انا حسيت بالآية دي النهاردة

Tuesday, August 25, 2009

السلام عليكم ورحمة الله
مشروع صغير أوي ممكن نعمله سوا على المدونة
من غير ما يكلفنا وقت ولا مجهود ان شاء الله
احنا كلنا الحمد لله بنقرأ وبنختم القرآن في رمضان
والقرآن لإنه كلام ربنا مهما قرينا فيه دايماً فيه جديد
انا بتمني اننا نقدر مش بس نقرأ...احنا كمان هنقرأ بتدبر
زي ما ناس كتيرة مننا بتعمل بفضل الله
المشروع اللي هنعمله هنا ان شاء الله
كل واحد هيمشي في الختمة اللي هو فيها
سواء جزء او جزئين او زي ما ربنا ييسرله
بس يختار لينا أكتر آيه حس بيها في اللي هو قراه النهاردة
آية حس انه بيقرأها لأول مرة
أية ممكن إدته أمل أو خوفته أو حس بيها بطريقة مختلفة
أو يمكن سمع تفسيرها أو قراه وحابب يقولهولنا
او عرف قصة نزولها و حس انه هيفيدنا وهيوضح لينا الآية
او لقى خاطرة جت في دماغه بخصوص الآية دي
ممكن يكتب الآية واللي هو حس بيه وممكن حتى يكتبها بس
ويسيبنا احنا نحاول نحسها زي ما هو حسها
دي دعوة للتدبر اتمنى صدي عند الناس
وأتمنى ماحدش يتردد يشارك فيها واتمنى كل حد يكتب
وهو واثق انه بفصل الله فيه ناس كتيرة بتقرأ اللي هو بيكتبه
وممكن كلمة تغير حاجة جوة حد او تلفت نظر حد لحاجة ماكنشي واخد باله منها
الحمد لله وبفضل الله أولا و أخيراانا أعرف شخضيا أكتر من 200حد
المدونة باستمرارغير الناس اللي انا ماأعرفهاش
صحيح ان معظمهم اختاروا يكونوا من الحزب الصامت وأنا بحترم ده وقدره
بالمناسبة انا عمري ما بزعل لما اكتب قصيدة او قصة مثلا
و أطلب رأيكم فيه وتيجي الردود قليلة شوية
بس بزعل بجد لما يبقى فيه حاجة زي كده
ناس محروجة تشترك او خايفين من الرياء
لإن بحب أحس اننا لسة قادرين نجتمع على الخير
الإجتماع على الخير نفسه نية كبيرة اوي
بناخد عليها ثواب كبير اوي يمكن زيها زي الخير نفسه
وتكثير سواد المسلمين في أي حاجة صح بيعملوها
برضو نية كبيرة أوي بس احنا مش بناخد بالنا منها
اتمنى كل الناس يقدروا يشاركوا معانا كل يوم أو مع كل آية يحسوها
ولو حتى مرة واحدة بس
حتى يمكن احسن يكون من غير الأسامي للي يحب كده عشان
شبهة الرياء تبعد عن أي حد
في الحق قل لا تخش َ شيئا ً...فعلي يديك الآن قد يأتي الهدى
سبأ ٌ هـــــــداها هدهد ٌ لإلهها...أفلا تســـاوي عند ربك هدهدا ؟؟
وهيبقى فيه مسابقة صغيرة كده لإختيار اجمل تأمل او اجمل احساس اتقال في آية
هيكون لجنتها من الشيوخ اللي بتصلي بينا في المساجد ان شاء الله
إبدأ دلوقتي بأكتر آية علقت معاك في الكام يوم اللي فاتوا
ماتحرمشي نفسك ولا تحرمنا من الأجر
...................................................
كل سنة وانتو طيبين مرة تانية
اتمنى ربنا لما ينظر لينا في الايام دي
يلاقينا اتغيرنا أو على الأقل بنحاول نتغير
اتمنى على مدار أكتر من عشرين يوم ان شاء الله نقدر نعمل ده
ويمكن ربنا يكرمني و اقدر بعدها أكتب هيدة ليلة القدر لو ربنا يسر ان شاء اله
ربنا يوفقنا كلنا لما يحبه ويرضاه

41 comments:

Anonymous said...

جميل اوي الموضوع يا محمود
انا اتصادفت وانا بقرأ في سورة البقرة
في الجزء اللي سيدنا ابراهيم بيكلم فيه ربنا
اللي كلنا عارفينها ولكن ليطمئن قلبي
والشيخ الشعراوي فسرها حلو اوي
قال ان سيدنا ابراهيم سئل ربنا
ربني أرني كيف تحيي الموت

يعني السؤال عن كيفية العملية مش عن العملية نفسها وإلا كان قال

ربي أرني هل تحيي الموت

يعني المشكلة مش مشكلة تصديق زي ما ناس كتير ممكن تفتكر
هو بس حب يشوف الموضوع يتعمل ازاي
حتى انا كمان و أنا بقرأ
لاقيت سبدنا ابراهيم قال ليطمئن قلبي
مش ليصدق قلبي
يعني ممكن اصدق الحاجة بس الطمأنينة شعور تاني
يعني مثلا تلاقي الام بتكلم ابنها وهو متغرب
وتقوله انا كلمتك بس مش هطمن عليك غير لما اشوفك
يارب يكون أول تعليق كان فيه المعنى اللي تقصده يا محمود

مستني ردود باقي الناس
وهشترك تاني ان شاء الله

Anonymous said...

