بلى قد آن

Monday, September 6, 2010

السلام عليكم ورحمة الله
بقالي كتير أوي ماكتبتش ومانشرتش قصيدة مناجاة
وماحاولتش اكتب غير لما يبقى عندي الإحساس اللي يخليني اكتب
اسمحولي أقول بس الكلمة الرخمة اللي بقولها كل مرة
إن يمكن الكلام مايكونشي فيه شعر...بس دا اللي أنا حاسه دلوقتي
أتمنى القصيدة دي فعلا تقدر تعبر عن إحساس محبوس جوة حد منكم
لأنها عملت معايا كده
و أتمنى إنها تكون جديرة انها تكون فعلا هدية ليلة القدر
وهدية العيد
كل سنة وانتو طيبين
.............................
ألَمْ يَأْنِ لِلَّذِينَ آمَنُوا أَنْ تَخْشَعَ قُلُوبُهُمْ لِذِكْرِ اللَّهِ
وَمَا نَزَلَ مِنَ الْحَقِّ وَلا يَكُونُوا كَالَّذِينَ أُوتُوا الْكِتَابَ مِنْ قَبْلُ
فَطَالَ عَلَيْهِمُ الأمَدُ فَقَسَتْ قُلُوبُهُمْ وَكَثِيرٌ مِنْهُمْ فَاسِقُونَ
بلي قد آن ياربي
بلي قد آن
ندائك شق آذاني
أعاد النور ثانية ً لوجداني
ْْو أشعرني...بأني عشت كل العمر
بعيداً عنك ياربي...بلا وجدان
بلي قد آن ياربي
أنا العاصي
أتيتك هارباً منــّي
بعمر ٍ قد مضي منــّي
رأيت خطاهُ تحملني ليوم العرضْ
فـحـَنّ القلب ياربي إلى نوركْ
وتاقت جبهتي للأرضْ
أتيتك صادقاً أبكي على ذنبي
وليس لديّ برهانٌ على صدقي
فعلمك أنت لا يحتاج للبرهانْ
بلي قد آن يارب....بلى قد آن
أنا العاصي
ٍ عيون الناس تحسبني على خير
و وحدك أنت من تدري بما قد كانْ
لديك العفو ياربي
وماغير الذنوب لدىْ
إليك الذنب يصعد دائما ً منـّي
و أنت لأنك الرحمنْ
يعود النور منــْك َ إلىْ
أردت زخارف الدنيا
فرحلت كلها عنــّي
ولم يبقى سوى دمعاً
يسابق بعضه بعضاً على خدّيْ
ولي نفس ٌ.. بريق الذنب يخدعها
فتحسب أن ذلك لي....ولا تدري
غدا ً ما لي يصير علىْ
أنا من يترك الأيام كي تلقى
على عيني غشاوتها
و أسئل بعدها نفسي
!!! لماذا لاتري عينيْ
وتنهش ظلمة الآثام في جسدي
و تسحب ما تبقى من حياة ٍ فيهْ
وتجعلني
أُمَـثــّل أنني حي ٌ..ولكنـّي...بقايا حىْ
وقفت الآن بين يديكْ
فـبين يديك دمعاتي تطهرني
و تـُـنسيني مرارة ما جنته ُ يديْ
وبركان ٌ من الحسرات يسكنني
فجئت إليك ياربي
لتطفئ ذلك البركانْ
بلى قد آن ياربي..بلى قد آنْ
أنا العاصي
عصيتك لا أري سببا ً لمعصيتي
سوى أنـّي ضعيف القلب
بحور جهالتي للذنب تأخذني
وحين أفيق لا أدري
لماذا كان ذاك الذنبْ
أعيش العمر في حرب ٍ مع ذاتي
برغم يقيننا أنــّا
كلانا خاسر ٌ في الحربْ
و إن يبدو لعين درب أحلامي
تسير خطاى في عجلٍ
وقبل الخطوة الأولى
أري نفسي وقد تــُهنا....أنا والدرب
و تاه النور من شمسي فلم تشرقْ
وكيف ستشرق الأنوار من شمسي
إذا الجهتانِ صارا غربْ
ويمضي العمر ملهوفاً
تضيف سنينه ُ كربا ً إلي كربٍ
تعاظم داخلى كربي وألجمني
فجئت به إلى ربي...ورب الكربْ
كفي حزنا ً على ما ضاع يا قلبي
إذا ما الحزن داخلنا غدا ناراً
فإن لنار حزنك ربْ
و كيف وقد عرفت الله يا قلبي
تخاف مرارة الأحزانْ
بلى قد آن ياربي... بلى قد آن
أنا العاصي
أتيتك والدجى يجثو على صدري
بحور الذنب ترميني لمنحدر ٍ فمنحدرِ
أنا البدر الذي لم ْ يكتمل أبداً
سماء الكون واسعة ٌ ولكني
بعصياني
جعلت رحابها ضاقت على بدري
أخادع دائما ً نفسي ...و أخبرها...غداً سأتوبْ
غدا ً يأتي....فأخبرها...غدا ً سأتوبْ
متى يأتي غدي المزعوم لا أدري
جحدت بنعمك الغراء ياربي
و أنت تزيدني نعماً...يزيد القلب معصيةً
ً فؤادي قد غدا يعصى علانيةً
ًًً وما أديت حق الله ثانية
ٍ و جئت بكل ما أوتيت من حمقٍٍٍٍٍٍ
لأطلب بعدها أجري
تركت الليل يسكنني ويغشاني
أزيد ظلامه بظلام عصياني
وعاد القلب مندهشاً
يجوب رحاب ذاك الكونْ
!!! و يبحث فيه عن فجري
أنا العاصي...دعوتك ملء إحساسي
دعائي ربّــما يبدو
عظيما ً إن اقارنه ٌ بمعصيتي
و عذري أنني أدعو
على قدر المهيمن لا على قدري
وعذري أن آمالي
بعفو الله ما ترَكـَـتْ
دبيب اليأس يسكنني
ولو حتى ...ملئت الكون بالعصيان
بلى قد آن ياربي .....بلى قد آن
أنا العاصي
أنا وحدي
يزيد الناس من حولي....فيغمرني
شعور ٌ أنني وحدي
يسيل الدمع من عيني
فأمسح دمعتي ...وحدي
أحاول بإبتساماتي
هزيمة جيش أحزاني
ولكن ابتساماتي تموت إذا
رأتني باسماً....وحدي
بعيدا ً عنـْــكَ لا معني
لذاك الكون ياربي
كأن الكون من حولي...غدا لحدي
فساقتني الخـطى لحماكْ
و ذاق القلب طعم رضاكْ
لديك وجدت إحساسي
لأول مرة ً ....إحساسْ
شعرت بأنني أحيا
و لست أضيف أنفاسا ً إلى أنفاسْ
شعرت لديك أني لم أعدْ....وحدي
و أن الكون قد أمسى له معني
و أن ّ بداخلى إنسان
بلى قد آن ياربي....بلى قد آن
عرفت الناس في الدنيا
وحين عرفت خالقهمْ
عرفت الفرقْ
على باب الخلائق كمْ
أطلت ُ الطرق والأبواب مغلقةٌ
و ربي يفتح الأبواب قبل الطرقْ
لذلك يا إلهي لنْ
أغادر بابك المفتوحْ
فأكرمني بنور هداك ياربي
أضئ ُ به ِبقايا الروح
ومهما كانت الدنيا تناديني
فذلك ليس يعنيني
قد استعصمت بالرحمن
لقد آن الرجوع الآن
بلي قد آن ياربي
بلي...قد آن

