طه

Tuesday, March 25, 2008

السلام عليكم ورحمة الله
من سنتين لما نشروا الرسومات المسيئه للنبي صلى الله عله وسلم
كتبت القصيده دي
و بعدين نسيتها ومانشرتهاش

لاني حاسس انها مش كفايه على الاحساس اللي جوايا
بس دلوقتي حاسس ان عايز انشرها
لان على الاقل فيها معني بحلم أقوله
يا رب تعجبكم وتسيب في قلوبكوا أثر

بعد أمّـــــا حسّينا بـأسى
يومين..تلاته ....واتــــنسى
والدنيا ليه داســــــــــــت عليه؟؟؟
إحنا نفوسنا اتغيـــــرت
ولا قلوبنا اتحــــجرت
ولا إحنا بس جــــــــــرالنا إيه ؟؟؟
لمّا بيسيئوا لنبـــــــــينا
و يهينوه أدّام عينــــينا
يبقى فاضــــــــــل لينا ايـــــه؟؟؟
فيه سؤال دايما ًقاتلني
لما طه هيقــــــــابلني
لو سئلني أقولـّــــــــــــــه ايه؟؟؟
يعني بس أقوله ســــــــــبتك......... للكلاب ووقفـــت ساكت
ولا اقولّه ان المــــــــروءه......... جوه قبر القــــــلب ماتت
ولا بس اقوله ايه؟؟؟
ولا أقولّه اني مســــــــــــلم......... بس مسلم في البــــــطاقه
المظاهر حلوه لكـــــــــــــن........ ما تلاقيش في القلب طاقه
ولا بس اقوله ايه؟؟؟
ولا أقول غمضت عيــــــني....... واعتـــــــــبرتك أى واحد
أصْلي شلت ما بين ضلوعي....... نفس ظالمــه وقلب جاحد
ولا بس أقوله ايه؟؟؟
اقوله بقيت ضعيف مــــــكتوف
رميت نفسي في حضن الخـوف
و أغمّض عيني لمّا بشـــــــوف
رسول رب العباد ينـــــــــــهان
بقيت زي السراب زايـــــــــف
و بعمل نفسي مش شايــــــــف
و أخاف مـ الناس ومش خايف
على طه النبي الــــــــــــعدنان

قلوبنا الدنــــــــــــيا وخداها
هموم الدنيا ملــــــــــــــياها
سامحنا....سامحنا يا طـــــهَ
ما تبقاش مننا غضــــــــبان
تعالوا خلاص كفايه هروب
ولو جوّانا لسه قلــــــــــوب
تعالوا للحظه واحده نتــوب
ونرجع تاني زي زمـــــــان
حتى لو كان كله واحــــد......... قـــــلبه ثار علـشان نبينا
بس برده دا مش كــــفايه........ إحنا فيه واجــــــب علينا


اعتراضنا مش بكلــــــمة........ تنتهي بعد المــــــظاهره
احنا مصحفنا في ايــــدنا........ والنبي ساب سنه طاهره
سنة المعصوم مـــــــحمد........ سنة للدنيــــــادي شامله
سنة لازم تبــــــقى نورنا........ في العباده وفي المعامله
لو صحيح بنــــحب طــه....... اللي في الإسلام جمـــعنا
يبقى لازم نبــــقى وجهة........ مشرفة للدين بتاعـــــــنا
كل واحد فينا قلــــــــــبه........ لو صحيح بالحـزن حس

يبقى بالأفعال نـــــــــعبّر....... مش كلام ينـــــقال وبس
همّا فعلاً لو شافـــــــونا........ مسلمين إســـلام بــــــجد
يعرفوا إن الدين بتاعـنا........ دين سلام مش موت وهد
لو صحيح بنحب طه
تبقى أخــــلاقه رايتنا
و سنته منهـــج حياتنا
لو صحيح..... بنـحب طه

22 comments:

! ! ! ! said...