بسم الله

بردو في سورة "البقرة"

في الآية "فيه هـــــدى للمتقين"


الشيخ الشعراوى بيقول :

لو فرضنا انك هتروح مشوار من هنا لاسكندرية بس انت متعرفشي الطريق وقدامك كذا طريق

وسألت رجل المرور أروح ازاى؟
فقالك امشي في الاتجاه دا
وأكيد أى حد هيسأله هينصحه مش هيفرق

طيب تخيل لو شكرته جدا انه هداك للطريق وحمدت الله امامه على كده..فهيكون موقف الراجل دا ايه

اكيد هيقولك على فكرةخد بالك بعد 10 كيلو فيه مطب او مشكلة ما

.........

يا ترى فهمنا ايه؟

ربنا سبحانه وتعالى بيهدينا جميعا للصراط المستقيم..كل واحد بقي هيقابل الهدى دا ازاى؟

اللى هيشكر ...اكيد ربنا هيزيده هدى على هداه والهدى الزيادة دى هى المتمثلة في ان ربنا بيعين العبد على طاعته

...........

Anonymous said...

بسم الله

((2))

في ســـورة "اللـــــــــــيل"


في الآيات "والليل اذا يغشى * والنهار إذا تجلى * وما خلق الذكر والأنثي *إن سعيكم لشتى"

سمعت دكتور نفسي بيتكلم عن هل الرجل أفضل من المرأة أم العكس؟

فقال انه في الآيات دى ربنا سبحانه وتعالى ذكر الليل والنهار وبعد كده ذكر الذكر والأنثي

وقال ان ذكر الذكر والانثي بعد الليل والنهار بيوضح فايدة الانثي للذكر كمثل فايدة الليل للنهار كل واحد بيكمل الثانى ومفيش أفضلية
والأفضلية بتيجى في الآية اللى بعدها

"إن سعيكم لشتى"

يعنى الأفضلية بالسعي

...........

Anonymous said...

انا كان لي تأمل صغير في آية للأسف فيها لبس عند ناس كتير
الآية قرئتها في سورة البقرة امبارح أو أول
بسم الله الرحمن الرحيم
ليس عليك هداهم ولكن الله يهدي من يشاء
صدق الله العظيم
لإن فيه ناس كتير لما نكلمهم عن الأمر بالمعروف والنهي عن المنكر
بيذكروا الآية دي ويقولولها
هما مش فاهمين الآية
ربنا بيقول
ليس عليك هداهم
مش ليس عليك دعوتهم
يعني احنا علينا ندعي بس الهدي من عند ربنا
يعني كده الدعوة مش ساقطة عننا بالعكس ربنا بس بيفهمنا ان الي علينا هو الدعوة وبس
انما الهداية من عند ربنا
يارب أكون أضفت حاجة

Anonymous said...

لما حضرتك كتبت البوست اللي كان عن أصحابك الي توفوا
انا قريته وخفت أوي
وخصوصا من الجزء اللي جمعت فيه أيات كتيرة تخوف بطريقة تخوف
ولما بدأت ختمة رمضان
كنت غصب عني بطريقى غريبة ببحص عن آيات تديني شوية أمل
لحد لما لاقيت الآية دي
في سورة البقرة
وما تقدموا لأنفسكم من خير ٍ تجدوه عند الله
ربنا مش هيضيعنا أبدا
واطمنت أوي أوي لما قريت الآية دي
وما كان الله ليضيع إيمانكم
مافيش رحمة اكتر من كده

ربنا يجازيك كل خير يا دكتر

Anonymous said...

السلام عليكم و ل سنه و كلكم يارب جميعا طيبين
انا فعلا الفكره دي كانت ف دماغي و كان نفسي فعلا اننا نعمل زي مشاركه كده عشان نفهم القران صح
ع العموم انا كنت سمعت الشيخ محمد خدايه كان بيكلم غن الايه القرانيه ( و اما بنعمة ربك فحدث) انا ع الاقل كنت مفكره ان معناها زي الفلوس و الاشياء الماديه لكن لقيت الشيخ فيقول لا لو كان القران يقصد كده كان قال الانعام لان او النعمه بفتح النون مش كسرها لان فيه صوره كامله تتحدث عن الانعام
اما النعمه هنا هي الدين ... ايوه الدين ... يعني مهمتنا اننا ننشر دين ربنا ولو حتى بالحديث مع بعضنا زي ما احنا بنعمل دلوقتي
يارب ما اكونش طولت عليكم
و بالله عليكم خلينا نكمل ف الموضوع ده و جزاكم الله كل الخير

ايمي

عندما تنهمر الدموع said...

السلام عليكم ورحمة الله وبركاته
ازيك ياد/محمود يارب تكون بخير وكل سنة وحضرتك طيب مرة تانية انا كنت عايزة اقول ان ربنا يجازيك كل خير على اللي بتعمله وعلى اللي بتنصحنا بيه وخصوصا البوست ده لأن الانسان مش المفروض انه يقرا القرىن بس عشان يختمه كام مرة لكن لازم يتدبر اياته ويعمل بيها ويدعو الى العمل بها
طبعا هو صعب جدا انه يكون في اية واحدة لكن اللي اقدر اقوله ان في ايتين دايما معايا وبتذكرهم في كل موقف قوله تعالى(وعسى ان تكرهوا شيئا وهو خير لكم وعسى ان تحبوا شيئا وهو شر لكم)
وايضا قوله تعالى(ان الله مع الصابرين اذا صبروا)بجد الايتين دول بيهونوا عليا حاجات كتير اوي ومواقف اكتر
كمان انا بحب اوي سورة يوسف لأنها بتبين انه مهما اشتدت المصائب وطالما الانسان مؤمن فالله سبحانه وتعالى سينصره ولن يخذله وسيجزيه خير
وايضا قصة سيدنا موسى مع الخضير في سورة الكهف لأنه منها بتعلم ان مفيش انسان يعرف كل حاجة وانه مهما بلغ من العلم ففيه اللي اعلم منه وان ربنا علمه واسع وشامل كل شئ وانه مهما بلغ علم الانسان فانه مش هيكون ذرة في علم الله تعالى
وكمان الاية الكريمة(انا عرضنا الامانة على السماوات والارض والجبال فأبين ان يحملنها واشفقن منها وحملها الانسان انه كان ظلوما جهولا)اد ايه بخاف من الاية دي لأني بحس ان علينا مسئولية فعلا كبيرة وممكن تكون اكبر من طاقتنا ولولا مساعدة ربنا لينا عمرنا ماكنا هنقدر نشيلها الامانة دي هي اننا نعمر الارض وننشر رسالة الاسلام في كل مكان ونؤمر الناس بعبادة الخالق وانه واحد احد ونعلمهم تعاليم الدين ونتحمل كل المصاعب والمشاق في سبيل تحقيق هدفنا ونحاول نحافظ على دينا وارضنا من اي انسان يحاول ان يطفئ نور الله او يحاول انه يهد اللي بنحاول نبنيهواخر جزء في الاية (انه كان ظلوما جهولا) فعلا هو اصعب جزء ربنا بيبين لنا انه اد ايه الانسان ظلم نفسه لما وافق على حمل الامانة وبالتالي هيكون ليه جزاء لحملها سواء بالعقاب او الثواب فربنا يقوينا ويساعدنا ويقدرنا على حملها يارب

