حتى يعود الثلاثاء

Wednesday, October 8, 2008

السلام عليكم ورحمة الله
اتأخرت كتير أنا عارف
معلهشي اصلي كنت بحضر موضوع للمدونه عن المدونه
اسمه الثلاثاء يعود
كانت وقفه طويله مع نفسي ومعاكوا قبل مرحلة جديده في عمر المدونه
وكانت هتبقى بدايه لعودة تدوينات الثلاثاء ان شاء الله
بس اليومين اللي فاتوا جاتلي فرصة شغل في شرم الشيخ
واحتمال اسافر ان شاء الله
هو لسه احتمال صغير
بس قلت أأجل الموضوع حتى يقضي الله أمرا ً كان مفعولا
خصوصا اني مش عارف هلاقي في الحتة اللي هشتغل فيها نت ولا لا
ولحد ما ما الموضوع يبان
هنشر اخر جزء من البوست ده
هو مش استفتاء بمعنى استفتاء
بس رايكم هيفرق معايا كتير جداجدا جدا جدا جدا...من هنا لحد الصبح

مستعدين؟؟؟
ياتري ايه اجمل بوست قريتوه هنا على المدونه؟؟

وايه البوست اللي ماكنتوش تحبوا تقروه هنا

ياتري من الحاجات اللي كتبتها هنا لو جت سيرة المدونه ادامك
ايه اول بيتين او اول جمله هتيجي في دماغك
اللي ممكن تكون علقت معاك اوي

ايه الحاجه اللي شايفها في المدونه ونفسك تفضل موجوده

وايه الحاجه اللي موجوده ونفسك ماتشوفهاش

اكتر حاجه بتحب تقراها هنا
الشعر الديني اللي زي الآن تبتسم الدموع وقلوب في طريق النور
ولا الفكاهي شويه اللي زي الفوطه وبتوع آداب
ولا اللي بيقولوا(بيقولوا)عليه رومانسي زي أرجعلها و كوني أنا
ولا الجمل اللي زي زي همسات من رحيق الماضي
ولا الجمل الهزليه شويه زي فيكتيمز

ياتري انت بتشوفني بكتب كويس فصحي ولا عامي ولا مابعرفشي اكتب خالص

رجاء خاص
ماحدش يقول انت كل اللي بتكتبه حلو يا محمود
خلوا الاستفتاء ده بجد يكون دليل لي في الفتره اللي جايه
ولو اي حاجه مضايقه اي حد يقول بصراحه وانا مش هزعل والله
ورجاء كل الناس تشترك في الاستفتاء ده
حتى الناس اللي انا عارف انهم مش بيحبوا يعلقوا
ومش شرط يكتبوا اسمهم لو مش حابين
هتستنى رايكم بصراحه ومن غير ذرة مجامله
ولو حد عنده اي اقتراح بخصوص المدونه يقوله
او حاجه غلط شايفها في المدونه ياريت يقولها
اتفقنا



24 comments:

شق القمر said...

احم احم
انا بخبط الباب بس
لانى صعب على الحفظ وسهل جدا النسيان
حتى انى لا اعيد على نفسى ما كتبت عندى ولا اتذكره عشان كده قلت المدونه تفكرنى


بس عامة وأنا ليس لى دخل فى شخصيتك
ولا أعيب فيها شيئا حاشا

إنما لا أحب التردد الذى يملؤنى أيضا

بس بحب الثقة اللى بشوفها ولو فى تعليق واحد بس

فمكنش لازم الموضوع دا أصلا محمود

مرة قبل كده كتبت عن موضوع عندى انه احلى موضوع انا كتبته ... فرد على أخى لى مثلك وقالى

احنا اللى نحكم مش انتى

أوافقه ولكن أزيد بشىء
أنى أنا من أكتب أيضا لى حكم مثلكم

ولو واثقة من شىء كتبته ولو الكل قال لا بقول برده عاجبنى

ولو مش حابه حاجه وحد قالى حلو بقوله شكرا .. رفعت معنوياتى

عرفت ليه مكنش مفروض تحطه

انت تمشى وتكمل على طول

من غير ما تبص وراك
او تسأل هو كان دا حلو ولا لا

قول انا اتحسنت ولا على نفس المستوى

مش اللى كتبته كان احلاه ايه

اتمنى تكون فكرتى وصلت


كل سنه وانت طيب

وربنا يسعدك ويوفقك فى اجازتك

ولو رحت شرم ابقى اتبخر كتير
حتى ولو رايح فى شغل فـ كفايه انك فى شرم

:))

natural magic said...

السلام عليكم
انا هبدأ باكتر حاجه ضيقتني في المدونه 0نبتدي بالوحش ونحلي بالحلو
البوست اللي قولت فيه انك هتقفل المدونه دااسوء حاجه حصلت هنا
اما بقي الكويس فحدث ولا حرج بجد انا بحس كل حاجه بقراها ليك
بس اكتر حاجه بتوصلي اللي باللغه العاميه في اي موضوع بقي رومانسي او فكاهي اوي اي موضوع
انا طبعا مش خبيره في الشعر ولا الاوزان والكلام دا
انا بقول الاحساس اللي بوصلي
وملحوظه صغيره لرنا ..متهيقلي ان راي القراء في حاجه انتي بتكتبيها مهم ويمكن يفتح عنيكي علي حاجات انتي مش شيفاها في نفسك بس طبعا لازم قبل كل دا تبقي انتي اللي واثقه في اللي تكتبيه
واخيرا ربنا يوفقك يا محمود
سلام

عمر said...

أولا ... تروح وتيجي بالسلامة يا حودة ، وربنا يعينك وييسرلك أمرك ويهون عليك طريقك

ثانيا ... هو تشبيه جه في دماغي - موضوع (بوست الثلاثاء) ده بيفكرني بحديث الثلاثاء الشهير للإمام حسن البنا مؤسس جماعة الإخوان المسلمين ، وأوجه الشبه متعددة منها : شعبية وجماهيرية بوست الثلاثاء في (رحلة إلى نفسي) نسبة إلى زوار البلوجرز ، تشبه الشعبية الجارفه لحديث الأستاذ حسن البنا الذي كام ينتظره الناس كل ثلاثاء ، بالإضافة إلى تشابه الاسم ، ووصول الكلام من القلب إلى القلب في الحالتين ، تعقيب - أنا أشهد إن مالكش دعوة بالكلام اللي أنا قلته ده ...ههه

ثالثا ... بالنسبة للاستفتاء فبصراحة الموضوع عايز له قاعدة وما ينفعش نكروته كده ، ولا أخفيك سرا إن أخبرتك أني أستمتع بقراءة أشعارك في المدونة بالكامل مرارا وتكرارا ... انتظر إجابتي في الاستفتاء قريبا

خالص حبي وتقديري وتمنياتي

Anonymous said...