أنا حسيت بالآية دي النهاردة

Monday, August 9, 2010

السلام عليكم ورحمة الله

النهاردة أول ليلة في رمضان

كل سنة وانتو كلكم طيبين

احترت جدا ايه اللي ممكن أعمله السنادي على المدونة في رمضان

بعد حيرة مالاقيتش اجمل من مشروع السنة اللي فاتت

انا حسيت بالآية دي النهاردة
http://journy-to-myself.blogspot.com/2009/08/blog-post_25.html

البوست ده كان رائع بجد
ومن اكتر الحاجات اللي انا حبيتها على المدونة

عايزين تاني واحنا بنختم القرآن كلنا تاني ان شاء الله

كل واحد هيقولنا آية اثرت فيه

طمنت قلبه...خوفته من ربنا....زعلته من نفسه...إدته امل

آية حس إنه بيقراها لأول مرة مع إنه طول عمره بيقراها

حس فيها بمعني ممكن نكون مش واخدين بالنا منه فحب ينقله لينا

أو سمع تفسيرها او قراه وكا حريص اننا نفهمها معاه
أو عرف قصة نزولها وحب يقولهالنا

او حتى ممكن يكتبلنا الآية اللي حس بيها دي ويسيبنا احنا نفكر
ونحاول نحس هوقراها ازاي
او على الأقل يكتبلنا اكتر آية بيحبها
أو أكتر آية بتخوفه

هي دعوة للتدبر ودعوة للإجتماع على الخير مش علشان حاجة إلا الخير
أتمى بجد كل الناس تشارك على اد ما تقدر
مرة واتنين وتلاتة

وا سمحولي أختم باليتيتن دول

في الحق قل لا تخش َ إلا بارئك ْ.....فعلى يديك لعلــّه يأتي الهدي
ســــبأ ٌهداها هدهد ٌ لإلهها....أفلا تساوي عند ربك هدهدا؟؟؟

