كل سنه وانتم طيبين

Sunday, December 7, 2008

السللام عيكم ورحمة الله



journy-to-myselfيسر مدونه



أن تعلن عن فتح باب القبول لدفعة جديدة من اللحوم



على ألا يقل حجم اللحوم المقدمة عن نصف كيلو ولا يوجد حد أقصى للتقديم



وذلك بمقر المدونة الجديد بحديقة الخالدين بالدرّاسه



وتهيب المدونه بعملائها سرعة التقدم قبل أن تمتلأ الثلاجة



ولا يشترط أن تكون اللحمه لحمة صافي



فنحن نقبل اللحوم الملبسة والكندوز..ضاني .>بناتي أو بتلو



هذا ويسعد المدونه لأول مرة لهذا العام ان تقدم خدمتها الجديدة



توصيل الأكالين للمنازل



فقط اترك عنوان بيتك وسوف يصلك مندوبنا- اللي هو أنا- ليأكل عندك



كل سنه وانت طيبين وبكل خير يارب



انا بهزر طبعا في موضوع اللحمه دي



واكيد أصحابي عارفين اني مش أكــّـيل ولا بحب الأكل أصلا-استروني ربنا يستركم



انا مالاقيتش حاجه أعيد بيها عليكوا غير اني أدعي لكل الناس امبارح



على الفطار والنهارده في صلاة الفجر للمسليمن كلهم



ولاخوانا المحاصرين في غزه



ولكل الناس اللي بتزورني هنا



ربنا يكرمهم ويحفظهم ويحققلهم كل اللي يتمنوه



ودي قصيدة معلهشي طلعت مش أد كده



بس استخسرت أركنها وقلت اعيد بيها عليكوا



حاجه على ما قدرت والله..يارب يارب تعجبكوا



ضحية الضحية



من مذكرت طـِفـِس



مش أنا والله...أنا بحب الأكل بس مش للدرجادي



يا لحمة ٌ حمــراء طـــــال غيابها.....عـــــــودي لنا ولتمــــلئي ثلاجتي
العيد أضحى عيد أضـــحي حينما......بعث الذين سيــــــذبحون بلحمتي
...و رأيت قوماً في طــريقي جهزّوا.....كل المــــوائد بالتحابيش التي
أجْـرَت لعابي واستباحت خاطري.....والشــوق نحو اللحم أدمى مهجتي
طارت عصافير البطون وزفزقت.....فأجبـــــتها..اليــوم لا ..لن تسكتي
وأخذت أمشي في الطريق أمامهم.....كي يعـــــزموني إن أحسوا حالتي
لم يُبصروني..عدتُ في عجل ٍلهم.....و أمــــــامهم آتي فأبطئ ُ خطوتي
قالوا تفضل..قلتُ لا في عــــزة ٍ....- من خلف قلبي- كي أداري لهفتي
قالوا تفـــــضلْ قلتُ لست بجائع ٍ....مازال أكـــــل الأمس يملأ معدتي
قالوا تسلـّى..قلتُ أتســــلى فقط..... بعض التســــالي كي أجيب أحبتي
شمّرت ُ كـــــمّي.. والحذاء خلعته ُ....وصــرخت فيهم أفسحوا يا سادتي
و جلســــتُ ما بين الرجال مربـِّعا....وخلـعتُ تي شيرتي هناك وساعتي
وضـــــــــعوا أمامي حلة ً مملوءةً.....يا سعد بطــــــني حين تأكل حلتي
ضـاني..بنـــاتي..أو بتلــّو هاهنا......يا حيــــرتي ما بيـــنهم يا حيرتي

