عام ٌ ..في عمر مدونتي

Friday, November 21, 2008

عام ٌ في عمر مدونتي

عام ..ٌ والعام هنا أعوامْ

عام ٌ ..و أنا أكتب ذاتي

وجعلت ُ دمـِـي حبر الأقلامْ

حلم ٌقد أمسي كالواقع

والواقع أمسى كالأحلامْ

أحكي عن نفسي وأراني

لا أحكي عني بل عنكم

وبأشعاري لا أفخر بل

أفخر أني قلب ٌ منكم

عام ٌ قد مر وبعد العام

ماعدت أنا... فأنا أنتم


السلام عليكم ورحمة الله
المفروض ان الموضوع ده كان ينزل يوم الجمعه
انما معلهشي كل الظروف اتجمعت انه ينزل النهارده
ويمكن تكون اجمل صدفة انه ينزل النهارده...التلات
اليوم اللي بقيت بعشقه وبستناه أكتر من أي حد فيكوا
زي يوم الجمعه اللي فاتت دي مدونتي بقى عمرها سنه
مش عارف سنه كتير ولا شويه....بس انا مبسوط اوي أوي أوي أوي
وكنت مبسوط اوي طول السنه دي
وبعد حيرة كبيرة أوي اكتب ايه النهارده اخترت الموضوع ده
أنا و انتم وهذه المدونه
اللي يمكن أول وأكتر مرة هتكلم عن نفسي وعنكم وعن المدونه بمنتهى الصراحه
ولما قعدت وماعرفتش اتكلم عن ننفي خالص

قلت همشيها أسئله واجابات-مش متحضرين والله- وهجاوب بكل صراحه


أنا
انت مين؟؟؟؟؟

أنا انسان أبسط من اللي ممكن أي حد فيكم يتخيله
انسان بيحلم يعيش الدنيا من غير تعقيد... من غير تكلف
يقول اللي نفس يقوله ويعمل اللي عايز يعمله مادام مش غلط ومادام مايإذيش حد
طب هو انت فعلا قليل الثقه بشعرك زي ما بتقول على نفسك
أنا فعلا قليل الثقه جدا بشعري...ولحد فترة قريبه كنت قليل الثقه جدا بنفسي كمان
مش عارف ايه السبب في ده
زمان من أول الابتدائي كنت بطلع في الاذاعه المدرسيه وكان ابويا الله يرحمه بيكتبلي كلمة الصباح ولما كان عضو مجلس الشعب بتاعنا ابن عمتي ولما يبقى فيه ندوه أو حاجه كانوا بيجيبوني أنا أو حنان وابويا يكتبلنا كلمة ونطلع نقولها
وحتى لما كان بييجي موجّه ولا حاجه في الابتدائي والاعدادي كانوا بيقوموني أقرأ أدامه
انما من أول الثانوي ما بقيتشي بقدر أقوم و أقرأ زي الأول
يمكن عشان كانت بداية تعب والدي اتهزيت أوي من جوايا لما لاقيتني خارج للدنيا كده مرة واحده
بس يوم بعد يوم بدأت أتماسك و أكتسب ثقتي في نفسي تاني
بس فضل شعري بالذات بعيد عن الثقه دي
و يمكن لو الدكتور أحمد الجندي ماطلعنيش غصب عني في لقاء الانف والأّذن

ولولا تشجيع زمايلي لي... يمكن عمري ماكنت هطلع أقول كده
وبرغم اني قلت الحمد لله بعد كده في رواندات ولقاءات وندوات و كليات تانيه
كل مرة بطلع أقول بفقد ثقتي عن المره اللي قبلها مع ان ربنا كان دايما معايا وبيوفقني
بس حاليا وبعد المدونه وبعد كلامكوا الجميل دايما
مش ابتديت أكتسب الثقه دي انما ابتديت أعرف موقعي فين في وسط اللي بيكتبوا
آخر مرة قلت شعر كنا في اسكندريه في ملتقى شعري بمناسبه سته اكتوبر
وطلعت قلت الفوطه وقصيدة كمان عن سته اكتوبر وربنا وفقني جدا الحمد لله
بس كان فيه تلاته من الشعرا اللي كانوا معانا مااعترفوش بي كشاعر أساسا
هما من النوع بتاع الشعر الرمزي و التجديد وبيكتبوا للصفوه من الشعراء والنقاد

وانا بحترم النوعيه دي والله أوي وبحب أسمعهم
وكلامهم مازعلنيش..اذا كان ماكانشي عاجبهم فاروق جويده.. انا اللي هعجبهم
بالعكس أنا كنت مبسوط لاني كنت اول مرة أتكلم و أدافع عن نفسي
وقلتلهم أنا عارف ان انا مش شاعر أوي زي ما هما قالوا
أنا واحد حس بحاجه وكتبها في الصورة دي
مايهمنيش ازاي طلعت المهم انها طلعت...ما يهمنيش ابقى شاعر على أد ما يهمني الناس يوصلها احساسي
عشان كده لما الكلام بيطلع فصحي بكتبه فصحي..عاميه بكتبه عاميه
جمل بكتبه جمل...كلام عادي بكتبه كلام عادي
وان كانوا هما بيكتبوا للي بيحبوا الشعر ..أنا بكتب للي مابيحبوهوش
ومتعتي الحقيقيه اني ألاقي حد مش بيحب شعر وبيقرالي...أو ان اكون سبب انه يبتدي يقرأ شعر حتى لو بطل يقري ليا
وقلتلهم ان كانت متعتكم انكوا تكتبوا شعر الناس ماتفهموش من اول مرة و تفضل تفك في رموزه
أنا مقدر ده بس أنا متعتي ان حد يقوللي شكرا يا محمود انت عبرت عني
دا أكبر من اي جايزة ومن أي وسام ومن أي تاريخ
متعتي اني أقدر أرسم ابتسامه غلى وش حد
اني أطلع دمعه مخنوقه جوه حد

لي موقفين في أسبوع شباب الجامعات هحكي واحد منهم عشان أنا طولت أوي
كان المفروض هتتعمل حفله الختام وتوزيع الجوايز وبعدها هتنعمل الأمسيه الشعريه اللي هنقول فيها
و بعد ما الناس جت... قلبوا النظام وخلوا الأمسيه في الاول
والناس كلها هاجت لان فيه ناس عايزة تاخد جوايزها وتمشي من غير ماتحضر
والمنظمين رفضو وقعدوا الناس والقاعه في حالة مرج وهرج شديده جدا
وطلعوا زمايلي واحد واحد وكنت أنا السادس تقريبا
وكان منهم ناس من اصحاب المراكز الاولي في المسابقه وانا كنت برة المراكز دي
وزعلت أوي ان ماحدش سمعهم لدرجه ان آخر واحد قبلي وكان من شبين رمى الميكروفون ونزل
ولما طلعت مالاقيتش ولا واحد من الناس ودنه معايا ولا مستعد يسمعني
وساعتها بس افتكرت القصيدة دي...نزيف من ندم
http://journy-to-myself.blogspot.com/2007/12/blog-post.html
قصيده مافيهاش صور جماليه ولا محسنات بديعيه ..فيها احساسي..احساسي وبس
وغمضت عيني وبدأت أقول وقبل ما أخلص فتحت عيني لاقيت كل الناس بفضل الله بتسمعني

وكلهم صقفولي بشده لما خلصت
والناقد اللي كان هناك واللي انا عارف انه مش مقتنع بي برضو قاللي
يمكن صحيح ماتكونشي فزت في المسابقه بس انا بشكرك من كل قلبي لانك الوحيد
اللي قدرت تفرض حاله من الصمت على هذه القاعه
دا كان بالنسبالي أحسن من أي جايزة ومن أي مركز
في النهايه قلتلهم اني مش بكتب عشان أكون شاعر...انا بكتب عشان أكون نفسي
كفايه كده على السؤال ده ..أنا طولت فيه اوي