طبعا أنا لازم أكون أول كومنت .... ولا اييييه؟؟؟؟
:))))

بارك الله فيك يا محمود
أنت فكرتنا بحاجه ... بالله ما نقدر ننساها
بس للأسف هي كانت زي أي حاجه في حياتنا ...هوجه وعدت
و بارك الله في كل أنسان بيفكرنا بنبينا محمد صلى الله عليه وسلم .. لأننا بالفعل مقصرييين جددددا ..
اللي بيحزن الواحد أننا ضعاف جدا اننا نرد أو نزوود عن نبينا ...
اللهم اعزنا وأنصرنا وسامحنا
أللهم أمين

لك تحياتي

quiet_storm said...

جزاك الله كل خير ..
والله مش مطلوب مننا بس غير اننا فعلا نتمسك بسنه نبينا وحبيبنا سيدنا محمد صلى الله عليه وسلم
واى تصرف ايجابى يجى بعد كده هتفرق معانا جدا لما ده يحصل ...ربنا هيكرمنا ويهدينا لطرق كتير نقدر نعمل بيها لديننا
اللهم اهدينا فيمن هديت
مره تانيه جزاك الله خيرا يا محمود وجعله الله فى ميزان حسناتك ان شاء الله

مـحـمـود فـرج أحمد said...

ماشي يا علام ... اول كومينت .. بس انا ارفض وبشده إعتبارك أول كومينت وانت عارف ليه

بس بجد يا حوده كلامك روعه روعه روعه
عارف أنا فاكر اني سمعتها منك من فتره بس سمعت الجزء اللي فيه بتقول ..لو قابلت طه هقول له ايه؟

بجد أسعدتني وأحزنتني
أسعدتني لما بلغت من جميل التعبير وأحزنتني لحالنا الذي لا يسر أحد

اللهم اعزنا بالرجوع الي منهاجك وسنة نبيك

سلام الله عليك

عندما نحب؟؟؟ said...

السلام عليكم ورحمه الله
جميله جدا يامحمود
ربنا يكرمك ويبارك فيك
ويقدرنا على حب النبى عليه افضل الصلاه والسلام بالفعل مش بالكلام
وربنا يغفرلنا سهونا يارب
ربنا يوفقك
ومستنينك

عمر said...

الله ينور يا حودة

فعلا الحل مش هيجي من لحظة غضب وخلاص والموضوع يعدي ، الموضوع فينا احنا لو تمسكنا بدينا بالأفعال مش بالكلام

وزي ماانت قلت
احنا مصحفنا في ايــــدنا........ والنبي ساب سنه طاهره

أو بالأصح مش انت اللي قلت ده حبيبنا هو اللي قال
" تركت فيكم ما إن تمسكتم به لن تضلوا بعدي أبدا كتاب الله وسنتي "ودائما يارسول الله ... أنت حي في قلوبنا

.................................
في نفس السياق
آخر تدويناتي
في ذكرى الميلاد .. احتفال أم حداد
.................................
تحياتي الدائمة لك يا محمود

Anonymous said...

طبعا وكالعاده مش محتاج تعليق

بس فعلا الواحد مش عارف يرد ازاى عاللى بيعملوا كده
هل يعمل مظاهره ويحرق سفاراتهم
ولا يعمل زى عمرو خالد ويروح عندهم
بس احنا فعلا لازم من جوانا نكون مسلمين بجد وبعدها نبقي نتكلم( ان الله لايغير ما بقوم حتى يغيروا ما بانفسهم)
جزاك الله خيرا والكلام اللي انت كتبته بيدينا امل في الحياه ان في لسه ناس فاكرة

snowwhite said...