tear..smile said...

التوبيااااااااااااااك دة بجد رااااااااااااائع جدااااااااااااا
جزااااك الله خيرا ااااااااااااا عليه وجعله فى ميزان حسناتاااااك

بجد الاية دى انا بحسها اووووووووووى

يوم يفر المرء من أخيه.وامه وابيه.وصحبته وبنيه.لكل امرئ منهم يومئذ شأن يغنيه

Anonymous said...

بالأمس سمعت أحد مشائخنا يتحدث عن قصة أصحاب الأخدود...(قتل أصحاب الأخدود..النار ذات الوقود..إذ هم عليها قعود..وهم على مايفعلون بالمؤمنين شهود..ومانقموا منهم الا ان يؤمنوا بالله العزيز الحميد)..أنظروا الى اي حد ضحوا بأنفسهم في سبيل الله..ونحن الى أي حد وصلت تضحياتنا..في الدعوة حتى..الأامر بالمعروف والنهي عن المنكر..ماذا فعلنا في هذا حتى..

هذه آية استشعرتها بحق رغم مروري
عليها كثيرا قبل ذلك..

دكتور محمود..جزاك الله عنا كل خير..وأدام الله نصحك وجمعتك على الخير والطاعة..وجمعنا جميعا في جنة الفردوس بعد ان يجعلنا ربنا ن عتقاءه من النار..آمين يارب

امة الله said...

السلام عليكم ورحمة الله . فى الحقيقه مادخلتش من زمان لكن لفت نظرى الموضوع لان الفكره كانت ف دماغى من زمان .جزاكم الله خيرا وربنا ينفعنا بيهم يارب. من الايات اللى حسيت بيها قوى قوله تعالى -ويجعل من يشاء عقيما-سبحان الله ان قال -يجعل-و ليس يخلق فليست كل اسباب العقم congenital ولكن منها acquiredوسبحان الله ان يقول قبلها يهب لمن يشاء اناثا و يهب لمن يشاء الذكور علشان يديهم امل لعلاج العقم بينما سبحان الله سيدنا ذكريا لما جه يدعى قال -وكانت امراتى عاقرا -ليبين مدى الاعجاز ان يرزقه الله يحيى وسبحان الله بعد كل الفتره دى نكتشف ان هناك فرق بين عاقر وعقيم

امة الله said...

ومن الايات بردو قوله -يسئلونك عن الاهله ..... ويسئلونك عن الخمر ...ويسئلونك عن الشهر الحرام ..وهكذا وفى كل الرد على هذا قل ويبلغ ماذا يقل الرسول صلى الله عليه وسلم الى الايه واذا سالك عبادى عنى فانى قريب ...وكاءن سبحان الله يوضح لنا انه ليس بيننا وبينه وسيط فهو قريب مجيب

امة الله said...

و كمان فى ايه ف سوره ص سبحان الله علشان كلنا نطمع ف كرم ربنا و مغفرته مش بس ان لو حد فينا عامل معصيع يقول يس ربنا يغفر لى لكن سبحان الوهاب يدعوه سيدنا سليمان ويعلمنا - قال رب اغفر لى وهب لى ملكا لا ينبغى لاحد من بعدى انك انت الوهاب -فلم يطلي من الكريم العفو فقط بل وطمع فى كرمه ان يهب له ملك وليس اى ملك بل ملكا لا ينبغى لاحد من بعده

امة الله said...

و كمان فى ايه ف سوره ص سبحان الله علشان كلنا نطمع ف كرم ربنا و مغفرته مش بس ان لو حد فينا عامل معصيع يقول يس ربنا يغفر لى لكن سبحان الوهاب يدعوه سيدنا سليمان ويعلمنا - قال رب اغفر لى وهب لى ملكا لا ينبغى لاحد من بعدى انك انت الوهاب -فلم يطلي من الكريم العفو فقط بل وطمع فى كرمه ان يهب له ملك وليس اى ملك بل ملكا لا ينبغى لاحد من بعده

ليس فقيرا من يحب said...

السلام عليكم

كل سنه وحضرتك طيب يا دكتور

وربنا يجازيك خير يارب على الفكرة

الجميله دى من اكتر الايات اللى بجد

بتاثر فيا وبتخلينى اشعر بسعاده

وراحه بال وطمأنينه غير عاديه


قول الله تعالى فى سورة البقرة
وإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ

بحس ان كل مشكله فى العالم ممكن تتحل

وكل حاجه باحلم بيها هتتحقق

وبحس ان ربنا قريب قوى منى وساعتها بحس

براحه بال غير عاديه

كل سنه وحضرتك طيب ربنا يكرمك

ويجازيك خير يارب

فى حفظ الله

------ said...

