تالت بوست

Tuesday, October 21, 2008

في البدايه بعتذر لناس كتير نسيت اذكر اساميها في البوست اللي تحت
مع اني كنت محتاج جدا اسمع رايهم
زي رحيل و فرج
N_e_m
Smile
وناس كتير تانيه
ماحدش بزعل مني وبرضو هستني آرائكوا
انا متشكر جدا لكل كلمة حلوة اتقالت في البوست اللي فات
كان نفسي جدا أرد بس مش عارف أرد أقول ايه

حاجه بس نفسي أقولها في موضوع قلة الثقة ده
حقيقي انا مش عارف اذا كنت فعلا قلة ثقة زي ما ناس كتير منكم قالت
وانا عارف انهم بيقولوا من خوفهم على
ولا الموضوع مش موجود زي ما احمد سعيد وجهاد قالوا
انا كان نفسي اقول كلام كتير اوي في الموضوع ده
بس عشان انا طولت النهارده اوي
كل اللي اقدر اقوله
اني زي ما محمد الخطيب قال
هكتب كل اللي نفسي فيه
او بمعني أصح هكتب كل اللي انا حاسس بيه
وهتكلم على طبيعتي ومايهمنيش لو أي حد فهم حاجه من كلامي انا مااقصدهاش

أما بالنسبه لطلب هبهوبه اني انا كمان اشارك معاكوا في الاستفتاء ده
فحقيقي انا حيرتي اكبر من حيرتكوا بكتير اوي

اكتر بوست حبيته هنا على المدونه ده سؤال مش هقدر أجاوب عليه
بس أقدر أقول ان لما حد يطلب بوست معين واكتبه
دا بيبقى اجمل حاجه بالنسبالي
وعشان كده فيه هديه في آخر البوست ده

أكتر بوست ماحبيتوش
هو زي ما انتو قلتوا بوست قفل المدونه
انا يمكن ماوضحتش اوي انا كنت هقفلها ليه
بس صدقوني اي حد مطرحي كان هيعمل كده
بس اللي خلاني أرجع وقفتكتم جنب الواحد
واني اكتشفت ان فيه ناس كتير انا لا اعرفها ولا عمري شفتها
ولا حتى بيعلقوا هنا
بس المدونه بتمثل ليهم حاجه
وكان اكتر كلام بيأثر في لما حد يقول ان بابا او ماما بيقولولك ماتقفلشي المدونه
واكتر كلمة أثرت في أوي مش عارف ليه
بنت ما اعرفهاش بعتتلي على الميل وقالتلي اخواتي الصغيرين بيحبوك اوي
وحافظين جاموستنا ولدت وبيقولولك ماتقفلشي المدونه
عشان كده وعشان حاجات كتير تانيه ماكانشي ينفع أقفلها

ايه الجمله او البيتين الللي ممكن ييجوا على بالي
حقيقي سؤال صعب اوي
كل الجمل اللي كتبتها طالعه من جوايا اوي
بحس ان كل اللي شفته وسمعته واتحكالي وحسيت بيه
كل حاجه في حياتي بتتعصر عشان تتطلع جمله من دول
بس لو هختار اول جمله بتيجي على بالي
هختار التلات جمل دول

اذا لم تستطع أن تكو ن مستقبلا باسماً في حياة من تحب
فعلى الأقل حاول ألا تكون ماضي مؤلم

ما أصعب أن يأتيك الحب الحقيقيْ بعد أن تكون قد استنفذت
كل مشاعرك في حبٍ لم يكن لك

إذا كانت أعمارنا تقاس بلحظات السعادة الحقيقة التي عشناها فأنا عمري أقصر من المدة التي قرأتم فيها هذه الجملة.........وإذا كانت أقدرانا تقاس بما قدمناه من خيرٍ حقيقي ٍ في هذه الدنيا فأنا أقل حجما من النقطة التي وضعتها في نهاية هذه العبارة .



