الحب والفوارق

Tuesday, March 18, 2008

الحب لا يعترف بالفوارق...ولكن الناس تعترف بها...فلا تنسي عندما يعيش في قلبك الحب...أنك تعيش بين الناس

جمله كتبتها
ساعات لما بقراها بحس انها صح اوي
احنا لما بنرتبط بحد
مش بنرتبط بيه لوحده
بيه و بأهله واصحابه وبيئته وكل حاجه في حياته
ممكن نكون بنحبه ..بس ياتري ممكن نفصله عن كل الحاجات دي
قصص حب كتيره اوي وكبيرة اوي شفتها فشلت لما واجهت الواقع
لان اللي بيحب مش بيبقى شايف غير اللي بيحبه وبس
دايما اقول ان الاله الحاسبه بتاع الحب فيه جمع بس
لكن الآله الحاسبه بتاع الحياه فيه جمع وطرح وقسمه وضرب
وساعات برجع واقول انه ليه لأ؟؟؟؟؟؟؟
ليه كل اتنين حبوا بعض مايكونوش لبعض
ليه دايما محتاجين نحسبها بالورقه والقلم
ليه يبقى ذنب قلبين مجرد انهم عايزين يعيشوا حياتهم ويكملوا طريقهم سوا
ليه عشان الناس وكلامهم نحرم قلب من قلب تاني كان هو اكتر حد ممكن يحافظ عليه واللي لو كل الحنان اللي في قلب الناس دول اتجمع مش هيعوضه عنه؟؟؟؟؟؟؟؟؟؟
انا جويا كلام كتير اوي مش عارف اقوله
على فكرة الفرق اللي اقصده مش الفرق اللمادي بس
فيه فروق اجتماعيه وثقافيه كتيره اوي
اعرف دكتور اتجوز ممرضه وكانت النتيجه انه اهله قاطعوه
واعرف مسلم كان بيحب مسيحيه وانتهت القصه بالفشل ادام الواقع اللي رفض الفرق ده
حاجات كتير بالشكل ده
يمكن اخترت القصيدتين اللي تحت سوا عشان يمكن يعبروا عن الفكرة اللي جوايا
قصيده كتبت فيها عن حد فضل انه يبعد لانه حس انه لو قرب
يبقى كده بيظلم اللي بيحبه وهيكون سبب في حزنه لو مش دلوقتي..فيمكن يكون أدام شويه
أما التاني فقرر انه يكمل في قصته وينفض لكل كلمة اتقالت وكل لسان اتكلم
أنا شخصيا مش عارف مين الصح
مستني رأيكم



معني الوفاء

مستـــحيل أبــــــدأ حكايه
و أبقى عارف مـ ِ البدايه
إنه مكـــــتوب في النهايه
القلـــــــــوب تبــــعد بعيد

رغـــــــم ان أنا وانتي كنا
في الهـــــــوي بنحلم بجنّه
بس في الحــــــب اللي بنّا
الفراق بـــــــــقى شئ أكيد

رغم اني في بعدي عنك ...مش هطيق لحــظة فراق
رغم اني هعـــيش وحيد.....بين دموع الاشـــــــتياق
بس عنك لازم أبـــــــعد.....هو دا... معـــــــني الوفاء

مـــــش هينـــــفع صدقيني
أعشقك.....أو تعشــــــقيني
والسبب..مش كرهـي ليكي
السبب.....هو حنـــيني!!!!

لو هكون دمعه في عينيكي...يبـــقى أنا هبعد و أسيبك
لو زرعت الحـــزن فيــــكي...ما أستاهلشي أكون حبيبك
صعب بعــــــدك بس أصــعب......لما حزني يكون نصيبك

أيوه فيّ خلـــــفت ظنك
بس مش بتخــــلّي عنك
حبنا ...كان حــــلم ضايع
سيبته لي... وخدته منك

أيوه هبــــــعد بس بُعــدك.......مش بإيدِي ولا بإرادتي
ممكن انسى الفـــرق بنا .......و أبقى جنبك لو أردتي
بس هبقى ساعتــها بهدم...فرحتك علشان سعادتي

