أستودعكم الله

السلام عليكم ورحمة الله وبركاته
كنت حابب اخلى الخبرين دول آخر خبرين في البوست
بس هبدأ بيهم عشان ما أطولشي عليكم رغم انهم خبرين رخمين جدا
الخبر الأولاني انه للأسف وغصب عني ده هيكون
آخر بوست على المدونة لمدة أربع شهور جايين ان شاء الله

وعشان كده لو البوست ده طويل شوية بس أتمنى تكملوه للآخر
والخبر التاني اني للأسف ماقدرتش أكتب هدية لليلة القدر زي السنة اللي فاتت
دعواتكم يا جماعة
والله انا حاولت كتير بس لسة القلم مش مطاوعني رغم اني كنت قربت أخلصها
ربنا وحده اللي يعلم ان الواحد بيروح وييجي
ويضحك ويتكلم بس من جوايا عامل ازاي بس الحمد لله على كل حال
وبتأسف لكل زوار و اصدقاء المدونة اني مش هكون معاهم الفترة اللي جاية دي
رغم انهم وقفوا جنبي في محن و أوقات صعبة كتيرة
كفاية أقول اني يوم ما ماكتبت عن اصحابي لاقيت بسام بيتصل من الامارات
واتصال جالي من اخ في الكويت ورسالة جاتلي من السعودية ربنا يكرمهم
بشكرهم كلهم لو كانوا بيقروا دلوقتي هما وكل الناس اللي اتصلوا بس وبعتولي
لإن اهتمامهم و ووقفتهم دي فرقت معايا جدا وخرجتني بسرعة من الحالة دي
وحتى آخر بوست كان عن جهاز القلب على المدونة اتفاجئت بالمبالغ اللي لميناها
ربنا يكرم كل حد دفع ولو جنيه واحد منها لإنها بجد هتفرق جدا
بس آن الأوان اني أنفصل عن كل حاجة و أحاول أركز في المذاكرة بس
انا والله حاولت السنادي واجتهدت في دراستي

وواثق ان ربنا مش هيضيعني ان شاء الله
وراضي بأي حاجة هتحصل في الامتحانات اللي جاية ان شاء الله
المفروض ان فاضل شهرين والمدونة تتم سنتين من عمرها
بس مش هقدر أكون موجود للأسف عشان كده من دلوقتي
كل سنة وانتوا والمدونة طيبين وبكل خير ان شاء الله
يارب تكون المدونة قدمت أي حاجة أسعدتكم أو عبرت عنكم في الفترة دي
ومعلهشي لو جت فترات كانت المدونة فيها كئيبة شوية بحكم ظروف صعبة حصلت
واتمنى ما اكونشي زعلت ولا ضايقت حد بأي حاجة كتبتها فيها
فيه حاجة لازم أقولها يمكن حد يقدر يساعد فيها رغم اني كنت
احب تفضل بيني وبين ربنا بس عن تجربة فيه ناس من اللي بيقروا
دلوقتي جواهم وبيعلموا خير كتير اوي و اكيد هيساعدوا الحالات دي
فيه تلات حالات انا كنت من فقضل ربنا عليا من الناس اللي مسئولة عنهم

وكنت بوصلهم الفلوس اللي كانت بتجيلي من الناس بنية مساعدة الناس برة موضوع الجهاز
على حسب حاجة كل واحد منهم هحكيلكم عليهم اذ ربما حد منكم يحب يساعد
وخصوصا اني خلصت كل الفلوس اللي معايا واللي وصلتني من الناس
أول حالة أربع أطفال اتيتموا مرة واحدة لما ابوهم وأمهم توفوا ورا بعض
وعايشين مع جدتهم الكفيفة وماعادشي فيه مصدر دخل

