة ناس تانية افقدهم بعدهم و خايفة جدا يوم ما انا نفسي اروح هناك عندهم

ربنا يسترها معانا يارب و يرحم جميع المسلمين الأحياء منهم و الأموات

(HALA)

ليس فقيرا من يحب said...

السلام عليكم

انا لله وانا اليه راجعون

بصراحه بعد ما قريت الحقيقه
انى مش لاقيه اى كلام اكتبه والحقيقه كمان انى حسه جدا بالنقطه بتاعت الصراع دى جداوعارفه قد ايه صعوبه
لما حد غالى عليك يتوفاه الله والصعوبه الاكبر بقه لما يبقى قدامك وتشوف بعينك
خروج روحه والوعود اللى الواحد بيوعدها لنفسه ولربنا ولازم اتغير
والتاثر الشديد وقتها ويمكن بعد شويه الواحد ينسى ويرجع لحياته الطبيعيه
عادى ويرجع لنفس غلطاته اللى كان بيعملها بس الحمد لله ربنا غفور رحيم
وبيؤجرنا كمان على مجاهده نفسنا
ربنا يرحمهم يارب ويرحم جميع موتى المسلمين
اللهم اغفر لهم وارحمهم
وعافهم واعف عنهم
واكرم نزلهم واوسع مدخلهم
اللهم ابدلهم دارا خيرا من دارهم
واهلا خيرا من اهلهم
وادخلهم الجنه بغير حساب ولا سابقه عذاب
اللهم ان كانو مسيئين فتجاوز عن سيئاتهم وان كانو محسنين فزد فى حسناتهم
اللهم عاملهم بما انت اهل له لا
بماهم اهل له

ربنا يصبرك ويصبر اهلهم يارب
ويهدينا جميعا ويحسن خاتمنا يارب

natural magic said...

البقاء لله محمود
ربنا يرحمهم ويدخلهم جناته امين
كلامك بسيط جدا ولكنه معبر جدا جدا جدا
جسمي قشعر من كلامك دا يا محمود
وابكاني بشده بالرغم ان بقالي فتره مش عارفه دموعي معنداني ليه
يا رب فعلا نعتبر من اللي بيحصل دا وبجد انا مش عارفه انا لو مكانك وفقدت ناس عزيزه عليا مرة واحده كدا هيبقي شعوري ايه
ربنا يقويك ويثبتك

كل واحد فينا عارف اخطائه فين.. مش محتاجين لكتب ولا لشيوخ
بس احنا بنخاف نواجه نفسنا
زي ما نكون بنعاند نفسنا
زي ما نكون بدون مانقصد بنعاند ربنا

الكلمه دي صح اوي اوي
وبجد احنا بنعاد نفسنا والشيطان متملك مننا جامد اوي
يارب يهدينا ونعتبر من اللي بيحصل دا

كلامي ليك انت بقي يا محمود
اهم حاجه انك تكون متماسك وثابت ودي صفات احنا عارفنها عنك مش عايزين موقف زي دا يضعفك بالعكس دا لازم يقويك احنا دخلين علي امتحنات ومستقبلك دلوقت انت اللي بتحدده
وزي ما صحبك فرحلك لما جبت مجموع كبير في الثانويه اكيد هيكون مبسوط اكتر لو استمريت علي النجاح دا
ربنا يوفقنا ويهدينا
نلقاك علي خير

د.ميريهان said...

البقاء لله يادكتور محمود...عظم الله اجركم ورحم امواتكم وغفر لنا ولكم....
ربنا يثبتكم يارب ويلهمكم الصبر على البلاء...
مع صعوبة احساسك انا مش عارفة احكيلك ايه...بس افتكر ربنا وعد اللي يفقد حبيب ويصبر على فقده انه يكون في الجنة مع الرسول...
ربنا يغفر لهم...ويارب يكون صبرك وصبرنا كلنا انك تجتمع بيهم في الجنة انشاءالله...يارب يحسن خواتمنا كلنا...ويجمعنا على خير في الفردوس...
من ناحية النسيان..ده شئ طبيعي..ولولا النسيان ماكان الانسان..بس اللي المفروض مننساهوش انه كان ممكن نكون مكانهم..وساعتها ياترى كنا هنقول ايه للملكين وهنعمل ايه في قبورنا...لازم نحاسب نفسنا قبل مايفوت الاوان...
ربنا يحميكم جميعا ويطول في اعماركم بالصحة والعمل الصالح ويصبركم جميعا ويصبرنا معاكم

Anonymous said...