أيوه هبعد.... بــس لازم.........تبقى عارفه بجد إني
قلبي حَب بصدق لــــكن....الظروف كات أقوى منيّ


بالعند فيهم!!
في بُــعدك عـــني يا حبــــيبتي....... لاقيت قلــــبي في بعــدك داخ
وبَــــــــــعد الدوخـــــة بعـلنها....... مافيش لغــــــــرامك استنساخ
يروح قلبي في هواكي فطيس......... لكن قلـــــبك يكــــــــون بيتي
عشان لازم ..أكـون رمسـيس..........في قلــــــبك....... يا نفرتيتي
ولامـــوا علىّ يــــاما الـــناس.........وقالـــــوا عليّ واد مــــغرور
قــالولي ازاي بقى يا ""........
lada
بتعشق واحـدة"فور باي فور"
أنا قلـــــــتلهم ان احـــــــــــنا.........هنقدر نمــــــــشي لو عايزين
ونقدر في الهــــــوى نكــــمّل ........مادام جــــوة القلــــوب بنزين
قالولي يا حـــلو محــــمولها...........خمــس كاميرات وجيل تالت
وعدة حضـــــرتك كــــانت .......... بتــــــاعت أحـــــمس التالت
وقلــــت مادُمـــتي ويّـــــايا............فشــركة نوكــــــيا دي ملكي
مادام بين القلـــــــوب شبكة...........نـــدوس لــو حتي بـِـلاسلكي
قالــــــــولي دي راكبه عربية........حاجات جبارة صـــنع باريس
وراكب حضــــــــــرتك رابع........في آخر كرسـي في السرفيس
أنـــا قلــــــت اللي بيــــــحبوا.........أكيـد بهـــــــواهم اتــــــغروا
مادام بيحـــــــبوا ايه يعــــني ........يروحوا الشـــــغل على كارو؟
قالولـــــي يا حلو في دولابها..........هـــــــــدوم أد اللي في بلدكم
ولو حــــــــــوشت في تمنهم..........يكون جه عـــــزرائيل خدكم
أنـــا قـــلت الهـــــــدوم ديّــة...........حاجـات مالهاش أكيد عوزة
عايــزها يادوب كده بطولها...........بجـذمة.. وجيــــبة... وبلوزة
قالوي طبيــــــخها أي كلام...........هتحــــرق في الطبــــيخ دمك
لا تعملك في يوم محـــــشي .........وبامــــــــــية زي طبـــخ أمك
وقلتــــــــــلهم وايه يعني ؟؟؟.........كفــــــاية بـِـقلـــــبها طـــابخاه
ولو تطبـــــــخلى سـم فيران......... هآكل منـّــه و أقــــــــول الله
قالولي هتعــــشقك على ايه...........يادم تقــــــيل..... يا تلــــقيحة
دا حُبـــــــــك أكل مستشفي............لا لون ولا طعم ولا ريـــحة
أنا قلتــــــلهم......... اتفلقوا............عاجـــبها يا نـاس وعاجباني
عينيها الســــود أكيد أحلى............من أحــــمد عـــز شايـــفاني
قالولي بتشــــــــتغل نفسك..... .... ياراجــــل بطـــل استـــــهبال
عشان القرد يا حلــــــــيوة.............في عين مــاماه بيبقى غزال
وقلتـــــــلهم عــيون القلب ...........أكــــيد مختلفه في الحسابات
مادام القــــلب عينه تشوف...........بنـنسى نـــبص في المرايات
قالولي بلاش تعيش في غرام.........نهــــــايته الســــودة محتومه
مســيركوا في يوم هتختلفوا..........وتبــــــقوا معارضه وحكومه
وقلـــــــت الحب مهما يكون..........ألــم وفـــــراق ونار ودموع
يزيد الحـــــــــــب في قلوبنا......ودي المتعة اللي في الموضوع!!
يقولوا ... ومهـــــما يقولوا...........كلامـــــهم مـــش هيـــفرسـنا
ولو مااتعلـــــــموش الحب.......... نعلمــــــــهم في مــــدارســنا
كفــــــاية عليـــنا لو عشة........... ننام لو حتى كـــان على بُرش
ومهما يقولـــــوا يا حبيتي........... نطنــــشهم..... ونعمل طُرش


22 comments:

صانعة الحرية said...