السلام عليكم

موضوع جميل اوى يامحمود

بجد اكتر سورة بتأثر فيا سورة الزلزلة

اذا زلزلت الارض زلزالها
واخرجت الارض اثقالها
وقال الانسان مالها
يومئذ تحدث اخبارها
بأن ربك اوحى لها
يوم يصدر الناس اشتاتا ليرو اعمالهم
فمن يعمل مثقال ذرة شر يره
ومن يعمل مثقال ذرة خير يره

يااااالله على هذه الايات

يارب اجعلنا ممن يأتون كتابهم بأيمانهم
اللهم ارحمنا ولا تعذبنا
اللهم اجعل القران ربيع قلوبنا

------ said...

تعرف وانا بقرأ النهاردة فى سورة يوسف
قريت ايه

ولما راودته التى هو فى بيتها عن نفسه وغلقت الابواب وقالت هيت لك قال معاذ الله انه احسن مثواى انه لابفلح الظالمون

يااااه بجد ايات جميلة
سرحت فيها واتحسرت على شباب اليومين دول
يارب اهديهم
تلاقيهم بيدوروا على المعصية من نت او تليفزيون او مكالمة او او وا
يارب اربط على قلوبنا من حب الشهوات

تعرف انى انا كل يوم افتح المصحف على اى صفحة واقرأ ايه واشوف ربنا بيقولى ايه النهاردة

فالنهاردة جتلى ايه الم ترا ان الله سخر لكم مافى السموات والارض والفلك التى تجرى فى البحر بأمره ويمسك السماء ان تقع على الارض الابإذنه ان الله بالناس لوؤوف رحيييم

يالله تخيل الايات فيها كلام جميل جدا
بتدعينا للتأمل فى خلق الله

بتورينا قد ايه ربنا عظيم

وانه بينا رؤوف رحيم مهما عملنا هو رحيم علينا

ياااااااارب ارحمنا وتقبلنا واغفر لنا تب عليا ان انت التواب الرحيم

Anonymous said...

السلام عليكم ورحمه الله وبركاته
فكره جميله يادكتور ربنا يجازيك كل خير يارب كل سنه وانت طيب ورمضان كريم
اكتر ايه بتخليني بجد ازعل من نفسي اووووووي لما بقراها وبحس ان بعيده اووووووووووووووووي عن ربنا وان ربنا زعلان مني هي (ألم يأن للذين ءامنو أن تخشع قلوبهم لذكر الله ومانزل من الحق)
بحس ان ربنابيحبنا اوووووي وبيعاتبنا بلين وبيقولنا انتو مش هتقربو بقي
ربنا يهدينا كلنا يارب ويقربنا منه

Anonymous said...

بسم الله الرحمن الرحيم
كان لي تأمل في الآية اللي في الكومنت اللي فات
ألم يان للذين آمنوا أن تخشع قلوبهم
لذكر الله وما نزل من الحق
صدق الله العظيم
من زمان والآية بتأثر فيا زي كل الناس
بس مش أوي يمكن عشان كنت بحس انها نازلة للناس البعيدة عن ربنا أوي
وكنت فاكر ان أنا مش كده
بس وانا بقرأها دلوقتي
اكتشفت فجأة ربنا بيقول يا أيها الذين آمنوا
يعني احنا
الي هما آمنوا وخلاص وآمنوا بجد بدليل ان ربنا قال انهم آمنوا
يعني احنا ممكن آمنا بس سة قلوبنا ماخشعتشي لربنا وكلام ربنا
ربنا مايجعلناش أبدا كده
ويجعلنا دايما من الخاشعين

birds_never_suicide said...

انا سمعت النهاردة آية لأول مرة آخد بالي منها
ويزيد الله الذين اهتدوا هدي
يعني احنا لما بنتهدي ونروح لربنا
ربنا بيزيدنا هدي من عنده
آية جميلة جدا
وموضوع جميل جدا
استمتعت بكل المشاركات اللي فيه

Al Bassam said...

السلام عليكم جميعا ورحمة الله وبركاته

والله وحشتونى كلكم ، ومعلش جايه متأخرة .. كل عام وأنتم بخير، كل عام وأنتم إلى الله أقرب ، وعلى طاعته أدوم وإلى رضاه أسبق ، وفى جنته ورحمته أطمع

يارب تكون بخير ياحوده وجميع الأهل وجميع زوار المدونه الجميله ، وبقول لكل واحد فيكم شخصيا كل سنه وانت طيب، كل واحد بإسمه وتقبل الله منكم الصيام والقيام وصالح الأعمال


بين كل فترة والتانيه لازم القلب يصيبه شئ من الغفلة والقسوه لكن فيه سورة جميله جدا من القرآن الكريم كل ماأقرأها والله ياجماعه بحس انى انسان جديد .. مقدرش أوصفلكم قد ايه بتأثر فى القلب وتلينه لدرجة انى كتبت مرة لنفسى فى ورقه وحطيتها قدامى عشان كل شويه اقراها وبقول لنفسى : اذا قسا قلبك فعليك بالأنعام

فعلا سورة راااااااائعه وفيها آيات كتير تستوقف القارئ ، وتكررت فيها آيه مرتين ، هى قول الله تعالى: كتب ربكم على نفسه الرحمة.. اتكررت مرتين فى السورة

وعنده مفاتح الغيب لا يعلمها الا هو

وهو الذى يتوفاكم بالليل ويعلم ماجرحتم بالنهار

وهو القاهر فوق عباده

قل من ينجيكم من ظلمات البر والبحر تدعونه تضرعا وخفية


قل الله ينجيم منها ومن كل كرب

اللــــــــــــــه وحده، آيات تهز القلب هزا وتأخذ بأيدينا رويدا رويدا الى الله سبحانه جل فى علاه

