من أجندة تالتة ثانوي

Tuesday, March 17, 2009

السلام عليكم ورحمة الله
يارب يكون كل الناس بخير
مش هطول عشان عارف ان أصدقاء المدونه من سنه سادته مشغولين
هدخل في الموضوع علطول وهقول ان رد الفعل اللي لاقيته
على مواضيع قديمة لاقيتها ونشرتها هنا هو اللي شجعني اني أدور على حاجات تانية
والحاجات اللي لاقيتها النهاردة لاقيتها في أجندة زرقة صغيرة كنت واخدها
هدية من الأستاذ أشرف اللي ان شاء الله يكون بيقرا الكلام ده دلوقتي
كنت بكتب فيها الأفكار والمشاعر اللي كانت بتيجي في بالي أيام تالته ثانوي
حتى كان جميل اوي اني ألاقي فيها أول جملة كتبتها في حياتي
هو الكلام مش شعر ومش جمل ومش أي حاجه خالص
هو مجرد خواطر وتأملات عادية جدا وماكنتش اتخيل انه ممكن
ييجي يوم يكون حد مهتم يقراها
ومش هقدر أقول انه كلام جميل انا بس هقول انه كلام حسيت فيه بالبراءة
وده اللي خلاني مصمم آجي أنشره النهاردة
ندخل في الموضوع
...................................
أول جملة كتبتها
إن أكثر ما أخشاه على قلبي
ان تأتي اللحظة التي لا يجد فيها من يحبه فيحب مضطراً من سيجده
..............................
فيه ناس في حياتنا نورهم زي نور الشمس
نورهم عالي اوي وبيملى حياتنا كلها بس بيسيبنا في الليل
في اكتر وقت احنا مجتاجينه فيه
وناس نورهم زي نور القمر
يتعب اوي عشان يجيب لنا شوية نور من الشمس ينورلنا بيهم الليل ده
بس لما بتيجي الشمس مش بيلاقي لنفسه مكان فينسحب من حياتنا بالراحة
وناس نورهم زي نور بيتنا
ينورلك وقت ما انت عايز
بس للأسف الشديد لازم انت اللي تئيده بإيدك
وللأسف الأشد لازم تدفعله تمن مقابل ده
وناس نورهم زي نور التلاجة
ينورلك وقت ما انت عايز من غير ما تئيده
بس في الحاجة اللي تخصه بس ويسيبك في أي حاجة تانيه
وناس نورهم زي نور الشمعة
يجيلك في عز الضلمة لما كل الانوار تسيبك
بس عشان ينورلك بيحرق نفسه وعشان كده بينتهي في وقت قصير اوي
بس يفضل نور ربنا هو النور اللي ممكن يفضل معاك في أي وقت
وفي أي مكان..و من غير تمن
التمن الوحيد انك تختاره وتبقى مستعد تسيب اي حاجة عشان يفضل معاك
...............................................
شئ غريب أوي انه لما يبقى لينا صاحب قريب اوي منا
نقول عليه دا مش صاحبي بس.. دا زي أخويا
ولما يبقى لينا أخ قريب أوي مننا
نقول عليه دا مش بس أخويا دا احنا اصحاب
!!!!!!!!!!!!!!!!!!!!!!!!!!!!!!!!!!!!!!!
يمكن يكون ده لان احساسنا بالبشر أكبر من انه يتصنف أو يتقسم
وان الناس لما بتدخل قلبنا مش شرط يبقى معاها بطاقة هوية
مش شرط نعرف هو ليه دخل ولا هيدخل تبع أنهي مجموعه
المهم انه موجود جوانا
وكإن قلبنا بيت كبير اوي بس مافيهوش قوض من جوة
فيه ناس ممكن تدخله بسنين من العشرة وناس ممكن تدخل بكلمة واحدة
حتى مش بنختار الوقت اللي بيدخلوا فيه قلوبنا ولانعرف سبب لكده
وياما ناس معانا كل يوم ومش قادرين يدخلوا قلوبنا لحد اللحظة دي
وياما ناس شفناهم مرة واحدة بس عمرهم ماخرجوا من جوانا
وياما ناس بنرتاح بس لمجرد اننا نشوفهم من غير حتى مانعرف هما مين
لماذا نحب...سؤال ٌ أمتع ما فيه أن يظل بدون اجابة
...................................
الاسلام عمره ماكان ضد العقل ولا ضد التفكير
بس احنا لما بنشتري تليفزيون جديد من المصنع
بناخد معاه كتالوج يقولنا بينطفي من هنا ..نطفيه من هنا
الصوت بيعلى من هنا.. نعليه من هنا
حطوه بعيد عن الحيطة عشرة سنتي نحطه بعيد عن الحيطة عشرة سنتي
من غير مناقشة ومن غير مانفكر
لانه اكيد المصنع اللي عمله أدري بيه وبإيه اللي يفيده وايه اللي يضره