كفــــــاية عليـــنا لو عشة........... ننام لو حتى كـــان على بُرش
ومهما يقولـــــوا يا حبيتي........... نطنــــشهم..... ونعمل طُرش

هههههههههههههههه
حلوه اوى دى
برش وطرش
حلو الوزن
ربنا يرضى عنك يا فندم
وسعيده باكتشافى المدونه

بنت الاسلام said...

بجد جميل جدااا

قدرت تجمع بين العامية والرومانسية والفصحي

ربنا يوفقك

استمر

تحياتي

pureblue said...

كويس اتك كتبت في الموضوع ده وده اكيد بعد ما فاض بيك بس ياريت تاخد فعلا براى التعليقات اللي هتتكتب لان كلها اكيد هتشجعك وعلى فكرة ساعات احنا اللي بنبنى لنفسنا مبنى كبير من الخوف داخلنا احنا ونكون احنا السبب ويكبر المبنى ويحجب وراه كل الامال وده مش كلام والسلام ده بجد وانا حاسه ان مخاوفك دى كلها من خيالك نسجتها عشان تعيش فيها ونسيت ان فيه حاجه اسمها تجربه لازم تحاول علشان بعد كده متجبشي اللوم على نفسك ولو على الاقل تصارحها وعلي راي ماما دايما بتقول البنات تحتها نار يعنى مفيش واحده بتقعد كتييير ههههههههه بجد اكسر الخوف اللي جواك وحاول تكون شجاع ولو حتى قدامها معلشي كلامى جامد شويه بس انت محتاج تشجيعه

مـحـمـود فـرج أحمد said...

حوده

لما أقول في عينيك حزن تبقي تسمع الكلام وتقول لي أيوه فعلا وعندك حق يا فرج وبعديها تقوم حاكي لي كل حاجه بالتفصيل

عارف التناقض ده مصلحه عشان تكتب وتمتعنا ولكن للأسف الواحد لو مش أخد أي خطوه إيجابيه ممكن يهد سعادة حبيبه

الحب لا يعترف بالفوارق وبرضه مش بيعترف بالخوف

الحب عايز الواحد يحارب الكون عشان حبيبه يكون جنبه

علي فكره أنا مش عارف أقول ايه لكن بجد أتمني توصل لحل في الموضوع ده وترسى علي بر

وعايز عينا مها لو سمحت اللي بالفصحي مش الحلمنتيشي ... هتبقى شديده والله

أشوفك بخير

! ! ! ! said...

أنا ممكن اسمي الكلمات الاولي
"معنى الاستسلام"
مش معنى الوفاء خاااالص
انت عارف يابو العزم أن أكيد كل واحد فينا مر بتجربة ما في حياته...
وفي الغالب زي مانت بتقول أنها بتنتهي بالفشل....
و لو كان بإيد الواحد أنه يرجع بتاع تلات ولا أربع سنين لورا..مظنش أني هسكت و زي ماتقال ....لازم تخوض التجربه
ناجحه ..أو فاشله ...ولو حتى فشلت من أول لحظه
يكفي أنك لن تندم بعدها علي لحظه سكوت ....في وقت كان ممكن الكلام فيه يبقا من دهب

هو ده رأيي
لك تحياتي

أحمد سعيد بسيوني said...

بسم الله
بص يا حودة في مثل بيقول رضا الناس غاية لا تدرك
مش هتقدر ترضى الناس كلها لان كل واحد ليه افكاره و اراءه وصعب انك تتوافق مع كله
بس مادمت انت مقتنع باللي بتعمله فتوكل على الله ولا تعجز
القصائد جميلة جدا
تحياتي

Anonymous said...

