محتاج أسمعكم

Tuesday, April 20, 2010

السلام عليكم ورحمة الله
انا محتاج منكم انكم تكملوا كلكم البوست ده لآخره
ومحتاج اسمع رأيكمم كلكم بعد شوية فضفضة كده جوايا نفسي أقولهم
من حوالي سنتين كان فيه حفل ختام الأنشطة لإتحاد الطلبة في كليتنا
تم دعوتي للمشاركة بإنى أقول شعر في الحفلة دي....ووافقت
رحت الحفلة وكانوا وزعوا ورق بالبرنامج وانا كنت موجود فيه
وناس كتير من زمايلي ربنا يكرمهم جم عشان يسمعوني
وحتى كان فيهم زمايلنا من أسرة الرأي
بدأت الحفلة .....كان فيها أغاني لناس من برة كليتنا وحضور من برة كليتنا
وجو ماحبيتوش وما اتبسطتش فيه خالص وحسيت انه صعب أقول في الجو ده
كلمت زمايلنا اللي مسئولين وبلغتهم اني هعتذر ومش هقول حاجة
قالولي ماينفعشي انت كده هتحطنا في موقف محرج جدا
ولاقيت زمايل لينا كتير لاحظوا انفعالي شوية وجم قالولي يا محمود
احنا مستيينك ده كله......لازم تطلع تقول...احنا عايزين نسمعك
وطلعت وقلت وربنا وفقني الحمد لله
وقتها حصل خلاف على المدونات بتاعت زمايلنا الس حضروا الحفلة والمنظمين
وابتدت مناقشات حامية جدا مابين الطرفين وطبيعي ان اسمي جه في الموضوع
وفتها سمعت اكتر كلمة اتقالت عني وفرحتني....في كذا كومنت ورا بعض
محمود دا أخونا كلنا واحنا نحب نسمعه في أي وقت و أي مكان وهو برة المووضوع
وجت بعدها نفس الكومنتات من كل الأطراف بنفس الكلام ونفس المعني
كنت فرحان جدا وشكرت الجمبع واعتذرت اني قلت في الحفلة دي
الأسبوع اللي فات تمت دعوتي من أخين عزاز جدا على قلبي
اني أقول شعر في حفلة النقابة اللي منظماها لدفعتنا
ولإن النقابة ماسكها ناس كتير من الاخوان فأسرة الرأي كانت هي اللي منظمة الحفلة
ما اترددتش ثانية واحدة رغم اني كنت مريض جدا ايامها وماكانشي صوتي طالع خالص
وماكنتش بنزل لا المستشفي ولا حتى شغلي في الصيدلية
وكان صعب عليا أوي المشوار من القاهرة للمحلة
واصحابي هنا حاولوا كتير يمنعوني بس صممت أنزل
ونزلت وكنت مبسوط جدا الحمد لله لما قلت اول مرة
رغم حاجات كتير ماكنتش حاببها في الحفلة
وكان فيه اتنين من أعز أصحابي طلبوا مني ان أقول عم بتاع الجوافة
وفيه ناس طلبت مني اني أقول نسي الفوطة
فقلت لزماينا المنظمين اللي رحبوا جدا بالموضوع واستمرت الحفلة
وكنت مبسوط جدا وفرحان بزمايلنا اللي بيتكرموا وبعدها أعلنوا اني هقول
بس بعد مسرحية كده هتتقدم في وقت بسيط....ولاقيت من الذوق اني استني
ولما بدأت المسرحية حسيت ان الجو في القاعة راح في سكة تانية خالص
غير اللي الحفلة معمولة ليه وغير اللي انا شخصيا كنت أتمنى أشوفه
ومابين اني اعتذر ومابين لأ...كانت الكلمة الحاسمة
لمجموعة من زمايلنا جم وسألوني اذا كنت هقول ولا لأ ولما قلت اني عايز أعتذر
قالولي احنا استنينا واستحملنا دا كله عشانك ....تيجي دلوقتي وتعتذر
واحتراما ليهم واحترما لكلمتي وتقديرا لأي حد كان نفسه يسمعني..طلعت قلت
أنا واحد من الناس بتعامل على سجيتي من غير ما أفلسف الأمور
عمري مافكرت اني دي حفلة اتحاد او دي حفلة اخوان
دي حاجة زمايلي عاملينها وقدروني وانا من جوايا حابب اشاركهم تعبهم وفرحتهم
احب أكون سبب بسيط في اني حاجة بيعملوها تنجح
ثم أنا مين أصلا عشان اتنطط واقول هقول هنا ومش هقول هنا
زمايلي هنا وهنا ناس أصحابي بجد..
دخلوا بيتي ودخلت بيوتهم وكلنا مع بعض عيش وملح
عمري ما تعاملت مع حد علي حسب انتمائه ..بحاول أتعامل معاه بشخصه
وتقتلني كلمة بسمعها من اصحابي القريبين
يامحمود الناس دي بتستغل موهبتك وحب الناس ليك في أغراض تانية
بس عمري ما فكرت بالطريقة دي ولا عمري حكمت على نية حد
ولا عمري على مدار الكام سنة اللي قلت فيهم شعر اتعاملت بمبدأ
بلاش تكون مع الناس دي لا تتحسب عليهم
ولا كنت باجي اقول هنا اني قلت مع الاتحاد بس انا مش منهم
ولا قلت مع الاخوان بس انا مش منهم
لإني ما كنتش بشوف الموضوع تهمة لازم آجي أبرأ منها نفسي أدامكم
أنا نفسي أعيش الدنيا أبسط من كده...من غير الحساابات دي
بس بييصادف كلام كتير من ناس حواليا المفروض يخليني أعيد حساباتي مع نفسي
أولهم والدتي اللي قالتلي آخر مرة وانا مسافر
يا محمود انت طيب و برئ بس زيادة عن اللزوم
الدنيا دي محتاج لمظاهر كتير انت ما بتاخدشي بالك منها
وكذلك من زمايلي
من اسبوع كنت واقف في استقبال العضم وكان متوزع معايا بنتيتن من عين شمس
جت حالة لراجل كبير عاجز رجله مكسورة وبيتوجع جدا...اتعطافت معاه جدا
وكشفت عليه وطلبتله أشعة وكنا يوم جمعة قبل اللصلاة
ومش لاقي كرسي متحرك أنقله عليه
شلته على كتفى لحد الأشعة وبعدين شلته وديته لحد قوضة الجبس واتجبس
وبعدين طلعته برة لحد ما ركب ومشي
لما رجعت قوضة الاستقبال واحدة من زمايلنا دول قالتلي
ايه ده يا دكتر اللي انت عملته ده.....انت دكتور ماينفعشي تعمل كده
ماعرفتش أرد....يمكن هي عندها حق بس انا من جوايا مقتنع باللي عملته
مقتنع اني لو ماكنتش دكتور كنت هعمل كده ومش حابب أبدا
اني كوني بقيت دكتور يمنعني من حاجة خير كنت هعملها
عمرش ما شفت مانع اني أساعد عيان عشان يقلع هدومه نكشف عليه
او اني أستره و أغطيه لما نخلص وأعدله شبشبه بعد ما يكشف
بس بحس الناس بتبصلي باستغراب أوي لو عملت حاجة زي كده
واكتشفت أخيرا لما جيت ألم فلوس عشان موضوع الصندوق الخيري
لاقيت ناس كتير بتحذرني وبشده من حاجة زي كده لإنه غير مسموح امنيا
مع اني طول عمري بلم فلوس وماحدش قاللي حاجة
ومن حوالي شهر ونص كنت بقول شعر في قلب كلية الشرطةوكسبت الحمد لله
والعميد بتاع الكلية كرمني بنفسه ....يعني لو فيه أي
مشاكل مع الامن أو كده ماكنوش دخلوني من الباب أصلا
أقرب موقف فاكره كان لواحد من ولاد عمي شغال في هيئة قناة السويس
قالللي بسأل عليك والله والناس بيشكروا فيك جامد بس حد قاللي
دا دماغه مهوية يا عم ...دا بيروح الكلية بالصندل
ضحكت جدا لإني برضو ماعرفتش أرد ومش شايف حاجة في الموضوع
طول عمري لما بتعزم عند حد بقعد وباكل لحد ما اشبع
زي ما باكل في بيتنا ولو نفسي في حاجة كمان بقول عليها
والاقي حد يقوللي يا محمود لما تاكل عند حد كل ربع أكله كده ولا نص أكله
ماينفعشي تاكل عادي كده
وخدوا على كده مواقف كتير أوي مش هوجع دماغكم بيها
انا بجد محتاج أسمعكم
هو أنا كده غلط
ولو غلط طب ايه الصح
هما فعلا الناس محتاجين اللي يمثل عليهم
محتاج أسمع كل حد يعرفني وكل حد عاملني عن قرب
وماحدش يفتكر اني مكبر الموضوع لان الموضوع ده مسببلي أزمة
انا ماكتبتش البوست ده عشان حد يقوللي يا محمود انت كويس
انا كتبته لإنه محتاج نصيحتكم....ومحتاج تقوموني لو فيه أي حاجة
ماحدش يبخل عليا بالرأي ده
ومحتاج كل آرائكم هنا على المدونة