ولو هختار ابيات
اكيد هحتار القصديه اللي كانت يبب في اني اشوف النبي صلي الله عليه وسلم
وهختار أول بيتين في الآن تبتسم الدموع
أسْلمْت ُ روحـــي والجوارح كلها ...لك يا إلهي فانتهت بك غربتي
لما سجدت ٌ ولامس الوجه الثرى..أحسست أني قد ملكت ُ كرامتي

يمكن لاني كتبتهم بعد توقف سبع شهور عن الكتابه وكانوا سبب في اني ارجع واكتب من تاني

وهختار الفوطه لانها أنجح حاجه كتبتها

ايه الحاجه اللي شايفها في المدونه ونفسك تفضل موجوده
انتم
يمكن كتير من الناس اللي بتعلق هنا انا ماعرفهمشي شخصيا
ولا شكليا حتى...بس بقيت بحس اني اعرفهم اوي
لدرجة ان لو الموضوع فيه اختيار جزء مثلاً بقيت
بتحدى نفسي كل حد منهم هيختار ايه...وكل انسان بيبقى ليه طلة
حتى لو من شوية كلام مكتوبين في صفحة نت
وبزعل لو لاقيت حد منهم ماعلقشي المرادي وبزعل اكتر لما حد ينضم لينا هنا
وفجأة ماألقيش اسمه ويبعد عن المدونه

ايه الحاجه اللي موجوده ونفسك ماتبقاش موجوده

نفسي ماحدش يبقي
anonymousغير معرّف
انا بدي العذر لأي حد مش عايزنا نعرف هو مين
لان ده من حقه
بس بيبقى نفسي يسيب ولو اسم مستعار ليه هو وماحدش يعرفه غيره
نعرفه بيه هنا ونسأل عليه لو غاب عننا




ايه الحاجه اللي مش موجوده ونفسك تبقى موجوده
هي الحمد لله موجوده
بس انا بحلم تكبر اكتر واكتر
الروح الحلوه الموجوده هنا
المدونه حققتلي حلم كبير اوي بحلم بيه من زمان
ان مكان واحد يجمع كل الناس اللي بعزهم وبيعزوني
ونفسي كل الناس دي تكتب رايها مش فيّ كمحمود
في اي موضوع وكلهم يسمعوا بعض و يعرفوا بعض
حتى الناس اللي بتبعتلي على الميل والناس اللي بتقوللي مني ليها
نفسي كل دول يبقوا هنا ويبقوا مش زوار المدونه ولا قراء المدونه
ولا حتي أصدقاء المدونه...نفسي يبقوا أهل المدونه

بيهيألي كده رضيت على معظم الأسئله
وعايز اقول كلام كتير اوي
بس خلوه لبوست أنا ..وانتم.. وهذه المدونه
اللي نويت اسيبه لعيد ميلاد المدونه ان شاء الله
اللي هيبقى
21/11ان شاء الله
ومش مشكله تعلقوا هنا
كفايه علي اوي تعلقوا فوق
انا كده تعبتكوا اوي النهارده
وعلى فكرة انا هدفع لبتاع النت كتير اوي النهارده
عشان اكتب التلات بوستات دول
واحتمال كبير اكنس السيبر وامسحه
بس فداكوا

