السلام عليكم ورحمة الله وبركاته
انا هحكيكلوا كام حكايه كده
ومهمتكوا انتو انكوا تقولوا مين اللي قام بأداء الأدوار
وتقولوا رأيكم في الحكايات اللي فهمتوها
.....................................................
اول حكاية دي بتوصف الرأي السياسي في موضوع المعبر
المحمول والشاحن
مرة كان واحد صاحبي طيب شويه -و ده حصل فعلا-موبايله مش راضي يشحن
وقالوله العيب في الشاحن ولما روّح
قام قاطع المحول- الكعبيرة الكبيرة اللي في أول الشاحن من فوق دي
وقام معري طرفين السلك وحاطههم في الفيشه
قال يعني كده صلح الشاحن
وكان طبيعي ان الموبايل يتحرق
صحيح كان لازم الكهربه تدخل الموبايل بس لازم يبقى فيه محول
لاننا لو شلنا المحول الموبايل هيتحرق
ولو الموبايل ماخدشي شحنته من الكهربه يبقة مالوش لازمه
حد فهم حاجه؟؟؟؟؟؟؟؟؟؟؟؟
على العموم هو ده الرأي السياسي
بس اي حد مقتنع بيه لازم يقري الحكاية دي
كان فيه أخين راضي وباسل
الاتنين طول عمرهم بيحبوا بعض جداوعايشين مع بعض
وبعيدن جه واحد مستقوي ضربهم الاتنين
وخد شقة باسل كلها وسابله قوضه واحده محبوس فيها
وشوية كمان وخد قوضة من شقة راضي بس راضي ماسكتش
وحارب شويه كده وخد نص قوضته تاني
قام المستقوي قال له انا هسيبلك قوضتك بس بشرط
أضرب باسل ولا اسيبه انت مالكشي دعوه
عايز تكلم اتكلم انما تمد ايدك لأ
و وافق راضي و استفرد المستقوي بباسل وفضل يضرب فيه
انما باسل فضل باسل وراضي فضل راضي
وكل شوية راضي يخبط على باسل ويقوله
تستاهل..أنا مش قلتلك ياباسل اقعد ساكت انت مش أد المستقوي
على العموم خد شويه الأكل دول عشان تقدر تكمل أصلهم مش هيبطلوا ضرب فيك دلوقتي
ولما يخلصوا ضرب فيك انا هاخدك أعالجك وأرجعك
تفتكروا فيه أخ كبير يعمل مع أخوه الصغير كده؟؟؟؟؟؟؟؟؟؟؟
...........................
النمل والفيل
كان فيه نكته-لللي يفهمها- بتقول
مرة شويه نمل-انا متخيلهم اتنين وعشرين نملة-شافوا فيل عايز يعدي على أرضهم
قالوا لا احنا مش هنسكت احنا هنتجمع ونطلع كلنا على ضهره
نقرصه قرصة جامده أوي تخليه يبعد
المهم طلعوا.. واحده راحت هنا وواحد راحت هنا قام الفيل هازز ضهره موقعهم كلهم
ماعادت نمّول صغيره اسمه فوزي فضلت على رقبته
قاموا كلهم مجمعين بعيد وفضلوا ينادوا من بعيدا
اخنقه يا فوزي
أكيد انتو عرفتوا مين فوزي
حابب بس اقول ان الفيل ماهوش فيل...الفيل ده فيل عشان احنا شافينه فيل
احنا اللي بسكوتنا زي الواحد وعشرين نملة دول عملناه فيل
...........................................................
الفراخ
مره واحد راح لواحد زعيم عربي وقاله أنا عايز أمسك الحكم
قاله الموضوع مش سهل كده
قاله جربني بس كده
قاله طب خد شوية الفراخ اللي في القفص دول
وتعالي على ميدان كبير وافتح القفص دقيقه واحده
لو عرفت تلمهم تاني هسيبلك الحكم..قاله يا سلام دي سهله خالص
خد الفراخ وراح الميدان الكبير وساب الفراخ فرخه راحت هنا وفرخه راحت هنا وهكذا
جه يلمهم مالمش ولا واحده ورجع واعترف انه ماعرفشي
الزعيم قالّه تعالي وانا اوريك السياسه تبقى ازاي
راحوا على نفس الميدان بس الزعيم طول السكه كل شويه يهز القفص جامد
كل شويه يهز القفص جامد
وصولوا الميدان كانت الفراخ داخت..نزلهم في الميدان مافيش ولا فرخه اتحركت
قام لاممهم وحاططهم في القفص تاني
وقال فهمت يعني ايه سياسة؟؟؟؟؟؟؟؟؟؟؟
..............................................