34 comments:

د/ رامي شهاب الدين said...

يمكن دى أول مرة أعلق لك فى مدونتك رغم إنى متابع قديم جداااااا لكل ماتكتب

أخى الفاضل : من راقب الناس مات هما

ومفيش إنسان على وجه البسيطة إتفق عليه كل البشر .. دا حتى حبيبك ونبيك خاتم الأنبياء والمرسلين لم يتفق عليه كل اهل الأرض ، وكان من كذبه وأذاه .. هل إنت شايف إنك افضل من سيدنا محمد عليه اتم الصلوات والتسليم

إعمل ماتراه صحيح يامحمود ومش مهم الناس شايفة إيه .. بس بشرط إن مرجعيتك فى مراقبة أفعالك سؤال واحد تسأله لنفسك : هل إللى بعمله ده فيه شئ يخالف عقيدتى أو مبادئى فى
الحياة ولا لأ ؟

موقفك فى عيادة العضم إسمحلى أقولك إنه موقف نبيل وقلما تلاقى حد يعمل زيك .. ناس كتير بتحبك وبتحترمك يامحمود والسر هو بساطتك فى التعامل وإحترامك لذاتك وتبسمك فى وجه كل من تصادف .. وبجد أنا سعيد جدا إنى فى يوم صادفت إنسان جميل زيك

نصيحة منى ليك : إستمر فيما أنت عليه ، ولا تلتفت لأى عامل قد يمنعك من المضى قدما فيما يسرك الله له

دمت بكل ود وإحترام

Anonymous said...