اه صحيح..كنت هنسي الهدية
"هكذا تمنيت أن أحب"
يا رب...
إنت عارف..
اني ياما حاولت أبعد
بس كنت في كل مرة
ألقى شئ بياخدني ليها
و أمّا أشوفها
يبتدي الإحساس في قلبي
يجري ناحية نور عينيها
ييجي مليون حاجه تايهة
منّي... بس لاقيتها فيها
بس خايف حبي ليها
يبقى شئ يشغلني عنك
يبقى حاجه تاخدني منك
و ألقى شئ جواي يصرخ... ليه تسيب نفسك لحـــــبّك
ماتحاولش تحب......إبعد.....و إقتل الاحساس في قلبك
و أبدأ ابعد... و أبدأ أنسى
بس مهما تدور سفينتي
عمرها ما تلاقي مرسى
و أبدأ أسال نفسي تاني
ليه بتبعد؟؟.. ليه بتهرب؟؟
ليه تقول عَالحب ذنب
رغم ان الحب شمسُه
مالية بالنور كل قلب
ليه بتهرب مـِ المواجهة
رغم ان الكون دا كله
مملكه... و الحب تاجها
و أبدأ أسأل نفسي تاني
أكتم الاحساس في قلبي... ولاّ أقوله
لأ هقوله
مش هسيب إحساسي بيها... أي شئ يمنع وصوله
أيوة لازم ....تبقى حاسه بحبي ليها
أيوة لازم تبقى عارفه
إني فعلا مشتريها
إنما برجع و أخاف
يتخدش توب العفاف
و البراءة اللي في عينيها
و أبدأ أسأل نفسي تاني
ليه أعلق قلبها بقلبي اللي لسه
زي حلم مالوش ملامح
لسه واقفة الدنيا ضده
لسه مش عارف طريقه
أيوة أنا بهواها لكن
حبها اللي في قلبي ساكن
بيناديني يقوللي ابعد
ماتحاولشي تكون أناني...لو صحيح بتحب.. سيبها
سيبها يمـــكن حـد تاني... يستـــــحق يكون حبيبها
أيوه هبعد.....لازم أبعد
مش هقف في طريق حياتها
مش هحاول حتى أكون
ذكري من بين ذكرياتها
بس صعب
صعب جدا
صعب يملى مكانها عندي .... مهـــما يحصل أي واحده
فيه بــشر مــــــش بنقابلهم... في الحياة غير مرة واحده
يا رب
خوفي مـــــــنك.. حبي ليها
حبي ليك والخـــوف عليها
كل دول أحاسيس في قلبي
عايشة فيّ وعشت فيها
و أمّا تاه القلب بينها
سبت كـــــل الناس.... وجيتلك
جيت ومن غير خوف حكيتلك
إنت أكــتر حد عـــارف... انها أحــــاسيس بريئة
بس تايهه في قلب قلبي.... لسه مش لاقية الحقيقة
يارب
مش هضيع لو مني ضاعت.... بس هبــقى أنا أقوى بيها
اهدى روحـــي يا رب دايما.... انت وحـــدك أدري بــيها
للي فيه الخــــــير لقــــــلبي.... لو مــــعايا .. أو ناســيها
و اللي يبـــقى يا رب برضه...خير في نفس الوقت.. ليها

23 comments:

natural magic said...

يعني ايه مش مهم تعلقوا هنا دي
انا بقي مش هعلق غير هنا ههههههه
البوست جميل والهديه اجمل
والاحساس فيها عالي اوي
ما شاء الله
بس متهيقلي قريتها قبل كدا او يمكن سمعتها
بس بجد تحفه
ربنا يباركلك

GEHAD said...

وأنا كمان هأعلق هنا لأن بجد دي أكثر حاجة أسعدتني جدااا ما تتصورش قد ايه فرحت بالبوست دا
ربنا يبارك فيك دكتور محمود
وبأشكرك كثير على الهدية الراائعة
بجد كان نفسي تبقة موجودة هنا في المدونة اوي
والحمد لله
لانها تستحق الكل يقرأها
ماشاء الله لاقوة الا بالله روعة روعة روعة

وجزاك الله خيرا
وربنا يوفقك في كل اللي قلته يارب
..........
هكتب كل اللي نفسي فيه
او بمعني أصح هكتب كل اللي انا حاسس بيه
وهتكلم على طبيعتي ومايهمنيش لو أي حد فهم حاجه من كلامي انا مااقصدهاش
.............

محمد عبد الباسط said...
This comment has been removed by the author.
هبهوبه said...

انا عارفه اني مهما قولت من كلمات شكر مش هقدر اوفيك حقك
بس انا فرحانه جداً انك اشتركت معانا برأيك لأننا كلنا واحد وكان لازم تحس بصعوبة الإمتحان عشان تعرف قد ايه تعبنا واحنا بنجاوب عليه
بس كله يهون عشان خاطرك
والهديه جميله اوي انا عارفه انك كتبتها قبل كده على المدونه وانا قريتها في الأول خالص بس هي حقيقي جميله اهم حاجه ان مفيش حاجه في الدنيا تسرقك لدرجة انها تنسيك حبك لربنا .
انا بعتذر اننا تعبناك النهارده في الكتابه بس حقيقي فرحتنا بيك تستاهل
وبعدين انت اصلاً كان المفروض تكتب عشر بوستات في مره واحده لإنك اتأخرت علينا جداً
بس ولا يهمك مهما إتأخرت هترجع تلاقينا مستنينك احنا وراك وراك
لحد ماتعمل كتاب فيه كل اشعارك وهتلاقينا برده معاك
واوعى تزعل على شغل شرم اكيد ربنا شيلك الأحسن عشان انت تستاهل احسن حاجه في الدنيا .

