ابتسامتك

Tuesday, June 3, 2008

السلام عليكم ورحمة الله
ازيكم يا جماعه
اتمنى الجميع يكون بخير
ابستامتك
يمكن تكون القصيده مكتوبه على لسان حبيب لحبيب
بس انا حاولت على اد ما قدرت اكتبها على لسان كل واحد مننا لكل حد هو بيعشق ابتسامته
فيه ناس في حياتنا مجرد رؤيتهم بيبتسموا بتخلى كل حاجه في حياتنا تبتسم
انا شخصيا بهدي القصيده دي لوالدتي كاول حد في الدنيا يهمني اشوفه بيبتسم
ولاخواتي وزمايلي وكل الناس اللي بحب ابتسامتهم واللي ابتسامتهم بتديني امل
وخصوصا الاطفال الصغيرين...وخصوصا البنات الصغيرين
وانا حاولت كمان ان ..ابستامتك...تتقري بقتح التاء الاخيرة او فتحها....عشان تقدر
تهديها لاي حد في حياتك
ورغم ان القصيده طويله شويه انما انا تقريبا نسيت ربعها
بس قدر الله وماشاء فعل
لي طلبين بقى
الطلب الاول اجباري تقول ايه اكتر مقطع عجبك...مقطع واحد بس
والطلب التاني اختياري تقول هتهديها لمين
ماشي؟؟؟؟؟؟؟؟
ابتسامتك
ابتسامتك نبع صـــــــافي
مهما يدّي ماينــــــــتهيش
ابـــــــتسامتك بحر دافي
اللي يغرق فيه...يعيش!!
ابتسامتك
ابتسامتك حاجــــه نادرة
في البراءه وفي الطـفوله
واللي أجمل كونها قادرة
تدخل القلب بســـــــهولة
ابتسامتك
نجمه بتنــــــــور سمايا
لو نجومها هيســــتخبوا
نهر سايل بين دمــــــايا
منبعه في قلبي ومصـبه
ابتسامتك
ابتسامتك جــــت تقوللي
مهما كان الحـــزن طال
افتح الأبواب تمـــــــللي
لسه فيه في الكون جمال
ابتسامتك
ابتسامتـــــــــك نار تدّفي
بس مابتحـــــــرقشي حد!!
يوم ما بلــــــــمسها بكفي
يوم ما اكـــون انسان بجد
ابتسامتك
سر من أســــــرار جمالك
اللي من كــــــــتر البراءه
كان ضروري يحطوهالك
قبل اســــــمك في البطاقة
ابتسامتك
ابتـــــــسامتك بيت ندهلي
نفسي أعــيش بكياني فيها
تبقى عنـــــــواني و أهلي
يبعتوا الجـــــوابات عليها!!!
ابتسامتك
تيجي شمس الكون وترحل
خاصم القــــــــمر النــــهار
وابتسامتك مهـــــما يحصل
نورها طـــــالع لــــيل نهار
ابتسامتك
ابتسامـــــتك وردة حلوه
ماليه كل الكـــــون زهور
زارعه جـوة القلب غنوة
مهما كــــــان القلــب بور
ابتسامتك
في ابتســامتك محتارين
هي ليه ما اتغــــيرتشي؟؟؟
زي ما تكون الســــنين
لسه فيكي ماحيـــرتشي!!!
ابتسامتك
قطر راكب فيه لــــوحدي
بس عامل زحـــــمة فيه!!
بنسي فيه كل الجراح دي
والأمل دايـــــــــــما ماليه
ابتسامتك
رجّعتلي القلـــــب يفرح
بعد عمر بحاله منــسِــي
خلـّـته للكون بيـــــشرح
يعني ايه كلمة رومانسي
ابتسامتك
لغر كل الــــناس تشوفه
بس حلــّـــــه معــايا بس
لما تتجمع حـــــــــروفه
تدّي كلــمة "قلبي حس"
ابتسامتك
ابتسامــــــتك قصه حلوة
قمت انا بـــــدرو البطوله
قلبي فيها ماخدشي غلوة
واتقتل من ضـــربه اولى
ابتسامتك
كل صــــــــبح وكــل ليل
بسمتك تبـــــــعت رساله
لسة فاضل شـــــئ أصيل
يا زمان مافيهوش أصاله
ابتسامتك
هي دايـــــــما خط سيري
لو تتــــــــــوه بي ّ الحدود
مهما تهت في يوم مسيري
لابتسامـــــــــتك يوم هعود
ابتسامتك
ابتسامتك خـــــيط بيربط
عمر فات مـــع عمر آتي
ابتسامتك شــــــئ بيظبط
عالأمل دايمـــا ساعـــاتي
ابتسامتك
كنت قبل ما اكون عارفها
عيد ميلادي يادوب ميعاد
بس بعد ماقلــــــبي شافها
كل يوم... بقى عيد ميلاد
ابتسامتك
ابتـــــــــسامتك نور منوّر
في طريق عمري الطويل
مهما عاش قلــــــبي يدوّر
ضحكتك مالهاش مثيل!!
ابتسامتك
جوة أحاسيـــــــسي الوفية
ابتسامتك نــــــورها عاش
مهما بكرة هيـــــجرى ليّ
هنسي روحي وماأنسهاش
ابتسامتك
عملت استعــــمار يا زهرة
جوة روحــــــي وقلبي مال
عملت الاحاسـيس مظاهرة
أيدّت في الاحتــــــــــــلال
ابتسامتك
علمــــــــــــــتني ان الإراده
شمعـــــــــها مابينــــــطفيش
اني أعيش عمري في سعاده
فيه فلوس.... أو كان مافيش
ابتسامتك
مش هلـــــومك عمري تاني
لو يطــول في الحـب صمتك
قلبي شاف كـــــــل المعاني
باينة من نــــــور ابتسامتك