السلام عليكم
اولا اعيد انا عليك يا دكتور واقولك ولكل الناس الجميله اللى بتدخل هنا (كل عام انتم الى الله اقرب وعلى طاعته ادوم ومن الجنه ادنى وعن النار ابعد ان شاء الله وانا كمان )
شوف باه يادكتور انا من يوم ماعرفتك بجد وبدون مبالغه عرفت ازاى اعيش حياه وانا فاهمه كل حاجه فيها عشت من كلماتك الراقيه الحساسه دى حياه جميله فيها روح بتناجى ربنا ساعات حينه بس حزنها لذيذ حياه بمعنى حياه فعلا
كمان معاليك عيشتنى لحظات صعبه جدا لما حسيت انو الحياه دى هتنسحب منى لما جيت ال ايه عاي تقفل المدونه (تقفل ايه ياعم الدكتور هى كانت بتاعتك )بس الحمد لله ربنا محرمناش منها ومنك
بجد بجد بجد يا حوده كل كلامك جميل وحساس وكتير بحس انو بيعبر عن حاجه جوايا حاجه لمسانى فعلا
عارفه انى رغيت كتيــــــــــــــــــــــر بس والله دى حاجه قليله جدا من اللى جوايا وزى ماانت قلت انو الحب بيزيد كلما زاد عدد المتقاسمين فيه ادام الله هذا الحب بين كل المسلمين
وربنا يخليك لينا ولجموع المعجبين دول يا دكتور
F.A

dina said...

السلام عليكم
موضوع صعب يا محمود بس هحاول اجمع
ابتدى باللى بحبه
نظرتك معناها ايه
و يور هارت كان ريترن باك
و حب الله هو اعظم دواء
و موضوع ايات القران فى رمضان
وموضوع ليله القدر ده له مكانه خاصه وجزره
اما فى موضوع بقى يعنى بجد جميل
بتاع المكياج ده مش فاكره اسمه

اما عن الوحش
ف مش اعتقد انى شفت كلمه واحده ضايقتنى على المدونه هنا
الا بوست انك هتقفل المدونه ده

صدقنى محدش دخل المودنه بتاعك ومش حبها ولا احترمك
وحب الناس حتى لو مش تعرفهم نعمه من ربنا ربنا يديمها عليك
وربنا يوفقك دايما وفى شغلك

Anonymous said...

اولا خللى بالك من نفسك وانت مسافر اصل المزز هناك جامدين اوى يامان
يابختك ياباشا
:)
وتانيا
عندك الرومنسي جامدوالفكاهى مش اوى فى ساعات استظراف
بس مش دايما
والباقى خلو
بس عاوز زقه معنويه لانك معندكش ثفه اوى فى تفسك وده مش حلو
بسسسسسسسسسسسسسسس ياباشا
لكن استمر الوضع تمام

little angel said...

ازيك يا محمود والاجازة معك ايه .. ربنا يوفقك فى شغلك وتبقى سعيد على طول يارب
اه فعلا انت ما شاء الله ربنا يزيدك مش محتاج راى والله بجد واهم حاجة اللى بتكتبه بيوصل لقلب الناس كلها وطبعا انا مش ضليعة ولا لغوية كل اللى اقدر احكم بيه عليك انى باحس كل كلمة كتبتها وبيوصلنى معناها وباعيش مع كل حالة ليك..واى ما تكتبته رائع وتجيد التعبير عنه ورسمه سواء الدينى او الرومانسى او الفاكاهى العامى
لكنى بصراحة جدا احب جدا كتبابتك الصوفية الزهدية ..وباحب من الاعامى جدا نسى الفوطة..

واجمل حاجة وفعلا نفسى اخدهم منك واوعى تطنش رجائى ده ..خواطرك كلها يا محمود سواء الحكيم منها او وصف حالة الحب او حال الدنيا ده بلاقى فيها عصير الحياة
فى النهاية كلما اقرا لك احيانا اجد نفسى واحيانا اشعر انك تتحدث بلسانى ما عجزت ان اقوله ..تحياتى ايها المبدع

عندما نحب؟ said...

السلام عليكم
ربنا يكرمك يارب يامحمود ويوفقك
مكنتش عايزه اقولك كل كلامك وخواطرك وقصايدك حلوين زى ما انت طلبت وعشان متحسش اننا بنبالغ
بس فعلا هى دى الحقيقه
اكتر حاجه بتعجبنى
الكلام اللى زى همسات من رحيق الماضى
بحس انه بيدينى حكم فى حياتى
وكمان قصيده هكذا تمنيت ان احب
انا فعلا اتمنيت اتحب الحب ده
اللى قبل ميكون الانسان بيحب انسان يحب ربنا قبله ويراعيه فى حبه
ربنا يوفقك يامحمود ويكرمك

quiet_storm said...

السلام عليكم ورحمه الله
انا جبت المدونه من الاول تانى عشان ادرو على حاجه مش عجبتنى لكن لقيت ان الحاجات اللى بحبها زادت اكتر ما انا كنت فاكره
*الان تبتسم الدموع*
*ارجعلها*
* انا وانتى وذاك الصمت*
* شموع لاتنطفىء*

وجمله منها فعلا دايما على لسانى ولو فتحت كتب السنه اللى فاتت هتلاقيها مكتوبه كتير

فرسائل الروح التى بيننا
لا شىء يمنعها الوصول

وكتير من الجمل والكلمات اللى بتكتبها بتلمس كل واحد فينا..فلازم تعجبه

العامى اللى بتكتبه دمه خفيف على قلب الكل وانت بجد متميز فيه اوى
لكن برده الفصحى عجبنى جدا جدا وانت اثبت فيك نفسك فى قصائد كتير

الدينى والمناجاه والفكاهى والرومانسى
كله بجد منك بنقبله وكمان بنحبه
لانه بيطلع من القلب فاقل حاجه ليه انه يوصل للقلب غصب عننا يعنى



بص يامحمود انا نفسى اقول حاجه مش عجبانى بس دورت دلوقتى ومش لقيت
لكن البحث سيظل جارى لحين الوصول للحاجه دى
:D;;)

يارب ان شاء الله دائما موفق فى حياتك كلها وتقضيها فى طاعه ربنا
ومن ابداع لاخر
وفى انتظار القصيده الجديده ان شاء الله

محمد عبد الباسط said...