السلام عليكم ورحمة الله.....
بسم الله ما شاء الله عليك يا د/ محمود
القصيدة دي بالذات مش محتاجة اي تعليق لانها بتعبر عن نفسها
ولما قريتها فكرتني بتقصيرنا وتساهلنا في اكبر اهانة ممكن تتوجه للمسلمين
كلنا حاسين بواجبنا بس مش قادرين نعمل حاجة
واللي بيحاول يعمل حاجة مش بيستمر عليها
والسبب في ده للاسف هو ضعفنا واحساسنا دايما ان احنا مش هانقدر نعتمد علي نفسنا في اي شئ
وفعلا الحل الوحيد لكل الهوان ده ان نطلب العزة من الله
بالتمسك القوي بدين الله وسنة الرسول المصطفي صلي الله عليه وسلم في كل امور حياتنا
يا رب نقدر علي كدة ونبقي من (القابضين علي الجمر )
كما قال رسولنا الكريم
.........................
اسفة علي الاطالة ...بس في بيت عجبني
جدا حسيت ان هو عنوان القصيدة
...................................
هم فعلا لوشافونا....مسلمين اسلام بجد
يعرفوا ان الدين بتاعنا....دين سلام مش موت وهد
بارك الله فيك وادام عليك هذه النعمة

GEHAD said...

ولا أقولّه اني مســــــــــــلم......... بس مسلم في البــــــطاقه
المظاهر حلوه لكـــــــــــــن........ ما تلاقيش في القلب طاقه
>>>>>>>>>>>>>>>
كل واحد فينا قلــــــــــبه........ لو صحيح بالحـزن حس

يبقى بالأفعال نـــــــــعبّر....... مش كلام ينـــــقال وبس
>>>>>>>>>>>>>>>>>>>>>
لو صحيح بنحب طه
تبقى أخــــلاقه رايتنا
و سنته منهـــج حياتنا
>>>>>>>>>>>>>.

دكتور محمود
بارك الله لك في موهبتك
وجعل ما كتبت في ميزان حسناتك
عبّرت فأجدت الوصف وأوردت الحل الأكيد فاللهم اعف عنا وفقنا لرضاك
دعواتكم

عندما تنهمر الدموع said...

السلام عليكم ورحمة الله وبركاته
في البداية أحب أبدي اعجابي الشديد بهذه القصيدة التي أثرت في لدرجة البكاء حقا كلمات رائعة أثرت في نفوس كل من قرأها لكن التأثر لن يفيد ولن يكون المصطفى سعيدا بأن يكون ردنا على كل هذه الاهانات هو التأثر أو البكاء أو حتى المشاركة في المظاهرات فقط بل انه سيكون فخورا بنا لو حاولنا فعلا كما تفضلت واوضحت بأن نقتل شياطين أنفسنا ونعود لسنة رسولنا عله يشفع عنا عند ربنا في يوم لا ينفع فيه الندم لذلك فأني أرجو من الله تعالى أن يهدينا ويعيد لنا أنفسنا التي تاهت في بحور عصياننا
في النهاية أني أشكرك حقا على هذه القصيدة الرائعة

dr_mony said...

طبعا قصيده جميله اوى بس احنا مش فى ايدينا اننا نعمل مظاهره بس كفايه نقاطعهم والمفروض ان اى سفير دنماركى او اوروبى لانهم اكيد بيشاركوا معاهم فى كده ونمنعهم من دخول مصر بس دى سياسه مصر اللى احنا عارفنها واللى نقدر عليه زى ما انت قولت فى القصيده احنا مصحفنا فى ايدنا وكفايه اوى السنه اللى تركها لنا المصطفى واحنا المفروض اننا مش بس نقاطع منتجاتهم الافضل ما نذكرهم اصلا لانهم احقر من اننا نشغل بالنا بيهم واحييك مره تانيه على القصيده انا بس غلبتنى الحماسه ه

محمود سليمان ابو العزم said...

مصطفي منورني دايما
وطبعا لازم تكون اول كومنت
حد يقدر يقول حاجه غير كده ياباشا
ومعاك حق في كل كلمه قولتها

محمود سليمان ابو العزم said...

كويت ستورم
جزاك الله كل خير يا حنان
ان شاء الله داميا منوراني كده

محمود سليمان ابو العزم said...

فرج

ياعم انت وعلام واحد
اي حد يعلق الاول مش مهم
المهم انكوا تفضلوا تعلقوا كده علطول
وامين لدعائك يا رب يا حوده

محمود سليمان ابو العزم said...

