خربشات

Monday, January 26, 2009

السلام عليكم ورحمة الله

احترت كتير جدا ايه اللي ممكن أكتبه النهارده بعد شهر كان صعب علينا كلنا

خصوصا اني بقيت دلوقتي بحس اني يوم التلات ده كإني

خارج من البيت ورايح أزور خمسين بيت مثلا لان فيه ناس هنا

ربنا يكرمهم بيوروا البوست لاخواتهم او لأبهاتهم وامهاتهم ربنا يبارك في عمرهم جميعا

وده بيصعب على المهمه اكتر لاني بتمنى عمر ماحد يدخل المدونه ويخرج منها زعلان

مالاقيتشي أدامي النهارده غير اني أرجع بجزء من أجزاء تهييس مذاكرة لو فاكرينه

أنا بصراحه بحب الخلطبيطه دي أوي..بحس انها بترسمني

مش هطول في المقدمه زي كل مرة

وكالعاده انتو لازم تختاروا ..بس خربشتين أو تهيسيتين المرادي

..........................................

إن القلوب التي تحب تستطيع أن تغفر كل الخطايا التي أرتكبت

في حقها إلا الخطايا التي أرتكبت نحو ما بداخلها من حب

.............................

‘ان المعادلة الصعبة في معاملة زوجتك أن تشعرها بأنوثتها في

نفس الوقت الذي لا تنسى فيه أن تشعرها برجولتك

........................

وكيف النصر إن كانت مساجدنا...غدت تشكو إلى الرحمن طول الهجرْ

سيأتي النصر إن صارت مساجدنا...بنا ملئى صفوفاً في صلاة الفجر

................................

يرى الأعمي أفضل منا جميعا إذا أطفئت الأنوار

ولمقطوع اليدين قدمان أقوي من أقدامنا جميعا

ليس العجز ان يكون لك نقطة ضعف..ان العجز ألا تسطتيع أن تجعلها أقوى مافيك

.................................

غصب عني لاقيتني راجع...ليك ورافع ألف راية

قلبي ما استحملشي بُعدك...والحنين احتار معايا

حتى لما داريت في نفسي...نفسي حنت من ورايا

.............................

إذا رأيت المرأة ولم تكلمها فأنت لم تراها بعد

.............................

حينما تيأس من وحود الخير في هذه الدنيا فحاول أن تصنعه بنفسك فربما

تأتي اللحظه التي ييأس فيها إنسان ٌ مثلك فيجد فيك ذلك الخير الذي افقتده

........................................

أهـــــــواك مهما حاولوا تفريقنا....لا تيأسي فالوعد لن أنساهْ

وهواك باق ٍ في ضلوعي ما بقى....بين الضلوع يدق نبض حياه

........................

كلما زادت نظرة الناس لنا احتراما ً كلما كان صعباً ان نحافظ عليها

وذلك لأن الخط الأسود يظهر بسهولة كلما زادت الصفحة بياضاً

..................................

من شعر الفخر

أنا واد رجــــــولة وواد خطر...والسمعة زي البنسلين

insulin أنا قلبي يبقي الـ....sugarولو الجروح هتكون

ودفنت كل الخوف زمان...وعملت دمعي الفورمالين

ما اقبلشي حد يدوس على....قلبي ولا يخليه حزين

واللي هييجي يهدني....لازم يشوف هيهد مين

spleenتبقى massمش كل طير لحمه طري...ولا أي

ايييييييييييييييييييييييييييييييه..فين أيامك يا عنترة تشوف شعر الفخر وصل لحد فين

.............................

تمهل كثيرا قبل حبك الأول فنحن بدون حب كتائه ٍ في صحراء يبحث من سنين

عن شربة ماء وفجأة ً وجدها أمامه

فقد يكون حظه سعيداً ليجد مائه نقياً منذ البداية وقد تعميه شدة العطش عما بذلك الماء من سموم

............................................................

جميعنا ظلمنا الحب حينما اتهمناه أنه أعمى...فعيون الحب ترى أفضل منا جميعا وليس

ذنبه أبداً أنه أسلم نفسه لقلوب ٍ تهوى أن تجرّه نحو الظلام

...................