يتحرجنى يا محمود بس فى الحقيقه كل كتباتبك رائعة
هحاول ارد على اسئلتك وربنا يقدرنى بقى هههههههههههههه

ياتري ايه اجمل بوست قريتوه هنا على المدونه؟؟
بتاع رجلك المكسورة ياعم .. استريحت
البوست اللي ماكنتوش تحبوا تقروه هنا؟؟
لا والله دا انا حتى بنتظر كتباتك وكلها رائعه

الحاجات اللي كتبتها هنا لو جت سيرة المدونه ادامك
ايه اول بيتين او اول جمله هتيجي في دماغك
اللي ممكن تكون علقت معاك اوي
قصة قصيرة رجل عاش مات كلنا ابطال هذه القصة من ساعة ما قراتها منستهاش وربنا يعافينا من القصه دى

ايه الحاجه اللي شايفها في المدونه ونفسك تفضل موجوده؟
الحاجه الجميله كتباتك وفى حاجه اتشرف بيها ان مدونتى تبقى على مفضلتك تبقى ميه ميه ههههههههههه

وايه الحاجه اللي موجوده ونفسك ماتشوفهاش
اللون يامحمود لون المدونة مش عاجبنى بس طبعا ده مجرد راى شخصي

اكتر حاجه بتحب تقراها هنا
بالترتيب الفكاهي الدينى الرومانسي

ياتري انت بتشوفني بكتب كويس فصحي ولا عامي ولا مابعرفشي اكتب خالص
فصحى منك بيوصل للقلب اكتر

عايز اقول كلمتين
اول كلمه ده مجرد راي شخصى ولو اختلاف الاذواق ...

تانى كلمه كنت ممكن اجاوب على اسئلتك بطريقة تحبطك يعنى مثلا ايه احسن بوست عجبك هاقول لك هو انت اصلا بتعرف تكتب ولا انت هتصدق نفسك
عايز اقول لك ان راى الناس فيك لازم ودايما تخليه بعد رايك الشخصى فى نفسك ولا تلتفت لاراء الاخرين

كان فى مفكر اجنبى بيقول لا تتحدث عن نفسك يطريقة سيئة امام الناس وتحدث بطريقة جيده عن نفسك امامهم لان الناس سيتكلمون عنك بطريقة واحده انها الطريقة السيئة

طولت بس هتوحشنى لو رحت شرم او لو فضلت بيتكم تقبل تحياتى يا كبير

dr.m.el-khatib said...

بسم الله الرحمن الرحيم

أزيك يامحمود باشا

والله بجد بجد واااااااااااحشنى جداااااااااااا

انا هكلمك على حاجة بس ياريت ياريت متزعلشى

اكتر حاجة مش بتعجبنى فى الشخص

انه ميكونش واثق من نفسة

الثقة بالنفس حاجة مهمة

ومهمة لينا كدكترة

عشان تعرف ازاى تاخد قرار وازاى تحدد مصير بنى ادم هيتعالج وهيكونواثق فى كل كلمة بتقولها

الثقة بالنفس تعريف مطلق وشامل

مش مجرد انى ابقى حلو وامور

لالالالالالالا

المهم انى اعرف اتصرف لما اتحط فى موقف محتاج قرار سريع وحكيم

والاهم من كده انى ابقى مقتنع بالقرار اللى انا اخدتة

توماااااااام ولا اية ؟؟؟؟؟

المهم المهم

خليك واثق من نفسك اكتر من كده

لانك بجد تستاهل اكتر من كده بكتير

انت شاعر قوى اوووووووى

حس بنفسك بقى ياأخى



عموما هردلك ياعم



ياتري ايه اجمل بوست قريتوه هنا على المدونه؟؟

بجد بجد

بوست بلسم

كانت قصة فوق الخيال

وخلتنى اعيط كتييييييييير


كمان بحب اوى

احنا مبنبالغش

ارجعلها

نظرتك معناها اية

هكذا تمنيت ان احب

جاموستنا ولدت

بالعند فيهم
واحد صاحبى (( أحمد فاروق بتاع اسرة انسانية ))
لما قرأ القصيدة دى قاللى بالنص

"انا ايدى اتهرت من التصقيف الراجل ده ملهوش حل بصراحه يا خطيب متمكن جدا بشكل احترافى ومحترف بدرجه تفوق التمكن"
ملحوظة .... احمد فاروق بيكتب عامى جامد جدااااااااا برده
فدى بجد شهادة تعتز بيها


بصراحة كل حاجة بتكتبها بتعجبنى اووووووووووى

ـــــــــــــــــــــــــــــــــ

البوست اللي ماكنتوش تحبوا تقروه هنا؟؟

همممممممممم

لا مفيش

انا بقول ان انت دلوقتى احسن واحد بتكتب عامى على الاطلاق

مش عارف كده يعنى

بتكيف وانا بقرأ الشعر العامى بتاعك

وزن وقافية وكلمات واحاسيس

شغل عالى أوى يعنى

واحسن حاجة انه شغل على كبير

شغل احتراف يعنى

مش مجرد هاوى بيكتب

انت تعديت الهواية دى مخن زمااااااااااان

انت فعلا دلوقتى محترف بجد

ــــــــــــــــــــــــــــــــــ

ايه الحاجه اللي شايفها في المدونه ونفسك تفضل موجوده؟

انت يامحمود

لما بفتح المدونة كأنى بفتح باب اوضتك

وبلاقيك وبلاقى روحك فيها

ـــــــــــــــــــــــــــــــــ

وايه الحاجه اللي موجوده ونفسك ماتشوفهاش

التردد ........!!!!!!

