احمد...شاب عنده 18 سنة ..أمور ...طيب..بيتكلم كتير ودمه خفيف..مؤهل متوسط
أحمد بص لمستقبله لقىمافيش اي مستقبل ليه هنا
أحمد بص لقى كل الشباب في قريتنا الكبيرة مسافر برة
احمد دور على الراجل اللي بيهربهم عن طريق البحر
احمد هرب عن طريق ليبيا وركب المركب في عرض البحر
احمد غرق في البحر
قصة حصلت ادامي وعشت أحداثها لان احمد كان جارنا في الأرض
وكنت بشوفه كل يوم الصبح وانا رايح الكلية
يمكن تحسوا ان أحمد شاب لسة صغير
بس فيه غير أحمد تلاتة تانيين كلهم في تانية وتالتة اعدادي
أنا من بلد-كفر كلا الباب- مساحتها كبيرة واعداد سكانها كتير أوي
تسعين في المية او اكتر من شباب البلد دي مسافر
مش عشرة ولا عشرين ولا مية ولا ميتين
دول يتعدوا بالآلاف
كفاية اقولكم في منطقة المفروض ان لسة السكن فيها مش أوي
في شارع طوله أقل من خمسميت متر وفيه مساحات كتير خالية
فيه تلاتة وخمسين واحد مسافر من وسط حوالي 35 او اربعين بيت
لان معظم البيوت فيها اتنين او تلاتة مسافرين
ووسط كل كلام الناس عن الناس اللي ماتت دي انا مابقيتش عارف الصح فين
أكيد السفر بالطريقة دي غلط
أكيد مش صح ان الناس ترمي ولادها في ليبيا عشان لو نفدوا من الشرطة هناك
يركبوا مركبة..عبارة عن شوية خشب ماسكين في بعص..
في عرض البحر من ليبيا لايطاليا
و بعدمايشوفوا الموت بعيينهم يتمسكوا هناك
ويااما يعرفوا يهربوا يا اما يرجعوا مذلولين
وبعد داكله يعيدوا التجربة من تاني
مش هتصدقوا لو قلتلكوا ان جارنا خلى ابنه يسافر ايطاليا وهو في خامسة ابتدائي
والله العظيم في خامسة ابتدائي لسه عنده عشر سنين
بس هما بيسفروا العيال دي عشان هناك في ايطاليا مش هيرجعوهم
وبيدخلوهم المدرسة و الناس تفرح اوي ابني عدى ودخل المدرسة
زي فرحة الناس زمان لما ابنها يدخل طب او هندسة
وماحدش واخد باله انها مدرسة تنصير
وماحدش واخد باله ان الواد ده مايعرفشي يعني ايه اسلام ولا يعني ايه دين
ولا يعرفوا ان لو اي حد قاله اي حاجه هيصدقه لانه مايعرفشي الصح من الغلط
بس الناس بتنهبل وهي شايفة ابن فلان اللي جنبها عمال يبعت يورو
وفلان بني فيلا أربع ادوار وجاب عربية تويتا كوريلا وهو مش لقى اللضى لسة
بيتهيالي ان احنا اكتر قرية في مصر فيها فيلات وعربيات تويتا كوريللا
واغلي سعر للارض والمباني واغلى سعر للجواز حتى
لدرجة ان اللي مش مسافر مابيعرفشي يجوز فيها
اكيد مش صح ان الناس تسيب تعليمها وكلياتها عشان تسافر
وزمايل لي كتير كانوا في تجارة وحقوق وتربية عملوا كده
بس في نفس الوقت بفتكر بلدنا قبل ما يطلع موضوع ايطاليا ده
وكان ماليها شباب عاطل وكل يوم نسمع عن
جرايم قتل وسرقة و.....ماهوا شباب عاطل مش لاقي حاجة يعملها
وافتكر تجربة لواحد قريبي لما راح ايطاليا اول مافتحت سنة تسعين
بس خد قرار انه يرجع ويشتغل في بلده ويتجوز ويعيش زي الناس وخلاص
ويتقى ربنا ويبعد عن مواطن الشبهات
و من كتر التزامه وتدينه كان رافض يدفع فلوس لاي وظيفة عشان ماتبقاش رشوة
وفضل لمدة خمستاشر سنه في مصر هنا يتلطـّم من هنا لهنا
خمستاشر سنه بيدور على لقمة حلال ليه ولأسرته
و بعد الخمستاشر سنه...سافر تاني...تخيلوا
بس سافر تهريب المرادي
وافتكر كلمة واحد صاحبي كان عايز يسافر فخفت عليه