اللهو الخفى said...

afdgtry luiuyio gdsgfert ;lj;lhuio dge5t n,hyiuy rytk68;6 r546y74 ryte4rwewtrij hikykityujt....................ytutiioipo ouipo ''o[oip arewwr tyr6yrte iuolio olioi dtret uiuou9 ljluo yiy8 6r6r i9p0890p eqeqezdd yu6uyi........................................ بجد رائع ربنا يبارك لك , على فكرة انت تعبتنى جامد اوى من غير ما تقصد انا اول مرة ادخل على المدونة كانت من اسبوعين تقريبا ,,,,,,,,,بس لما شفت اسمك ولانى سمعت عنك كتير قبل كدة ,,,قلت افتح و اقرا لك ,,,,,و شدتنى كتاباتك لدرجة انى قريت كل اللى انت كتبته قبل كدة,,, ما تستغربش

اللهو الخفى said...

يمكن تقول عليه جنان ,بس فعلا انا قريت كل اللى موجود على المدونة بالكومنتات و بالرد بتاعك على الكومنتات كمان ,,,,,بجد جميل ,,,يا ريت يبقى عندك ثقة كبيرة فى نفسك لانك ادها يا محمود,,,,,رغم انى كان فى حاجة مزعلانى منك,,,بس بعد كتاباتك سامحتك,,,,و ما تحاولش تعرف ايه هى,,,,, جميل اوى و فخر لنفسى انى يكون لى زميل موهوب زيك,,,,,,و يا رب دايما علطول..على فكرة كل سنة وانت طيب رغم ان عيد ميلادك فى شهر فبراير,,,,و الف مبروك للدكتورة اختك رغم انها متاخرة شوية,,,,و على فكرة انا برده والدى مات بنفس مرض والدك ربنا يرحمهم ويدخلهم الجنة ان شاء الله ,,,,بلسم برده قصة جميلة وبداية جميلة,,,,,,,,و على فكرة انا اكيد لى نصيب فى الجاموسة الجاية,,,,,,,وكفاية كدة بقى اظن صدعتك بما فيه الكفاية و طولت عليك اوى ..................................تصبح على خير

اللهو الخفى said...

اسمى وحش شوية او شويتين,,,بس ما بين الخيرين حساب

quiet_storm said...

هديه مقبوله
بجد قصيده روعه روعه جدا
عن نفسى بحبها اوى وفرحت فعلا لما رجعتها تانى

فى انتظار التلات الجاى

عندما تنهمر الدموع said...

السلام عليكم ورحمة الله وبركاته
انا بكتب كومنت للمرة التالتة بس عشان اشكر حضرتك على الهدية وعلى انك كتبت تاني قصيدة هكذا تمنيت ان احب اصل حضرتك متعرفش انا اد ايه بحبها شكرا مرة تانية وربنا يوفقك ويكرمك وعلى فكرة شكرا على ان حضرتك رديت على الاسئلة وحسيت اد ايه كان صعب علينا الاختيار

الحلم الجميل said...

السلام عليكم
القصيده دى انا بحبها جدا وحضرتك متعرفش اد ايه كنت مبسوطه اوى لانك رجعتها تانى وبشكرك كمان على كل القصايد هنا ان كانت دينيه جت فى وقتها بالنسبه لى وكنت محتجاها و رومانسيه عيشتنا او حاجه لذيذه ضحكتنا شكرا ليك اوى وربنا يوفقك

Anonymous said...

السلام عليكم يا دكتور محمود
انا عاوزه اقول لحضرتك اني اكتر حد هنا فرحان بالبوست ده بالذات لان حضرتك رجعت القصيده بجد هديه رائعه شكرا جدا جدا جداااااااااااااااااا بجد انا بحب القصيده دي جدا جدا والحمد لله انك رجعتها وشفت بقي حضرتك احترت في الاختيار ازاي امال احنا كنا نعمل ايه ربنا يوفقك ويكرمك ويحفظك دايما يا رب

Amert Alhozn

emi_doc said...

اكيد مش هزعل انك مفتكرتش اسمي وسط الناس اللي تحب يعلقوا
انا بجد المدونه هي الحاجه الوحيده اللي بفتحها لما اكون تعبانه ومضايقه ومش عايزه اكلم اي حد
وافضل اقرا القصايد وبجد هكذا تمنيت ان احب روعه جدا ومهما وصفت مش هديها حقها لاني فعلا بحب القصيده دي جدا عموما اوعدك اني مش هغيب عن المدونه تاني وهزهقك من تعليقاتي وربنا يوفقك
هبه

محمود سليمان ابو العزم said...