على فكرة موقفك فى عيادة العظم المفروض انه هو عادى وزمايلك هما اللى فيهم حاجه غلط لان الدكتور مهمة انه يدعم المريض من كل النواحى وبعدين حتى لو مش من وجهة النظر دى تبقى من الناحية الانسانية فى بعض الموافق المفروض الانسان ينسى فيها البرستيج ده موقف رجولة والمفروض انه لا يوجدممرض او اى حد تانى يعمله فانت المفروض تعمله و بعدين انت مقتنع بمافعلته هو ده المهم جزاك الله كل خير

Anonymous said...

السلام عليكم ورحمة الله
بص ياحودة انا بعتبر شهادتى فيك مجروحه لانو ربنا وحده عالم انت عندى ايه بس بص هقولك ورزقى على الملك
ياسيدى انا مش شايفه خاالص انو اى حاجه من اللى بتعملها غلط لا موقفك وترددك فى التراجع عن انك تستمر فالحفله ولا موقفك فعيادة العظام ولا موقفك فالاكل ولا اى موقف من المواقف دى
انت صح ومفروض اى بنى ادم عنده قلب واحساس وضمير وعقل يعمل كده كمان لما قالتلك والدتك انك برىء زياده عن اللزوم انا شيفاها اجمل حاجه فيك ولو حاولت تستعمل شويه مظاهر هتلغى جواك بواطن كتير
انت صح وكده صح وحياتك صح وتفكيرك صح
مش عارفه ياترى بقولك كده لانو كتير بتعامل زيك كده وبرده بلاقى انتقادات كتير بس ولا يهمنى مادمت صح ومش بعمل حاجه تزعل ربنا يبقى اللى يزعل يزعل واللى يقول يقول او بقول كده لانو شيفاك كده اجمل حد عرفته
معرفش المهم انك صح
ولا يهمك ياحوده ويااااااااااااااااااااااااااااااااارب تكون عرفتنى من غير توقيع
عموما هوقع
F.A

سنا said...

قال رسول الله صلي الله عليه وسلم: (لو يعلم العبد ما في حسن الخلق لعلم انه محتاج أن يكون له خلق حسن)
وما من شئ أثقل في ميزان المؤمن( يوم القيامة من خلقٍ حسن)
في التعامل مع الاخرين بنحاول قدر المستطاع ان ننتهج نهج القرأن والرسول عليه الصلاه والسلام اما ما يخالفهم فميستحقش بجد حتي ولو التفاته من اي انسان اما بقي اذا حاول الانسان انو يرضي الناس فدا مستحيل مستحيل وزمان علموهالنا في قصه جحا وابنه يعني مثلا مقوف زي موقفك مع الرجل الكبير العجوز دا تفتكر لو كنت عاملته بترفع زي ما ناس كتير للاسف فاكرني ان دي متطلبات مهنه الطب تفتكر كانو هايرضو والله ابدا فهنا بقي في طريقين اما صح والناس مش هايرضو او غلط وبرضو الناس مش رضيين
حتي الانسان اللي علق علي انك بتروح الكليه بالصندل والله والله دا ان دل فهو بيدل عل تفاهه الانسان دا ولك حق فعلا انك تضحك علي انسان اختار لنفسه انو يكون بالتفاهه دي

الدنيا زي المركب والكل هاينزل منه اما انك تنزل غرقان او تنزل لبر الامان ايهم تفضل؟
وما نحن سوي زائرين ليوم تمر بنا القافله
وبصراحه مواقفك كلها اللي اتقالت مش شايفه فيها حاجه غلط بس علشان ترتاح جادل اللي قدامك في موقفه واثبت له صحه عملك واثبت له خطأقوله اما سكوتك علي كلامهم فمعناه رضاك به ودا اكيد لا ووالله ساعتها هايحسوا اد .ايهم هما صغيرين اوي في طباعهم دي
معلش طولت شويه بس بصراحه مواقف الناس استفزتني
واخيرا اسمحلي اطلب منك تحط نفسك
في مكان مدرس بيشرح نص (كن بلسما)
وفجأه قام قال لك تلميد ياستاذ اللي انت بتقوله دا مينفعش في الزمن دا بعدين قام واحد تاني وقالك ان مستحيل اعمل زي ما الشاعر دا بيقول ولو عملت كدا كل الناس تزيد في اساءتها ليا ،ياتري ترد علي التلاميذ دول تقول ايه ؟؟؟؟؟

tareksashah said...

