احنا ...بتوع الفرقه الخامسة

Tuesday, June 24, 2008

السلام عليكم ورحمة الله



في البداية أنا بعتذر عن تقصيري الشديد في حق المدونه

المشكله مش بس في الامتحانات
المشكله اني مش عندي نت في البيت
ومش بعرف ادخل نت في البلد لان النت بعيد جدا عني
والمشكلتين دول سببهم ان احنا بيتنا آخر بيت في الأراضي
بس دايما بحاول أدخل نت بأي طريقه
و أحاول أقري الردود



بس الوقت والظروف اليومين دول مش بيمهلوني اني أرد
وكمان بعتذر لـهبهوبه ومحمد مغاوري بالذات عن القصيدة اللي كنت قلت اني هحطها على المدونة
بخصوص فرح أختي
انا بجد كان نفسي اكتب حاجه مخصوص واقولها في الفرح
لان حنان مش بس اختي الكبيرة
دي توأمي
بس ماكانشي في دماغ خالص في الوش بتاع الفرح ان اكتب اي حاجه
وحتي لما كنت بلاقي الدماغ ماكنتشي بتيجيجي مظبوطه
انا بس كان فيه شويه ابيات جٌم في دماغي
كانوا محتاجين يظبطوا
واضيف ليهم اللي كنت هكتبه مخصوص لاحمد وحنان بس الوقت ما امهلنيش





الابيات كانت بتقول
الجواز مش لبس دبلة
أو غوايش في الايدين
مش ورقتين عقد رسمي
عند مأذون مكتوبين
absolutly
الجواز مش بت حلوة
خدها واد أمور جميل
مش هدوم مغسوله حلوة
ويّا أكل لذيذ جميل
absolutly
الجواز رحمة ومودة
زي رب الكون ما قال
مهما فيه العمر عدي
كل يوم بيزيد جمال
الجواز يا جماعه رحلة



كلـــــــها حب وتفاهم



واللي بيخليها أحلى



لمّة الأطفال معاهم





الجواز اتنين قلوبهم



ضمها ..احساس برئ



الجواز اتنين حياتهم



ضمها...نفس الطريق





الجواز اتنين لبعض



بالقلوب.. عايشين لبعض



بالقلوب.. عايشين في بعض



بالقلوب ..عايشين ببعض



حتى لو هيكون طريقهم



فيه مطر أو حتى رعد



مش هيمنع يوم طموحهم



شئ عشان.. بيحبوا بعض





في النهايه انا هدعي لكن



نفسي كله يقول آمين



من هنا وكل الأماكن



كل قلب يقول آمين



ربنا.. يفضل حاميهم



ربنا يبارك عليهم



ربنا يطرح بركته



والأماني الحلوه فيهم





يملى بيتهم بالأمان



جنبهم أجمل جيران



يحمي بيتهم مالناموس



والعناكب والفيران





ربنا يبارك في مالهم



ربنا يكتر عيالهم



مهما في الدنيادي يجري



ربنا مايشغلشي بالهم





ربنا يزيدهم سعاده



كل يوم تكبر زياده



يفضل الشربات في ريقهم



مايدوقوش ولا قهوة سادة



تبقى عين الناس بعيد


والأمل يفضل يزيد


يمشي قطر العمر بيهم


والجميع راضي وسعيد

...........................................

يارب كل الناس تكون قالت آمين بجد


أما قصيدة المدرج


فأنا مش عارف أشكر زمايلي ازاي


بجد مش عارف


وبالذات احمد الجوهري


اللي كان نفسه اوي يطلعني اقول


بيتهيألي لو هو اللي هيقول ماكانشي هيعمل كده عشان نفسه


لما احمد قاللي انت هتقول بعد المحاضرة
بقيت خايف اوي الناس تمشي
مش عشاني


خفت ان احمد يتحرج عشان هو اللي مطلعني


بس لاقيت رد فعل من زمايلي ماكنتش متوقعه خالص


لدرجة ان لما طلعت ولاقيت الناس كلها مامشيتشي انا خفت وارتبكت
ونسيت ربع اللي كنت هقوله تقريبا
متشكر على تشجعيكم دايما لي


