اللهم لك الحمد

Wednesday, February 10, 2010

كم من سنين ٍ في الذنوب أضــعتـُـها
وحويتُ في صدري فؤادا ً لا يـَـرقْ
وبرغم ذاك ستـــرتني و رزقــــتني
أعطيـــــتني يارب ما لا أستـــــحقْ
..........................
اللهم لك الحمد
اللهم لك الحمد
اللهم لك الحمد كما ينبغي لجلال وجهك وعظيم سلطانك
إن القلوب التي لاتعرف الله تري حتى في عطائه حرمانا ً من النعمة
اما القلوب التي تعرفه فتري حتى في حرمانه من النعمة عطاءاً
أنا الحمد لله يا جماعة جبت جيد جدا
1128
مش هكدب عليكوا وهقوللكم إن ده اقل بكتير من اللي كنت بتمناه واللي كنت مستنيه
ومش هكدب عليكوا أنا كان نفسي أوي أجيب امتياز السنادي بالذات
بس ربنا شاء كده وانا والله الحمد لله راضي ومتأكد إن ربنا ليه حكمة في كده
وكلمة قولتها قبل كده بس نفسي أفكر نفسي وافكركم بيها
خصوصا وانا شايف حالة الحزن اللي مسيطرة على ناس كتير من زمايلي وانا منهم
يمكن كان كل واحد مننا نفسه يجيب درجات معينة عشان توديه في مكان معين
هو مختاره لنفسه
بس ربنا إدي لكل واحد مننا ردجات معينة عشان توديه
في مكان معين ربناا مختارهوله
اكيد اللي ربنا مختاره لينا أحسن بكيتر من اللي احنا مختارينه لنفسنا
حتى لو احنا بنظرتنا الضيقة شايفين غير كده
وفيه ناس انا عارف انها تعبت اوي وماخدتش حقها في النتيجة دي
بس دايما بفتكر في الاوقات اللي زي دي موقف عمري ما بنساه
حصللي من حوالي خمس سنين
كنت على الكوبري في بلدنا وكان في جيبي اتنين جنيه ونص
وافتكرت إن عليا اتنين جنيه ونص للست بتاعت العيش لإني رحت اشتريت
منها مرة بإتنين جنيه ونص من شهرين وماكانشي معايا فكة وقتها
رحت إدتها الاتنين جنيه ونص رغم إنها ماكاتتشي فاكراهم
وروحت بس وانا في الطريق بعد الكوبري بحوالي ميت متر لاقيت
اللي شغال في محل بقالة هناك بينادي عليا يا دكتر استني يا دكتر
بصيت لاقيته جايبلي اتنين جنيه ونص وبيقوللي ان دول
بقية عشرة جنيه كنت خدت منها خدت حاجة منه بيها
والفكة معاه ماكملتشي الباقي
خدتهم وأنا فرحان جدا مش عشان الاتنين جنيه ونص ....عشان حسيت
ان كل حاجة في حياتنا ممكن تبقى زي الاتنين جنيه ونص دول
ممكن نعمل حاجة ونبقى مستنين مقابل وما نلاقيش المقابل ده ونزعل اوي
واحنا مش عارفين إنه ممكن ربنا يبى شايلهولنا في حاجات تانية
في صحتنا في مالنا في راحة بالنا في حب الناس لينا في بركة في رزقنا
حتى لو ماكانشي في ده ...اللي عملناه هيتشال لينا هناك في الآخرة
في اكتر وقث هنكون محتاجين فيه لكل حاجة حلوة عملناها
انا شخصيا كان ليا حلم في دماغي في الطب ليه قصة طويلة
يمكن الحلم ده بعد عني دلوقتي جدا
بس الحمد لله حتى لو الواحد راح في وحدة صحية في أبعد حتة
مادام الواحد نيته خير إن شاء الله يحاول يعمل حاجة وكل اللي ربنا كاتبه خير
فاضل كلمة نفسي اقولها رغم إني ماكنتش حابب اكتبها هنا
فيه حد عزيز عليا قاللي كلمة جرحتني اوي مع إني عارف إنه بيتكلم من خوفه عليا
أصل انت شاطر تشغل نفسك بالمشرحة والمراجعات والاسطوانات والحالات
وفي الآخر مافيش حد نفعك ولا إداك درجة
انا مش زعلان ولا ندمان على اي حاجة عملتها دا لو كنت عملت حاجة أصلا
ولو الأيام اتعادت وقدرت أعمل أكتر من كده ميت مرة هعمل
وحتى لو دفعتنا ستين وحشة رغم انهم مش كده أبدا برضو كنا هنحاول نعمل حاجة
انا بحب الدفعة وبعزهم جدا وبعتبر كل من فيها زي اخواتي
وهفضل دايما فخور اني واحد منهم
في النهاية ألف مبروك لكل زمايلي...إني أحبكم في الله
ومن يوم التلات اللي جاي ان شاء الله هترجع تدوينات التلات
يارب نتقابل دايما في الخير وعلى كل خير

