Your heart can return back

Tuesday, April 15, 2008

السلام عليكم ورحمة الله
أنا كنت محضر موضوع تاني خالص احطه النهارده
بس الموضوع ضاع مني
ومش هلحق أكتبه تاني
وقعدت اقول اكتب ايه ...أكتب ايه
مش هسيب التلات ده يعدي كده
مش لاقيت غير قصيده كنت كتبتها عشان اقولها
في حفلة حملة حمايه
بس الحفله اتلغت
ونسيت القصيده دي خالص
ودلوقتي افتكرتها
واللي هيخليني انشرها النهارده انها مش بس للناس اللي بتشرب
هي لكل حد فيه عقبه في حياته مش بس عقبة الادمان
ياب تعجبكوا
Your heart can return back
صدقني..مش بنـــلوم عليك.........الوقــــت ده مش وقت لوم
جاييــــن نـــــمد ايدينا لـيك.........ونقول بلاش تيأس في يوم
قالوا عليك انســـــان وحش ........وقلـــــــــوبنا قالت ألف لأ
يمكن تكون غلطان صحيح.........بس الرجـــــوع للحق حق
حقك تعــــــيش ...حقك تعود
ولو الطــــــريق مليان سدود
فيه ألف إيـــــد ممــــدوة ليك
مهما يكون طال النــــــزيف
صدقني قلبك مش ضـــعيف
وهيبقى أقـوى وأقـــوي بيك

انســــــان وزيّـــك زيّــــــنا
أو يمكن احـــــــــــسن مننا
بس احنا رافضين السكوت
والحلم فارد ميــــت شراع
بينادي عالعمر اللـي ضاع
ويقول بلاش حلـمك يموت

بيتك.. حيــــاتك... أسرتك
أهلك ..زمايلك.... صحتك
ليه كـــل ده ترضاه يروح
ليه تـرضي غلطه صغيرة
ويـّاها متــــــــعة قصــيّرة
يملوا حـــــياتك بالجـروح

ربك خلـــــــقنا بشر سَوِي
وإدّانا فضـــــل كبير أوي
ازاي ايدينــــا تضـــــــيعه
ربّــك فاتحــلك باب رضاه
لو كنت حاسس صوت نداه
لازم كيـــــانك يســــــمعه
Dayes when come and go
They make our hearts suffer
God send to us somebody
Who can remove eyes cover
We want not to leave drugs
To turn the future black
Even when you are away
Your heart can return back
ليه تقتل الحــــلو اللي فيك.........ليه الوِحِـــــش يفضل يبان
واجه قوام......فتح عينيك............ضدقني قلبك مش جبان
مين اللي قال حبة حـــبوب ........بتـــــهدّي أو تعــمل دماغ
بالعكس دي مجـرد هروب ........وبتنبي فيك بيت من فراغ
جربت تشرب؟!...يجري ايه لو جيت تجـــــــــرّب عكــسها
ومادمت مخلـــوق حر ليه..........تبقى أســــــيرها وعبدها
فيه ناس بتــــفتح بابها ليك.........علـــــــشان ترجع صحتك
بقلوبها هتحـــــــافظ عليك ........ويهـــــمّـــهم ســــريــــتك

ربك عليك دايــــــــماً شـــــهيد.......هتقولـّه ايه يـــــــــوم الحساب
والنار بتــــــسأل عن مــــــزيد......خايف نكــــــــون احنا الجواب
ولا تحـــــــــب تكـــــون سعيد......والجـــــنه تفــــــــــتح ألف باب
وتشوف هناك رب العبـــــــيد.......ولا يبـــــــــقى فيه بينكم حجاب
انطق وقــــــــولها وعيد وزيد.......أنا مش هـــــعيش وسط العذاب
أنا مش هعيــــش انسان وحيد.......وكــــــــــفايه في الدنيا اغتراب
هتدوبي يا جبال الجــــــــــليد.......هتموتي يا سنــيييييييين السراب
لازم يكون عزمك أكـــــــــيد........وما فيش مطر من غيـر سحاب
صدقني هيلــــــــين الحــــديد........من غير لاضـعف ولا انسحاب
قوم رجــــــــــع الطفل الوليد........اللي اتحــرق جــــــواك وشاب
رجّـــــــع شموع قلــــبك تئيد.......وارجـــــــع لأحــــــلام الشباب
جرّي الأمل جـــــــوة الوريد.......وافــــــتح في بنك النور حساب
ممكن يكــــــــــون قلبك بعيد........بس الأمــــــل ولا لحظة غاب
طول مااحنا جنبك ايد في ايد.......هتــــــــــلاقي حزن القلب داب
خليـــــــــنا نبدأ من جـــــديد........مهما يكـــــــــــون كال الغياب

ومادمت من جواك نضـــــيف.......شئ مستـــــــحيل أبدا تضيع
مهما الورق مات في الخريف.......لازم بيـــــــــرجٍع في الربيع

لازم تســـــــــيب دنيا الدموع........وترجّــــــــــع العمر الجميل
ممكن يكون صــعب الرجوع.........لكن أكــــيد... مش مستحيل
لكن أكيد مش مستحيل
لكن أكيد..........مش مستحيل

12 comments:

Anonymous said...

