زبادي اسرائيلي

Tuesday, May 18, 2010





اللسلام عليكم ورحمة الله





................................





اسرائيل دي دولة قوية جدا مش زي ما نتو فاكرينها





وعلى فكرة شعبها شعب ودود جدا بس الفكرة المتاخدة عنه غلط










يمكن تكون دي أقل الجمل استفزازا في حوار طويل





مع واحد يقرب لواحد شغال معايا في الصيدلية شغال في طابا





وكنت قاصد اني ما أردش غير في الأخر عشان اسيبه يقول كله اللي هو عايزه





كان بداية الكلام زي ما قلتلكوا كده





وكان السؤال الطبيعي من الناس اللي شغالين معايا....ازاي يعني





لأا دولة قوية بجد





انا كنت بتمشي يوم على الحدود بينا وبينهم





وخدت شوية صور انما ايه
أنا استئذنته وخدت الصور بلوتوث



بص كده يا دكتور الصورة دي












دي صورة فيها العلمين على الحدود جنب بعض




شايف القوضة اللي الناحيادي دي...



دي أنضف حاجة في الحدود بتاعتنا حتى مافيهاش مروحة من جوة




شايف بقى المبني الكبير اللي قصادها ...ده اوسخ وحدة عندهم




تكييف ومكاتب وتلاجات اكل من كل الأصناف




وتلاقي العسكري بتاعنا واقف يا عيني اتناشر ساعة على رجله في عز الشمس




وهما ورديتهم أربع ساعات بس غير الساعات بتوعنا خالص




وبعدين بص يا دكتور الصورة دي شايف ميناء ايلات عامل ازاي













حاجة تحفة اللي يسمع انا ضربناه يفتكر انه ماعادشي ليه اثر




انما بص...والله العظيم تحفة معمارية




وبعيدن بقى ده فندق هيلتون طابا












ده كان انضرب في التفجيرات الآخرينية واليهود صلحوه على حسابهم بقى حاجة تحفة




حتى السيول عملوا حسابها وعملولها مجاري تحت الفندق




تلاقي المية معدية من غيرحتى ما تبل الفندق في الوقت اللي كان في الناس بتموت في قلب سينا




