كان الله في عون العبد

Monday, November 30, 2009

السلام عليكم ورحمة الله
يارب تكون كل الناس خير
انا جاي اكتب النهاردة لسببين
اولا وده السبب المهم انا كنت حكيتلكم قبل كده هنا عن حالات محتاجة مساعدة
بفضل الله انا وزمايلي لاقينا تعاون غير عادي من ناس كتير منكم
أكتر مليون مرة من اللي بنحلم بيه
وفي الفترة اللي فاتت قبل ما نقعد من الدراسة انا وصلت كل الفلوس مطرح ما كل واحد طلب مني
واللي ماحددوش حاجة معينة كان فيه تلات بنات بيتجوزوا لميت كل المبالغ اللي جاتلي
وحطيتها في جهازهم وربنا بارك في الفلوس الحمد لله والتلاتة اتجوزوا العيد ده
ماقدرتش احضر أفراحهم للأسف بس امهاتهم اتصلوا بي وبيدعيلكوا كلكم
لإنكم كنت سبب في فرحة بناتهم - وجبر خاطرهم - ودي حاجة انا بشوفها كبيرة أوي
المهم فاضل حالتين انا كنت من الناس اللي مسئولة عنهم بس دلوقتي ماعادشي معايا فلوس باقية
والحالتين اتصلوا بينا وللأسف ماقدرناش نعمللهم حاجة وده شعور صعب جدا عليا
الحالة الأولى حالة الست بتاع التحاليل اللي حكيتلكوا عنها قبل كده
والحالة التانية أسرة من الأيتام عايشين مع جدهم
بالنسبة للحالة الأولي انا بفكر في حلين إلى جانب أي مبلغ ممكن أي حد يساعد بيه
أول حل لو حد هنا يقدر يدّخل معايا ونقدر نخلي موضوع التحاليل ده ببلاش
يعني حد يكون ليه معرفة او حاجة في العلاج على نفقة الدولة او وزارة الصحة
ويكون يعرف طريقة نخللى التحاليل دي مجانية يبقى جزاه الله خيرا
وعشان يعرف يسأل ..هي التحاليل المطلوبة اللي بتنعمل كل أسبوعين
للناس اللي بياخدوا حقن انترفيرون بميتين وأربعين جنيه والتحليل اللي بينعمل
كل شهرين بربعمية وخمسين جنيه لو حد يقدر يحاول وانا هحاول وربنا ييسر
والحاجة التانية هي ان مافيش اي جهة اتصال بيني وبين الست دي
وبستني كتير على ما هي بتعرف تتصل بي و كمان بيبقى فيه ناس حابة تساعدها
ويمكن يبقوا محروجين مني او مش عايزين يبانوا في الصورة بأي شكل
ففكرنا لو أي حد معاه عدة موبايل قديمة مستغني عنها ممكن يجيبهالنا
تكون يادويك بس شغالة على اد الاستقبال مش لازم تكون عدة كويسة المهم تكون شغالة
بحيث لو أي حد عايز بيها يتصل بي او يبعتلي وانا هبعتله نمرتها ويبقى منه ليها علطول
انا عارف اني طولت اوي بخصوص الست بس ده يمكن عشان انا ارتبطت بيها جدا
وهي كمان ست عفيفة أوي وبتتحرج أوي تطلب من أي حد تاني
وبالنسبة للأيتام برضو اللي ربنا يقدره بأي حاجة ولو بسيطة واحنا هنوصللكم للشخص
المسئول عنهم وان شاء الله ربنا يجعله في ميزان حسناتكم
ويمكن حد يقول انه مش وقته بس يمكن لما نفك كرب ناس زي دي
ربنا ساعتها يفك كربنا احنا كمان
زمايلي في سنة سادتة كفاية عليهم لحد كده عشان ما أعطلهمش
حابب أقوللهم بس ماحدش يقول شكرا على أي حاجة بالعكس
انا اللي على جميل ليكم كلكم لإنكم كنتم السبب ان يبقى ليا
اسم وسمعة انا بجد ما استحقهمش وانتم اكبر سبب ان المدونة دي
لسة موجودة لحد دلوقتي ..انا بس حاولت أقول شكرا بطريقة عملية
ومش شايف - بدون مبالغة - إني عملت حاجة لسة
كل واحد بس يركز في مذاكرته دلوقتي وهنخلى الكلام ده لبعدين
ربنا يوفقكم وينول كل حد فيكم اللي بيتمناه ان شاء الله
آخر حاجة عايز أطلبه منكم انكم تدعولي يا جماعة
ادعولي بجد
انا بعيش فترة صعبة جدا مش عشان الامتحانات ولا حاجة
انا بقالي فترة طويلة يمكن أكتر من سنة بعاني من حالة أرق مزمن
بيعدي على ايام طويلة مابعرفشي انام فيها خالص
وخدت كل الأدوية والمنومات وعملت كل حاجة ممكت تتخيلوها ومفيش فايدة
انا عارف انه مش صح ان الواحد يقول حاجة أدام الناس كده
بس اتفاجئت بناس كتيرة جدا من أصحابي بيقابلوني ويتصلوا بي
وبيسألوني نفس السؤال محمود هو انت زعلان مننا في حاجة...شكلك زعلان؟؟
انا والله مش زعلان من أي حد بس الحكاية هو التوهان اللي بعاني
منه بسبب الموضوع ده ..وده شعور ماحدش يعرفه بجد غير اللي جربه
لدرجة ان النهاردة خارج مخصوص عشان اجيب حاجات الدكتور جمال
لإني رغم ان كان معايا حوالي مية وخمسين اسطوانة وزعتهم كلهم ونسيت أخليلي واحدة
ادعولي مش بس ان موضوع النوم ده ينتظم
ادعولي ان مايتسربشي لي أبدا شعور بالزهق او بالسخط من الموضوع ده
لإن لو ده حصل هكره نفسي جدا
وادعوا لكل زمايلي في سنة سادتة لإن معظمهم بيمر بنفس الظروف بصورة او بأخري
ادعولي