السلام عليكم يا محمود
بصراحة يوجد تشابه كبير بينى و بينك فى الكثير من الاشياء
و قابلتنى نفس تلك الانتقادات
منها ماكانت فى محلها و منها ماكانت بعيدة عن الصحة
اثبت على ما انت عليه
و موقف العيادة ده ربنا باذن الله هيدخلك الجنة بيه
و يارب نبقى زيك
----
و تبقى روح الكلية بجزمة يا عم هههه
مش لازم صندل يعنى
مش فاكر انى بصيت لرجليك قبل كده ههههه
:P

Anonymous said...

i was just like u some day,and i decided to change,and guess what,i feel...well i feel nothing,i think i became a horrible miserable synthetic lifeless creature,who donno what he wants,i wish i can be spontaneous the way u r,don't change dear brother,just be ur self

amira elhawary said...

انا اول مره اعلقلك علي المدونه لانك لو اتاثرت بكلام الناس تبقى كارثه
عارف قصة جحا وحماره وابنه لما في الاخر شالوا الحمار وبرضو معجبش الناس00
لو هتغير حاجه فيك يا محمود اوعي تغيرها بس علشان راي الناس حتي لو كانت غلط
اللي بيستمد قيمته من راي الناس فيه بيعيش ويموت ملوش قيمه
بس مش هاقولك كمل زي ماانت 000 لأ قيم نفسك وغير اللي تشوفه غلط بس برضو باللي يناسبك انت

Anonymous said...

ana 2aret el post bs msh 3arfa arod akteblak eh

a2ollak enta sa7 ?? enta aked 3aref en enta sa7....enta zay ma mamtak 2aletlak enk ymkn tkon tayyeb zyada 3n ellozom bs da msh 3eb de msh 7aga w7sha asln.elmfrod kollena nkon tayyeben.kon en elnas msh kda fa da 3eb fehom homma..rabbena ykrmk w ybareklk w ew3a tetghayyar 3shan mateb2ash zay nas kter awy m3ana etghayyaro w ba2o we7shen awyyyyyyyyyyyyyyyyyyyyyyyyyy w ana bat7assar bgd kol ma ashofhom aw at3aml m3ahom...rbna yhdehom yarab w yhdena game3an

HALA

أبو العز said...

رضا الناس غاية لا تدرك أخي الكريم

اجعلها في رأسك دائما

أصلح الله شأنك

Little Angel said...

محمود يارب تكون بخير ممكن اقولك راى وده بحكم معرفتى بيك وبحكم ما رايته فى الحياة مش كتير اى نعم بس اتعلمت منه كتير ..
انت شخصية الله يبارك لك انسان فعلا بمعنى الكلمة وبكل ما فيها من صفات الله وحده يعلم وكم تمنيت والله بجد لو اكون زيك كده بس برضه لازم تحرص شوية ومش تخون يعنى جميل حسن النية والاجمل انى اخد بالى من كل حاجة وده مش هيجى الا بالتجارب ولازم تقع عشان تتفهم الحياة وما حولك وعمر الطيبة والبساطة ما كانت عيب ابداااااااا وباقولك ابقى كما انت الله يزيدك من فضله فقط خد بالك يامحمود وليس كل ما يلمع ذهبا وعامل الناس بالخلق الافضل ده امر ربنا ولو وصلت له يبقى انت حمد لله من عباده المخلصين ولا تحزن ولا تياس ولا تغالط روحك فى اشياءك البسيطة والطيبة وحسن النية يارجل ده الالاف المعجبات واسالنى انا هههههههه والله بجد فعلا ..واخر كلامى عشان تبقى كما انت ولكن برضه اكرر سيدنا على قال ..احبب حبيبك هونا ما عسى ان يكون عدوك يوما ما وابغض عدوك هونا ما عسى يكون حبيبك يوما ما يعنى دوام الحال محال ..وده مش معناه تظن الناس السوء ولكن احاول اكتسب فطنة واتعلم ولا اتضايق من وقوعى فى اخطاء امال هنتعلم فى الدنيا ازى واعرف احكم ازى وخد بالك الافظع من الخطا تكراره
وختما حديث خير الانام عليه الصلاة والسلام اذكرك ونفسى وكل الاحباء به
اصنع المعروف فى اهله وغير اهله ..فان صادف اهله فهو اهله ..وان لم يصادف اهله فانت اهله ..وفقك الله وثبت خطاك وطمان قلبك وانارد دربك يااخى معلش رغيت بقى بس والله ده انا كمان اختصرت يامحمود ..هههه تحياتى

Little Angel said...

اه نسيت اهم نقطة معلش ههههههه دوما اقولها لنفسى واقولها طبعا لاخى العزيز
طالما انك ترضى الله وتسعى لجنته ورضاه خلااص كله يهون وارضاء الناس جميعا غاية لن تنال ومش مهم اصلا رضاهم ولكن خد نقدهم بعين الاعتبار يعنى من الاخر وبلغتنا غربل الكلام خد اللى ينفعك ولا تكترث بما هو لن يجدى صح ولااى

Anonymous said...

