أستودعكم الله

Tuesday, September 15, 2009


السلام عليكم ورحمة الله وبركاته
كنت حابب اخلى الخبرين دول آخر خبرين في البوست
بس هبدأ بيهم عشان ما أطولشي عليكم رغم انهم خبرين رخمين جدا
الخبر الأولاني انه للأسف وغصب عني ده هيكون
آخر بوست على المدونة لمدة أربع شهور جايين ان شاء الله

وعشان كده لو البوست ده طويل شوية بس أتمنى تكملوه للآخر
والخبر التاني اني للأسف ماقدرتش أكتب هدية لليلة القدر زي السنة اللي فاتت
دعواتكم يا جماعة
والله انا حاولت كتير بس لسة القلم مش مطاوعني رغم اني كنت قربت أخلصها
ربنا وحده اللي يعلم ان الواحد بيروح وييجي
ويضحك ويتكلم بس من جوايا عامل ازاي بس الحمد لله على كل حال
وبتأسف لكل زوار و اصدقاء المدونة اني مش هكون معاهم الفترة اللي جاية دي
رغم انهم وقفوا جنبي في محن و أوقات صعبة كتيرة
كفاية أقول اني يوم ما ماكتبت عن اصحابي لاقيت بسام بيتصل من الامارات
واتصال جالي من اخ في الكويت ورسالة جاتلي من السعودية ربنا يكرمهم
بشكرهم كلهم لو كانوا بيقروا دلوقتي هما وكل الناس اللي اتصلوا بس وبعتولي
لإن اهتمامهم و ووقفتهم دي فرقت معايا جدا وخرجتني بسرعة من الحالة دي
وحتى آخر بوست كان عن جهاز القلب على المدونة اتفاجئت بالمبالغ اللي لميناها
ربنا يكرم كل حد دفع ولو جنيه واحد منها لإنها بجد هتفرق جدا
بس آن الأوان اني أنفصل عن كل حاجة و أحاول أركز في المذاكرة بس
انا والله حاولت السنادي واجتهدت في دراستي

وواثق ان ربنا مش هيضيعني ان شاء الله
وراضي بأي حاجة هتحصل في الامتحانات اللي جاية ان شاء الله
المفروض ان فاضل شهرين والمدونة تتم سنتين من عمرها
بس مش هقدر أكون موجود للأسف عشان كده من دلوقتي
كل سنة وانتوا والمدونة طيبين وبكل خير ان شاء الله
يارب تكون المدونة قدمت أي حاجة أسعدتكم أو عبرت عنكم في الفترة دي
ومعلهشي لو جت فترات كانت المدونة فيها كئيبة شوية بحكم ظروف صعبة حصلت
واتمنى ما اكونشي زعلت ولا ضايقت حد بأي حاجة كتبتها فيها
فيه حاجة لازم أقولها يمكن حد يقدر يساعد فيها رغم اني كنت
احب تفضل بيني وبين ربنا بس عن تجربة فيه ناس من اللي بيقروا
دلوقتي جواهم وبيعلموا خير كتير اوي و اكيد هيساعدوا الحالات دي
فيه تلات حالات انا كنت من فقضل ربنا عليا من الناس اللي مسئولة عنهم

وكنت بوصلهم الفلوس اللي كانت بتجيلي من الناس بنية مساعدة الناس برة موضوع الجهاز
على حسب حاجة كل واحد منهم هحكيلكم عليهم اذ ربما حد منكم يحب يساعد
وخصوصا اني خلصت كل الفلوس اللي معايا واللي وصلتني من الناس
أول حالة أربع أطفال اتيتموا مرة واحدة لما ابوهم وأمهم توفوا ورا بعض
وعايشين مع جدتهم الكفيفة وماعادشي فيه مصدر دخل

لإن أبوهم كان صنايعي علي باب الله ومافيش أي مرتب ولا حاجة
تاني حالة ست غلبانة من بلد غلبانة هي بتصرف علاج على نفقة الدولة
حقن الانترفيرون بتاعة فيروس سي بس المشكلة انها لازم كل أسبوعين
تعمل تحليل كل أسبوعين بيتكلف مية وعشرين جنيه وهي ست غلبانة جدا
وأكتر حاجة صعبة في الموضوع انها عايشة ولحدها وابنها الوحيد سايبها
والست دي أكتر حد انا شخصيا متعاطف معاه لدرجة اني لما لقيتها
مستنية وبحسبها مستنية صجفة طلعت من تلات أسابيع بيتجي وتستني
في نفس الحتة اللي كنت قابلتها فيها قبل كده وادتلها فلوس كان حد مديهالي
واللي خلاني أتعاطف معاها أكتر انها دعت على ابنها أدامي وبعيدن عيطت
بس ماعيطتشي عشان هو سايبها عيطت عشان وصلها للدرجة انها تدعي عليه
انا خليتها تسأل لو كان ينفع تعمل التحاليل برة الجامعة

