مليون مبروك

Friday, January 29, 2010

السلام عليكم ورحمة الله
يرضو محمد جابني على الموتسيكل عشان أسلم على كل الناس
أولا انا متشكر جدا جدا لكل الناس هنا والناس اللي اتصلت بيا
او بعتولي على الميل او على الفيس بوك يسألوا عليا
ولو اني لاحظت ان كلهم يا إما بيسألوا ياإما على عبد الرحمن يا إما على رجل الكنبة
!!!!! مافيش حد بيطمن عليا انا خالص
ثانيا
مليون مبروك لمصر.....انا زي كتير منكوا بنحب البلد دي أوي
وعايز اقول كلام كتير أوي بس مش عايز أكرر كلام كتير قلته قبل كده
خصوصا في بوست عم بتاع الجوافة
اللي بفضل ربنا ثم بفضل تشجيعكم اتشجعت وقدمته في مسابقة الجامعة
والحمد لله ربنا كرمني بيه بالمركز الأول في الزجل
وزيادة في فضل ربنا عليا كرمني كمان بالمركز التاني في القصة وشعر الفصحي
اللهم لك الحمد
وافتكرت جملة كنت كتبتها بعد ماتش السودان واللي حصل فيه
مصر ماوصلتشي كاس العالم بس كفاية إنها وصلت لينا
............................
حابب كمان قبل النتيجة لزمايلي في سنة سادتة
أنا راضي ان شاء الله بأي حاجة ربنا هيكتبها
وعارف ان كل زمايلي كده وأحسن ان شاء الله
يارب يكرم كل حد باللي بيحلم بيه
ولينا كلام كتير قبل الامتياز ان شاء الله
وبعتذر عن تقصيري الشديد في حق المدونة وفي حق ناس كتير منكم
مش عايز أطول عليكوا وهسيب التطويل لو ربنا كرمني ورجعت أكتب تاني كل تلات
.........................
ملحوظة
كل زمايلي معزومين عندي على عزومة فطير كبيرة في حالة لو جبت امتياز
لو ماجبتش امتياز من دلوقتي مافيش فطير..ادعوولي بقى
...................
أنا نسيت بقيت الكلام اللي كنت جاي أقوله النهاردة
بس تاني شكرا لكل الناس على كل حاجة
ألف سلامة عليكي يا رجلي
من جديد علي الفيس بوك