واحنا ربنا هو اللي خلقنا وقالنا نعيش ازاي ونعمل ايه عشان نعيش صح
وادانا عقل عشان نفكر بيه وندور على اللي يفيدنا ..بس احنا
اول ما استخدمنا العقل ده اتجرئنا بيه على اللي خلقه
وحسينا اننا نقدر نعمل كتالوج لنفسنا ونمشي بيه
مع اننا من جوانا مرتاحين للكتالوج الصح
بس ربنا كان أرحم بينا كتير من المصنع بتاع التليفزيون
لإنه خلقنا و إدانا الكتالوج بتاعنا وساب حسابنا كله للآخر
.......و ورانا احنا بنئيد منين ونطفي منين ونغير منين و
وساب لينا سؤال كبير أوي...احنا هنشغل قناة ايه؟؟؟
........................................................
ساعات بيظهر في حياتنا انسان
يمكن لو الظروف كانت غير الظروف والمكان غير المكان
كان بقى أهم انسان في حياتنا
بس بيبقى صعب علينا اوي نرتبط بيه لأسباب
ممكن ماحدش يفهمها غيرنا احنا بس
وبيبقى الموضوع أصعب لما تلاقي الانسان ده جواه مشاعر ناحيتك
وبيقى الموضوع أصعب كمان لما تكون خارج من تجربة جرحتك أوي
في وقت انت مش محتاج فيه مجرد انك تحب وبس
انت محتاج تتحب
محتاج تحس ان فيه حد شاريك وباقي عليك ومستعد يعمل اي حاجة عشانك
بس تبقى خايف اوي تقرب من الانسان ده
مع انك بتسأل نفسك ليه لأ..ليه ماتخوضشي التجربة
بس ترجع وتخاف
تخاف ان الشعور اللي جواك يبقي شعور بالاحتياج مش شعور بالحب
تخاف انك تعلق الإنسان ده بيك وفجأة تكتشف انك مش بتبادله نفسه المشاعر
لانه ساعتها هيكون بيحبك اوي ولما هينجرح هينجرح أوي
وخصوصا انك لسه دايق مرارة الجرح ده بتبقى عاملة ازاي
ومش هيبقى ادامك احتيار غير انك تبعد حتى لو بعدك ده هيجرحه
حتى لو كرهك.. حتى لو عينيه بكت عليك
بس الجرح القريب احسن بكتير من الجرح البعيد
والجرح اللي ماتقدرشي تخيطه.. لازم تكويه
يمكن ساعتها تشوف في عينيه نظرة لوم
بس كفاية انك هتكون أدام نفسك حافظت عليه لحد آخر لحظة
..........................................
أصعب لحظة
لما تحس انك بتنزف أوي لان حد طعنك في ضهرك
وتبص حواليك تلاقي كل الناس بينزفوا زيك فتضطر تداري جرحك
و تبقى خايف تبص وراك عشان خايف يكون اللي طعنك حد قريب منك
يمكن مايموتكشي جرحه أد ماتموتك صدمتك فيه
بس الأصعب من ده كله
انك تلاقيك انت اللي من غير ماتقصد طعنت نفسك بنفسك
أصعب لحظة
لما تعمل حاجة كبيرة اوي عشان تسعد بيها حد بتحبه أوي
بس الحاجة دي تكون سبب في حزنه
وبدل نظرة الفرحة اللي مستني تشوفها في عينيه
تلاقي نظرة عتاب
أصعب لحظة
لما تقع وتلاقي نظرة الشماتة جاية من أقرب الناس ليك
أصعب لحظة
لما تكون في قمة الحيرة وتوصل لقرار
بس ماتعرفشي اذا كان قرارك وحي من ربنا ولا وسوسة شيطان
فتكون حيرتك أصعب و أشد
أصعب لحظة
لما حاجة تجرحك اوي وانت سعيد أوي
لان المسافة اللي هتقع منها هتكون كبيرة اوي
أصعب لحظة
لما تضطر تضحك وانت مدبوح من جواك
لانك ساعتها هتكون رضيت كل الناس
بس دبحت نفسك زيادة
....................................
لو قعدنا نحسبها مع نفسنا عشان نعرف من اكتر حد اديناله وعود وأخلفناها
هنلاقي ان الجواب هيكون....ربنا
بس ربنا مش زي البشر وحاشاه انه يكون زيهم
لان اي حد في البشر لو اديتله ميعاد وأخلفته
مش هييجي تاني مرة
وان جه تاني مرة وأخلفت الوعد مش هييجي تالت مرة
انما ربنا مهما اخلفنا وعودنا معاه
بنرجع ونلاقي الباب مفتوح
وكإننا ماأخلفناش ولا وعد
عشان كده هو ...ربنا
.................................................
آسف اني طولت عليكوا
بس في قمة سعادتي اني كتبت البوست ده
في انتظار تعليقاتكوا دايما
محمود أبوالعزم