وساعتها ممكن أتفق مع أي معمل يبقى بنص التمن
بس لو حد من اللي بيقروا ليه حد في المجال ده ويقدر يساعدها
بفلوس او بالتحاليل يبقى جزاه الله كل خير
تالت حالة هي ست تعبانة وليها ابن تعبان جدا وبنت تانية بتتجهز
انا أعرف زمايل لينا ربنا يكرمهم بيساعدوها على أد ما يقدروا
بس هي الدايرة واسعة عليها جدا ومحتاجة لكل جنيه
هما دول التلات حالات اللي نفسي حد ربنا يكرمهم ويقدر يساعدهم
أقوللكم على موقف مش عارف يضحك ولا يبكي بس هيوريكم

أد ايه الناس دي طيبة وتستحق المساعدة
بالصدفة لاقيت تاني حالة اللي محتاجة تحاليل دي مستنية وصعب على
انها جت قبل كده تلات مرات وماشفتهاش لإنها ماكنتش معرفاني انها محتاجاني
واتعاطفت معاها جدا وكان معايا مبلغ صغير كانت الناس مأمناني عليه لحالات محتاجة
ادتهولها واديتها آخر فلوس كانت معايا ومشيت بعدها بعشرين متر قابلت الحالة التالتة
وقلتلها والله انه ما عادشي معايا فلوس خالص وكنت محروج منها جدا
حلفت ميت يمين لازم آخد منها اتنين جنيه أروح بيهم ...وروحت على حسابها؟؟
مش بقوللكم هم يبكي وهم يضحك
يارب ما يكونشي زمايلي في سنة سادتة زعلانين مني في أي حاجة
أنا بحبهم في الله والله وبقدرهم وبحترمهم وشايل تشجعيهم
لي جميل فوق راسي طول عمري وده اللي كان بيخليني دايما
بحاول أفيدهم بأي حاجة أقدر أعملها ليهم في الكلية
يمكن ربنا وفقني في حاجات وخاني التوفيق في حاجات تانية
أتمنى دي تعوض دي وأكون قدرت أعمل أي حاجة تفيدهم
أنا طولت أوي أوي وده يمكن عشان مش هاين عليا أسيب المدونة و امشي
كل سنة وانتم طيبين وبخير وبكل صحة وسلامة
بجد دعواتكم لي ولكل زمايلي لإننا محتاجين دعائكم جدا
أستودعكم الله
ودول ايميلي ورقم تليفوني لو أي حد عاز اي حاجة في أي وقت أنا تحت أمره
0185856476
وقبل ما امشي انا قلت أسيبلكم هدية صغيرة اوي أوي
أنا قلت أضرب عصفورين بحجر واِشارك معاكم في ملحمة الـتأمل
اللي كانت على المدونة الفترة اللي فاتت دي
بجد والله انا استفدت واتعلمت من آيات كتيرة حسيتها لأول مرة معاكم
وقبل الـتأمل هسيبكلم هدية تانية صغيرة

بشري لكل الناس اللي كانت تعرف أصحابي ربنا يرحمهم
ولكل الناس اللي إتأثرت بالبوست اللي كتبته عنهم
انا شفتهم في رؤية أثلجت صدري وهي اللي خلتني أرجع لحياتي من تاني
واتزامن ده مع كذا حد من أصحابنا شافوهم في نفس الوقت في رؤى جميلة جدا
و أنا بقول كده مش عشان بس أطمن الناس عليهم
أنا بس حابب أقول ان ربنا رحيم أوي يا جماعة...رحيييييييييييييييييييييييم اوي
ربنا يلحقنا بيهم على خير ويسكنهم الفردوس الأعلى إن شاء الله
الهدية التانية حاجة بدور عليها من اكتر من عشر سنين ولسة لاقيها حالا
حلقة كنت سمعتها للشيخ الشعرواي حكي في أولها حاجة مش عايز أحرقهالكم
وبعد عشر سنين انتظار اني اسمعها تاني لاقيتها دلوقتي بالصدفة على اليو تيوب