وبيجيلنا أكل من قلب اسرائيل بقى...مادقتش زيه




الموظف بتاع الحسابات بتاعتنا بيروح يخلص حسابات جوة اسرائيل كل أسبوع


عشان الفندق كله نزلاء يهود




بنبعت معاه يجيبلنا شوية حاجة من هناك




وبالذات الزبادي بتاعهم...تحس انك بتاكل قشطة




ده كان جزء من كلامه




ما أقدرشي اقوللكم اد ايه كنت بتحرق من جوايا وانا بسمع الكلام ده




أنا بغير على البلد دي اوي




زي ما بيقولوا في المثل أدعي على ولدي وأكره اللي يقول آمين




انا بدعي على بلدي و أكره اللي يقول آمين




النهاردة كنت في طنطا




دخت أربع ساعات عشان اخلص ورقة في معاش والدي


و اروح الكلية يرجعوني المعاشات




وهناك يبعتوني هنا وهنا يبعتوني هناك وطالع نازل ومن ده كتير اوي




ممكن اتخنق ممكن اتعصب بس بلدي هي بلدي




انا هقدملكوا صورة أحسن عندي من كل الصور اللي فوق دي




صورة ام أحمد ومعاها بنت بنتها












ست غلبانة بتبيع درة أدام الصيدلية اللي أنا شغال فيها




الست دي ربت تلات عيال من الدرة دي




جوزت اتنين منهم ووبنتها التالتة في كلية تجارة




ولادها بييجوا يقعدوا معاهم وهي شغالة




عمرهم ما استعروا منها رغم ان بنتها الكبيرة مجوزة جوازة حلوة جدا




ام احمد بتيجي تحوش معانا اللي بتطلع بيه من شقي طول النهار




عشرة جنيه...عشرين جنيه...بكتيره خمسة وعشرين جنيه




كله ده عشان لسة عليها أقساط التلاجة والبوتاجاز وحاجات في جهاز بنتها اللي اتجوزت




يوم ماتش الاهلي والاتحاد الليبي كنت في الصيدلية




لما دخل الجون التالت..دخلت عندنا الصديلية وعيطت




وقالت الحمد لله ماحدش يغلب مصر أبدا




أنا بحب مصر عشان فيها ناس زي ام احمد




انا بقعد كتير أدور على أي حاجة تخص حرب أكتوبر على النت




وانسي كل حاجة بالساعة والساعتين والتلاتة و اقعد اتفرج عليها




يوم ستة اكتوبر مابقومشي من جنب الراديو




اقعد اسمع الابطال دول وهما بيحكوا بطولاتهم




بفتخر ان ابويا وعمي حاربوا في الحرب دي




لينا جارنا كان في الأسري المصريين




حكالي مرة انهم كانو بيجيبوا الأسري ويرصوهم جنب بعض




ويعدوا عليهم بالدبابة




انتو متخييلين؟؟؟؟




ازاي حد قلبه يطاوع حد ياكل حاجة من هناك




حتى ولو زبادي زي ما الراجل ده كان بيقول




ازاي نسامح ناس قتلوا من خيرة شبابنا بمئات الآلاف




ما اعرفشي




انا عندي كلام كتير مش هقوله لإني عارف أنه جوة واحد منكم




انا بس عايز أسئلكم سؤالين اجباريين لكل حد قري البوست ده








تفتكروا لو حرب أكتوبر رغم أي وكل حاجة اتغيرت




تفتكروا لو الحرب دي بكرة الساعة اتنين الضهر




تقتكروا هنقدر نعمل فيها نفس اللي عملنها فيها قبل كده








لو عرضوا عليك




تروح البلد اللي انت بتحبها غير مصر




ويدوك عقد عمل وسكن وكل اللي انت عايزه




بس تسيب الجنسية المصرية وتاخد جنسية البلد دي
وماترجعش مصر أبدا




بصراحة...هتقبل؟؟؟

14 comments:

Anonymous said...

النسيان دلوقتى اكبرمصيبة هو اكيد نسى كم ام انجرح قلبها وكم طفل اتيتموا وكمان فرحان انهم بنوا الفندق فرحان اننا احتيلينا تانى من غير من حس علشان كدة لو رجع الزمن وهنحارب من جديد لازم الناس تصحى من غفلتها الاول ويصحى فيها احسسها بالغيرة على البلد وفعلا انت عندك حق انا ادعى على ولدى واكره اللى يقول امين رغم الى الناس شفته فىالبلد دى بس اكيد فى ناس كثير بتخاف عليها قوووووووووووووى انت عارف الاحساس ده عامل دى ايه احساسى فىالكلية بتضايق منهافى بعض الاحيان بس لو خيرونى هخترها تانى

Anonymous said...

بالنسبة للسؤال الأول :
ما أظنش ,


بالنسبة للسؤال الثاني :
لو أضمن إنهم هيعاملوني زي أهل البلد الأصليين و مش هيضطهدوني ,
أحجز على أول طيارة

أع ـقل مـ ج ـنـونــة said...

اااااااااه والف ااااااااااه

حسيت بدماااااااار جوايا وانا بقرا البوست

صاحبك اللى بيشكر ف اسرائيل اوي كدا

قوله ان كل دا من دمنا

من دموعنا والمنا

ازاى ننسي الد اعدائنا بسهولة كدا ؟

ياتري لو سألته بتكره مين .. اسرائيل ولا الجزائر ؟ هايقولك ايه ؟!!

بالنسبة للاسئلة ..

لو حرب اكتوبر بكرة .. مش هنقدر نعمل حاجة

مش تشاؤم ولا سلبية

بس .. لا القيادة دلوقتي هي هي ، ولا الشباب والوطنية اللى فيهم هي هي !

اجابة السؤال التاني ..

احساسي باني وسط اهلي وعيلتي مهما شوفت من مصاعب داخل بلدي ووطني

اهون كتير من النعيم مع احساس الغربة خارج وطني

كان في مثل بيقولوه اجدادنا ..

من خرج من داره اتقل مقداره

هو فعلا صح ! .. مش مجرد مثل قديم

والدليل للي بيحصل للمصريين دلوقتي برة مصر ومن الدول العربية قبل الغرب !

تقبل مروري .. :)

قبلاوى said...

طيب وانت قلتله ايه ؟

optimisty said...

اعتقد يا دكتور محمود لو الحرب بكره هنقدر باذن الله نعمل زي محصل فيها قبل كده ......اعتقد ان احنا مشاعرنا بالوطنيه تجاه بلدنا متخدره بسبب الظروف الي بنعيشها انما مش ميته
ولو حصل اي حاجه كلنا هنفوق وهنرجع اقوي من الاول كمان والله اعلي واعلم طبعا

اما بالنسبه للسؤال التاني بلا شك مش هقبل استحاله اسيب بلدي مهما كانت ظروفي فيها ومهما كان المستوي الي ممكن اعيش فيه بره بلدي وصحيح فعلا من خرج من داره اتقل مقداره

semsema said...