لإن أبوهم كان صنايعي علي باب الله ومافيش أي مرتب ولا حاجة
تاني حالة ست غلبانة من بلد غلبانة هي بتصرف علاج على نفقة الدولة
حقن الانترفيرون بتاعة فيروس سي بس المشكلة انها لازم كل أسبوعين
تعمل تحليل كل أسبوعين بيتكلف مية وعشرين جنيه وهي ست غلبانة جدا
وأكتر حاجة صعبة في الموضوع انها عايشة ولحدها وابنها الوحيد سايبها
والست دي أكتر حد انا شخصيا متعاطف معاه لدرجة اني لما لقيتها
مستنية وبحسبها مستنية صجفة طلعت من تلات أسابيع بيتجي وتستني
في نفس الحتة اللي كنت قابلتها فيها قبل كده وادتلها فلوس كان حد مديهالي
واللي خلاني أتعاطف معاها أكتر انها دعت على ابنها أدامي وبعيدن عيطت
بس ماعيطتشي عشان هو سايبها عيطت عشان وصلها للدرجة انها تدعي عليه
انا خليتها تسأل لو كان ينفع تعمل التحاليل برة الجامعة

وساعتها ممكن أتفق مع أي معمل يبقى بنص التمن
بس لو حد من اللي بيقروا ليه حد في المجال ده ويقدر يساعدها
بفلوس او بالتحاليل يبقى جزاه الله كل خير
تالت حالة هي ست تعبانة وليها ابن تعبان جدا وبنت تانية بتتجهز
انا أعرف زمايل لينا ربنا يكرمهم بيساعدوها على أد ما يقدروا
بس هي الدايرة واسعة عليها جدا ومحتاجة لكل جنيه
هما دول التلات حالات اللي نفسي حد ربنا يكرمهم ويقدر يساعدهم
أقوللكم على موقف مش عارف يضحك ولا يبكي بس هيوريكم

أد ايه الناس دي طيبة وتستحق المساعدة
بالصدفة لاقيت تاني حالة اللي محتاجة تحاليل دي مستنية وصعب على
انها جت قبل كده تلات مرات وماشفتهاش لإنها ماكنتش معرفاني انها محتاجاني
واتعاطفت معاها جدا وكان معايا مبلغ صغير كانت الناس مأمناني عليه لحالات محتاجة
ادتهولها واديتها آخر فلوس كانت معايا ومشيت بعدها بعشرين متر قابلت الحالة التالتة
وقلتلها والله انه ما عادشي معايا فلوس خالص وكنت محروج منها جدا
حلفت ميت يمين لازم آخد منها اتنين جنيه أروح بيهم ...وروحت على حسابها؟؟
مش بقوللكم هم يبكي وهم يضحك
يارب ما يكونشي زمايلي في سنة سادتة زعلانين مني في أي حاجة
أنا بحبهم في الله والله وبقدرهم وبحترمهم وشايل تشجعيهم
لي جميل فوق راسي طول عمري وده اللي كان بيخليني دايما
بحاول أفيدهم بأي حاجة أقدر أعملها ليهم في الكلية
يمكن ربنا وفقني في حاجات وخاني التوفيق في حاجات تانية
أتمنى دي تعوض دي وأكون قدرت أعمل أي حاجة تفيدهم
أنا طولت أوي أوي وده يمكن عشان مش هاين عليا أسيب المدونة و امشي
كل سنة وانتم طيبين وبخير وبكل صحة وسلامة
بجد دعواتكم لي ولكل زمايلي لإننا محتاجين دعائكم جدا
أستودعكم الله

ودول ايميلي ورقم تليفوني لو أي حد عاز اي حاجة في أي وقت أنا تحت أمره

now_tears_smile@yahoo.com

0185856476
وقبل ما امشي انا قلت أسيبلكم هدية صغيرة اوي أوي
أنا قلت أضرب عصفورين بحجر واِشارك معاكم في ملحمة الـتأمل
اللي كانت على المدونة الفترة اللي فاتت دي
بجد والله انا استفدت واتعلمت من آيات كتيرة حسيتها لأول مرة معاكم
وقبل الـتأمل هسيبكلم هدية تانية صغيرة

