لمن يهمه الأمر

Friday, August 21, 2009


السلام عليكم ورحمة الله
في البوست ده كان لازم نجاوب على سؤال اتوجهلنا كتير
انتو عملتوا ايه بالفلوس اللي انتو لميتوها مننا؟؟
وده سؤال من أي حق أي حد شارك معانا انه يسألنا وعارفين طبعا ً انه
بيسأل بحسن نية ومافيش أي مشاكل اننا نجاوب السؤال ده
ويشهد الله اننا لا كونا لمينا ولا كونا بنقول دلوقتي عملنا ايه بالفلوس
اننا كده بنرائي لإن زي ماقلت وبقول دايما الموقف مايستحملشي كده
أنا استئذنت زمايلي كمان اني أقول كل حاجة بالمبلغ اللي اندفع فيها
يمكن ناس برة الموضوع ده خالص تحس ان فيه أماكن لسة محتاجة
فتشارك هي كمان في الخير ده بينهم وبين ربنا
فيها حاجة بس قبل ما أكمل
احنا عارفين ان الموضوع فيه خلاف واحنا زي ما قلنا دايما اجتهدنا
واحنا بندعي من كل قلبنا ان الثواب يوصل او على الأقل تبقى شهادة خير
مننا للدكتورة رندة ربنا يرحمها او على الأقل لإنها كانت السبب اننا نعمل كده
ومش معني كده اننا خلاص عملنا كل حاجة لإن هيفضل اهم حاجة
اللي على الأقل مافيش فيها أي خلاف....الدعاء ليها دايما
واحنا حاولنا نقسم الفلوس على كذا حاجة بحيث ان بإذن الله
ييجي الثواب من هنا أو من هنا أو منهم كلهم ان شاء الله
وحاولنا نكمل حلم الدكتورة رندة ونحط الفلوس
في نفس مجالها وفي حاجات هي كانت بتحبها
وحاولنا نبقى على مهلنا بحيث ما يبانشي لينا أدام مصدر انفاق نقول انه كان أولي
وماكنشي فيه فلوس بتنصرف إلا بعد ما نشاور بعض
وبعد ما نلاقيها أولي من الحاجات التانية
وفيه ناس كان ليها اقتراحات فوق راسنا والله وكنا بنفكر فيها كلها
بس هو ربنا في النهاية قدر ان الفلوس تتقسم بالطريقة دي
الفلوس اللي معانا وصلت حوالي خمس تلاف جنيه ونص
نسبة كبيرة منهم كانت منكم ونسبة كانت من زمايل دكتورة رندة برة الكلية
اتقسمت كما يلي
.....................................
اللي هو اسمه دي إسdefibrellitorفيه ألف جنيه راح لجهاز الـ
مع الدكتورة مي سلامة ..هو الجهاز تمنه شبعة وتلاتين ألف جنيه
والألف جنيه دي كان من أول الفلوس اللي اندفعت فيه
والحمد لله حتى دخلت في المقدم اللي اندفع عشان يجيبوا الجهاز على مابقية المبلغ يتلم
ولو اي حد عايز يخرج أي فلوس في رمضان ياريت يشارك فيه
لإنه جهاز مهم جدا وبينقذ حياة بني آدمين كتير
.........................................
فيه خمسميت جنيه راحوا للدكتورة غادة
هي بتجهز بنت فقيرة وهي المسئولة عن تجهيزها
هتشتريلها منهم جهاز يفضل في بيتها دايما
واللي هيتبقى من المبلغ هيروح في القساطر اللي بتتركب لعيانين الكلى
..........................
فيه 570جنيه راحوا لعيان بيمعمل عملية جراحة مخ و أعصاب
وفيه ميتين جنيه دخلوا في بناء مسجد
وفيه أجهزة
laryngoscope& 2 ambo pags
راحوا لقسم الأطفال وماتعرفوش فرقوا أد ايه لما النور قطع عن الحضانات
يادوبك بعد ما الجهازين وصلوا بنص ساعة
كفاية علينا أوي الأطفال اللي جهازين الأمبو باج دول أنقذوهم
suctionوفيه كمان جهازين أمبو باج وجهاز
راحوا لقسم التخدير لإنهم كانوا محتاجينهم جدا
دا كله اتكلف حوالي تسعميت جنيه
وفيه مغسلة اتكلفت 470و خشبة أموات اتكلفت 760جنيه
راحوا لمسجد في قرية فقيرة كانوا محتاجينهم جدا
وفيه مية وعشرين جنيه راحوا لحالة كانت محتاجاهم تعمل بيهم تحاليل
عشان تقدر تصرف بيها علاج على نفقة الدولة
والمبلغ اللي اتبقي اشترينا بيه كراريس وكشاكيل وحاجات لدار أيتام
عرفنا ان الدكتورة رندة ربنا يرحمها كانت بتشارك فيها
......................................................
هو دا اللي حصل بالظبط
وانا كنت بتكلم بصيغة الجمع مش بقصد الجروب اللي كانت مسئولة عن الموضوع
انا بقصدنا احنا كلنا
ملحوظة..اي حاجة اتوزعت او هتتوزع غير الحاجات دي فهي من برة الفلوس دي
ملحوظة كمان
رغم صعوبة موضوع دكتورة رندة علي ناس كتير من دفعتنا
بس كان فيه نعمة يمكن انتو ماحسيتوش بيها
ان الموضوع حصل وهما لية دفعة واحدة
زعلوا سوا وبكوا سوا وحاولوا يعملوا حاجة سوا
لإن لما أصحابي توفوا واحنا كل واحد مننا في حتة
كان كل واحد بيموت فيهم لوحده وكنا بنموت مع كل واحد يعرف فيهم
و فيه ناس عرفت وهي هناك في الغربة....مش هقدر أقوللكم حالتهم عاملة ازاي
آخر حاجة
برة موضوع الدكتورة رندة خالص
لسة الدكتورة مي والدكتورة غادة بيلموا
لو حد عايز يشارك معاهم بأي حاجة يروحلهم او ممكن يوصلهم من خلالنا
ربنا يجازي كل حد شارك معانا
ولو حتى كان مختلف معانا وحاول يرشدنا ناحية الرأي الصح
جزاكم الله خيرا جميعا