السلام عليكم
حبيبيى محمود

أسأل الله أن يديم عليك نعمة الحب اللى بيملى قلبك وبيملى قلوب الناس تجاهك

انت ابن حلال
انت صح والناس التانيين صح
المهم
كن فخور باللى بتعمله
واحتسب الأجر عند الله

طول ما انت نيتك لله
اعمل اللى صح حسب نظرتك و ثقافتك و رأيك

كن نفسك يا محمود
صدقنى هتزعل اوى من نفسك لو ما كنتش نفسك
ودا سر تميزك
أنك نفسك

ربنا يبارك فيك و يحفظك

Anonymous said...

السلام عليكم
حبيبيى محمود

أسأل الله أن يديم عليك نعمة الحب اللى بيملى قلبك وبيملى قلوب الناس تجاهك

انت ابن حلال
انت صح والناس التانيين صح
المهم
كن فخور باللى بتعمله
واحتسب الأجر عند الله

طول ما انت نيتك لله
اعمل اللى صح حسب نظرتك و ثقافتك و رأيك

كن نفسك يا محمود
صدقنى هتزعل اوى من نفسك لو ما كنتش نفسك
ودا سر تميزك
أنك نفسك

ربنا يبارك فيك و يحفظك

natural magic said...

ازيك يا محمود
وحمد الله علي سلامتك من دور البرد اللي كان عندك

اولا طبيعتك دي اللي محببه فيك الناس دي كلها
ومخليانا لما بنشوف ابو العزم بنحس ان الدنيا فيها خير
وفعلا احنا صبرنا علي حفله النقابه علشان انت هتقول فيها في الاخر
طبعا تصرفاتك اللي علي طبيعتك صح جدا
بس بردو لو التصرفات دي هتضرك من قريب او من بعيد يبقي قلتها احسن
مش صح انك تضحي بنفسك علشان تسعد غيرك
لان كدا انت مش هتبقي سعيد علشان تقدر تقدم اي حاجه لاي حد
لازم تفكر في عقبات اي تصرف ليك
وتوازن النفع من الضرر
لكن كون انك تغير تصرفاتك علشان الناس قالوا كدا
لاء طبعا
انت تحط في اعتبارك انت
انسان ثم دكتور مش العكس
ربنا يكرمك ويبارك فيك

محمد مغاوري said...

بالنسبة لموضوع الأتحاد والاخوان سألوا شارلي شابلن قبل كده عن علاقته بصديق ليه الصديق ده كان مقرب ليه جدا بس ينتمي لحزب شيوعي بس كان رده بكل بساطة انه مايفرقش معايا عشان انا في صداقتي معاه مااخترتوش لأبعاد سياسية كل الحكاية ان احنا اتنين جمعنا ظروف واحدة وهموم واحدة فبقينا أصحاب بغض النظر عن هو ايه وانا ايه وايه هيا انتمائتنا السياسية..........

بالنسبة للعضم احب اقولك خليك رحيم بنفسك انا شغال دلوقتي استقبال اطفال وفي مواقف كتير اوي زمايلي بيدخلوا يلاقوني شايل العيل علي رجلي او علي كتفي وبسكته عشان اكشف عليه وياما عيال رجعت عليا ولا عطست في وشي بس أنا بني ادم وده طفل لأ وكمان مريض يبقي منتظر ايه؟؟؟؟؟؟

اللي يمكن بس الناس عندهم حق فيه سواء انا او انت هو لازم الأمان الشخصي بتاعك اولا قبل اي حاجة من العدوي ومن المخاطر اللي ممكن يجلبهالك المريض ودي مش زي ما الناس فاكرة ندالة بس انت مسؤول عن حياة ناس كتير وغير كده انت مصدر ناقل للعدوي بين المرضي بتوعك يبقي عشان كده انك تاخد احتياطك مش عيب ولا حرام بالعكس ده عشانهم قبل ما يبقي علشانك

وبالنسبة للراجل اللي رجله مكسورة كان ممكن ببساطة تجيبله ترولي او كرسي وتنقله حفاظا علي نفسك ولو دورت ومالقتش مش عيب ابدا انك تنقله بنفسك

طولت عليك بس عايز اقولك اللي عايز ينصحك هاينصحك واللي بيهاجمك ممكن يكون عشان نصيحة وممكن لأنه مقيد مش عارف يتصرف زيك وفي الحالتين التمسلهم العذر
والله من وراء القصد

Anonymous said...

اذيك يا محمود
يارب تكون في أتم صحة وعافية
أحب أقولك يامحمود ان البساطة وطيبة القلب طول ماهي تؤدي لخدمة الناس عمرها ماتعيبك أبدا والنبي صلي الله عليه وسلم علي الرغم من منزلته الكبري وانشغاله الشديد كان لا يمتنع عن خدمة الناس مهما كان وهكذا كان فعل الصحابة الذيت تربوا علي يديه فقد كان عمر رضي الله عنه يحمل الطعام علي ظهره ويذهب به الي المحتاجين واذا قيل له عنك ياامير المؤمنين قال من يحمل عني ذنوبي يوم القيامة وهكذا كان فعل أبي بكر رضي الله عنه وبقية الصحابة رضوان الله عنهم أجمعين

أما مسألة الاخوان والاتحاد فالصح يامحمود اللي انتا بتعمله وهو انك بتشارك في أي عمل لله طالما وراه خير ومافيهوش أي مخالفات

وربنا يبارك فيك يامحمود ويوفقك باذن الله
أخوك
أحمد حسن طه

sony2000 said...