دووووووووووووس ياعم على طووووووول

ــــــــــــــــــــــــــــــــــ

اكتر حاجه بتحب تقراها هنا
بالترتيب الفكاهي الدينى الرومانسي

الرومانسى

الفكاهى

الدينى

ـــــــــــــــــــــــــــــــــ

ياتري انت بتشوفني بكتب كويس فصحي ولا عامي ولا مابعرفشي اكتب خالص

انت بجد بتكتب كلة باحتراف يفوق الخيال

بس اللى بيكتبوا فصحى ومتمكنين فيها كتيييييييييير

اما العامى صعب انك تلاقى حد محترف بالطريقة دى

انا عن نفسى بحب العامى اكتر

وبكتب عامى على قدى يعنى

وبكتب خواطر فصحى

ومع ذلك بحب العامى اكتر بكتييييييييييير

بحس انه بيوصل للقلب على طووووووول



على فكرة محمد عبد الباسط قال كلام ذى الفل فى اخر رده

بجد عجبنى اوى


يامحمود بيه

متلتفتش لآراء الاخرين

ومش معنى كده انك متاخدش رايهم

لكن فى نفس الوقت

متخليش كلامهم هو اللى يمشّيك

اقتنع بنفسك

وقولها لنفك دايما

انا واثق فى نفسى

هبهوبه said...

السلام عليكم
يارب لو كان شغل شرم فيه خير ليك ربنا يكرمك بيه
انا هحاول ارد على اسئلتك الصعبه من غير مااقولك ان كل حاجه بتكتبها بتبقى جميله
انا بحب جداً بوست حب الله اعظم دواء لأنه بيحمل معاني رائعه في اطار خفيف
واكتر بوست مش حبيته يوم ما قررت انك تنهي المدونه لإنها مش ملكك لوحدك
واكتر حاجه بحب اشوفها في المدونه وبتمنى انها تفضل موجوده
هي انت يا محمود لأنك احلى حاجه فيها
واللي بيضيقني ومش عايزة اشوفه تاني هو احساسك بعدم الرضا عن نفسك وعن كتاباتك
لأنك انسان جميل وكل كلامك حلو جداً
وبالنسبة للفصحى والعاميه انا بحبك تكتب زي ما بتتكلم عشان كلامك يطلع من القلب يدخل القلب بسرعه
واكتر جمله بفتكرها دايماً
اذا كانت اعمارنا تحسب بلحظات السعاده التي عشناها فعمري اقل من الوقت الذي تقرأ فيه هذه الجمله واذا كانت اقدارنا تقدر بما فعلنا من خير فقدري اقل من حجم النقطة التي وضعتها في نهاية هذه العبارة
انا بحب كل القصايد الدينية لإنها بتدينا امل وبتريحنا
والفكاهي بيرسم على شفايفنا ابتسامه ضاعت وسط الزحمه
والرومانسي بيحرك مشاعر قلوبنا اللي جمدها الزمن
يارب اكون قدرت اجاوب على اسئلتك
بس لأن كلنا واحد يبقى لازم انت كمان تشترك في الإستفتاء ده وتقول رأيك
احنا هنستنى عودت الثلاثاء وماتقلقش اكيد شرم فيها نت ربنا يوفقك ويرزقك كل الخير.

عندما تنهمر الدموع said...

السلام عليكم ورحمةالله وبركاته
ازيك ياد\محمود يارب تكون بخير بصراحة الاسئلة اللي حضرتك سألتها صعبة جدا لكن قدر الامكان هحاول اقول رأيي بصراحة اولا كنت عايزة اقول ان اول قصيدة قرأتها لحضرتك كانت قصيدة ثوب العفاف اللي كنت نشرتها في معرض الكلية السنة اللي فاتت ومتتصورش اد ايه عجبتني القصيدة دي وهي اللي شجعتني اني افتح المدونة واكون من اصدقاءها
اكتر قصيدة حبيتها في الشعر الرومانسي هكزا تمنيت ان احب واللي فعلا زعلت عشان حضرتك شلتها من المدونة انا فعلا مقرأتش ايه الكومنتات اللي اتكتبت فيها لكن كنت ارجو ان حضرتك متهتمش بأي حاجة اتكتبت المهم ان القصيدة ناس كتير حبتها واعجبت بيها وانا واحدة منهم
اما بقى القصايد اللي فيها حزن وألم فكلها بحبها جدا خصوصا قصيدة مجروح ولكن وايضا انساها ولا ارجع لها والقصايد الرومانسية بحب فيها جدا معنى الوفاء
اما القصايد الدينية اكتر حاجة حبيتها الان تبتسم الدموع والقصيدة اللي حضرتك كتبتها في ليلة القدر
في بقى ابيات كنت حضرتك كاتبهم بيأثروا في جدا وعمري ما بنساهم ودايما على بالي اللي هم
ياما ناس بتكون قرايبك
عمرهم ما يشيلوا همك
ياما أكتر حد ظالمك
يبقى خالك ولا عمك
ياما فيه انسان غريب
تلقى حضنه بسرعه لمّك
و أما يبقى ما بينكوا عشرة
يبقى من لحمك ودمك
في كمان مجموعة جمل بحبها اكتر من غيرها
ما أصعب أن يقتلك القلب الذي كنت تتمنى ان يحيي فيك الأمل من جديد
ما أصعب أن تكون لا شئ في حياة من تراه كل شئ
اذا كانت اعمارنا تحسب بلحظات السعاده التي عشناها فعمري اقل من الوقت الذي تقرأ فيه هذه الجمله واذا كانت اقدارنا تقدر بما فعلنا من خير فقدري اقل من حجم النقطة التي وضعتها في نهاية هذه العبارة
فعلا جمل دايما في بالي
اخيرا البوست اللي مكنتش اتمنى اشوفه في المدونة هو البوست اللي قررت فيه تسيبها والحمد الله حضرتك شلته كمان بصراحة بوست النهاردة مش عشان حاجة بس انا ليا رأي ياريت متزعلش منه جميل انك تحب تعرف رأي الناس في اللي بتكتبه وتسمع اقتراحتهم عشان تحاول تتطور من مستوى شعرك وتتجاوز عن اي خطأ صدر منك سهوا بس المشكلة اني لما قريت البوست حسيت فيه بنبرة يأس او عدم ثقة في كل اللي بتكتبه وده اللي معجبنيش يمكن حضرتك مكنش قصدك كده من بوست النهارده يمكن انا فهمت غلط بس سامحني حضرتك اللي ادتني الاحساس ده لأن بقالك فترة بتقول ان اي حاجة بتكتبها مش بترضيك هو جميل ان يكون الانسان متواضع بس مش معنى كده انه يفقد الثقة في نفسه
يارب تكون فهمت قصدي ومتزعلش من كلامي وربنا يوفقك

باجوجو said...