مابيتنسوش

Saturday, July 31, 2010

TO SOULS OF MY DEAR FRIENDS
محمد ....كامل....باسم...محمد....رامي
ONE DAY I PROMISED YOUR SOULS AND MYSELF
NOT TO WRITE ABOUT YOU
NOT TO MAKE MEY FEELINGS... WORDS
BUT NOW... AFTER ONE YEAR
I DISCOVERED THAT I AM IN MASSIVE NEED TO WRITE
DON"T KNOW WHAT OR WHY
BUT IT IS A VERY LITTLE PART FROM WHAT I FEEL
TO SOUL OF MY FATHER
TO ANY HERAT MISSED ANY NEAR KIND HAERT
THESE LITTLE WORDS
...........................................................
مابيتنسوش
لو كل حاجة بتتنسي
طب همـّا ليه ما بيتنسوش
و سنين تقوت
نحضن وشوشهم في العيون مع إننا
دلوقتي حتي لو نبص لوشنا
مابنعرفوش
ما بيتنسوش
رغم الجروح
وبرغم إحساسنا اللي تاه
لو كان يروح
من بالنا بالنا في الحياة
من بالنا همـّا ما بيروحوش
مابيتنسوش
نفتح لقلوبنا لشمس أحلام الحياة
يمكن تاخدنا لضيـّـها
ونقول قلوبنا العطشانين
في الدنيا بكرة تلاقي ناس
قادرة بلمسة من الحنان على ريـّـها
لكن قلوبنا بتكتشف
ان احنا مهما قابلنا ناس
فيه ناس مافيش ناس زيـّها
فيه قلب واحد لو رحل
كل القلوب ماتعوضــّوش
مابيتنسوش
بعد الفراق
تتلم عالقلب الجراح
وتعيش تدوّر في الحياة
على قلب ممكن يسمعك
لما فــْ عينيك الكون يضيييق
تلقي فـْ دفا عيونه البراح
وتزيد جراحك لما فجأة بتكتشف
إن اللي ممكن يسمعك ...هوّ اللي راح
و لإن عمر ما حد تاني هيفهمك
الحزن جواك مهما زاد
مضطر جواك تكتمه...وماتحكيهوش
ما بيتنسوش
بعد الفراق
فيه عمر تاني بيبتدي
أيامه تجري بسرعة لكن...في المكان
وتخاف سنين العمر موت على نفسها
لـياخدها تيار الحياة من نفسها
لكنـّها
بتلاقي جوة الذكريات حضن الأمان
ترفض دموعك تجري تاني على الخدود
ترفض حنينها يواجه الحزن الجبان
وبدل ما يجري الدمع منــّك يجري فيك
ويحس إنه رخيص أوي
لو كان على خدودك يبان
ومابين زمن
أيامه عايزة تحسسك
إن الفراق من ألف عام
ومابين حنين بيحسسك
إن الفرق من لحظتين
ييجي الأمل ويعلمك
إن القلوب اللي يجمــّعها الوفا
في الدنيا مهما اتفرقت
البُــعد لحظة وتنتهي
أما اللقا....طول الزمان
رب القلوب
هو اللي عالم بالقلوب
هو اللي عارف إن شوقنا لقلبهم
عمره ماكان قلــّة رضا
ولا ضعف أبداً في الإيمان
بس احنا في الآخر بشر
ومن الصعوبة على البشر
إن انت أدام حلمهم
تضطر فجأة تحط.....كان
بركان كلام
جواك ولكن للأسف
الكلمة لما بتتولد
بتموت حروفها على اللسان
شئ مستحيل مهما حاولت ومهما قلت
تحكيه لحد ماجرّبوش
و عيون كتير
يمكن تشوف إن السنين
قدرت تنســـّينا السنين
و تغرهم
ضحكاية صعبة بتترسم
بمرارة عالوش الحزين
ولإن لسة القلب عايش وسطهم
لو ضحكوا يضحك زيهم
لو يبكوا يمسح دمعهم
فاكرينه منزوع الحنين
يستغربوا لو يسئلوك...ايه اللي فيك
و ترد وانت بتبتسم... أبدا ً مافيش
وماقدّروش ولا عمرهم هيقدّروا
إن القلوب لازم تعيش
لو مش عشانــّا عشان قلوب بتعشيلنا وتعيش بـِنا
و لإننا
بنخاف عليهم من رحايا دمعنا
فالقلب لازم دمعته
تدّارَي في الوش البشوش
وحاجات كتير جوانا بس لإنها
جوانا جدا ً ...مش بتظهر عالوشوش
مابيتنسوش
الذكري تجاعيد الزمن
الذكري عنوان القلوب
!!الذكري توهة بترشدك وسط الدروب
الذكري شمش تنام في أحضان الجليد
وتفوت سنين
لا النار بتقدر تنطفي
ولا الجليد يقبل يدوب
الذكري شمس بتحرقك
لكن مشاعرك تتحرق أكتر إذا
حسّيت بشمس الذكريات رايحة لغروب
الذكرى صاحب مهما كان بيعذبك
يفضل وجوده بيدّي لحياتنا الحياة
وعشان كده
لو حتى فكر يوم يسيبك ...ماتسيبوش
مابيتنسوش
فيه قلب مهما يروح بعيد
عمره ما يتحوّل... شبح
طير الوفا بيزيد حياة....مهما اندبح
دا لإنه عارف إنه لو رفرف بعيد
لا هيلقى لدموعه وطن
ولا دار لقلبه... مهما دار
فيه ناس كتير
موجودة دايما جنبنا
لكنها...جوة القلوب مالهاش وجود
وناس كتير مالهاش وجود
لكنها...موجودة دايما جنبنا
وناس نشيلها في قلبنا
ونحس إن قلوبنا بور
وناس بترحل عننا
وتسيب في قلب الروح عمار
القصة مش قصة جسد
القصة قصة احساسات
مش كل من حضـَـنه التراب
يبقى خلاص جوانا مات
غيمة ضباب
مهما تداري على النهار وتحوّطه
برضو النهار يفضل النهار
مابيتنسوش ولا عمرنا اتمنينا يوم
أيامنا تجري ويتنسوا
دول هما طعم الحب وسط سنين مرار
دول هما ضحكة عمرنا
دول هما آخر حلم مانع حلمنا
يغرق في بحر الانهيار
دول هما آخر سور لمملكة الحنين
اللي محاصرها من سنين....مليون ألم
لكن لا رِضـْـيـِت تدفن الأحلام في يوم
ولا احساساتها استستلمت ...رغم الحصار
دول اللي يمكن ودعوا في نص الطريق
وبرغم ده... بنحس بيهم جنبنا
و كإنهم ...من غير كلام إدّونا وعد
ويّانا لو هنــــكمّــله
و يفارقوا لو مانكملوش
و عشان كده
مهما السنين فضلت كده....متجمدة
مهما الحياة فضلت كده....متقيدة
طول ما الزمن بيخطـّي على شط الحياة
ولحد لما احنا هييجي يوم وهنتنسي
هيعيشوا هما مايتنسوش
وهيفضلوا طول السنين
مابيتنسوش

waiting

Tuesday, July 20, 2010

silent until 31/7 en shaa Allah
don"t miss this day on this blog

لن يرحل الربيع

Tuesday, July 13, 2010

السلام عليكم
قصيدة النهادرة قصيدة أقدم من اللي فاتت
يمكن لفترة طويلة كنت بشوفها
من الحاجات اللي بشوفها لا تستحق النشر
رغم اعتزازي بيها وبكل كلمة قلتها
بس بنشرها هدية لواحد من أعز الناس عندي..مصطفي علام
هو بيحبها وطلب مني كتير إني أنشرها هنا
وانا مصطفي طلبه غالي أوي عندي
............................
لن يرحل الربيع
...............
كفي لوماً وتعذيباً و أشجانا....كفي ندماً على ما في الهوي كانا
فليس الحب للأحلام مذبحة ً....وليس العشق للآمال سجّـانا
لما ينساب حزن الأمس في غدِنا؟؟.....لما تبقى بأسر اليأس دنيانا
تعالي الآن يا عمري لكيْ نحيا.....فذاك اليأس إن ننساه ينسانا
وذاك الحب مخلوق ٌ بعالمنا...لكي يُـمسي به ِ الإنسان إنسانا
إذا ما كان نور الحب مكتوبا ً...فـَـلن يمنعه لا إنساً ولا جانا
و إن كان الأسى قدرا ً فلن نبكي...وسوف يهون لو يرضى فؤدانا
دعينا نعشق الأقمار يا عمري....ولا يغزو ظلام الليل قلبانا
إذا ما أشرقت سمس ٌ سنهواها...ولن تهوي غروب الشمس عينانا
و تلك الراية البيضاء يا عمري....سننساها فلن نستسلم الآنَ
!! وما دامت سمانا ما بها غيم ٌ...لما نرتاب ان السيل قد حانا
و يكفي أنني معك ِ و أنت ِ معي....معاً سيصير موج البحر شطئانا
معا ً نحيا ولا آهات تدمينا....معاً...نمضي ولا أحزان تغشانا
معا ً نشدو ولا تبكي مآقينا....معا ً...يمسي مرير الشوك بستانا
معا ً ننسى وتنسانا مآسينا.....ونور الحب في الدنيا سيلقانا
معا ً سنواجه الدنيا ويكفينا....و لو بعض ابتسامات ٍ عـَـلـَتْ فانا
لما نرضي بأن نعطي امانينا.....لماضينا إذا ما كان أبكانا
تعالي الآن يا عمري فمن يدري...أسوف نعيش بعد الآن أزمانا؟؟

