عم بتاع الجوافة

Friday, November 20, 2009


السلام عليكم ورحمة الله

انا مش هتكلم عن المدونة وعن أد ايه هي وحشاني

انا جاي أكتب حاجة كتبتها النهاردة

هي مش شعر ومش قصة ومش أي حاجة

بس كتبتها وكنت حابب أوي الناس تقراها

أتمن تكملوها للآخر

ولو عجبت حد فهي متاحة للنشر باسمي او من غير اسمي في أي حتة

وعلى فكرة أول تمن سطور فيها حصلوا فعلا أدام عيني

..........................................


حط بتاع الجوافة
علمك وسط الجوافة
شفته وسألت نفسي
هو بتاع الجوافة
بيحب مصر ليه؟؟؟؟
طب ليه كان دمه فاير
علشان ماتش الجزاير
مع إنه بيبقى ماشي
!!!! وفي جيبه اتنين جنيه
عم بتاع الجوافة
مضايق النهاردة
أصله ماباعشي النهاردة
بس الماتش النهاردة
يبقى هيستني ليه
هيشوف الماتش فين؟؟
أصله ماعندوش ريسيفر
طب ليه هيجيب ريسيفر
والتليفزيون ماجاش
ممكن على قهوة يقعد
بس القعدة بفلوس
ومافيش قهوة ببلاش
عم بتاع الجوافة
وياه اتنين جنيه
و استلف اتنين جنيه
راح في القهوة ودفعهم
وقعد على نص كرسي
وبعلوْ صوته قال
ان شاء الله هنوصل
أملنا ماانتهاش
عم بتاع الجوافة
ماسكتشي لحظة واحدة
وفضل من قلبه يُصــْرُخ
وينادي مصر مصر
عاش منتخبنا عاااااااااش
واتحمس لما شافنا
كل الجماهير علينا
وبنلعب تحت ضغط
ونسيت أقوللكم
عم بتاع الجوافة
كان أصلا عنده ضغط
عم بتاع الجوافة
عديت تاني يوم عليه
في مكانه مالاقيتوش
قلـقـتني أوي الحكاية
وسألت عليه قالولي
ده محجوز في العناية
حودت عليه وشفته
كان راقد في السرير
و معاه قفص جوافته
ولاقيت قفص الجوافة
لسة العلم عليه
ماسألتش عامل ايه
أو حتى جراله ايه
كان عندي سؤال كبير
محتاج جواب عليه
لما انت بتاع جوافة
ومادام مش لاقي تاكل
بتحب مصر ليه؟؟

بتحب مصر ليييييييييييييييييييه؟؟؟
طلـّع قفص الجوافة
إدّاني جوافة منهم
قاللي اسأل الجوافة
هوّ انتي يا جوافة
جواكي بذر ليه؟؟
لو عايز يا ابني تعرف
بنحب مصر ليه
روح إسال القمر
بينور ليلنا ليه
إسال شمس الصباح
بتجيلنا الصبح ليه
روح إسأل الزهور
جواها عطر ليه
روح إسأل كل أم
بتحب وليدها ليه
حب البلد دي يا ابني
شئ مفطورين عليه
احنا بنعشقها عشق
ومادام القلب يعشق
يبقى ما تسألشي ليه
عم بتاع الجوافة
علمني حاجات كتير
علمني يا مصر انك
مش نيل وهرم وسد
علمني يا مصر إنك
ناس بتحبك بجد
علمني …إن علمك
هيعيش يامصر عالي
غصبا ْعن أي حد
مصر قلوب بالمحبة
زرعت في الأرض حبّة
طرحت روحنا اللي حابة
حتى الحزن اللي فيها
مصر في ضلمتنا شمعة