حتى لو احنا سنين ضايعين..بين إحساس الجوع والقهر

مع اننا دايـــــــما شايلين...حمل تقيل يقطم في الدهر

مع ان الدمع لو اتجــــــــمّع...ممكن يعــــــمل مليون نهر

مع ان الـــــــــكل بيتعذب .......وبيتــــــألم سر وجهر

حتى لو احنا قبضنا مرتب...يخلص يوم واحد في الشهر

لكن قلبي يا مصر هيفضل...برضو يحبك طول الدهر

...................................................

ان أصعب أنواع الحب ان تحب من لا يحبك..ولكن الأصعب أن

يحبك من لا تحبه بعد أن تكون قد تذوقت مرارة النوع الأول

...............................

لا تكن كالكومبارس الذي أتته الفرصة لأداء دور أكبر فحاول

أن يخرج فيه كل قدراته التمثيله ففشل

ولكن عليك ان تعلم أن البساطة التى تؤدي بها دورك الآن سوف تعطيك في المستقبل أدوارا ً أكبر

........................................

ولدنا وداخلنا فراغات ٌ كثيرة ..فراغ ٌ يملأه الحب وفراغ ٌ تملأه الصداقة وفراغ ٌ يملأه النجاح

ولكن يبقى ايماننا بالله هو الشىء الوحيد القادر على ملئ كل هذه الفراغات في وقت ٍ واحد

.........................................