ناتوشرال ماجيك

يا ستي تعلقي هنا تعلقي هناك
المهم انك ماتغيبيش عن المدونه ابدا
انتي قريتي القصيده قبل كده
لاني حافظ تعليقك عليها هناك قبل ما اشيلها
ربنا يكرمك ويعزك ويحفظك ويخليكي للمدونه

محمود سليمان ابو العزم said...

جهاد

انتي تنوري هنا او هناك
ربنا يبارك فيكي ويكرمك وتفضلي منورة المدونه علطول
دعواتك

محمود سليمان ابو العزم said...

هبهوبه

زي ماقلت في البوست
انا اكتر حاجه تسعدني ان حد من اهل المدونه يطلب حاجه واعلمها
دي شئ كبير اوي بالسبالي
ربنا يخليكي يارب
انتي كمان تستاهلي كل خير والله
ربنا يكرمك

محمود سليمان ابو العزم said...

اللهو الخفى

اولا اسمك مش وحش ولا حاجه
هو بس انا طول ما انا قاعد ادام الجهاز خايف سكينه ولا شومه تطلع من هنا ولا هنا

ثانيا
الشرف لي انا والله
وانت لو تعرفني بجد هتعرف ان اكتر شئ يزعلني ان حد يكون زعلان مني
رجاءا تقوللي ايه اللي مزعلك
ولو مش عايزني اعرفك
ابعتلي على الميل ده
now_tears_smile@yahoo

ثالثا
شكرا على كل ثانيه قضيتها هنا على المدونه
والله نورتها
واتمنى زي مازرت كل المواضيع القديمه
تفضل معانا في كل المواضيع الجديده

محمود سليمان ابو العزم said...

كويت ستورم

ربنا يخليكي يا حنان
والحمد لله ان الهدية عجبتك
انا كمان هستني تعليقك التلات اللي جاي

محمود سليمان ابو العزم said...

عندما تنهمر الدموع

معلهشي تبعتكوااوي في التعليق النهارده
ولا تتخيلي سعادتي بسعادتكم بالقصيده
ربنا يكرمك ويوفقك
ومااتمناش في يوم انشر موضوع
وماالاقيش تعليقك عليه

محمود سليمان ابو العزم said...

الحلم الجميل

الجميل مش رجوع القصيده
الجميل رجوع تعليقك هنا
انتي من الناس اللي كنت هكتب اني زعلان منها
لانها وقفت جنبي في اول المدونه
وبعدين انقطعت مرة واحده عن التعليق

رجاءا ماتعمليهاش تاني

محمود سليمان ابو العزم said...

اميرة الحزن

لالشكر واجب على انا
لانك اول حد افتقد القصيده لما شلتها
واول حد طلب مني ارجعها
انا اللي بعتذر عن تاخيري في اجابة طلبك
بس كان غصب عني

ربنا يكرمك ويعزك يا رب

محمود سليمان ابو العزم said...

ثemi_doc

ارجو انك تفبلي اعتذاري
انا كنت هحط قريب بوست عن المدونه
بس اجلته شويه
وكان اسمك من اول الناس فيه والله

على العموم انا بتأسف
وانتي وعدتي
اتمنى تكون أد الوعد ده

عمر said...

بسم الله الرحمن الرحيم

أولا : أنا أعتقد إن موضوع الاستفتاء ده مش عدم ثقة بنفسك ولكنه وقفه يجب أن يقفها كل انسان مع نفسه ويراجع حساباته وأحييك عليها

ثانيا : أشمعنه انت بتقول بحب أي بوست وما بتحددش ، هي كوسه ولا ايه ....هههههه

ثالثا : فعلا أبياتك دي من أجمل ماسمعت لك

تحياتي

smile said...

السلام عليكم ورحمةالله وبركاته انا بجد بتأسف على التأخير انا بس مابدخلش النت كتير بجد الهدية جميلة جدا انا دلوقتى بس عرفت ليه كان اصحابى بيحكولى عنها وعايزة اقول لحضرتك انى اتمنيت ان حضرتك ترجعها تانى بعد ماشلتها وعشان كده بأشكر حضرتك بالتوفيق دايما ان شاء الله