ده جزء صغير منها وياريت لو حد عنده بقية الحلقة يبعتهولي

لإنها حلقة يقشعر لها الجسد وتدمع لها العيون والله
وده اللينك بتاعها....رجاءا تسمعوها....رجاااااااااااااااااااااااءا

http://www.youtube.com/watch?v=15KgflZq10Y
أنا بحب الراجل ده جدا...من الشخصيات اللي بتمثل حاجة كبيرة في حياتي

ورجاءا تسمعوا كمان النشيد ده لإني بحب أسمعه جدا

http://www.youtube.com/watch?v=z2bJLHBwfEA
و أخيرا انا كمان لي الشرف إني أتأمل معاكم وأشارككم في حاجة
من اجمل الحاجات اللي حصل على المدونة
انا هاخدكم لسورة أنا مش بس بحبها انا بعشقها
وبعتبرها من أعز أصحابي ولما أكون مخنوق أو مبسوط لازم أقراها
أكيد لو من أصحابي بيقرأ هيعرف اني أقصد سورة الزمر
أنا لو اتكلمت عن سورة الزمر وارتباطي بيها هتكلم كتير

وهحكي عن كل آية فيها بس عشان مش عايز أطول عليكم
في سورة الزمر قضية بحسها من تاني آية...قضية الإخلاص
.........................................
إنا أنزلنا إليك الكتاب بالحق فاعبد الله مخلصا ً له الدين
.......................................
كان ممكن ربنا يقول فاعبد الله وخلاص

بس العبادة من غير اخلاص ماتساوش حاجة
حتى ربنا بيقولهلنا في الآية اللي بعدها علطول.....ألا لله الدين الخالص
ونفس القضية في الآية رقم أربعتاشر.... قل الله أعبد مخلصا ً له ديني
ومن أكتر الحاجات اللي بحسها في سورة الزمر
انها بتححسنا يعني ايه ربنا
لإننا لو حسينا يعني ايه ربنا حاجات كتيرة في حياتنا اوي هنتغير
تخيلوا معايا وخلوا قلوبكم تحس بربنا وهو بيتكلم عن نفسه
سبحانه هو الواحد القهار
ألا هو العزيز الغفار
ذلكم الله ربكم له الملك لا إله إلا هو فاني تصرفون
إنه عليم بذات الصدور
قل اللهم فاطر السموات و الأرض أنت تحكم بين عبادك
طب محتاجين ايه اكتر من إن ربنا يقولنا
وماقدروا الله حق قدره والأرض جميعا ً قبضته يوم القيامة
والسموات مطويات ٌ بيمينه سبحانه وتعالي عما يشركون
ياتري فعلا احنا حاسين بعظمة ربنا وجبروته
طب تخيلوا ان مع العظمة والملك والجبروت دول ربنا بيقولنا
وإن تشكروا يرضه لكم...فيه فضل أكتر من كده
ربنا مش جزء من حياتنا ربنا هو كل حياتنا
ولإن فيه حاجات كتيرة اوي وربنا عارف ان فيه
ميت طريق بينادينا بعيد عنه ربنا بيسألنا سؤالين في السورة دي
كل واحد يسألهم لنفسه
........................
أليس الله بكافٍ عبده
أو لم يعلموا أن الله يبسط الرزق لمن يشاء ويقدر
لو الأجابة آه يبقى ايه في الدينا هيخوفنا تاني
ولو الإجابة لأ يبقى احنا مانستحقش لقب مؤمنين
عشان كده ربنا من حقه بعد ما بين لينا كل ده انه يقولنا
في كملتين بعتبرهم من أصعب الكلام في القرآن
ياعباد ِ فاتقون
من حقه يقولنا
إن تكفروا فإن الله غني ٌ عنكم
أليس في جهنم متوىً للكافرين
فويل ٌ للقاسية قلوبهم من ذكر الله
وبدا لهم من الله ما لم يكونوا يحتسبون
ولإن ربنا عارف ان الحياة هتاخدنا
من رحمته بينا دايما يفكرنا بآيات ممكن تبان صعبة
بس انا بشوفها من أرحم الآيات بينا
إنك ميت ٌ وهم ميتون
أن تقول نفسٌ يا حسرتي على ما فرطت في جنب الله
عارفين ان ربنا خلى في الدنيا جزء واحد من ميت جزء من الرحمة
بالجزء ده بتلاقي كل أم وكل ابن بيرحموا ولادهم ولو لقوهم في طريق غلط
بيحاولوا يرجعوهم
ولإن ربنا أرحم بينا من كده بكتير برضو بيحاول يفوقنا
وينبهنا من الغفلة اللي احنا فيها ويفكرنا بيه وبإننا هنموت
ومن رحمته انه مهما نعمل مهما نعمل فاتحلنا بابه دايما
لدرجة ان ربنا بيقولنا
ليكفر الله عنهم أسوأ الذي عملوا
يعني مش بس اللي عملوه لأ دا أسوأ اللي عملوه
لإن ساعات لما بنقعد مع نفسنا بنفتكر ذنوب لينا صعبة جدا
و نسأل ياتري ممكن ربنا يغفرهالنا
وربنا بيرد على سؤالنا....أسوأ الذي عملوا
وشوفوا قمة الفضل في بقية الآية لما ربنا بيقول
ويجزيهم أجرهم بأحسن الذي كانوا يعملون
يعني في المغفرة هييفرلنا أسوأ وفي الجزاء هيدينا على قدر أحسن
حاجة كنا بنعملها....فيه فضل أكبر من كده؟؟؟؟
أنا طولت أوي رغم اني لسة عندي كلام كتير عن سورة الزمر
بس كفاية اختم بآيتين كل الناس بتحبهم
قل يا عبادي الذين أسرفوا على أنفسهم لا تقنطوا من رحمة الله
إن الله يغفر الذنوب جميعا ً
.........................................
و آخر آية اللي ياريت كلنا ندعي نكون منهم
إنما يوفي الصابرون أجرهم بغير حساب
عرفتوا ليه انا بعشق سورة الزمر؟؟؟
كل سنة وانتم كلكم طيبين
دعواتكم لي ولكل زمايلي ان شاء الله
أستودعكم الله وأسيبكم مع آخر جزء وأروع جزء من سورة الزمر
و آخر حاجة أحب اختم بيها الفترة دي على المدونة
بسم الله الرحمن الرحيم
وسيق الذين اتقوا ربهم إلى الجنة زمراً حتى إذا جاؤوها
وفتحت أبوابها وقال لهم خزنتها سلام عليكم طبتم فادخلوها خالدين
وقالوا الحمد لله الذي صدقنا وعده وأورثنا الأرض
نتبوأ من الجنة حيث نشاء فنعم أجر العاملين
صدق الله العظيم

