أنا دكتور

Wednesday, June 16, 2010

انا دكتور
بعالج ...بس ما أشفيشي
وتبقى الحالة في إيديـّـا
لا موتها دا حاجة بإيديا
ولا اقدر أقوللها عيشي
وتبقى الدمعة في عينيـّـا
لكن علشان أنا دكتور
بكون مضطر ...ما أبكيشي
لكن بحلم وحلمي كبير
أكون فوق الوشوش بسمة
تكون مـ ِالقلب مش رسمة
و الاقي كلمتي راسمة
على وشوش البشر تفاريح
و الاقي الحلم جوايا
بيتحول لورداية
أقدّمها بضحاية
هدية لكل قلب جريح
أنا انسان بيتمنى
يكون أنسان
انا انسان
كتير بيداري أحزانه
عشان عايز
بضحكة يعالج الأحزان
يداوي الخلق لو تتعب
ومش من حقه ولا لحظة
يكون تعبان
سنين العمر قضّاها
يواصل ليلها بنهارها
كتاب بيسلمه لكتاب
كإنه مكانه بين كتبه
لكن بين البشر زيـّه
مالوهشي مكان
انا إنسان
بيتمنى يكون حاجة
بيحلم يدّي لو يقدر...بصيص النور
لناس للشمس محتاجة
وقلبه بيتحرق لما
يكون جواه بيتقطع عشان حالة
و يلقى الناس يشاوروا عليه
دا أعصابه.... في تلاجة
لإنه بجد بيحاول
يشيل أمل الشفا في عينيه
ومايسيبهوش
ويتحدي الظروف لكن
ساعات كل الظروف حواليه
ماتخدمهوش
ويبقى مـُناه
لآخر لحظة يعمل شئ
يراضي ضميره مهما يكون
عشان صوت الضمير جواه
مايدبحهوش
وتفضل تايهة احلامه
وبتدورّ على المأوي
لكن أدّام محاولاته
ساعات يبقى المرض أقوى
وبرضو الناس ماتعذرهوش
ويبقى طريقه مليان شوك
لكن كل البشر شايفاه
طريق بالورد كان مفروش
انا انسان
عينيه مش باصّــة لفلوسكم
انا انسان يتمنى...إذا شفتوه
تحسوا براحة في نفوسكم
بيحلم إنه مايسيبشي
رحايا الحزن تنهشكم
ولا قطر الأسى يدوسكم
أنا دكتور
بعالج روح
و أخلـّــى عينيـّـا مهما يكون
تكون مش شايفة صاحب الروح
أنا بحلم
أعالج كل كل الناس
بدون تفرّيق...بدون ما اسأل
هعالج مين...وهاخد كام
ولو حتى اللي كان جايلي
خلاص بكرة
هيتنفذ عليه الحكم بالإعدام
أنا مسئول قصاد ربي
لآخر لحظة في حياته
أعالج عنده أي آلام
أنا دكتور
ما بحلمشي
الاقي الخلق تعبانة
عشان أكسب
وتبقى عيادتي مليانة
ولما أسمع
خطيب الجمعة يدعي يقول
يارب تعافي مرضانا
بَــرُد بكل قوة آمين
وحلمي يادوب
إذا كان ربنا مقدر
لأي قلوب
تدوق طعم المرض لحظة
أحاول أخفف الأوجاع
ما أخليش شمس أحلامهم...ياخدها غروب
أنا دكتور
مابنكرشي ساعات إني
بتتسرق الحياة مني
وتسرقني الحياة مني
تشوفني عيونكوا وكإني
بكون بإرادتي أنا مقصر
و إني في لهفة الأيام
بحس بموجة الأحلام
على الواقع بتتكسر
وإني ساعات بقف عاجز
وأحس الدنيا بحر كبيييييييييييييييير
وبيني وبين عبور البحر ميت حاجز
وأخاف إني اعيش عمري
بأحلام رافضة تتفسر
مابنكرشي صحيح لكن
أنا فيـّـا الأمل ساكن
بإني أكيد في يوم هقدر
أغيـّر شئ
صحيح صعب الطريق وطويييييييل
سنين صعبة وحمل تقيل
ودمعة خنيقة رافضة تسيل
و ألف محاولة بتقاوم
عشان نقدر
نخلى العمر جوة الطب عمر جميل
عشان في قلوبنا يفضل شئ
يحب بجد ...مش تمثيل
لكنـّي برغم ده بحلم
عشان لما الزمن هيدور
أحس بإني أحلامي
خلاص قدرت تعدي السور
وأحس بإن جوايا
برغم العتمة حوالــيّـا
قدر يفضل شوية نور
و إني زرعت ورداية
في أرض البور
و إني برغم ميت حاجة
بتكسـْـرني
أنا مارضيتشي أعيش مكسور
و أقولها صريحة من غير خوف
و انا راسي رافعها لفوق
انا أستاهل...لقب دكتور

26 comments:

Unknown said...

الله اكبر عليك
ربنا يباركلك يا حوده والله بجد
تحفه تحفه تحفه
انا هعملها شير ع الفيس بوك

منــار فايد said...

من أقوى ماكتبت حقيقي يامحمود

ورااااااااااااائعه جداا
ربنا يوفقك دايما وتقدر تعمل حاجه ترضي ربنا وترضي بيها نفسك

Anonymous said...

can't say anything,you said everything!!
man you made me cry,well i wanted to cry anyway!,we lead a very hard life..thanx for saying what we can't say,i'm not gifted like you,so i can't express,God bless you DOCTOR.

محمد فوزى عرفة said...