ابتسامتك
لو قعــــــدت سنين بطولها
برضو مــــــش هقدر أعبّر
أي كلــــمه أكــــيد هقولها
ابتسامتك برضــــــــو أكبر!!
ابتسامتك
هي كلــــــــــــمة سر قلبي
اللي من غيــــــــرها بتوه
واللي لمّا بتبــــــقي جنبي
تبــــــتسم كــــــل الوجوه
ابتسامتك
ابتـــــــسامتك زي طـيف
جوة روح الــروح ماليها
جوة قلب القــــــلب عاش
زي نسمة في عز صيف
حسوا روحي وقلبي بيها
رغم اني ماشفـــــــتهاش
ابتسامتك
ابتسامتك طـــــير مرفرف
مهما طار أســـمى و أسمى
باني جوة القــــــــلب عش
في ابتسامتك نفسي أعرف
هو فـــــــوق الوش بسمه؟؟
ولا فوق البســـــــمة وش؟؟
ابتسامتك
يا اللي حــــبك نور عينيّ
ياللي جوة الروح رسمتك
دعوة من قلبي وعيــــنيّ
ربنا يخلـّي..... ابتسامتك

45 comments:

Anonymous said...

السلام عليكم

القصيدة رائعة بجد ياد. محمود
زى ما عودتنا دايما
واكتر مقطع عجبنى هو
في ابتســامتك محتارين
هي ليه ما اتغــــيرتشي؟؟؟
زي ما تكون الســــنين
لسه فيكي ماحيـــرتشي!!!
لانى حسة اننا كل مابنكبر ابتسامتنا بتقل شوية شوية
انا بقى بهدىها لابن اختى لسة عنده 4 سنين وما فيش حاجة تزهقه زينا او مش عارف حاجة

اما بالنسبة للقصة انا لسة قرياها حالا
داهى رائعة ودايما انا كنت بفكر فىالفكرة دى ان لو الحالة دى حد نعرفة كنا نعمل ايه وكنا هنتعامل معاهم زى اى حد
انا اصلا اوقات كتير بحس انى المفروض مكنتش دخلت الكلية دى لانى خايفة من كل حاجة فيها
ازاى مريض يكون حياته فى ايدى ولو اتاخرت ثانية ممكن يحصل له perminant damage
مش عارفة بس اكيد ربنا هيساعدنا مدام بنحاول

اسفة انى طولت عليك بس مبسوطة لانى بعت اول كومنت

شق القمر said...

ابتسامتك
قطر راكب فيه لــــوحدي
بس عامل زحـــــمة فيه!!
بنسي فيه كل الجراح دي
والأمل دايـــــــــــما ماليه

السلام عليك محمود
كيف حالك ؟؟ :)
لعل الابتسامة تظل مرسومة فى ايام الامتحانات ان شاء الله

المقطع اللى فات عجبنى جداا
وبكده اكون جاوبت على السؤال الاجبارى
على فكرة انا يمكن مقراتهاش كاملة دلوقتى
لكن بإذن الله اقراها كلها
وكمان الابتسامة مش شرط تكون اهداء فى شخص معين
بالعكس انا ابقى ابتسامتى اهداء لنفسى حتى تظل ترسمها فيراها الجميع عليها
فتكون مصدر راحة وسعادة لهم
بجد بحزن جدا لما بكون مش قادرة لاى سبب تكون ابتسامتى فى عيون الناس واوقات بضر ارسمها غصب عنى عشان اكيد ناس كتير بتهرب فى الزحمة لمجرد انهم يلاقوا اللى بيقابلهم ببشاشة
بالتوفيق محمود

عمر said...
This comment has been removed by the author.
عمر said...

بسم الله الرحمن الرحيم

هم كلمتين ياحوده دلوقتي وبعدين إن شاء الله هقرأ وأرد ، والله مستقطع وقت بالعافية وانت عارف .. وعارف ان بكره امتحان جلدية .. فدعواتك ليا زي مادعيتلك انهارده في الكارديو
لكن هعمل ايه بقى ( ابتسامتك ) تهمني

بس فعلا ياحوده .. إني أحبك في الله
وباهديلك من شعرك حتة لقطة بالصدفة من الآخر

يا اللي حــــبك نور عينيّ
ياللي جوة الروح رسمتك
دعوة من قلبي وعيــــنيّ
ربنا يخلـّي..... ابتسامتك

في انتظار اللقاء قريبا
تحياتي لك ، ودعواتك لي

...............................

