الله أكبر...في رمضان

Friday, August 21, 2009


السلام عليكم ورحمة الله
رمضان بدأ
كل سنة و انتم كلكوا طيبين
قبل أي وكل حاجة النهاردة اول ليلة من رمضان
ربنا بينظر لينا الليلادي وبيباهي بينا الملايكة
حاسين دي؟؟؟؟؟
مااعرفشي ليه عز عليا أوي إن رمضان يبدأ من غير ما أكتب فيه حاجة
رغم اني عارف ان معظم الناس اللي متابعة المدونة مشغولين جدا
انا هكتب موضوعين يعني فيه كمان موضوع تحت ده ان شاء الله
اللي خلاني آجي واكتب اني حاسس اننا – اللي في سنة سادتة واللي مأجلين
الدفعات التانية يعني- مضغوطين أوي
كلنا عايزين نعمل حاجات كتيرة أوي في رمضان
بس ظروف الامتحانات والدراسة غصب عننا واخدانا وخصوصا اننا المفروض
نلم السنة كلها في الشهر ده
وحاولت أفكر ازاي احنا وحتى الناس اللي مش معانا
نقدر نستفيد من خير وثواب رمضان واحنا ماشيين في دراستنا عادي
كنت سمعت كلمة قريب من شيخ عجبتني أوي
بيقول فيها ان النيات تحارة العلماء
يعني فيه ناس كتير بتعمل نفس الحاجة بس مش كلهم بيؤجروا عليها
لان فيه ناس بتعمل الصح بس من غير نية صح
عشان كده عايزين نعمل كل حاجة في رمضان بنية صح
يعني هنذاكر وهنروح الكلية بنية اننا ننفع المسلمين ونكون دكاترة كويسين
وعشان نجيب درجة كويسة تودينا لمكان كويس نقدر نخدم منه الناس
حتى الأكل والنوم هنعملهم بنية انها حاجة بتساعدنا على العبادة وعلى المذاكرة
و لو كان الوقت مش سامحلنا نعمل حاجات كتيرة كويسة
فاحنا نقدر من غير ما نضيع وقت نسيب حاجات كتيرة مش كويسة كنا بنعملها
لإن من وجهة نظري اننا لما نسيب حاجة بتغضب ربنا عشان ربنا
بيبقى ثوابها كبير اوي عنده ان شاء الله وخصوصا لما نبقى متعلقين بالحاجة دي
هقوللكم تجربة مريت بيها بس مش عايز الناس تتصدم فيا
انا أكتر حد فيكم كلكم كان بيسمع أغاني وده مش جهر بالمعصية والله
بس انا من تانية اعدادي مش بذاكر ولا بنام غير والردايو مفتوح جنبي
بكل الحلو والوحش اللي فيه لدرجة ان كل الأغاني القديمة
كنت أعرف مين اللي لحنها و ألفها وتغنت امتى وقصتها ايه
الحمد لله ماكنتش بتفرج على اي كليبات بس كنت مدمن أغاني
ومابين فترات ببطل فيها وفترات برجع أسمعها تاني
و انا زي ما بيتهيالي معظمنا كده عارف من جوايا ان الأغاني حرام
و حتى لما سئلت لاقيت ان الموضوع مافيهوش خلاف أصلا
ولاقيت كل العلماء تقريبا ً ما أجازوش الموضوع حتى النسبة القليلة اوي
اللي أجازت الموضوع مااجازوهوش بالشكل اللي هو موجود دلوقتي ده
وكلنا عارفين كده بس كلنا وانا اولكم بنكابر
انا عارف ان كلامي دلوقتي بقى تقيل على قلب ناس منكم والبوست بقى رخم
بس انا عن تجربة بعد ما بطلت أسمع
حسيت ان بجد مافيش حاجة اكبر من رضا ربنا وحسيت
ان ديننا ده كله وعقيدتنا بتتلخص في كلمتين اتنين...الله أكبر
ربنا أكبر من اي ومن كل حاجة
وده اللي خوفني وزعلني اوي من نفسي اني حسيت بتفاهة نفسي
وانا قاعد بسمع كلام انا عارف انه بيغضب ربنا ويوم بعد يوم بتلعق بيه زيادة
وبحب اللي بيعملوه ولولا تثبيت ربنا يمكن كنت بقيت واحد من اللي بيصنعوه
عمري ما هنسي لما كنا في اسبوع شباب الجامعات في المنصورة
وجت حفلة تامر حسني ومارحناش انا واصحابي الحمد لله بس واحنا
رايحين نتعشي لاقينا زحمة ووش وعربيات اسعاف وخدنا الفضول
اننا نشوف ايه اللي بيحصل ورحنا خمس دقايق شفت فيهم كتير أوي
بس اللي مش هنساه اني شفت بنت كانت عايزة تطلع على المسرح بتاعه
والبودي جارد بتاعه كل ما تيجي تطلع يدوس على راسها برجله
وهي عمالة تعافر وبتحاول تحوش رجله عشان تطله
ليه؟؟؟؟؟؟؟؟
ساعتها افتكرت حديث النبي صلي الله عليه وسلم يحشر المرء مع من يحب
واحنا للأسف قلوبنا اتعلقت بالناس دي مع اننا عارفين اننا ما اتخقلناش لكده
احنا قلوبنا اتعلقت بالحاجت دي لاننا علقنا قلوبنا بيها
يعني زي ما احنا بنعودها هي ببتعود
فيه راجل احيانا بيركب معانا في مواصلة السنطة طنطا ومن ساعة مايركب لحد ما ينزل
تلاقيه بيدندن بالقرآن وصوته جميل أوي ربنا يبارك فيه هو عود قلبه على القرآن