عندما نحب

بتيعدني تعليقاتك جدا دايما يا اسماء
ربنا يغفر لنا جميعا
دايما مستني تعليقاتكم

محمود سليمان ابو العزم said...

عمر

سعيد جدا بدخولك عالم التدوين
وسعيد اكتر بتعليقاتك اللي دايما بتديني امل
وكمان اسم مدونتك..بحب النور
يارب كلنا نكون بنحب النور

محمود سليمان ابو العزم said...

انونيموس

انا كمان بصراحه مش عارف الصح فين
بس في الظروف اللي احنا فيها دي
بيتهيالي اللي نقدر نعمله ان نتمسك بالكتاب والسنه
ربنا يلطف بينا ويرحمنا

محمود سليمان ابو العزم said...

سنو وايت

معاكي حق في كل كلمه قوليتها
وسعيد انك بداتي تسيبي تعليقاتك هنا على المدونه
ماتحريميناش من مرورك دايما

محمود سليمان ابو العزم said...

جهاد

فينك من زمان
بس المهم انك رجعتي تنوري المدونه
ومتشكر على تعليقاتك اللي على المواضيع اللي تحت كمان
ماتطوزليش الغيبه تاني

محمود سليمان ابو العزم said...

عندما تنهمر الدموع

جزاك الله كل خير على رايك الجميل وكلامك الاجمل
يارب تكون كل الناس قرت تعليقك لانه فيه كلام جميل اوي

محمود سليمان ابو العزم said...

دوك موني
جمال اوي حماسك
هو يودي في داهيه اينعم
بس دي اقل شء نقدر نعمله
خالص تقديري لزيارتك الدائمه

شق القمر said...

ربنا يبارك محمود
بجد انا سعيدة جدا انى اخت لانسان مثلك به كل هذه المشاعر الجميلة جدااا

اكيد كلنا مثلك نملك المشاعر نفسها ونقاسى على انفسنا
ولكن خرجت مشاعرك عن قفص القلب ليفصح بها اللسان فى كلمات ونسق طيب وجميل جدا تبارك الله

ولن أزيد عن تعليق الجميع شيئا
فقد تابعت التدوينة من اول رفعها
لكنى اود ان اؤكد الان انها حقا نفوسنا

وان ديننا مشروح لمن يريد فى سنة المصطفى صلى الله عليه وسلم
وان حياتنا ومعاملاتنا وكل ما يتعلق بوجودنا بالدين بسنته ايضا

لنحاول ان نقرا فى سنن المصطفى
وان نتبعها
وان نبدا بالاهم والكبير ثم المهم
وهكذا

ليس لنقف على سنة المصطفى فى فعل قد لا يساوى غير شكليات وهكذا نسىء ايضا

واذكر انى اختلفت كثيرا مع ملتحيين ليسوا من السنة فى شىء الا انهم يركنون باللحية على ذلك

واخشى ان اقول لكم انى نفسى اخشاهم لانى لا اعتبر لتلك اللحية مما قد قابلت منهم


ربنا يبارك فيك محمود

محمود سليمان ابو العزم said...

شق القمر

متشكر اوي على كلامك الجميل ده يا رنا
ومعاكي حق في كلمة قولتيها
النبي صلى الله عليه وسلم ساب سنه جميله جدا
كفايه الكلمه الطيبه اللي بقينا بنفتقدها اوي اليومين دول
اما موضوع اللحيه
فأنا مش عارف الحكم بالظبط
كل اللي اعرفه ان اللي مربي لحيته وأخطأ
يبقى مش ذنب اللحيه
ذنبه هو
مش بحب الناس تقول انا مش مربي لحيته بس أحسن منه
احنا المفروض نقارن نفسنا بالصح مش بأي حد أو أي حاجه تانيه
يعني مثلا مش بحب بنت تبقى لابسه ضيق ومحزف وتيجي تقول بس انا احسن واقرب لربنا من اللي لابسه خمار دي الف مرة


جزاك الله كل خير يا رنا
ويارب منوراني دايما