كدبت عليك

Tuesday, April 21, 2009

السلام عليكم ورحمة الله

بعد قصيدة النهاردة اتمنى الناس بعد ما تقراها وتعلق عيها

و انا نفسي اسمع رأي كل الناس فيها

تقري الدعوة الصغيرة في البوست الصغير اللي تحت

.................................................

الكدب في حياتنا عمره ما كان انك تقول انك معاك وانت مامعاكشي

ولا انك تقول انه ما معاكشي وانت معاك

الكدب ممكن يكون في حاجات كتيرة اوي واشكال كتيرة اوي

الكدب ممكن يكون بكلمة واحدة.. بنظرة واحدة.. بوعد واحد وعدته

وانت عارف من جواك انك مش هتقدر توفيه

يمكن الانسانة اللي كتبت على لسانها القصيدة دي مالهاش وجود غير في خيالي

وماكانشي في ذهني تخيل معين للكدبة اللي هي كدبتها

بس هي كدبت وماعرفتش ترجع ولا تعترف بالكدبة دي غير دلوقت

انا نفسي كل الناس تعيش مشاعرها دي وتحط نفسها مطرحها

بس نفسي كمان كل حد بعد ما يقرا الكلام يحط نفسه مطرح الحد

الي اتقال ليه الكلام ده...يا تري لو كنت مطرحه

تقدر تسامح حد كدب عليك...وخصوصا لو كنت ..بتحبه

.........................................................................
كدبت عليك

كدِبــــت علــــيك وماقدرتش.........أقــــــــوللك قلبي كان كداب
مشيت ويّـاك مابـــــــين حبك.........وبـــــين حيرة و ألم وعذاب
لإني مــــــاكنـــــتش أتصور........هيـــــيجي اليوم ..نكون أحباب
كدبت عليك
كدبت عليك ومـــــش عارفة ........في إيــه خـــــلاني أكدب إيه
ماكانـــشي ساعتــــها جوايا.........أمـــل بيحــــــــابي قلبي عليه
ومن طـــــــــبع البشر تغلط .........وبعد الغــــــلطة تســــأل ليه
كدبت عليك
سـرَقــت بكـــــدبتي حــبــك.........لاقـــــيت حـــبك بيــــسرقني
بقيت بكــــــــدب وبتـــــألــّم .........ونــــار الكـــــــدب تحرقني
و أصـــــــعب مـِــن كده إني........بشــــــوف قلــبك...مصدقني
كدبت عليك
شربت الحــــــــب من إيدك.......عطـــــشت زيادة لمـّـــا شربت
وقلـــبك حـُــــبّـه خــــــلاني......عشان أفضل في حضنه..كدبت
وخـَبـّـيت في الدمـوع نفسي.......ومن نــــــار المواجـهة هربت
كدبت عليك
بقيت عايشة بضمير مشقوق.......ونــــــــار مزروعة جوة الشق
مابين احساس يقــــــول أيوة...... وبين احـــــساس بيصـــرخ لأ
وأحــــس بإني كـــــــــــدابة...... ولــــــو حـــــتى ...بقول الحق
كدبت عليك
لاقيتني مشيت معاك في طريق….ماكــــــــانشي رجوعه بإيديّا
وخفت أحكي الحقـــيقة في يوم…. ولو كــــــــان حـــتى بعيــنيـّا
أموت من شـــوقي ليك و انــتَ......تمـــــــوت من صدمتك فيـّا
كدبت عليك
وخفت وخــــــــــوفي خـــلاني......أعــــــيش العمر كله سكوت
وقلت إزاي نهـــــــــــون واحنا......بنــــينا في قلب بعض بيوت
وخفت اللي اتبنى في سنـــــــين......في لحظة ضعف كله يموت
كدبت عليك
ياتري عشـــــــرتنا هتخليك……..تســــــــــامح قلب بيــغشـّـك
ياتري نار كــدبي هتقسـّـيك……..و تــُطرد قلـــــبي من عشك
وهيموت الحنين في عينيك…….. ويـُســـــكنها الدموع والشك
كدبت عليك
بلاش تقــــتلني نــــار شكك..........وخـــبّـيني.. في نـــــور حبك
كفـــاية عليّا لــــــــــوم ذاتي..........و انا عايشة .. بــــنار ذنبك
لكن محتاجة مــــــــنك وعد..........لقلبي ...مهــمااا كــان دربك
سواء قــــــــــررت نتفـــارق……..سواء هتســيبني أعيش جنبك
ولو سبت في مشــــاعـرك نار.........برغـم النـــار ياريــت قلبك
يسامح قلــــــبي في الحالتيـــــن …....لإنــــه بجــــــــد ...بيــحبك