انا رأيي يتلخص فكلمه:اعمل اللي انت عاوذه واللي شايفه صح
ومهمن عملت لايمكن هتعجب كل الناس:)
تقبل مروري وتحياتي

عندما تنهمر الدموع said...

السلام عليكم ورحمة الله وبركاته
ازيك يا د/محمود يارب تكون بخير
انا هقول لحضرتك رأيي بصراحة من غير ما تعتبره انه مدح او شكر لاني زي ما قلت قبل كده لو مش رأيي كده فانا مش مجبرة اني اقوله خصوصا ان حضرتك متعرفنيش شخصيا يمكن انا كمان متعاملتش مع حضرتك شخصيا بس اللي انا متأكدة منه ان حضرتك انسان بكل معنى الكلمة وده مش من فراغ كتابات وكلام حضرتك بتعبر عن جزء كبير من شخصيتك ده اولا
ثانيا اي حد بسأله عنك دايما بيقول انك انسان محترم جدا
الحفلة اللي حضرتك قلت عنها قبل سنتين انا كنت حاضراها كنت لسه في اولى يعني انا مليش في جو الحفلات ده بس انا واصحابي كنا حاضرين عشان نسمعك لاننا اتحكالنا عنك كتير وكنا دخلنا ع المدونة وقرينا كتير من اشعارك حتى يومها استغربت جدا ان حضرتك كنت مضايق جدا كان واضح عليك حتى حسيت انه مكنتش عايز تقول حاجة رغم اني مكنتش اعرف اي حاجة من اللي حصلت انا قصدي بس من الموضوع اني اقول ان حضرتك طيب جدا واي حاجة بتحس بيها بتبان عليك يعني اللي في قلبك على لسانك زي ما بيقولوا وده مش عيب يعني جميل انك متبقاش انسان منافق واللي بتحسه بتقوله لكن المشكلة انه ناس كتير بتفكر انه من الجرأة والصراحة الزايدة انك تكون على طبيعتك يعني لازم يبقى في تحفظ في تعاملك مع بعض الناس
وبالنسبة لموضوع المشفى فالطبيب انسان قبل ما يكون دكتور ومن اهم الصفات اللي لازم تتوفر في الطبيب هو انه يكون انسان يعني مش غلط اللي حضرتك عملته واكيد اي واحد عنده قلب كان عمل نفس ما حضرتك عملت
وبعدين مهما عملت عمرك ما هترضي كل الناس وكل الاطراف عشان كده اعمل اللي شايفه صح واللي يمليه عليه ضميرك طالما شايف ان ده صح وانك مش بتعمل حاجة غلط ولا بتغضب ربنا
يا دكتور خليك على طبيعتك وخليك برئ زي ما انت لان البراءة بقت حاجة صعبة نلاقيها اليومين دول وكمان تأكد انه الدكتور لازم يكون انسان اولا قبل ما يكون دكتور عشان كونه انسان ده هيخليه دكتور ناجح وكفاية حب الناس ليك ودعوانهم ليك هي اللي هتفضلك ليوم الدين
سامحتي طولت على حضرتك بس ده لمعزتك عندنا كلنا وربنا يكرمك ويوفقك دايما يارب ويهديك لما فيه الخير لك

وليد مسعد said...

normaaaaaaaaaaaaaaal

Anonymous said...

انا بروح الكلية بشبشب بصوبع و ما حدش ليه عندى حاجة رجلى و انا حر فيها وانا مستريح كدة

Anonymous said...

السلام عليكم ورحمه الله

ازيك يا د محمود والف سلامه
تقريبا كل الناس هنا قالت
كل اللى كان ممكن اقوله بس
اهم حاجه ان حتى من نغير ما
تسألنا رأينا كنت هتختار الصح
لان ما شاء الله حضرتك انسان فطرته
سليمه وناس كتير بيحسدوك عليها حتى
اللى ليهم تعليقات على تصرفاتك
بينهم وبين نفسهم يتمنوا يبقوا زيك
بس بيمنعهم المظاهر اللى خلاص بقت مستعبدانا وبعدتنا عن دينا وتعليماته
نصيحتى بجد ليك حافظ على فطرتك السليمه لانها هيا اللى دايما بتدلك على الخير وهيا اللى هتخليك سعيد وراضي وارفض بشده اى حد يقولك غير كده
وحتى اعمل نفسك كانك مسمعتش حاجه اصلا
ولا تخلى كلامه ياثر فيك وزى ما انت قولت مش كونك دكتور يبقى في حاجات تعملها وحاجات لأ ..

على فكره كان نفسي احضر الحفله
بس طرأت ظروف غصب عنى منعتى من الحضور
وزعلت انى مسمعتكش وانت بتقول الشعر لان دا بالنسبه ليا متعه تانيه بس
يالا ملحوقه وقدر الله ما شاء فعل

دمتم بخير دائما
دوك ميرو

Al Bassam said...

