الصيدلية

Tuesday, April 27, 2010

السلام عليكم ورحمة الله
معلهشي البوست ده هو الأهم في بوستين كتبتهم النهاردة
معلهشي يا جماعة النهاردة بس فيه كلام مهم جدا بخصوص موضوع الصيدلية
اللي حكيتلم عنه قبل كده
اولا اهم حاجة لازم أقولها ان دي فكرة اسلام الشاذلي وهو أكتر حد

تعب جدا في الموضوع من اول ما بدأ لحد دلوقتي...ربنا يجازيه كل خير

ثانيا الفكرة باختصار ان فيه أدوية ممكن تكون مركونة عند ناس مننا

سواء كان مثلا واخدها كعينات مجانية...او بتاعة حد كان تعبان عندهم مثلا

وربنا أتم شفاه الحمد لله او ماعادشي بيستخدم الدوا ده والدوا فضل مركون عنده

او دوا كان بيستخدمه حد وربنا توفاه قبل ما يكمل الدوا وحابين ان الدوا ده يبقى صدقة على روحه

فالفكرة انا ننلم الأدوية دي من الناس حتى لو شريط أو أمبول واحد.

وهنعمل بيهم لستة مبدأية نوزعها على زمايلنا ونعرفهم ان الأدوية دي موجودة معانا

بحيث هما لو قابلوا على مدار السنادي حالة هما حاسين انها مش قادرة على تمن الدوا

ساعتها هيبلغونا واحنا نحاول نوفره مادام موجود معانا ان شاء الله

و من خلال الدعاية الصغيرة اللي قام بيها اسلام وساعدناه فيها على أد ما قدرنا

جالنا كمية دوا كويسة جدا واسلام تعب جدا عشان يعملها في لستة


وكانت مهمتي اني أنزل طنطا و احاول أوصل الفكرة لأكبر عدد من زمايلنا

انا حاولت على اد ما قدرت اني أكلم معظم زمايلي اللي لاقيتهم يومها

والحمد لله لاقيت تجاوب كتير من ناس منهم ولاقيت ناس حابة تشارك بكذا صورة

بس لسة فيه عوائق كتير أدام الموضوع محتاجينكوا معانا فيها

أولا لسة الفكرة ماوصلتشي لناس كتير فياريت اللي خد مننا نسخة
يصورها ويحاول يوصل فكرة الموضوع لأكبر عدد يقدر عليه

تاني حاجة و اهم حاجة احنا عندنا مشكلة كبيرة في المكان

الأدوية دلوقتي لسة مع اسلام وهيبقى صعب عليه جدا انه يكون موجود في كل وقت

لو حد عنده أي أفكر بخصوص المكان ياريت يقولنا

احنا محتاجين يكون قريب من الجامعة وسهل الوصول اليه

ويكون فيه حد متواجد فيه يصرف العلاج للعيانين

بحيث ان زمايلنا تلقائيا يبعتوا العيانين على هناك علطول من غير مانبقى احنا في النص
بس ازاي؟؟؟؟؟
كنا بنفكر نعمل ميرج مع جمعية رسالة بس للأسف مقر صيديلتهم في المحلة
وفيه جمعيات تانية بس بصراحة احنا مش عارفين الجمعيات دول هياخدوا مننا ولا هيدونا

فيه فكرة ان الدوا يبقى مع زمايلنا في السكن
بس برضو صعب ان علطول يبقى حد منهم موجود باستمرار
ولو استحملونا النهاردة مش هيستحملونا بكرة

فيه فكرة اننا نأجر مكان في أي سنتر محترم
نقدر نأتمن الناس اللي فيه ونخلى حد من اللي شغالين فيه يبقى مسئول عنه
بحيث ياخد الادوية من الناس المتبرعين و برضو يصرف الأدوية للناس اللي محتاجين
وده طبعا مقابل مبلغ هياخده
بس هيبقى أسهل لينا أكتر و أيسر للجميع