25 comments:

هـمـــــــــــسة said...

دوكتر قصيدة ولا اروع ماشاء الله
الاحساس فيها عالى جدا والمشاعر فيها حقيقى حلوة جدا وعجبنى جدا الصراع النفسى اللى فى القصيدة والندم ربنا يبارك فيك والله


يمكن انا لو كنت مكان حبيبها مش عارفة غالبا مش هسامحها يمكن لانى مش بكره حاجة فى الدنيا اد الكذب لانى مقتنعة ان اللى يكذب مرة يكذب ألف مرة وليه ادعت حبه فى البداية مع انها ماكنتش بتحبه وليه بعد شوية بس عرفت قيمة قلبه

بنجاواتى said...

السلام عليكم

قصيده رائعة يا دكتور

احيانا الانسان بيكدب كدبة واحدة وهو مش متعود على الكدب

وانا شايف ان السماح والعفو افضل من أى شىء

والمهم انها تكون مش من طبعها الكدب وإنها تكون فعلا دلوقت نفسها يخبّيها فى نور حبه

وتقبل فائق احترامى

Anonymous said...

اصعب احساس فى الحياه انك تحس انك لا شىء عند من تحب برغم كل الاحساس والحب اللى استحالة لسانة يوصفة فعلا بتكون صدمة مش هيحسها الا اللى عاشها ومر بيها
بس ارجع واقولك مجرد كلمة صدق بعد كل دا من حبيبك ويعترف بحبة دا مش هيكون ليك فرصة تفكير او اختيار اصلا لانك تلقائى هتلاقيكى سامحتة برغم ابشع احساس ممكن تحس بية فى حياتك
بس كل دا
لانك

......
بتحبه

مستنيك مع 1 نسكافية و1 بطاطس و1 برجر بالبيض يا حوده

Anonymous said...

عايز أقولك الحقيقية و لا أكدب عليك ؟
أقول لك الحقيقة أحسن. اصل الكذب مالهوش رجلين. قصيدة جميلة زيك يا حودة.
ربنا يوفقك و محدش يكدب عليك
your elder brother
Mr.Ashraf

Anonymous said...

بسم الله

انا مش فاهمه الكدبه اوى

بس انت قلت كلنا بشر..والبشر بيغلط

اما التسامح من عدمه فيحدده حبيبها لانه اكتر واحد ممكن يفهم

بس كالعاده جميلة

..............

مبروك على عبد الرحمن ربنا يبارك فيه


بجداجمل احساس لما تبقي خال

pure blue

نهال عمر said...

بسم الله كالعادة طبعا كلام رائع واحساس اروع فى رايى المتواضع ان المسامح كريم ولازم نسامح لان كلنا بنغلط ومحتاجين اللى جرحناه يسامحنا وانا فرحانة انك هتنورنا فى راوند6 يادكتور وكان نفسى تعملها من زمان واكيد هنحضر ان شاءالله وربنا معانا كلنا

Anonymous said...