كما عودتك .. إعلان غير مدفوع الأجر
دعوة لكل زوارك الكرام من الفرقة الخامسة وزملائهم من الدفعة لمتابعة آخر أخبار الدفعة والامتحانات وكذلك لينكات المذكرات والمحاضرات المهمة على مدونة الدفعة - الرأي -
www.elrai.blogspot.com
ودائما .. خير الناس أنفعهم للناس
ابتسامتكم .. تهمنا - على رأي محمود ـ

Anonymous said...

elrousha
الصراحة القصيدة كلها حلوة وانا مش عارفه اختار انه مقطع نفسي اكتب القصيدة كلها تاني بس اكتر مقطع عجبني هو
ابتسامتك
مش هلـــــومك عمري تاني
لو يطــول في الحـب صمتك
قلبي شاف كـــــــل المعاني
باينة من نــــــور ابتسامتك
وانا احب اهديه لكل الاطفال في العالم لان ابتسامتهم هي اكتر حاجة بتفرحنا

عندما تنهمر الدموع said...

السلام عليكم ورحمة الله وبركاته
اولا وقبل ما اعلق على القصيدة احب اهني حضرتك على قدرتك على كتابة الشعر بمعنى انه زي ما بتقدر تكتب قصائد وقصص تبكينا كمان بتقدر تكتب قصائد تبعث فينا الامل والحياة مرة تانية بعد ما بيضيعوا منا في زحمة ومشاكل الحياة
اما القصيدة فهي فعلا جميلة بكل مقاطعها وبكل كلمة فيها بتبين حاجة الانسان لحد دايما يكون جنبه وتكون ابتسامته هي الشمعة اللي بتنور دربه وترسم فيه الامل وترجعله توازنه وهي البيت اللي بيجري ويستخبى بين اركانه من الحياة ومشاكلها يعني باختصار كلنا فعلا محتاجين حد نرتاحله وابتسامته ترجعنا لأجمل ايام وذكريات عشناها
واكتر مقطع عجبني هو
ابتسامتك
ابتسامتك جــــت تقوللي
لسه فيه في الكون جمال
افتح الأبواب تمـــــــللي
مهما كان الحـــزن طال
اما من حيث انا بهديها لمين فده فعلا حاجة صعبة لأنه مفيش حد معين او شخص واحد ابتسامته بتسعدنا بس انا عايزة اهديها لكل ام ابتسامتها زي نور الشمس اللي بيدفينا وبيحمينا ولكل اب مستعد يضحي بعمره عشان خاطر ولاده ومهما تعب بيفضل مبتسم عشان ميحسوش بيه وبهديها لكل صديق بيساعد صديقه وبيفضل دايما جنبه ويخفف عنه همومه وبهديها لكل طفل برئ لسه الدنيا ملوثتهوش بأحقادها وبالأخص لكل طفل مريض لأني بحس انه اذاكان ربنا خد منه جزء من صحته لكن اداه بسمة تنسيك الدنيا وما فيها واخيرا بهديها لكل اخ بيقف جنب اخوه لما بيحتاجله
كنت بس عايزة اقول انه فعلا ابتسامة شخص واحد مش كفاية عشان تسعدلك حياتك لكن احنا محتاجين ابتسامة دول كلهم.
ودعواتي لحضرتك دائما بالتوفيق والنجاح

Leonardo said...

هو فـــــــوق الوش بسمه؟؟
ولا فوق البســـــــمة وش؟؟

:)

وباهديهالك إنت يامحمود علشان تفضل تبتسم على طول

Anonymous said...

حلوة موووووت
بهديها لحد بحبه ومش حاسس بيا

ترررررب said...

ابتسامتك
لغر كل الــــناس تشوفه
بس حلــّـــــه معــايا بس
لما تتجمع حـــــــــروفه
تدّي كلــمة "قلبي حس

جميله اوى زى ماعودتنا ربنا يحفظلك موهبتك

Anonymous said...

بسم الله

والله كنت ناويه اكتب كومنت لما اخلص امتحان بس من جمال القصيده مقدرتش

مش لاقيه كلمه اوصفها بيها غير
منتهى الرقه

اما بالنسبه لاكتر جزء عجبنى بغض النظر عن انها كلها جميله

ابتسامتك جت تقوللي
مهما كان الحزن طال
افتح الابواب تمللي
لسه فيه في الكون جمال

اما بهديها لمين
فانا فكرت كتير
ولقيت انا دايما نفسي اشوف الناس كلها سعيده ومبتسمه

بس ممكن اهديها لبنت اختى اللي لسه متولدتشي اصلا
يعنى بديها هديه قبل اى حد

بجد بجد بارك الله فيك

pure blue

natural magic said...

ابتسامتك
نجمه بتنــــــــور سمايا
لو نجومها هيســــتخبوا
نهر سايل بين دمــــــايا
منبعه في قلبي ومصـبه
دا السؤال الاجباري
والسؤال الاختياري اختي الصغيره فعلا ابتسامتها بتنور يومي
بجد جميله يا محود
ربنا يكرمك

little angel said...

الله يا محمود .. يا سلام على الرومانسية النادرة وحلو الكلام ..وكل ده من الابتسامة ..ما شاء الله عليك وادام ابداعك ..عجبتنى جدا خاصة انها ايدت فيك الاحتلال وكل يوم تبتسم لك يبقى يوم ميلادك .. ادام الله بسمتك وبغلك كل ما تريد ..تحياتى

Anonymous said...