البحر والمركب
ركزوا أوي في الحكاية دي
واحد مسلم غلبان زي حالاتنا كده كان عايز يعدي البحر
بص للبحر لاقاه كبير أوي مش شايف آخره..تعب واليأس صابه
وبص لقى مركب كبيره أوي واقفه ومستنياه وعلى استعداد تعديه البحر مهما كان كبير
فرح أوي بس جه يجري ناحية المركب لقى نفسه متكتف ورجليه من تحت متقيدة
ساعتها فهم انه لازم يفك القيد عشان يركب المركب عشان يقدر يعدي البحر
حد عرف ايه القيد وايه البحر وايه المركب
أنا طولت عليكوا كتير اوي
بس هتعذروني لو عرفتوا اني هديلكوا وهدي لنفسي وللمدونه اجازه لمدة شهر من دلوقتي
انا بحاول أكتب في ظل الظروف دي ومش قادر خالص
تعرفوا اني عشان أكتب خرجت مخصوص عشان اسمع قناة الجزيره
ولما سمعتها وشفت المناظر حسيت بالعجز أكتر وماقدرتش اكتب اي حاجه
والخاطرة الوحيدة اللي كتبتها كان اسمها انتحار قصيدة
ماحبيتش أكئبكوا ولا احسسكوا بالذنب أكتر ما كلنا حاسين
اعتبروها فترة هشحن وراجع وكمنا هستريح على ما الكمبيوتر بتاعي يرجع
لاني اتبهدلت من الكتابه في السيبرات الشهرين اللي فاتوا
كمان حسيت ان المدونه الفتره اللي فات المنحني بتاعها كان في النازل في كل حاجه واولها في كتابتي أنا
بس لو انتو عازيني أكتب أنا هكمل ان شاء الله
أشوفكم على خير ان شاء الله
محمود أبوالعزم
17 comments:
اول كومنت ..... احمدك ياااااااااااارب
اقرا بقى ...دعواتك
السلام عليكم
انا اول مره اكتب تعليق هنا بس انا دايما متابعه كتابات حضرتك بجد الموضوع رائع ومعبر جدا للواقع اللي احنا عايشينه غصب عننا وكنت عايزه استأذن حضرتك في فكره عاوزه اوصلها للناس او بمعني اصح للطبقه المتعلمه اللي بتابع اخبار غزه كل يوم وبركز اوي علي كلمه غزه مش فلسطين الناس اللي بيصعب عليها عدد القتلي والاطفال اللي ماتت وبس ونسيوا فلسطين ونسيوا الاقصي نسيوا ارضنا ودا هدف اليهود من ضرب غزه فلو عند حضرتك قصيده او تقدر توصل الكلام دا عن طريق قصه من قصص حضرتك الرائعه يبقي جزاك الله كل خير
معبره جدا وجامده اخر حاجه يا دكتور
دايما يا محمود مواضيعك جامده
ويارب نقدر نفك القيد علشان نعدى البحر
وان شاء الله هنعديه
ودايما مستنين ابداعاتك علشان انت موهبه فعلا واوعى تبطل كتابه
بسم الله
تفتكروا فيه أخ كبير يعمل مع أخوه الصغير كده؟؟؟؟؟؟؟؟؟؟؟
تفتكروا انسان على فطرته السليمة يرضى ان يتعمل في انسان اخر كده ؟؟؟؟؟
بغض النظر عن انهم اخوة في الدين واللغة والارض
********
اخنقه يا فوزي
وياريتهم بيقولوا اخنقه او بيشجعوه او بيدعموه
بل على العكس بيكسروا من مجاديفه وبيسفيهوا احلامه وبيطالبوه بالاستسلام
********
اشغل الفرد في نفسه عشان يتشغل عن غيره
سياسة خبيثة
*******
فك الحصار الداخلي اولى ومقدم على الحصار الخارجي
وكل حصار مطالبين بفكه
********
محمود
من غير المقبول الغياب اكتر من اسبوع
بجد
دمتم
علي مثل هذه القصص نستطيع ان نكتب الالاف منها
لانها كلها تحكي نفس الحكايه ولكن بلغات مختلفه
لا نستطيع ايضاان نٌحرٍك ساكنا
الرد اللي ماشي دلوقتي نفسي نفسي
نزعل شوية وتصبح كاي مشكله
منظر القتلي أمات قلوبنا وللاسف أصبحت كالحجارة
*فهي كالحجارة أو أشد قسوة*
منظر أبكاني كثيرا قبل ذلك من سنوات
والان نفس المشهد يتكرر ولكن اعتدته تقريبا
ونفس الردود لم تختلف بتاتا
زي مقال للدكتور احمد توفيق ظاهرة الاٌلفه تتكرر بالضبط
De Je Vu.