محاولة ...بريئة جدا

Tuesday, July 6, 2010

السلام عليكم
بيبقي شعور غريب أوي ولذيذ أوي
لماقدرا ً كده اخبط في قصيدة قديمة أوي كتبتها من سنين
والقصيدة اللي تحت دي أنا كنت ناسيها خااااااالص
وما أظنش حتى إن حد قراها خالص
لإنها من زمان أوي
هي مش شعر أوي....بس حسيت فيها ببراءة غريبة كده
قلت انشرها هنا يمكن تعجبكوا
ويمكن قريّب إن شاء الله أنشرلكم حاجت من نفس الكشكول
اللي لاقيت فيه القصيدة دي
...............................
العاشق المجنون
..............
انا برفض إني اكون
العاشق المجنون
نفسه عليه بتهون
ودموعه تملى الكون
وحبيبته مش سائلة
مين قال مشاعرنا
ناحية بشر غيرنا
بتشـّـل تفكيرنا؟؟
ليه لمـّا تإسرنا
مانكونشي ناس عاقلة؟؟
.
ولو القلوب دايبة
تبقى قلوب خايبة
عن وعيها غايبة
!!ولا عمرها تفكـّر
ليه دايماً العشاق
عايشين في نار و فراق
وكإنهم فـ ِ سباق
!مين في الدموع أكتر؟
.
وكإن أي قلوب
لما تدوب... بتدوب
و آخرها بس يادوب
تبكيلها كام دمعة
وكإن أحاسيسنا
مخلوقة تتعسنا
ضلمتها تحبسنا
!!! مع إنها...ِشمعة
.
ليه دايما الاحساس
مظلوم مابين الناس
وعشان ضعيف...ينداس
ولا حد يبكي عليه
أهل الهوى...مجاريح
ورقة فـ مهب الريح
و كإنما التجريح
بقى شئ أساسي فيه
.
أنا برفض إني أعيش
على خانة التهميش
بدموع ماتسيبنيش
ومشاعري بيئنـّوا
!! أنده و أرد الندا
ومشاعري كبش الفدا
الحب لو كان كدا
يبقي بلاش منــّه
.
الحب مش معناه
نلقى طريقنا تاااه
في الدنيا عن مرساه
وسنين تطير في الهوا
الحب إيد على إيد
لو يبقي حلم بعيد
نوصلله في المواعيد
لوإيدنا تبقى سوا
.
في العالم المخنوق
مفروض يكون الشوق
حاجة بتاخدنا لفوق
و تقوّي إرادتنا
لوتكتر الأحزان
نلقي فـ برائته أمان
دا الحب عمره ما كان
شئ ضد سعادتنا
.
حبي اللي بحلم بيه
هياخدني منــّي ليه

يلاقيني يوم ما ألاقيه
يمحي الألم...يداويه
و أغسل مشاعري فيه
مهما هعاني فيه
stop ما أقدرشي أقولــّه
مهما المواجهة تطول
أنا مش هقف مشلول
بالحب هقدر أطول
حلمي.. وساعتها هقول
أنا دقت طعم الحب