و قلتله وايه اللي يجبرك تشوف الموت بعينيك
قال اللي يجبرني ان انا هعيش ميت هنا برضو
وافتكر الناس اللي رفضت تسافر و كان جواها احلام وطموحات نفسها تعملها هنا
بس كل الاحلام دي مااتت جوة الأدراج على عتبة الاجراءات والرسوم
وكانه بيتحارب في بلده وكإنه ماحدش عايزه يعمل حاجة هنا
واتغاظ اوي لما يطلع الأخ المسئول بمنتهى البرود ويقول
اللي معاه تلاتين الف يسافر بيهم مايعمل بيهم مشروع احسن
ومايعرفشي ان الناس بايعة هدومها عشان توفر مبلغ زي ده
وما يعرفشي- وانا شفت بعيني- ان حتى اللي حاولوا يعلموا حاجة ماقدروش
معلهشي لو كنت منفعل شوية بس انا محروق من جوايا اوي على
العيال اللي ماتت دي وكان نفسي افرغ الشجنة دي
ومن زعلى لاني عاؤف ان النس مش هتبطل تعمل كده
وفي النهاية عايز قول لكل حد سرق ولو قرش واحد من البلد دي
انه هيتحاسب على روح الناس دي
لان البلد دي لو خيرها ما اتسرقشي كان قضانا وماكانشي حد
هيضطر يرمي ولاده في البحر لانه شايفهم كده او كده....هيموتوا
13 comments:
أبكيتنا
بجد بعد البوست دماغي وقفت .. يمكن لو بفكر في الموضوع قبل مقرا كلامك وانت قريب قوي من الموضوع كنت هفكر كويس
لكن انا دماغي وقفت
بس ... الهروب عمره ما كان حل
انا قريت الموضوع يا محمود وبجد حاسس بيك
انا فعلا اعرف كويس كل اللي قلته لدرجه كنت قاعد في قاعده من ناس عندكم وكان زعلان من ابنه انه رجع بعد ما راح هناك باقل من سنه وكان بيقول انه دخل مدرسه برده وخد الجنسيه
بس كل اللي كان في دماغي ازاي يرجع بعد ما خلاص المفروض يعني انه بقي واحد منهم بيتمتع بكل حاجه هناك وقلت حرام عليه الولد ده
كان سنه برده حوالي 12 سنه
تخيلو ا
وكنت متعاطف مع والده لانه كان بيقول انا مصدقت ان واحد هيسافر وهيريحني من المصاريف وهيساعدني شوية
بس بعد كلامك .....عرفت موضوع السفر ده
انه مش علشان سواد العيون بتاعه المصريين هما بيدخلونا المدارس
.......
ربنا يلطف بينا
انا للا وانا اليه راجعون
حسبي الله ونعم الوكيل,
بس فعلا ما اظنش ان الحل انهم يرموا بايديهم الى التهلكة
رب هنا رب هناك
والرزق مكتوب للشخص مش هيحصل غيره,
بس بجد منهم لله اللي كانوا السبب في اللي بيحصل,
ربنا يحفظ شبابنا من كل سوء
اللهم لا تسلط علينا من لا يخافك فينا ولا يرحمنا
السلام عليكم ورحمة الله وبركاتة
والله يا محمود الموضوع فعلا صعب لكن الحياة هنا اصعب كتير جدا الناس بترمى روحها فالتهلكه عشان تعيش لحظه بمتعه بحياه كويسه ولقمة نظيفه بس بجد الواحد بيتقطع عشان الناس دى
وانا لله وانا اليه راجعون
F.A
لا حول ولا قوه الا بالله
انا مش مصدقه الكلام اللي بتقوله دا دا فعلا حرام يمكن علشان انا مش متابعه او بمعني اصح مبحاولش اتابع لاني بجد مش نقصه
بس الاعداد الرهيبه اللي بتقولها دي دا اللي صعب اتخيله
انا في منطقتنا اللس اسمع عنهم اربعه او خامسه
بس بجد مش عارفه ايه الحل؟؟
لكن اللي غلط جدا اللي يسفر ولاده وهم صغيرين اوي كدا
طيب لو شاب كبير اهو يقدر يفرق الصح من الغلط اللي حد ما
لكن الاطفال دول صعب اوي
انا لله وانا اليه راجعون
بجد مش عارفه ايه اخرتها ؟؟؟
ربنا يلطف بينا
ان لله وانا اليه الراجعوان ربنا يرحم الشباب الصغير ده ويصبر الاهالى آمين يارب