ريـَش ٌ وهُبَرٌ ..مــــــوزةً أو فخدة ٌ ...مابينـــــــهم طبعاً سآخذ راحتي
والأرز في منــــــباره ِ متراقصاً......طـــبق الكوارع كم يزغلل مقلتي
مخ ٌ..عكاوي..لحم ُ رأس ٍ..كرشة ٌ....أصحبت أخشى أن أموت بفرحتي
وبسلة ً وبطاطـــساً وطــــــواجناً......سأنال منـــــها لن أضيـّع فرصتي
محشي كرنب ٌ بعده ورق العنبْ....وأمامــــــــــــــهم حتماً سأرفع رايتي
وحمامتين صغــــــــيرتين وبطة ً....و بدأتُ أغرق في صواني شوربتي
وبدات ألهفُ مسرعاً طبـقاً طبق ْ......والناس حـولي يحـــسدون شهيتي
بل إنهم خافـــــــوا على أولادهم..... و مضـــــوا بهم لمّا رأوا وحشيتي
إني جعااااان ٌ فاعــذروني يا بشرْ.....ولــتتركوني الآن أشــــبع رغبتي
اللحم ُ غال ٍ والجيــــــوب نظيفة ٌ.... وشكــــوتُ للرحمن ظلم حكومتي
و العيد فرصـــــتنا لـنـملأ بطننا.......خلــّـوا إذنْ بيـــني وبين وليمتي
واصلت ُ زحفي في الصواني كلها.....وكأنني أســـــد ٌ وتلك فريســـتي
فإذا بمغص ٍ في مصـــاريني أتى...فصرخت آااه..آه ياآبة يا أمّه ياعمتي
كبَسَ الطعام على جميع مراوحي.....وسقـطتُ مرميّا ً صريع طفاستي
و أخــــذت ألف ملــــــين ٍ وملين ٍ....لكـــنّها..لا لم تــــــدواي أزمـــتي
مابين إسهــــــــال ٍ وامساك ٍ هنا......العـــــــيد ُ مر ّ ولم أداوي تخمتي
والآن أرقد ُ في ســـريري هاهنا......وطـــــــفاستي كتبت نهاية قصتي
قد كنت أبغي في اللـحوم أجازة ً.....فقضيتُ في الحـــمّام كل أجازتي

every year..your heart near

15 comments:

Mahmoud Solliman said...

بقي كده يامحمود امساك واسهال في العيد.... عموما هي جامدة جدا خصوصا الجزء اللي فتحت فيه في الاكل .... بس يلا عزومة تفوت ولاحد يموت

quiet_storm said...

كل سنه وانت طيب وبخير وصحه وسعاده يامحمود
يارب السنه الجايه يكون عيد اسعد عليك وعلى كل اللى تحبهم
وربنا يتقبل دعاءك
يارب تكون افتكرتنى بدعوه كده

قصيده دمها خفيف اوى وخصوصا انها مكتوبه بالفصحى

ودى النهايه الطبيعيه للطفاسه

ll[.::Dr.ShaboMania::.]ll said...

والله جميله جدا يا حوده....وموضوع اللحمه ده في ميعاده
_________________
اه صحيح ياريت تلغي حته أشكوا حكومتي يابني دا امن دوله وانت مش قدها
ههههههههههههه
كل سنه وانت طيب يا محمود
Dr.ShaboMania
The Exorcist MiDo
Mo7amed Shalaby

أحمد سعيد بسيوني said...

بسم الله

رائعة يا حودة

بس وصفك التفصيلي ده - من تشمير كم وخلع حذاء - لا يصدر الا عن واحد عنده الصفة دي فعلا
ههههههههههه

باهزر معاك طبعا يا محمود
انا عارفك اقل واحد بتاكل في الدنيا عشان كده مش هاعزمك في العيد ده لان بعد اي عزومة ليك بنرمي الاكل
وش بيغمز

كل سنة وانت طيب يا محمود
وكل عام وانت في تقدم وسعادة وهناء

دمت بكل خير

Dr. Flavio said...

اوعوا تصدقوا يا جماعه

محمود مش كده خااااااااااااالص

انا عزمته ومجربه ... خفيف خفيف يعني

بس يا حوده .. بقافيتها فكرتني باللآن تبتسم الدموع

ولو إن دي هتبقى


الآن تبتسم البطون
هههههههههههههههههههههههههههههههههه

natural magic said...

كل سنه وانتوا بالف صحه وسلامه

منار said...