لكن الآيه التى تستوقفنى كثيرا هى فى قول سيدنا ابراهيم لقومه : فأى الفريقين أحق بالأمن ان كنتم تعلمون ، الذين آمنوا ولم يلبسوا إيمانهم بظلم أولئك لهم الأمن وهم مهتدون

أحق الناس بالأمان يوم القيامه ، الذين امنوا ولم يلبسوا ايمانهم بظلم ، أى شرك

فى الحقيقة هى سورة تختص بترقيق القلوب ياريت لو نقراها النهارده بهذه النيه كلنا حتى لو كنا قريناها قبل كده

طولت عليكم

بس لازم اشكركم جميعا لانى استفدت كتير قوى منكم بارك الله فيكم

والسلام عليكم

Anonymous said...

بسم الله الرحمن الرحيم قريت ايه انهارده بتقول (وما كان الله معذبهم وهم يستغفرون) اكيد كلنا عارفين الايه دى بس حبيت افكركم بيها وان مهما غلطنا ربنا بيدينا الفرصة دايما فاكثروا من الاستغفار

Al Bassam said...

السلام عليكم ورحمة الله وبركاته

يارب تكونوا بخير جميعا ، وتقبل الله صيامكم وقيامكم

فى قصة سيدنا موسى مع العبد الصالح فى سورة الكهف كان له عليه السلام ثلاثة تعليقات

عند خرق السفينة ، وقتل الغلام ، وبناء الجدار

وفى كل مرة يعزم سيدنا موسى ألا يسأل أو يناقش معلمه فى شئ ولكن يرجع ويسأل

ولكن الذى كان يثير هذه التساؤلات فى نفس سيدنا موسى عليه الصلاة والسلام ، مواقف مشابهة فى حياته سابقا

فعند خرق السفينة قال أخرقتها لتغرق أهلها ، فقد أمر الله أمه أن تلقيه فى تابوت ثم تلقيه فى البحر فتذكر ذلك وعلم ان الله ينجى عباده بأشياء قد تكون فى ظاهرها هلاك

وعند قتل الغلام قال ، أقتلت نفسا زكية بغير نفس ... فتذكر أنه كان قد قتل نفسا خطأً من قوم فرعون

وعند بناء الجدار بدون أجر ، نسى موسى عليه السلام انه قد سقى للبنتين أيضا بدون أجر وعوضه الله خيرا بالزواج من احداهن


نفعنا الله جميعا بالقرآن العظيم

Anonymous said...

جميل اوي التوبيك دا وعلى فكرة انا من القراء المتابعين للمدونة باستمرار بس دي اول مرة اشارك او اعمل كومنت وبجد يا دكتور محمود ربنا يكرمك ويقيك شر الرياء واحسبك صادق في كل كلمه بتقولها لان احساسك بيوصلنا واعتقد ان الهدف من الموضوع اتحقق لاني فعلا حاسة اني استفدت من كل كومنت وحاسة اني لاول مرة بقرأ الايات المذكورة وفعلا سورة الانعام من السور الجميلة جدا وكلها معاني جميلة اوي
اما عن الايات اللي بتأثر فيا اوي وَمَا قَدَرُوا اللَّهَ حَقَّ قَدْرِهِ وَالْأَرْضُ جَمِيعًا قَبْضَتُهُ يَوْمَ الْقِيَامَةِ وَالسَّماوَاتُ مَطْوِيَّاتٌ بِيَمِينِهِ سُبْحَانَهُ وَتَعَالَى عَمَّا يُشْرِكُونَ
بحس لما اقرأ الايد دي اد ايه احنا ولا حاجة واد ايه احنا جاحدين اوي لربنا
وكمان من الايات اللي بتأثر اوي فيا . ( وَمَن يَتَّقِ اللَّهَ يَجْعَل لَّهُ مَخْرَجاً{2} وَيَرْزُقْهُ مِنْ حَيْثُ لَا يَحْتَسِبُ
والايات عن المتقين بتأثر فيا اوي ربنا يجعلنا جميعا من الاتقياء
واسفة على الاطالة ويا ريت ربنا يكرمني واشارككم الثواب

Al Bassam said...
This comment has been removed by the author.
Al Bassam said...

السلام عليكم ورحمة الله وبركاته

سمعت كلمه جميله من زمان بتقول

تعرف إلى الله فى الرخاء يعرفك فى الشدة

المعنى ده قرأته و حسيته قوى امبارح فى كتاب جامع العلوم والحكم والمعنى باختصار فى قول الله تعالى فى سورة الصافات عن سيدنا يونس عليه السلام : فلولا أنه كان من المسبحين ،للبث فى بطنه إلى يوم يبعثون

عندما قال لا اله الا انت سبحانك انى كنت من الظالمين ، لم تكن أول مرة يدعو الله فيها حيث تقول الآيه الكريمه

فلولا أنه كـــــــــــان من المسبحين، اى كان قبل هذه الشده من المسبحين

وعندما نقارن بين هذا الموقف وموقف فرعون قبل الغرق عندما قال آمنت ، قال الله عز وجل : آآلآن وقد عصيت قبل وكنت من المفسدين؟؟

فلم يكن من المسبحين قبل ذلك ولا الداعين لله تعالى ولا الساجدين لعزته جل فى علاه

عندها فهمت هذا المعنى بحق

يارب اكون قدرت أوصل المعنى ده
بارك الله فيكم وتقبل منكم

Al Bassam said...