واحنا في ضلمتها شمعة

وبترسم فوق خدودنا

في كل لحظة دمعة

لكن علشان خاطرها

دمعتنا بنداريها
هيعيش يا مصر علمك
هيعيش برغم ألمك
رغم عذابنا وعذابك
هيعيش دايما مرفرف
علشان الدنيا تعرف
اننا عاشقين ترابك
حبك مش ماتش كورة
حبك جوانا صورة
مرسومة بلون دمانا
لو يوم هيحبسوكي
في قفص حزن سابوكي
هترفرفي في سمانا
ارفعي راسك لفوووووق
ارفعي راسك لفوووووق
أرواحنا بتـنـتميلك
دمّها دايب في نيلك
ولا شئ في الدنيا ممكن
يغير انتمائنا
وقت الجوع بـيكي نشبع
وقت العطش انتي مائنا
احنا ببساطة انتي
وانتي ببساطة احنا
وسوء عايشن في عشة
ولا عايشين في قصر
برضو هتفضل قلوبنا
دايما تحب مصر
ارفعي راسك لفوق
حتى في زمن الدموع
حتى في زمن السخافة
ارفع راسي لفوق
وكفاية إن فيكي
انسان بيموت عشانك
انسان عاشق كيانك
زي بتاع الجوافة

27 comments:

Anonymous said...

والله يا دكتر
عمري ماتخيلت بعد المجهود اللي انت عملته في المشرحة
وانت مدخل البارتات ومطلع البارتات
انك ممكن تكتب شعر بالجمال والرقة دي
ربنا يحميك ويبارك فيك

Anonymous said...

الله ينور عليك ياحودة يابتاع الجوافة
. فى انتظار المزيد. بس تشوف حاجة مافيهاش بذر علشان أنت عارف أن القولون عندى مش تمام.
أخوك / أشرف

Anonymous said...

بصراحه قدرت تعبر عن كل اللي جوانا وجوا اي مصري مخلص واهانتنا من الجزائر ربنا هيحاسبهم عليها وسبنا وشتيمتنا وضربنا رغم هزيمتنا مش هيعدي بالساهل في رب كبير بيحاسب حتي لو حكومتنا معملتش اي حاجه ولا شفت غليلنا ربنا قادر علي شئ قادران يا خذ لنا حقنا ممن اهروا دمائنا بغير ذنب رددوا معي كثيرا حسبنا الله ونعم الوكيل
شكرا ليك يا دكتر محمود علي مجهودك العظيم بجد اثبت انك جدير باحترام كل الدفعه بارك الله فيك وجزاك عنا كل خير يارب

د/عرفه said...

يا سلام عليك يا حودة
واحشنا والله


راااااااااائع جدا

مش لاقى كلامه اعبر بيه عن اعجابى


ربنا يكرمك ومتغيبش عنا كتير

نهال عمر said...

اخييييييييييرا يا دكتور .
طبعا مفيش حاجة خلتك تكتب غير مصر؟و.
طبعا تسلم ايدك ولسانك .واحنا كلنا ف حب مصر زى بتاع الجوافة
:)

ابو العز said...

حبك مش ماتش كورة

رائع

ربنا يعزك

Anonymous said...

والله يا حوده لو بتاع الجوافه في بلدنا بيعرف يقول الكلام الكبير ده يبقي لازم تتحب.....أحمد صقر

natural magic said...

اولا يا محمود عايزه اشكرك جدا جدا جدا علي مجهودك في المشرحه وفي كل حاجه والله
ربنا يجزيك عنا كل خير
وبجد انا اتشرف اني من دفعه فيها ناس زيك وزي زميلنا اللي بيتعابوا معاك
طبعا شعرك انهرده بيعبر عننا كلنا
بالرغم ان احنا يمكن مكنش حسين بحب مصر جوانا كدا
بس حاجه زي اللي حصلت دي من شويه همج اثبتت اننا بنعشق ترابها
وبصراحه لاني مش متابعه اوي سياسه انا اتصدمت باللي بيحصل دا
ليه كل دا مصر عملت ايه علشان الحقد دا
وبالرغم اني متاكده ان الفيفا مش هتعملنا حاجه
بس كفايه علينا ان شعب مصر كله من كبيره لصغيره اجتمع علي حب مصر وان مصر مش هتسكت علي اللي بيحصل
معلش انا طولت بس عايزه اقولك حاجه
انك تحمد ربنا انك قادر تعبر بقلمك
غيرك بيغلي من جوا ومش عنده طريقه يعبر بيها
ربنا يكرم ويعدي علينا الايام بخير
دعواتكم

اسلام الشاذلى said...