والثناء اللي انا بجد وبصدق لا أستحقه


ومش لاقي اي رد على التشجيع الجميل اللي كان في المدرج


غير اني انزل القصيده هنا

ومعلهشي ان القصيده صعبة في قرايتها للناس اللي مش من سنه خامسه

احنا بتووووووووع الفرقه الخامسه
غـــــم تلاقي .......و هـــــم تلاقي
كل ما اقابـــــــــــل حـــــــــــد يقوللي
أنا ماذاكــــــــــــــرتش حاجه نهائي
عيني عليكي يا فرقه يا خامسه
فين أيــــــــــــــام بس الثانوية
والتســــــعه وتسعين في المية
دلوقتي العشـــــــرين في المية
diarrheaجايبه لكل الناس

عيني عليـــــــــكي يا فرقه يا خامسه

كل ما أقــــــــــــــــــــــابل حد يقوللي
أنا عقــــــــــلي في سنه خامسه اتخم

ازاي الأطــــــــفال تتـــــــــــــــــــــلم

وأنا مزنـــــــــــــوق في الباطنه ياعم
ماذاكرتـــــــــش امـــــــــراض الـــدم
والجلديه...... تجـــــــــــــــــيب الغم
و هــــــــم في هــــمheartوchest
مـِالعصـــــبيه أنا دمّــــي اتــــــــــــسم
أنا قلـــــبي اتغمnephrologyمـ الـ
أنهي أســـــــــــيبه؟؟ و أنهي أهم؟؟؟
وابتـــــــــــدت الإشـــــــــاعات والنم
عيني عليـــــــــكي يا فرقه يا خامسه
بــــــص يا عــيــــني في وش الناس