في انتظار تعليقاتكم واختياراتكم

كي لا تذوب الشمس

Tuesday, January 20, 2009

السلام عليكم ورحمة الله
يارب تكون كل الناس بخير
انا متشكر أوي لكل الناس اللي وقفت جنبي الفتره اللي فاتت
ولكل الناس اللي طلبت مني اني أكتب النهارده
بجد جزاهم الله خيرا
وكلمة الشكر اللي كان ممكن أقولهالهم ان أرجع و أكتب النهارده
وآسف ان كنت لضيق ذات النت مش برد على ردودكم رغم اني بقراها كلها
ولا سألت عن الناس اللي غابت عن التعليق ولا رحبت بالناس اللي علقوا هنا لأول مرة
بس أكيد انتو عاذرني ان شاء الله
أنا هكتب النهارده شويه خواطر من مواقف حصلتلي من التلات اللي فات لحد التلات ده
وليه لأ
أكيد كلمة حالة اختلفت بالنسبالنا كتير-اقصد طلبة الفرقه السادته-عن قبل كده
لان الحالات ماعادتشي بروفيشينال زي عز ورجب وصابر والحزب ده
واكيد نفس الشعور ده يحسوا الناس اللي في الأطفال في خامسة
الأسبوع اللي فات كان عندنا حاله في الرواند
ست كبيره-حوالي خمسه وأربعين سنه مثلا- عندها فتاق
بسم الله ماشاء الله وشها مليان طيبه كده تشوفها تحس انها خالتك او عمتك
خرجت من الرواند لاقيتها واقفه ومش عارفه تروح فين
مشيت معاها أوصلها وجينا في نص السكه ولاقيتها بتبكي بحرقه وبشده أوي
وسألتها كتير عن السبب وكانت مابتردش وتبكي زياده
وفي الآخر طبطبت على وسابتني و أصرت انها تمشي لوحدها
بصراحه كنت عاذرها مع ان زمايلي كلهم ربنا يكرمهم كانوا بيعاملوها كويس جدا
وماحدش حط ايده غير لما استئذن منها بس أكيد مهما عملنا الموضوع كان صعب عليها
يوم الأربع أنا اللي كان على الحاله واستئذنت منها وكانت بنت أكبر مننا بحاجه بسيطه
وشيتنا الحاله ورحت يوم الخميس أوزر عم أحمد- ده واحد جاري وقريبي-في عنبر الرجال
و شاء ربنا انهم كلهم كانوا مجعمين وبيشربوا شاي وعملولي معاهم
وقعدت في وسطهم...كانت كوباية شاي جميلة جدا
مش في طعمها على أدم ما القعده معاهم ببساطتهم وطيبة قلبهم والدم الفلاحي الخفيف ده
والاهم كان فرحتهم بالواحد لمجرد اني شربت معاهم شاي
عارفين الحاج فارق بتاع الباروتيد تيومر اللي عنده ييجي خمسه وسبعين سنه ده
كنت بهزر معاه واقوله البنات عندنا ماعادشي ليهم سيرة غيرك يا عم فاروق
احنا رايحين عند الحاج فارروق ابو عينين زرقه جايين من عند الحاج ابو عينين زرقه
يتبسط أوي ويقول هما اللي بييجوا والله أنا ماقلتلهمش ييجوا
ويطلعلي الصور اللي لسه متصورها ويوريهالي ويقوللي شوف أنا طالع حلو ازاي
اقوله زي العسل يا عم الحاج بس دي أكيد صور ابنك ويضحك اوي
بعدها وقبل ما أروّح قلت أبص على الحاله اللي كنت مشيتها امبارح
فرحـِت جدا اني رايح أبص عليها عادي كده مش عشان آخدها الرواند
واللي كانت فرحانه جدا برضو حاله اسمها نوال
عشان زميلنا محمد رسلان-حد من الناس المحترمه والطيبه جدا-جه زارها مخصوص امبارح
وقعدت كلت معاهم...انا كنت جعان بصراحه
أنا حكيت كل ده عشان تفهموا منين جاتلي الفكرة اللي هقولها دي
انا بقترح اقتراح بسيط جدا
ان كل اتنين تلاته أربعه خمسه شيتوا حاله علاقتهم ماتنقطعشي بيها بعد الشيت
لان الحاله ده انسان زيه زينا ومربيين ناس زينا واحسن مننا كمان
لان الحاله مش مجرد آلة زي الترمومتر والسرنجه بنستعملها ونرميها
وناخد منها كلمتين ونعمل عليها اكسامسنين ولا كأن اللي معانا ده بني آدم
اللي شيتوا الحاله بس كل يوم يروحوا يبصوا عليها بس...يبصوا بس
