الصيدلية

Tuesday, April 27, 2010

السلام عليكم ورحمة الله
معلهشي البوست ده هو الأهم في بوستين كتبتهم النهاردة
معلهشي يا جماعة النهاردة بس فيه كلام مهم جدا بخصوص موضوع الصيدلية
اللي حكيتلم عنه قبل كده
اولا اهم حاجة لازم أقولها ان دي فكرة اسلام الشاذلي وهو أكتر حد

تعب جدا في الموضوع من اول ما بدأ لحد دلوقتي...ربنا يجازيه كل خير

ثانيا الفكرة باختصار ان فيه أدوية ممكن تكون مركونة عند ناس مننا

سواء كان مثلا واخدها كعينات مجانية...او بتاعة حد كان تعبان عندهم مثلا

وربنا أتم شفاه الحمد لله او ماعادشي بيستخدم الدوا ده والدوا فضل مركون عنده

او دوا كان بيستخدمه حد وربنا توفاه قبل ما يكمل الدوا وحابين ان الدوا ده يبقى صدقة على روحه

فالفكرة انا ننلم الأدوية دي من الناس حتى لو شريط أو أمبول واحد.

وهنعمل بيهم لستة مبدأية نوزعها على زمايلنا ونعرفهم ان الأدوية دي موجودة معانا

بحيث هما لو قابلوا على مدار السنادي حالة هما حاسين انها مش قادرة على تمن الدوا

ساعتها هيبلغونا واحنا نحاول نوفره مادام موجود معانا ان شاء الله

و من خلال الدعاية الصغيرة اللي قام بيها اسلام وساعدناه فيها على أد ما قدرنا

جالنا كمية دوا كويسة جدا واسلام تعب جدا عشان يعملها في لستة


وكانت مهمتي اني أنزل طنطا و احاول أوصل الفكرة لأكبر عدد من زمايلنا

انا حاولت على اد ما قدرت اني أكلم معظم زمايلي اللي لاقيتهم يومها

والحمد لله لاقيت تجاوب كتير من ناس منهم ولاقيت ناس حابة تشارك بكذا صورة

بس لسة فيه عوائق كتير أدام الموضوع محتاجينكوا معانا فيها

أولا لسة الفكرة ماوصلتشي لناس كتير فياريت اللي خد مننا نسخة
يصورها ويحاول يوصل فكرة الموضوع لأكبر عدد يقدر عليه

تاني حاجة و اهم حاجة احنا عندنا مشكلة كبيرة في المكان

الأدوية دلوقتي لسة مع اسلام وهيبقى صعب عليه جدا انه يكون موجود في كل وقت

لو حد عنده أي أفكر بخصوص المكان ياريت يقولنا

احنا محتاجين يكون قريب من الجامعة وسهل الوصول اليه

ويكون فيه حد متواجد فيه يصرف العلاج للعيانين

بحيث ان زمايلنا تلقائيا يبعتوا العيانين على هناك علطول من غير مانبقى احنا في النص
بس ازاي؟؟؟؟؟
كنا بنفكر نعمل ميرج مع جمعية رسالة بس للأسف مقر صيديلتهم في المحلة
وفيه جمعيات تانية بس بصراحة احنا مش عارفين الجمعيات دول هياخدوا مننا ولا هيدونا

فيه فكرة ان الدوا يبقى مع زمايلنا في السكن
بس برضو صعب ان علطول يبقى حد منهم موجود باستمرار
ولو استحملونا النهاردة مش هيستحملونا بكرة

فيه فكرة اننا نأجر مكان في أي سنتر محترم
نقدر نأتمن الناس اللي فيه ونخلى حد من اللي شغالين فيه يبقى مسئول عنه
بحيث ياخد الادوية من الناس المتبرعين و برضو يصرف الأدوية للناس اللي محتاجين
وده طبعا مقابل مبلغ هياخده
بس هيبقى أسهل لينا أكتر و أيسر للجميع