toxic look و apathyهتشوف


همّا يا دوب بــــــــــــــــس امتحانين


shockوالدفـــــــــــــعادي تخش في


عيني عليـــــــــكي يا فرقه يا خامسه

واللي يقـــــــــــــول أنا شكلي مضيع


انا يا اخوانـّـا خـــــــــــلاص كبرت


واللي يقـــــــــــوللي أنا قلبي خلاص


elarged tender heartبقـــى


عيني عليـــــــــكي يا فرقه يا خامسه

واللي متنـــــــــــــــشن أوي والخوف


hyper toniaو rigidity جابله

واللي يا عينـــــــــــي عليه مــِالخوف

aphoniaفقد النـــــــــــطق وجاله

عيني عليـــــــــكي يا فرقه يا خامسه

واللي يقــــــــــول شوفي يا محمود

severe episodeأنا هيجــيلي

واللي يـــــــقول شوفني يا ابوالعزم

broncospasmأنا هيجــــــيلي

عيني عليـــــــــكي يا فرقه يا خامسه

واللي يقوللي حـــــــــالات الباطنة

واخده جمــــــــيع الإحتــــــياطات

مش في فلــــــــــــوس انما ناويين

ياخدوا غـــــــــــوايش وموبايلات

عيني عليـــــــــكي يا فرقه يا خامسه

واللي يقـــــــــــول الجدول زانق

blackومخلـّــيـــلنا الدنــــــــــيا

وانا بالذات جـــــدول مجموعتي

anginal attackبيجــــــيب

عيني عليــــكي يا فرقه يا خامسه

واللي يقــــــــــــول أنا زي النملة

أما المنــــــــــــــــــــهج زي الفيل

dyspropotionومادام يحصل

لازم نلــــــــــــــــــــــجأ للتأجيل

عيـــــني عليكي يافرقه يا خامسه

عيــــــــــــــني علينا وكل الناس

في امتحــــــانات علطول مهريّه

مش عــارفين يا اخوانا نشوف

كأس الأمـــــــــــــــــم الأوربيه

عيني عليـــكي يا فرقه يا خامسه

عيـــــــــــني علينا كده وجدولنا

مزنــــــوق ولا علبة بولوبيف

كـــــل الناس بتأجـّـــــز واحنا

امتحـــــاناتنا في عز الصيف

عيني عليـــــــــكي يا فرقه يا خامسه

سنه كامـــــــلة رايحين جايين

كل الطــــــلبه يا عيني بتسعى

وازاي بـــــــس يا عالم ندرس

سنه كاملة مـــــن تسعه لتسعه

عيني عليـــــــــكي يا فرقه يا خامسه

تيجي الصـــــــبح تلاقي الناس

كله بيـــجري في ساعته يبص

أقصى منـــــاه في الدنيا بحالها

يوصـــــــــل قبل تمانيه ونص

عيني عليــــكي يا فرقه يا خامسه

بس ان شــــــــــــاء الله هتعدي

وماحــــدش مــــــــــننا هيموت

زي ما اولــــــي وتـــانيه وتالته

ورابعه ما فاتوا ماخامسه تفوت

ربنا هيســـــهلها علــــــــــــــــينا

مــــش هيشمّــــــــــــت أبدا ً فينا

مش هيضـــــــــيع يوم مجهودنا

و أكـــــــــــــــــيد هيحقق أمانينا

ادعوا مـــــــــــعايا ان شـاء الله

ربـــــنا هيـــــــــــــــعديها بخير

مهما يكـــون صعب الموضوع

احنا أملـــــنا.... في رب كبير


في النهايه أنا نفسي أقول

أنا كنت أجلت امتحان الأطفال بتاع الرواند وامتحنته النهارده وامبارح

وخلال اليومين بتوع الامتحانات دول

دخلت نت ساعه كل يوم عشان أكتب البوست ده

لاني بجد بحبكم في الله

ويعز على ان حد يقول اكتب حاجه يا محمود وماكاتبهاش

ولاني بستكتر على نفسي الكلام الجميل اللي بسمعه وبقراه هنا

ومش بلاقي رد غير اني اكتب من جديد

وان شاء الله الايام الجايت تمهلني أرد على ردودكم اللي بعزها أوي

سواء على الموضوع ده

او الكام موضوع اللي قاتوا

كل اللي طالبه منكم دعواتكم

لاني بجد محتاجها الفتره الجايه

ربنا يوفقنا ويكتبلنا الخير جميعا





ودلوقتي مع صورتين من صور الفرح


طبعا واخدين بالكو ... أنا الواد الطويل أبو بدله سمرا ده .. أحسن واحد بيسقف في مصر




أنا برضه



فاضل بس بيتين كان نفس اوي اقولهم بعد ماخلصت القصيده في المدرج

بس ماجاتشي فرصه

إذا أخطـــــــــــأتُ أو خانتني كلماتي

فإنّ العيب في نفسي .. ومن نفسي

وان وُفّـــــــقت في شـــــئ ٍفتوفيقي

بفضل الله ليس الفــــضل من نفسي


26 comments:

محمود سليمان ابو العزم said...

على فكرة بس المكان الفاضي ده
كان فيه صورة لي من الفرح
بس مانزلتش كالعاده
حصل خير
وهحاول انزلها تاني ان شاء الله
في انتظاركم جميعا
وان شاء الله هرد في اقرب فرصه على موضوع التسامح اللي فات
لاني محتاج ارد عليه
جزاكم الله كل خير جميعا

Alice said...

بحجز اول تعليق وبس :)
لى الهدية
:)))

رحيل said...