السلام عليكم ازيك يا دكتور محمود
والله نفسي مره ابقي اول كومنت بس مش عارفه .
المهم بجد بجد حضرتك عبقري لان المره اللي فاتت حضرتك بكيتنا جامد اوي والمره دي خليتنا نبتسم ونتفاءل جامد اوي وخصوصا واحنا داخلين علي الامتحانات ربنا يعديها علي خير ان شاء الله.
القصيده بجد اكتر من رائعه ربنا يزيدك من الكلام الحلو ده وخساره فعلا انك نسيت ربعها.
نيجي للطلب الاجباري احلي مقطع عجبني جدا هو
ابتسامتك
مش هلـــــومك عمري تاني
لو يطــول في الحـب صمتك
قلبي شاف كـــــــل المعاني
باينة من نــــــور ابتسامتك
وده والله بعد حيره طويله لان بجد في مقاطع تانيه عجباني جدا بس ده اكتر واحد
اما بقي الطلب التاني وهو بصراحه صعب جدا لاني زي كل الناس بتمني اني اشوف ابتسامه علي وجه اي حد في الدنيا
بس انا بهديها اولا لحضرتك لان حضرتك اللي كتبتها واسعدتنا بيها فنتمني ان احنا نشوف ابتسامتك دايما
وثانيا لاكتر حد انا بحبه في الدنيا كلها واللي بعمل كل حاجه في حياتي علشان خاطره هو وعلشان اشوف دايما الابتسامه علي وشه وهو والدي ربنا يخليه ليه
وبهديها لكل الاطفال اللي في الدنيا خصوصا في الاراضي المحتله اللي بكاهم يخلي الحجر ينطق والقلوب بتقطع( يارب اطرح البسمه علي شفاهم)
بجد انا بشكر حضرتك مره تانيه علي القصيده دي وربنا يوفقك ويحفظك دايما
ويجعلك سبب في سعاده وابتسامه اي مريض واي انسان
مستنين حاجه جديده الثلاثاء اللي جاي ان شاء الله
Amert Alhozn

مـحـمـود فـرج أحمد said...

ايوه كده يا حوده

ربنا يخليك للشعب .. بجد كلام جمييييييييل

ابتـــــــسامتك زي طـيف
جوة روح الــروح ماليها
جوة قلب القــــــلب عاش
زي نسمة في عز صيف
حسوا روحي وقلبي بيها
رغم اني ماشفـــــــتهاش


حلوه الحته دي يا حود ... كبير طول عمرك

بالنسبه للإهداء .. مش عارف بصراحه ... أنا دايما بحب كل اللي اعرفهم يكونوا في سعاده وأولهم رابطة الحب كلها
إنماأكتر ضحكه عجبتني وأكتر حد اتمنى أشوفه فرحان .. فمش هاقول لك عليهم

سلام يا حبي

quiet_storm said...

السلام عليكم ...ازيك يامحمود.شكل امتحان الكارديو كان دمه خفيف النهارده


اكتر مقطع عجبنى
ابتسامتك
جوة أحاسيـــــــسي الوفية
ابتسامتك نــــــورها عاش
مهما بكرة هيـــــجرى ليّ
هنسي روحي وماأنسهاش

وكمان ده

ابتسامتك
يا اللي حــــبك نور عينيّ
ياللي جوة الروح رسمتك
دعوة من قلبي وعيــــنيّ
ربنا يخلـّي..... ابتسامتك

انا عارفه انى كده اخليت بشروط الاجابه عن السؤال الاول الاجبارى
وبما انى كده كده مش هتنجحنى فانا مش هجاوب على السؤال التانى بقى
:D

هو الاكيد كل الاطفال ابتسامتهم ليها مفعول السحر ....وانا عن نفسى بهديها لبنت عمى- الله يرحمه- وبنتها لمى فضلها 5 اسابيع بالظبط وتكمل سنه لان بجد احب اشوفهم فرحانين على طول ..لانى بحس انى عمى اكيد بيبقى فرحان هو كمان
ربنا يديم عليك الابتسام وقدرتك على رسم البسمه على شفاه الاخرين

M.EL-KHATIB. said...

ابتسامتك
لغر كل الــــناس تشوفه
بس حلــّـــــه معــايا بس
لما تتجمع حـــــــــروفه
تدّي كلــمة "قلبي حس"


بجد دى جامده جداااااااااااا

انت بجد ملكش حل يامحمود

ربنا يباركلك يارب


أهدى القصيدة دى

لوالدتى

وللانسانة اللى بحبها

Anonymous said...

elsalamo 3alaykom w ra7mat ALLAh
el 2abyat tab3an to7fa kal3ada
agmal bet hwwa
ياللي حبك نور عيني ياللي جوه الروح رسمتك دعوة من قلبي و عينيه ربنا يخلي ابتسامتك

w ana bahdeha le wa7da sa7bety ana msh ha2ol esmaha la2enaha 3arfa enny ba7ebbaha w kol el nas kman 3arfen hya 2ad eh ghalya 3andy. bgd de forsa 7elwa awy enny a33abar lel bane2adma de 3n msha3ry.ana b7bha bgd.b7baha awy..b7baha be3adad elmarrat elly khaffefet feha 7ozny..b7baha be3adad elmarrat elly sharketny feha far7y.b7baha awyyyyy.b7baha aktar mn ro7y wallahy w sa3at kteer ba7es en 7atta ro7y law da77et beha 3ashanha haykon shwaya 3aleha... bane2adma bgd gamela .gamela awy ana mbsota w fakhora enny sa7betha w fe nafs el wa2t ana za3lana 3ala kol elly maye3rafohash..bgd sa3banen 3allaya ennohom ma3andohomsh el she2 el gamel da...
ana asfa enny tawwelt bs fe3lan kol elly ana 2olto lessa maddahash 7a2aha..3yza kol elnas ted3ely w ted3elha.rbna yekremha ya rab w tkon as3ad wa7da fel 3alam zay mahy dayman sabab sa3adty.
w ya rab kol wa7ed yed3elha hwwa kman ykon mbsot w sa3ed.

ana b7baha awy w bardo b7b kol el nas waalahy w nefsy kol el3alam ykon sa3ed.

ana akheran bashkorak ya doctor ma7mod ennak eddetny elforsa elfaze3a de enny afdfad w a2ol elly gwaya
rbna ykrmk w yekrmna kollena ya rab
{H}

semsema said...