بسم الله الرحمن الرحيم

للمرة التالته علي التوازى
اكون اول كومنت ههههههه

ايه الشرف العظيم ده؟

بسم الله ما شاء الله
كل يوم بتثبت موهبتك اكتر واكتر

في كل النواحى

واحلي ما في القصيده دى الامل والتشجيع


وربنا يوفقك
ادام الله عليك موهبتك

pure blue

عمر said...

تاني كومنت ... متهيألي في تقدم جامد قوي ، بس أنا عندي نفس تواقة ( زي ما سيدنا عمر بن عبدالعزيز بيقول ) إن شاء الله هبقى أول كومنت

بسم الله ماشاء الله ياحوده ، فعلا جميلة وزي ما قلت لك قبل كده من جمال شعرك إنك تقدر تدمج العربي في الإنجليزي ويمكن يكون ربنا كرمك بكلية الطب عشان كده

كويس انك نسيت اللي كنت هتقوله انهارده عشان نقرأ لك قصيدتك في حملة حماية وربنا يسامح اللي كان السبب في إن احنا ما نسمعشي القصيدة دي منك

أشكرك على البيتين اللي كتبتهم كتعليق على مدونتي

وأتركك هذه المرة - من غير إعلان - عشان ما تزعلش

تحياتي

Anonymous said...

السلام عليك اولا ازيك يا دكتور محمود انا متشكره جدا لحضرتك علي ردك علي الكومنت بتاعي في القصيده اللي فاتت وان شاء الله هسيب لحضرتك اسم ترد بيه عليه زي ما حضرتك طلبت.انا بجد مش لاقيه كلام اقوله لحضرتك يعني القصيده مش محتاجه لرأي اصلا لانها بجد بتعبر عن نفسها بجد قصيده حلوة اوي اوي واحسن ما فيها هو اسلوب حضرتك الرائع في انك مش بتحاول تلوم الناس دول علي اللي هما بيعملوه وبتحاول تشجعهم وتقولهم اذا كان اللي عملوه ده غلط فهو اتعمل وخلاص المهم بقي الامل في الرجوع اكيد موجود لسه وده اللي حضرتك اكدت عليه ولكن بتشجيعنا ليهم ووقوفنا معاهم .مره تانيه بجد بشكر جضرتك علي الكلام الجميل ده وربنا يهدي كل شباب المسلمين ويعافهم ويحميهم وربنا يحفظك ويحميك ويحققلك ما تتمناه اسفه علي الاطاله بس فس كل مره ببقي نفسي اقول تعليقي علي اي حاجه بتقولها مني لحضرتك بس برجع اكتب يمكن لاني بعرف اقول اللي بحسه اكتر في الكتابه. رجاء يا دكتور محمود يا ريت تحاول ما تضيعش حاجه حضرتك كتبتها قبل كده لان مش كلام حضرتك اللي يضيع.(Amert Alhozn)

هبهوبه said...

ماشاءالله يادكتورمحمود
أجمل حاجه إن ربنا سبحانه وتعالى يرزقك بالموهبه ومعاها القبول كل قصايدك بتتحب وبتدخل القلب مهما كان موضوعها حتى لو حزينة
بس أعتقد أن اللي المفروض تخاطبهم بالكلام ده موش هيدخلوا المدونة علشان يقرأوا القصيدة ولأنها رسالة يبقى لازم تحاول تنشرها وتوصلها لكل اللي محتاجين يسمعوا كلمة أمل وتشجيع تاخد بإيديهم حتى لو طبعتهاووزعتها في نطاق المجمع
على الأقل تبقى حاولت توصل رسالتك وتمد إيدك للي محتاجينك
وربنا يجازيك خير ويقدرك على مساعدتة كل اللي يحتاج مساعدتك

quiet_storm said...

مهما الورق مات في الخريف.......لازم بيـــــــــرجٍع في الربيع

ممكن يكون صــعب الرجوع.........لكن أكــــيد... مش مستحيل


جميله اوى وفعلا يا متمكن ..ابيات مليانه بالامل والثقه فى النفس والرغبه بان اللى جاى احسن ان شاء الله

بالتوفيق دايما واالاسبوع الجاى تكتب الموضوع اللى ضيعته ده
فى انتظاره....وشكرا

أحمد سعيد بسيوني said...