الله عليك يا ابو العزم
انا مش عارف اقولك على اللى انا حاسه بكلامك المذهل بس بجد انت خلصت كل الكلام ومش هعرف اجاريك ولا اقولك حاجة من اللى عاوز اقولها اكتر من ربنا يبارك فيك

الله عليك بجد ياابو العزم

وكفاية إن فيكي
انسان بيموت عشانك
انسان عاشق كيانك
زي بتاع الجوافة

۩۝۩ Dr. Flavio ۩۝۩ said...

الله عليك يا حوده
تسلم ايديك ويسلم
عم بتاع الجوافه

بجد رائعه يا حوده .. حب مصر جوانا سواء فيه ماتش او مفيش .. حب مصر جوه كيان كل واحد فينا فعلا

تتواصل تحياتي يا مبدع الكلمات

Nahnoha said...

ماشاءالله يا محمود
كلمات جميلة واحساس صادق وكلنا حسينا معاك بحب مصر في الكلمات الحلوة دي
مستنيين اكتر واكتر
وربنا يوفقك في المذاكرة

Shaimaa said...

لو عايز يا ابني تعرف
بنحب مصر ليه
روح إسال القمر
بينور ليلنا ليه
إسال شمس الصباح
بتجيلنا الصبح ليه
روح إسأل الزهور
جواها عطر ليه
روح إسأل كل أم
بتحب وليدها ليه
حب البلد دي يا ابني
شئ مفطورين عليه
احنا بنعشقها عشق
ومادام القلب يعشق
يبقى ما تسألشي ليه
عم بتاع الجوافة
علمني حاجات كتير
علمني يا مصر انك
مش نيل وهرم وسد
علمني يا مصر إنك
ناس بتحبك بجد
علمني …إن علمك
هيعيش يامصر عالي
غصبا ْعن أي حد

اكثر من رااائع
ربنا يكرمك

Ahmed Al Shawadfy said...

رائع.. رائع
ربنا يزيدك يا محمود ويحرسك يارب
بجد جميله جدا جدا

محمد السقا said...

بامانه يا محمود ربنا يزيدك الكلام سهل بس مش اى حد يقدر يكتبه وانا مع بتاع الجوافه حب مصر مش محتاج ليه وازاى بس يا ريت كل الناس تستغل الوحده اللى حصلت دى ونحاول نعمل حاجه بجد لان البلد دى تستاهل مننا ان احنا نعملها حاجه بجد حاجه اكبر من التشجيع فى ماتش كوره يا ريت نستغل الحماس والوحده اللى موجوده فى حاجه اكبر وربنا يوفقنا الاول فى الامتحانات ويوفقك يا حوده
محمد السقا

عمر said...
This comment has been removed by the author.
عمر said...

لو تسمعني يا حوده
مش عارف اقولك ايه ؟؟؟

لو تسمع نبض قلبي
بيرفرف هو ليه ؟؟؟

لو شفت نن عيني
ده بيلمع لأجل ايه ؟؟؟

لأجل بتاع الجوافه
ولا اللي قال عليه

*****

زي بتاع الجوافة
في بلدنا دي كتير

لأجل البلد دي قدم
والله يا ناس كتير

فيه منهم اللي عمر
بايديه منشأ كبير

وغيره اللي علم
جيل متعلم بصير

والدكتور اللي زيك
داوى بايده الفقير

ما طلبش منه حاجه
غير دعوة للقدير

انه يحمي البلد دي
من اي ايد حقير

*****

لكن برضه يا حوده
اللي حصل كتير

اي والله يا بلدي
ده والله شيء خطير

*****

بقى هو حب بلدي
يتفاس بماتش كوره

ولا انتمائي ليها
بارفع عشانه صوره

ولا ارفع العلم
واصرخ في كل كوره

نصرك يا مصر قادم
بالرجل أو ب( أوره )؟

*****

ده حالنا ده يحزن
لا !! ده يجيب الندم

حالنا صار يبكي
وعشانه يغلي دم

انا مش باقول حرام
اني ارفع العلم

ولا اهتف باسم بلدي
منصورة في الأمم

لكن باقول حرام
ده غيرنا في القمم

واحنا لسانا برضه
في ذيل كل الأمم

وياريت حاولنا ننهض
ونشيل عشانها هم

يارب اصلح بلدنا
واجعلها في القمم

خلي الاسلام شعارها
ما بين كل الامم

*****

واللي عشانها قدم
زي ( بتاع الجوافة )