ابتسامتك طـــــير مرفرف
مهما طار أســـمى و أسمى
باني جوة القــــــــلب عش
في ابتسامتك نفسي أعرف
هو فـــــــوق الوش بسمه؟؟
ولا فوق البســـــــمة وش؟؟
أولا ازيك يامحمود؟يارب تكون تمام
انا زعلانة اوي اني ملحقتش اول كومنت
بس الظروف كانت ضدي
النت مفصول والجلدية تناديني
يله ملحوقة
الظاهر ان امتحان الكارديو ده وشه حلو علينا
علشان شفنا"ابتسامتك"
عقبالنا يارب
جميلة جدا يامحمود وفيها مقاطع كتير عجبتني
بس يله علشان السؤال اجباري بس
أما بالنسبة للإختياري
......فأنا بهديها ل
مممممممممم
لكل حد بيحبني بجد ونفسه يشوفني دايمن سعيدة
زي ما أنا نفسي أشوفه سعيد
ربنا يوفقك يامحمود ويارب دايمن ابتسامتك ما تفارق محياك.
تحياتي وخالص مودتي لشاعر الرومانسية والرقة

هبهوبه said...

السلام عليكم
انا مش عارفه انت ازاي تخيلت اني في طب أنا لو كنت في طب اكيد كنت هستغل الفرصه وآجي اسلم على امير الشعراء محمود ابو العزم واخد معاه كام صورة علشان افتخر بيهم بس مفيش نصيب بقى
بالنسبة للقصيدة هي بجد تحفه
هي حقيقي عكس قصيدة بلسم تماما لكن كل واحده فيهم فيها جمال مختلف
اسمحلي انا هختار مقطعين الأول
ابتسامتك نبع صـــــــافي
مهما يدّي ماينــــــــتهيش
ابـــــــتسامتك بحر دافي
اللي يغرق فيه...يعيش
وده بهديه لوالدتي ولآيه
علشان اسم آيه ده اسم لآجمل بنتين في حياتي ربنا يخليهم ليا
أما المقطع التاني بقى
ابتـــــــسامتك زي طـيف
جوة روح الــروح ماليها
جوة قلب القــــــلب عاش
زي نسمة في عز صيف
حسوا روحي وقلبي بيها
رغم اني ماشفـــــــتهاش
ده بقى بهديه ليك انت يامحمود علشان أنا حقيقي ماشفتش ابتسامتك لكن حسيت بيها
وبحسها فكل قصيدة من قصايدك يكون مليها الأمل
اسمحلي كمان واحد بس
يا اللي حــــبك نور عينيّ
ياللي جوة الروح رسمتك
دعوة من قلبي وعيــــنيّ
ربنا يخلـّي..... ابتسامتك
ودي بهديها لكل الناس اللي حوليا واللي بحبهم علشان نفسي أشوف الدنيا كلها بتبتسم
أنا أسفة جداً طولت عليك

Anonymous said...

ابتسامتك
مش هلـــــومك عمري تاني
لو يطــول في الحـب صمتك
قلبي شاف كـــــــل المعاني
باينة من نــــــور ابتسامتك
السلام عليكم ورحمه الله وبركاته
ازيك يادكتور محمود اد ايه القصيده اكتر من رائعه فكرتنا ان في حاجه اسمها ابتسامه في وقت تقريبا نسينا فيه يعني ايه ابتسامه
طبعا القصيده كلها رائعه جداااااااا بس انا عجبني البيتين دول جدااااا
اما ههديها لمين فههديها لكل الناس اللي انا بحبهم وبكون مبسوطه جداااا لما بشوفهم بيبتسموا
انا بشكرك لانك رسمت اكيد ابتسامه علي كل وش قرا القصيده دي
ربنا يكرمك ويحفظك ويوفقك ويديم عليك جمال روحك وتفضل محافظ علي ابتسامتك علي طول

رحيل said...

كالعاده من حلو الى احلى ومن رائع الى اروع ايها الشاعر الرقيق ، القصيده كل مقاطعها اجمل من بعضها ربنا يباركلك في موهبتك ويزيدك منها.. هادخل في المفيداجمل مقطع عجبني :

ابتسامتـــــــــك نار تدّفي
بس مابتحـــــــرقشي حد!!
يوم ما بلــــــــمسها بكفي
يوم ما اكـــون انسان بجد...

وفي مقاطع تانيه كتير اكثر من رائعه بصراحه لكن حضرتك اشترطت مقطع واحد بس انما ده اكثر جزء حسيت انه فعلا بيحقق مغزى القصيده ..

