كان الله في عون العبد

Monday, November 30, 2009

السلام عليكم ورحمة الله
يارب تكون كل الناس خير
انا جاي اكتب النهاردة لسببين
اولا وده السبب المهم انا كنت حكيتلكم قبل كده هنا عن حالات محتاجة مساعدة
بفضل الله انا وزمايلي لاقينا تعاون غير عادي من ناس كتير منكم
أكتر مليون مرة من اللي بنحلم بيه
وفي الفترة اللي فاتت قبل ما نقعد من الدراسة انا وصلت كل الفلوس مطرح ما كل واحد طلب مني
واللي ماحددوش حاجة معينة كان فيه تلات بنات بيتجوزوا لميت كل المبالغ اللي جاتلي
وحطيتها في جهازهم وربنا بارك في الفلوس الحمد لله والتلاتة اتجوزوا العيد ده
ماقدرتش احضر أفراحهم للأسف بس امهاتهم اتصلوا بي وبيدعيلكوا كلكم
لإنكم كنت سبب في فرحة بناتهم - وجبر خاطرهم - ودي حاجة انا بشوفها كبيرة أوي
المهم فاضل حالتين انا كنت من الناس اللي مسئولة عنهم بس دلوقتي ماعادشي معايا فلوس باقية
والحالتين اتصلوا بينا وللأسف ماقدرناش نعمللهم حاجة وده شعور صعب جدا عليا
الحالة الأولى حالة الست بتاع التحاليل اللي حكيتلكوا عنها قبل كده
والحالة التانية أسرة من الأيتام عايشين مع جدهم
بالنسبة للحالة الأولي انا بفكر في حلين إلى جانب أي مبلغ ممكن أي حد يساعد بيه
أول حل لو حد هنا يقدر يدّخل معايا ونقدر نخلي موضوع التحاليل ده ببلاش
يعني حد يكون ليه معرفة او حاجة في العلاج على نفقة الدولة او وزارة الصحة
ويكون يعرف طريقة نخللى التحاليل دي مجانية يبقى جزاه الله خيرا
وعشان يعرف يسأل ..هي التحاليل المطلوبة اللي بتنعمل كل أسبوعين
للناس اللي بياخدوا حقن انترفيرون بميتين وأربعين جنيه والتحليل اللي بينعمل
كل شهرين بربعمية وخمسين جنيه لو حد يقدر يحاول وانا هحاول وربنا ييسر
والحاجة التانية هي ان مافيش اي جهة اتصال بيني وبين الست دي
وبستني كتير على ما هي بتعرف تتصل بي و كمان بيبقى فيه ناس حابة تساعدها
ويمكن يبقوا محروجين مني او مش عايزين يبانوا في الصورة بأي شكل
ففكرنا لو أي حد معاه عدة موبايل قديمة مستغني عنها ممكن يجيبهالنا
تكون يادويك بس شغالة على اد الاستقبال مش لازم تكون عدة كويسة المهم تكون شغالة
بحيث لو أي حد عايز بيها يتصل بي او يبعتلي وانا هبعتله نمرتها ويبقى منه ليها علطول
انا عارف اني طولت اوي بخصوص الست بس ده يمكن عشان انا ارتبطت بيها جدا
وهي كمان ست عفيفة أوي وبتتحرج أوي تطلب من أي حد تاني
وبالنسبة للأيتام برضو اللي ربنا يقدره بأي حاجة ولو بسيطة واحنا هنوصللكم للشخص
المسئول عنهم وان شاء الله ربنا يجعله في ميزان حسناتكم
ويمكن حد يقول انه مش وقته بس يمكن لما نفك كرب ناس زي دي
ربنا ساعتها يفك كربنا احنا كمان
زمايلي في سنة سادتة كفاية عليهم لحد كده عشان ما أعطلهمش
حابب أقوللهم بس ماحدش يقول شكرا على أي حاجة بالعكس
انا اللي على جميل ليكم كلكم لإنكم كنتم السبب ان يبقى ليا
اسم وسمعة انا بجد ما استحقهمش وانتم اكبر سبب ان المدونة دي
لسة موجودة لحد دلوقتي ..انا بس حاولت أقول شكرا بطريقة عملية
ومش شايف - بدون مبالغة - إني عملت حاجة لسة
كل واحد بس يركز في مذاكرته دلوقتي وهنخلى الكلام ده لبعدين
ربنا يوفقكم وينول كل حد فيكم اللي بيتمناه ان شاء الله
آخر حاجة عايز أطلبه منكم انكم تدعولي يا جماعة
ادعولي بجد
انا بعيش فترة صعبة جدا مش عشان الامتحانات ولا حاجة
انا بقالي فترة طويلة يمكن أكتر من سنة بعاني من حالة أرق مزمن
بيعدي على ايام طويلة مابعرفشي انام فيها خالص
وخدت كل الأدوية والمنومات وعملت كل حاجة ممكت تتخيلوها ومفيش فايدة
انا عارف انه مش صح ان الواحد يقول حاجة أدام الناس كده
بس اتفاجئت بناس كتيرة جدا من أصحابي بيقابلوني ويتصلوا بي
وبيسألوني نفس السؤال محمود هو انت زعلان مننا في حاجة...شكلك زعلان؟؟
انا والله مش زعلان من أي حد بس الحكاية هو التوهان اللي بعاني
منه بسبب الموضوع ده ..وده شعور ماحدش يعرفه بجد غير اللي جربه
لدرجة ان النهاردة خارج مخصوص عشان اجيب حاجات الدكتور جمال
لإني رغم ان كان معايا حوالي مية وخمسين اسطوانة وزعتهم كلهم ونسيت أخليلي واحدة
ادعولي مش بس ان موضوع النوم ده ينتظم
ادعولي ان مايتسربشي لي أبدا شعور بالزهق او بالسخط من الموضوع ده
لإن لو ده حصل هكره نفسي جدا
وادعوا لكل زمايلي في سنة سادتة لإن معظمهم بيمر بنفس الظروف بصورة او بأخري
ادعولي