ادي له اللي عايزه
ده هيرضى .. باي حاجه

محمد عبد الباسط said...

امتعتني
بارك الله فيكم

semsema said...

اولا شكرا جزيلا ليك يا محمود عن تعبك معانا في موضوع المشرحة وطبعا شكرا لكل زمايلنا اللي كانوا معاك في الموضوع وربنا يجزيكم خير الجزاء

اما بالنسبة للزجلولة الحلوة دي
كتبت فأبدعت
ربنا يزيدك معبرا عنا وعن ما بداخلنا
تحياتي

Anonymous said...

واو

GEHAD said...

ماشاء الله لاقوة إلا بالله
بجد كنا مفتقدين المدونة جدا
راااااااااااااااااااائعة من روائعك
كماهي العادة
بوركت وبورك قلمك النابض
وجزاكم الله خيرا

Anonymous said...

محمود و عمر
مش محتاجين كلام :)
ابدعتووووووووووووا بجد

ياريتنى كنت بياعة جوافة هههههه

rose flower

طارق الشافعى said...

الله يا محمود بجد والله الكلام دا المفروض يوصل للسان كل مصرى علشان يردده بجد اكثر من رائع وانت عارف رأيى فيك من زمان ربنا يوفقك ان شاء الله منتظرين منك المزيد.

Anonymous said...

رائعة يا حودة
طبعا زى ما عوتنا وما شاء الله عليك يا عمر جميل كلامك
ربنا يوفقكم فى الامتحانات
امضاء--انسان

Anonymous said...

بجد الكلام جميل جدا بس انا تعبت عما قر يته ربنا يبارك فيك والى معاك

عندما تنهمر الدموع said...

السلام عليكم ورحمة الله وبركاته
ازيك ياد/محمود يارب تكون بخير
متصورش حضرتك اد ايه المدونة وحشتنا وكلام حضرتك وحشنا جدا بس انا كنت كل فترة بدخل واشوف اذا كنت كتبت حاجة وفرحت اوي لما لقيت حضرتك راجع لنا بكلامك الجميل
بجد القصيدة جميلة وده اللي اتعودنا عليه من حضرتك فعلا احنا كلنا مصريين وبنحب مصر مش لحاجة بس لانها مصر وبرغم كل مشاكلها وكل الصعوبات اللي بنشوفها فيها هتفضل بلدنا ووطنا اللي لو لفينا العالم مش هنلاقي وطن غيره
كل سنة وحضرتك وكل اصدقاء المدونة بخير
وياريت حضرتك متحرمناش تاني من كلامك الجميل
مستنيين كل جديد وربنا يكرمك ويوفقك ويعينك على سنة ستة

ميرام said...

جميلة قوي
(:
الفكرة والصياغة ..
خالص تقديري
(:
كل عام وانتم بخير

Bassam said...

أبكيتنى يا محمود

أبكيتنى والله يا حبيب القلب

بوركت من شاعر .. وبوركت من طبيب ...وبوركت من أخ وصديق... على الرغم من انى ماعرفش انت عملت ايه فى المشرحه

المهم ..جزاك الله كل خير، لأن كلامك عشش فى القلب ، وانا فعلا بقيت مدمن لمدونتك حتى الفترة اللى غبت عننا فيها كنت بدخل برضه

وعلى فكره .. انا كنت ناوى السنه دى أزرع موز.. بس عشان خاطرك ..هزرع جوافه


فعلا قصيده رائعة جدا جدا جدا ، لأبعد مما كنت أتخيل

تقبل تحياتى

دمت موفقا