اهديها لمين بهديها لكل الناس عشان عايزة العالم كله يبتسم عشان كل انسان لما بيبتسم بيبقى انسان بجدّ...

اجمل تمنياتي واسمحلي انحني تحية لهذه المعزوفه الرائعه....

أحمد سعيد بسيوني said...

ابتسامـــــتك وردة حلوه
ماليه كل الكـــــون زهور
زارعه جـوة القلب غنوة
مهما كــــــان القلــب بور

من احسن المقاطع حقيقة
والقصيدة بمجملها جميلة

اهديها
للوالدة
ربنا يحفظها و
يبارك لنا فيها
تحياتي

Anonymous said...

ابتـــــــسامتك زي طـيف
جوة روح الــروح ماليها
جوة قلب القــــــلب عاش
زي نسمة في عز صيف
حسوا روحي وقلبي بيها
رغم اني ماشفـــــــتهاش


ده اكتر مقطع عجبنى والقصيدة كلها جمسلة ومعانيها راقية جدا
أدام الله ابتسامتك و اسعدك
اهديها لكل قلب عرف معنى العطاء وبذل نفسه لاسعاد الاخرين

sluvswho

! ! ! ! said...

يا اللي حــــبك نور عينيّ
ياللي جوة الروح رسمتك
دعوة من قلبي وعيــــنيّ
ربنا يخلـّي..... ابتسامتك

أزيك يا محمود
واحشني جدا يابني

كفايه عليك أجابة سوال واحد
:)
يلاا

c u

smile said...

السلام عليكم ورحمة الله وبركاته اول لما قريت القصيدة اكتر حاجة فرحتنى انى عرفت ان فيه لسه حد عارف معنى الجمال اما السؤال الاول مش هجاوب عليه مش لانه صعب ومحير بس لانى لوقلت جزء من القصيدة بس بقيتها هيزعل منى ......... اما السؤال التانى اصعب بس انا هجاوب عليه وانا بهدى القصيدة لتلاتة:اول حد هى اغلى واحب الناس الى قلبى وهى امى ملاك بيتنا اللى من غيرها البيت مايسواش وعشان كده انا بهديها الى جانب القصيدة الدعاء ده ويارب كلكوا تدعوا بيه معايا لامى ولكل الامهات والابهات ..اللهم ارحم والدى كما ربيانى صغيرا...آمين اماتانى حد فهم اطفال اللوكيميا ومش بس اطفال اللوكيميا بس كل اطفال الاورام لانهم بجانب اجتماع الفقر والمرض فى كتير منهم كمان اجتمع فيهم اكتر حاجة مؤلمة فى الدنيا وهى السرطان اللى الامه مابيتحملهاش الكبار فمابالك فى حد فى برائتهم وعشان كده انا بادعى ان ربنا يجعلنى فى يوم من الايام من اسباب ابتسامتهم.. يارب ... اما الحد التالت هو كل المصريين اللى قتل ابتسامتهم الجوع والغلاء والفقر .. يارب يخلى ابتسامتهم او يارب ارجع اشوفها تانى وخصوصا فى مستشفى الجامعة!!!! اما بقى وبما انى مابعرفش اكتب شعر فهسيب لحضرتك كلام خير الانام صلى الله عليه وسلم ...تبسمك فى وجه اخيك صدقة... وانا برضه بحب افكر نفسى وافكر الزملاء بكلمة احد عظماء الحروب صلاح الدين الايوبى ..كيف اضحك والاقصى اسير.. وعشان ماضيعش كل درجة السؤال الاول هقول لحضرتك ولكل الزملاء ...ربنا يخلى ابتسامتك...ان شاءالله

Anonymous said...

حلوة القصيده اوي يامحمود كل المقاطع حلة بس لو مصمم نختار يبقى
ابتسامتك نار تدفي
بس ماتحرقش حد
يوم مالمسها بكفي
يوم مااكونانسان بجد
وبهديها ليك ولاخواتي اللي بالمناسبة بيحبوك منحبي ليك ولماما طبعا ولحبيبي اللي مش حاسس بيه

سنووايت said...

جميلة جدا

Anonymous said...

ايه يا جماعه مش ملاحظين ان صاحب المدونه ماردش على اى كومنت فى القصيده دى لعل المانع خير
مش ملاحظين كمان ان المدونه دى عليها اكبر نسبه من المعجبات البنات ياترى ايه السبب؟؟؟؟؟؟؟؟؟؟؟؟
نرجو الرد من صاحب الشأن
--------------

Anonymous said...

بسم الله

بعد اذن الدكتور محمود ممكن ارد علي الاستاذ المحترم صاحب الكومنت اللي فات

اولا حضرتك يا صاحب القلب الابيض اوى مش من حقك تدخل في شئون اي حد زى ما حضرتك اكيد ما مبتحبش حد يدخل في شئونك

ثانيا سيادتك بتسأل ليه الدكتور محمود مردش
والله يا سيدى كل واحد عنده مشغولياته مش فاضي زى سيادتك
بالاضافه ان هو حر يرد او ميردش

ثالثا حضرتك بتسأل ليه معظم الزوار بنات
انت سيادتك علطان اوى لان فيه اولاد كتير بيفهموا بيجوا يزوروا المدونه ويكتبو كومنتات وبما ان حضرتك فاضي فممكن تروح تقري الكومنتات في باقي البوستات
بالاضافه ان الاعجاب من وجهة نظر حضرتك حاجه
ومن وجهة نظرنا حاجه تانيه خالص

يا ريت ردودى تكون بردت شويه

واذا كنت حضرتك مبتعرفشي تكتب شعر والله مش ذنبك بس ممكن تختار اي حاجه بتحبها وتعملها وتبفي كويس فيها وهيبقي ليك معجبين ومعجبات
واذا كنت مبتعرفشي تعمل حاجه خاالص فمجرد تشجيعك لحد اومجرد سكوتك دا في حد ذاته شىء محترم
الكلمه الطيبه صدقه

انا اسفه جدا جدا عن انى دخلت نفسي في الموضوع بس شايفه ان مجرد دفع الظلم عن حد شىء محترم

pure blue
انا اسفه مرة اخرى

هبهوبه said...