بسم الله الرحمن الرحيم

"واصبر نفسك مع الذين يدعون ربهم بالغداة والعشى يريدون وجهه ، ولا تعد عيناك عنهم تريد زينة الحياة الدنيا، ولا تطع من أغفلنا قلبه عن ذكرنا واتبع هواه وكان أمره فرطا"

ومن كلام المصطفى صلى الله عليه وسلم

{ من أسخط الله في رضا الناس سخط الله عليه وأسخط عليه من أرضاه في سخطه ، ومن أرضى الله في سخط الناس رضي الله عنه وأرضى عنه من أسخطه في رضاه حتى يزينه ويزين قوله وعمله في عينه }

أخى وحبيبى دكتور محمود

مجتمعنا هو اللى عايز يتغير

مجتمعنا هو اللى محتاج تربية من جديد

ممكن يكون كلامى قاسى شويه ، بس هيه دى الحقيقة

وبعدين ياحوده .. احنا حبيناك كده ، مش عاوزينك تبقى نسخه تانيه من حد ، أى حد... وانت مابتعملش حاجه غلط معاذ الله

بالعكس..هو ده ديننا وأخلاق ديننا واسلامنا الجميل

يوم ما زرتك فى بيتك واتشرفت بمعرفتك ياحوده ، فيه حاجتين جمال جدا لقيتهم فيك (الرقة و الشجاعة ) وقليل جدا لما تلاقى حد يجمع الاتنين دول مع بعض


فيه كلام كتير جدا كنت عاوز اقوله ، لكن الجماعه ماشاء الله ماسابوش حاجه فى نفسى الا وقالوها ، ربنا يكرمكم جميعا ويبارك فيهم ويجمعنا دايما على خير


أشوفك قريب على خير ان شاء الله

n said...

طول ما الواحد مش شايف عيوب الناس بيكون مبسوط
لحد ما يبدأ يشوف السواد اللى جواهم الدنيا بتسود فى عينه شويه بشويه

المشكله بقى انه يبقى زيهم
اوعى تعمل كده لان ساعتها هتفقد نفسك

بس حاول ان محدش يستغلك
اهم حاجه

Anonymous said...

انت عندك أزمة جامدة مع نفسك لو ماكنتش كدة ما كنتش كتبت الكلام اللى فى البوست ده
لأنك عارف انه صح
ايه يعنى لما تغطى المريض
أنا مثلا شغالة نسا
وعلطول باغطى الحالات
لحد ما فى يوم كنت باغطى رجلين حالة
لقيتها عمالة تدعيلى بشدة جامدة
ربنا يسترك زى ما سترتينى
وقعدت تكررها كتير جدا
والواحد بين ثانية و التانية ممكن يكون مكان اللى قدامه
ويتمنى ان حد يغطيه
وفى الاخر عامل الناس بمثل ان تحب ان يعاملوك به

Dr_medo said...

بص يا حوده انت اللى تاعبك انك متابع الناس ومهتم برايهم فى اللى بتعمله انت ممكن تقيس بمقياس تانى خالص هيرحك جدا وانك تشوف الحاجه اللى انت بتعملها زى مثلا موضوع العيان بتاع العضم هترضى ربنا ولا لا
ساعتها اكيد هترتاح وترتاح جدا

Mohamed Elnemr said...

بص يا محمود ربنا يعلم انك واحد من احلى الشخصيات اللى اتعاملت معاها
اللى شفته منك انك انسان على طبيعتك ودى احلى حاجة فيك
بس نصيحة اعمل اللى انت شايفه صح ومرتاحله ومتحاولش تشغل دماغك فلان هيقول ايه عنك
واتأكد ان حياتك اللى على طبيعتها هى توفيق ربنا سبحانه وتعالى ليك وزود من حب الناس ليك

وبالنسبة للمستشفى انت انسان قبل ما تكون دكتور
ولو الدكتور تخلى عن اهم ما يميزه وهو الانسانية يبقى بلاشها احسن

semsema said...

ازيك يا شاعر وحمدا لله علي سلامتك

ارضاء الناس غاية لا تدرك يا محمود خليها بالله عليك دايما في بالك

وكمان اللي ربنا بيحبه بيجعل حبه في قلوب الناس وانت الحمد لله ليك شعبية اكتر من شعبية منتخب مصر دلواتي

احنا كلنا زملاء وزميلات بنقدر وبنحترم اخونا محمود ابو العزم علشان هو انسان فطري خدوم محب للخير عمره ما زعل حد فينا لان اصلا محدش فينا يقدر يزعل منه اتعلمنا منه حب الناس ومساعدتهم

انت علي حق واللي يقول غير كده يبقي هو اللي عايز النصيحة متهتمش بكلام الناس يا محمود طالما انت مقتنع انك اي شيء بتعمله فهو لاجل مرضاة الله فقط يبقي كلام الناس ميهمنيش لانهم كده كده بيتكلموا عالفاضي والمليان

وموقفك في عيادة العظم موقف نبيل وميقللش من بريستيجك في شيء
خد من كلام اللي حواليك اللي يتلاءم معاك ويتفق مع شخصيتك واللي تحس انه ميمشيش مع ابو العزم لا تلق له بالا

ثق بنفسك اخي العزيز

Anonymous said...