مش هتكلفنا أي حاجه..خمس دقايق كل يوم..بس حاجه كبيرة أوي عندهم
ونكسر الحاجز اللي بنا وبينهم ونخفف من الألم النفسي اللي احنا بنسببهلهم في الرواند
ولو الحاله مش مقتدرة ماديا احنا ممكن نساعدها بصورة شيك اننا ندفعلها تمن الأشعه مثلا
زي ما أي حد بيدفع لحد أجرة المواصله مثلا..من غير مانحرجهم
وده مش تواضع مننا أبدا يا جماعه واللي يفتكر انه كده يبقى مايعملشي كده أصلا
الناس دول مش أقل مننا أصلا عشان يبقى تواضع
دول زي ما قلت زينا و أحسن مننا كمان
هو مجرد اقتراح أتمنى كل الناس تساعدني في توصيله
يمكن تكون حاجه كويسه لما نعلمها بنية زيارة مريض وادخال السرور على قلب مسلم
وتكتب في ميزان حسناتنا كلنا ان شاء الله
وليه لأ؟؟؟
.......................................
انا عايز أكتب كلام كتير تاني بس أنا طولت أوي في النقطة اللي فاتت دي
هخلي كل الكلام لمرة تانيه ان شاء الله بس حابب بس أحكي
عن موقف شفته في أحداث غره دي كلها
قبل أي حاجه عايز اقول ان وقف اطلاق النار ده اختبار لينا
ياتري كل المشاعر دي كانت شوية هيجان وهيخلصوا دلوقتي؟؟؟
ياتري قدروا فعلا يشغلونا بغرة وينسونا ان القضيه قضية فلسطين كلها
وان الحفر تحت المسجد الأصى مستمر لحد اللحظه دي
كلنا لازم نسأل نفسنا السؤال ده
....
الست دي أبكتني أكتر من أي صورة ومن أي مشهد ومن أي كلام
رغم انها هي ما بكيتشي
كان المراسل بيسألها عن تلاته من ولادها ماتوا وهي تقول
الحمد لله
عن جوزها اللي لسه تحت الأانقاض تقول..الحمد لله
عن مصير ابنها اللي في بطنها تقول ..الحمد لله
صمود وعزة وصبر ماشفتش زيهم
صمود بيبعت رساله تتفهم من غير كلام
صمود قدر يستفزني اني أكتب بعد عجز تام عن مجرد التفكير في الكتابة
على لسانها كتبت هذه الكلمات البسيطه جدا
واللي ماتجيش أي حاجه جنب الاحساس اللي وصلتهولي
كي لا تذوب الشمس
....
لا تذرفوا دمعا ً على ّ فإنني
قد ضقت ذرعا ً بالبكاء وبالعويلْ
لا تحسبوا قلبي تجمّد داخلي
إن فارقــَت خدي الدموع فإنها
شقت بقلبي ألف نيل
لكنني أعلنتها
ً ًمن جاء يطلب في دموعي ذلــّـة
فأنا بصبري سوف أجعله ذليل
ارجع بجيشك خائبا ً يا أبرهه
أنا لن يـُـلين عزيمتي مليون فيل
لا لن يسيل الدمع من عيني أنا
لن أنحني..فائذن لدمعك أن يسيلْ
اقتل وليدي..سوف يحيا داخلي
وتعيش ترشـُف أنت طعم الموت في أوطاننا
أعلمت يا رعديد من فينا قتيل؟
يا أمة ً باعت ضياها للدجى
ودليلها لا زال يبحث عن دليل
لا تيأسوا فأنا هنا
رمز الكرامة في بقايا امتى
و أنا برغم الحزن فارسها النبيل
رغم العطش
قلبي أنا سيظل للعطشى سبيل
نفسي تهون لأجل شبر ٍ واحدٍ ٍ
فالشبر في وطني وطنْ
وجميع ذاك الكون لا يكفي بديل
لو أنجبت بطني هنا
في كل ثانية ٍ بطلْ
سيسوقهم قلبي ضحايا للوطن
وبرغم ذاك أراه ما ردّ الجميل
لو فقد قلبي كل من سكنوا به
ففداك يا أقصى قليل
فليقصفوا وليغلقوا كل الحدود
يبقى سلاح ٌ لن يلين لقصفهم
هو ذلك الصبر الجميل
ويظل في رحمي الصغير معسكرٌ
تتعلم الأطفال في أرحامنا
حمل السلاح وكيف يُنتزع الفتيل
لا يأس لا أحزان َ لا دمعا ً هنا
فهنا الأمل
هل يستطيع عدوّنا قصف الأمل؟
لا بل سيحيا نابضا ً جيلا ً فجيل
أجساد شهداء الكرامة أصبحت
سدا ً منيعا ً سوف يبقى شامخاً
كي لا تذوب الشمي في بحر الأصيل
مادام للأقصى جنود ً مثلنا
فسقوط وطني
مستحيلٌ مستحيل ٌ مستحيل

