نشرة أخبار رجلين حوكشة

Saturday, January 23, 2010

السلام عليكم ورحمة الله
يارب يكون كل الناس بخير...مععلهشي عودة متأخرة بس لما تعرفوا هتعذروني
أولا الحمد لله الذي بنعمته تتم الصالحات
انا بقيت دكتور بفضل الله بعد ست سنين ونص من المعاناة ربنا يجعلهم في ميزان حسناتنا ان شاء الله
وثانيا برضو الحمد لله ...أنا أول ماخلصت امتحان اتجبست الحمد لله
هي حاجة بسيطة الحمد لله ..كسر في صباع رجلي...بس كان لازم يتجبس
شكرا لكل الناس اللي اتصلت بي واللي بعتولي واللي سألوا على ربنا يكرمهم
ومعلهشي اني قصرت في حق المدونة بس غصب عني
انا كان في نيتي حاجت كتير عايز أكتبها بس قدر الله وما شاء فعل
انا حتى خليت محمد صاحبي جابني على الموتسيكل لحد السيبر هنا عشان أسلم عليكوا كلكم
وان شاء الله هحاول آجي تاني..ولما أفك الجبس هرجع اكتب كل تلات ان شاء الله
وبما إني جيت لازم أحاول اكتب حاجة برضو
فيه فكرة جت على دماغي دلوقتي
نشرة أخبار حادثة حوكشة
هو نفس الخبر بس هتخيل كل حتة هنذيعه إزاي
.........................................
على التليفزيون المصري...نشرة الساعة تسعة
يتابع الرئيس مبارك عن كثب... وهو مركز يعني...آخر تطورات الحادث الأليم
الذي ألم بالمواطن /حوكشة الطويل وقد أصدر السيد الرئيس توجيهاته إلى الحكومة بسرعة البدء
في التحقيقات للوقوف على ملابسات الحادث...في الوقت الذي صرح فيه
الوزير عمرو سليمان بإن الحادث حادث فردي ولا توجد
أي شبهة لأعمال إرهابية وأوضح أن الموضوع
امر داخلي بحت..داخلي آخر حاجة عني... وان مصر لن تسمح
أن يكون الحادث ذريعة...حجة يعني...للتدخل في شئونها الداخلية
هذا وسنوافيكم بالجديد في خدماتنا الإخبارية القادمة
...........................
الخبر على قناة الأهلي
في الوقت الذي كانت فيه تعقد...بتحط يعني...أملا كبيرا في لحاق
لاعب المنتخب /حوكشة الطويل...معلهشي هي وسعت شوية...بالمنتخب في دور الأربعة
في حال فوزه على الكاميرون ...عادوته الإصابة من جديد لتصيب ملايين المصريين
بخيبة الأمل وخاصة في ظل غياب أبوتريكة وبركات وعمرو زكي
وقد صرح الدكتور إيهاب على إن الإصابة ستتطلب البقاء في الجبس لمدة أسبوعين على الأقل
يبدأ بعدها اللاعب برنامج تأهيلي تحت إشراف الطبيب الألماني
وقد أعرب جوارديولا__دا مدرب برشلونة عشان فيه ناس في طب...عن خيبة أمله
وذلك لأن الإصابة سوف تحرمه من التعاقد مع اللاعب خلال انتقالات يناير
ليكون إلى جوار ميسي وابراهيموفيتش في هجوم النادي الكتالوني....اللي هو برشلونة عشان فيه ناس في طب
وبمناسبة الناس اللي في سنة سادتة اللي لسة مخلصين
منتخبنا هيلعب بعد بكرة ان شاء الله في بطولة اسمها كأس أمم إفريقيا
اللي لسة صاحي منهم يبقى يتفرج
.......................................
الخبر على قناة الجزيرة
كعادتها نفت الحكومة المصري وجود أيادي خفية...من تحت الحزام يعني...تقف
وراء حادثة صابع حوكشة التي أثارت الرأي العام المصري
في الوقت الذي تشير فيه أصابع الأتهام إلى ضلوع....يعني متورطة...قوي إقليمية
في ذلك الحادث ولم تستطع تصريحات الحكومة المصرية أن تخفي حالة الإحتقان
التي تسود الشاعر المصري إبان...يعني بعد...الحادث الأليم
.................................................
على فناة السي إن إن
تتابع الإدارة الأمريكية عن كثب...بتقلد الريس بتاعنا يعني...آخر تطورات
حادثة حوكشة الشهيرة وأبدت الإدارة الأمريكية قلقها إزاء العنف المتصاعد بالشرق الأوسط
وأوضحت انها لن تقف مكتوفة الأيدي...يعني ربنا يستر...إزاء الوضع المتدهور بالشرق الأوسط
خصوصا إن الحادث لا يعتبر الأول من نوعه ...كنت إنكسرت قبل كده السنة اللي فاتت برضو..
وحذرت مصر من مغبة...من البلاوي اللي هتحصل يعني إذا أصرت على تجاهل القضية
.......................................
كفاية عشان ما أطولشي عليكوا
ألف شكر لكل الناس على كل حاجة
لربنا يحميكوا ويوفقكوا كلكم ان شاء الله

14 comments:

اميره الاسلام said...