فبقى حتى لما ييجي يدندن بيدندن بالقرآن وحتى احنا لما بنركب معاه
بنرمي ودانا عشان نسمعه ونسمع القرآن بصوته
آخر موقف هحكيه عشان انا طولت عليكم بس الموقف ده علمني كتير
وإداني كمية ثبات جامدة جدا في الكلام اللي فوق ده
امبارح رحت الساعة اتنين كده أصلي الضهر في المسجد اللي برة الكلية
اللي قصاد مكتبات الشرقاوي الناحية التانية
ولاقيت راجل كبير اوي في السن ماسك مصحف صغير أوي وبيقرأ فيه
بس بيقرأ بمشقة شديدة ومقرب المصحف لعينه اوي فقلت يمكن مايعرفشي
ان المسجد فيه مصاحف كبيرة وخدتله مصحف كبير.. الراجل طبطب على
وقاللي يا ابني انا مابقراش غير في المصحف ده من تلاتين سنة
ومش هرضي أغيره أبدا لإنه بقى أعز صاحب لي
وحاسس ان المصحف ده بالذات هو اللي هيشفعلي يوم القيامة
بجد علمني كتير أوي وخلاني أخجل من نفسي وخلى الشعور اللي جوايا
ناحية المصحف اللي بشيله يتغير ده مش بس مصحفي ده صاحبي
لو عودنا قلبنا على كلام ربنا هيتعود عليه
زي ما احنا عودناه يسمع أغاني فاتعود عليها وخلى اننا نبطل نسمعها
بقى شئ صعب علينا وشئ كلنا بنكابر فيه مع اننا عارفين انه غلط
حتى لو مش حرام كفاية نسيبها لإنها شبهة والمسلم لازم يتقي الشبهات
انا بتكلم الكلام ده و هو أصعب عليا من أي حد فيكو
بس زي مابنسمع في كل وقت وفي كل أدان....الله أكبر
خلونا نبطل بس التلاتين يوم دول...نجرب...يمكن نحس فعلاً
اننا لما نبقى مع ربنا بقلوبنا مش هيبقى ناقصنا حاجة
معلهشي انا طولت في النقطة دي اوي بس زي ما قلتلكوا قبل كده
ان ربنا كتبلي اني أشوف النبي صلي الله عليه وسلم أكتر من مرة
وكانت كلها في فترات كنت مبطل فيها أسمع الاغاني دي
تخيلوا لو حاجة زي كده ممكن تكون مانعة عننا خير أد ايه
وتخيلوا واحنا محتارين هي حلال ولا حرام وطلعت في الآخر حرام
متخيلين العداد هيبقى عد علينا أد ايه
مش بس الأغاني ... السجاير كمان
اعرف نسبة قليلة أوي من اللي متابعين المدونة بيدخنوا
وعارف انهم لو عايزين يبطلوها هيبطلوها...بس ده لو كانوا عايزين ده
بس لو ماقدروش وما حلموش يبطلوها في رمضان هيبطولها امتى
هما كمان محتاجين يحسوا بنفس الكلمة ......... الله أكبر
احنا كمان نقدر نعمل حاجة مش هتكلفنا أي حاجة
احنا نقدر نخلي رمضان هو أطول فترة صمت في حياتنا
يعني هنسكت على اد مانقدر
مش هنتكلم كتير بنية اننا مش عايزين نقول أي كلمة تغضب ربنا
مش هنجيب سيرة حد بـحاجة هو بيكرهها حتى لو بنقدر نقولهاله في وشه
حتى المتعة اللي بنلاقيها في الكلام ده محتاجين برضو نحس فيها ان الله أكبر
وحتى لو الوقت مش سامحلنا اننا نعمل حاجت كتير في رمضان
كفاية لو قدرنا في الصمت ده وفي الوقت اللي بيعدي مابين الحاجات اللي بنعملها
واحنا في الكلية واحنا في الطريق واحنا في البيت
نملى الوقت ده مله بالباقيات الصالحات
سبحان الله والحمد لله ولا إله إلا الله والله اكبر ولاحول ولاقوة إلا بالله
مش هتكلفنا وقت ولا مجهود بس ثوابها كبير اوي عند ربنا
أنا نفسي أقول كلام كتير أوي بس انا طولت عليكوا أوي
في النهاية كلنا لازم ندخل رمضان واحنا حاسين انه آخر رمضان في حياتنا
لو ما اتعلمناش كده من كل الظروف اللي فاتت يبقى مش هنتعلم ابداً
وفي آخر رمضان في حياتنا ماينفعشي ربنا يبصلنا يلاقينا في حتة
هو مش عايز يشوفنا فيها
ماينفعشي يبصلنا يلاقينا بنسمع أو بنشوف حاجة بتغضبه
مش عايزين نضيع ثانية واحدة في رمضان في اي حاجة غير رمضان
رمضان اللي ربنا اداهولنا هدية عشان يغفرلنا فيه
ينفع نرد هدية ربنا عشان أي حاجة
أول حاجة لازم نعملها بسرعة
كل واحد يطلع قايمة الأسماء في محموله ويجيبها من الأول للآخر
يشوف مين اللي هو مقصر في حقه أو مزعله ويعتذرله
أو حد هو زعلان منه ويسامحه
خلنا ندخل رمضان واحنا مش مزعلين ولا مزعلين حد
يمكن ربنا يسامحنا وبعفر لينا تقصيرنا عشان النقطة دي
انا كده طولت أوي
كل سنة وانتو كلكم طيبين
فيه بس هيبقى مشروع صغير كده على المدونة طول رمضان
اتمنى كلكم تشاركوني فيه هنا ان شاء الله
ربنا يتقبل منا جميعا ان شاء الله
كل سنة وكلكم بخير