احساسات...متناقضة

Tuesday, June 29, 2010

بيبقي شء غريب انك تحس بحاجة
وبعدها علطول تحس بحاجة عكسها
شعور غريب أوي
من فترة كنت متوزع في جدول الاستقبال
والاستقبال هنا تلات أيام أو يومين في كل قسم
باطنة وجراحة وأطفال ونسا وعظام
كنت في استقبال الباطنة وجت حالة راجل كبير ومعاه ابنه وومراته
كان بيشتكي من ألم جامد جدا في صدره
أنا اللي توليت الحالة وكان عنده ذبحة صدرية
وربنا وفقني بفضله اني ألحقه لحد ما ربنا شال عنه الحمد لله
بعدها كنت في العضم ولاقيت نفس الراجل والست وابنهم
وكانت الست وقعت فرجليها اتلوت تحتهاا
و انا اللي كنت مسئول عن الحالة برضو والحمد لله اتعملها اللازم وعدت
بعدها كنت في الجراحة ولاقيت نفس التلاتة
والله العظيم دا فعلا حصل من غير مبالغة
وكان الواد عنده مغص كلوي وكنت موجود وعملتله اللازم بفضل الله
كان احساس جميل أوي وغريبة اوي في نفس الوقت
بس اللي كان أجمل ان الراجل ده جه بعدها بيوم
سلم عليا وقاللي انه مسافر الكويت لو عايز اي حاجة من هناك
بصراحة فرحت جدا إنه جه مخصوص يسلم عليا
و كانت من الايام اللي حسيت فيها بقيمة الطب وبمعناه و أد ايه هو شئ جميل
وعكس الاحساس
يوم السبت اللي فات كنت في استقبال الأطفال
الساعة أربع الفجر
جت ست عجوزة ومعاهاا بنتها وجوز بنتها شايلين عيل صغير
ماله يا ماما
تعبان
تعبان ماله يا ماما
تعبان
طب وريهولي كده
بنبص لاقينا الواد أازرق خالص
ماحسيناش بنفسنا غير واحنا بنجري بيه على القسم فوق
حاولنا كتير نرجعه ونعمله عملية افاقة
كان معانا نايبين وكنا أربعة امتياز
كلنا بنحاول
وك لشوية نحط السماعة على أمل اننا نسمع أي حاجة
وماكانشي فيه اي حاجة
الواد كان زي القمر زب الملاك لدرجة ان كلنا دمعنا واحنا شغالين
بس للأسف الواد كان جاي ميت أصلا
بسبب أم مش هبقى بشتمها لو قلت عليها غبية ومهملة
لإنها ماقدّرتش قيمة النعمة اللي ربنا اديهالها ولا فهمت
ان فيه في الدنيا تتمنى ضفر ملاك زيه
بس الشئ اللي كان صعب بجد هو شعور العجز ده
انك مش قادر تعمل أي حاجة رغم اإنك عايز تعمل كل حاجة
وعكس الأم دي
مش هنسي أم جاتلي الصيدلية
وكانت كاشفة على ابنها عند دكتور نفسية وعصبية والروشتة غالية جدا
وكان شكلها غلبان جدا
وبدون ما أقصد أي اهانة والله قتلتها
بس الدوادا غالي أوي يا آمّة
قالتلي هات كل الدكتور كاتبه يا ابني
مش عايزة احس اني قصرت معاه في حاجة أبدا
ان شا الله حتى أبيع الجلبية اللي عليا
والله جسمي قشعر من كلامها لإني
حسيت انها لو اضطرت لكده فعلا هتعمل كده
الموقف اللي نفسي أسجله بجد
لأنه اثر فيا جدا
حالتين كان فيه حاجات طالبينها مني
وماكنتش عارف أعمل أي حاجة لأني مكانشي معايا أي فلوس
والحاجات اللي كانت مطلوبالهم غالية جدا ماينفعشي أطلبها من حد
وسمعت عن ناس كويسة في الجمعية الشرعية بتساعد في الحاجات دي
بس ماكنتش عارف أوصللهم ازاي
وفي يوم بسأل الراجل اللي شغال معايا في الصيدلية
قاللي انت تعرف الشيخ رضا الطيب اللي ساكن فوق الصيدلية علطول
اللي بييجي ياخد مننا دوا كل أسبوعين مرة
أيوة عارفه
دا يبقى سكرتير عام الجمعية الشرعية على مستوي الجمهورية
قولـّه وهو هيعمللهم اللازم
وفعلا تاني يوم حود علينا ياخد الدوا
وقلتله... والحمد لله ربنا كرم وعملنا الللي كان مطلوب
وحمدت ربنا كتير جدا
وحسيت أد ايه ربنا بييسر لما يكون الواحد نيته خير
وجربت عكس الاحساس ده
لما ست اتصلت بيا من يومين
محتاجة مية وخمسين جنيه بس ...وماقدرتش أوفرهم ليها
لأني من يوم ما حولت ماعدتش بقابل الناس اللي كانت بتسيب معايا فلوس
واستهلكت نفسي واستهلكت زمايلي معايا في اني أغطي أكبر عدد ممكن
بس وشي اتحرق عند معظم الناس
وحسيت بخنقة شديدة جدا و انابقوللها
أناآسف والله يا حاجة...بجد والله غصب عني المرادي,,,مش هقدر
.......................................................................
.......................................................................
جملة عجبتين اوي لصاحبي لنادر ابوحسن
وانا مسافر كنت اتسائل (ماذا ) ينتظرنى
,لانه لو كان هناك ( من ) ينتظرنى
فلن يهمنى ( ماذا ) ينتظرنى .
..............................................
أخيرا
اتمنى كل الناس تقدر تشارك معانا في الفكرة دي
فكرة شنط رمضان
أنا مش هضيف حاجة زيادة عن التفاصيل اللي موجودة في اللينك اللي تحت ده
كل اللي أقدر أزوده اننا هنحاول نوصل الحاجة دي لللي يستحقها فعلا
بجد متشطر جدا لكل حد كمل البوست ده لآخره

لسة بحلم

Monday, June 21, 2010

ليه أقبل الأحلام تكون
مكتوبة بالقلم الرصاص
أنا لسة عايش يبقى ليه
أقبل أعيش ...عيشة وخلاص
ليه أحرم الليل الطويل
بالحزن من حلمه الجميل
يطلع عليه فجر الخلاص
أنا لسة فيه جوايا شئ
ما أعرفشي ايه
ولكنـّــي لسة بخاف عليه
أنا لسة فيه جوايا شئ
بيخلي قلبي ...بيبتسم
يدّي الأمل
لو حتى عاش من غير أمل
لو حتى كل الناس خانوه
يعشق وما يخوّنش حد
!!!ويحب من غير احتراس
ليه بندقية حزننا
بتصيدنا بسهولة أوي
وسنين بنسأل نفسنا
الحزن كان صياد عنيد
ولا احنا يمكن قلبنا
هو ّ اللي سهل الافتراس؟؟؟
وهيبقي طعم العمر ايه
لو سيبنا فيه الحلم تاه
ومادام رضينا لقلبنا
يدخل لمعركة الحياة
يبقى بلاش مـ ِالموت نخاف
يبقى بلاش مـ ِ الخوف نموت
لازم نواجه مهما كان
لوكان كده كده ميّــتين
أشرفلنا نموت بالرصاص