ازيك يا محمود
يارب تكون بخير

كردا علي السؤال الاول
حب البلد في قلوب الناس دلواتي نفس اللي كان ايام اكتوبر
الانتماء والوطنية مش بتتجزء ولا بتتغير

اما السؤال التاني فهرد عليه بموقف حصل ادامي السنة اللي فاتت

كنت راكبة تاكسي وكان سواق التاكسي نصراني وراكبه جنبه ادام بنت شكلها جارتهم او قريبتهم كان بيحكي لها عن ابنه الوحيد
قالها انه بعد ما طلع الاول في كليه الاقتصاد والعلوم السياسيةوكان له حق التعيين وللاسف طبعا كالعادة مش اخدوه واخدوا ابن الدكتور اللي كان بعده فالترتيب
المهم قالها انه اكتئب وحياته ساءت وفي يوم بالصدفة لقي جواب في غرفته من واحد صاحبه عايش ومتجوز ومستقر في تل ابيب وبيطلب منه انه يهاجر ليه
ولما واجه ابنه بالجواب وقاله طبعا مش هتسافر قاله انا فعلا قدمت طلب هجرة لاسرائيل
قاله ازاي يابني تعيش مع اعداءنا وتسيب امك وابوك ؟قاله بمنتهي الجحود كانت عملت لي ايه البلد
ساعتها قلت اللي يبيع بلده سهل يبيع ابوه وامه
وفعلا الولد ده هاجر وساب اهله وابوه قال للبنت دي انا اعتبرته مات ولو الحرب قامت بينا وبينهم تاني مش هتردد امسك بندقية واحارب بلد عارف انه ممكن يكون فيها لان ابني مات واندفن في بلده من يوم ما فكر يسيبها ويرتمي في احضان اعدائها
اتاثرت بكلام سواق التاكسي ده جدا وبجد اعجبت بوطنيته
وللاسف يا محمود لما روحت وفتحت جوجل وبحثت عن هجر المصريين لاسرائيل لقيت ان فيه الاف كل عام بتقدم طلبات هجرة لاسرائيل وللاسف مصريين

تغني بهواكي الشعراء
وعن حبي لكي لا تسألي
فاسمك اعذب ما سمعت أذناي
وأطيب ما نطق فمي
الناس يجري بعروقهم دماء
وحبك يبحر محل دمي

Anonymous said...

لااعتقد ان احنا ممكن نعمل حاجة دا احنا فى زمن الضياع زمن غلب فيه الرجال واصبحت النساء التى تحكم

زمن غاب فيه الصديق واصبحنا ننسى كل من نحب .لو لم اكن مصريا ,لوددت ان اكون مصريا.جزاك الله كل خير.


















ز

محمد عبد الباسط said...

جزاكم الله خيرا يا محمود رجعتنا للثوابت والاصول اللى ساعات بننساها ومنهتمش بيها

بالنسبه لحرب اكتوبر لو بكره انا متاكد ان هيكون زى اول مره ان شاء الله

بالنسبه للسؤال التانى
انا أأبى الا ان اكون مصريا

مره تانيه جزاكم الله خير الجزاء واسألك الدعاء

د/محمد الخطيب said...

السلام عليكم ورحمة الله وبركاتة

بص يامحمود
احنا عندنا جيش فعلا ياكل الزلط
عندنا جيش وشعب محدش يقدر يغلبهم

كنت قاعد مع عميد طبيب فى المستشفى الايطالى العسكرى بالاسكندرية فقال لى كلمة مش قادر انساها:- قال ان اسرائيل لو حست فى وقت من الاوقات ان جيشنا مش هيقدر يدافع عن البلد فى حالة عدوان اسرائيل علينا كانت اسرائيل هتيجى وتدخل بلدنا الصبح !!!
معنى كده اننا نقدر ندافع عن نفسنا كويس اوى وفعلا لو اتكررت الحرب دى هنعمل احسن من اللى عملناه فى 73 فعلا

أما السؤال التانى فأنا عاوز اوضح نقطة واحدة بس
فيه فرق شاسع بين الحكومة والوطن
ممكن اختلف مع الحكومة بس مازلت بحب الوطن
أعتقد ان دى نقطة واضحة جدا
شكرا واسف على الاطالة

Anonymous said...

اما السؤال الاول
فأنا عندى أمل ان احنا ممكن نعمل حاجه
لأن الناس الموجوده دلوقتى هما هماهم اللى كانوا موجودين فى ماتش كاس افريقيا 2006 و2008وبرده 2010
الناس اللى فجأه بتلاقيهم وقفوا على رجليهم برغم الدوامه اللى هما فيها
بينسوا كل حاجه ومش فاكرين غير بس (مصر)
................
السوال التانى

مهما كان وضعى مش الشغل هوا اللى هيخلينى اسيب بلدى ابدا
وان كنت بتمنى انى اعيش فى المدينه المنوره ..

دوك ميرو

Wohnungsräumung Wien said...

Thanks for it .. I hope the new Topic is always

Entrümpelung said...

Succès ... S'il vous plaît noter les nouveaux sujets toujours

Entrümpelung wien said...

Dank den Themen .... Ich hoffe, mehr von den Themen

entrümpelung wien said...

شكرا لكم .. دائما موفقين ..::))


entrümpelung
entrümpelung
entrümpelung wien