5 comments:

Anonymous said...

السلام عليكم ورحمه الله وبركاته
كل سنه وحضرتك طيب يادكتور محمود رمضان كريم ويارب يتقبل مننا جميعا
جزاك الله كل خير وجزاكم الله جميعا كل خير كل من شارك في حمله الخير واهداء ثوابها لروح رنده
ربنايارب يجعله في ميزان حسانتها وحسانتكو جميعاان شاء الله

في بس حاجه احنا بنحاول نختم القران مع بعض في رمضان لينا كلنا ولرنده معانا ان شاء الله زي ماعملنا هنا قبل كده بس علي الجروب بتاع رنده ياريت لو اي حد يحب يشارك معانا وناخد كلناا ثواب ختم القرا ن في رمضان ده لينك التوبيك
http://www.facebook.com/topic.php?topic=10249&uid=121101330880

Anonymous said...

gzak allah kol kher ya m7mod
rabbena yeg3alo fe mezan 7asanatak w fe mezan 7asant randa yarab
allahomma ameeeeeeeeeeeeeeeeeen

Anonymous said...

جزاكم الله خيرا
كل سنه وانت طيب وبخير يامحمود
ربنا يتقبل منا الصلاه والصوم وصالح الاعمال
بالتوفيق يارب دايما لكل خير

Anonymous said...

كان ليا تعليق على موضوع الختمة لدكتورة رنده لاني سمعت ان في الختمة المفروض الاشخاص يكونوا موجودين في نفس المكان وكل واحد بيقرا بصوت عالي للباقي لحد ما يختموا القران اما فكرة ان كل واحد لوحده يقرأ جزء او اكتر والقران يتوزع عليهم دي متعتبرش ختمة والله اعلم
وفعلا يا دكتور محمود مفيش اجمل من عمل الخير ...بيهون حاجات كتير اوي ربنا يكرم كل حد شارك معاك ويجزيك خير الجزاء ويا ريت اعرف ازاي ممكن اوصل لدكتور مي او دكتورة غادة وعايزة اعرف تفاصيل اكتر عن الجهاز اللي بيلموله الفلوس ...عشان لو حاولت اجمع وحد سألني جهاز ايه اقدر اجاوب وياريت ترد عليا بسرعة عشان الواحد يلحق يعمل اي حاجة قبل ما شهر رمضان ينتهي....وانا باذن الله عندي فكرة وعايزة انفذها ان شاء الله عايزة اعرف اسرة فقيرة واتكفل بيها وقلت الفكرة دي لاصحابي واهلي لاني اكيد مش حقدر اتكفل بيها لوحدي وشجعوني وان شاء الله نبدأ باسرة وربنا يباركلنا فيما بعد وتكون اسر كتيرة...انا بس حبيت اني اقترح عليكوا الفكرة لان لو كل مجموعة عملت كده ...محدش حيكون محتاج حوالينا ...وكمان ليا طلب اخير منك يا دكتور محمود لو تعرف اي اسرة محتاجة بجد وموجودة في طنطا يا ريت توصلني ليها ...واسفة جدا ع الاطالة

محمود ابوالعزم said...

ربنا يجازيكوا خير يارب
بالنسبة للكومنت اللرابع
ربنا يجازيكي خير يارب
بالنسبة للجهاز انا كتبت اسمه وطريقة توصيل الفلوس في البوست اللي فوق
وبالسنبة للأسرة الفقيرة
فكرتك جميلة جدا ربنا يبارك فيكي
وان شاء الله نحاول ننشرها
انا اعرف أسرة كنا بنلمها قريب
في قرية جنب طنطا علطول
حصلتلهم ظروف صعبة جدا حرمتهم من الأب والأم سوا
وسابوا أربع أطفال أكبر حد فيهم عنده تلاتاشر سنة عايشين مع جدتهم الضريرة
رجاءا لو كده حضرتك ابعتيلي على الميل
لإنه ماينفعشي أكتب عنووانهم على المدونة هنا
وانا هقوللكم توصليلهم ازاي وبطريقة ماتجرحهمش
now_tears_smile@yahoo