14 comments:

Anonymous said...

كم من سنين ٍ في الذنوب أضــعتـُـها
وحويتُ في صدري فؤادا ً لا يـَـرقْ
وبرغم ذاك ستـــرتني و رزقــــتني
أعطيـــــتني يارب ما لا أستـــــحقْ

من أجمل أجمل أجمل ما سمعت

شق القمر said...

أخى العزيييييييز جدا محمود
كل الأهل بيطمنوا عليك وبيسألونى عن أحوالك
وأكيد بيباركوك ويباركولك كتيييير أوى

أنا لما قرأت بوستك دا غير حالى لسعادة جميلة أوى.. عشان حسيت روحك الجميلة اللى تاهت من فترة كبيرة عنا بتسطع من جديد


سعيدة جدااااااااا
ربنا يديم لك الخير ويحبب فيك خلقه ويستخدمك فى الخير وللخير


واحنا مش عارفين إنه ممكن ربنا يبى شايلهولنا في حاجات تانية
في صحتنا في مالنا في راحة بالنا في حب الناس لينا في بركة في رزقنا


الجملة دى كانت غايبة عنى شوية بس الحمد لله عادت لنفسى بعد أن كتبتها أنت

وختاما............. بانتظارك بالبشر والفرح والسرور وكأننا ننتظر عيدنا فى كل ثلاثاء

موفق بأمر الله

أنا بجد سعيدة جداااا ومتفائلة لك خير جداااا ومتأكدة ان كل اخواتى شباب وبنات هيبقوا دكاترة زى السكر وبجد هيشهد ليهم انهم بكل خير

ربنا يوفقنا ويوفقكم جمييييييييييييييييييييييعا آمييييييييييين

Anonymous said...

الف مبروك النجاح وانك خلصت، النجاح مش بس انك تجيب تقدير بس هتقدره بجد اما تشنغل وتكون سبب فى علاج حد انا فى رايى هو ده النجاح الحقيقى يمكن الواحد ليس له نصيب فى التقديرات بس انشاء ربنا يوفقنا ان نحقق الهدف الحقيقى من وراء الكلية فى اى مكان مش مهم

د.ميريهان said...

الف مبارك يادكتور محمود.......وعقبال فرحنا بيكم في البكالوريا.......وحفلة التخرج..

جد فرحنا لكم كلكم الله يبارك فيكم.....
ويارب تكونوا عونا لوطن والشعب والبشر كلهم

دائما تذكرنا بما غاب عنا فجزيت كل الخير

Anonymous said...

بسم الله


هو دا الكلام
.............

سيدنا مالك والد سيدنا " أنس ابن مالك"

كان كاتب صفات معينة لزوجته وكان من

ضمن الصفات دى انها تبقي جميلة وشقراء


ولما تزوج أول مرة يشوف زوجتة كان ليلة

الدخلة...ووجدها سمراااااااااء جدا

وعلى عكس اللى كان عاوزه

فزعل طبعا و تنحى جانبا عنها


فقالت له"لعل الخير كامن في الشر"

فالكلمة دى فرحته

وتركها حوالى 18 سنة ورجع وجد ابنه

الامام أنس بن مالك عالم عظيم وبيخطب في الناس

......................