بص بصراحة بقى أنا هقوللك الحقيقة بس يار ب متزعلش

يا حودة انت اسئلتك بجد أصعب من الام سى كيو بتاعة الباطنة

بجد كل موضوعاتك جامدة جدا

انا اسف مش هقدر انقى لأن لو نقيت هظلم بقيت المواضيع

بس انا بيعجبنى فيك الشعر الفكاهى أكتر من الدينى

ربنا يوفقك فى شغلك حياتك وترجع بالسلامة

تقبل تحياتى

Anonymous said...

السلام عليكم ازيك يا دكتور محمود يا رب تكون بخير وكل سنه وحضرتك طيب وكل اللي هنا كلهم طيبين انا معلش ببعت الرد متاخر لاني بجد مكنتش هبعت رد المره دي لاني مش عارفه اختار ايه ولا ابعت ايه بس حضرتك طلبت بقي واحنا لازم نلبيلك رغبتك طبعا اولا العنوان كويس جدا بجد ونفسنا فعلا ان يوم الثلاثاء يرجع زي زمان علشان ما اطولش عليك
انا بحب جدا جدا جدا الا مالا نهايه اقرا لحضرتك الجمل زي همسات من رحيق الماضي والجمل اللي فيها لمسات حزن شويه بتبقي اكثر من رائعه واكتر جمل بحبها هي
اصعب انواع الدموع هي الدموع التي لم تستطع رغم حزنك ان تفارق عينيك
ما اجمل ان تجد نفسك في عيون كانت هي الاخري تبحث عن نفسها في عينيك
وجمل كتير وعلي راسهم طبعا اهم جمله بالنسبه ليه بكتبها في كل حته دايما

اذا لم تستطع ان تكون مستقبلا باسما في حياه من تحب فعلي الاقل حاول الا تكون ماضي مؤلم

اكتر البوست اللي بحبها اخر بوست كان رائع هديه ليله القدر وهمسات من رحيق الماضي ونظرتك معناها ايه وكمان هكذا تمنيت ان احب ولو حضرتك فاكر انا طلبت منك انك ترجعه تاني لانه بوست جميل جدا جدا

من المواضيع اللي ابكتني جدا هو اول موضوع قراته علي المدونه هنا ليه هو

عذرا غلبتني دموعي وشموع لا تنطفئ

حضرتك بجد موهوب في كتابه كل انواع المواضيع ولو اني اتحيز شويه للهمسات بحس انها بتطلع من القلب اوي اوي وبحسها اوي ربنا يزيدك

اما البوست اللي ما كنتش احب اني اشوفه هو البوست اللي حضرتك كنت هتسيب المدونه فيه وده متفق عليه من الجميع

الحاجه اللي بحبها وشفتها هنا هيه حب الناس لحضرتك ولكلامك وللروح الحلوة اللي موجوده هنا

والحاجه اللي ما احبش اشوفها مفيش لاني بحب ادخل هنا علي طول وبستريح جدا لما ادخل واقرا المواضيع اللي بحبها والمواضيع اللي ما كنتش قراتها

اتمني لحضرتك التوفيق دايما يا دكتور محمود والخير دايما ربنا يكرمك ويحفظك ويزيد من موهبتك وكتاباتك الرائعه
ومعلش طولت علي حضرتك اوي

Amert Alhozn

أحمد سعيد بسيوني said...

بسم الله الرحمن الرحيم

ازيك يا محمود
يا رب تكون بخير وبصحة جيدة

اعتذر على التاخير في الرد لبعض المشغوليات ، بس عجبتني الوقفة الجميلة اللي انت عاملها دي لمعرفة اراء زوار المدونة ، عجبتني كخطوة توقف ومراجعه وتصحيح

نخش بقى على الاسئلة

ياتري ايه اجمل بوست قريتوه هنا على المدونه؟؟
من اجمل البوستات اللي قرائتها هنا هي بوست العفاف وبوست الفوطة

البوست اللي ماكنتوش تحبوا تقروه هنا؟؟
بصراحة مش لاقي بوست ممكن اطلق عليه الصفة دي ، لان كل البوستات حقيقي بتعجبنا وبنستفيد منها
بس بوست اغلاق المدونة استغربت منه ، لاني كنت مش عارف القصة اصلا ومازلت ، وفجاة قرات انك عاوز تقفلها ، لانه في رايي ارى فكرة الاغلاق والهروب فكرة غير صائبة وان حدثت بعض الظروف المانعة فلا باس باغلاق مؤقت لفترة محدودة

الحاجات اللي كتبتها هنا لو جت سيرة المدونه ادامك ايه اول بيتين او اول جمله هتيجي في دماغك اللي ممكن تكون علقت معاك اوي
هما 3 حاجات
الاولى
القصة القصيرة .. ولد عاش مات .. كلنا ابطال ، وتمنيت ان نضيف نحن بافعالنا في الحياة جملة " ترك بصمة" قبل الممات
الثانية
جملة في الاشمعنى وهي
التعيين في الكلية .. heredaitry وتذكرتها خصوصا بعد ظهور النتيجة
الثالثة
هي انه من الممكن ان تشتري ايد اصفق لك و ارجل تمشي معك و.... ولكن لا تستطيع ان تشتري قلوب تكن لك الحب والتقدير

ايه الحاجه اللي شايفها في المدونه ونفسك تفضل موجوده؟
المدونة نفسها كلها

وايه الحاجه اللي موجوده ونفسك ماتشوفهاش
مش لاقي حاجة اقولها

اكتر حاجه بتحب تقراها هنا
بالترتيب الفكاهي الرومانسي الدينى


ياتري انت بتشوفني بكتب كويس فصحي ولا عامي ولا مابعرفشي اكتب خالص
انا شايف عامي اكتر والفصحي جميل جدا
امبارح كنت باقرا للعملاق احمد مطر وبصراحة وانا باقراله جيت انت على بالي ، مش عارف يمكن عشان انا حاسس انك ماشي على خطاه في قوة الكلمات وسهولتها وقوة الوزن وبساطته ، اتمنى اشوفك من كبار الشعراء في يوم من الايام

نقطة اخيرة حبيت اقولها وهي ظن البعض انك قليل الثقة بنفسك ولكني وبصراحة ارى عكس ذلك – وانا ممن لا يجاملون - ، بسبب معرفتي الشخصية بك ، كما انه لا يمكن ان تصدر مثل الكلمات الا من واثق ، واني لارى ان ما تفعله هو من التواضع الجميل

تلميحة اخيرة .. نفسي اشوفك في حاجات تانية غير الفكاهي والرومانسي والديني ، حاجات ومجالات كتيرة اتمنى انك تتطرق لها بدون خوف او خجل لان الفنان مرآه عاكسه لواقعه الذي يعيش فيه

انظر هنا
http://belawa6an.blogspot.com/

تقبل تحياتي الخالصة

semsema said...