أنا دكتور

Wednesday, June 16, 2010

انا دكتور
بعالج ...بس ما أشفيشي
وتبقى الحالة في إيديـّـا
لا موتها دا حاجة بإيديا
ولا اقدر أقوللها عيشي
وتبقى الدمعة في عينيـّـا
لكن علشان أنا دكتور
بكون مضطر ...ما أبكيشي
لكن بحلم وحلمي كبير
أكون فوق الوشوش بسمة
تكون مـ ِالقلب مش رسمة
و الاقي كلمتي راسمة
على وشوش البشر تفاريح
و الاقي الحلم جوايا
بيتحول لورداية
أقدّمها بضحاية
هدية لكل قلب جريح
أنا انسان بيتمنى
يكون أنسان
انا انسان
كتير بيداري أحزانه
عشان عايز
بضحكة يعالج الأحزان
يداوي الخلق لو تتعب
ومش من حقه ولا لحظة
يكون تعبان
سنين العمر قضّاها
يواصل ليلها بنهارها
كتاب بيسلمه لكتاب
كإنه مكانه بين كتبه
لكن بين البشر زيـّه
مالوهشي مكان
انا إنسان
بيتمنى يكون حاجة
بيحلم يدّي لو يقدر...بصيص النور
لناس للشمس محتاجة
وقلبه بيتحرق لما
يكون جواه بيتقطع عشان حالة
و يلقى الناس يشاوروا عليه
دا أعصابه.... في تلاجة
لإنه بجد بيحاول
يشيل أمل الشفا في عينيه
ومايسيبهوش
ويتحدي الظروف لكن
ساعات كل الظروف حواليه
ماتخدمهوش
ويبقى مـُناه
لآخر لحظة يعمل شئ
يراضي ضميره مهما يكون
عشان صوت الضمير جواه
مايدبحهوش
وتفضل تايهة احلامه
وبتدورّ على المأوي
لكن أدّام محاولاته
ساعات يبقى المرض أقوى
وبرضو الناس ماتعذرهوش
ويبقى طريقه مليان شوك
لكن كل البشر شايفاه
طريق بالورد كان مفروش
انا انسان
عينيه مش باصّــة لفلوسكم
انا انسان يتمنى...إذا شفتوه
تحسوا براحة في نفوسكم
بيحلم إنه مايسيبشي
رحايا الحزن تنهشكم
ولا قطر الأسى يدوسكم
أنا دكتور
بعالج روح
و أخلـّــى عينيـّـا مهما يكون
تكون مش شايفة صاحب الروح
أنا بحلم
أعالج كل كل الناس
بدون تفرّيق...بدون ما اسأل
هعالج مين...وهاخد كام
ولو حتى اللي كان جايلي
خلاص بكرة
هيتنفذ عليه الحكم بالإعدام
أنا مسئول قصاد ربي
لآخر لحظة في حياته
أعالج عنده أي آلام
أنا دكتور
ما بحلمشي
الاقي الخلق تعبانة
عشان أكسب
وتبقى عيادتي مليانة
ولما أسمع
خطيب الجمعة يدعي يقول
يارب تعافي مرضانا
بَــرُد بكل قوة آمين
وحلمي يادوب
إذا كان ربنا مقدر
لأي قلوب
تدوق طعم المرض لحظة
أحاول أخفف الأوجاع
ما أخليش شمس أحلامهم...ياخدها غروب
أنا دكتور
مابنكرشي ساعات إني
بتتسرق الحياة مني
وتسرقني الحياة مني
تشوفني عيونكوا وكإني
بكون بإرادتي أنا مقصر
و إني في لهفة الأيام
بحس بموجة الأحلام
على الواقع بتتكسر
وإني ساعات بقف عاجز
وأحس الدنيا بحر كبيييييييييييييييير
وبيني وبين عبور البحر ميت حاجز
وأخاف إني اعيش عمري
بأحلام رافضة تتفسر
مابنكرشي صحيح لكن
أنا فيـّـا الأمل ساكن
بإني أكيد في يوم هقدر
أغيـّر شئ
صحيح صعب الطريق وطويييييييل
سنين صعبة وحمل تقيل
ودمعة خنيقة رافضة تسيل
و ألف محاولة بتقاوم
عشان نقدر
نخلى العمر جوة الطب عمر جميل
عشان في قلوبنا يفضل شئ
يحب بجد ...مش تمثيل
لكنـّي برغم ده بحلم
عشان لما الزمن هيدور
أحس بإني أحلامي
خلاص قدرت تعدي السور
وأحس بإن جوايا
برغم العتمة حوالــيّـا
قدر يفضل شوية نور
و إني زرعت ورداية
في أرض البور
و إني برغم ميت حاجة
بتكسـْـرني
أنا مارضيتشي أعيش مكسور
و أقولها صريحة من غير خوف
و انا راسي رافعها لفوق
انا أستاهل...لقب دكتور