وانا متخيلة المأساة دى لانى تقدر تقول يادوكتر اتحكالى بتفاصيل عن احداثها وانا عارفة يعنى ايه بهدلة ويعنى ايه سفر فى مركبة عبارة عن شوية خشب يعنى ايه شباب صغير شاف الموت ألف مرة قبل مايوصل لمكان مكان مش عارف هو طوق النجاة ليه ولا الطوق اللى هيتخنق بيه يعنى ايه شاب وصل لبلد غريب وعمال يستخبى فيه ويهرب من مكان لمكان وكتير منهم بينتهى بيه المطاف انه يتجوز واحدة اجنبية علشان بس الجنسية علشان يضمن الامان والمكان
ومش عارفة ليه احنا كمصريين بنبص لبعض كده وعلشان فلان سافر وعمل شوية فلوس يبقى انا كمان اسافر حتى لو ربنا كرمنى
حكاية كبيرة يادوكتر والله محتاجة وقفة لان للاسف المشهد ده بيتكرر كل يوم وعلى الرغم من كل الارواح اللى بتموت ماحدش بيتعظ برضه
السلام عليكم
إزيك يا محمود ليك تاج عندي
بسم الله
ربنا ينتقم من المتسببين
قولوا .. آمييين
السلام عليكم ورحمة الله وبركاته
انا بكتب كومنت هنا عشان اقول ان القصة اللي حضرتك بتحكي عنها بتتكرر كل يوم وكل ساعة شباب كتير بيهربوا من هنا بيهربوا من الحاضر المظلم للمستقبل المجهول وللاسف المسؤولين عارفين كل ده وعمرهم مافكروا يلاقوا حل للمشكلة دي ولاحتى كلفوا خاطرهم يدوروا على اسباب المشكلة الحقيقية ويحاولوا يحلوها قدر الامكان وبعد ما كانت بلدنا ام الدنيا بقى كل العالم بيحكي عن ولادها اللي في اي فرصة متاحة بيسبوها وبيدوروا على لقمة عيشهم في حتة تانية يللا اهم بيتخلصوا من ازمة السكان
السلام عليكم ورحمة الله
والله موضوع الهجرة في حد ذاته اضراره اكبر من نفعه حتي ولو كانت شرعية فتخيل هاتكون ايه نتايجها لو كانت في
سن مش مناسب او بطريقة مش مامونة
فعلا البلد دي مش سهل فيها ان الواحد ياخد حقه لكن برده مش الحل السفر لبلد اجنبي
لان الحياة في البلد دي اكيد هاتبقي صعبة زي هنا بالظبط
لا وهايزيد عليها تعب الغربة والبعد عن الاهل والناس اللي عشنا معاهم
والخسارة هاتكون اكبر من المكسب
وحرام بجد اللي بيحصل لشاب لسه بيحاول يشق طريقه
او طفل مالوش ذنب في اي شئ
غير ان والده مش شايفله عوزة غير للفلوس تكون نهايتهم كده
وعذاب اسرة بحالهااتخطف منها ابنها فجاة كانت لسه بتحلمله بمستقبل
وهم اللي يدفعوا التمن
وارجع اقولك ان البلد دي لو كان فيها عدل واحساس بالضمير وتنفيذ سليم للقوانين ماكنتش المشكلة دي بقت موجودة
وده المفروض يكون حلها
وتكون دي اخرتها
.........................
ربنا يرحم الشباب البرئ ويصبر اهاليهم يا رب
انا لله وانا ايه راجعون
دي مشكله شعب مش بلدك لوحدها مشكله شباب تملكنا الياس وفقدنا الامل في تحقيق اي هدف.
بس ياريت تعالي نشوف اللي هيقعد قدامه ايه؟
خيارات محدوده مابين انه يتعب ويشتغل ويمكن كمان يفتح مشروع يجي مسئول بقرار غبي يقفلهوله ويطلعه مديون كمان لضرايب وده انا شفته
والبعض الاخر ضعيف العزيمه يدمن مخدرات بل ويحترف تجارتها كمان وده برضه مثال شفته واللي عمله جارك الله يرحمه لو احنا مكانه انا شايفه بيلعب علي افضل الاحتمالات
لا إله إلا الله
إنا لله وإنا إليه راجعون
مش قادر أتكلم بجد
الموضوع ده بقى منتشر جدا يامحمود
ربنا يعافينا
ويكتر خير بلدنا
ويعقل دماغ ولادنا
ويهدى ضرب حكومتنا
توت توت
مركب رايح ليبيا
الحق ليفوت
وميرسى على البوست
Post a Comment