ازيك يا محمود
اسفة جدا عالتأخير كان عندي ظروف بالاضافة لمشكلة عندي في متصفح الانترنت مكنتش بعرف ادخل علي الكومنتات
انا قرأت البوست ده أول ما انت وضعته
بصراحة يامحمود فكرتني بامتحان الام سي كيو اللي بتنح ادامه ومبعرفش احل حاجة
ايه الاسئلة الصعبة دي
هو سؤال واحد اللي جاوبته بسرعة من دون تفكير
وايه البوست اللي ماكنتوش تحبوا تقروه هنا
طبعا مفيش باستثناء البوست بتاع قفل المدونة الله لا يرجعها ايام
نيجي بئه لامتحان الفوازير بتاعك

ياتري ايه اجمل بوست قريتوه هنا على المدونه؟؟
اجابة السؤال الاول
انت فعلا كل كتاباتك بحسها وبتوصلني جااااااااامد
بس لما تعمل ديوان باذن الله اول حاجة هفتح الديوان واقراها هي
انا وانت وذاك الصمت او الرنين الصامت زي ما كنت مسميها الاول
وطبعا الان تبتسم الدموع وكمان نظرتك معناها ايه وابتسامتك بحبها جدا والفوطة وبتوع اداب ومجروح ولكن وكل حاجة بجد كده هظلم الباقي
السؤال ده صعب اوي اوي اوي
ياتري من الحاجات اللي كتبتها هنا لو جت سيرة المدونه ادامك
ايه اول بيتين او اول جمله هتيجي في دماغك
اللي ممكن تكون علقت معاك اوي

اجابة السؤال الثاني
كل شئ ٍ في الدنيا يستطيع أن يعطيك التعاسة والسعادة
فالدموع تكون غايةً في الجمال عندما تسيل من عينين سعيدتين
والبسمة تكون غايةً في القسوة حينما نضطر أن نرسمها على وجوهنا لحظة الوداع .

لا تجعل لنفسك حلما صغيرا تحققه فتشعر أنك قد فعلت كل شئ
ولا تجعل لنفسك حلما كبيرا لا تحققه فتشعر أنك لم تفعل أي شئ
ولكن دع أحلامك الصغيرة تتجمع لتعطيك في النهاية حلمك الكبير

دائما ما يذكرني عالم الحب بعالم المحمول
فبعضنا يملك بين ضلوعه حباً ولكنه لا يملك الصلاحية لاستخدامه
و بعضنا يملك هذه الصلاحية ولكنه لم يقابل الى الآن رصيده من الحب
وبعضنا يملك رصيدا وصلاحية ولكن هموم الدنيا استنفذته ففصل شحناً
وبعضنا قرر أن يلغي مشاعره ويغلق قلبه ويعيش في هذا العالم بلا شريحة!!!

دي من اكتر الجمل اللي علقت معايه
اما اكتر بيت بحبه اوي وبعته مسجات كتيييير مع طبعا حقوق الكتابة محفوظة
ياللي حبك نور عنيه ياللي جوه الروح رسمتك
دعوة من قلبي وعنيه ربنا يخلي ابتسامتك

ايه الحاجه اللي شايفها في المدونه ونفسك تفضل موجوده
بصراحة الروح الحلوة اللي بحسها وانا هنا من الناس اللي بتدخل بحس اننا هنا كلنا اسرة واحدة مع ان مش كلنا نعرف بعض

وايه الحاجه اللي موجوده ونفسك ماتشوفهاش

انك تغيب عن المدونة فترة كبيرة ومتنزلش فيهم حاجة ولو كلمة تطمنا بيها عليك
او تفكر تهجر عالمك الصغير الرائع ده

اكتر حاجه بتحب تقراها هنا

بلاقي نفسي وبحس كل انواع الشعر اللي بتكتبه سواء ديني رومانسي فكاهي

ياتري انت بتشوفني بكتب كويس فصحي ولا عامي ولا مابعرفشي اكتب خالص

لا مبتعرفش تكتب خاااااااااالص
هههههههه
انت ماشاء الله عليك في الفصحي والعامي
بس انا بحب اقرالك العامي اوي

ياااااااااااااه
اخيرا خلصت
معلش يا محمود لو كنت قصرت في الرد واتاخرت والله كانت ظروف خارجة عن ارادتي حتي كنت هجيبلك الرد في الفرح علي ما المتصفح يتصلح وربنا قدر وتعبت ومجيتش
يله حصل خيييير

منتظرين الجديد يا شاعر
دمت بخير وسعادة

semsema said...

معلش يا محمود نسيت اقول حاجة
قد يكون الوعد أمسى
مستـــــحيلاً أن تفيهْ
رغم ذاك فإن قــــلبي
لن يضيع و أنتَ فيه
ده نهاية قصة بلسم بجد مأثرة في اوي

وكمان قصيدة جاموستنا ولدت اللي سمعتها منك حصريا في ملتقي الشعر

كومنت كمان اهو تعويضا عن التقصير والتأخير

GEHAD said...