مع الاسعاف

Tuesday, June 8, 2010

أبوالعزم يا ابوالعزم
إيه يا دكتر
بص الساعة دلوقتي ستة ونص -الصبح-و انت الوحيد اللي موجود من الامتياز دلوقتي
ومحتاجين حد يطلع مع حالة تعبانة في الإسعاف
ماشي يا دكتر بس افهم ايه الحالة بس
الواد الشاب ده اللي اسمه يعقوب جرجس اللي كان جاي في خناقة
heamothorax هو كان مغزوز في صدره و كان جاي ب
chest tube وركبناله
يعني جاي بدم ضاغط على الرئتين وركبوله أنبوبة تنزل الدم ده
الحمد لله هو عدي مرحلة الخطر بس نزل اتنين لتر دم لحد دلوقتي ولسة بينزل
ولازم يروح الدمرداش عشان يفتحوا صدره
لإن مافيش في المستشفي هنا جراحة قلب وصدر
طب يا دكتر مش هو دا العيان اللي كنا باعتينه الساعة اتناشر بالليل
أيوة احنا بنمر دلوقتي لاقينا بتوع الاسعاف رجعوه تاني وسابوه ومشيوا
طب رجعوه ليه...مش عارفين
المهم خده بسرعة بس عشان تلحق قبل ما الورديات هناك تتبدل
عشان هتلاقي الوردية القديمة اللي شافت الحالة هناك
وهتلاقي هناك دكتور اسمه مختار في القلب والصدر كان شافها باللليل
وماتخافشي احنا كلنا هنكون معاك على التليفون
حاضر يا دكتر
ركبت الاسعاف ورحت الدمرداش كانت الساعة تمانية إلا ربع
ونزلت في استقبال الجراحة هناك
لو سمحت يا دكتر انا معايا حالة كذا كذا
مالناش دعوة روح لدكتور القلب والصدر
وجريت في مبني تاني خالص عند دكتور القلب والصدر
لاقيت الباب مقفول والدكتور نايم جوة خبطت وصحيته
لو سمحت يا دكتور عايز الدكتور مختار
عايز منه ايه
انا معايا حالة كذا كذا
ماليش دعوة احنا مالناش استقبال خاص بين روح لبتوع الجراحة
لو عرفت تدخلله هناك هما هيبعتولي آجي أشوفه
طب يا دكتر ممكن تشوف الحالة بص عليها بصة واحده
يا دكتر ماليش دعوة
ورجعت الاستقبال
وكان ساعتها واحد من الدكاترة في المطريه معايا على التليفون
قاللي دور على النايب السنيور في الجراحة دورت عليه ورحتله
يا دكتر انا معايا حالة كذا كذا ومش راضيين يدخلوها
انا مش هدخل حالة مركبة شيست تيوب
ليه يا دكتر
هو كده
يعني هو ذنبنا اننا انقذنا العيان؟؟
انت عارف انها لو ماكانتشي اتركبت كان هيموت في دقيقة واحدة
ماردش عليا
طب يا دكتر الأخصائي والدكاترة معايا على التليفون ممكن تقوللهم الكلام ده
انا ما بكلمشي حد
ليه يا دكتر...ماردش عليا
نزلت لاقيت الحالة نزفت كمان نص لتر في التيوب
جريت عند دكتور القلب والصدر
شافني قاللي دخلتها الجراحة قلتله لا بس بتنزف مني وانا مش عارف اعمل حاجة
انا ماليش دعوة وماتجيليش هنا تاني لو عرفت تدخلها الجراحة هما هينادولي
طب يا دكتور الدكاترة في المطرية عاوزين يكلموا حضرتك
انا مش هكلم حد
ورزع الباب في وشي وقفل وراه
و رجعت للدكاترة في الجراحة لاقيت ناس تانية خالص استلمت
رحت اكلمهم بس للأسف ما إدونيش فرصة أتكلم
معلهشي يا دكتر الحالة دي ماجاتشي في طبنشيتنا
دي كانت في النبطشية اللي قبلنا
يا دكاترة انا كنت هنا من عشر دقايق بس وبعيدن هتفرق ايه جيت امتي
لا يا دكتر تفرق كتير ومعلهشي احنا مش هنستلم الحالة
انا مش عايز أطول عليكوا ولا اخنقكوا اكتر من كده
كفاية اقوللكم اني فضلت في الدوامة أربع ساعات
وطلعت للمدير....ماجاش النهاردة
طب اللي ينوب عنه.....مش موجود
بس اللي اصعب لما اخصائي عندنا من المستشفي اتصل بيا وقاللي
بص انت تنزل العيان من الاسعاف وتقطعله تذكرة استقبال تديهاله في ايده
وتجيب الاسعاف وتيجي وتسيبه هناك هما كده هياخدوه غصب عنهم
لأ يا دكتر معلهشي انا مش هقدر اعمل كده
يا ابني انت لو سبت العيان هياخدوه ان شاء الله
ويبقى انت بتفيده مش بتضره وبعدين ما هما عملوا معانا كده
ولو ماخدوهوش؟؟؟
يبقى انت عملت اللي عليك
أنا آسف يا دكتر مش هقدر اعمل كده
وخدت العيان ورجعت المطرية بالاسعاف
هناك حصلت مشكلة كبيرة جدا
بس ربنا وقف جنبنا وقدرنا نوقف النزيف ونركب للعيان دم
واتحجز في الجراحة عندنا على ما المدير يتصرف
مش عارف ليه كنت محتاج أحكي الحكاية دي زي ما حصلت كده
انا عمري ما اتهنت زي ما اتهنت في اليوم ده
بس استحملت لإني كان نفسي اعمل حاجة للعيان
يمكن اكتر سؤال بيدور في بالي
اكيد الدكاترة اللي مارضيوش ياخدوا الحالة مني دول كانوا دكاترة زينا كده
بيحلموا يعملوا حاجة
إيه اللي وصلهم للدرجة دي
ياتري الواحد هيبقى زيهم كده في يوم من الايام
medico legalياتري الواحد هيدور زيهم على الكلمة اللي كلهم بيقولوها
للدرجة للي تخليه يسيب العيان يموت ادامه عشان مايورطشي نفسه في مسآلة قانونية
طب ومسآلة ربنا
واحد من زمايلي من جامعة تانية شافني بجري مرة
عشان حالة كانت جاية اشتباه في الزايدة
قاللي بالراحة يا حودة الموضوع مش مستاهل
قلتله الموضوع ببساطة ان الحالة اللي دخلت عندك
ياإما بتعد في ميزان حسناتك يا إما في ميزان سيئاتك
مافيش وسط
كل آه هي بتتألمها زيادة هتتحسب عليا وهتحاسب عليها
يا عم دول كلهم بيتوجعوا استعباط
استبعاطهم يحاسبهم عليه ربنا زي ما هيحاسبنا على استعباطنا احنا كمان
انا لا أعفي نفسي أبدا من إني بقصر في اداء وظيفتي
و بستحقر نفسي جدا لما أسيب طبنشيتي عشان ورايا اي حاجة تانية
رغم اني مش مطلوب اكون موجود عشان اشخص و أعالج انما عشان اتعلم
بس الضمير ما بيتجزأشي
رغم اني كنت جاي احكي كلام كتير جدا
بس لما حكيت الموقف ده اكتئبت تاني
بدعي ربنا يساعدني أطلع كل مشاعري في قصيدة نفسي اكتبها من زمان أول
أنا دكتور
ادعولي
بس لو ماقدرتش
كفاية اني اقول لكم ولنفسي قبل اي حد
كل واحد مننا هيتحاسب عن نفسه بس
مش شرط انك تضرب انسان عشان تموته
لو عيان بيموت ادامك وانت ممكن تلحقه ودواه معاك
وانت لأي سبب مااديتهوش الدوا ده
من وجهة نظري المتواصعة جدا....ان انت كمان قتلته
المفروض في الطب اننا بنتعامل مع روح
أيا كان صاحب الروح دي
معاه فلوس زي مامعهوش
جاي في خناقة زي اللي جاي مجروح في حرب
حتى لو كان قاتل وكل الناس شايفاه مايستحقش يعيش
احنا نتعامل مع الروح ونسيب غيرنا يتعامل مع صاحب الروح
لإن دي امانة ربنا حطها في إيدينا
لو مش أدها يبقى نسيبها
يارب يارب يارب نبقى أدها

النشرة

Monday, May 24, 2010

ميعاد النشرة بيقرب
مذيع النشرة لسة ماجاش
وتايه حضرة المخرج
هيعمل ايه؟؟؟
وبينادي
ماحدش شاف سعادة البيه
دي عاشر مرة أرن عليه
وليه مش راضي يفتح ليييييه؟؟
وحتى مهندسين الصوت
ماجوش لسة؟؟
دي ناس بالدنيا مش حاسة
يفوت الوقت
وكل الناس على الساعة
عيونهم رايحة جاية تبص
يا خبر اسود
خلاص فاضل دقيقة ونص
قلق فوق الوشوش باين
وخنقة بتكتم الانفاس
و فجأة يلاقوا مخرجهم
بيطرد برة كل الناس
ويمشي الكل
وقبل ما يوصلوا بيوتهم
يبصوا لأي تليفزيون
يلاقوا النشرة شغالة
وكل الدنيا ماشية تمام
وتبقى الحيرة قاتلاهم
عشان راسيين على الحالة
منين وصل المذيع فجأة
طب ازاي تبقى شغالة
وكل الكاست مش موجود
وفي اليوم اللي بعديها
بسرعة يلموا بعضيهم
يروحوا بلهفة للمخرج
عيونهم جوة منها سؤال
ويضحك حضرة المخرج
يرد بكل سخرية
عقولكم ضيقة جدا
خسارة بجد
دي نشرة اول امبارح
فضلت أعيدها طول اليوم
وللحظ السعيد.. جداً
وللأسف الشديد.. جداً
ماحسّــش حد

زبادي اسرائيلي

Tuesday, May 18, 2010





اللسلام عليكم ورحمة الله





................................