السلام عليكم ورحمة الله وبركاته طبعا القصيدة جميلة الحقيقة ان حبيبها هواللى هيحدد اذاكان يسامحها ولا لأ حسب درجة حبه ليها لو فعلا بيحبها هيسامحها وهيلتمس مليون عذر حتى لو على حساب كرامته وحتى لو زعل فى الاول ففى الآخر قلبه غصب عنه هيروحلها سواء عقله رضا او مرضاش لان مرارة الفراق بعد حبه الكبير هتبقى اصعب من جرح كرامته هيحس ان كل حاجة صغيرة هى عملتها من غير قصد كان حب بس هى اللى ماكانتش واخدة بالها اما بقى لوحبه ماكانش كافى هيلاقى جرح كرامته اكبر من مرارة الفراق ده رأيى

منــار فايد said...

جميله اوي يامحمود
بجد لمست فيا جوانب كتير وحسيت بيها اوي
مش عارفه ليه مع اني لاكدبت ولا اتكدب عليا
يمكن عشانك كاتبها باحساس
واحساس الندم اللي في الاخر رائع بجد
وانا عن نفسي هسامح
لان اللي بيحب بيسامح
واللي مش مسامح يبقى مابحبش
مش لازم نسامح واحنا في ضعف
بالعكس نسامح واحنا في قوتنا
عمر التسامح والعفو كان ضعف ابدا
اذا كدبه اتكدبت علينا من شخص بنحبه في الاول هتجرحنا طبعا
هنتصدم اوي
هنندم كتير اننا عرفنا شخص كدا واتخدعنا فيه
هتصعب علينا نفسنا اوي لاننا حبينا بجد وبصدق..
بس بعدها هنسامح برضو مهما كابرنا كتير ويمكن وقت يفوت بس مادام بنحب بجد
يبقى اكيد هنسامح

ساعات حاجات كتير اوي مش بنعرفها ومانعرفشي الظروف اللي حططت الشخص ده في المكان ده وخلته عمل كدا....
ساعات الطرف التاني مش بيعرف يوضح هو عمل كدا ليه مش لانه ماعندوش حاجه يقولها
بالعكس ساعتها هيبقى نفسه يقول كل اللي في باله بس ده لانه حاسس انه مهما قال وبرر موقفه فهو خلاص في نظر حبيبه كداب..
وده احساس صعب جدا

بورك قلمك يامحمود
وفي انتظار جديدك دائما

محمد مغاوري said...

رغم انك تستاهل والله بس مش عايز اضيع وقت واقعد اقلك ان القصيدة اكثر من رائعة والأحساس صادق لأني زهقت من الكلام ده خصوصا وانت لسه مازال ينقصك التكثيف والواقعية التعجبية اللي ما فيش حد عارفها غيرك
المهم انا شايف ان مابني علي باطل فهو باطل وبالتالي ممكن تكون حبت عشان بس لقيته بتحبها وممكن عشان حبت المعاملة مش الشخص انا شايف مع احترامي لشعورها بس ماينفعش يكمل في حبها

Unknown said...

كلام جميل كالعاده طبعا
بس انا رايي ان الكدب في اي حاجه ممكن نسامح فيها الا في الحب
يعني انا لو مكنها وكدبت غصب عني مش هكمل في الكدبه عمري لغاية ماتوصل لمأساه وطريق مسدود كدا
وانا لو مكانه مش هكمل معاها مهما كان لان اللي يكدب في مشاعره سهل عليه اوي يكدب في اي حاجه تاني

اسلام الشاذلى said...

صباح الخير يا حودة
مش عارف اقولك ايه فى قصيدتك اللى خلتنى لازم اعلق عليها اللى هى فعلا اكثر من رائعة وخلتنى قريتها كتيير اوووى لان كلامها عاجبنى اوووى واكتر من كلامها احساسها اللى عاجبنى اوووى اووووى

يمكن انا رأيى بردوه ان البنى ادم ممكن يسامح فى حاجات كتير وزى ما انا قلتلك قبل كدا ان التسامح والعفو قدرة لا يمتلكها الكثير منا انما التسامح فى الكدب بالذات صعب اوووى يمكن انا بتكلم عليا انا شخصيا دا صعب عليا جداا ومش بعرف اسامح عليه ولا انساه ولا اثق فى الشخص اللى كدب عليا مرة مهما حصل تانى

د.ميريهان said...