استدراك


فيونس عليه السلام الذى كان من المسبحين قبل الشده ، نجاه الله وعافاه من شدته ، ومش كده وبس

وأنبتنا عليه شجرة من يقطين

أما فرعون فنجاه الله ببدنه ليكون عبرة للناس جميعا

فاليوم ننجيك ببدنك لتكون لمن خلفك آيه

وبئست النجاة هذه

اللهم اجعلنا من المسبحين الذاكرين

Anonymous said...

الله يجزاكم خير بجد...الله يوفقكم كلكم..
الفايدة اتحققت يادكتور ونلت الهدف..يارب يكون يف موازين اعمالك...

انا في ايات بحس انها بتصبر في وقت الشدة اوي..وبستشعرها جدا..زي (ومن يتق الله يجعل له مخرجا)..واية..(ان بعد العسر يسرا)..في ايات كتير بتبقى تصبير والهام للمؤمنين..

Anonymous said...

انما امره اذا اراد شيئا ان شقول له كن فيكون
اخر صوره يس
لو بس نفهم الايه دي وترسخ في قلبنا عمرنا مهنعترض علي قضاء ربنا لينا
لان ببساطه لو كان ربنا رايد غير اللي حصلنا كان هو اللي حصل
ونحط في تفكرنا دايما ان اي ابتلاء او قضاء وقدر حصلنا هو الافضل لينا من وجهه نظر ربنا ليه
فمين هيختارلنا احسن من رب

B said...

فيه آية قرأتها السنادي لأول مرة
أكيد قريتها قبل كده كتير بس أول مرة آخد بالي منها
في أول آية في سورة الأنفال
في آخرها ربنا سبحانه وتعالى بيقول
فاتقوا الله وأصلحوا ذات بينكم و أطيعوا الله ورسوله
صدق الله العظيم
حسيت ان دول أول تلات خطوات للنصر
وخصوصا ان الآيات معظمها بيكلم عن غزوة بدر
هنتقي ربنا أول حاجة
وتاني حاجة للأسف مش واخدين بالنا منها
كلنا مزعلين بعض ومتخانقين مع بعض
مع ان ربنا بيقول وأصلحوا ذات بينكم
يبقى النصر هييجي ازاي واحنا كده
يارب بكون ربنا وفقني وشاركت معاكم مشاركة كويسة

الرمال لا تذوب في البحر said...

انا سمعت تفسير جميل اول للشيخ الشعراوي
الراجل ده كان جميل أوي يا جماعة
بيقول في تفسير سورة المنافقون في أول آية
بسم الله الرحمن الرحيم
إذا جاءك المنافقون قالوا نشهد أنك لرسول الله والله يعلم إنك لرسوله والله يشهد إن المنافقين لكاذبون
صدق الله العظيم
وقال ان فيه مستشرقين علقوا على الآية
ازاي يقولوله انك رسول الله وربنا يقول ان هما كدابين
الشيخ الشعراوي قال
ان الكدب هنا مش في كلمة رسول الله
الكدب هنا في كلمة "نشهد"اللي قبلها
يعني هو رسول الله بس شهادتهم هي اللي كدب
انا وصلت المعني؟؟؟
جزاكم الله خيراً جميعا

tear..smile said...

قال تعالى :
" افلا انبئكم بالاخسرين اعمالا * الذين ضل سعيهم فى الحياة الدنيا وهم يحسبون انهم يحسنون صنعا "

الايه دى لوحدها بتوصف حال نااااااس كتييييييييييييييييييييييير اوى مننا
وربنا يهدينا ويوجهنا للطريق المستقيم

۩۝۩ Dr. Flavio ۩۝۩ said...

#

إِنَّ لِلْمُتَّقِينَ مَفَازًا
حَدَائِقَ وَأَعْنَابًا
وَكَوَاعِبَ أَتْرَابًا
وَكَأْسًا دِهَاقًا
لّا يَسْمَعُونَ فِيهَا لَغْوًا وَلا كِذَّابًا
جَزَاء مِّن رَّبِّكَ عَطَاء حِسَابًا
رَبِّ السَّمَاوَاتِ وَالأَرْضِ وَمَا بَيْنَهُمَا الرَّحْمَنِ لا يَمْلِكُونَ مِنْهُ خِطَابًا
يَوْمَ يَقُومُ الرُّوحُ وَالْمَلائِكَةُ صَفًّا لّا يَتَكَلَّمُونَ إِلاَّ مَنْ أَذِنَ لَهُ الرَّحْمَنُ وَقَالَ صَوَابًا
ذَلِكَ الْيَوْمُ الْحَقُّ فَمَن شَاء اتَّخَذَ إِلَى رَبِّهِ مَآبًا
إِنَّا أَنذَرْنَاكُمْ عَذَابًا قَرِيبًا يَوْمَ يَنظُرُ الْمَرْءُ مَا قَدَّمَتْ يَدَاهُ وَيَقُولُ الْكَافِرُ يَا لَيْتَنِي كُنتُ تُرَابًا



أنا حسيت بدول جدا انهارده حيث قرأهم الإمام وتصورت كل كلمة كأنها واقع أمامي وتصورت جزاء المتقين في الآخره

اللهم اجعلنا من المتقين

۩۝۩ Dr. Flavio ۩۝۩ said...

وَأَمَّا مَنْ خَافَ مَقَامَ رَبِّهِ وَنَهَى النَّفْسَ عَنِ الْهَوَى
فَإِنَّ الْجَنَّةَ هِيَ الْمَأْوَى


ونهى النفس عن الهوى... أد ايه الآيه دي عظيمه وفيها سبيل الخلاص لينا كلنا

الخوف من الله ونهي النفس عن الهوى

Anonymous said...

بسم الله الرحمن الرحيم خيييييييييير يا جماعة مفيش تعليقات جديدة ليه يلا لازم نشد حيلنا شوية ونشجع بعض. ( ان معى ربى سيهدين ) طبعا اللى معاه ربنا ويكون دايما مع ربنا لازم يكون ع طول مطمن.