ماينفعش يا اليس الهديه لاول تعليق حقيقي يعني ليا انا بس هه هههههههههه

لا حقيقي انا عايزة اقول حاجه واحده بس وبجد حاساها فعلا مش مجامله ولا مبالغه انه احنا روددنا عليك وعلى مدونتك وكلامها اللي بيمسح عالقلب يا محمود برقه وخفه ولمسة حنيّه بتهون علينا كلنا كل اللي احنا فيه ده احلى هديه منك لينا كلنا وبجد يارب يديم عليك موهبتك الراقيه ده ومايحرمناش احنا منها عشان فعلا احنا في امسّ الحاجه ليها سواء بطبيعة شخصيات بعضنا الاكثر من مرهفه او حتى في الزمن السيء اللي احنا فيه حاليا وعلى راي ابو العلاء تمتع بالسيء فالأسوأ قادم :P فمن خلالك بنقدر فعلا بعد لطف ربنا نتحمّل سيء هذا الزمان عشان نستعد للاسوأ وزي مابيقولوا في ناس ربنا بيخلقهم عشان يهونوا عالناس التانيين والحمد لله انك مش من الناس التانيين ههههههههه فهمت حاجه؟؟؟!! يلا سلام بقى وكفايه عليك كده وماتنساش الهديه معلش يعني اه ...

Alice said...

هههههههههههه
انا لسه عالمدونة رحيل
اى نعم حجزت وعملت كام حاجة فى البيت بس رجعت تانى عالمدونة
وطبعا مش حجزت الا بعد ما رديت
رغم انى متأكدة ان محمود هيفض الخلاف دا ويقول انا اول واحد رد ولا مش شايفين
ههههههههههه
تعليقى الاول يعد وبالتالى يحسب
اما تعليقى هنا فانا اكرر ثانية
انى لا اجيد الرد فى مواقف ناقشتها سابقا
عن قصيدة الفرقة الخامسة فانا قلت بعد ما الكل ايده وقفت عن التصفيق
( ختامه مسك )
للدكتور الجميل رئيس القسم وعن أحمد الجوهرى واصراره لانى متاكدة ان محمود خواف شوية مش بيتكلم الا بالعافية
وكذلك عن محمود وما ابدع وجعلنى اشعر انى لست الوحيدة فى دوامة المنهج وخلافه
اما عن كلماتك الاولى
كنت اتوق لارى ابتسامة حنان وحى تسمعها منك وانت فرح بها ولها
وامنى نفسى ان اسمع قصيدتك فى حفل زواجى ان شاء الله :)
هعزمك وهعزم الجوهرى واخليه يقدمك بالعافية برده :))
ربنا يديك ويدينا طولة العمر ان شاء الله
اما عن تأجيلة فهذا مالم اتوقعه
الاهم ان تكون وفقت
وباذن الله خير

semsema said...

ولا اليس ولا رحيل
أنا أول كومنت انا هنا من بدري بس كنت بتمعن في القصيدة
وبعدين محمود يقصد اول كومن لحد في سنة خامسة صح يامحمود؟
شفتوا قال صح اهو
بحجز أول كومنت وجاية علي طول

semsema said...

أنا جيت
أنا لما سمعت القصيدة منك في المدرج بجد كنت هموت من الضحك
وكل الناس كانت فرحانة ووجوههم اللي اترسم عليها الهم والغم من التلات ساعات الفظاع بتوع المحاضرة مع الحر رجعت اترسم عليها البسمة تاني
ميرسي اوي ليك يامحمود علي بسمتك اللي اترسمت علي شفايفنا ووجوههنا يومها
اما بالنسبة لقصيدة الفرح
جميلة خالص
وانا علي فكرت دعيت وامنت وقولت امين
وبالزات علشان ربنا يبعد عنهم الناموس
بجد حاجة قمة الارف والزهق الناموس ده
تحياتي لخفيف الظل دائما
أدام الله قلمك الرائع مبدعا لاحلي واجمل الكلمات
وربنا يوفقنا جميعا ان شاء الله

بالنسبة لخلاف اول كومنت ده
انا بنسحب خلاص وبرفع الراية البيضا
لسببين
اولا ان هديتي وصلت من القصيدتين الحلوين دول
وثانيا ان اليس شكلها كده في سنة خامسة والله اعلم
تحياتي لاليس ورحيل

شق القمر said...