وياتري بتحلم بايه يا حوده
انا أحلامي-في الدنيا- غريبه اوي
احلامي كدكتور كتيرة وكبيرة اوي بس ربنا ييسرلي المكان اللي أقدر أحققها فيه
كل احلامي دلوقتي اني أشوف اخواتي شقوا طريقهم و استقروا في حياتهم واشوف والدتي مرتاحه

وفرحانه بينا واحس بوالدي في قبره مرتاح وراضي عننا وان ربنا يجمعني بيه وبيهم وبكل الناس اللي

بحبهم في ظل عرشه و نعيم جنته ان شاء الله
أما أحلامي كشاعر فغريبه جدا تعرفوا أنا كان أقصي احلامي ايه في الشعر
عارفين امثلة البلاعه وأمثله النحو بتاع كتب العربي والجمل اللي مكتوبه في كراسه الخط دي
وانا صغير ولحد دلوقتي كان نفسي أكتب حاجه يعلموها مثال زي دول كده
أحلام غريبه والله
بس اقصي حلم بحلمه في موضوع الشعر ده اني اختم حياتي الشعريه في الكليه

بقصيدة في حفلة تخرجنا ان شاء الله..انا قلت في حفلة تخرج السنه اللي فاتت

بس نفسي اوي اقول في حفلة دفعتنا لاني بعزهم أوي

أحلامي كانسان انه مايجيش اليوم اللي الناس اللي بتحبني تنصدم فيّ ويفضلوا يحبوني
تعرفوا...انا بما ان البوست ده مافيهوش قيود
أنا هقولكم على سر عمري ماقلته لحد...أنا زي أي حد بيكتب أغاني جاتلي كام فرصه اني اخش موضوع الشعرالغنائي
بس خفت أوي من حرمانيه الأغاني وخفت لو بالفرض انها مش حرام اني أكتب اغنيه تنعمل
كليب وحش او تتنغي ويترقص عليها لان ساعتهاهفضل طول عمري زي اللي لحنها واللي يغنيها هنشيل في الإثم
منهم فرصتين ماحكيتشي عنهم لأي حد لان أي حد كان هيقوللي ازاي تضيع فرصه زي دي
حتى انا ولان اللي جوايا نفس بشريه زي أي حد ساعات الشيطان يقوللي وليه لأ
ماكانشي زمانك دلوقتي كذا وكذا ومعاك أد ايه وكلام من ده
بس خفت أوي من ربنا اللي كرّم شعري برؤيه النبي صلي الله عليه وسلم زي ماحكيتلكوا
أرجع واستغله في حاجه ممكن تغضبه
خفت أكون من الذين يحبون أن تشيع الفاحشة في الذين امنوا
عشان كده بحس ان ربنا عوضني بحب الناس ده
وانه فتحلي طريق لقلوب ناس عمري ماكنت أحلم اعرفهم.. حتى من قبل ما يقروا شعري
وعشان كده بخاف أوي على الحب ده لانه أكبر علامه في حياتي بتقوللي يمكن يكون ربنا بيحبك
رغم اني ماعملتش حاجه أستحق بيها الحب ده
وعشان كده خايف أوي ييجي يوم القيامه ويتقال آدي محمود اللي بتحبوه..شوفوه على حقيقته
كفايه كده على السؤال عشان عيطت والله

اللهم استرني فوق الأرض وتحت الأرض ويوم العرض عليك
اللهم لا تخزني ولا تفضحني بين خلقك ولا بين يديك

طب اختار اجابه...انت بتحب الناس..بتحبهم بس تحب يبقوا هما في حالهم وانت في حالك

لا بتحبهم ولا بتكرههم... ولا بتكرههم

سبحان الله يا أخي على ما أد ماشفت من الناس بس بحبهم يا برضو
انا اليوم اللي بيعدي على من غير ما اكسب فيه صديق جديد بعتبر نفسي كنت انسان فاشل
ولو نزلت من الميكروباص من غير ما اتعرف على حد من اللي جنبي او على الاقل اتلكم معاه ببقى زعلان جدا
ومن امتع الاوقات لما ابقى راكب مواصله والناس مكركبه على بعض وبعدين نقلب الهم ده وتلاقي
الميكروباص كله نازل ضحك وقفشات للصبح ..امال انا تعلمت القافيه دي منين
حِـب الناس كده زي ما همـّا...من غير ماتخش في تفاصيل
عامل الخلق بأصلك حتى ...لو مايكونشي الباقي أصيل
مش لازم يبقوا على مقاسك...دا مافيش بنى آدمين تفصيل

طيب لازم تجاوب على الأسئله اللي يمامة البلوجر رنا دغيدي سألتهم لينا في مدونتها الجميله
http://degheidy.blogspot.com/2008/11/blog-post_19.html


هو عشان الأسئله كتيره اوي أنا هختار اهم سؤال دلوقتي
ماهي السعاده من وجهة نظرك
السعاده بالنسبالي اني أكون سبب في سعادة الآخرين
اني أسمع حد بيفضفض ويحكيلي والأكتر لوقدرت أساعده برأيي
اني اطلع اقول حاجه والاقي كل الناس بتضحك ومبسوطه
اني أساعد حد محتاج وانا مش محتاج منه اي حاجه
السعاده الحقيقه ..اني أحس ان ربنا راضي عني
ربنا يرضى عننا جميعا ان شاء الله

وأنتم
مادام وصلنا لأنتم بقى اسمحلى أسألك انت ليه بتحب الناس هنا أوي كده
مع انك ماتعرفشي معظمهم ومش هتعرفهم


عشان هما روح المدونه دي..هما اللي عملوها لحد ماوصلت للدرجه دي

فيه حاجات كتير كنت ناسيها وافتكرتها وحاجات كنت سايبها وما كملتهاش وحاجات كنت شايفها لا تستحق النشر

وكلها كملتها نشرتها هنا....هما اللي كانو دايما بيشجعوني اني أكتب كمان وكمان

هما اللي استحملوني وانا عمال اوجع دماغهم انا هكتب ..لأ مش هكتب..اصل أنا مخنوق شويه النهارده..أصل مش عارف مين قاللي ايه...أصلي تعبان شويه..وبس ولكن و معلهشي ومزهقهم معايا

بس هما كانوا دايما يردوا احنا مستيينك يا محمود..اكتب يا محمود... انشر ومالكشي دعوه

حاجات كتير كنت كابتها بقالي سنين وناسيها او مش مكملها جبتها وكملتهاو نشرتها وبقت من أنجح الحاجات

زي نظرتك معناها ايه وارجعلها ورساله الي قلبي و موعد بغير موعد وحاجات تانيه كتير


يمكن أخص بالذكر الناس الللي بتعلق لانهم نبض هذه المدونه

وان كان اللي بكتبه هو الدم فكلامهم هو القلب اللي بيدفعه

ومش هعدهم عشان ما انشاش حد منهم
وكان كل تعليق ويمكن كل كلمه بتنكتب
بتصحي جوايا حاجه وبتديني قدرة اكبر على الكتابه
وبحمد ربنا كتير اوي انه وقف في طريقي ناس زيكم
وبفرح اوي بالناس اللي بلاقي ردها على كل بوست
يمكن اكون ما اعرفشي معظمهم..بس المدونه قربتني ليهم اكتر
وبقيت بحس كل واحد منهم هيكتب ايه
ولو الموضوع مطلوب فيه اختيار جزء بقيت براهن نفسي كل واحد منهم هيختار ايه
وبفرح اوي لما الاقي الناس اللي شجعت المدونه في اولها زي
ناتشورال ماجيك ودوك ميرو و الحلم الجميل وهمسات داعيه وعندمانحب ورحيل و
SMILE&snowwhite
بيرجعوا ينوروها من تاني
وبزعل اوي لما احس ان حد بقى واحد من اهل المدونه وبعدين مالاقيش اسمه فجأه هنا
زي فجر آخر
امضاء انسان
اسيرة الصمت
طيور الجنه
دكتور احمد ماضي