ما شاء الله عليك يا حودة

متميز جدا ما شاء الله

وموافقك فى كل حرف من كلامك

وربنا يبارك فيك

وربنا يقدرنا
ويوفقنا فى عملنا

Anonymous said...

ماشاء الله يامحمود
ربنا يبارك فيك
بجد رائعة
وأروع مافيها انها طالعة من قلب حاسس بيها

احمد حسن طه

Anonymous said...

ربنا يكرمك

اميره الاسلام said...

عوده قويه يامحمود ماشاءالله جميله جدا
وكلام كله فى الصميم بيعبر عن اللى جونا
ويارب دايما نتساهل لقب دكتور

snowwhite said...

جميلة جدا يا محمود والله ....ما شاء الله

Anonymous said...

عندما تتحدث ألسنتنا فإنها تقول

انا دكتور

بارك الله فيكم وزادكم من فضله


احمد سعيد

Little Angel said...

الله عليك يامحمود كعادتك مبدع واجمل ما هزنى انى انسان باتمنى اكون انسان ورسم صورة الطبيب وروحانياته وازاى يؤثر كل الدنيا على نفسه يرب يرضى عنا ونكون عند حسن ظن الناس بنا ويعنا نكون زى ما انت وكلنا بنتمنى وفعلا لا يعلم بالقلوب الا مقلبها اللهم ثبتنا وربنا يبارك لك وتكون بخير دوما ..تحياتى وان بى مهمة انا تاثرت جدااااااااااااااااااااا ومش كنت ناقصة يامحمود كفاية اللى عندى

Anonymous said...

رااااااااائعة...من افضل ما كتبت ان لم تكن افضلهم

rose flower ;)

۩۝۩ Dr. Flavio ۩۝۩ said...

دمت مبدعا ً متألقا ً


تحياتي لكل كلمة تسطرها بيديك

.:Dr.ShaboMania::. said...

بجد مش من غير مجامله
مجهود عبقري منك يامحمود وقصيده ولا اروع والله بجد
ربنا يباركلك في وقتك ان شاء الله
اسمحللي اقتطف ابيات منك علي صفحتي علي الفيس لكام يوم اوعدك
الي الامام ياصاحبي

BUTTERFLY said...

واخاف اني اعيش عمري
باحلام رافضة تتفسر
ما بنكرشي صحيح لكن
انا فيا الامل ساكن
باني اكيد ف يوم هقدر
اغير شئ

دي انا بالظبط
راااااااااائعة يا دكتور محمود
بالتوفيق

Al Bassam said...

بسم الله ماشاء الله

ربنا يبارك فيك يا حودة ويوفقك انك تكون احسن مما تتمنى ان شاء الله

قصيدة رائعة لشاعر ملهم

لقد رزقك الله عز وجل الحس المرهف والتعبير الصادق والمشاعر الجياشة ، بارك الله لك وبارك فيك وبارك عليك



وأرجو انك تسامحنى ان كنت مقصر فى حقك شوية


إلى أن أراك ان شاءالله، لك منى أرق التحيات

محمد عبد الباسط said...

تسلم يا حوده ربنا يعزك
وبصراحه لو مكنش الدكتور كده يبقى فعلا ميستحقش لقب دكتور

جزاكم الله خيرا يا حوده واتمنى انك تكون بخير واسئلك الدعاء
اخوك محمد عبد الباسط

Anonymous said...

ارشح هذه القصيدة وبقوة انها تتقال في حفلة تخرجنا
احنا مش محتاجين نسمع شعر بيضحك
احنا محتاجين قصيدة فيها المعاني الحلوة دي

Unknown said...

تسلم ايدك يا دكتور
عايزاك تضيف هدف كمان لاهدافك وانت بتعالج مريض .... انك ترفع شان مصر
عفوا ليس لنا وطن اخر
ووطننا ليس له شعب اخر

هدى said...

فعلا تستاهل لقب دكتور
ماشاء الله عليك يا دكتور بجد كلام رائع جدا واحساس ممتاز
ربنا يوفقك

محمود said...

انت من الناس القليلة اللي بتفكرني بواجب الدكتور تجاه العيانين ساعات في النبطشية الضغط عليا وعدم توافر الاماكن بيخلي الواحد يقلب او استغفر الله العظيم يقصر في حق العيانين او يسمع لكلام النواب اللي اكبر منه ان الناس دي جايه تتدلع مش عيانين بجد ربنا يعينك ويعيينا ويسامحنا لو كنا في يوم قصرنا ويتجاوز عن سيئاتنا اللهم امين

عندما تنهمر الدموع said...

السلام عليكم ورحمة الله وبركاته
ازيك ياد/محمود يارب تكون بخير بجد القصيدة جميلة جدا وجمالها في انها بتعبر عننا بجد بتعبر عن كل واحد دخل الطب وحلم بيوم ما يتخرج ويكون دكتور يعني ببساطة القصيدة ترجمت اللي كان جوانا كلنا ومش عارفين نقوله او نعبر عنه
ربنا يكرمك ويوفقك دايما يارب ويحفظلك موهبتك اللي دايما بتعبر عن اللي جوانا

OPTIMISTY said...

بجد بجد تحفه جدا
ربنا يبارك لحضرتك دكتور محمود

Maria al abssi said...

كلام ولا اروع
نتمنا ان كل الدكاترة يكونوا كذا فعلا يستاهلوا لقب دكتور

Anonymous said...

رائــــــــعة

Entrümpelung said...

Succès ... S'il vous plaît noter les nouveaux sujets toujours

Entrümpelung wien said...

Dank den Themen .... Ich hoffe, mehr von den Themen