بشري لكل الناس اللي كانت تعرف أصحابي ربنا يرحمهم
ولكل الناس اللي إتأثرت بالبوست اللي كتبته عنهم
انا شفتهم في رؤية أثلجت صدري وهي اللي خلتني أرجع لحياتي من تاني
واتزامن ده مع كذا حد من أصحابنا شافوهم في نفس الوقت في رؤى جميلة جدا
و أنا بقول كده مش عشان بس أطمن الناس عليهم
أنا بس حابب أقول ان ربنا رحيم أوي يا جماعة...رحيييييييييييييييييييييييم اوي
ربنا يلحقنا بيهم على خير ويسكنهم الفردوس الأعلى إن شاء الله
الهدية التانية حاجة بدور عليها من اكتر من عشر سنين ولسة لاقيها حالا
حلقة كنت سمعتها للشيخ الشعرواي حكي في أولها حاجة مش عايز أحرقهالكم
وبعد عشر سنين انتظار اني اسمعها تاني لاقيتها دلوقتي بالصدفة على اليو تيوب

ده جزء صغير منها وياريت لو حد عنده بقية الحلقة يبعتهولي

لإنها حلقة يقشعر لها الجسد وتدمع لها العيون والله
وده اللينك بتاعها....رجاءا تسمعوها....رجاااااااااااااااااااااااءا

http://www.youtube.com/watch?v=15KgflZq10Y
أنا بحب الراجل ده جدا...من الشخصيات اللي بتمثل حاجة كبيرة في حياتي
ورجاءا تسمعوا كمان النشيد ده لإني بحب أسمعه جدا

http://www.youtube.com/watch?v=z2bJLHBwfEA
و أخيرا انا كمان لي الشرف إني أتأمل معاكم وأشارككم في حاجة
من اجمل الحاجات اللي حصل على المدونة
انا هاخدكم لسورة أنا مش بس بحبها انا بعشقها
وبعتبرها من أعز أصحابي ولما أكون مخنوق أو مبسوط لازم أقراها
أكيد لو من أصحابي بيقرأ هيعرف اني أقصد سورة الزمر
أنا لو اتكلمت عن سورة الزمر وارتباطي بيها هتكلم كتير

وهحكي عن كل آية فيها بس عشان مش عايز أطول عليكم
في سورة الزمر قضية بحسها من تاني آية...قضية الإخلاص
.........................................
إنا أنزلنا إليك الكتاب بالحق فاعبد الله مخلصا ً له الدين
.......................................
كان ممكن ربنا يقول فاعبد الله وخلاص