محمود حماده said...

(كل شئ هالك الا وجهـه)

Anonymous said...

من أول ماحضرتك حطيت البوست وانا كنت بدور على مقولة لأحد الصالحين سمعتها زمان بس مش قادرة أتذكر هو مين
ولا ايه المقولة بالظبط
بس هو كان بيتكلم عن أربع آيات في القرآن جم على لسان أنبياء وناس قالوهم و دايما الآية اللي بعدها تلاقي ربنا حماهم وحاش عنهم
انا فاكرة الآيات
.................
فَسَتَذْكُرُونَ مَا أَقُولُ لَكُمْ وَأُفَوِّضُ أَمْرِي إِلَى اللَّهِ إِنَّ اللَّهَ بَصِيرٌ بِالْعِبَادِ * فَوَقَاهُ اللَّهُ سَيِّئَاتِ مَا مَكَرُوا وَحَاقَ بِآلِ فِرْعَوْنَ سُوءُ الْعَذَابِ
.................
الَّذِينَ قَالَ لَهُمُ النَّاسُ إِنَّ النَّاسَ قَدْ جَمَعُوا لَكُمْ فَاخْشَوْهُمْ فَزَادَهُمْ إِيمَانًا وَقَالُوا حَسْبُنَا اللَّهُ وَنِعْمَ الوَكِيلُ فَانقَلَبُوا بِنِعْمَةٍ مِّنَ اللَّهِ وَفَضْلٍ لَّمْ يَمْسَسْهُمْ سُوءٌ وَاتَّبَعُوا رِضْوَانَ اللَّهِ وَاللَّهُ ذُو فَضْلٍ عَظِيمٍ
......................
قال كلا إن معي ربي سيهدين
فَأَوْحَيْنَا إِلَى مُوسَى أَنِ اضْرِبْ بِعَصَاكَ الْبَحْرَ فَانْفَلَقَ فَكَانَ كُلُّ فِرْقٍ كَالطَّوْدِ الْعَظِيمِ
...........................
لا إِلَهَ إِلا أَنْتَ سُبْحَانَكَ إِنِّي كُنْتُ مِنَ الظَّالِمِينَ
فَاسْتَجَبْنَا لَهُ وَنَجَّيْنَاهُ مِنَ الْغَمِّ
وَكَذَلِكَ نُنْجِي الْمُؤْمِنِينَ
..................
في الآيات دي اتقال أربع كلمات بعد كل واحدة منهم جه جواب الشرط بحرف الفاء يدل على سرعة الاستجابة من ربنا
وكان دايما بعد حرف الفاء دي فضل كبير من ربنا للي قال الكلمات دي عشان كده بقول لازم نتمسك بيهم ونقولهم دايما
حسبنا الله ونعم الوكيل
لا إله إلا أنت سبحانك إني كنت من الظالمين
و أفوض أمري إلى الله إن الله بصيرٌ بالعباد
كلا إن معي ربي سيهدين

ياريت نخليهم على لسانا دايما

the last ray said...

إن تنصروا الله ينصركم ويثبت أقدامكم
......................
النصر الأولاني غير النصر التاني من وجهة نظري أو زي ما أنا حسيت
حسيت ان ربنا مش في معركة وعايزنا ننصره حاشا لله
انا حسيت ان ربنا عايزنا ننصره في نفسنا
ننصره على الدنيا وزخرفها وكل مافيها
نجاهد نفسنا ونحافظ على ايمانا
ساعتها هو هينصرنا على أعدائنا ويكون جنبنا دايما

Anonymous said...

فى البداية كل عام وكل حضراتكم بخير وصحة وطاعة ابدية لله وجعل الله ايامنا جميعا رمضان لا استطيع ان اصف لكم مدى فرحتى لانى اشارك معكم فى هذا البوست ومهما وصفت لكم مدى الشجاعة التى اكتسبتها لاشترك معكم اليوم فلن استطيع بس بجد موضوع رائع والردود اكثر من رائعة وجزاك الله خيرا يامحمود عفوا د/ محمود وجزى كل المشاركين بصراحة كل الايات المقربة الى قلبى قد كتبت وليس معنى هذا انى لن اشارك معكم

اول اية بجد بحبها اوى لانها بتفكرنى بمدى لهوى وبعدى عن الله وكم كنت غير ملتزمة ولا مؤدية لفروضى مش جهر بالذنب ابدا والله بس حبيت اقولكم على حاجة كنت متخيلة انها شى عادى ايام الثانوية العامة مريت بظروف صعبه جدا ولكنى الحمد لله افقت منها وكان همى الشاغل المذاكرة فقط فكنت اخرج من بيتى الصبح ولا اعود سوى بعد المغرب بسبب المدرسة والدروس فكانت اغلب الصلوات تفوتنى وكانت تمر على ايام اصلى الصلوات الخمس ليلا قبل النوم حتى ارتاح وانا نائمة كل ذلك انا متخيلة انها شى عادى