د:سمر
أجدع بنوته
eng _eman
nan
H
doc_mony
n_e_m
sluvswho
emi_doc
الناس دي والناس اللي انا ناسي اساميها دلوقتي
نفسي اوي يرجعوا للمدونه تاني
وتعليقاتهم تنورها
وحتي الناس اللي بتبعتلى رايها على الميل والناس اللي بتقوللي رايها شفوي
نفسي تبقى المدونه هي المكان اللي تجمع كل الناي اللي لي في قلبها مكان


انا والله يعلم الله وحده كم أحبكم فيه


طب بمناسبه أنتم...مين اكتر ناس تحب تقول أدامهم شعر

بدون تفكير وبدون حيرة وبدون مجامله...دفعتي طبعا

انا بحب الدفعه دي جدا جدا جدا ومهما رحت ولا جيت انا في النهايه فخور اني واحد منهم

لانهم هما اللي عملوني...من أول مرة طلعت ولحد دلوقتي دايما واقفين جنبي وبيشجعوني حتى لو ماكنتش كويس

أنا يمكن قلت في مركز المؤتمرات وكان فيه معظم هيئة تدريس الكليه من اول العميد وربنا وقفني جدا

وفي مرة قلت في حضور حوالي ألف شخص وربنا برضو وفقني جدا

وفي كليات وبلاد تانيه وربنا كان دايما معايا

بس عمري ما حسيت بالدفء والسعاده زي يوم ما بقول في وسط زمايلي

حتى لو رواند صغير مافيهوش ييجي عشرين واحد

لاني بجد بحبهم جدا وكنت وهفضل فخور دايما اني واحد منهم


وهذه المدونه؟؟؟

المدونه عالم صغير ربنا سبحانه وتعالي عملهولي عشان أرتاح فيه من وش العالم بتاعنا ده
تعرفوا...انا كنت أسعد واحد بتدوينات التلات دي
كنت ببقى في قمة سعادتي وأنا بحط البوست
وفي قمة الانتظار وانا مستني ادخل نت تاني يوم عشان اشوف تعليقاتكم
وافضل من التلات للتلات افكر واحضر في بوست التلات اللي جاي
تعرفوا كمان ..انا لحد ما المدونه اتعملت
ماكنتش اعرف يعني ايه مدونه
بس أمير صاحبي عملهالي ..وفرج وعلام جزاهم الله كل خير كملوها
ولما دخلت على المدونه زيي زي اي حد منكم
لاقيت فيها الحلم اللي بحلم بيه من اول معرض دخلت فيه الكليه
لما حسيت اني بكتب حاجه ممكن حد يحب يقراها
ولما لاقيت فيه ناس بتشجعني وتقوللي اكتب تاني يا محمود
ولما لاقيت يوم بعد يوم زمايلي يبفتحولي قلوبهم وبيعتبروني واحد منهم
وبيبقوا فرحانين وانا طالع اقول في محاضرة او في رواند
كان نفسي يبقى فيه مكان واحد يجمع الناس اللي بحبهم وبيحبوني
اقدر من خلال المكان ده اقدملهم اللي بكتبه
وهما يقولوا انت كده كويس يا محمود
او انت كده غلط يا محمود
او انت ماكنتش كويس المرادي
والاهم
انهم من خلال الشئ اللي انا كاتبه يقدروا يسمعوا بعض ويعرفوا بعض
ويبقى المكان ده مكان لقاء ليهم كلهم
لحد ما اتعملت المدونه
ولاقيت فيها جزء كبير اوي من الحلم ده

وده اللي بيخليني حريص جدا اني اكتب وانشر

واني ممكن ييجي على تلات ومش لاقي نت في بلدنا مثلا اركب واروح السنطه

او ادخل نت معفن ريحة السجاير ملياه ومليان دوشة

عشان اكتب بوست التلات لاني بجد بقيت مابرتاحشي غير هنا...علي صفحات المدونه دي

تعرفوا كمان..اني حافظ معظم الردود اللي هنا ...حافظها صم

واني لما بكون محنوق بجيب المدونه من اول بوست فيها واقعد أقرا التعليقات من تاني

يارب تفضل دايما كده ويارب تفضلوا انتو كمان تحبوها

وتلاقوا فيها ولو كلمة صغيره تكون سبب في سعاده اي حد

ويارب ان شاء الله ماتكونشي آخر سنه في آخر عمر المدونه

وتفضل زي همسات داعيه اطلفت عليها أجمل اسم

رابطة الحب


انا لسه جوايا كلام كتير أوي بس انا طولت عليكوا أوي

ودلوقتي هسيب الكلام ليكو انتو

وزي ما كان الكلام النهارده من غير قيود

اتمنى تكون التعليقات برضو من غير قيود

واي حد نفسه يقول حاجه يقولها

والاختلاف النهارده كمان ان كل واحد منكم له الحق انه يسئلني سؤال

وانا ان شاء الله هجاوب عليه


كل سنه وانا وانتم والمدونه طيبين وبكل خير دايما يارب

أخوكم /محمود أبوالعزم

55 comments:

quiet_storm said...

أول كومينت
ولى عوده قريبا بعد القراءه

semsema said...

تاني كومنت
هقرا وراجع تاني

GEHAD said...

ايه ده برده حجزين انا نفسي ابقى أول رد
كل سنة والمدونة عامرة بإبداعاتكم وروحكم الطيبة وكلماتكم العطرة
دمتم والمدونة وروادها بخير وسلامة
لي عودة

quiet_storm said...

أولا كل سنه وانت طيب والمدونه بخير ومن نجاح لاخر وفى تقدم دائما
واحنا كل سنه واحنا دائما قراء مستمتعين بكل اللى بتكتبه هنا
*********
كلمات جميله بسيطه لكن تحمل خلف الحروف معانى رائعه
كل اجابتك ماشيه على مبدأ الشفافيه
وده المنتظر من انسان مثلك
ربنا يبارك فيك ويكرمك يارب
*********
موقفك من الشعراء الثلاثه دول
كان فعلا جامد جدا وردك بسيط اوى لدرجه انه مقنع جدا
********
موقف اسبوع الجامعات ده كان تكريم من ربنا ليك
وزى ما انت قولت ده احسن من اى مركز اى حد حصل عليه
**********
ربنا يقدرك انك تحقق كل ماحلمت به وكل ما تمنيت ...يارب امين

وياسيدى يعموا كراسه الخط كلها من كلماتك الجميله
وان شاء الله تقول فى حفله تخرجنا قصيده وتكون احلى من قصيده الدفعه اللى فاتت بقى
وبعد الكليه تنتقل لمرحله جديده من الحياه والشعر كمان
ويارب بالتوفيق دايما
********
بالنسبه لموضوع الاغانى او اللى كان هيجيلك من وراها
ان شاء الله ربنا يعوضك خيرا منه
ومن ترك شيئا لله ... فالله حتما سيعطيه

**********
وربنا يديم عليك صفاء نفسك و روح المرح اللى كلنا بحسها فى مواضيعك وكلامك
بالنسبه للاسئله بقى
اولا اكتب اخر ابيات الفتها قبل قراءه التوبيك على طول

ثانيا ...اكتر بيت او كلمه انت كتبتها وعلى طول فى بالك
واكتر بيت او جمله برده على طول فى بالك بس مش ليك

ثالثا ليا عوده تالته باسئله تانيه

رابعا بقى مش عايزه افكرك انا حليت الفزوره وكمان اول كومينت

;;) ;) :D

GEHAD said...