6 comments:

nora said...

السلام عليكم
جزاك الله خيرا يادكتر وربنا يجعله فى ميزان حسناتك
وكل سنه وانت طيب وبخير ورمضان كريم عليك وعلى المسلمين جميعا

د.ميريهان said...

جزاك الله خير يادكتور
ربنا ييتقبل منا كلنا صيام رمضان وقيامه...
وبجد اهم شئ النقطة اللي حكيت عن السكوت والصمت...سبحان الله الصيام بيبقى كانه جنة عن الحاجات دي
بس طبعا النية بتكبر العمل...
ربنا يوفقكم يارب...ويتقبل منكم...ويجعل مذاكرتكم في ميزان حسناتكم..
وكل عام واانت بخير...رمضان كريم علينا جميعا

natural magic said...

الله اكبر
جزاك الله عنا خير محمود
ربنا يهدينا ويقوينا ويثبتنا

أحمد سعيد بسيوني said...

بسم الله

كل عام وأنتم بخير

أسأل الله العظيم أن يبارك لكم في هذا الشهر الكريم ويرزقكم القول والعمل الصالح

اللهم سلمنا إلى رمضان وسلم رمضان لنا وتسلمه منا متقبلا

دمتم في طاعة

zeinb said...

السلام عليكم ورحمة الله وبركاته كل عام وحضراتكم بخير ولامة الاسلامية بامن وسلام وتقدم دكتور محمود جزاك الله خيرا على المدونة كلها وعن هذه الخاطرة المعبرة. يمكن لان حضراتكم فى سنة سادسة فظروف رمضان صعبة قليلا عليكم اما بالنسبة لباقى الطلبة فرمضان هذا العام افضل بكثير فى الاجازة والحمد لله نقدر نعمل فيه حاجات كثير وفقنا الله واياكم اسفة على الاطالة زينب

منــار فايد said...

محمود كل سنه وانت طيب يامحمود
ويارب يبارك فيك
وان شاء الله نحاول فعلا نطلع من رمضان السنه دي غير كل سنه
قول معايا يارب يبعد الشيطان عننا
ويخلي همنا الوحيد في الصلاه والعباده في رمضان ويبعد عننا اي ملهيات
وبالنسبه ليكم اقصد سنه سادته فبجد انتم محتاجين تنظيم وقت لانكم مطلوب منكم م\اكره امتحانات ورمضان فربنا يقدركم
ان شاء الله

ربنا يقدرنا جميعا يارب
ويارب يعيد رمضان عليناويتقبل منا