ممكن أقول للكومنت الغريب ده اللي هو أصلاً شكله مش من أصدقاء المدونه ده دخيل علينا
إحنا مش بنكتب لمحمود علشان نستنى منه رد إحنا بنكتبله علشان بنحبه وبنحب كلامه وقصايده اللي بتهون علينا كتير من مشاكل حياتنا وبتدينا الأمل وكتابته للبوست كل يوم تلات ده أحلى رد كلنا بنستناه
وبالنسبه لموضوع البنات أعتقد إن إنت بس اللي شايف كده لأن أنا شايفه إن فيه أولاد كتير بيكتبوا وبعدين لو متضايق أوي بلاش تدخل المدونه وتقرأ اللي فيها
علشان اللي يدخلها لازم يحترم صاحبها ويحترم أصدقائها
أنا أسفة يا محمود لأني رديت بالنيابة عنك بس إحنا كلنا أبو العزم

محمود سليمان ابو العزم said...

السلام عليكم ورحمة الله

ازيكم كلكم يا جماعه
انا آسف اني مش رديت على واحد واحد
بس غصب عني والله
فرح اختي عقبال عندكم جميعا يوم السبت
وكمان الامتحانات اللي مش عارف هعمل فيها ايه
انا كنت بقرا الردود كل يوم وبفرح بيها جدا
ومتشكر اوي على كل كلمة حلوة اتقالت
ويارب الاهداء يكون وصل لكل الناس اللي بتحبوها
يمكن الفترة الجايه ما اكونشي موجود بانتظام على المدونه
بس هحاول على اد ماقادر اكون موجود ان شاء الله


الاخ او الاخت اللي كتب الكومنت اياه
اولا كنت اتمنى تكتب اسمك لو انت اد الكلام اللي انت كاتبه وحاسس انه مش غلط
كنت اتمنى تبقى عندك الجرأه دي وماتخافشي انا بتقبل النقد بصدر رحب جدا
بالنسبه لموضوع التاخير في الرد
فانا شرحت فوق ليه
وكمان عشان احيان كتير اوي بحس ان الردود اكبر من اي كلمة ممكن انا اكتبها

اللي زعلني في كلامك ان الاساءه مش لي
دي لناس انا بعزهم وبحترمهم جدا
رغم اني مااعرفشي معظمهم
بس اعرفهم هنا كويس اوي
انا مااعرفشي مين هبهوبه ولا مين عندما تنهمر الدموع ولا مين انسان ولا مين طيور الجنه ولا مين اميرة الحزن ولا مين همسات داعية ولا الروشه ولا ناتشورال ماجيك
تقريبا اعرف ربع الناس هنا بس
بس كل الناس اللي قلتهم دول وكل الناس اللي ماكتبتش اسمهم وكل الناس اللي انا اعرفهم شخصيا
كلهم بحترمهم جدا وكلهم زي اخواتي
حتة بنت او ولد ماتفرشي في حاجه
لان بجد كلهم زي اخواتي
وفرحت اوي لما همسات داعية قالت على المدونه رابطة الحب
حتى ولو مابين ماتعرفشي بعضها
بس حاولوا يقولوا اللي جواهم ولو في رد صغير
وبفرح لما الاقي حد كاتب اللي جواه في رد ممكن يكون حتى احسن من البوست اللي انا كاتبه
وبفرح لما الاقي الناس اللي علقت هنا راحت علقت عند علام وفرج ورنا وعمر واحمد سعيد وهدي
لان كلهم اخواتي
ونجاحهم من نجاحي
وحتة بنت او ولد مش هتفرق
المهم انه حد بيحس
حد عنده استعداد يدي فرصه لمشاعره في عالم حرمنامن الفرصه دي

احنا هنا رابطة الحب
كلنا اخوات ومش عايزين من بعض حاجه غير الحب في الله ولله
لو عايز تشرفنا على كده اهلا وسهلا بيك
ولو الكلام مش عاجبك
يبقى بلاش تتعب نفسك وتقراه
وبلاش تقول كلام ممكن يجرح حد من غير ما تحس

وفقنا الله وهدانا جميعا

semsema said...

ألف مليون مبروك يامحمود لدكتورة مي صح ولا أنا غلطانة
وعقبال لما نفرح فيك قول آمييييين
أحييك علي ردك علي صاحب أو صاحبة الكومنت إياه
اللي هو أكيد ميعرفش يعني إيه حب وأخوة في الله
أدامها الله بين أفراد المدونة جميعا
ووفقنا الله لما يحب ويرضي
تحياتي

Anonymous said...