ههههههههههههههه
يبقى برده انا اول كومينت
مادامت سنة خامسة
لا وبتحجز كمان
دا طبعا بتنازل محمود عن الكومينت اللى كتبه فى الاول ده :((

M.El-KHATIB said...

بجد حاجة أكتر من رائعة يامحمود كالعادة

انت انهسان محترم بجد وعندك موهبة جامده جدا ة

ربنا ميحرمناش منك يااااااااارب

مفيش حاجة لسنة رابهة بقى ....!!!

هههههههههههههههههههههههههه


أخوك ... محمد الخطيب

وياسيدى هسيب الهدية لبتوع سنة خامسة

بالهنا والشفا

ولا الهدية مش بتتاكل ...!!!!

مـحـمـود فـرج أحمد said...

أنا مش جاي عشان الهديه ... إطلاقا

هتقوم رادد عليا يا أبو العزم .. الهديه لأي حد إلا انت .. هقول لك ماشي

ازيك يا واد .. عملت ايه في الامتحان

بص يا بني البوست ده رغم انه طويل إلا إني قريته وبجد بجد فرحت

شكلك مفرفش والبوست عسل خالص
وكلماتك لأحمد وحنان .. جميله جدا بس متوقعتش إنها تكون كده

مش عارف ليه توقعت انك لو كتبت في حاجه زي دي هتخاطب أحمد وتهنيه على إنه فاز بأجمل عروسه وكده يعني

بس انت كتبت الكلام عام جدا ... ولا ده عشان ميقولوش مين يشهد للعروسه؟؟

وطبعا قصيدة الفرقه الخامسه .. أنا عبرت عن رأيي في المدرج

إيدي وجعتني من التصقيف يا راجل

يلا يا حوده .. اسيبك دلوقتي

سلام يا حبي

شق القمر said...

هنعمل ايه بصورك يا محمود
يوم فرحك هنبقى نتفرج عليك وعلى عروستك قبلك
:))
بجد نفسى اشوف عروستنا
متنساش ترفع صور حنان وتبعتهم على الميل
وعقبالك :)

رحيل said...

طيب ما انا في سنه خامسه برده حد قالكم اانا في كي جي تو يعني هههههههه يلا مش مشكله بصوا مش هانختلف كلنا كاسبانين طالما كلنا اصحاب لواحد في شخص محمود والاجمل انه جمعنا هنا عنده وصحيح يا محمود هانعمل ايه بصورك عايزين صور القمر بتاعتكم اللي اكيد اكيد كانت قمر برده في الفرح وربنا يديم نورها دايما في سماكم :) ...

Anonymous said...

إذا أخطـــــــــــأتُ أو خانتني كلماتي فإنّ العيب في نفسي .. ومن نفسي وان وُفّـــــــقت في شـــــئ ٍفتوفيقي بفضل الله ليس الفــــضل من نفسى


ايه الجمال ده

البيتين دول جمال اوى



الجواز اتنين لبعض

بالقلوب.. عايشين لبعض

بالقلوب.. عايشين في بعض

بالقلوب ..عايشين ببعض

حتى لو هيكون طريقهم

فيه مطر أو حتى رعد

مش هيمنع يوم طموحهم

شئ عشان.. بيحبوا بعض


طبعا آآآآآآآآآآآآآآميييييييين

وربنا يبارك في جوازهموبعد تسع شهور ان شاء الله تكتب قصيده لحد جديد في العيله


بالتوفيق فى الامتحنات

pure blue

عندما تنهمر الدموع said...