ان لله وانا اليه راجعون
لاحول ولاقوة الا بالله
بص يا حودة بالنسبة لموضوع الشاحن دا عندك حق فية لاننا لو شيلنا ( الكعبيرة دى ) ودخلناكهربا على طول على الموبايل هيتحرق واحنا كمان هنتحرق معاه وازن الموبايل اتحرق فى بدلين قبل كدا لما شالوا المحول بتاع الشاحن
2_ موضوع باسل وراضى دول عمرهم ما كانوا بيحب بعض حقيقى زى ما انت فاهم باسل (دا لو كان باسل اصلا ) ليه اتجاهاتاته عكس راضى ( اللى هو راضى فعلا ) بس باسل يكون باسل بنفسة وبقوتة مش بقوت عفش البيت بتاعه ويستخبى تحتية ووراه ويخلية يتكسر الاول ويجعجع من وراة وهو محلتوش حاجة ومريض
3_ الفيل فيل شئنا ام ابينا ووراه ديناصور اهوج الدور والباقى اننا كتيييييييييييييير بس فى صورة نمل وطول ما احنا كدا لا النمل دا ولا فوزى هيقطع يعملى حاجة وعلى فكرة دا مش ماسك فى رقبتة ولا حاجة دا بيزغزغة مش اكتر
4 _الفراخ زى موضوع النمل كدا طالما رضينا بكدا نستحق مش مجرد الرج بس لالا الدبح والشوى على فحم كمان
اسف لو ارائى مش تعجب البعض بس ياريت مش نبص تحت رجلينا وكما قال الرسول (_ص( ( رحم الله امرء عرف قدر نفسه ) الموضوع مش صوت ومشاعر وخلاص يلا منهم لله جميعاااااااااا
اولا بالنسبة لموضوع النمل تعرف اصغر نملة فيهم اسمها قطر ور غم كده اكتر واحدة صوتها عالي
بالنسبة لباسل ربنا معاه بس المشكلة في راضي قصدك مين اصل الراضيين في الزمن ده كتير قوي
اخيرا يامحمود لو حتغيب شهر كامل مش مهم لانك حتلاقيني فوق دماغك في الكلية وحاخد منك الانتاج الجديد اول بأول وحستمتع بيه لوحدي
ربنا يوفقك يادكتور
نعم اخي الكريم
انه الواقع الاليم
والضحية الشعوب
وكأنه مقدر لها ان تعيش في حيرة من امرها
مكتوفة الايدي عاجزة
....................
بمناسبةالنملةوالفيل
دي قصيدة قرأتها
نملة قالت للفيل: قم دلكني
ومقابل ذلك ضحكني
وإذا لم اضحك عوضني
بالتقبيل وبالتمويل
وإذا لم اقنع .. قدم لي..
كل صباح ألف قتيل !
ضحك الفيل ..
فشاطت غضبا : تسخر مني يا برميل ؟
ما المضحك في ما قد قيل ؟!
غيري أصغر ..
لكن طلب مني أكثر..
غيرك أكبر ..
لكن لبى وهو ذليل ..
أي دليل ؟
أكبر منك بلاد العرب ..
وأصغر مني إسرائيل
للأمانة منقول
................................