13 comments:

natural magic said...

جزاك الله خيرا يا محمود
ربنا يعينك دايما لفعل الخير
وماشاء الله فعلا استفادنا كتير من تاملات الناس هنا علي المدونه في ايات القران
ربنا يكرمهم ويعزهم
ربنا يوفقنا الفتره اللي جايه لان الامور متلغبطه علي الاخر
بجد فعلا محتاجين دعوات كل الناس لدفعه سادسه طب طنطا ربنا يهونها علينا ويعديها علي خير يا رب

Anonymous said...

السلام عليكم ازي حضرتك يا دكتور محمود انا بجد التعليق وحشني اوي اوي بس المدونه مش وحشتني لانها بيتي التاني اللي لازم ادخله كل يوم او الكتاب اللي لازم اقرا منه قبل اما انام معلش انا قلت انها بيتي لان يجد انا مش قادره اوصف الاحساس اللي بحسه وانا بقرا اي موضوع عليها معلش لو مش كنت بعلق الفتره اللي فاتت انا عارفه انها فتره طويله جدا جدا بس كان في الاول فيه ظروف وبعدين المواضيع كنت مش بقدر اعلق عليها واكتر موضوعين انا كنت متاثره بيهم جدا وكنت تعبانه فعلا موضوع عم المرسي وموضوع زمايل حضرتك ربنا يرحمهم يا رب ويسكنهم فسيح جناته المهم
والاهم اللي خلاني اعلق انهارده هي سوره الزمر
بجد سوره الزمر الي خلتني اعلق السوره دي زي ما حضرتك قلت ممكن كتير من الناس بتقراها وتعدي عليها من غير ما تعرف معانيها واياتها الجميله وخصوصا الايات الاخيره او يالاصح روائعها الاخيره انا بحبها جدا جدا وكمان سوره الاعلي وسوره القارعه
كل سنه والمدونه وحضرتك وكل الناس اللي هنا طيبين وبصحه وسلامه وربنا يوفقك ويوفقنا لعمل الخير وان شاء الله يجعله في ميزان حسناتك وكمان ربنا يعينا السنه دي علي اللي احنا فيه يا رب وربنا يوفقك ويكرمك ويحفظك يا رب
البوست رائع كالعاده واحنا علشان خاطر حضرتك هنتنازل السنه دي عن هديه ليله القدر وانا اسفه اني مكنتش بعلق الفتره اللي فاتت ومرسي اوي ان حضرتك بتسال علينا لما بنغيب بس الحمد لله احنا فعلا مش بنغيب لان ببساطه مش سهل علي حد انه يدخل المدونه ويقرا الكلام ده انا عن نفسي والله من غير مجامله واحنا في شهر كريم انا بسميها
لالئ محمود ابو العزم