مبروك لاختك ياشاعر وعقبالك كده مع اللى بتحبها ياااااااااااااااااااااااااااااااااااااااااااااااااااااااااااااااا ااااااااااارب
)شوفت باة كل دى دعوة ازاى
يمكن السماء تكون مفتوحه دلوقتى وتستجاب لامنيتك
صحيح مش هتعزمنا على فرح اختك هههههههه
عالعموم مبروووووووووووووووووك بس مش عارف ازاى هتذاكر اطفال اكيد الجو فى البيت مش مظبط خالص وانت لاحول لك ولا قوة

natural magic said...

مبروك يا محمود لاختك دكتوره حنان؟صح ولا ايه
وعقبلنا كلنا جميعا ميييييييييييين يا رب

Anonymous said...

السلام عليكم
بجد قصيده اكتر من رائعه ودا مش جديد على حضرتك .
واكتر مقطع عاجبنى هو
ابتسامتك
يا اللي حــــبك نور عينيّ
ياللي جوة الروح رسمتك
دعوة من قلبي وعيــــنيّ
ربنا يخلـّي..... ابتسامتك
وبهديها لابن اخى.
n_e_m

سالم صلاح سالم said...

روعه يابني والله.
أنا فعلا بزعل من نفسي كل لما بدخل مدونتك دي.
بصراحة بحس إني ممكن أحسدك وأنا مش بحب أحسد حد والله، ما شاء الله عليك ربنا يبارك في قلمك.
___
أحسن مقطع عجبني :-
ابتسامتك طـــــير مرفرف
مهما طار أســـمى و أسمى
باني جوة القــــــــلب عش
في ابتسامتك نفسي أعرف
هو فـــــــوق الوش بسمه؟؟
ولا فوق البســـــــمة وش؟؟
____

رحيل said...

مبروك يا دكتور محمود على زواج اختك ومعلش ماتزعلش من الردود العقيمه فالشجرة المثمرة هي التي ترشق بالحجارة :) ....

little angel said...

الف الف مبرووووووووووك يا محمود ربنا يتمم لها بخير وعقبالك يارب ..وربنا يديم افراحك ..تحياتى

Anonymous said...

السلام عليكم ورحمه الله وبركاته
الف مبروك لاختك يادكتور محمود وشد حيلك في امتحان الاطفال ان شاء الله ربنا هيوفقك وهيكرمك بس بلاش تتاخر علينا في البوست الجديد احنا بنتقل عليك بس خلاص احنا اتعودنا ان كل اسبوع بنقرالك بوست جديد
ربنا يوفقك ويكرمك ويكرمنا كلنا ان شاء الله في الامتحانات
dr_A

هبهوبه said...

السلام عليكم
أنا الحقيقة مش عارفة ناس قالوا دكتورة مي وناس قالوا دكتورة حنان
بغض النظر انا هسميها العروسة
ألف مبروك ليها ربنا يفرح قلبها ويباركلها ويسعد كل أوقاتهابس لازم توصلها مباركة كل أصدقاء المدونه
وعقبالك وربنا ينصرك دايماً على أعداء النجاح ويكفيك شر عينهم
بس أنا عايزة أقترح عليك إن البوست الجاي يكون إهداء لأختك بمناسبة فرحها
علشان تعرفها إن البيت هيكون مظلم بعد ماتمشي وتروح تنور بيت عريسها وربنا يوفقك ويوفقها
أنا أسفه على الرغي ده وكومنتاتي الكتير دي

محمود سليمان ابو العزم said...

ربنا يبارك فيكم كلكم يا جماعه
عقبالكوا كلكوا يارب
ربنا يرزقكم جميعال حريم ورجاله بالقلب اللي يسعدكم ويحافظ عليكم
وان شاء الله يمكن يكون الاسبوع الجاي قصيدةة زي ماهبهوبه قالت
بس يوم الاربع بقى بعد امتحان الاطفال ان شاء الله
جزاكم الله كل خير يا جماعه

أستئذنكم بس أرد على الكبير.. أمير المشاعر عم سالم
كلمتك كبيرة اوي على اوي يا عم سالم
انا شخصيا وبصراحة كده بحسدك
ولما توشفني ابقى اقري قل أعوذ برب الفلق
المقامات محفوظه يا كبير



دمتم بكل خير
على وعد ٍ باللقاء ان شاء الله

محمود سليمان ابو العزم said...

نسيت بس اقول انا اختي اسمها حنان مش مي

اسم على مسمي والله
مش عارف البيت من غيرها هيبقى عامل ازاي
ربنا يسعدها يارب
عقبالكوا جميعا

Anonymous said...

بصراحة القصيدة جميلة بس ياترى مين ا المقصودة بيها ياريت تقوللى عليها او تقوللى اى امارة يمكن اكون اعرفها وادلك عليها

محمود ابوالعزم said...

''''

محمد السقا said...

بسم الله
قصيده جميله يا محمود انت مش محتاج راييى انت بامانه موهوب بجد وربنا يكرمك ويوفقك ان شاء الله
بالنسبه لاكتر مقطع عجبنى فكلها جميله ماشاء الله

لو قعــــــدت سنين بطولها
برضو مــــــش هقدر أعبّر
أي كلــــمه أكــــيد هقولها
ابتسامتك برضــــــــو أكبر
اما اهديها لمين فمالكش دعوه ما يخصكش
محمد السقا