وفيه فكرة جميلة اوي بس تنفيذها صعب
لو حد من زمايلنا عنده أو يعرف صيدلية تطون حريصة على الخير
هنودي أدويتنا هناك ونبعتلهم العيانين بكارت يصرفوله العلاج
ولو الدوا مش متوفر من اللي احنا اديناه ليهم هيصرفوه من عندهم
وفي آخر كل شهر نحاسبهم على الدوا الزيادة ده

لو حد يقدر يساعدنا في ده أو عنده اي فكرة بخصوص المكان ياريت يساعدنا

كمان يا جماعة احنا محتاجين ناس معانا
اسلام بيتعب جدا لوحده وخصوصا اني معظم الوقت في القاهرة
لو حد حابب يشاركنا بأي شكل يبقى جزاه الله خيرا
سواء مثلا يبقوا من اللي بيستلموا الأدوية من الناس
او اللي هيعملوا جرد ويكتبوا الأدوية في لستة كمبيوتر وهكذا

انا ان شاء الله نازل يوم الخميس عشان هقبض وراجع تاني
كان فيه ناس كتير قالتلي ان عندها علاج حابة تجيبوا لينا
ياريت في اليوم ده أقدر آخده منهم
دي نمرتي
0199849267
ولو أي حد من زوار المدونة عنده دوا أكيد برضو تشرفنا ثقته فينا

دايما لما كتبت هنا عن أي حاجة في الخير
كان رد فعلكوا أكبر بكتير مما كنت بحلم
أتمنى الاقي نفس رد الفعل في الموضوع ده
لإن الواحد قابل ناس بتفرق معاهم الحباية اللي تمنها نص جنيه بس
ربنا يكرمنا ويوفقنا ويطهر نيتنا وينور بصرنا وبصيرتنا