رائعة يا حودة
كالعادة
دمت

! ! ! ! said...

ما شاء الله يا محمود
كالعاده .. و كما عودتنا

بارك الله فيك
أنا كنت عايز أقول بس حاجه صغيره
أنا كان ليا نصيب اني قعدت في مره مع مدمن متعافي .. من اللي بيعملوا علي علاج المدمنين من الأدمان و اللي كانو شغالين في حملة حمايه ... وبيساعدوهم للوصول لبر الامان
و من الحاجات الجميله اللي هو قالها
" أن المدمن ده أنسان زي أي أنسان .. دفعته ظرووف لأنه يقع في مشكلة الأدمان
و أنه كل اللي هو محتاجه أنه يحس أن في حد واقف جنبه .. عايز يساعده
مش ناس عماله تقوله لا أنت غلط ..أنت مش أنسان
عايز واحد يحط ايده علي كتفه .. ويكلمه بحنيه .. وياخد بإيده لللطريق الصح"

بارك الله فيك يا محمود
goo onn

*عندما تنهمر الدموع* said...

السلام عليكم ورحمة الله وبركاته
في البداية احب اشكر حضرتك على التعليق الجميل اللي حضرتك رديت عليا بيه ومتتصورش اد ايه انا فرحت لما كان اسمي اللي بعلق فيه هو السبب في ولادة قصيدة جديدة لتنضم الى زميلاتها وتكون وردة في هذه الباقة من القصائد والتي تتحفنا بيها في المدونة
وبالنسبة لموضوع اعتذاري عن اطالتي فده لاني بخاف اني اكون فعلا بعطل حضرتك بدون قصد لما بتكلم عن اللي حساه جوايا وعن وجهة نظري المتواضعة عن الدنيا واللي فيها
اما بالنسبة للقصيدة فهي حقا رائعة حتى ان الاحرف عجزت عن التعبير عن جمالها لانها بتحاول توصل للناس رسالة مهمة وهي ان المدمنين هم ناس عاديين كانوا في يوم زينا لكن ظروفهم الصعبة هي اللي خلتهم كده يمكن تخلت عنهم الارادة والعزيمة وسابتهم في عز ماهم محتاجين لها عشان كده مش المفروض اننا كمان نتخلى عنهم او نعاتبهم لان ده مش هيفيد لكن ممكن يضر وممكن يبعدنا عنهم ويكرهم فينا وفي الاخر فكما يقول المثل لا تبكي على اللبن المسكوب عشان كده لازم نحاول نساعدهم مش هم بس لكن اي حد ظروفه صعبة عشان ميبقاش زيهم ونرجع نقول لو....لو....لو....وبرده لازم كلنا نفتكر بأن اي انسان مهما كان ومهما وصل اكيد مر في حياته بظروف صعبة لكنه تجاوزها لما لقى حد يقف جنبه
في النهاية فأني اود ان اضم صوتي الى صوت الصديقة العزيزة (هبهوبه) وانضم لرأيها بأن حضرتك تحاول تنشر هذه القصيدة قدر الامكان ربما تكون البلسم الشافي الذي يداوي جروح المعانين لذلك فأني ارجو من حضرتك ان تضع هذه الفكرة نصب عينيك وتضع معها حديث الرسول الكريم ( من رأى منكم منكرا فليغيره بيده فأن لم يستطع فبلسانه فأن لم يستطع فبقلبه وذلك اضعف الايمان ) صدق رسول الله _صلى الله عليه وسلم_
نهاية فأن ادعو الله لك بالتوفيق والنجاح الدائم في حياتك العلمية والعملية

Anonymous said...

سلام عليكم يادكتور محمود اتمنى ان حضرتك تقبلني صديقة للمدونة
احب اشكر حضرتك على كل قصائدك لانها فعلا جميلة وبتحمل معاني كتير ياريت الناس تفهمها وتدركها وتؤمن بيها

elrousha

GEHAD said...

ما شاء الله لا قوة إلا بالله
نفع الله بك دوما
جزاك الله خيرا
قصيدة تعجز الكلمات ان تصف مدى روعتها ورقيها في كل ما تحويه
من تفاؤل وأمل وحب وحرص وحنان
كل الامتنان والتقدير لقلمك النابض وإلى هذا الشعور الراقي والقلب الصافي
ما أجمل أن تشعر بالآخرين وتعبر عنهم
خالص دعواتي لك دكتور محمود

رحيل said...

I don't know what to say U r just a genius and I can't tell how much I'm proud of my self to be one of U'r readers...Ur's...

Anonymous said...

yimkin ana machoftich il9asida di abli kida lakin bissaraha hia hayla o inta 3andak mawhiba atmana lik kol lkhir "maria"