هم يبكي وهم ..يبكي

Tuesday, January 13, 2009

السلام عليكم ورحمة الله وبركاته
انا هحكيكلوا كام حكايه كده
ومهمتكوا انتو انكوا تقولوا مين اللي قام بأداء الأدوار
وتقولوا رأيكم في الحكايات اللي فهمتوها
.....................................................
اول حكاية دي بتوصف الرأي السياسي في موضوع المعبر
المحمول والشاحن
مرة كان واحد صاحبي طيب شويه -و ده حصل فعلا-موبايله مش راضي يشحن
وقالوله العيب في الشاحن ولما روّح
قام قاطع المحول- الكعبيرة الكبيرة اللي في أول الشاحن من فوق دي
وقام معري طرفين السلك وحاطههم في الفيشه
قال يعني كده صلح الشاحن
وكان طبيعي ان الموبايل يتحرق
صحيح كان لازم الكهربه تدخل الموبايل بس لازم يبقى فيه محول
لاننا لو شلنا المحول الموبايل هيتحرق
ولو الموبايل ماخدشي شحنته من الكهربه يبقة مالوش لازمه
حد فهم حاجه؟؟؟؟؟؟؟؟؟؟؟؟
على العموم هو ده الرأي السياسي
بس اي حد مقتنع بيه لازم يقري الحكاية دي
كان فيه أخين راضي وباسل
الاتنين طول عمرهم بيحبوا بعض جداوعايشين مع بعض
وبعيدن جه واحد مستقوي ضربهم الاتنين
وخد شقة باسل كلها وسابله قوضه واحده محبوس فيها
وشوية كمان وخد قوضة من شقة راضي بس راضي ماسكتش
وحارب شويه كده وخد نص قوضته تاني
قام المستقوي قال له انا هسيبلك قوضتك بس بشرط
أضرب باسل ولا اسيبه انت مالكشي دعوه
عايز تكلم اتكلم انما تمد ايدك لأ
و وافق راضي و استفرد المستقوي بباسل وفضل يضرب فيه
انما باسل فضل باسل وراضي فضل راضي
وكل شوية راضي يخبط على باسل ويقوله
تستاهل..أنا مش قلتلك ياباسل اقعد ساكت انت مش أد المستقوي
على العموم خد شويه الأكل دول عشان تقدر تكمل أصلهم مش هيبطلوا ضرب فيك دلوقتي
ولما يخلصوا ضرب فيك انا هاخدك أعالجك وأرجعك
تفتكروا فيه أخ كبير يعمل مع أخوه الصغير كده؟؟؟؟؟؟؟؟؟؟؟
...........................
النمل والفيل
كان فيه نكته-لللي يفهمها- بتقول
مرة شويه نمل-انا متخيلهم اتنين وعشرين نملة-شافوا فيل عايز يعدي على أرضهم
قالوا لا احنا مش هنسكت احنا هنتجمع ونطلع كلنا على ضهره
نقرصه قرصة جامده أوي تخليه يبعد
المهم طلعوا.. واحده راحت هنا وواحد راحت هنا قام الفيل هازز ضهره موقعهم كلهم
ماعادت نمّول صغيره اسمه فوزي فضلت على رقبته
قاموا كلهم مجمعين بعيد وفضلوا ينادوا من بعيدا
اخنقه يا فوزي
أكيد انتو عرفتوا مين فوزي
حابب بس اقول ان الفيل ماهوش فيل...الفيل ده فيل عشان احنا شافينه فيل
احنا اللي بسكوتنا زي الواحد وعشرين نملة دول عملناه فيل
...........................................................
الفراخ
مره واحد راح لواحد زعيم عربي وقاله أنا عايز أمسك الحكم
قاله الموضوع مش سهل كده
قاله جربني بس كده
قاله طب خد شوية الفراخ اللي في القفص دول
وتعالي على ميدان كبير وافتح القفص دقيقه واحده
لو عرفت تلمهم تاني هسيبلك الحكم..قاله يا سلام دي سهله خالص
خد الفراخ وراح الميدان الكبير وساب الفراخ فرخه راحت هنا وفرخه راحت هنا وهكذا
جه يلمهم مالمش ولا واحده ورجع واعترف انه ماعرفشي
الزعيم قالّه تعالي وانا اوريك السياسه تبقى ازاي
راحوا على نفس الميدان بس الزعيم طول السكه كل شويه يهز القفص جامد
كل شويه يهز القفص جامد
وصولوا الميدان كانت الفراخ داخت..نزلهم في الميدان مافيش ولا فرخه اتحركت
قام لاممهم وحاططهم في القفص تاني
وقال فهمت يعني ايه سياسة؟؟؟؟؟؟؟؟؟؟؟
..............................................
البحر والمركب
ركزوا أوي في الحكاية دي
واحد مسلم غلبان زي حالاتنا كده كان عايز يعدي البحر
بص للبحر لاقاه كبير أوي مش شايف آخره..تعب واليأس صابه
وبص لقى مركب كبيره أوي واقفه ومستنياه وعلى استعداد تعديه البحر مهما كان كبير
فرح أوي بس جه يجري ناحية المركب لقى نفسه متكتف ورجليه من تحت متقيدة
ساعتها فهم انه لازم يفك القيد عشان يركب المركب عشان يقدر يعدي البحر
حد عرف ايه القيد وايه البحر وايه المركب
أنا طولت عليكوا كتير اوي
بس هتعذروني لو عرفتوا اني هديلكوا وهدي لنفسي وللمدونه اجازه لمدة شهر من دلوقتي
انا بحاول أكتب في ظل الظروف دي ومش قادر خالص
تعرفوا اني عشان أكتب خرجت مخصوص عشان اسمع قناة الجزيره
ولما سمعتها وشفت المناظر حسيت بالعجز أكتر وماقدرتش اكتب اي حاجه
والخاطرة الوحيدة اللي كتبتها كان اسمها انتحار قصيدة
ماحبيتش أكئبكوا ولا احسسكوا بالذنب أكتر ما كلنا حاسين
اعتبروها فترة هشحن وراجع وكمنا هستريح على ما الكمبيوتر بتاعي يرجع
لاني اتبهدلت من الكتابه في السيبرات الشهرين اللي فاتوا
كمان حسيت ان المدونه الفتره اللي فات المنحني بتاعها كان في النازل في كل حاجه واولها في كتابتي أنا
بس لو انتو عازيني أكتب أنا هكمل ان شاء الله
أشوفكم على خير ان شاء الله
محمود أبوالعزم