محتاج أسمعكم

Tuesday, April 20, 2010

السلام عليكم ورحمة الله
انا محتاج منكم انكم تكملوا كلكم البوست ده لآخره
ومحتاج اسمع رأيكمم كلكم بعد شوية فضفضة كده جوايا نفسي أقولهم
من حوالي سنتين كان فيه حفل ختام الأنشطة لإتحاد الطلبة في كليتنا
تم دعوتي للمشاركة بإنى أقول شعر في الحفلة دي....ووافقت
رحت الحفلة وكانوا وزعوا ورق بالبرنامج وانا كنت موجود فيه
وناس كتير من زمايلي ربنا يكرمهم جم عشان يسمعوني
وحتى كان فيهم زمايلنا من أسرة الرأي
بدأت الحفلة .....كان فيها أغاني لناس من برة كليتنا وحضور من برة كليتنا
وجو ماحبيتوش وما اتبسطتش فيه خالص وحسيت انه صعب أقول في الجو ده
كلمت زمايلنا اللي مسئولين وبلغتهم اني هعتذر ومش هقول حاجة
قالولي ماينفعشي انت كده هتحطنا في موقف محرج جدا
ولاقيت زمايل لينا كتير لاحظوا انفعالي شوية وجم قالولي يا محمود
احنا مستيينك ده كله......لازم تطلع تقول...احنا عايزين نسمعك
وطلعت وقلت وربنا وفقني الحمد لله
وقتها حصل خلاف على المدونات بتاعت زمايلنا الس حضروا الحفلة والمنظمين
وابتدت مناقشات حامية جدا مابين الطرفين وطبيعي ان اسمي جه في الموضوع
وفتها سمعت اكتر كلمة اتقالت عني وفرحتني....في كذا كومنت ورا بعض
محمود دا أخونا كلنا واحنا نحب نسمعه في أي وقت و أي مكان وهو برة المووضوع
وجت بعدها نفس الكومنتات من كل الأطراف بنفس الكلام ونفس المعني
كنت فرحان جدا وشكرت الجمبع واعتذرت اني قلت في الحفلة دي
الأسبوع اللي فات تمت دعوتي من أخين عزاز جدا على قلبي
اني أقول شعر في حفلة النقابة اللي منظماها لدفعتنا
ولإن النقابة ماسكها ناس كتير من الاخوان فأسرة الرأي كانت هي اللي منظمة الحفلة
ما اترددتش ثانية واحدة رغم اني كنت مريض جدا ايامها وماكانشي صوتي طالع خالص
وماكنتش بنزل لا المستشفي ولا حتى شغلي في الصيدلية
وكان صعب عليا أوي المشوار من القاهرة للمحلة
واصحابي هنا حاولوا كتير يمنعوني بس صممت أنزل
ونزلت وكنت مبسوط جدا الحمد لله لما قلت اول مرة
رغم حاجات كتير ماكنتش حاببها في الحفلة
وكان فيه اتنين من أعز أصحابي طلبوا مني ان أقول عم بتاع الجوافة
وفيه ناس طلبت مني اني أقول نسي الفوطة
فقلت لزماينا المنظمين اللي رحبوا جدا بالموضوع واستمرت الحفلة
وكنت مبسوط جدا وفرحان بزمايلنا اللي بيتكرموا وبعدها أعلنوا اني هقول
بس بعد مسرحية كده هتتقدم في وقت بسيط....ولاقيت من الذوق اني استني
ولما بدأت المسرحية حسيت ان الجو في القاعة راح في سكة تانية خالص
غير اللي الحفلة معمولة ليه وغير اللي انا شخصيا كنت أتمنى أشوفه
ومابين اني اعتذر ومابين لأ...كانت الكلمة الحاسمة
لمجموعة من زمايلنا جم وسألوني اذا كنت هقول ولا لأ ولما قلت اني عايز أعتذر
قالولي احنا استنينا واستحملنا دا كله عشانك ....تيجي دلوقتي وتعتذر
واحتراما ليهم واحترما لكلمتي وتقديرا لأي حد كان نفسه يسمعني..طلعت قلت
أنا واحد من الناس بتعامل على سجيتي من غير ما أفلسف الأمور
عمري مافكرت اني دي حفلة اتحاد او دي حفلة اخوان
دي حاجة زمايلي عاملينها وقدروني وانا من جوايا حابب اشاركهم تعبهم وفرحتهم
احب أكون سبب بسيط في اني حاجة بيعملوها تنجح
ثم أنا مين أصلا عشان اتنطط واقول هقول هنا ومش هقول هنا
زمايلي هنا وهنا ناس أصحابي بجد..
دخلوا بيتي ودخلت بيوتهم وكلنا مع بعض عيش وملح
عمري ما تعاملت مع حد علي حسب انتمائه ..بحاول أتعامل معاه بشخصه
وتقتلني كلمة بسمعها من اصحابي القريبين
يامحمود الناس دي بتستغل موهبتك وحب الناس ليك في أغراض تانية