انا قرأت الموضوع كله بس قلت أحجز برده..ههههه
صدقاً سعادتي لا تـُوصف بالاحتفال بمرور عام على هذه الرابطة الرااائعة
أدعو الله أن نظل نحتفل بها كل عام بإذن الله
ومن رُقي إلى رُقي
أدامها الله لنا نعمة
وبارك الله فيها
كلماتكم كعادتكم التي أرجو من الله دوامها لكم ..من القلب ..فتمس القلب سريعا
عندما نقرأ لكم ..ترق القلوب وتنساب السكينة في النفس ويهدأ البال
وقبل كل ذلك يحفني شعور بالسمو والارتقاء
.....
لكل رواد المدونة ..أحبكم دون أن أعرف الكثير منكم
أحبكم لرد رددتموه أو تعليق كتبتموه فلمس شيئا من نفسي وأثر فيّ وأفادني
........
لن أطيل
فما أريده كثيير
ولكن
اعتذار أود تقديمه لعدم تعليقي في موضوعات كثيرة وان كنت اتابعها باستمرار
وإنه لشرف كبير لي أن أترك تعليقا بسيطا هنا في مدونتنا
...
ليس لي إلا أن أدعو لكم دكتور محمود ولكل رواد المدونة
والله يتقبل مني
.....
وأسألكم الدعاء لي أيضا بأن ييسر الله لي الحج هذا العام ويتقبل مني ...
....
خالص تهاني القلبية وامتناني وتقديري لكم

عندما نحب؟ said...

السلام.عليكم.ورحمه.الله.وبركاته
كل.سنه.وانت.طيب.يامحمود
ويارب.مدونتك.ومدونتنا
تكبر.سنه.ورا.سنه.ادام.عينينا
معلش.اذا.كنت.خلتها.مدونتنا.كمان
لان.زى.ماانت.بتخرج.اللى.فى.قلبك
احنا.كمان.بنتكلم.فيها.من.قلبنا
وزى.ماانت.كنت.محتاجلها.اوى.كدا
احنا.كمان.كنا.محتاجين.حد.يعبر.عننا
ويحس.بينا
والحمدلله.انت.نجحت.فى.كدا
ربنا.يوفقك.ويباركلك.يارب
وبالنسبه.لاجاباتك
عن.نفسى.توقعتها
لانك.ببساطه.كتاب.مفتوح.للى.يعرفك.او.اللى.حتى.يشوفك.من.بعيد
انت.كلام.واضح.وصريح.وسط.الغاز
ربنا.يكرمك.ويارب.تحقق.كل.احلامك
بس.مش.لازم.تستنى.الفرص.تتوفرلك
ابدا.بالحلم.الصغير
واطلع.وحده.وحده
لحد.متوصل.باذن.الله.للى.نفسك.فيه
ممكن.كلمه.صغير.دى.متتفقش.مع.كلمه.حلم
بس.انا.شايفه.ان.فى.احلام.صغيره
سهله.بعون.ربنا.طبعا
.تحقيقها.ممكن.يدينا.ثقه.اننا.نكمل.لحد
منحقق.حلمنا.الكبير.وبثقتنا.فى.ربنا
طبعا.قبل.اى.شىء

Dr. Flavio said...

أحلى حاجه في المدونه يا حوده انها من مواليد شهر نوفمبر
هههههههههههههههههههههههه

صحيح البوست طويل لكن أنا قريته كله برغم إني مش في البيت وبرغم إني عاوز أنام جدا .... بس كلامك فوقني واستمريت في القرايه لحد ما خلصت

كل سنه والرابطه دي وصاحبها أو بالأحرى نجمها الساطع بخير

في موضوع الشعر أنا ليا هقول لك تعريف الشعر لدى الخطيب التبريزي في كتابه الشهير الكافي في العروض والقوافي وهو أن ... الشعر هو الكلام الموزون المقفى ... سواء اعترف بك هؤلاء ام لا فانت شاعر يكتب بفطرة شعرية سليمه لا يشوبها علل ولا زحاف ولا في قافيته عيوب .. ويكفيك أنك تكتب الشعر بجميع فنونه دون الإطلاع عليها

أدام الله علينا تلك الرابطه التي يملؤها الحب ما حيينا

كل عام وأنت وأصدقائك بخير

BUTTERFLY said...

ربنا يوفقك يا دكتور.
وكل سنة والمدونة منورة بكلماتك الرقيقةوالتي ان دلت فتدل على شخصية صاحبها.
وعلى فكرة إحنا اللي فخورين بوجودك
ف دفعتنا.
ربنا يوفقك ويديلك اللي بتتمناه وربنا يكتر من أمثالك.

! ! ! ! said...

السلام عليكم ورحمة الله

محمود
كل سنه و أنت طيب ...
و بجد أنا مش عارف أقول ايه
أنت عارف بقا اللي في القلب في القلب

ربنا يبارك و يزيد
أحبك في الله

natural magic said...

كل سنه وانت طيب يا محمود
وبجد كل سنه واحنا كلنا طيبين
وربنا يكرمك ويزيدك وتفرحنا يكلماتك الجميله
عجبني اوي كلمتك انك بتكتب الشعر للي مش ليهم في الشعر
لان انا فعلا كدا
ويمكن كلمه احساسك وصلي دي بقولها في كل رد ليا هنا
وانا بتفق معاك ان دفعتنا دفعه جميله اوي وبنها دفء جميل
وفعلا بنبقي فرحنين اوي لما نلاقيك هتقول حاجه في محاضره او روند....فمتبخلش علينا بقي
ودي اخر سنه لينا مع بعض ...يعني لو تقدر كل يوم تقولنا حاجه يعني ههههه
ربنا يديم عليك محبه الناس

بتقول ان ممكن نسالك صح؟سؤالي بقي
يعني ايه هختم حياتي الشعريه في قصيده يوم تخرجنا؟
انت بتتكلم جد؟يعني ناوي تنكد علينا بانك هتبطل شعر في اليوم اللي هو احسن يوم في حياتنا المفروض؟يا شيخ حرام عليك
بس كدا انا طولت
سلام

natural magic said...

ولا تقصد حياتك الشعريه في الجامعه بس؟اذا كان كدا اوك؟

شق القمر said...

أنا مقدر ده بس أنا متعتي ان حد يقوللي شكرا يا محمود انت عبرت عني
دا أكبر من اي جايزة ومن أي وسام ومن أي تاريخ
متعتي اني أقدر أرسم ابتسامه غلى وش حد
اني أطلع دمعه مخنوقه جوه حد

................................

تسلم محمود
بس ياريت تقدر انت تطلع مع دمعاتك احزانك

بالمناسبة

انت مش من النوع اللى يحب يكسب صديق كل يوم


كمان لازم تجاوب التاج
مش سؤال واحد وتجرى

بالتوفيق أخى الفاضل :)

محمد عبد الباسط said...

ثقتى بان كلماتك ستدوم عبر العصور وستعمر فى الحياة اكثر مما نعمر نحن وانت لانها خرجت من قلب حي...... اطال الله لنا فى عمرك اخي الفاضل
وفى عمر مدونتك الفاضلة
انا كمان عايز اشكر اوى الناس اللى وقفوا جنبك فى اول المدونة عشان هما كمان سبب فى نجاح هذا القصر المهيب
تقبلوا تحياتي
اسالك الدعاء اخى الكريم

حلم كبير

Anonymous said...