أبكيتني..أبكيتني بشدة
احنا حبيناهم من كلام حضرتك عنهم
ربنا يرحمهم كلهم
بس ماينفعشي تنسحب انت من حياتنا كده يا دكتور محمود
حضرتك رمز لحاجات حلوة اوي في حياتنا
حتى لو انت أكبر ممثل زي ما بتقول
احنا عايزينك كده
المهم ان الخير اللي ربنا سخرك فيه يكمل
لازم تكون أقوي لإنك الوحيد اللي بيقدر يجمعنا على حاجة صح
انا عمري ماشفت دفعتنا مجمعة على الخير غير هنا
عمر ماشفت زمايلنا من أسرة الرأي ايد واحدة مع زمايلنا في الاتحاد في الخير غير معاك
ماينفعشي تنسحب وتضعف كده
دي الدفعات التانية بتحسدنا على وجودك معانا
ربنا يثبت قلبك وقلب أصحابك وقلب أهاليهم
وان شاء الله ربنا هيغرلهم عشان كل الناس اللي بتحبهم دي
ولو ربنا ماكنشي عايز يغفرلهم كان موت كل واحد في بيته
وما كانوش ماتوا غرقانين عشان ربنا يكتبهم شهدا عنده
ربنا يرحمهم

alguien soy yo said...

ربنا يرحمهم ويعفو ويغفر لهم

وماقدروا الله حق قدره
وبدا لهم من الله ما لم يكونوا يحتسبون

فى الفتره الاخيره بسمع الموت كتير قوى شباب صغير واطفال وناس كبيره اللى مات عادى واللى كان تعبان واللى حصله حادثه
وانا عارفا واثقه ان ربنا بيبعتلى رساله فى كل ده
يعنى اصحى ممكن تموتى فى لحظه وهيسألنى عملتى ايه بقى فى عمرك اللى اديتهولك
انا مش عارفا هاقول ايه بس هاطلب منه انه يسامحنى ويرحمنى
بجد شكرا ليك يعنى كتير بنحتاج حد يفوقنا من اللى احنا فيه

وشكرا ليك على انك خلتنى افكر فى ناس معايا انا مأثره فى حقهم وممكن فى لحظه مش القيهم قدامى

اخر حاجه ان ممكن يكون ربنا مسهلنا حاجات كتير فى حياتنا غير نا مش لقيها وبيقولنا اشتغلوا بقى
بس احنا بنكسل وبنأجل ونقول بكره بس ممكن مايبقاش فى بكره

ربنا يرحمهم ويرحمنا

امة الله said...

السلام عليكم وعلينا ورحمة الله ويركاته واطلب من الجميع ان يشعرها جيدا البقاء لله وحقا ان القلب ليحزن وايضا يبكى صدقنى مش هتنسى لان عناك ناس وموافق لاننساها وان مر عليها الاف السنين نفتكرها فى فرحنا وفى حزننا بيذكرونا بحاجات كتيير تخلينا نبكى واحنا بنضحك بنساعد واحنا محتاجين بنجامل واحنا مجروحين واحسن من ده كله نسامح لاننا عارفين ان كله فانى واحنا فانين بس اهم حاجه ماتنساش احنا لسه عايشين فى حق لناس كتير علينا وفى حق لنفستا على نفسنا وفى رساله لازم ناديها علشان لما يجى ميعادنا يفتكرونا زى ما انت بتتفتكرهم وباذن الله مش اخر بوست ولاحاجه والبقاء لله

عندما تنهمر الدموع said...