أولا بأشكر دكتور أحمد سعيد لأنه بصراحة قال نقطة مهمة وحقيقة كان نفسي أقولها جدا ويمكن هي سبب رئيسي أني اتأخرت في الرد لأني لاحظت أن الكل مجمع على حاجة أنا مش شايفاها موجودة وهي
.....
(نقطة اخيرة حبيت اقولها وهي ظن البعض انك قليل الثقة بنفسك ولكني وبصراحة ارى عكس ذلك – وانا ممن لا يجاملون - ، بسبب معرفتي الشخصية بك ، كما انه لا يمكن ان تصدر مثل الكلمات الا من واثق ، واني لارى ان ما تفعله هو من التواضع الجميل )
.......
أنا صراحة من متابعتي لمدونة حضرتك حاسة كما ذكر دكتور أحمد تماما وأن لو حضرتك بتحط استفتاء أو اختيارات أو بتطلب كدا ماهوش أبدا انه نقص ثقة بالعكس تماما حاسة أنها ثقة وتواضع من حضرتك
وشيء جميل جدا ورائع أنك بتشرك معاك كل اللي بيحبوك
واعذرني على تأخر ردي وتقبل خالص تقديري
..........
بالنسبة للأسئلة
اجمل بوست قريتوه ....طبعا المدونة ثريّة وكدا هاحتار جداااا ولكن أول ماخطر ببالي قصة بلسم
مؤثرة جدا
في كمان التشكيلة اللي قلتها في ملتقى الشعراء كانت رااائعة للغاية

.........
وايه البوست اللي ماكنتوش تحبوا تقروه هنا.....البوست اللي قلت فيه انك هتقفل المدونة
........
من الحاجات اللي كتبتها هنا لو جت سيرة المدونه ادامك
ايه اول بيتين او اول جمله هتيجي في دماغك
اللي ممكن تكون علقت معاك اوي
الصراحة الأبيات اللي معلقة معايا جدا
"قصيدة" الآن تبتسم الدموع
من أول ما قرأتها على جروب الإي إن تي
وأظنها أول حاجة قرأتها لحضرتك
"وكمان" شموع لاتنطفأ
وأبيات
ياما ناس بتكون قرايبك
عمرهم ما يشيلوا همك
ياما أكتر حد ظالمك
يبقى خالك ولا عمك
ياما فيه انسان غريب
تلقى حضنه بسرعه لمّك
و أما يبقى ما بينكوا عشرة
يبقى من لحمك ودمك
...
ونسى الفوطة واحنا وبتوع آداب
ومن المعرض في كثير و بأحب "الرنين الصامت"
...
ولما تصفحت المدونة ثاني الان لقيت كثيييييييير أوي بس اللي علقت

ان قمة البعد عن الله ليس أن تشعر أنك بعيدا عنه ولكن أن تشعر انك أصبحت غير قادر ٍ على العودة اليه مرة أخرى وقمة القرب من الله ليس أن تشعر أنك قريبا منه ولكن أن تتأكد أنك لن تستطيع الحياة لحظةً واحدة ً بعيدا عن رحابه"

......
ايه الحاجه اللي شايفها في المدونه ونفسك تفضل موجوده
المدونــــــــــــــــــة
ربنا يخليك لها وتزيدها براوااااائعك ويجعلها في ميزان حسناتك
............
اكتر حاجه بتحب تقراها هنا
المناجاة"الديني" في قصائدك رااائعة بتأثر فيّ وكذلك الخواطر
وبأستمتع بقراءة الفكاهي والرومانسي
جدااااااا
........
ياتري انت بتشوفني بكتب كويس فصحي ولا عامي ولا مابعرفشي اكتب خالص

ماشاء الله لا قوة إلا بالله
ربنا يباركلك في موهبتك ويثيبك عليها
.........

في حاجة كنت عايزة أقولها بصدق أنا بأدخل المدونة لكي أرقى بنفسي وأسمو بها لأن هناك شعور يتملكني عندما أدخلها وأتبحر في مواضيعها
بتحسسني إني في نقاء وصفاء مع نفسي
ولما بأعلق او لا فهذا حسب تأثري لأن أحيانا درجة التأثر تخليك ما تقدرش تعلق
والله أنا بأدخلها عشان نفسي أنا فعلا اللي بأستفيد كل ما تصفحتها بكل كلمة بكل معنى بتمدني بالكثير
فعلا مدونة حضرتك من المدونات النادرة اللي لما بأدخلها في أي وقت ومهما كانت حالتي بترقق قلبي
اطلت فعذرا وجزاك الله خيرا
وجزى الله الجميع هنا خيرا كثيرا
خالص تقديري وامتناني

! ! ! ! said...

السلام عليكم محمود
أنا طبعا اتأخرت كتيييير أوي ... بس ده لأني مكنتش هرد لولا أنك ذكرتني بألأسم
أنت عارف أن أي حاجه عاجباني أو مش عاجباني بقولهالك في وشك ... ومش هستنا البوست
:)

ما علينا أنا حاسس أني داخل أمتحان

ياترى أيه أجمل بوست قريتوه عالمدونه؟؟

*******************************
البوست اللي مكنتوش تحبو تقروه
؟؟
مظنش أن في أجابه تنطبق عالسؤالده
******************************
ياتري من الحاجات اللي كتبتها هنا لو جت سيرة المدونه ادامك
ايه اول بيتين او اول جمله هتيجي في دماغك
اللي ممكن تكون علقت معاك اوي
؟؟؟؟؟؟

قد نفترق لا لعيبٍ فينا ولا لخطأ ٍ منا ولكنها إرادة القدر التي علينا أن نرضي بها ونسلم بحكمتها فقد نكون
كالخطوط المتوازية التي سارت وسوف تسير الى جوار بعضها الي الأبد ولكنها أبداً لن تلتقي

**************************

ايه الحاجه اللي شايفها في المدونه ونفسك تفضل موجوده
؟؟
بما أن مفيش في المدونه غير المدونه ...
فهي أكيد الأجابه هي المدونه
!!!!
أنا مستغرب من السؤال ده
******************************
وايه الحاجه اللي موجوده ونفسك ماتشوفهاش

؟؟؟

لا يوجد
بإستثناء تغيير لون الفونت بتاع بوستين تحت كده كل ما أرجعلهمم الاقيهم مكتوبين بالأبيض و معلرفش أقراهم
******************************
اكتر حاجه بتحب تقراها هنا
؟؟؟
الجمل اللي بشعر في معظمهابحكمة بالغه
و بعضها برقه بالغه
و أخرى بطعم (غير)... بس

*****************************
ياتري انت بتشوفني بكتب كويس فصحي ولا عامي ولا مابعرفشي اكتب خالص
؟؟؟؟

أكيد أنت أبدعت في العامي أكتر من الفصحى
و لكن أغلب كتاباتك الجاده كانت فصحى
و أنا عن نفسي بحب جدا قصيده أنت مش عارف مش حاططها هنا ليه .. أو مستقل بيها كل ما أكلمك عنها و هي
(لن يرحل الربيع)
********************************

حاجه أخيره
أنا لفيت المدونه كلها على بوست
أنا بحبه جدا ... و قلبتها رأسا على عقب بس بدون فايده
و هو بوست
(حب من نوع أخر)
اللي كان بيقول
يارب انت عارف .. أنى ياما حاولت ابعد
!!!!!!!
مش عارف هو فين
و ده بصراحه أكتر حاجه زعلتني و أنا بفتكر البوستات واحد واحد

وديته فين يا بو العزم
اه
مبتردش
ماشي
حسابنا بعدين
:D

كفايه كده بقا أنا زهقت مالكتابه
أنا مش عارف أنت هتقرا ده كله أزاي

! ! ! ! said...