السلام عليكم ورحمة الله وبركاته
ازيك يا د/محمود يارب تكون بخير ويارب تكون العروسة الجميلة د/حنان بخير
قصيدة الفرح بجد جميلة جدا ويارب تكون ابواب السما كانت مفتوحة وانت بتكتبها وواحنا كلنا بنقول امين ويارب يسعد ايامها ويوفقها في حياتها ويبارك لها في زوجها واولادها الجايين ان شاء الله ويعود عليهم تمام الصحة والعافية _امين امين يارب العالمين_
اما قصيدة المدرج فدي حاجة تانية خالص وفعلا خلتنا نحس بمعانتكم وزي ما بيقولوا اللي يشوف بلوة غيره تهون عليه بلوته يعني احنا بتوع اولى قومنا الدنيا وقعدناها واسودت الحياة في وشنا عشان هنخلص في شهر سبعة لكن انتوا فعلا الله يكون في عونكم ويوفقكم وميضيعش ابدا مجهودكم
لكن بصراحة حضرتك مكنش لازم تعتذر عن تقصيرك في حق المدونة لأننا عارفين ان دي حاجة مش بايدك وان الامتحانات وخده كل وقتك واحنا كلنا متأكدين انك بتحاول تتواصل معانا على قد ما تقدر وبتحاول تنزل بوست كل اسبوع عشان ما تزعلش حد وده فعلا احسن رد على الكومنتات اللي بنكتبها وزي ما حضرتك بتكتب وما بتنتظرش مننا اي كلمة شكر فاحنا كمان بنعلق على بتكتبه لأنه فعلا بيشدنا ومش مستنيين اي رد طبعا انا مش قصدي اننا مش عايزينك ترد علينا لكن الفترة دي سماح عشان الامتحانات لكن بعد كده لأ لكن في رد هيرضينا كلنا هو ان حضرتك تاخد بالك من مذاكرتك ونسمع عنك كل خير ان شاء الله
ربنا يوفقكم جميعا وان شاءالله هتعدي وتعبكم مش هيضيع وافتكروا دايما ان ربنا معاكم فاستعينوا به وخذوا بالاسباب ثم توكلوا عليه

سهر عافية said...

السلام عليكم ورحمة الله وبركاته
كيف حاللك أمير الشعراء
لك منة وتحية وتهنئة لزفاف أختك الكريمة أدام اله على عائلة أبو العزم الفرح والسعادة

Anonymous said...

elrousha
السلام عليكم يا دكتور محمود
طبعا قصيدة الفرح جميلة جدا وكلنا دعينا لدكتورة حنان واحنا بنقراها ويارب دعواتنا تستجاب
اما بالنسبه لقصيدة الفرقة خامسة فهي جميلة مع اني مقدرتش افهم الكلمات الانجليزي اللي فيها مش لغباء مني بس لاني مش في طب الحمدلله
بس انا اكيد حاسه بمعانتكم وازاي ان الواحد يفضل سنة كاملة يذاكر ويدح وما يخدش راحة خالص بس لازم تصبروا عشان انتم اخترتم انكم تكونوا دكاترة وربنا يوفق حضرتك وتجيب امتياز وتطلع من اوائل الدفعة
بس اتمنى ان الامتحانات ماتخدش حضرتك مننا وتفضل حضرتك علطول تتحفنا بقصايدك.

Anonymous said...

elrousha
السلام عليكم يا دكتور محمود
طبعا قصيدة الفرح جميلة جدا وكلنا دعينا لدكتورة حنان واحنا بنقراها ويارب دعواتنا تستجاب
اما بالنسبه لقصيدة الفرقة خامسة فهي جميلة مع اني مقدرتش افهم الكلمات الانجليزي اللي فيها مش لغباء مني بس لاني مش في طب الحمدلله
بس انا اكيد حاسه بمعانتكم وازاي ان الواحد يفضل سنة كاملة يذاكر ويدح وما يخدش راحة خالص بس لازم تصبروا عشان انتم اخترتم انكم تكونوا دكاترة وربنا يوفق حضرتك وتجيب امتياز وتطلع من اوائل الدفعة
بس اتمنى ان الامتحانات ماتخدش حضرتك مننا وتفضل حضرتك علطول تتحفنا بقصايدك.

أحمد سعيد بسيوني said...