لكن محتاجة مــــــــنك وعد..........لقلبي ...مهــمااا كــان دربك
سواء قــــــــــررت نتفـــارق……..سواء هتســيبني أعيش جنبك
ولو سبت في مشــــاعـرك نار.........برغـم النـــار ياريــت قلبك
يسامح قلــــــبي في الحالتيـــــن …....لإنــــه بجــــــــد ...بيــحبك

هذا المقطع أعجبني بحق...كلماته مؤثرة جدا...
على كل...أعتقد اذا حدث هذا الموقف لنا...اراهن اانا سنسامح ..لان الحب لايرحم..ومن يحب يرى كل شئ فيمن يحبه جميلا..وهذه الكذبة ليست شيئا امام الحب..
ثم لنفرض انها لم تصارحه يوما بحبها..ثم اتى اليوم الذي قالت له هذا الكلام..اخبرته انها تحبه ولكنها في الاول كانت كذبه..اعتقد لن يصدم كثيرا لانه لم يأخذ منها حبا صريحا قبل ذلك..
وايا كانت الكذبة...فالحب يغير الكثير..أعني لابد ان تتغير هذه الفتاة ان كانت تتطبع بالكذب اصلا..لذا فالسماح افضل...عموما...فمابالك اذا كان في الحب؟؟

هذا ما أراه..

وختاما..قصيدتك دكتور ممتاااازة...معاني مرهفة واحساس رائع..
واسلوب ... شعبي ممتاز..

لك مني اطيب دعوة بأفضل واهنا حياة..
وننتظر جديدك..فأتحفنا بالمزيد

د/عرفه said...

جميل كالعادة محمود
بص هقولك
الانسان فى طبعه انانى
مش بيحب يفقد شىء
ولما بيلاقى انسان بيحبه
مش بيحب يفقده او يواجهه
وبيحاول يضحك على نفسه علشان يستمر معاه


وبعدين اظت ان الموضوع مقصود بيه حد معين
واحذر منى علشان بحب التخمين
انا متوقع شىء معين
بس حاسس انه صعب اوى يكون اللى فى دماغى

dr_beero said...

القصيده تحفه والله وبهنيك عليها من كل قلبى واللى بيحب بجد بيسامح حبيبه ويغفرله انا معاكم ان الصدق اسمى شىء لازم يكون موجود بين الناس عامه وفى المشاعر بصفه خاصه بس لو هو متاكد انها بتحبه بجد وهى ذات نفسها تستحق انه يسامحها اكيد هيغفر لها لاننا مش بنقابل الحب ده كل يوم ولازم هو يكون متاكد انها مامنعهاش من مصارحته بالحقيقه الا خوفها انه يضيع منها وكفايه انها ندمانه على كده وصدقونى اللى بتبقى فى الموقف ده بتتعذب كل يوم تقابله فيه وخوفها بيزيد يوم عن يوم

blue-wave said...

وبتقولى انك على قدك؟؟
يا شيخ حرام عليك
كلمة رائع اقل من انها توصف الجمال اللى حسيته فى كلماتك صديقى العزيز
بجد وبدون اى مجامله
انت رائع

محمود جامع said...

السلام عليكم
اول زيارة لي في المدونة
البداية قصيده جميله جدا --ده طبعا على عادتك يا محمود عمرك مانطقت بكلام مش جميل --
قصايدك دايما فوق الرائعه
ربنا يزيدك
اخوك وزميلك

عندما تنهمر الدموع said...