بس عمري ما فكرت بالطريقة دي ولا عمري حكمت على نية حد
ولا عمري على مدار الكام سنة اللي قلت فيهم شعر اتعاملت بمبدأ
بلاش تكون مع الناس دي لا تتحسب عليهم
ولا كنت باجي اقول هنا اني قلت مع الاتحاد بس انا مش منهم
ولا قلت مع الاخوان بس انا مش منهم
لإني ما كنتش بشوف الموضوع تهمة لازم آجي أبرأ منها نفسي أدامكم
أنا نفسي أعيش الدنيا أبسط من كده...من غير الحساابات دي
بس بييصادف كلام كتير من ناس حواليا المفروض يخليني أعيد حساباتي مع نفسي
أولهم والدتي اللي قالتلي آخر مرة وانا مسافر
يا محمود انت طيب و برئ بس زيادة عن اللزوم
الدنيا دي محتاج لمظاهر كتير انت ما بتاخدشي بالك منها
وكذلك من زمايلي
من اسبوع كنت واقف في استقبال العضم وكان متوزع معايا بنتيتن من عين شمس
جت حالة لراجل كبير عاجز رجله مكسورة وبيتوجع جدا...اتعطافت معاه جدا
وكشفت عليه وطلبتله أشعة وكنا يوم جمعة قبل اللصلاة
ومش لاقي كرسي متحرك أنقله عليه
شلته على كتفى لحد الأشعة وبعدين شلته وديته لحد قوضة الجبس واتجبس
وبعدين طلعته برة لحد ما ركب ومشي
لما رجعت قوضة الاستقبال واحدة من زمايلنا دول قالتلي
ايه ده يا دكتر اللي انت عملته ده.....انت دكتور ماينفعشي تعمل كده
ماعرفتش أرد....يمكن هي عندها حق بس انا من جوايا مقتنع باللي عملته
مقتنع اني لو ماكنتش دكتور كنت هعمل كده ومش حابب أبدا
اني كوني بقيت دكتور يمنعني من حاجة خير كنت هعملها
عمرش ما شفت مانع اني أساعد عيان عشان يقلع هدومه نكشف عليه
او اني أستره و أغطيه لما نخلص وأعدله شبشبه بعد ما يكشف
بس بحس الناس بتبصلي باستغراب أوي لو عملت حاجة زي كده
واكتشفت أخيرا لما جيت ألم فلوس عشان موضوع الصندوق الخيري
لاقيت ناس كتير بتحذرني وبشده من حاجة زي كده لإنه غير مسموح امنيا
مع اني طول عمري بلم فلوس وماحدش قاللي حاجة
ومن حوالي شهر ونص كنت بقول شعر في قلب كلية الشرطةوكسبت الحمد لله
والعميد بتاع الكلية كرمني بنفسه ....يعني لو فيه أي
مشاكل مع الامن أو كده ماكنوش دخلوني من الباب أصلا
أقرب موقف فاكره كان لواحد من ولاد عمي شغال في هيئة قناة السويس
قالللي بسأل عليك والله والناس بيشكروا فيك جامد بس حد قاللي
دا دماغه مهوية يا عم ...دا بيروح الكلية بالصندل
ضحكت جدا لإني برضو ماعرفتش أرد ومش شايف حاجة في الموضوع
طول عمري لما بتعزم عند حد بقعد وباكل لحد ما اشبع
زي ما باكل في بيتنا ولو نفسي في حاجة كمان بقول عليها
والاقي حد يقوللي يا محمود لما تاكل عند حد كل ربع أكله كده ولا نص أكله
ماينفعشي تاكل عادي كده
وخدوا على كده مواقف كتير أوي مش هوجع دماغكم بيها
انا بجد محتاج أسمعكم
هو أنا كده غلط
ولو غلط طب ايه الصح
هما فعلا الناس محتاجين اللي يمثل عليهم
محتاج أسمع كل حد يعرفني وكل حد عاملني عن قرب
وماحدش يفتكر اني مكبر الموضوع لان الموضوع ده مسببلي أزمة
انا ماكتبتش البوست ده عشان حد يقوللي يا محمود انت كويس
انا كتبته لإنه محتاج نصيحتكم....ومحتاج تقوموني لو فيه أي حاجة
ماحدش يبخل عليا بالرأي ده
ومحتاج كل آرائكم هنا على المدونة

اعتذار

Tuesday, April 13, 2010

السلام عليكم ورحمة الله
انا بعتذر يا جماعة والله عن الكتابة
i have severe upper respiratory tract infection
جيت هنا النت بالعافية والله
والمفروض ان هنزل بكرة أقول بكرة شعر في حفلة النقابة بكرة
بس لسة ماكتبتش ومش عارف هقول ازاي لاني صوتي مش طالع أصلا
ربنا يستر
يارب تكووا كلكم بخير
دائما....على أمل اللقاء