محدش عارف الخير فين

واختيار الرب للعبد أفضل من اختيار العبد لنفسه


ألف ألف مبروك

والاهم من التقدير هو النجاح بعد كده في الحياة العملية

۩۝۩ Dr. Flavio ۩۝۩ said...

حوده

اخي الحبيب

أسعدتني كلماتك الرقيقه

كثيرون رأوني غير سعيد بنتيجتي ويعلم الله أن عدم سعادتي بسبب نتيجة اخوتي المقربين وليس نتيجتي فكل شيء من الله وله الحمد

حين قرأت كلماتك ونقلت لي شعور الرضا الجميل ... أحسست أنه يجب ألا يحزن اي مننا على شيء وان ننظر للقادم بكل تفاؤل وحب

لن يبقى بيننا غير الحب

مبااااااااااااارك يا اجمل دفعه ويارب التوفيق لنا دوما

اميره الاسلام said...

مش عارفه اقول ايه بس بجدان بقدر واحترم فيك رضا نفسك وبقضاء ربنا واكيد ان شاء الله ربنا عاينلك حاجه كويسه وزى م ربنا بيقول عسى ان تكرهو شيئا وهو خير لكم

أنــا said...

اولا ... بجد بجد الف مبروووووووووووووووووووك
..
ثانيا : فعلا زي ماقولت .. ربنا مقسم لكل واحد رزقه .. هايكون فين وامتى ..
فمحدش يقدر يعترض على دا ..
اختيار ربنا لينا .. هوا احسن حاجه لينا ومكنش هاينفعنا غيره ..
فبجد بقى .. الف الف مبروك ..
ربنا بازن الله كاتبلك كل خير
ورضاك باللي ربنا كاتيبهولك .. هيخلي ربنا يباركلك في كل حاجه في حياتك ...


بجد تستاهل كل خير ..
ربنا يوفقك

Al Bassam said...

الحمد لله رب العالمين

الحمد لله الذى بنعمته تتم الصالحات

الحمد لله..الحمد لله.. الحمد لله


ألف ألف ألف مبروك يا حبيب قلبى

الحمد لله الأولى على التوفيق والنجاح

والحمد لله التانيةعلى الرضا بالله ورزقه

والحمد لله التالته على نجاحكم جميعا

والحمد لله كمان مرة على عودتى بالسلامه لبيتنا الغالى،.. ده أول تعليق أكتبهولك يا حوده من بيتنا، فالحمد لله أنه يكون عن نجاحك بفضل الله

نفع الله بكم ووفقكم لما فيه كل خير
وليس هناك أجمل ولا أصدق من قول الله عز وجل
(وعسى أن تكرهوا شيئاويجعل الله فيه خيرا كثيرا)

تحياتى ...ولو بعرف أزغرت كنت زغرتت والله بس ليك واحده يوم فرحك ان شاء الله

Anonymous said...

الحمد لله رب العالمين
والف مليون مبروك
وعقبال الماجستر والدكتوراه
وانت فى اسعد حال ان شاء الله

دوك ميرو

محمد عبد الباسط said...

الف مبروك يا محمود


وعقبال الماجستير والدكتوراه


اخوك محمد عبد الباسط

Anonymous said...

مليون مبروووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووك يا دكتور المستقبل بس اكشف علينا ببلاش

Anonymous said...

ألف مبروك على النجاح والحمد لله وانا والله يادكتور محمود لامسه حب الله فيك وكمان شايفة فيك دكتور بجد وان شاء الله بكرة هتبقى حاجة كبيرة وهتتأكد إن اختيار ربنا سبحانه دايما جميل اتمنى لك وللجميع بالتوفيق وإلى الأمام دائما مبارك النجاح

عندما تنهمر الدموع said...

السلام عليكم ورحمة الله وبركاته
الف الف مبروك يا د/محمود والحمد لله ان ربنا عوض تعبك خير
وزي ما حضرتك قلت مش مهم التقدير اد ما مهم انك تعمل حاجة تساعد بيها الناس وتكون نيتك خير
الف مبروك مرة تانية وعقبال الماجستير والدكتوراة