ربنا يكرمك وتكون احسن كاتب ودكتور في العالم وصدقني ان حضرتك هتكون ان شاء الله من الناس اللي ليها شأن ان شاء الله

معلش اني طولت كده بس بخلص بقي من القديم ربنا يطول عمر المدونه اكتر من 10000000 سنه
وكل سنه وحضرتك طيب مره تانيه

Amert ALhozn

Anonymous said...

جزاكم الله خيرا و اثابكم الجنة
اخي الفاضل .. عندما تعجز الكلمات
فاننا نكتفي بالدعاء ان يجعلك الله و ايانا من المقبولين و المعتوقين في شهر الكريم
فهو عز و جل اهل التقوى و اهل المغفرة الكبير المتعال
ده تاني تعليق ليا في المدونة و كان الاول في ليلة القدر العام الماضي
اما عن سورة الزمر فلا اجد سوى انا نتوجه الى الله عز وجل بالشكر و الحمد و لكن كيف نشكره عز و جل و شكرنا له نعمة تستحق الشكر
لا حرمكم الله الاجر عنا
و لا حرمنا كلماتكم الرائعة

Soul.o0o.Whisper said...

السلام عليكم و رحمة الله و بركاته

كل سنة و انت طيب يا دكتور
و عيد سعيد عليك يارب

و ان شاء الله ربنا يوفقك
و زى ما قلت انت ( و يجزيهم أجرهم بأحسن الذى كانوا يعملون)

فأبدا مش نقنط من رحمة ربنا
و لا من فضله علينا
و صدقنى عن تجربة
اليقين بيفرق اوى اوى
فرق بين انك تكون داخل و كل يقين ان ربنا مش هيخذلك
و بين انا عملت اللى عليا و زى ما تيجى تيجى بئا

و ان شاء الله نسمع عنك أخبار كويسة قريب


دمت بكل خير

Al Bassam said...

*** في أمان الله يا محمود *** ======================= لكن كلنا مستنيينك وان شاء الله ربنا يحققلك كل اللي تتمناه ، ووجودك معانا حبيب إلينا و مستقبلك إلينا أحب ، ربنا يوفقك

أحمد سعيد بسيوني said...

بسم الله الرحمن الرحيم

تقبل الله طاعاتكم

وكل عام وانت بخير

جعله الله عيد حب وسعادة وهناء

دمتم بود

عندما تنهمر الدموع said...

السلام عليكم ورحمة الله وبركاته
ازيك ياد/محمود يارب تكون بخير بجد اد ما انا زعلانة ان حضرتك هتسيب المدونة فترة طويلة اد ما انا مبسوطة انك بقيت احسن دلوقتي الحمد لله وانا متأكدة انه زي ماحضرتك زكلامك الجميل هيوحشنا احنا كمان والمدونة هنوحشك بس طالما ده لمصلحتك فربنا معاك
بجد شكرا على كل كلمة قلتها وكل بوست نشرته فرحنا وادانا امل جديد في الحياة وشكرا على كل بوست نشرته خدنا منه عظة وعبرة لبكرة وشكرا على كل بوست عرفنا منه ان في ناس كتير محتاجين مننا دعاء ومساعدة وان واجبنا كدكاترة بيحتم علينا اننا ندور على الناس دي ونساعدها وشكرا على كل بوست دعتنا فيه اننا نقوي فيه علاقتنا بربنا ونتأمل في كتابه الكريم
بجد لو قعدت من هنا لبكرة اشكرك مش هوفيك حقك فبجد شكرا شكرا وكل اللي اقدر اعمله انه ادعيلك ربنا يجازيك خير على كل اللي عملته وبتعمله وربنا يكرمك ويوفقك انت وكل زمايلك
بجد هنفتقد كلام حضرتك ياريت متطولش الغيبة علينا وكل سنة وحضرتك طيب بمناسبة العيد وبمناسبة مرور سنتين على عمر المدونة
بس معلش حضرتك مقلتش ازاي ممكن نساعد الناس اللي حضرتك قلت عليهم في البوست ياريت تقولنا ازاي ممكن نقابلهم او انه هيبقى عن طريق حضرتك
ربنا يكرمك مرة تانية ومستنيينك دايما