السلام عليكم ورحمة الله وبركاته
ازيك ياد/حودة يارب تكون بخير حلوة اوي قصيدة النهاردة واجمل مافيها الاحساس الكبير بالندم وتأنيب الضمير اللي حست بيه الانسانة دي بعد ماكدبت على انسان حبها من كل قلبه وصدق كل كلمة قالتهاله السؤال اللي بسأله لنفسي دلوقتي هو ياترى ممكن ييجي يوم من الايام واضطر اني اعمل زيها اوممكن تحصل ظروف تجبرني اكدب على شخص واوهمه اني بحبه وانا مبحبوش مش عارفة بس مبحبش احكم على حد قبل مااعرف ظروفه اللي انا عارفاه اني مش عايزة اظلمها لأني متحتطش في نفس ظروفها يمكن اضطرت تكدب عشان متجرحش شعوره يمكن شافته انسان حساس وحست ان مجرد رفضها حبه ده ممكن يحطم اماله ويمكن تربيتها من الاساس كانت غلط كل دي حاجات ممكن تكون السبب في الكدب لكن لو كدبت لمجرد التسلية ده شئ انا ارفضه تماما ارفض اني اكدب على انسان واوهمه بحبي ليه عشان اتسلى بيه او العب بمشاعره واحاسيسه
ولوكنت مكان حبيبها هل ممكن اسامحها؟برده معنديش اجابة محددة بس لو كان فعلابيحبهااكيد هحط في عين الاعتبار انها اعترفت له وده دليل على انها حست بالندم والا فليه اعترفت كانت ممكن تفضل مستمرة في كدبتها وتسيبه وتمشي من غير ماتطلع نفسها كدابة وبعدين لو حبيبها بجد بيحبها اكيد هيحس من كلامها بندمها على اللي عملته لكن ممكن برده تكون الكدبة دي بداية الفتيل اللي هيشعل نار شكه في اي حاجة ممكن يسمعها عنها او ممكن يكون من النوع اللي ميقدرش يسامح اوينسى بسهولة بس انا متهيألي اني لو اتحطيت في موقفه هسامح اللي كدب عليا او على الاقل مش هعاتبه قبل مااعرف سبب كدبه عليا ولو اعترف اكيد هو باقي على الحب اللي بينا والا مكنش اعترف لي اكيد هو كان تعبان وبيتعذب كل ثانية كان بيشوف فيها حبي له واقتناعي بكل كلمة بيقولها حتى لو كان بيكدب عليا فيها وبعدين انا مؤمنة بأن اللي بيحب لازم يسامح لأن الحب جماله في انه بينقي قلوبنا ويطهر مشاعرنا
ده رأيي هسامح حتى لو كان ظني في اللي بحبه في غير محله فالمثل بيقول يابخت من نام مظلوم ولا نمش ظالم وبعدين مين عارف مش يمكن حبي ليه هو اللي يغيره ويهديه واكون بحبي ده سعدت نفسي وهديت انسان وساعدته انه يتخلص من كدبه
حتى لو كان اللي كدب عليا حبني لمجرد انه شافني بحبه فكويس انه حاول يحبني وحاول ميجرحش حبي ليه يعني البداية بكدبة اتقلبت واقع وحقيقة والنتيجة انه حبني مهما كان سبب حبه ليه سواء حبني بجد او حب حبي ليه
في الاخر ربنا مايحطنا في اي موقف فيهم
على فكرة انا اسفة جدا جدا بس مش هقدر البي الدعوة لأن عندي امتحان يوم الخميس وقبليه بس يوم الاربع اجازة معلش سامحني والله لو مكنش الامتحان مكنتش هتأخر حضرتك عارف معزتك عندنا ربنا يوفقك ان شاء الله وانا متأكدة ان القصيدتين حلوين حتى من غير ما اسمعهم

محمد عبد الباسط said...

مااصعب ان تعرف انك مظلوم وظلمت من الاخرين وبيدك القصاص ثم لا تقدر ان تقتص بل ويطلب منك بعد كل هذا الظلم ان تعفو وتسامح طلب صعب اوى


عن نفسى ممتنع عن التصويت لاشعار اخر


حلم كبير

Nabil said...

السلام عليكم...

القصيده دى جميله جدا جدا

وكمان معناها جميل كل كتابتك حلوه بصراحه

بس الكدب من الاخطاء التى لاتغتفر ابدا

د/محمد الخطيب said...