أنا والريموت وغزة

Tuesday, January 6, 2009

السلام عليكم ورحمة الله
أنا مش هطول في المقدمة وهسيبها للآخر عشان لو حد عايز يقرى القصيدة بس
انا بس بعتذر لو فيه بعض ألفاظ غريبه شويه بس ماقدرتش أشيلها
لاني حبيت أبينها زي ما هي
أنا كان نفسي أنزلها بصوتي بس ماعرفتش
بس انتو أكيد ان شاء الله هتقروها زي ما اانا كتبتها وأحسن
بفضل الله
ماعادشي في بيتنا تليفزيون
لإن بتاعنا كان فرقع
وساب في البيت هدوء وسكون
قريّب رحت ازور صاحبي
قعدنا شوية نتكلم
وعلى حال غزة نتألم
ونستغرب ونسأل ليه
وبعد شوية جه تليفون
وقام صاحبي ورد عليه
رجعلى وقاللي متأسّف
أنا مضطر هستئذن
هروح مشوار وهرجع جري
يادوب ساعه وهرجعلك
وهنا في القوضة تلفزيون
قوم اتفرج عليه حبة
على بال ما آجي من برة
و شوف الدِش بالمرة
وقام صاحبي وسابني معاه
مسكت ريموته في ايديّا..وشغلته
وشغلت الطبق ويّاه
لاقيت فيه واحدة بتغني ومابتغنيش
لان الغنوة مش معموله للغنوة
دي غنوة بتتسمع بالعين
عشان تسرقلنا عقولنا
وكل الخلق تسمعها
!!!! ولو قافلة الودان الاتنين
تقوم تقعد تنط تشب
فجور واضح ..و إسمه..كليب
وتدلـّع وتتمايص
عشان يبقى الزبون هايص
وكانت لابسه لا مؤاخذه
أقل مساحة ممكن ست تلبسها
ومخرج ماشي بالكاميرا
بيتفحص ويتمحص
وخلى الجسم زي كتاب
!!!وخلى الكل يدرسها
أنا لو حتى صول غلبان
في أي بوليس في قسم آداب
دي أول واحدة هحبسها
و غيرت القناة تاني
لاقيت فيه فيلم عامل فيلم
وعـِلم السينما في بلدنا
صَبَح في بلدنا أكبر عـِلم
فلوس عالفاضي مصروفة
وناس عالفيلم ملهوفة
وفين الفكرة مش عارف
وفن القصة مش شايف
أنا مش لاقى غير قصة
على كل القيم بتدوس
بطل ومعاه كمان بطله
"ودول "أبطال" عشان كان مشيهم "بطال
وطول الفيلم نازلين بوس
على الفاضي وعلى ..الفاضي
"لان مافيش في ده "مليان
مادام منتج يكون كسبان
ماهيش فارقه وعلى استعداد
يقدم فيلم
مافيش فيه حد مش عريان
وغيرت القناة تاني
لاقيت استودوي تحليلي ...بتاع كورة
وجايب حد من نادي
وحد قصاده من نادي
ويشتد الخلاف عادي
!!!عشان كورة
يقولــّه سرقتوا لاعّيبنا
يقولــّه التاني مش عيبنا
يقولّه الدورى لفريقنا
يقوله اتهد وفارقنا
!!!ويتخانقم.. عشان كورة
وطبعا فيه شريط احمر
لنشر رسايل الجماهير
وخد عندك شتيمة كتير
فريقنا كبير..فريقكوا حمير
نزاع يغلب نزاع كشمير
وتطلع أقبح الألفاظ
أشوف أنا كل ده واتغاظ
ياتري لو كل نص جنيه
رماه الأخ في رساله
وصـَـل غزة..هيعمل ايه؟؟
أكيد هيغير الحالة
وغيرت القناه تاني
لاقيت فيه حاجه سياسية
يااااااااااااااااااااااااه
أخيرا حاجاة عن غزة
لكن ماكانتشي عن غزة
لاقيت طرفين
حكومة وضدها معارضة
بيتخانقم ولا المجانين