عم بتاع الجوافة

Friday, November 20, 2009


السلام عليكم ورحمة الله

انا مش هتكلم عن المدونة وعن أد ايه هي وحشاني

انا جاي أكتب حاجة كتبتها النهاردة

هي مش شعر ومش قصة ومش أي حاجة

بس كتبتها وكنت حابب أوي الناس تقراها

أتمن تكملوها للآخر

ولو عجبت حد فهي متاحة للنشر باسمي او من غير اسمي في أي حتة

وعلى فكرة أول تمن سطور فيها حصلوا فعلا أدام عيني

..........................................


حط بتاع الجوافة
علمك وسط الجوافة
شفته وسألت نفسي
هو بتاع الجوافة
بيحب مصر ليه؟؟؟؟
طب ليه كان دمه فاير
علشان ماتش الجزاير
مع إنه بيبقى ماشي
!!!! وفي جيبه اتنين جنيه
عم بتاع الجوافة
مضايق النهاردة
أصله ماباعشي النهاردة
بس الماتش النهاردة
يبقى هيستني ليه
هيشوف الماتش فين؟؟
أصله ماعندوش ريسيفر
طب ليه هيجيب ريسيفر
والتليفزيون ماجاش
ممكن على قهوة يقعد
بس القعدة بفلوس
ومافيش قهوة ببلاش
عم بتاع الجوافة
وياه اتنين جنيه
و استلف اتنين جنيه
راح في القهوة ودفعهم
وقعد على نص كرسي
وبعلوْ صوته قال
ان شاء الله هنوصل
أملنا ماانتهاش
عم بتاع الجوافة
ماسكتشي لحظة واحدة
وفضل من قلبه يُصــْرُخ
وينادي مصر مصر
عاش منتخبنا عاااااااااش
واتحمس لما شافنا
كل الجماهير علينا
وبنلعب تحت ضغط
ونسيت أقوللكم
عم بتاع الجوافة
كان أصلا عنده ضغط
عم بتاع الجوافة
عديت تاني يوم عليه
في مكانه مالاقيتوش
قلـقـتني أوي الحكاية
وسألت عليه قالولي
ده محجوز في العناية
حودت عليه وشفته
كان راقد في السرير
و معاه قفص جوافته
ولاقيت قفص الجوافة
لسة العلم عليه
ماسألتش عامل ايه
أو حتى جراله ايه
كان عندي سؤال كبير
محتاج جواب عليه
لما انت بتاع جوافة
ومادام مش لاقي تاكل
بتحب مصر ليه؟؟

بتحب مصر ليييييييييييييييييييه؟؟؟
طلـّع قفص الجوافة
إدّاني جوافة منهم
قاللي اسأل الجوافة
هوّ انتي يا جوافة
جواكي بذر ليه؟؟
لو عايز يا ابني تعرف
بنحب مصر ليه
روح إسال القمر
بينور ليلنا ليه
إسال شمس الصباح
بتجيلنا الصبح ليه
روح إسأل الزهور
جواها عطر ليه
روح إسأل كل أم
بتحب وليدها ليه
حب البلد دي يا ابني
شئ مفطورين عليه
احنا بنعشقها عشق
ومادام القلب يعشق
يبقى ما تسألشي ليه
عم بتاع الجوافة
علمني حاجات كتير
علمني يا مصر انك
مش نيل وهرم وسد
علمني يا مصر إنك
ناس بتحبك بجد
علمني …إن علمك
هيعيش يامصر عالي
غصبا ْعن أي حد
مصر قلوب بالمحبة
زرعت في الأرض حبّة
طرحت روحنا اللي حابة
حتى الحزن اللي فيها
مصر في ضلمتنا شمعة

واحنا في ضلمتها شمعة

وبترسم فوق خدودنا

في كل لحظة دمعة

لكن علشان خاطرها

دمعتنا بنداريها
هيعيش يا مصر علمك
هيعيش برغم ألمك
رغم عذابنا وعذابك
هيعيش دايما مرفرف
علشان الدنيا تعرف
اننا عاشقين ترابك
حبك مش ماتش كورة
حبك جوانا صورة
مرسومة بلون دمانا
لو يوم هيحبسوكي
في قفص حزن سابوكي
هترفرفي في سمانا
ارفعي راسك لفوووووق
ارفعي راسك لفوووووق
أرواحنا بتـنـتميلك
دمّها دايب في نيلك
ولا شئ في الدنيا ممكن
يغير انتمائنا
وقت الجوع بـيكي نشبع
وقت العطش انتي مائنا
احنا ببساطة انتي
وانتي ببساطة احنا
وسوء عايشن في عشة
ولا عايشين في قصر
برضو هتفضل قلوبنا
دايما تحب مصر
ارفعي راسك لفوق
حتى في زمن الدموع
حتى في زمن السخافة
ارفع راسي لفوق
وكفاية إن فيكي
انسان بيموت عشانك
انسان عاشق كيانك
زي بتاع الجوافة