25 comments:

فجر اخر said...

السلام عليكم ورحمه الله وبركاته
ازيك يادكتور محمود يارب تكون دايما بخير وربنا يكرمك ويكرمنا ان شاء الله في الامتحانات اللي جايه دي
بجد كل الجمل جميله واحساسها حلو اوووي وكلها فعلا تحس فيها بالبراءه اللي كانت جوانا كلنا واحنا فعلا في المرحله دي بس مش عارفه هي راحت فين دلوقت
لو هنختار جمل فانا عجبتني الجمله دي

لو قعدنا نحسبها مع نفسنا عشان نعرف من اكتر حد اديناله وعود وأخلفناها
هنلاق ان الجواب هيكون....ربنا
......................
بجد الجمله دي حقيقه ربنا يكرمنا ويغفر لنا كلنا احنا وكل المسلمين
دمت بخير

! ! ! ! said...

إن كنت أنت يا محمود ي قمة سعادتك و انت بتكتب البوست ده .. فأنا بجد أكاد اجذم أني ممكن أكون أكتر منك سعاده :)
وكفاية أنك فكرتني بأيام زمااااااااااان
أيام كنا فيها مليانين طيبه و براءة كده
كنا بنفكر في الدنيا و فى بكره بطريقة تانيه
مع إنك لسه زي مانت طيب و عسول خالص لحد دلوقت :D

قبلاوى said...

جميل جدا يا دكتور

موهوب من يومك

" أول جملة كتبتها
إن أكثر ما أخشاه على قلبي
ان تأتي اللحظة التي لا يجد فيها من يحبه فيحب مضطراً من سيجده "

جامده جدا دى بجد

شق القمر said...

سبحان الله
:)
تسلم محمود
ربنا يباركلك ويزيدك

حياتى نغم said...

السلام عليكم
ما شاء الله كلمات معبرة
خواطر فلسفية واقعية رائعة
شعرت بالكثير منها
كتاباتك قريبة من النفوس وبنائه
بارك الله فيك
ووفقك لكل خير

هـــــــمــــســة said...

ماشاء الله ربنا يبارك فيك والله
حضرتك موهوب بجد جداااااااااا ماتتخيلش حضرتك انا سعيدة اد ايه وانا بقرا الجمل ى بجد فيها عمق وحكمة وفلسفة ولا اروع

والجمل كلها اثرت فيا جداومااقدرتش اختار حاجة معينة

عموما سلمت الايادى وفى انتظار المزيد

Anonymous said...