6 comments:

Anonymous said...

rbna ykrmk ya m7mod yarab enta w kol elly zayyak w ye3enak dymn 3ala fe3l elkher

3ala fekra 3bd elra7man masha2 allah sokkar awy rbna yekhalleholko yarab

(HALA)

د.ميريهان said...

ربنا يعينكم يادكتور محمود....ويجازيك بفعل الخير اللي بتعمله في الامتحانات الفينال....ويزيل عنك كل سبب للارق والقلق...ويبعث الطمأنينة في قلوبكم...ويثبتكم ياااارب...
ويحقق امانيكم وتخلصوا على خير...ونفرح بتخرجكم ياااارب...امين

Anonymous said...

مشكلة ان بودى يطلع زيك يا حودة مش كفاية واحد

طبعا عرفتنى

Anonymous said...

السلام عليكم
الحل الوحيد اللى نفع معايا للأرق اللي بيجينى ايام الامتحانات الاستعانة بالله(واذا استعنت فاستعن بالله)
والدعاء الكتير فى كل صلاة انا بادعى (اللهم اعنى على النوم لما اعوز انام والصحيان لما اعوز اصحى يارب اكون قدرت افيدك ويارب تدعيلى

Anonymous said...

ربنا يكرمك ويوفقك على كل التعب والمجهود اللى قمت بيه وان شاء الله ربنا حيجازيك كل خير ف الدنيا والاخره ويحقق كل اللى بتتمناه لانك من الشخصيات اللى فعلا تستحق كل خير

وربنا قادر يصلح لك الاحوال وتعرف تنام كويس

أنــا said...

الف سلامه عليك يا دكتر محمود وربنا يبعد عنك اي ارق وتعب بازن الله ..
ويجعل كل اللي بتعمله في ميزان حسناتك يارب ..

اتمنى تبقى باتم صحة ويارب نشوفك قريب وانت بتقولنا انك بقيت كويس وبتنام بانتظام ..
وترجع تكتب شعر تاني .. مش عارفه ليه حاسه انك بطلت تكتب !!.. يمكن عشان انت بتبعد فترات طويله عن المدونه ..
او بتكتب في المناسبات .. ياريت تبقى متواجد على طول ..
تمنياتي بالتوفيق والسداد الدائم من الله .. وكمان يارب تكون حليت كويس في امتحاناتك
ربنا يوفقك