نسيت اكتب أجابة السؤال الأول
ده لأني محتار
بلسم
أحنا بتوع الفرقه الخامسه
دول أجمل حاجات في بالي دلوقت

سلام

dr shams said...

hi
ازيك يا دكتور
البلوج بتاعك مره يجنن بجد
انا قريت حبه صغنينين فيه كده لكن مقدرتش اكمل انت عارف بقي مواله موال عاوزله سنه بحالها علشان اقراه كله
بس طبعا الان تبتسم الدموع كانت تحفه
وكمان القصيده الفكاهيه اللي انت حاططها اسمها تقريبا مبنبالغش مره حلوه عن جد

وعلي فكره الكومنتات اللي عندك يمكن فهمتني حاجات كتير اوي

علي العموم ربنا يوفقك يا جميل
وفي انتظار المزيد من كتابتك

عمر said...

بسم الله الرحمن الرحيم

الأخ الحيبيب والشاعر المبدع والحكيم " ده وصفك اللي أنا خرجت بيه بعد قراءة سريعة لأشعارك وحكمك وأقوالك مع إني لاحظت إني تقريبا ماكنتش مفوت حاجه من غير ما أقرأها أول ما بتنزل "

أولا أنا مش عارف أقول أنا آسف ولا أنا سعيد
أنا بجد آسف فعلا على تأخري عن الإجابة على الاستفتاء لأنه فعلا صعب ومحتاج وقت وتركيز
ولكني سعيد أيضا لأمرين ... أولهما شرف لي إنك ذكرت اسمي في اللي ما علقوش ، جزاك الله خيرا
والثاني إني سعيد إن ردي ما جاش إلا بعد ما الزميل الشاعر الحبيب إلى قلبي خاصة وقلوب الزملاء جميعا - مصطفى علام - رد عشان ارسل له برقية تهنئة بنتيجته وشوق لرؤيته واستغراب لإغلاقه مدونته التي كنا نستمتع بها ، ياريت يا حوده تبلغه رسالتي دي

بالنسبة لإجابتي على الاستفتاء في التعليق التالي - عشان ما اطولش عليك -

عمر said...

يسم الله الرحمن الرحيم

اللهم لا سهل إلا ما جعلته سهلا وأنت تجعل الحزن إذا شئت سهلا

السؤال الأول
***********
ياتري ايه اجمل بوست قريتوه هنا على المدونه؟؟
جـ/ طبعا البوستات بصراحة وبدون مجامله جميلة وتنم عن صدق في المشاعر

لكن من أجملها في نظري
من الديني : حب الله هو أعظم دواء ، والآن تبتسم الدموع

من الرومانسي :كفاية علي ، وابتسامتك

من الفكاهي : طبعا احنا بتوع الفرقة الخامسة ، وانا وبتوع آداب

وفي حاجه مش عارف أحطها تبع ايه : الأنوثة

ووالله حاجات كتير قوي تانية

..................................
السؤال الثاني
*************
وايه البوست اللي ماكنتوش تحبوا تقروه هنا
جـ / بصراحة مافيش وانا اختلف مع زملائي اللي قالوا البوست اللي انت هتسيب فيه المدونة لأنه لازم يكون فيه فترات للأنسان يصاب فيها بالإحباط ويؤذيه أحد ممن حوله فيؤثر ذلك على عواطفه - خاصة إذا كان شاعر - واحنا دايما متعودين منك الصدق في مشاعرك على المدونة فلو كنت ما كتبتش البوست ده كان هيبقى فيه شك في هذا الصدق
........................
السؤال الثالث :
***************
ياتري من الحاجات اللي كتبتها هنا لو جت سيرة المدونه ادامك
ايه اول بيتين او اول جمله هتيجي في دماغك
اللي ممكن تكون علقت معاك اوي
جـ /من أجمل الحاجات اللي دايما أفتكرها عندك يا حوده ... جملة الآن تبتسم الدموع ، وكان - مصطفى علام - واصف مدونتك بده لما كان فاتح مدونته ، وانا باعتبره وصف معبر جدا عنك لأنك فعلا خليت دموعنا تبتسم
..................................
السؤال الرابع :
***************
ايه الحاجه اللي شايفها في المدونه ونفسك تفضل موجوده

جـ / المدونة نفسها
..................................
السؤال الخامس :
**************
وايه الحاجه اللي موجوده ونفسك ماتشوفهاش

جـ / لا يوجد

..................................
السؤال السادس :
***************
اكتر حاجه بتحب تقراها هنا

جـ/ جميل التنوع اللي عندك يا حوده ، بس أنا شايفك حسب الترتيب
الديني
الرومانسي
الفكاهي
..................................
السؤال السابع والأخير : ( أحمدك يارب)
**********************************
ياتري انت بتشوفني بكتب كويس فصحي ولا عامي ولا مابعرفشي اكتب خالص

جـ / أنا دايما كنت عكس الناس كلها بحبك في الفصحى اكثر من العامي وبشوفك بتبدع فيه اكتر ، لكن لما قرأت المره دي حسيت اد ايه العامي عندك سهل وبسيط وبيوصل للقلب سريعا

بس فيه ملاحظة : انت من افضل مميزاتك اللي ماشفتهاش تقريبا في حد انك بتعرف تدمج بين الطب ( انجليزي ) واللغة العربية وبتكون بيها قصائد جميلة

..................................
في الختام نصيحة أتمنى انك تاخد بيها
*********************************
ياريت يا محمود تحاول تنشر شعرك سواء بالصحف أو المجلات أو الوسائل الأخرى لأن دي رسالة أعتبر انك واجب توصلها للناس كلها وممكن تستعين ببعض الشعراء الكبار في ذلك
...................................

تحياتي لك ولمدونتك