السلام عليكم ورحمة الله وبركاته
البقاء لله ياد/محمود وربنا يجعلها اخر الاحزان ان شاء الله يمكن كل ماحد بنحبه اوي ومرتبطين بيه اوي بيحصله كده ده بيبقى انذار لينا من ربناانه احنا مهما طال العمر بينا او قصر فاحنا مسيرنا هنرجعله وانه لازم ناخد بالنا من كل حاجة بنعملها عشان هتبقى يا معانا ياضدنا يافي ميزان حسناتنا يافي ميزان سيئاتنا
عايزة اقولك انه مش بس انت اللي خايف من لقاء ربنا خايف من اليوم اللي مفيش حد هينفعنا فيه غير رحمة ربنا واعمالنا ده كلنا خايفين لأننا عارفين ان احنا مهما عملنا مقصرين في حق اللي خلقنا واننا بكل اللي بنعمله صفر على الشمال بالنسبة لكل الصحابة الكرام بس احنا بنرجو من ربنا انه يرحمنا من الصراع اللي احنا عايشينه يمكن زمان الدنيا كانت ابسط من كده لكن كانت احسن بكتير من دلوقتي والمطلوب مننا اننانحاول بكل طاقتنا على الاقل منفضلش قاعدين عاجزين مش قادرين نتغلب على ذنوبنا لازم نحاول واكيد في يوم هنقدر المهم النية الخالصة لوجه الله تعالى والدعاء
وفي النهاية ندعو الله ان يغفر لجميع موتى المسلمين ويتوب عليهم ويرحمهم ويدخلهم فسيح جناته ويتقبل منهم احسن ما عملوا ويرزق اهلهم الصبر والسلوان ويارب يساعدنا على خوض الامتحان الصعب الذي وضعنا فيه ويرحمنا ويقوينا ويعيننا على ذكره وشكره وحسن عبادته

وردة said...

اقسم باللهخ العظيم مش لاقية كلام اقولهولك
من فترة بدخل اشوف موضوعاتك واخرج من غير ما اعلق علي شئ
كل مرة اوعد نفسي بالتغي ومش بوفي بالوعد
يمكن انا اكبر منكم شوية
بس بستصغر نفسي اووووي قصاد الناس اللي فعلا ربنا اخترغهم
فعلا ربنا اخترهم علشان يكونو في الجنة ان شاء الله
ربنا يرحمهم ويلحقهم بالصالحين
يارب
ربنا يرحمهم
ربنا يتغمدهم بمغفرته
سلام

Anonymous said...

إنا لله وإنا إليه راجعون
ربنا يصبرك ويصبر اهلهم
وربنا يحسن خاتمتنا جميعا

Anonymous said...

كيف تحفظ صيامك وانت على النت


قد لا يتخيل بعض الصائمين أن صيامهم فى هذا الشهر المباركك قد يتأثر

بجلوس أمام الانترنت فى صباح رمضان .. خاصة من يقضون الكثير من اوقاتهم

فى الدعوة لله و لإعلاء كلمة الحق ... و لكن للأسف هذه هى الحقيقه ... و كيف ذلك ؟

يكون ذلك للأسف عن طريق المواقع الاجنبية الشهيرة التى ندخل عليها يومياااا نظرا

لإحتياجنا الشديد لخدماتها مثل موقع الياهوو و الهوتميل مثلا . و مشكلة هذة المواقع

هى الصور و الاعلانات الاباحية المنتشرة بها و التى تقع عليها العين اضطرارا

فتألفها بعد حين ... و رغبة منا فى الحفاظ على صيامنا - نسأل الله أن يتقبل منا - فإن هناك

طريقه لحجب الصور - جميع الصور - من صفحات الانترنت على الجميع اتباعها عسى

أن يتقبل الله منا صيامنا ... و الطريقه كالتالى

اضغط على

Tools

فى أعلى شريط الأدوات
ثم اختر

Internet Options

ثم اختر

Advanced

ومن قائمة

Multimedia

قم يإلغاء الإختيار

Show Pictures

ثم اضغط

OK

نسأل الله أن يتقبل منا صيامنا و يحفظ علينا ثوابة بدون نقصان

برجاااااااااااااااااااااء انشرها لتثاب بأجر كل من عمل بها