ولكن بالصدفة العمياء سمعت هذه الايه كم شعرت بضآلتىوتفاهتى اهملت فى حق الله الى هذه الدرجة صحيح انى اصلى ولكن كيف بعد مرور وقت الصلاة (فخلف من بعدهم خلف اضاعوا الصلاة واتبعوا الشهوات فسوف يلقون غيا)ياااالله كم كنت عمياء اترك حق الله الى ان وصلت لهذه الدرجة لم اكن اعى وانا احفظ القران ان اخلاف الصلاة اى تاخيرها للصلاة التى تليها بكت نفسى جدااااااااااااااااا على ذالك الشئ الذى تصورت يوما انه شى عادى ولكنى فهمت فالله اسال واياكم ان لانكون من اؤلئك الذين يلقون فى ذالك الغى ولكنى فرحت جدا عندما سمعت هذه الايه التى فتحت لى ابواب الامل وجعلتنى اشعر انى وليدة الحظة (قل ياعبادى الذين اسرفوا على انفسهم لاتقنطوا من رحمة الله ان الله يغفر الذنرب جميعا)بجد فرحت اوى اوى اوى دخل الامل قلبى من جديد ادركت كم ان الله تبارك وتعالى جميل احسست ان هذه الايه لى لى وحدى ليس رياء ابدا والله ولكن هل تعرفون ذالك الاحساس الذى يتملك قلوبنا عندما تشعر ان شخص يمسح دموعك ويحل همومك التى لم يكن لها حل هل تعرف ذالك الاحساس الذى يوحى لك بان هذا السخص ملك لك وحدك هذا هو الاحساس بجد مهما وصفتها صعب اوفى حقها ولكنها دائما امامى تلهمنى امل ليس فى تكرار الذنب لا بل فى رحمة اذا اخطات وليس اذا تعمدت ايه ثالثة بحبها جدااااااااا ارى بها عظمة الله وروعة القران (غافر الذنب وقابل التوب شديد العقاب )الله الله على الحكمة والترتيب يذنب المرء فيستغفر الله ويبدى التوبة فيقبلها الله ولكن اذا ماكررت الذنب فان الله شديد العقاب ولكن رحمه الله وسعت كل شئ وسبقت كل شئ

(انا نطعمكم لوجه الله لانريد منكم جزاء ولا شكورا انا نخاف من ربنا يوما عبوسا قمطريرا فوقاهم الله شر ذالك اليوم ولقاهم نظرة وسرورا) هذه الايه ايضا بحبها اوى لاابالغ او افترى او رياء حين اقول اننى احب هذه الايات ولكنى فعلا احبها حبا فاق الوصف بل واننى احفظها اكثر من باقى القران

(قل ان صلاتى ونسكى ومحياى ومماتى لله رب العالمين ) حقا حياتى كلها لله لاننتظر من بشر معروف ولا جزاء ولكننا ننتظر من رب البشر اعظم الجزاء

جزاكم الله خيرا وجزانا واياكم عفوا على الاطالة وان لم اكن اوفى حق هذه الايات اتمنى ان يصل احساسى اليكم واتمنى من الله عز وجل ان يرضى عنا ويرضى اهلينا عنا ويسترنا يو القيامة

مازال قلبى مليئا بالايات ولكن عذرا للاطالة واسال الله واياكم الثبات زينب(بنوتة علوم)تعقب بسيط صورة القيامة وق والزمرصور اعشقها بلا استنساء وخاصة من روحانية الشيخ محمد رفعت والشيخ العجمى اتمنى ان تسمعوهم وتشعروا بالروحانية العالية التى فى صدورها انها النشوة الوجدانية الروحانية

Anonymous said...

السلام عليكم ورحمه الله وبركاتة
من الايات الجميله فى القرأن
)عفا الله عما سلف...................سورة المائده
العفو والتسامح صفه من صفات ربنا
يعفو عنا ويسامحنا رغم خطأنا
احنا البشر فين من ده ؟
بجد دى دعوة اننا نسامح بعض ونعفو عن بعض
..العفو عند المقدره
بس ياريت منتفهمش غلط وان العفو ده قلة حيله وضعف من الشخص لغيره



الايه التانيه
انه من عمل منكم سوءا بجهاله ثم تاب من بعده واصلح فانه غفور رحيم ...........سوره الانعام
دعوه للتفاؤل كل ذنوبنا اللى فاتت واحنا مش عارفين ان شاء الله ربنا يغفرها لنا بس على شرط اننا نتوب ونرجع عنها
وربنا يغفر لنا ذنوبنا ويرحمنا ويعفو عنا ان شاء الله

Anonymous said...

الفكره جميله جدا
ربنا يبارك فيك
شوف اول ايه...(يمكرون ويمكر الله والله خير الماكرين
بجد ايه روعه حسسيتنى بعظمه وجلال ربنا وان ربنا هو اللى
خلقنا وعارف خبايا انفسنا ..... يبقى ازاى نجى احنا ونمكر عليه



الايه التانيه (هل جزاء الاحسان الا الاحسان)
الايه يمكن تكون بتوضح علاقتنا مع ربنا وعلاقتنا مع بعض احنا البشر
يعنى ازاى هكون بعامل فلان بكل احسان واحترام وبعدين الاقى منه النقيض
انه يسىء ليه ويغتابنى او يطعنى فى ضهرى بالبلدى يعنى
انا عن نفسى اعرف حد كان بيطبق الايه دى فى حياته
كان مش بيعامل الناس بمعملتهم وكان بيقابل الاساءه بالاحسان
وفعلا الشخص ده متتصورش ربنا كرمه اد ايه فى حياته
وان شاء الله هشارك تانى

Anonymous said...

من سورة الأنفال حسيت السنادي بالآية دي
وَمَا كَانَ اللّهُ لِيُعَذِّبَهُمْ وَأَنتَ فِيهِمْ وَمَا كَانَ اللّهُ مُعَذِّبَهُمْ وَهُمْ يَسْتَغْفِرُونَ

و انت فيهم مش معناها الصحابة اللي كان النبي صلى الله عليه وسلم وسطهم
دي في كل وقت وكل مكان
دي لنا احنا كمان
لو النبي صللى الله عليه وسلم سة جوانا بأخلاقه وسنته يبقى ربنا مش هيعذبنا
هو ده المعي اللي انا حسيته من كلمة وأنت فيهم
يارب النبي يكون فينا فعلا
صلي الله عليه وسلم