السلام عليكم
ازيك يا حودة وبجد بعتذر انى مقصرة فالتعليق على خواطرك الجميله دى
وبجد انت تعبتنى معاك لانى خلاص مبقتش عارفه الاقى جمله مفيدة توصفلك مدى اعجابى باسلوبك وكتاباتك واحساسك العالى
ان كنت هختار جمله من وسط اللؤلؤ ده فهختار جملتك عن الاسلام لانك بجد بيها لمست حاجه مهمه جدا
وبجد بدعى ربنا من كل قلبى انو يوفقك ويقدرلك الخير
ومتنساش الغلابه اللى بيعلقو على جملك دى لما تبقى مشهور يا دكتور
اظن عرفت اللماضه دى تبقى مين اكيد هى
F.A

د/عرفه said...

حلو يا محمود
ما شاء الله عليك
بجد بقيت خبير نفسى
بحب الخواطر دى

quiet_storm said...

اولا ربنا يسعد ايامك دايما زى مابتفرحنا وتسعدنا على طول

ثانيا تأملات غايه فى الجمال والفكر والفهم
كلهم اعجبت بيهم بس حبيت اوى اللى بتتكلم عن الناس والنور ...جامده جدا

ثالثا ...انت متأكد انك كنت فى تالته ثانوى

:D ;;) :D

خديجة عبدالله said...

إن أكثر ما أخشاه على قلبي
أن تأتي اللحظة التي لا يجد فيها من يحبه فيحب مضطراً من سيجده
دى فعلا كلمة حكيمة وكثيرا ما تحدث
معبرة ولكنها لا أجد ما أصفها به لكنها صعبة
ماشاء الله حضرتك من زمااان واااضح إنك موهوب ماشاء الله ربنا يحفظك ويحميك

كلمات أجمل من أن توصف بالجمال زادك الله قربا منه وعملا له

حسام غانم said...

ما شاء الله عليك يا محمود

حكيم من يومك

لا بس بغض النظر عن أي حاجة

الدبانة دي جاااااااااامدة جدا

أنا لسه شايفها

تحياتي ليك

وربنا يوفقك في الامتحانات

Mr.Ashraf said...

ماشاء الله عليك ياحودة . كنت و مازلت و ستظل رائع فى كل شئ. بارك الله فيك و زادك حسنا و خلقا و حكمة.

سأظل أشبه نفسى بالانسانه ... said...

ممتع من يومك يا محمود
ربنا يكرمك يارب
ويزيدك من بوح القلم
ويوفقك ويحقق لك اللى فى بالى

عندما تنهمر الدموع said...

السلام عليكم ورحمة الله وبركاته
ازيك يا د/محمود يارب تكون بخير
ماشاء الله ايه الكلام الجميل ده والاجمل ان حضرتك لسه محتفظ بيه لسه فاكر اول جملة كتبتها وكتبتها امتى وانك بتفتخر بكل حاجة كتبتها في الوقت ده حتى لو كانت مش بنفس براعة وقوة الحاجات اللي بتكتبها دلوقتي وان حضرتك دايما تصر على ان لولا هذه الحاجات مكنتش بقيت محمود سليمان اللي كلنا بنحترمه وبنحب كلامه
المهم ان الجمل دي فعلا عجبتني لأنها رغم بساطة كلامها لكنها بتعبر بصدق عن الواقع بتعبر عن مشاعر واحاسيس مدفونة جوانا يمكن منقدرش نعبر عنها او حتى نقدر نبوح بيها
أصعب لحظة
لما تضطر تضحك وانت مدبوح من جواك
لانك ساعتها هتكون رضيت كل الناس
بس دبحت نفسك زيادة
الجملة دي فعلا جامدة اوي وجميلة اوي وعجبتني اوي اوي
مش بس دي بجد كل البوست جميل جدا ومش بس حضرتك اللي سعيد انك نشرته احنا بجد الاسعد اننا قريناه
ربنا يكرمك ويوفقك ويخليك لينا عشان تفضل دايما تسعد اوقاتنا
اه على فكرة هي نتيجة الامتحان هتطلع امتى؟

عندما نحب..... said...