و عن الاستمرار في الكتابة
لايسعني الا ان اقول
ماقيمة الانسان معتقدا اذا لم يقل للناس ماعتقدا ماذا يفيد الصوت اذا لم يكن للصوت ثم صدى
ننتظر المزيد
العنوان بتاعك لخص كل حاجه
بس ليه الأجازه يا عمنا ... هيبقى علام وانت؟؟
ولو تسمح انا عايز اقرأ انتحار قصيده حتى لو لم تضعها على المدونه ولا تهتم للكآبه والحزن ولا تخش علي منهما لأن لدي منهما كثيييييييييير
دمت بخير
صحيح ... منتظر العزومه
أنا بصراحه مش هقدر اعمل اى كومينت على كلامك...لانه كفايه جدا ومش محتاج تعقيب
بس هعلق على حاجتين اولا الف مبروك المركز الاول فى الزجل والثانى فى القصه
-وعايزين نقرأ القصه دى-..
ثانيا فعلا شهر ده فتره طويله جدا
وحكايه الاجازه دى ياريت تعيد نظر فيها
والمنحى اللى ف النازل اللى انت بتقول عليه ده مش فى المدونه
ده كان فى معنوياتنا احنا
فى انتظار موضوع جديد الثلاثاء القادم
كل دعواتى بدوام التوفيق...
السلام عليكم ورحمة الله وبركاتاه انااول مره اكتب تعليق بس انا متابعه كتباتك الرائعه ايه الكلام القمه فى الروعه بجد موهبتك جامده اوى ربنا يبارك فيك رجاء لاول مره بلاش موضوع الاجازه واكتب يامحمود و مفيش انحدار ولا حاجه خليك واثق فى نفسك من يتق الله يجعل له مخرجا ويرزقه من حيث لا يحتسب
السلام عليكم ورحمة الله وبركاته امنياتى يارب اكون من اولاد فوزى ويارب متخلنيش فرخة ........اما بالنسبة لقصة البحر والمركب فمن لا يملك قوته لا يملك قراره ....... وتحيه لصمود اولاد فوزي واسمح لى ان اقتبس من كلماتك عبارة بحس انها بتمثلهم (انا وردة هتطلع وتفتح لو حتى يكون العالم بور
في نقطة تاريخية احب اوضحهالك يا محمود انه لما راضي جه يتفاوض علي الأوضة بتاعتة كان في موقف قوة وطلب انه يضم شقة باسل علي مائدة المفاوضات بس باسل رفض وكذلك كل ولاد عمهم خافوا لحسن راضي يبقي صاحب فضل علي اخوه باسل وقالوله اتكلم عن نفسك بس
سندعو الله لاهل غزة.. ولكن باي شيء ندعوه
ندعوبيد ملطخة بدماء اخواننافي
غزة..قتلها العجز و الصمت
ندعوهبجباه ذلها الاعداء و نحن صامتون
ندعوبدموع زائفة سرعان ما تجف
ندعوبحرقة قلب مؤقتة تزول عندما تضغط زر التحكم لرؤية قناة الاغاني
ندعوبشعارات على الشات تتبعها تأييدات لنادي كرة القدم..او ايهما افضل عمرو ام تامر
مع احترامي للجميع و لكل الانتماءات و لكل الاشخاص فانا اقل من تقييم احد.. و لكن باي عين سادعو ربي ؟
ان الله لا يغير ما بقوم حتى يغيروا ما بانفسهم
سندعو الله لاهل غزة.. ولكن باي شيء ندعوه
ندعوبيد ملطخة بدماء اخواننا في غزة..قتلها العجز و الصمت
ندعوهبجباه ذلها الاعداء و نحن صامتون
ندعوبدموع زائفة سرعان ما تجف
ندعوبحرقة قلب مؤقتة تزول عندما تضغط زر التحكم لرؤية قناة الاغاني
ندعوبشعارات على الشات تتبعها تأييدات لنادي كرة القدم..او ايهما افضل عمرو ام تامر
مع احترامي للجميع و لكل الانتماءات و لكل الاشخاص فانا اقل من تقييم احد.. و لكن باي عين سادعو ربي ؟
ان الله لا يغير ما بقوم حتى يغيروا ما بانفسهم
السلام عليكم و رحمة الله و بركاته
الاخ الفاضل..د / محمود دي اول مرة اكتب تعليق في مدونة على الرغم من اني متابعة من فترة طويلة وعلى الرغم ان في مواضيع كتيرة اثرت فيا و كنت اتمنى اشارك فيها لكني اكتفيت بالقراءة بس يمكن المرة دي الوضع مختلف لسببين