ليس فقيرا من يحب said...

السلام عليكم

كل سنه وحضرتك طيب يارب

عيد سعيد عليك وعلى كل حبايبك يارب

ربنا يكرمك ويوفقك وترجع بالف سلامه

ربنا يجازيك خير يارب

maha said...

جزاك الله خيرا دكتور محمود وان شاء الله ربنا يجازيك كل خير ويوفقك ويكرمك في الامتحانات انت وكل طلبة سنة سادسة

وان شاء الله تكون من المقبولين في رمضان

انا فعلا هافتقد المدونة جدا
انا متابعاها من زمان اوى بس دى اول مرة اكتب كومنت

اما عن سورة الزمر فهى من احلى الصور اللى بعشق قرايتها وبتريحني نفسيا جدا
لكن حضرتك اضفتلى معان جديدة اول مرة احسها بالطريقة دى
جزاك الله خيرا

۩۝۩ Dr. Flavio ۩۝۩ said...

لم أعد أتابع المدونات منذ فتره ولكن ارتباطي بمدونتك هو ما جعلني أتسلل إليها الآن وأقرأها ولم أكن أعلم أنك بعثت بتدوينه جديده

ارتبطت بها .. لأني بكيت كثيرا على صفحاتها

فيه اكتر من موضوع ابكوني عندك وأكتر من قصيده لك أحفظها وتحملني إلى أحاسيس مختلفه كلما اقرأها

جزاك الله خيرا يا محمود ويارب يجعل مساعيك في ميزان حسناتك

the last ray said...

دكتور محمود
ايه رأي حضرتك مادام كده كده مش هتكتب حاجة على المدونة
انك تكمل مشروع انا حسيت بالآية دي النهاردة
يعنينبدأ المشروع من الأول وحضرتك حتى لو مش معانا فالمدونة مدونتنا كلنا
انا بقول كده لإن الموضوع كان عاجبني جدا وأجبرني اني أشارك فيه رغم اني ماليش في التعليقات
وحسيت فيه بحاجات حلوة أوي
ياريت تقدر ترجعه و أكيد لو رد واحد هينكتب هيبقى في ميزان حسناتك
حتى عشان مايبقاش تأملنا للقرآن في رمضان وبس
وتبقى دعوة للتأمل بعد رمضان كمان
ايه رأي حضرتك

semsema said...

ازيك يا محمود
يارب بخير وربنا ييسر الفترة الجاية دي علي الجميع
أحببت مدونتك لانني بكيت كثيرا بين يدي حروفها
ربنا يثيبك علي كل ما كتبته يداك عليها
في امان الله وحفظه

Anonymous said...

السلام عليكم ورحمة الله وبركاته
انا تعبت بجد من كتر مابقولك الله عليك ياحودة بس بالله الله عليك انا من يوم ماعرفتك وانا بستمتع بكل كلمه بتقولها وبتكتبها ربنا يخليك بجد
وبالنسبه لصحابك لله مااعطى وله مااخذ وكل شىء عنده بااجل مسمى والحمد لله انو ربنا اثلج صدرك بالرؤيه اللى اراكها
الاخر باه ياسى حودة بجد بجد بحترمك وبعزك جدا وزاد ده لما قلت انك عاشق سووووووورة الزمر الله عليك بجد رائع السورة دى عشق قلبى وبالذات ايه( وسيق اللذين اتقوا ربهم الى الجنة زمرا حتى اذا جااااؤها وفتحت ابوابها وقال لهم خزنتها سلام عليكم طبتم فادخلوها خااااااااااااالدين)
بجد شوف العظمه زمرررررررراااااااا
يلا يا حوده مش عارفه اقولك ايه بجد
بجد بحترمك جدا واحبك فالله
F.A