السلام عليكم ازيك يا دكتور محمود كل سنه وحضرتك طيب وكل الناس اللي هنا طيبين وبخير

وكل سسنه والمدونه طيبه وبخير ويارب يمر عليها اكثر من الف عام ان شاء الله

بجد كلام رائع من انسان رائع وفعلا مواقف رائعه لك الحق ان تفتخر بها ونحن ايضا لنا الحق ان نفتخر بك ايضا
انا بجد في حياتي عمري ما كنت بقرا الشعر غير نادرا جدا لاني مش كنت بحبه زي ما انت قلت كده كان بيحتاج لفك الرموز لكن بعد اما قرات لحضرتك من زمان وانا بحبه جدا جدا وبعشق فعلا هذا النوع من الشعر وهذه الاحاسيس البسيطه اللي من وجهه نظري اروع كلمات بقرأها وهذا والله صدقا وكلماتك وجملك احسن ماي جمل موجوده في كتاب او في كراسه خط

انا نفسي اسأل حضرتك سؤال

في انسان كده في الدنيا اللي احنا عايشينها دي يحمل كل هذه المشاعر الرقيقه وكل هذا الحب للناس اللي حواليه ؟؟؟؟؟

مستنين كتاباتك دايما يا دكتور محمود او بمعني اصح من وجهه نظري اللالئ

يا رب موفق دايما ربنا يوفقك ويحفظك وان شاء الله تستمر رابطه الحب دايما عامره بكتاباتك ومعلقيها

Amert Alhozn

Khaled said...

أدخلت على نفسي البهجة
وفكرتني أيام زمان

مع إني من طنطا

شكراً يا محمود
ومنتظرين منك حلقات جديدة

Khaled Selim said...

أنا أحييك جداً على عدم دخولك المجال الفني
قرارك صائب جداً

وإحتسب الأجر عند الله في جهادك ضد مباهج الحياة عشان ترضي ربك

اللي يمكن ناس كتير في أيامنا دي لو معاهم ربع موهبتك كانوا مترددوش لحطة واحدة ولو بالحرام

Dr. Flavio said...

قريته تاني في البيت وكنت هعيط تاني برده

بجد بجد مش عارف أقول إيه .. إنت وصلتلي من خلال كلامك رساله مهمه جدا

يمكن انت مصرحش بيها ولا انت قصدتها لكن هي وصلتني .. أشكرك عليها جدا

أحبك في الله يا أخي

wes said...

ازيك يا د.محمود كل سنه والمدونه وانت دايما بخير ويارب كده مليون سنه من النجاح للمدونه وليك وانا ثقتي في الله كبيره ان المدونه دي ان شاء الله هتكون اكبر مدونه شعريه ان شاء الله لانك بجد تستاهل كل خير وبتعبر عنا بجد اذا كنا فرحانين تلاقي بوست ولو كنا زعلانين برده تلاقي بوست يعبر عن ده ان شاء الله مزيد من النجاحات

علي فكره انا متابعه جيده جدا في المدونه والمحاضرات والرواندات بس دي اول مره اكتب كومينت عشان مناسبه زي دي مش ينفع تتفوت من غير كل سنه والمدونه في نجاح

دينا said...

كل سنة ووحضرتك ومدونتك بألف خير ومن نجاح الى نجاح ان شاء الله

dr_dina

snowwhite said...

السلام عليكم ورحمة الله
كل سنة وانت بالف خير يا محمود
وكل اللي علي المدونة هنا بخير ويا رب من نجاح الي نجاح اكبر
وعقبال ما نقرا بوست العيد المية للمدونة
ومش يكون قرار اعتزالك يوم التخرج ده بجد
لان انا ببقي سعيدة وانت بتتكلم عننا وبتفتح قلبك هنا وتتكلم بدون خوف ودي ثقة احنا اكيد كلنا بنعتز بيها
ونتمني تدوم علي طول
ومش تخلي اي كلمة تهزك او تزعلك
واكتب وانشر كل اللي تقدر عليه
وعن نفسي انا لما كنت اقرا شعر في اي مكان بالصدفة
كنت بحس ان معظمه معقد شوية ومش بفهمه كله
لكن لما قريت شعرك وشعر زملائنا في الدفعة
عرفت ان مش كله عقد كده
وبالنسبة لموضوع الاغاني كان فعلا قرارك صائب جدا واكيد ربنا شايلك حاجة احسن
ربنا يوفقك ويكرمك في حياتك ان شاء الله
واتمني مش اكون طولت اوي
ومنتظرين الثلاثاء القادم باذن الله

الحلم الجميل said...

السلام عليكم ورحمة الله وبركاته
كل سنه والمدونه وحضرتك وكل الموجودين بخير
ميلاد المدونه دى حاجه فعلا تستحق الاحتفال
كفايه انها بتسمح لينا نوصل لشعر بنحبه وبنستناه
وكمان عاوزه اشكر من اطلقت عليها اسم رابطة الحب لانها فعلا كده بحس وانا عليها بدفا البيت والاسره
وبما ان قلنا البيت فانا هقوم اساعدهم فى المحشى
ربنا يكرمك يادكتور ويوفقك
فى انتظار بوست التلات القادم

docmero said...

أنا مش عارفه أودى وشى منك فين بصراحه
..
بس
والله والله الغياب عن المدونه بيبقى قهرى واللى لازم تعرفه أن المدونه
ماكنتش حلمك لوحدك دى تعتبر حلم كل واحد بيدخل وبيقرا وبيرد وبيعبر عن مدى تأثره باللى بيقراه

انت يا دكتور محمود كفايه عليك كده علشان عايزه أعيد على المدونه الحبيبه
بس أوعى تكون غيران
....
كل سنه وانتى طيبه يا مدونتنا
واسمحيلى أغنيلك وأقولك

يا نور جديد ..فى يوم سعيد
دا عيد ميلادك أحلى عيد

وبطفى معاكى أول شمعه ويارب عقبال الشمعه ال100وأحنا متجمعين حواليكى وبيكى ويارب انتى دايما المدونه البريمو بين المدونات
وآسفه انى بتأخر عليكى كتيييييييييير لكن المهم انى برجع بشوق اكتر من الاول
وبتمنى انه ميطولش غيابى

والسلام ختام

طائر ٌ بلا أجنحه said...

كويت ستورم

وانتي طيبه يارب حنان وبكل صحة وسلامه يارب
وبشكرك ان على مدار السنه كنتي دايما متواجده ومشجعاني ورافعه من معنوياتي دايما
بجد بشكرك والله
ربنا يخليكي لينا وللمدونه

بالنسبه للسؤالين

الجمله اللي لي وفيد دايما في بالي كتير اوي
بس بما انك عايزة جمله واحده
تبقى
اذا لم تستطع أن تكون مستقبلاً باسماً في حياة من تحب فعلى الأقل حاول ألا تكون ماضي مؤلم

أما الجمله اللي مش لي ومعلقه معايا جدا
جمله قريتها في مدونه اخويا وصاحبي باجوجو

من الممكن أن تنسى نفسك ولكن من المستحيل أن تنسى نفس ٌ سكنت نفسك

طائر ٌ بلا أجنحه said...

نسيت معلهشي الاسم اللي بعلق بيه متغير
ومش هلحق أغيره دلوقتي


جهاد
أدام الله كلماتك الرقيقه المجامله دائما
و أدام الله عليك صفاء روحك ونقاء نفسك
ويسر لكي الحج هذا العم
رجاءا لا تنسينا من صالح دعائك هناك
يكفيني فقط الدعاء بالرحمه لوالدي وبدوام الصحه لوالدتي وبالههداية لي

انا بس افتركت بيتين كنت كتبتهم عنك انتي وحنان

ناس مش بتكتب انما
ليها ذوق تقوله بكل ذوق
فيه ناس بتطبخ انما
فيه ناس كمان تعرف تدوق

طائر ٌ بلا أجنحه said...

عندما نحب

ماتعرفيش مدى سعادتي لما بشوفك تعليقك هنا
جزاكي الله كل خير على كلامك الجميل دايما وعلى تشجعيك المتواصل
كلامك الجميل فكرني بجمله كتبتها زمان

لا تجعل لنفسك حلما صغيرا تحققه فتشعر أنك قد فعلت كل شئ
ولا تجعل لنفسك حلما كبيرا لا تحققه فتشعر أنك لم تفعل أي شئ
ولكن دع أحلامك الصغيرة تتجمع لتعطيك في النهاية حلمك الكبير

طائر ٌ بلا أجنحه said...