اسرائيل دي دولة قوية جدا مش زي ما نتو فاكرينها





وعلى فكرة شعبها شعب ودود جدا بس الفكرة المتاخدة عنه غلط










يمكن تكون دي أقل الجمل استفزازا في حوار طويل





مع واحد يقرب لواحد شغال معايا في الصيدلية شغال في طابا





وكنت قاصد اني ما أردش غير في الأخر عشان اسيبه يقول كله اللي هو عايزه





كان بداية الكلام زي ما قلتلكوا كده





وكان السؤال الطبيعي من الناس اللي شغالين معايا....ازاي يعني





لأا دولة قوية بجد





انا كنت بتمشي يوم على الحدود بينا وبينهم





وخدت شوية صور انما ايه
أنا استئذنته وخدت الصور بلوتوث



بص كده يا دكتور الصورة دي












دي صورة فيها العلمين على الحدود جنب بعض




شايف القوضة اللي الناحيادي دي...



دي أنضف حاجة في الحدود بتاعتنا حتى مافيهاش مروحة من جوة




شايف بقى المبني الكبير اللي قصادها ...ده اوسخ وحدة عندهم




تكييف ومكاتب وتلاجات اكل من كل الأصناف




وتلاقي العسكري بتاعنا واقف يا عيني اتناشر ساعة على رجله في عز الشمس




وهما ورديتهم أربع ساعات بس غير الساعات بتوعنا خالص




وبعدين بص يا دكتور الصورة دي شايف ميناء ايلات عامل ازاي













حاجة تحفة اللي يسمع انا ضربناه يفتكر انه ماعادشي ليه اثر




انما بص...والله العظيم تحفة معمارية




وبعيدن بقى ده فندق هيلتون طابا












ده كان انضرب في التفجيرات الآخرينية واليهود صلحوه على حسابهم بقى حاجة تحفة




حتى السيول عملوا حسابها وعملولها مجاري تحت الفندق




تلاقي المية معدية من غيرحتى ما تبل الفندق في الوقت اللي كان في الناس بتموت في قلب سينا




وبيجيلنا أكل من قلب اسرائيل بقى...مادقتش زيه




الموظف بتاع الحسابات بتاعتنا بيروح يخلص حسابات جوة اسرائيل كل أسبوع


عشان الفندق كله نزلاء يهود




بنبعت معاه يجيبلنا شوية حاجة من هناك




وبالذات الزبادي بتاعهم...تحس انك بتاكل قشطة




ده كان جزء من كلامه




ما أقدرشي اقوللكم اد ايه كنت بتحرق من جوايا وانا بسمع الكلام ده




أنا بغير على البلد دي اوي




زي ما بيقولوا في المثل أدعي على ولدي وأكره اللي يقول آمين




انا بدعي على بلدي و أكره اللي يقول آمين




النهاردة كنت في طنطا




دخت أربع ساعات عشان اخلص ورقة في معاش والدي


و اروح الكلية يرجعوني المعاشات




وهناك يبعتوني هنا وهنا يبعتوني هناك وطالع نازل ومن ده كتير اوي




ممكن اتخنق ممكن اتعصب بس بلدي هي بلدي




انا هقدملكوا صورة أحسن عندي من كل الصور اللي فوق دي




صورة ام أحمد ومعاها بنت بنتها












ست غلبانة بتبيع درة أدام الصيدلية اللي أنا شغال فيها




الست دي ربت تلات عيال من الدرة دي




جوزت اتنين منهم ووبنتها التالتة في كلية تجارة




ولادها بييجوا يقعدوا معاهم وهي شغالة




عمرهم ما استعروا منها رغم ان بنتها الكبيرة مجوزة جوازة حلوة جدا




ام احمد بتيجي تحوش معانا اللي بتطلع بيه من شقي طول النهار




عشرة جنيه...عشرين جنيه...بكتيره خمسة وعشرين جنيه




كله ده عشان لسة عليها أقساط التلاجة والبوتاجاز وحاجات في جهاز بنتها اللي اتجوزت




يوم ماتش الاهلي والاتحاد الليبي كنت في الصيدلية




لما دخل الجون التالت..دخلت عندنا الصديلية وعيطت




وقالت الحمد لله ماحدش يغلب مصر أبدا




أنا بحب مصر عشان فيها ناس زي ام احمد




انا بقعد كتير أدور على أي حاجة تخص حرب أكتوبر على النت




وانسي كل حاجة بالساعة والساعتين والتلاتة و اقعد اتفرج عليها




يوم ستة اكتوبر مابقومشي من جنب الراديو




اقعد اسمع الابطال دول وهما بيحكوا بطولاتهم




بفتخر ان ابويا وعمي حاربوا في الحرب دي




لينا جارنا كان في الأسري المصريين




حكالي مرة انهم كانو بيجيبوا الأسري ويرصوهم جنب بعض




ويعدوا عليهم بالدبابة




انتو متخييلين؟؟؟؟




ازاي حد قلبه يطاوع حد ياكل حاجة من هناك




حتى ولو زبادي زي ما الراجل ده كان بيقول




ازاي نسامح ناس قتلوا من خيرة شبابنا بمئات الآلاف




ما اعرفشي




انا عندي كلام كتير مش هقوله لإني عارف أنه جوة واحد منكم




انا بس عايز أسئلكم سؤالين اجباريين لكل حد قري البوست ده








تفتكروا لو حرب أكتوبر رغم أي وكل حاجة اتغيرت




تفتكروا لو الحرب دي بكرة الساعة اتنين الضهر




تقتكروا هنقدر نعمل فيها نفس اللي عملنها فيها قبل كده








لو عرضوا عليك




تروح البلد اللي انت بتحبها غير مصر




ويدوك عقد عمل وسكن وكل اللي انت عايزه




بس تسيب الجنسية المصرية وتاخد جنسية البلد دي
وماترجعش مصر أبدا




بصراحة...هتقبل؟؟؟