ازيك يا محمود
احنابنحبك وبنحترمك عشان اخلاقك دى وانت كده صح وعمرك ماترضى كل الناس فاعمل الللى شايفه صح وخلاص
حفلة النقابة احناحضرناها وبصراحة معجبيش فيها غير الشعربتاعك وكنت زعلانة جدا لما مشينا بدري ومسمعناش القصيدة التانية وكنت عاوزة اطلب منك انك تنزل القصيدة الاولى على المدونة عشان فى حاجات وقعت منى
وكمان نفسى اقلك رفقابنفسك شوية متحاسبهاش قوى على كل حاجة حتى لوبعيدة عنك
ربنا يكرمك ان شاء الله ومستنيين نشوفك قريب وكمان مستنيين الجديد

Anonymous said...

ازيك يا محمود
احنابنحبك وبنحترمك عشان اخلاقك دى وانت كده صح وعمرك ماترضى كل الناس فاعمل الللى شايفه صح وخلاص
حفلة النقابة احناحضرناها وبصراحة معجبيش فيها غير الشعربتاعك وكنت زعلانة جدا لما مشينا بدري ومسمعناش القصيدة التانية وكنت عاوزة اطلب منك انك تنزل القصيدة الاولى على المدونة عشان فى حاجات وقعت منى
وكمان نفسى اقلك رفقابنفسك شوية متحاسبهاش قوى على كل حاجة حتى لوبعيدة عنك
ربنا يكرمك ان شاء الله ومستنيين نشوفك قريب وكمان مستنيين الجديد

Anonymous said...

محمود انت فعلا شخصية طيبة جدا
انما مش شخضية ساذجة أبدا
بالعكس
انت مكن تكون أذكي مخلوق اجتماعي شفته
عندك ذكاء اجتماعي رهيب... الجميل فيه انه فطري مش مفتعل ومافيهوش تمثيل
والدليل على كده كمية الناس اللي انت تعرفهم على اختلاف انتمائتهم
خليك زي ما انت لانك لو اتغيرت مش هتعرف ترجع تاني
انا أصلا ما أظنش انك تعرف تتغير

م.م

فجر اخر said...

متتغيرش يامحمود لو حاولت تتغير حتي لو غيرت اللي انت شايفه في نفسك وحش هتتحول لبني ادم متعرفوش وهتكره نفسك وهتبدا كل حاجه كانت حلوه فيك تتحول لحاجات وحشه وهتكره البني ادمين الي اضطروك تعمل كده في نفسك وكل ده عشان تحاول ترضي الناس انت كده حلو بقي وحش ربنا خلقك كده متتعبش نفسك واعمل اللي شايفه صح واعمل اللي حاسه صح الحلال بين والحرام بين ربنا معاك ويوفقك ويهديك ويهدينا كلنا للخير

Anonymous said...

السلام عليكم ورحمة الله وبركاته
طبعا ما شاء الله الردود وفت ما يمكن قوله ....
لكن لى إضافة هى رأيى أولا وأخيرا
أرجو أن تتقبله...
بالنسبة لموضوع إنك تذهب لتلقى شعرا فى مكان تكون معترضا على ما فيه...هذا أراه خطأ
خصوصا حتى من الردود ما شاء الله أن أناس كثيرين أنت سبب لذهابها ...
أنا لا أعلم ما هو الذى ترفضه فيها بالضبط لذا أرجو أن تلتمس لى العذر

...
ما رأيتة منك يا دكتور
أنك شخص مختلف حقا
وبك براءة لا أحب أن تتغير فيك
و ما يخطر ببالى كل مرة أقرأ لك هو توفيق الله لك فى الوصول للقلوب ...
بجد ملكش حل ..ما شاء الله..
وأنا شخصيا بافرح إن فى الدنيا حد زيك

أخيرا :
كن أنت نفسك يا دكتور


وفقكم الله
عذرا للإطالة

somy gamal said...

ازيك يادكتور عجبني كلامك اوووووووووي بص انا لاكنت زيك كده ف الاول بس للاسف اتغيرت اووووووووووووووووووووووووي كلام الناس اثر فيا كانوا دايما يقولولي لما تتقرصي هتحرصي مينفعش تبقي كده فااتغيرت مع الضغط بس للاسف حاسه اني بقييييت وحشه جدا حتي احترامي لنفسي بفقده شئ فاشئ بقيت حد مش قادرة اجيب له مصطلح انصحك متتغيرش لاني بحاول ارجع للاول بس صعب في تناقض كبيييييير جوايا مش عارفه اعمل ايه

somy gamal said...

ازيك يادكتور عجبني كلامك اوووووووووي بص انا لاكنت زيك كده ف الاول بس للاسف اتغيرت اووووووووووووووووووووووووي كلام الناس اثر فيا كانوا دايما يقولولي لما تتقرصي هتحرصي مينفعش تبقي كده فااتغيرت مع الضغط بس للاسف حاسه اني بقييييت وحشه جدا حتي احترامي لنفسي بفقده شئ فاشئ بقيت حد مش قادرة اجيب له مصطلح انصحك متتغيرش لاني بحاول ارجع للاول بس صعب في تناقض كبيييييير جوايا مش عارفه اعمل ايه