فرج

معلهشي تعبتك زي ما انا تاعبك معايا دايما
ربنا يخليك لي والله يا حوده
اما بالنسبه لموضوع الشعر
فانت اكتر حد عارف ان الموضوع بالنسبالي هوياه مش احتراف
واني بكتب اللي ييجي على دماغي
وان كله في الاول وفي الىخر فضل من ربنا
حتة أوزان وقوافي والكلام ده مش فارقه كتير والله

مستني مدونتك ترجع من جديد
بقصيده جامده كده ان شاء الله

طائر ٌ بلا أجنحه said...

باتر فلاي

أنا أول مرة أشوف الاسم
بس ان شاء الله ماتكونشي آخر مرة
أنا متشكر جدا والله
و أنا اللي فخور بجد ومن غير أدنى مبالغه اني واحد منكم
يارب أكون دايما حتى بعد الكليه واحد من الدفعه دي ان شاء الله
ربنا يكرمنا ويوفقنا جميعا

طائر ٌ بلا أجنحه said...

!!!!

يا اخي انت حببتني في علامات التعجب والله ..عشان بقت بتفكرني بيك
فعلا اللي في القلب في القلب يا صاصا
احبك الذي احببتني فيه

طائر ٌ بلا أجنحه said...

ناتشورال ماجيك

وانتي بألف صحه وسلامه يارب
والسنه الجايه زي دلوقتي
تبقوا خلصتوا ورقة الجراحه الاولي
كنت هقول نبقى اتخرجنا بس افتكرت ان الموضوع هيطول شويه
انا متشكر اوي اوي اوي على كلامك اللي خلاني احس اني ماكنتس بكدب على نفسي لما قلتلهم كده
ربنا يكرمك

اما بالنسبه لسؤالك
فبصراحه انا طموحي في الشعر مش كبير أوي .حتى لو في يوم من الايام نزلت ديوان لازم أنزله قبل ما نخلص الامتياز ان شاء الله
لانه هبقى منزله عشان زمايلي
الفترة اللي بعد الكليه مش بفكر فيها الا كطبيب
مش عارف موضوع الشعر ده هيبقى اخباره ايه معايا

انما ان شاء الله ماتكونشي المدونه اتقفلت ويفضل التواصل بيني وبين كل الدفعه الجميله دي من هنا
مهما فرقتنا النيابات و الجيش والتكاليق والدنيا وزحمتها ان شاء الله

طائر ٌ بلا أجنحه said...

شق القمر
تسلمي انتي يا رنا
اوعي تكون زعلتي وانا بتكلم عن الناس اللي بتكتب كلام رمزي شويه
انا بحترمهم جدا والله واولهم انتي طبعا
ربنا يكرمك

نت مش من النوع اللى يحب يكسب صديق كل يوم

جمله استوقفتني كتير اوي امبارح
وقعدت افكر فيها لحد دلوقتي ومافهمتهاش


بالتوفيق ليكي انتي كمان يار نا

طائر ٌ بلا أجنحه said...

محمد عبد الباسط

الأهم من ان تدوم كلماتي هو ان يدوم بيننا ذلك الحب وهذه الاخوة في الله
وأدام الله عليك جمال وتألق مدونتك

كفايه كده بقى لتكون المدونه متراقبه
هههههههههههههه

طائر ٌ بلا أجنحه said...

اميرة الحزن

لا تتخيلي كلامك الجميل ده بيسعدني اد ايه
انتي من الناس اللي بتخليني احس اني حاجه حلوة

اما بالنسبه لسؤالك
ايوه لسه فيه ..وفيه كتير كمان
واحسن مني بكتييييييييييييير
منهم ناس معانا في دفتني والله
ومنهم ناس بتعلق هنا كمان
زي عمر واحمد سعيد وعلام وفرج
بس المشكله في العالم بتاعنا ده ان الوحش هو اللي بيان اكتر
وانتي كمان اظنك من الناس دي واحسن ان شاء الله

ربنا يكرمك ويخليكي للمدونه يارب
وتفضلي دايما منوراها

طائر ٌ بلا أجنحه said...

خالد سليم

ربنا يخليك يا خلود
وانا كل يقين في الله انه دايما هيعوضني خير
انا كفايه علىا كلمة حد جميل زيك
دعواتك

طائر ٌ بلا أجنحه said...

wes

صحيح انه اول كومنت بس كأنك بتكتبي كومنتات من زمان والله
متشكر أوي على متابعتك وعلى تشجعيك
يارب تفضلي منوزراني دايما هنا او في اي حتة
وشئ يسعدني جدا اني اقدر اعبر عنكم
دا شرف لي
يارب اقدر اعمل كده دايما

نورتي المدونه

طائر ٌ بلا أجنحه said...

دينا

متشكر اوي وكل سنه وانتي طيبه
ومستني تبعتي وقت اللقاء الأدبي عندكوا
عشان أجيب الرجاله بتوعنا ونيجي عندكم في المنصورة ان شاء الله

طائر ٌ بلا أجنحه said...

سنو وايت
كنت منتظر ردك والحمد لله انه جه
انا بعتز اكتر منكم بالثقه دي والله
ولولا ان انا بعتبركم زي اخواتي فعلا عمري ماكنت هكتب عن نفسي كده
وان شاء الله الثقه دي هتفضل موجوده دايما وهتخليني اكتب أكتر و أكتر ان شاء الله
أما بالنسبه لموضوع الأغاني
فانا عمري ماندمت وعمري ماهندم ان شاء الله
كفايه ان ربنا عوضني بناس زيكم في حياتي
دا كفايه على جدا

ربنا يكرمك ويعزك ويصونك ويحفظك دايما يارب

طائر ٌ بلا أجنحه said...

الحلم الجميل

ربنا يكرمك ويخليكي للمدونه يارب
وعلى فكرة على ما كلامك أسعدني على اد ما اول مرة ازعل من المدونه
لانك مش هتقدر تبعتلنا محشي من خلاالها
متعوضه ان شاء الله
يارب يكون طلع ططعمه كويس
مع اني مش بحب المحشي يعني

مستني ردودك دايما

طائر ٌ بلا أجنحه said...

دوك ميرو

ولا يهمك والله
احنا كفايه علينا زياراتك الخاطفه دي
ويابخت المدونه بتهنئتك الجميله دي
بس بلاش موضوع ميت سنه ده
ان شاء الله الواحد مايعجزشي ويموت وهو شايل نفسه كده ان شاء الله

مستني ردرودك دايما حتى ولو كانت كل فين وفين

أحمد سعيد بسيوني said...

بسم الله

ألف ألف مبروك يا حودة على اتمام المدونة لعامها الاول

وانشاء الله تستمر حتى نحتفل بها في يوبيلها الذهبي بعد خمسين عام وساعتها يكون عندك كام وشبعين سنة وشاعتها هاكون برضه انا من دورك وهاخش اهنيك واقولك اني شعيد جدا زي شعادتي الاولى باتمام مدونتك لعاملها الاول من 50 شنة

قول يا رب

خلي بالك الشين الكتيرة دي عشان هنكون ساعتها طرم بقى بدون شنان
هههههه

حبيبي محمود

حابب اسالك 3 اسئلة

من هو شاعرك المفضل ومن هو كاتبك المفضل

اول بيت كتبته او اول قصيدة
اكيد كانت من زمان اوي

امنية تتمنى تحقيقها

معذرة على الاطالة

دمت سالما

فجر اخر said...