نشرة أخبار رجلين حوكشة

Saturday, January 23, 2010

السلام عليكم ورحمة الله
يارب يكون كل الناس بخير...مععلهشي عودة متأخرة بس لما تعرفوا هتعذروني
أولا الحمد لله الذي بنعمته تتم الصالحات
انا بقيت دكتور بفضل الله بعد ست سنين ونص من المعاناة ربنا يجعلهم في ميزان حسناتنا ان شاء الله
وثانيا برضو الحمد لله ...أنا أول ماخلصت امتحان اتجبست الحمد لله
هي حاجة بسيطة الحمد لله ..كسر في صباع رجلي...بس كان لازم يتجبس
شكرا لكل الناس اللي اتصلت بي واللي بعتولي واللي سألوا على ربنا يكرمهم
ومعلهشي اني قصرت في حق المدونة بس غصب عني
انا كان في نيتي حاجت كتير عايز أكتبها بس قدر الله وما شاء فعل
انا حتى خليت محمد صاحبي جابني على الموتسيكل لحد السيبر هنا عشان أسلم عليكوا كلكم
وان شاء الله هحاول آجي تاني..ولما أفك الجبس هرجع اكتب كل تلات ان شاء الله
وبما إني جيت لازم أحاول اكتب حاجة برضو
فيه فكرة جت على دماغي دلوقتي
نشرة أخبار حادثة حوكشة
هو نفس الخبر بس هتخيل كل حتة هنذيعه إزاي
.........................................
على التليفزيون المصري...نشرة الساعة تسعة
يتابع الرئيس مبارك عن كثب... وهو مركز يعني...آخر تطورات الحادث الأليم
الذي ألم بالمواطن /حوكشة الطويل وقد أصدر السيد الرئيس توجيهاته إلى الحكومة بسرعة البدء
في التحقيقات للوقوف على ملابسات الحادث...في الوقت الذي صرح فيه
الوزير عمرو سليمان بإن الحادث حادث فردي ولا توجد
أي شبهة لأعمال إرهابية وأوضح أن الموضوع
امر داخلي بحت..داخلي آخر حاجة عني... وان مصر لن تسمح
أن يكون الحادث ذريعة...حجة يعني...للتدخل في شئونها الداخلية
هذا وسنوافيكم بالجديد في خدماتنا الإخبارية القادمة
...........................
الخبر على قناة الأهلي
في الوقت الذي كانت فيه تعقد...بتحط يعني...أملا كبيرا في لحاق
لاعب المنتخب /حوكشة الطويل...معلهشي هي وسعت شوية...بالمنتخب في دور الأربعة
في حال فوزه على الكاميرون ...عادوته الإصابة من جديد لتصيب ملايين المصريين
بخيبة الأمل وخاصة في ظل غياب أبوتريكة وبركات وعمرو زكي
وقد صرح الدكتور إيهاب على إن الإصابة ستتطلب البقاء في الجبس لمدة أسبوعين على الأقل
يبدأ بعدها اللاعب برنامج تأهيلي تحت إشراف الطبيب الألماني
وقد أعرب جوارديولا__دا مدرب برشلونة عشان فيه ناس في طب...عن خيبة أمله
وذلك لأن الإصابة سوف تحرمه من التعاقد مع اللاعب خلال انتقالات يناير
ليكون إلى جوار ميسي وابراهيموفيتش في هجوم النادي الكتالوني....اللي هو برشلونة عشان فيه ناس في طب
وبمناسبة الناس اللي في سنة سادتة اللي لسة مخلصين
منتخبنا هيلعب بعد بكرة ان شاء الله في بطولة اسمها كأس أمم إفريقيا
اللي لسة صاحي منهم يبقى يتفرج
.......................................
الخبر على قناة الجزيرة
كعادتها نفت الحكومة المصري وجود أيادي خفية...من تحت الحزام يعني...تقف
وراء حادثة صابع حوكشة التي أثارت الرأي العام المصري
في الوقت الذي تشير فيه أصابع الأتهام إلى ضلوع....يعني متورطة...قوي إقليمية
في ذلك الحادث ولم تستطع تصريحات الحكومة المصرية أن تخفي حالة الإحتقان
التي تسود الشاعر المصري إبان...يعني بعد...الحادث الأليم
.................................................
على فناة السي إن إن
تتابع الإدارة الأمريكية عن كثب...بتقلد الريس بتاعنا يعني...آخر تطورات
حادثة حوكشة الشهيرة وأبدت الإدارة الأمريكية قلقها إزاء العنف المتصاعد بالشرق الأوسط
وأوضحت انها لن تقف مكتوفة الأيدي...يعني ربنا يستر...إزاء الوضع المتدهور بالشرق الأوسط
خصوصا إن الحادث لا يعتبر الأول من نوعه ...كنت إنكسرت قبل كده السنة اللي فاتت برضو..
وحذرت مصر من مغبة...من البلاوي اللي هتحصل يعني إذا أصرت على تجاهل القضية
.......................................
كفاية عشان ما أطولشي عليكوا
ألف شكر لكل الناس على كل حاجة
لربنا يحميكوا ويوفقكوا كلكم ان شاء الله

مش انا كنت هشيل نسا وولادة

Friday, January 8, 2010

السلام عليكم ورحمة الله وبركاته
انا كنت ناوي النهاردة زي ما ناس منكم ربنا يكرمهم
قالولي لازم تكتب آفية عن الامتحان
بس قلت خليها للآخر بعد ما نخلص خالص ان شاء الله
بس حابب أحكيلكم عن موقف مموتني من الضحك من ساعة ما خلصت امتحان
الإمتحان جه زي ما انتو شوفتوه كده
وبدات أحل في النسا بعد الساعة اتناشر
وجيت عند سؤال
gynocoloical causes of urine retintion
mental block وكان فاضلي كتير وماعادشي وقت وحصللي
و حاولت أفتكر في الأسباب بتاع السؤال ده مافيش حاجة جاية على دماغي خالص
سبت القلم دقيقة وحاولت أركز
إيه ايه ايه ؟؟ ..أيوة إفتكرت ومسكت القلم بسرعة وكتبت
1-benign prostatic hyperplasia
2-cancer prostate
وكملت الاجابة عادي وبقية الأسباب
وانا في السؤال اللي بعده افتكرت انه امتحان نسا
قعدت ييجي خمس دقايق أشطب في السطرين دول
حسيت انهم لو كلمة منهم اتشافت هيسقطوني
وهيعلقوا الورقة على الباب الإزاز بتاع الكلية
أو يعرضوها في التليفزيون اللي في المدخل
بس الحمد ربنا ستر
وهعيش طول عمري أفتكر الموقف ده
..............................................
لو عايز أي حد في سادتة طب طنطا يرن عليك....أي حد
أضمنلك إنه يرن عليك بعد ما تبعتله الرسالة دي
ولو مامعهوش رصيد هينزل يشحن ويرن عليك
....
رنيت عليك و إنت مطنش.....وقالبني دايما بإستمرار
يارب بقى لو ما ترنش.....في الشفوي تدخل للعطار