اعتقد القصيدة التانية من حيث المعنى انا افضلها اما القصيدة الاولى انا كبنت لو واحد قال لى الكلام دة مش هسميها وفاء خالص هاسميها عجز لان اللى مش قادر يدافع عن سعادته يبقى مش يستاهل السعادة دى و هافكرك بجمله انت اللى قايلها و انا مؤمنة بمعناها من زمان " احلامنا هى البر التى تستريح عليه قلوبنا و لكى نتمكن من الوصول الى البر لابد من الابحار اولا" هى تقريبا كدة ....... و متنساش ان الابحار هيكون عكس التيار .......... مش عارفة جايز كلامى شديد بس دة رايي و اخيرا تقبل تحياتى و اعجابى
بالقصيدتين من حيث النظم

sluvswho

dead zone said...

اولا القصائد.مقدرش اقول كلمة لانو فعلا فوق الوصف كالعادة
فعلا ماشاء الله على موهبتك و عقليتك و احساسك .. ابداع

لكن بالنسبة لموضوع الفروق الاجتماعية و الثقافية و المادية .. هي المادية ممكن تكون اضعف الفروق الي ممكن نتغلب لكن الثقافية والاجتماعية بتبقى فعلا صعبة و مش سهل انك تخلط مجتمعين ببعض و نمزج طبقتين مختلفتين

و لو قولنا انهم حقهم يحبو و يتهنو ببعض و مش ذنبهم
بس هما مش عايشين لوحدهم في ناس و
مجتمع و اسرة واصحاب
هو راي عقلاني بس على قد ما المشاعر حلوة الدنيا مبتتقاسش بالحب بس .. في واقع بيحكمنا

ربنا يحفظ لحضرتك موهبتك و يزيدك ابداع

عمر said...

أنا متهيألي سمعت منك القصيدة التانية ياحودة قبل كده
وانت برضه مصمم عليها وكتبتها هنا ، اوعى يا ابني تكون دي الحقيقة وبتحاول تصبر نفسك
نصيحة مني ابعد عن .. الفور باي فور ، وابعد عن العربية الكارو ، وخليك في التكتك إلا إذا كان الموضوع مش في ايديك وفي هذه الحالة يبقى ربنا معاك
تحياتي

هبهوبه said...

أنا موش عارفة رأيك إيه في الإتنين يعني مع مين فيهم بس عايزة أقولك إن الرجالة هي اللي دايماً بتهرب بعيد علشان بتخاف من المسؤلية اللي أكبر منهم والبنات يعيشوا في عشه بس تكون مفروشة بالحب أصلهم قنوعين جداً ورومانسين جداً

Abo 7anf said...

موضوعك جميل قوى وان كان فيه جزن
بجد كلماتك معبره

semsema said...

اولا تحياتي وتقديري للقصيدة التانية الجميلة اوي
وده مش غريب علي شاعرنا العظيم
تعرف
اجمل مافي الدنيا دي انك تلاقي نصك التاني
يفكر في اللي بتفكر فيه
ويكملك الجمله قبل ما تقولها
يحمل عنك همومك ويخرجك من اي مود كئيب ممكن تعيشه
تحس بالامان لانه معاك ولانك معاه
ولما تبص لادام وللمستقبل ماتخافش لان معاك اللي هيهون صعابه عليك لحد ماتوصلوا سوا
واظن ان العاقل لما يوصل لده كله مش من السهل يضحي بيه؟
بس في سؤال؟
هل فعلا انا نصه التاني زي ماهو بالنسبه لي؟
هل مستعد يتعب معايه ومشواري طويل
هل هيقف جنبي وحبه لي هيهون عليه اي صعب؟
لو اجاباتك ب نعم
يبقي جو اون
وكمل واكييييييييييييد هتوصل
اما لو ب لا
يبقي كان شيئا لم يكن
واكيد هتصادف تاني اللي تكون ليه النص التاني
الحب بيتحس مش لازم تقوله شفايف
صح يادكتر
وكلام الناس فالاخر لابيقدم ولا ياخر
كلام وغيرة مش اكتر
تحياتي

quiet_storm said...