السلام عليكم ورحمه الله
كل سنه وحضرتك طيب يادكتور محمودويارب عقبال يارب 100 سنه تفضل فيها منور المدونه بكل اللي بتكتبه سواء هو شعر او لا اهم حاجه يفضل في نفس الاحساس الجميل ده الي هو اهم حاجه فعلا
طبعا انا بعتذر عن عدم ردي علي كتير من المواضيع اللي فاتت بس والله انا علي طول بفتح المدونه وبتابع كل اللي بتكتبه بس بحس ان ردي هيبقي صغير اوووي جنب اللي المفروض يتقال

اجاباتك عن الاسئله عجبتني اووووي وخصوصا اجابتك اعن السؤال بتاع مفهومك عن السعاده ده عجبني جدا

بالنسبه للاسئله انت الصداقه ايه بالنسبه ليك وهل لقيت في حياتك الصديق اللي ممكن تقول عليه انه توأم روحك

علي فكره عجبتني اوي قصيده نزيف من ندم دي جدااا بجد عيطت لما قريتها

يا رب
بدعي من قلبي ولساني...... والدموع بتقول آمين
بدعي ماتسيبنيش لوحدي ....يا نصير المظلومين
بدعي ماتسيبنيش لوحدي ...و إنت خير الراحمين
بدعي ماتسيبنيش لوحدي ...لو تسيبني هروح لمين
يارب يكرمك ويديم عليك جمال احساسك وصفاء روحك وحب الناس ليك ويجازيك كل الخير ان شاء الله

semsema said...

يااااااااااه هو أنا اتاخرت كده
قريت البوست والله اول ما اتوضع
كل سنة ومسافر الي ذاتي بألف خير
وربنا يكتر اشعارها ومحبيها
بجد يامحمود مدونتك دي الشط اللي برتاح عليه من عناء الابحار طول اليوم
دمت لنا مبدعا
ودمت لاهلك بارا
ودمت لربك طائعا
ودمت لنفسك متميزا
تحيااااااااتي
ومعلش الرد اتأخر
بس انا حجزت بدري علي فكرة
وحليت الفزورة
فين الهدية بقي؟؟؟؟؟
وعد الحر دين يامحمود متنساش

عندما تنهمر الدموع said...

السلام عليكم ورحمة الله وبركاته
ازيك ياد/محمود يارب تكون بخير وكل عام والمدونة بخير ويارب تفضل دايما مجمعانا على المودة والحب والاحترام وعقبال مايكون عندها 100سنة كلها شعر وقصائد وجمل وكلمات ومشاعر واحاسيس صادقة وجميلة ومعبرة عنا
فعلا كانت سنة جميلة قرينا فيها كلام اجمل قدرت تعبر فيه عننا عن همومنا مشاكلنا افراحنا ،عدت سنة عشناها مع المدونة وتقاسمنا معاها لحظات مرة ولحظات حلوة ،اكتسبنا من خلالها اصدقاء وكونا مع بعض اسرة جميلة يكن افرادها لبعضهم كل حب وتقدير واحترام عشان كده بدعي ربنا انه تبقى هذه المدونة دائما رابطة الحب فيما بيننا
على فكرة انا لما قرأت كلام حضرتك عن محاولاتك الشعرية ودخولك مسابقات كتير يمكن ربنا لم يكتب لك التوفيق فيها ولما حضرتك ذكرت ان كتير قالوا انك مش شاعر حسيت اني عايزة اقول لهم كلهم انه ممكن يكون معاهم حق في ان شعر حضرتك ممكن ميكنش شعر بالمعنى المتعارف عليه انا قصدي انه شعر نوعا ما ضعيف في الصور الجمالية والخيالية خالي من الاستعارات والتشبيهات والكلام الغامض والمبهم وكل الحاجات اللي كنا بندرسها في الثانوي الحاجات اللي كنا بنكرهها لأنها صعبة ومش كلنا كنا بتقبلها وكنا نقعد نحفظ فيها سواء كنا فهمينها اولأ وكنا مجبرين نذاكرها عشان نخش نكتبها في الامتحان ونطلع بعده ولا كأننا سمعنا عنها لو هو ده الشعر في نظرهم ولو الشاعر عندهم هو اللي يكتب حاجات مش واضحة وييجي كل واحد يفسرها على مزاجه فأنا مبحبش النوع ده من الشعر وفعلا انا لا استسيغ كل الاشعار في حاجات تدخل القلب على طول بسيطة واي حد يفهمها بسهولة وشعر حضرتك من النوع ده انا هقول لحضرتك حاجة انا قبل ما ادخل على المدونة مكنتش بقرأ شعر ولا حتى ليا اي ميول ادبية ولما اصحابي حكولي عن شعر حضرتك اللي كان في معرض الكلية والله طلعت مخصوص عشان اقرأه عشان اشوف شعر محمود سليمان اللي كانوا بيحكوا عنه وفعلا لقيت ان معاهم حق اول مرة اقرا قصيدة من غير محس انها مملة او افضل اقول امتى هتخلص وبعدها بدأت ادخل على المدونة في الاول اترددت اني اكتب كومنتات لكن جمال ماكنت اقرأه هو اللي شجعني على كده انا مش بجامل حضرتك لأني مش مجبرة اني اقول الكلام ده لكن هي دي الحقيقة اذا كان كلام حضرتك من وجهة نظرهم مش شعر فأنا متأكدة انه شعر بس من نوع جديد شعر بيعبر عما بداخل صاحبه بكل وضوح وصراحة وشفاشية من غير تجميل او تزييف اوقيود شعر خرج من نفس جميلة ومن مشاعر واحاسيس صادقة خارجة من القلب ولقت طريقها بسرعة للقلب شعر جمع ناس كتير اذواقهم مختلفة وربطهم بيه ووقت ماكان صاحب الشعر ده فاقد الثقة في كل اللي بيكتبه ويوم ما قرر يقفل المدونة ويبطل يكتب لقى ناس كتير يعرفها وناس اكتر ميعرفهاش وفقت ضده ومنعته واقنعته انه يكمل ويكمل وانهم دايما معاه وانه لما يحتاج لهم هيساعدوه وهيقولوا رأيهم في كل اللي بيكتبه بصراحة بعد كل ده لسه برده هيقولوا عليك انك مش شاعر اصل الشاعر مش بكلامه الشاعر بيكون شاعر بحب الناس ليه بحبهم لكلامه وبمدى تأثير كلامه فيهم وبسرعة وصوله لقلوبهم وبسرعة استدراك عقولهم لهذا الكلام مع اختلاف مستويات تفكيرهم
عشان كده كلنا بنقول انك شاعر على الاقل لأنك شاعر بمشاكلنا وهمومنا وبتعبر عنها بكل بساطة وعفوية
في اخر كلامي بتمنى من حضرتك انك تستمر وتكمل واحنا دايما معاك وبندعيلك ان ربنا يكرمك ويوفقك وينمي موهبتك ويحبب كل خلقه فيك وكل عام وحضرتك بخير

quiet_storm said...

انا اللى المفروض اشكرك والله مش انت
***
انا بس افتركت بيتين كنت كتبتهم عنك انتي وحنان

ناس مش بتكتب انما
ليها ذوق تقوله بكل ذوق
فيه ناس بتطبخ انما
فيه ناس كمان تعرف تدوق

ربنا يخليك على ذوقك انت بجد
ههههههههههه....
بس احب اقولك حاجه انى الحمد لله بعرف اطبخ وادوق كمان
وجوجو الاجازه دى اتظبطت فعلا
...الله يكون فى عونك يا عمو
ووعدتنى كمان بعزومه لما ترجع بالسلامه ان شاء الله من غير اى مساعدات داخليه م البيت عندهم او خارجيه منى انا
وساعتها انا هدوق وهقول بكل صراحه
*****
فاضل بقى انى افكرك بسؤال سالته فى كومينتى التانى وانت نسيته تقريبا

اكتب اخر ابيات الفتها قبل قراءه التوبيك على طول


وكده وكفايه كلام بقى انا اكتر حد اتكلم

GEHAD said...