وفيه فكرة جميلة اوي بس تنفيذها صعب
لو حد من زمايلنا عنده أو يعرف صيدلية تطون حريصة على الخير
هنودي أدويتنا هناك ونبعتلهم العيانين بكارت يصرفوله العلاج
ولو الدوا مش متوفر من اللي احنا اديناه ليهم هيصرفوه من عندهم
وفي آخر كل شهر نحاسبهم على الدوا الزيادة ده

لو حد يقدر يساعدنا في ده أو عنده اي فكرة بخصوص المكان ياريت يساعدنا

كمان يا جماعة احنا محتاجين ناس معانا
اسلام بيتعب جدا لوحده وخصوصا اني معظم الوقت في القاهرة
لو حد حابب يشاركنا بأي شكل يبقى جزاه الله خيرا
سواء مثلا يبقوا من اللي بيستلموا الأدوية من الناس
او اللي هيعملوا جرد ويكتبوا الأدوية في لستة كمبيوتر وهكذا

انا ان شاء الله نازل يوم الخميس عشان هقبض وراجع تاني
كان فيه ناس كتير قالتلي ان عندها علاج حابة تجيبوا لينا
ياريت في اليوم ده أقدر آخده منهم
دي نمرتي
0199849267
ولو أي حد من زوار المدونة عنده دوا أكيد برضو تشرفنا ثقته فينا

دايما لما كتبت هنا عن أي حاجة في الخير
كان رد فعلكوا أكبر بكتير مما كنت بحلم
أتمنى الاقي نفس رد الفعل في الموضوع ده
لإن الواحد قابل ناس بتفرق معاهم الحباية اللي تمنها نص جنيه بس
ربنا يكرمنا ويوفقنا ويطهر نيتنا وينور بصرنا وبصيرتنا

8 comments:

sony2000 said...

بجد ربنا معاك
ويساعدك ذي مابتساعه الناس
اللهم امين:)

Little Angel said...

ان شاء الله يامحمود هاحاول والله وهانشر موضوع جزاكم الله كل خير ..

KEBLAWYAT said...

احنا عاملين حاجه زى كده فى كفر الشيخ

وعندنا دوا احنا كمان

ممكن نبقى نظبط مع بعض بحيث يبقى الليسته فيها الدوا اللى هنا وهنا

Anonymous said...

Just God Bless u

no name said...

Just God Bless u

Anonymous said...

السلام عليكم ورحمة الله وبركاته ....في الاول بجد جزاك الله خيرا علي الفكرة الرائعة دي وانت بجد من اكتر الناس الايجابيين اللي شوفتهم في حياتي انا بس كنت بسال واحدة صيدلانية اذا كان ممكن تساعدكم في المشروع دة فقالتلي ان جمعية الرداء الابيض بترحب بالافكار دي حتي هي كان عندها ادؤيو ووديتهالهم هي بتاعت د.نزار بتاع الجراحة لو عايز موبايله ابعتهولك وربنا يقدر الخير يارب....

just god bless u said...

السلام عليكم
ربنا يوفقك ويقدرك ديما على فعل الخير
بالنسبة لموضوع الصيدلية دة انا معرفش افيدك
لكن ممكن اجمع ادوية من عندنا فالبيت وكمان اخويا ميديكال ريب فى شركة ادوية وبيجيله عينات مجانية كتير
انا بس حاليا عندى امتحان نسا
باذن الله لما اخلصه واقدر اجمع كمية كويسة مالعلاج هكلم حضرتك ونشوف هنوديهم فين
الله كريم

jacyvahl said...

Harrah's Casino Hotel, Atlantic City - Mapyro
Find the best prices on 서귀포 출장샵 Harrah's 의정부 출장샵 Casino Hotel in Atlantic City (New 포천 출장샵 Jersey), United States. 구미 출장샵 Map with all 2224 hotel rooms and suites 삼척 출장마사지 available in