الف الف سلامه عليك يامحمود ربنا يجعله فى ميزان حسناتك وتفك الجبس عن قريب بس نصيحه طبيبه بقه ........اشرب لبن كتير واقعد فى الشمس كتير عشان واضح ان عندك نقص فى فيتامين Dواللكالسيوم

fatma atiya said...

شفاك الله وعفاك د_ محمود
تمنياتى لك بالشفاء العاجل

وما شاء الله عليك حلوة نشرة الاخبار ديت وان شاء الله تفك الجبس وترجع تمتعنا من تانى كل تلات ان شاء الله

عمر said...

ألف ألف سلامة يا طيبيب - لسه ما بقناش دكاترة عشان مافيش حد واخد دكتوراة يقول لك انت لسه طبيب

شفاك الله وعافاك ، لا بأس طهور إن شاء الله

وألف مبروك مقدما إن شاء الله على النتيجة ليك ولينا

يارب

alemam said...

ألف سلامه يا دكتور محمود
لا بأس طهور ان شاء الله
أسأل الله العظيم رب العرش الكريم أن يشفيك

Anonymous said...

ألف مليون سلامة لك ي " حوكشة" قصدى يادكتور محمود "عايزينك تشد حيلك بسرعة و ترجع للمنتخب . أصل الواد إيتو و سونج مش ناوين يجيبوها البر مع المنتخب . و محدش هيقدر يوقفم عند حدهم إلا انت. كل المصريين بيدعولك علشان ترجع و تنور الملعب من تانى
أخوك الكبير/ أشرف

د/عرفه said...

ألف سلامة عليك يا حودة

دايما كه المؤمن مصاب


وتلاقيك لخدت عين جامدة كده بمناسبة ان الامتحانات خلصت
امال بقى لما النتيجة تبان
متنساش تقرا قرآن على نفسك
وربنا يحفظك
ان شاء الله

۩۝۩ Dr. Flavio ۩۝۩ said...

ماشي يا عم حوكشه

ربنا يقومك بالسلامه وترجع تبدع أشعار وتملا المكتبات دواوين

لأنك اكيد متوقف الفتره دي بسبب الجبس

زمان فاروق جويده بيزرغط



كل الأمنيات الطيبه يا أخي الحبيب

quiet_storm said...

الف سلامه عليك يا محمود الحمد لله انها جت بسيطه
والف مبروك التخرج وباذن الله تبقى النتيجه فيها الشفا:D

نشره جامده بجد
بس انت كدا نسيت النشره الفنيه يافرحه احمد حلمى وكريم عبد العزيز دلوقتى

عندما تنهمر الدموع said...

السلام عليكم ورحمة الله وبركاته
ازيك يا دكتور محمود يارب تكون بخير والف مبروك كونك الحمد لله اصبحت دكتور وخرجت من الكلية دي بخساير بسيطة يارب عقبال ما تبقى اشهر دكتور في مصر كلها
والف سلامة على صابعك ابقى خد بالك من نفسك بعد كده
ربنا يكرمك ويوفقك ومستنيينك دايما

natural magic said...

الف سلامه يا محمود
ربنا يشفيك ويعافيك يارب
ومبروك عليك وعلينا كلنا انتهاء الطب
ويارب يارب تكمل بخير بالنتيجه

Anonymous said...

سلامتك الف سلامه
ادى اخرتها مع سنه ساته
بس الحمدلله انه جات لحد كده ولازم تاخد بالك بعد كده من رجليك بالذات
ولازم تطيب خاطرها على اللى بتعمله فيها مش كل يوم متجبسه
ومبروك عليك الاجازه وعقبال ما نبارك على النتيجه والتخرج ان شاء الله

دوك ميرو

د.ميريهان said...

سلامات ياكتور محمود....لابأس طهور ان شاءالله.....
الحمدلله انك انتهيت من الامتحانات بكده....وعقلك مازال معك...هههه
ومبارك ألف ياطبيبنا...ربنا يوفقك وتحقق أممانيك في دراستك وحياتك...
وربنا يقدرك وتبقى دايما زي مااعتدناك بادئ بالخير ومساعد لغيرك....

في انتظار ابداعك الذي منعك عنه سيل الامتحانات الجارف........

أكرمك ربي وشفاك

Anonymous said...

روح ياله العب بعيد يا دكترة

Anonymous said...

السلام عليكم
الله ياحووووووووووووودة انى مااعرف انك كنت مريض شيه حاجات بالله كانت منعانى من دخل مدونتك اللى انا مدمنة دخلها
لا بـــــــــــــ طهورـــــــــأس يااجمل حوده فالدنيا
F.A