السلام عليكم
ازيك يامحمود يارب تكون بخير
جميل جدا البوست ده
يمكن يكون اكتر بوست عجبنى ليك واثر فيا
حلو اوى بجد ورقيق
فيه محمود ببراءته
ويمكن كمان يكون جمع كل الاحاسيس اللى كانت فى كتاباتك قبل كدا
ربنا يكرمك ويوفقك يارب
انا قريت البوست اللى فات واجمل جمله عجبتنى فى حياتنا بشر لم نفعل لهم شيئا لنستحق منهم كل هذا الحب ولكن علينا انا نفعل كثيرا لكى لا نفقده
الجمله دى واول جمله كتبتها انت
شفت فيهم نفسى وحسيتهم اوى
وكنت جاوبت على الامتحان كمان
بس معلش ورقه اجابتى ضاعت
والجهاز بتاعنا باظ
متزعلش منى لانى مقله فى التعليق
بس بجد لما ربنا يسمح بدخل
اه
كنت عايزه اجاوب على اهم سؤال
محمود هنا ومحمود فى الكليه؟
انا شايفه انهم الاتنين كنزين
نادر لما نلاقيهم
ربنا يكرمك ويبارك فيك

salma mohamed said...

جميل جدا كالعادة كلامك,
فعلا مع انك كاتبه من زمان لكن الظاهر الموهبة متأصله فيك من يومك,
بجد كلمات لامست احاسيسي ومشاعري,
زادك الله من هبته,ووفقك الى ما تحب في الدنيا والآخرة.

أحمد سعيد بسيوني said...

بسم الله

جميل ورائع ما كتبت قديماً وحديثاً يا محمود

زادكم الله من فضله

جميلة جداً خاطرة النور

اللهم ارزقنا في حياتنا نورا
وبعد مماتنا نورا
ويوم أن نحشر إليك نورا

آمين

شباك موارب said...

السلام عليكم ورحمه اللله وبركاته

يارب تكون كويس يامحمود وكله تمام...
جميل اوي نلاقي حاجه كاتبينها من سنين
ونلاقيها بالصدفه..ونقراها كاننا اول مره نقراها في جياتنا
وتعجبنا اوي كدا....


اكتر من رائعه(في ناس نورهم زي القمر بيتعب اوي عشان يجيب لنا شويه نور من الشمس ينورلنا بيهم الليلل..بس لما تيجي الشمس مش يلقى لنفسه مكان فينسحب))

كتير ناس اوي يامحمود في حياتنا كدا
واحنا عارفين والاصعب كمان انهم عارفين
بس اتعودوا خلاص ان لهم دور معين في حياتنا ومش بيسمحوا لنفسهم يتعدوه
وده مزعلنا من نفسنا اوي
بس برضو مش هينفع نغير ده..
يعني الشمس شمس
والقمر قمر...


تاني حاجه كتبتها فعلا ينطبق عليها(ان الحب من الله)
في حياتنا ناس كتير اوي عرفناهم في مده قصيره او طويله بس بقوا قريبين مننا اوي...

حكايه التلفزيزن دي بقى مش فاهماها اوي....


كون اننا بقى نعمل حاجه كبيره عشان نسعد بيها حد ونلاقيها سبب في حزنه...
بنعمل كدا كتير اوي وبتحص لنا برضو

بس الاهم ان الواحد مايبقاش قاصد يعمل الحاجه دي في الشخص ده..
لان ساعتها المسميات هتختلف تماما

لازم يكون ربنا اكتر حد اديناله وعود وفي نفس الوقت اكتر حد بابا مفتوح لينا علطول.....
وده لان الله يختلف طبعا عن بشر..

بس يارب مانطولشي الغيبه والبعد عن ربنا اكتر من كدا عشان قلوبنا ماتعتادشي البعد

ودمت بخير..وفي انتظار روائعك

salma mohamed said...

دكتور محمود
زدت مدونتي شرفا بتعليقك فيها
وشكرا لمتابعتك دايما
واهلا بيك حتى ولو من غير تعليق
انا اللي كتباه مش شعر دي زي ماتقول خواطر
الشعر له شروط ماتحققتش في كلماتي دي
انا كتبت ابيات شعرية قبل كده بس قصيره وعلى قدي
اما بقى بالنسبة لشعرك االجامد فربنا يزيدك
واما بقى الكلام اللي سقط مني مش الكلمات الطبية,
صحيح انا مش دكتورة متخرجه من طب بس تقدر تقول دكتورة من كتر السماع لاني ناشئه في بيت كله دكاتره كل كلامهم في الطب
بس الصوت عندي مكنش واضح في كل القصايد,بس انا علقت على الدبانه علشان شكلها ظريف اوي
عموما ربنا يعينك ولما تفضى ابقى اكتبهم.