اولا انا بشكرك على القصيدتين الرائعتين دول
ربنا يكرمك ويزيدك موهبه ..لانك فعلا بتقدر توصل اى فكره وكل احساس بمنتهى البساطه

الحب لا يعترف بالفوارق...ولكن الناس تعترف بها...فلا تنسي عندما يعيش في قلبك الحب...أنك تعيش بين الناس

جمله بجد وانا بقراها لاول مره لما بعتها على الجروب وقفت قدمها كتير وفكرت فيها كتير
بس فى الاخر قولت انه فى كتير جدا اوقات الخوف ده مش بيبقى موجود الا جوانا وبس وكل الناس شايفه الموضوع مفيهوش اى داعى للخوف و انه كمان لو فى حب بجد حب حقيقى مش هيبقى فى اى فوارق من اى نوع .
حتى لو كان فى ...هو مش هياخد باله منها ومش هيديك فرصه انك تفصله عن الفوارق دى لانه هيغوص فيها ويحاول انها تكون جزء اساسى منه عشان هى جزء اساسى منك وانت جزء اساسى منه وهيشجعك انك تاخد خطوه ايجابيه وهيقف جنبك فيها لحد ما توصلوا للى انتو عايزينه...

ولو هو فعلا ده اللى حصل ...يبقى من حقها عليك انت على الاقل انك تحاول ...تحسسها انك بيها اقوى انها بالنسب ليك حاجه تستحق انك تتعب شويه عشانها ..تتمسك بالامل و بيها طول ما هى متمسكه بيك
ومتفتكرش انك لو تبعد عنها كده هتريحها او بتيعد عنها الحزن والدموع ....انا افتكر ان ده معنى الانانيه لانك فى الحاله دى اخترت الطرق السهل ليك انت اللى هو الاستسلام بحجه انك مش عايز تعذبها


ولو الطرف التانى ده هو اللى بيتكلم عن وجود هذه الفوارق يبقى بجد ميستاهلش حد يحبه كده ولا حتى يفكر فيه ثانيه .....واكيد هو اللى يبقى خسران اه ضيع من ايده انسان بمعنى الكلمه
مش عارفه انا كده خرجت عن الموضوع ولا لا او هو ده اللى تقصده ولا ايه بس ممكن اقول انى افتكرت فيلم حبببى دائما وانا بقرا الموضوع

دعواتى وكل امنياتى ان ربنا يوفقك ويكتبلك الخير فى كل حياتك ويرضيك بيه

Anonymous said...

ازيك يا محمود
انا هبه
بجد بجد مفيش كلام يوصف روعه كلامك
وازي هو بيمس قلب كل انسان
وانا رايي انك لازم تتكلم
لكنك لو معملتش كدا
هيجي اليوم اللي تندم علي الفرصه اللي كانت في ايدك وضاعت منك
وسواء ربنا وفقك فدا هيبقي اكبر فرحه ليك
ولو لقدر الله مكنش في نصيب فيكفيك انك اخدت بالاسباب
لان ربنا متطلبش منا نتائج
طلب اننا ناخد بالاسباب
ويكفيك وقتها شرف المحاوله
وانا شايفه ان كل التعليقات بتشجعك انك تتكلم
وبضم صوتي ليهم
واوعي تترد لحظه
ومتحرمناش من كتباتك

dr_mony said...

هاى ازيك ياحوده يارب تكون بخير معلشى التعليق جاى متاخر وطبعا قصائدك جميله جدا بس عايز رايى ما فيش حد هيجاوب على السؤالين الا شخص واحد وهو اللى هيقرر اذا كان هيبعداو هيكمل معاك وحاول تكون شجاع لو حتى قدامها وتانى مره احييك على روعه القصائد

عندما تنهمر الدموع said...