ماطيقتش نفسي بصراحة
و غيرت القناة تاني
لاقيت فيه حاجة مختلفة
وبرنامج كبير ديني
وقلت أكيد دا عن غزة
لكن ماطلعشي عن غزة
وطلعت ناس بتتخانق
!!!!بقينا في ديننا نتخانق
ومين سلفي..ومين اخوان..ومين صوفي
وكله في كله بيخبّط
ولاااحدّش بيسمع حد
وكله يهمه يطلع صح
ولو نغرق ووحدة صفـّـنااا تتهد
ولا افتكروا ان اسلامنا
دا دين نازل يجمّــعنا
ولو سيبناه
مافيش شئ تاني يرفعنا
ولااا فيه حاجة تنفعنا
ولا يكون للحياة معنى
وغيرت القناة تاني
لاقيت النشرة شغالة
وصورة بنت مدبوحة
وعايمة في دم ألف شهيد
وما سألتش ولا استغربت
لان ساعتها كنت فهمت
مادام الأمة ده حالها
فيبقوا بجد يستاهلوا
أكيد حاسة القلوب بيهم
وحالهم في القلوب واجع
وتبكي قلوبنا بعينيهم
ونتمني
أكيد النصر يوم راجع
هييجي النصر يوم لكن
هيرجع للي يستاهله
ولو فعلا بنتمناه
لابد احنا اللي نتغيّر
عشان نقدر نكون أهله
عشان نقدر ....نكون أهله
محمود سليمان أبوالعزم
أخيرا،القصيدة متاحه لو أي حد عايز يبعت اللينك او ينشرها على منتدى أو جروب
فاضل حاجه عايز أقولها
كل حد فينا بيفتح الاميل دلوقتي
هتلاقي رسايل اننا هنعمل حاجه معينه كلنا تضامنا مع غزة
هنصوم أو هنصلي..او هندعي..دا كويس ماقلتش حاجه
بس أنا شايف ان احنا لينا دور أكبر من كده
احنا اللي زي حالاتنا من أكتر الناس اللي اتظلمت في العدوان ده
ساعات بقول بيني وبين نفسي يا بختهم هما جاعوا واتبهدلوا واتقتلوا في سبيل ربنا
واكيد ان شاء الله ربنا هيعوضهم عن كل ده بأحسن منه مليار مرة
انما احنا لا قدرنا ننصرهم ولا ننصر نفسنا
وبقت حياتنا محبوسة مابين احساسنا بتانيب الضمير والاحساس بالععجز
ولما نقابل ربنا هنتحاسب على كل اللي حصلهم ده
تخيلوا معايا ان كل الوضع اللي احنا فيه ده زي بقعه سودة
مغطية كل الوطن العربي والاسلامي وكلنا واقفين عليها
انت لو بصيت للبقعه دي من بعيد هتحس انك مش قادر تعمل حاجه لنفسك
ولا تحوشها عن أهلك بس لو انا وانت وانتي
كل واحد نضف الحتة اللي تحته يبقى حتة جنب حته كل البقعه دي هتروح
هو ده اللي نقدر نعمله دلوقتي..غيّر نفسك
شوف حاجه كويسه ماكنتش بتعملها واعملها تضامنا مع غزة
لو مش بتصلي الفجر صليه حاضر في المسجد تضامنا مع غزة
لو مش بتصلي الصلاة في وقتها صليها تضامنا مع غزة
صوم زكـّي اعمل اي حاجه زي كده تضامنا مع غزة
او سيب اي حاجه وحشه كنت بتعملها برضو تضامنا مع غزة
أظن دي حاجه مش صعبة
احنا في النهاية هنكون برضو ماعملناش حاجه بس عشان بكرة لما نقابل ربنا
نقوله يارب احنا حاولنا نعمل حاجه
في النهاية دعاء قصير جسمي بيقشعر لما بسمعه
لازم كلنا ندعيه في كل وقت وفي كل مكان
اللهم استعملنا ولا تستبدلنا