1 - احساس جماعي بالعجز و تأنيب الضمير نحية اخواتنا في غزة على الرغم انهم ربنا ابتلاهم ليصطفيهم والشهداء منهم في مكان افضل مننا
2 - ان حضرتك بتقول انك ناوي تتوقف فترة عن الكتابة و ان حضرتك ملاحظ ان مستوي كتابتك في النازل
اعمال حضرتك كلها ما شاء الله هايلة و احنا بنفخر بوجود طبيب موهوب في دفعتنا زي حضرتك
اسمحلي بعيدا عن المدح و المجاملات نتكلم بامانة و ربنا وحده شاهد على ما اقول
حضرتك استطعت بكلام بسيط تغير في حياة ناس كتير و بدون مبالغة كان سبب في قرب بني ادم لربنا.. يمكن مش واخد بالك بس انا مش هانسي موضوع ليلة القدر وكنت يومها بحضر السحور علشان اخده لامي في المسجد و هي بتعتكف و قولت ابص سريعا عاى البوست المهم بعد ما قريت الموضوع مقدرتش امسك دموعي و بدون تفاصيل كتيرة الليلة اتغيرت تماما بالنسبة لي بصراحة حاجات كتير اتغيرت ..اللي عايزة اقوله ان حضرتك بكلمة تكتبها باخلاص تبتغي بها رضا الله فيكتب الله رضوانه عليك الى يوم يلقاك.. متستهترش بالمدونة دي مش مجرد مجال لشعرك اد ما بشوفها روح جديدة ربنا بيخلقها جوى نفس الدنيا بتموتها بمادياتها .. وحضرتك بفضل الله سبب و المدونة دي هي اللي هترد بيها على ربنا يوم القيامة لما عز و جل يسألك عملت ايه للاسلام ؟ لكن احنا مش هنعرف نرد
في المدونة ضحكنا و بكينا .. احنا بنحكي لاهلنا عن كل موضوع جديد لان تقريبا هي دي الحاجة الوحيدة اللي فيها جديد
و ان كنت مش لاقي اللي تكتبه فده طبيعي لاننا مش لاقيين اللي نقوله و كأننا اتعودنا على الصمت حتى ابتلعنا السنتنا فمن فضلك متبقا واستمر بارك الله فيك...
السلام عليكم ورحمة الله وبركاته
ازيك يا د\محمود يارب تكون بخير
انا قريت القصص وعجبتني جدا خاصة انها صورة واضحة ومبسطة للواقع اللي عايشينه طبعا الاخين راضي وباسل اوقصدي اللي كانوا اخين في الدين والاخوة والعروبة فراضي فضل راضي بحاله في الاول وبعد ماكان مش راضي وحارب ودافع عن ارضه وبعد ما رجعتله نسي انه كان له اخ خاض معاه المعركة من اولها ولحد دلوقتي شقته مرجعتلوش والظاهر ان راضي عجبته الراحة وان فترة النقاهة اللي خدها بعد حربه لسه مطولة وياعالم هيفضل كده لحد امتى اما باسل فربنا معاه واحنا كلنا بقلوبنا ودعواتنا بنتمنى له النصر المبين
اما ال22 نملة فانقسموا مجموعتين بس للاسف غير متكافئتين مجموعة فيها نملة واحدة مستسلمتش وفضلت تحارب وهتحارب الفيل لأخر يوم من عمرها اما المجموعة التانية 21 نملة الباقيين فالله يكون في عونهم عمالين يعملوا اجتماعات ومؤتمرات يشجبوا ويرفضوا ويستنكروا ويحاوروا والنتيجة 0
اصلهم خافوا من الفيل ونسيوا انه كان في الاصل شوية نمل متفرقة في كل حتة مش لاقية حد يجمعها ولا مكان يأويها لكنهم صمموا واتجمعوا وبقوا زي الفيل في قوته اما النمل حصل معاه العكس كان في الاول فيل كبير يخاف منه النمل وبعدين اتغر بقوته واتحول نمل اتفرق في كل حتة لهو قادر يتجمع ولا قادر يساعد النملة اللي رفضت الاستسلام
اما الفراخ فده واقع الحاكم يدوخها ويشغلها بمشاكل وحاجات تافهة عشان يعرف يشكمها والله سياسة تحفة بسيطة وسهلة
ياللا ربنا يستر علينا وعلى الايام اللي جاية بعد كده
اخيرا بتمنى ان حضرتك متطولش الغيبة علينا وارجعلنا بسرعة وربنا يكرمك ويوفقك
Post a Comment