بسم الله
جميلة جدا قصيدة الفرح وان شاء الله اعزمك في فرحي وتطلع تقولها هههههه باستغلك بقى
بالنسبة لقصيدة الفرقة الخامسة فبجد هي عبرت عننا كلنا بصراحة وبالذات كمان لما سمعناها منك والاهات كانت بتنطلق من الحضور في المدرج وانت بتقول دراسة من تسعة لتسعة وامتحانات في عز الصيف ... معانا يااااا رب
ربنا يعزك يا حودة ومايحرمناش منك ابدا
جزيتم الجنة

Anonymous said...

السلام عليكم ازيك يا دكتور محمود
اولا انا متشكره جدا علي تلبيه طلبي بجد انا مبسوطه اوي ان حضرتك نزلت القصيده دي علي المدونه لانها بجد حلوة جدا .حضرتك اصلا كلامك كله حلو جدا
وردودنا اللي احنا بنبعتها دي والله فعلا قليله جدا جداعلي الكلام اللي بنقرأه او اي احساس بنحسه من خلالها وما تقولش ان حضرتك ما تستاهلهاش حضرتك تستاهل اكتر منها بكتيييييييييييير جدا بس هو الانسان دايما هو اللي مش عارف قيمه نفسه وخصوصا لما يلاقي الناس كلها بتحبه الحمد لله
قصيده الفرح دي جميله اوي وان شاء الله ربنا يستجيب لكل دعوة وامنيه فيهاباذن الله والصور كمان بجد حلوة اوي عقبال صور فرح حضرتك ان شاء الله تكون احلي واحلي
الاهم بقي ان حضرتك ختمت الموضوع بابيات جميله جدا ورقيقه جدا بجد ما شاء الله عليك


إذا أخطـــــــــــأتُ أو خانتني كلماتي
فإنّ العيب في نفسي .. ومن نفسي
وان وُفّـــــــقت في شـــــئ ٍفتوفيقي
بفضل الله ليس الفــــضل من نفسي

ونعم بالله وان شاء الله موفق دايما يا دكتور محمود والله ربنا يوفقك ويحفظك وان شاء الله ربنا يكرمك في الامتحانات وتعدي عليك وعلينا بخير ان شاء الله.
Amert Alhozn

Anonymous said...

معلش يا دكتور محمود بجد امنيه اخيره يا ريت حضرتك تحاول ترجع قصيده هكذا تمنيت ان احب ومش مهم الردود اللي اتكتبت عليها لانها بجد قصيده جميله جدا ومن اكتر القصائد اللي بحبها علي المدونه وان كان حد كتب رد ضايق حضرتك فده عيب فيه بقي مش في القصيده وهو حر يا ريت تنزلها اتمني ذلك ولو ما نزلتهاش انا مش هزعل خالص بس كل الحكايه ان كل مره كنت بدخل المدونه بحب امر علي كل القصايد واقرأها
بالتوفيق ان شاء الله دايما
Amert Alhozn

quiet_storm said...

لازم اقول طبعا الف الف الف مبروك لحنان
(الاسم الجميل طبعا)واقولك عقبالك ان شاء الله عن قريب

معلش متاخره اوى ....بس بجد كان عندى مشكله فى الكومينتات

----------

اخبار الامتحانات ايه ؟
يارب تكون عملت كويس وبدايه مبشره للى جاى ان شاء الله

----------

القصيده الاولى رسمت صوره جميله الكل بيتمناها ويطلبها من ربنا

ربنا يوفقك ويكتبلك كل خير واللى تتمناه ديما

والقصيده التانيه مش هقدر اكتب احسن من كلام اللى سبقونى فعلا مسك الختام
لتلت ساعات من العذاب فى المدرج
والصور جميله على فكره عقبال صورك وانت قاعد بقى

هبهوبه said...