السلام عليكم ورحمة الله وركاته
انا رأيي ان مش كل الناس بتفكر في الفلوس لكن ورغم انهم نادرين اكيد في ناس كويسة يمكن صعب ان احنا نلاقيهم لكنهم موجدين واحنا المفروض ندور عليهم ولما نلاقيهم نحطهم في عنينا زي اللؤلؤ لما بنحافظ عليه رغم ان الكلام ده كلامي لكني لغاية دلوقتي مقابلتش في حياتي حد مش بيجري ورا الدنيا لسبب او لآخر بشكل خلاه يغير مبادؤه ويضحي بيها ويتنازل عن حريته في الجولة الاولى طالما انه خسر فيها من غير ما يحاول يكسب في باقي الجولات ،اد ايه احنا بقينا بنمشي ورا كلام الناس وهو في الاخر مش هيفيد لاننا بس اللي عايشين ظروفنا واحنا بس اللي نقرر اذا كان ما نفعله صحيح ام خاطئ وفي الاخر الناس مش وراها غير الكلام ومش بيعجبها حاجة لكن المشكلة الحقيقية فينا احنا اللي بنينا حياتنا على رأي الناس وعجزنا على ان يكون لنا رأينا المستقل لذلك فانا اتمنى ان يكون الحب والوفاء دافع لنا يقوينا ويغلب كلام الناس

Anonymous said...

دمت بخير ياشاعرنا العظيم اكيد قصائدك ابداع مفيش كلام وفكرتها عظيمه جدا بس بالنسبه للقصيده الاولى انا من وجهه نظرى انها متمسكه بيه وهو عشان ما يظلمهاش زى ما قال باقل جهد بعد عنها يبقى كده مش مفروض انها تتمسك بيه تانى لانه سابها من اول مواجهه صعبه واجهته معاها وكان المفروض يواجه الموقف حتى لو فشلت محاولته واما القصيده التانيه فمش معقول الفوارق تبقى للدرجه الكبيره دى يعنى انا شايفه لو الفوارق الماديه مش مشكله لان الفلوس بتروح وبتيجى ولو هو حاسس انها بتحبه بجد وما عندوش اى شك فى حبها له اكيد هيقفوا سوا ويكملوا سوا لان الواحده مش مغصوبه على حاجه مش عايزاها بس دة لو لقت اللى قدامها متمسك يها اما الفوارق الثقافيه فمن رايى انها صعبه شويه يعنى مثلا بتكون بعد كده معايره وكده ومش بتكمل بس برده لو بيحبوا بعض جدا اكيد هينسوا كل الفوارق دى وقيس على كده اى فوارق ممكن كل ده مش يسمى فوارق بس نسميه ظروف الحياه الصعبه اللى عيشناها بس لازم يبقى كل طرف عشان يكمل لازم يضحوا عشان مشوارهم يكمل وسعيده بتعليقى على الموضوع وقصائدك الرائعه دمت بخير دائما

رحيل said...

بقالي كتير مش بدخل عشان ظروفي بصراحه كانت صعبه شوية المهم رأيي في الموضوع المهم قوي ده لانه اصبح حديث الساعه كالتالي:

الحب جميــــل قوي ورائــع واجمل شيء في الوجود ماحدّش يقدر يقول اي حاجه في ده والحياة اصلا اتخلقت بالحب وصعب تتعاش بدونه بس الاهم بقى هو ايه مفهومنا عن الحب !! يعني العيب مش في الحب على رأي ام كلثوم العيب في مفهومنا القاصر عنه ، للاسف احنا بنختصر الحب في شعور غالبا مابيكون اعجاب ووردتين ومكالمة تليفون ودبدوب يوم عيد الحب في حين ان المعنى الاساسي للحب اكبر واشمل من كده بكتير ، ولو فكرنا بس شوية كده هانلاقي نماذج الحب الناجحه في دينا كتير جدا يعني عندنا القصه الواقعيه جدا اللي بطلاها سيدنا محمد عليه الصلاة والسلام وستنا خديجه ونفس البطل في قصته مع السيدة عائشه ، وسيدنا علي رضي الله عنه وأمّ ابيها فاطمه الزهراء..
كل دول كانوا بيحبوا وبيعشقوا كمان بس كان الحب عندهم ليه مفهوم آخر ليه مذاق آخر ، بيحبوا بعض عشان يستمروا مع بعض فبالتالي ماكانش شعورهم وقتي او لحظي او غامر في لحظة انسياق عاطفي وراء قشور المشاعر ولو نلاحظ في كل النماذج اللي ذكرتها اوغيرها طبعا كان التكافؤ مطلوب وشيء اساسي بس بلاش برده نختصر مفهوم التكافؤ في شقه وعربيه وموبايل بالماديلية انا قصدي التكافؤ في الاخلاق وخلفيات الاصول يعني لو كل انسان قبل ماينساق وراء مشاعره بالاعجاب اللي بتتطور فعلا بعد كده وتبقى حب فكّر في خلفية الشخص اللي انجذب ليه والمقصود بخلفياته من كل النواحي دينيه واخلاقيه واجتماعيه او حتى عالاقل فكريه هل في تكافؤ بينهم ولا لا !!اعتقد واكاد اجزم ان اي فوارق ماديه سهل جدا طمسها لانه هايبقى الطرفين عايزين نفس الشيء وبنفس الطريقه ومش هاتحصل البلبه العاطفيه ده عند اي واحد فيهم انما احنا مابنصدق يلا هييه هانحب وحتى لما بنييجي نتزوج كلنا بنفرح زي الاطفال بالفرح والحفله والشقه الجديده وفستان الفرح وبدلة العريس (بالقشور برده) لكن المضمون آخر شيء ممكن نفكر فيه : وماحدش يقول فيالمثالين الي سردتهم ده النبي وعليّ احنا هانيجي لدول ازاي ولا فين يا جماعه مادول هم قدوتنا ونبراسنا لازم نعمل زييهم ونفكر حتى زييهم صحيح مش هانوصل لمستواهم بس اعتقد لو اعتدنا مقارنة انفسنا بالكثير سنحصل على الكثير مهما كان قليل في خطاهم ... يارب اكون قدرت اشرح نفسي بوضوح وحتى اشعار آخر في مشاركة جديدة... تحياتي ..

eng_eman said...

اكيد طبعا ومن غير كلام وكالعادة كلمات رائعة
بس انا شايفة انوا مفيش اتنين هيحبوا بعض وبينهم اختلافات كبيرة ؟؟ طيب ازاي ازا كان جزء من الحب هو توافق في الفكر والثقافة
وبجد مهما كان لازم نرفض الاستسلام لانك بجد هتندم على اليوم اللي فكرت فيه تستسلم

متسبش حبيبتك ابدا لاني واثقة انك لما هتختار هتختار صح ان شاء الله مهما كانت الفوارق فالحب ينتصر دائما

Anonymous said...

الموضوع ده فعلا مهم لكن انا شايف ان فعلا لازم يكون هناك توافق بين الطرفين ومينفعش الحب لوحده لان ده ارتباط ولازم يكون هناك تكافؤ والا لن يكون هناك استمرار والدليل على ذلك هو نجاح زواج الصالونات فى معظم الاحوال عكس الزواج عن طريق الحب وانا شايف انه يحتفظ بمشاعره لنفسه افضل حتى لا يخسرها...............

Anonymous said...

لو حد موافقنى فى هذا الموضوع يرد
؟؟؟؟؟؟؟؟؟؟؟؟؟؟؟؟؟؟؟؟؟؟؟

Anonymous said...

تعقيبا علي تعليق الدكتور anoaymousهو صح جدا وده كلام الناس العاقلة بس مش يعرف الاول الطرف التاني موافق ولا لأ مفيش قواعد في الحب والحب يصنع المعجزات
بالمناسبة انا اصلا كنت عايزة اكتب احلي بيوت قراتها بس حبيت ارد علي الكومينت الاول
لو هكون دمعة في عينيكي يبقي انا هبعد واسيبك
لو زرعت الحزن فيكي ما استاهلش اكون حبيبك
صعب بعدك بس اصعب لما حزني يكون نصيبك
واخيرا عندي سؤالين
1)ليه الدكتور محمود ما ردش علي كومينتات القصيدة زي ماهو متعود يعمل؟
2)هللللللللللللللللللللللللللللللللل القصيدة تجربة شخصية؟