ميرام said...

ماشاء الله ..
بجد بحييك بشدة ..
الكلام طويل لكن شدني لحد آخر حرف
فيه سلاسه رهيبه ..
واحساس عالي ..


عجبني جدا تشبيهات المحبة ..بجد قوية ..(:

تصفحت مدونتك ..
وأقل مايجزي أن أصفها بالرائعه
سعيدة فعلا بتعثري في مدونتك
(:
تحيــــــــاتي

Anonymous said...

الحاجه الكويسه اللي فيك
ان لسانك حلو واسلوبك احلى في الكلام
بس اتخنقت منك ياراجل خلاص
انت شايف ليه نفسك اوي كدا وعامل مشغول علطول وماعندكشي وقت

مش معنى كدا اني الاقي مليون حد بيدافع عنك انا مش بكرهك ولا حاجه
بس ده رايي فيك

انت شخص اناني

Anonymous said...

السلام عليكم
عارفة يا حودة بجد انى مقصرة جداااااااااااااا
كمان يا حوده والله كل كلامك حلو ومش بعرف اختار جمل منه
لكن اول جمله بجد لمستنى جدا خايفه اضطر احب اى حد الاقيه
ههههههههههه
كمان بص باه ياحوده بما انو الفقيرة لموالها الغنى اول وحده ترد بعد الاخ اللى بيقولك انت انانى
فشوف باه يا دكتور
انت راجل دكتور وراجل كويس
فحاجه من اتنين لو كان بيهزر فانا بقوله الهزار ده مينفعش مع حودة
واما باه لو كان بيتكلم جد فانا باه بقوله انت بجد معرفتش حوده صح
وهقولك خد جمب انت
وسيبنى انا باه منى له
ههههههههههههههه
عموما يا اجمد واحسن واحن وارق حودة فالعالم لا تلتف خلفك
وعيب اوى باه لو مكنتش عرفتنى
F.A

المبهم said...

إن كان ده ريحك ماشي ياسيدي
ويارب تكون فهمت قصدي ووصلك اللي عاوز اقوله
انت سامحت ولا بس مسحت؟
ابقى رد يا حوده
هدلعك اشمعنى انا
على الاقل انا اخوك (:

محمود ابوالعزم said...

المبهم

أنا تعبت بصراحة
والله انت ماتعرفشي انت عملت في ايه بالكلام اللي عمال ترميه ورا بعضه ده
انا مانمتش امبارح يا أخي
على العموم انا عندي رد كبير اوي
بس انا مش عايز اتكلم في الموضوع ده تاني
لانك شكلك مش فاهم انك بتكلم في أعراض ناس وعمال بتقصف في عرضهم بدون ماتفهم ولا حتى تدي فرصة لنفسك تفهم
ومااظنش ان ده حاجة بسيطة عند ربنا
الدين مش كده يا أخي
والنصيحة في الاسلام مهما كانت عمرها ماتهين حد ولا تكلم على حد زي ما انت بتكلم على الحد ده كده
انا مسامحك والله واتمنى ربنا يسامحنا كلنا
والمدونه مفتوحة ادامك اكتب اللي انت عايزه
انا مش همسح حاجة تاني
فوضت أمري لله
بس لآخر مرة بقوللك اتق الله في كلامك
ولاني ماتعودتش اخبي حاجة جوايا
انا مش عايز اشوف ردودك على المدونة تاني وربنا يسامحك على اللي انت عملته في من غير ماتقصد

Anonymous said...

بجد انا مش عارفه اقول ايه اكيد اى كلام هقوله مش هيكون ليه لزمه بعد الكومنتات الكتيره دى بس انا اول مره ادخل المدونه وبجد حلوه اوى انا قريت حاجات بسيطه بس اكيد هكمل وبجد اول مره اعلق على حاجه لانى مقدرتش امنع نفسى وقلت لازم اعلق ربنا يوفقك ويحققلك كل اللى تتمناه