كتبتهم عنك انتي وحنان

ناس مش بتكتب انما
ليها ذوق تقوله بكل ذوق
فيه ناس بتطبخ انما
فيه ناس كمان تعرف تدوق

.........
جزاكم الله خيراً دكتور محمود
شكرا جزيلاً
أخجلتمونـــا
بيتين رائعين ..شرف كبير لنا بجد..سررتُ كثيراً بهما ..شهادة أفخر وأعتز بها
جدااا ..ربنا يكرمك
بُـوركتم وسلِمتم
لكم خالص التقدير والامتنان
واستجاب الله دعاؤكم وأعطاكم ما سألتموه
دعواتكم لي أيضاً
...........

GEHAD said...

معلش اسمحلي أرد على كلام حنان
..
بس احب اقولك حاجه انى الحمد لله بعرف اطبخ وادوق كمان
وجوجو الاجازه دى اتظبطت فعلا
...الله يكون فى عونك يا عمو
ووعدتنى كمان بعزومه لما ترجع بالسلامه ان شاء الله من غير اى مساعدات داخليه م البيت عندهم او خارجيه منى انا
..
منورة يا حنونة
اتظبطت!!!!
الله يكون في عونك يا عمو!!!!!!!!!!
ماااااااااشي.. لما أشوفك
!!!!!!!!!!!وعزومة؟؟؟؟؟؟
امتى دي؟
وكمان من دون مساعدات!!
كدا بقى لازم أعترفلك إني ماأعرفكيش أساساً..هههههه
بأهزر طبعا
ادعيلي أنتِ بس ربنا ييسرلي الحج
وبعدها أعزمكم كلكم ولا يهمكم خالص بلا أي مساعدات
بس أنتوا اللي عايزين كدا ..ماليش دعوة بقى بالنتايج..تسلمي حنون

صانعة الحرية said...

البوست طويييل
لكن طيب جدا
جعل الله كل حرف فى ميزان حسناتك
ورفع قدركم ورفعكم بتواضعكم هذا
اتابع المدونه منذ فتره

طائر ٌ بلا أجنحه said...

السلام عليكم ورحمة الله
متأسف أوي على التأخير في الرد
غصب عني معلهش

حبيبي أحمد سعيد
ربنا يبارك فيك واظن ان مدونتك هي كمان قاربت على عامهاالاول
بس انا مش هشترك في موضوع الشين ده ان شاء الله
انا بدعي ربنا دايما ياخدني ليه وانا شايل نفسي كده

بالنسبه للأسئله
الكاتب المفضل والشاعر المفضل
الكاتب دي مش عارفها بصراحه
مش عارف ليه بقت قرائاتي قليله جدا
بقيت بعتمد بشكل كبير على الراديو في اكتساب الثقافه
يمكن عشان بحس ان معظم الناس اللي اتشهرت دي اول ما القلم طاوعها وكتاباتها وصلت للناس أول ما تجرأوا تجرأوا على ربنا زي نجيب محفوظ ويوسف السباعي واحسان عبد القدوس ويوسف ادريس وكامل الشناوي
عشان كده مش بحب أقرأ ليهم كلهم
بس بحب أوي الطريقه الساخرة اللي بيكتب بيها يوسف معاطي(في الجرايد) وأنيس منصور واللي زيهم كده
وبحب كمان أقرأ لمصطفي محمود
اما الشعر فأكيد مش هتصدقني اني مش من هواة قرائة الشعر
ونادر أوي لما اجيب حاجه وتعجبني
مش عيبي في الناس اللي بقرالها
هو عيب في أنا ..اني مش بحب الصيغه الشعريه أوي
بس بحب شاعر اسمه عبدالوهاب محمد وواحد ماخدشي حقه اسمه فتحي قوره
دول بحس اني قريب منهم في الكتابه شويه
وبحب- وبدون مجامله-زمايلي في الكليه كلهم وبستمتع بيهم
وبحب لعب سيد حجاب بالكلام رغم عدم احترامي لشخصه من موقف شفته ليه
كفايه كده اصلي طولت


أول بيت كتبته كان عن النبي صلى الله عليه وسلم وسبحان الله طلع موزون لوحده كده رغم اني ماكنتش اعرف يعني ايه وزن
كان بيقول
حُـمّدت في الأخلاق صرت محمدّا..ياخير من نال العلا وتمجدا

أمنيه اتمني انها تتحقق

اكيد احلامنا للآخرة وللأقصى وللمسلمين واحده كلنا واحده
أما بالنسبه لي شخصيا
فبحلم أشوف اخواتي كلهم مرتاحين في حياتهم
ووالدتي كمان أشوفها مرتاحه ولو أقدر أطلعها كل سنه تحج أو تطلع عمرة
واخيرا ربنا يخليلي أصحابي ويرزقني ببنت الحلال اللي تحبني و تعفني وارتاح معاها من عناء الدنيا ده

ربنا يكرمك يا ابوحميد

طائر ٌ بلا أجنحه said...

فجر آخر

في البدايه اسمك بيعجبني جدا
ان شاء الله هبقى
أحطه عنوان لقصيده كده..بعد اذنك طبعا
مافيش داعي للاعتذار ابدا المهم انك كنتي متابعه المدونه الفترة اللي فاتت
بس تأكدي برضو ان رد أي حد ولو ضغير فهو بيمثلي حاجه كبيرة جدا
متشكر أوي على كلامك الجميل أوي ده
جزيتي الجنه
وبالنسبه للسؤال

انا ماليش في الدنيا دي غير اصحابي اصلا
يعني مافيس في حياتي قرايب بجد غير نادر جدا
ولا جيران لاننا بعيد عن السكن شويه
ويمكن عشان كده ربنا عوضني باصحابي الكتير دول
وكلهم والله بعتبرهم توأم روحي
واللي بيسعدني أكتر اني ألاقي ناس كتير منهم بتعتبرني كده
أدامهم الله ذخرا لي

شكرا مرة تانيه
و جزاكي الله كل خير

طائر ٌ بلا أجنحه said...

سمسمه

ربنا يكرمك يا سماح
وأدامك الله ذخرا لهذه المدونه
ودايما مشجعاني ورافعه من معنوياتي كده
على فكرة أنا بعتلك الهديه
يارب تكون وصلتك

طائر ٌ بلا أجنحه said...

عندما تنهمر الدموع

حقيقي مش عارف اشكرك ازاي
تتضاءل كل الكلمات
جزاكي الله كل خير
ويارب يارب دايما منورة المدونه علطول
متشكر اوي وآسف اني مش عارف أرد

طائر ٌ بلا أجنحه said...

حنان وجهاد
انا ماليش دعوه بالمشاكل العائليه اللي بينكم دي
بس البيتين دول أقل حاجه ممكن تتقال والله
جزاكم الله كل خير

طائر ٌ بلا أجنحه said...

صانعه الحريه
معلهشي البوست كان طويل شويه
بس الذكرى دي مابتجيش غير كل سنه مرة
شكرا على ردك أوي
وأتمنى تفضلي متابعه المدونه دايما

طائر ٌ بلا أجنحه said...

ناس كتير اتمنيت أشوفهم في المناسبه دي
مش عايز اقول اسامي عشان ما انساش حد
بس افتكر منهم دلوقتي

هبهوبه
عمر
بيور بلو
باجوجو
أكوا بلو
smile
emi_doc
f.A

وعذرا لم تسعفني الذاكرة في بقية الأسماء

Anonymous said...

كل سنه وانت طيب يا زعيم
احمد صقر

طائر ٌ بلا أجنحه said...

وانت طيب وبكل صحه وسلامه يا دكتر
طبعا ماحدش هنا عارف ايه قصة زعيم ودكتر دي
هههههههههههههه
وبالمناسبه بقى.. الف مبروك لاحمد

كل سنه و احنا اخوات او يمعني اصح كل سنه واحنا قلب واحد يا ابوحميد
ربنا يخليك لي