بسم الله ماشاء الله

سلاسة فى الاسلوب والتعبير عن اللى جواك

بجد مش قادر اقول غير ماشاء الله وربنا يحميك

اما بالنسبة لموضوع ان حد يسامح حد

اعتقد ان لو اللى بيحب لسه باقى على حبيبه

أكيد أكيد هيسامحة

بس بشرط ان اللى بيحبة دة يبقى فعلا مش بيكدب عليه المرة دى !!!

Anonymous said...

السللم عليكم ورحمة الله وبركاته
القصيدة أكثر من رائعة ماشاء الله عليك وحسيتها جدا وأثرت فية جدا أولا طبعا علشان جميلة وثانيا بسبب شخصي شوية بس والله انا مش بكدب هوضح شوية أنا لسة مخطوبة قريب لحد هوة ماشاء الله كويس جدا وبيحبني جدا وفي البيت موافقين عليه جدا بس أنا لا أبادله نفس الشعور بس وافقت وقلت أدي لنفسي فرصة يمكن وفي نفس الوقت مش عايزة أظلمه معايا مش عارفة ليه أنا حكيت الكلام ده دلوقتي بس لما قريت القصيدة خفت أكون كدابة فعلا من غير ما آخد بالي وخفت اكون السبب في زعل أي حد
آسفة لاني طولت عليكم
بهنيك بجد يا دكتور على قصيدتك وبتمنالك التوفيق دايما باذن الله
السلام عليكم

Eng.sarsora said...

اكيد لو في حد كدب عليا انا هسمحو وخاصة لو هوا اعترف ليا بالكدب دا وحاسس بغلطته وندمان عليها ونفسو اني اسمحو يعني مش كل الناس كدا في ناس بتكدب ومش بتحس حتى انها كدابه وفي حاجات كتير بتحصل اكبر من كدا وبردو بنسامح فيها يعني الاهم اننا نكون بقيين على الانسان دا يعني بتختلف من شخص لشخص ومدا تعلقنا بالانسن دا وعلقته بينا

فجر اخر said...

السلام عليكم ورحمه الله
ازيك يادكتور محمود يارب تكون بخير عامل ايه في المذاكره شد حيلك ربنا يوفقنا كلنا ان شاء الله
جميله اوي القصيده بجد تحفه واحساسها جميل واخر جزء فيها روعه بجد
كفـــاية عليّا لــــــــــوم ذاتي..........و انا عايشة .. بــــنار ذنبك
لكن محتاجة مــــــــنك وعد..........لقلبي ...مهــمااا كــان دربك
سواء قــــــــــررت نتفـــارق……..سواء هتســيبني أعيش جنبك
ولو سبت في مشــــاعـرك نار.........برغـم النـــار ياريــت قلبك
يسامح قلــــــبي في الحالتيـــــن …....لإنــــه بجــــــــد ...بيــحبك

هي اكيد مكدبتش عليه غير لانها كانت بتحبه وهي اكيد كانت محتاجاه جنبها ومحتاجه حبه ده هو مش مبرر بس هو في ايه تاني يمكن يغفرلها غير انها بتحبه وهو كمان بيحبها اللي بيحب حد ممكن يزعل منه بس مش لازم يسيب زعله يعميه ويخليه يهد المعبد عليه وعليها مايبقاش ده حب
انا بالصدفه كنت بتفرج علي فيلم اجنبي وعجبني الكلام ده
وحسيت انه رد علي القصيده دي


"الحب صبور دائماً وهو أبداً ليس غيور
- "الحبّ أَبَداً ليست متبجّح ولا مغرور.
وهو أَبَداً ليس وقح أَو أناني.
ولا يعاتب
ولايستاء
الحبُّ لا يسعد
بذنوبِ الناسِ الآخرينِ
هو جاهز دائماً للإعْذار،
للإتِمان، للتَمنّي. . .
. . . وللتَحَمُّل
"مَهْما يحدث

اسفه لو كنت طولت عليك
دمت بخير

Anonymous said...

بجد تحفة اوي
واد ايه احساسها جميل ومؤثرة
تسلم ايدك يادكتور
اتمنالك مزيد من التوفيق

أحمد عمارة said...

موهوب .. ما شاء الله