هههههههههههههههه

ربنا يبسطك ايه كل ده

والله حرام عليك

المشكله ابعتلك نص كيلو اللحمه ازاى

؟؟؟؟؟؟؟؟؟؟؟؟؟؟؟؟؟؟؟؟؟؟؟؟

المهم

كل عام وانت بالف خير

ويارب عيد سعيد وايام سعيده دايما

وخالص تحياتى لزوار المدونه

وعيد سعيد

بس قصيده من الاخر

تحفه ودى بجد اخرة الطفاسه

ربنا يستر

semsema said...

ايه الوليمة الجامدة دي
ما شاء الله ايه اصناف اللحوم دي كلها؟؟
انت كنت معزوم في الصعيد؟؟
ولا عند قبيله من قبائل واحة سيوة؟؟
اعتقد ان لو شفت الوكل ده كله ادامي ممكن يجيلي هارت اتاك من تخمة الرؤية بس
ماشاء الله وش بيخمس اهو لتقول بقر او بنق او بحسد ولا حاجة
قصيدة حلوة ودمها خفيف وخفيفة مع كم الاكل الرهيب اللي فيها
كل سنة وانت بالف خير وكووووووووول الاسرة يارب
عيد سعيد عليك وعلي كل اللي بتحبهم

SMILE said...

السلام عليكم ورحمة الله وبركاته.........مع انى مليش فى اكل العيد الكبير ده وبقضيه رجييم بس حسيت انى شبعت من قراية طريقة الاكل .........اكيد القصيده دمها خفيف...........عيد سعيد على كل زوار المدونة

M.EL-KHATIB said...

جااااااااااااااااااااااااااااااااامده بجد يامحمود والله

حلوة حلوة يعنى

هههههههههههههههه

بس انت مش أكيل ولا اية

نزلت من نظرى كده

انا ميملاش عينى غير الناس الاكيلة اللى ذيى

بيشتكوا منى فى البيت من كتر الأكل

وواحد صاحبى بيقوللى

الريجيم بالنسبة لك

مش مجرد توفير فى فلوسك

ده انقاذ لأسرة كاملة

انت خطر على الاقتصاد المصرى

بس بجد راااااااااااااااااااااااااااااائة

docmero said...

الف حمد لله عالسلامه
هههههههه زعلتنى بجد
مش كله مره واحده طيب
خليها الغدا عند فلان والعشا عند علان
كده الحال يمشى وتعدى بسلام
ودى احلى عيديه بجد
كل سنه وانت والمدونه وأهلها بخير وسعاده
ودايما مع بعض

هبهوبه said...

السلام عليكم
أولاً كل سنة وكل أصدقاء المدونه بخير ودايماً في صحة وسعادة
وإنت يا محمود يارب دايماً تكون بخير وربنا يحقق كل أمنياتك وأحلامك السعيدة وتبقى دكتور كبييييييييييير وشاطر جداً ومشهور جداً عشان تعالج الراجل بتاع العزومة ده إذا كان في أمل في علاجه أصلاً حرام عليك يا محمود مفيش إنسان مهما كان جعان يأكل كده بس عايزة أقولك إنها عديه جميلة جداً ودي أحلى عديه أنا خدتها في العيد ده.

dina said...

v funny mahmoud realy
kol sana weenta tayb
sorry for delay

عندما تنهمر الدموع said...

السلام عليكم ورحمة الله وبركاته
كل سنة وحضرتك طيب وبألف خير ياد/محمود وكل سنة واهل المدونة كلهم بخير وصحة وعافية
القصيدة جميلة جدا ودمها خفيف اوي والله يكون في عون الطفس اللي كان بياكل في القصيدة وربنا يشفيه حقيقي عدية جميلة اوي ويارب تفضل حضرتك
دايما في كل عيد تعيدنا بقصيدة زي دي
كل سنة وحضرتك طيب مرة تانية وان شاء الله السنة الجاية تكون محقق كل احلامك وامانيك

Sahar said...

سلامو عليكو

بجد تحفة ماشاء الله

بجد الوصف رهييب

تحياتي ليك يافندم

و كل سنة و حضرتك بخيييييير