السلام عليكم
أنا متشكرة أوي يامحمود على القصيدة الجميلة دي بس لازم أختك تقرأها انا والله قولت آمين
وبتاعة الفرقة الخامسة جميلة ربنا يوفقكم ويكرمكم بس المهم يكون التعب ده بفايدة عشان البلد يكون فيها دكاترة بجد يعالجوا المرضى ويخففوا آلامهم لسه لحد دلوقتي مرضى كتير بيموت من الإهمال نفسي الظاهره دي تختفي وعندي أمل في بتوع الفرقة الخامسة
أناإتأخرت في قرآة البوست عشان كان عندي حالة وفاة واحد كان عزيز أوي على قلبي وكان عنده المرض اللي مش بيرحم حد بس للأسف الدكتور تباطئ فعلاجه وطبعاً المرض كان أسرع من أي حاجه بس الحمد لله ربنا رحمه برحمته الواسعة وخدوا عنده هو أحن عليه من أي حد بس لحد إمتى هيكرر المشهد ده فحياتنا حاولوا تتعبوا بجد عشان تتخرجوا وإنتم معاكم أمل الحياة
وإحنا كلنا هندعيلكم بالنجاح والتوفيق وربنا يجعلكم سبب في تخفيف الآلام عن المرضى .

هبهوبه said...

أنا أسفة يا محمود نسيت أقولك إن الصور جميلة زي القمر
أنا كمان نزلتها عندي على الجهاز منورة

Doc mero said...

آآآآآآآآآآآآآمييييييييين
يا رب العالمين
والف مبروك لحنان

وربنا معانا احنا كمان

محمود سليمان ابو العزم said...

السلم عليكم ورحمة الله

مين يا جماعه اللي جاب سيره الهديه دي
انا قلت فيه هديه؟؟؟؟؟؟

ندل ندل يعني
لا ان شاء الله الهدية هتبقى لرنا ورحيل وسماح
دا اولا

انا والله يا جماعه لا أجد من الكلمات
ما أستطيع ان أرد به على هذه الكلمات التي صدقا لا استحقها
وتقصيري في الرد الان ليس لضيق الوقت كالعاده
ولكنه عجز عن التعبير
وربما ادخر هذا الوقت لكتابة موضوع جديد لا تفارق كلماته رأسي منذ ثلاثه ايام
يبقى فقط أن أرحب بعوده دكتور ميرو بين اهل المدونه

انتظروني قريبا ان شاء الله
تللات اربع ايام كده يعني
انا مش عارف ايه اللي خلاني اتكلم نحوي كده

همسات داعيه said...

السلام عليكم ورحمه الله وبركاته
اسفه جدا انى ماشاركتش معاكوا من زمان بس انتوا اكيد هتعذرونى من راوند اطفال لامتحان لامتحان وهكذا
المهم متكونوش نسيتونى
اولا مبروك يادوكتور لاختك ولو انها متاخره كتير ربنا يباركلها ويرزقها بالذريه الصالحه ويطلعوا زى خالهم ان شاء الله
ثانيا احنا اللى متشكرين ليك جدا ع القصيده اللى كسرت جو الكابه اللى كنا فيه مش عارفه كنا هنروح ازاى كده لولا قصيدتك الرائعه طبعا
بس غريبه انك كنت خايف ان الناس يمشوا انت مفروض تكون واثق ان الناس دى كلها بتستنى اى ابيات منك لانها بتعبر فعلا ع اللى جوانا وبتكون لسان حال كل واحد فينا
ع العموم ربنا يباركلك ف موهبتك دى كمان وتمتعنا
ربنا معانا كلنا ف الامتحانات ان شاء الله وتعدى ع خير اتمنى انى متاخرش ف التعليق تانى لانى بجد بافتقد زملائى واخواتى فيها

محمود سليمان ابو العزم said...

رد متاأخر شويه

اهلا وسهلا بكويت ستورم اللي المدونه افتقدتها جدا الفتره اللي فاتت

البقاء لله يا هبهوبه والهمك الله الصبر في وفاة الشخص ده
وآسف على تأخيري في الرد

همسات داعيه
المدونه نورت من تاني والله العظيم
ومتشكر اوي على كللامك
ويارب تكوني ماشيه كويس في الامتحانات