بس العبادة من غير اخلاص ماتساوش حاجة
حتى ربنا بيقولهلنا في الآية اللي بعدها علطول.....ألا لله الدين الخالص
ونفس القضية في الآية رقم أربعتاشر.... قل الله أعبد مخلصا ً له ديني
ومن أكتر الحاجات اللي بحسها في سورة الزمر
انها بتححسنا يعني ايه ربنا
لإننا لو حسينا يعني ايه ربنا حاجات كتيرة في حياتنا اوي هنتغير
تخيلوا معايا وخلوا قلوبكم تحس بربنا وهو بيتكلم عن نفسه
سبحانه هو الواحد القهار
ألا هو العزيز الغفار
ذلكم الله ربكم له الملك لا إله إلا هو فاني تصرفون
إنه عليم بذات الصدور
قل اللهم فاطر السموات و الأرض أنت تحكم بين عبادك
طب محتاجين ايه اكتر من إن ربنا يقولنا
وماقدروا الله حق قدره والأرض جميعا ً قبضته يوم القيامة
والسموات مطويات ٌ بيمينه سبحانه وتعالي عما يشركون
ياتري فعلا احنا حاسين بعظمة ربنا وجبروته
طب تخيلوا ان مع العظمة والملك والجبروت دول ربنا بيقولنا
وإن تشكروا يرضه لكم...فيه فضل أكتر من كده
ربنا مش جزء من حياتنا ربنا هو كل حياتنا
ولإن فيه حاجات كتيرة اوي وربنا عارف ان فيه
ميت طريق بينادينا بعيد عنه ربنا بيسألنا سؤالين في السورة دي
كل واحد يسألهم لنفسه
........................
أليس الله بكافٍ عبده
أو لم يعلموا أن الله يبسط الرزق لمن يشاء ويقدر
لو الأجابة آه يبقى ايه في الدينا هيخوفنا تاني
ولو الإجابة لأ يبقى احنا مانستحقش لقب مؤمنين
عشان كده ربنا من حقه بعد ما بين لينا كل ده انه يقولنا
في كملتين بعتبرهم من أصعب الكلام في القرآن
ياعباد ِ فاتقون
من حقه يقولنا
إن تكفروا فإن الله غني ٌ عنكم
أليس في جهنم متوىً للكافرين
فويل ٌ للقاسية قلوبهم من ذكر الله
وبدا لهم من الله ما لم يكونوا يحتسبون
ولإن ربنا عارف ان الحياة هتاخدنا
من رحمته بينا دايما يفكرنا بآيات ممكن تبان صعبة
بس انا بشوفها من أرحم الآيات بينا
إنك ميت ٌ وهم ميتون
أن تقول نفسٌ يا حسرتي على ما فرطت في جنب الله
عارفين ان ربنا خلى في الدنيا جزء واحد من ميت جزء من الرحمة
بالجزء ده بتلاقي كل أم وكل ابن بيرحموا ولادهم ولو لقوهم في طريق غلط
بيحاولوا يرجعوهم
ولإن ربنا أرحم بينا من كده بكتير برضو بيحاول يفوقنا
وينبهنا من الغفلة اللي احنا فيها ويفكرنا بيه وبإننا هنموت
ومن رحمته انه مهما نعمل مهما نعمل فاتحلنا بابه دايما
لدرجة ان ربنا بيقولنا
ليكفر الله عنهم أسوأ الذي عملوا
يعني مش بس اللي عملوه لأ دا أسوأ اللي عملوه
لإن ساعات لما بنقعد مع نفسنا بنفتكر ذنوب لينا صعبة جدا
و نسأل ياتري ممكن ربنا يغفرهالنا
وربنا بيرد على سؤالنا....أسوأ الذي عملوا
وشوفوا قمة الفضل في بقية الآية لما ربنا بيقول
ويجزيهم أجرهم بأحسن الذي كانوا يعملون
يعني في المغفرة هييفرلنا أسوأ وفي الجزاء هيدينا على قدر أحسن
حاجة كنا بنعملها....فيه فضل أكبر من كده؟؟؟؟
أنا طولت أوي رغم اني لسة عندي كلام كتير عن سورة الزمر
بس كفاية اختم بآيتين كل الناس بتحبهم
قل يا عبادي الذين أسرفوا على أنفسهم لا تقنطوا من رحمة الله
إن الله يغفر الذنوب جميعا ً
.........................................
و آخر آية اللي ياريت كلنا ندعي نكون منهم
إنما يوفي الصابرون أجرهم بغير حساب
عرفتوا ليه انا بعشق سورة الزمر؟؟؟
كل سنة وانتم كلكم طيبين
دعواتكم لي ولكل زمايلي ان شاء الله
أستودعكم الله وأسيبكم مع آخر جزء وأروع جزء من سورة الزمر

و آخر حاجة أحب اختم بيها الفترة دي على المدونة

بسم الله الرحمن الرحيم

وسيق الذين اتقوا ربهم إلى الجنة زمراً حتى إذا جاؤوها

وفتحت أبوابها وقال لهم خزنتها سلام عليكم طبتم فادخلوها خالدين

وقالوا الحمد لله الذي صدقنا وعده وأورثنا الأرض

نتبوأ من الجنة حيث نشاء فنعم أجر العاملين

صدق الله العظيم