الموضوع ما انتهاش

Thursday, March 11, 2010

السلام عليكم ورحمة الله
يارب تكونوا كلكم بخير
انا عارف الني قصرت في حق المدونة جدا
وعارف اني حتى لما برجع أكتب زي دلوقتي بكتب مواضيع بايخة ومملة
بس البوست ده بالذات رغم انه كله كلام...بس مهم جدا جدا
ًخصوصا لزمايلي في امتياز ولكل حد عنده حلم في حياته عامة
ورجاءا عشان خاطري كل الناس تكمل معايا البوست للآخر
اللي حاابب أقوله النهاردة انه بعد ظهور نتيجة السنادي كنت محطم نفسيا جدا
حتى لو بينت غير كده لكل اللي حواليا الللي عارف ان معظمهم هما كمان
جواهم حاجات كتير اتهدت...وده موضوع مالوش دعوة خالص بمسألة الرضا
الحمد لله انا والله راضي وعارف ان منعظم أصحابي هما كمان راضيين
االلي حصل اني قعدت مع نفسي شوية بعد النتيجة وحسيت اني لازم أعمل حاجة
ماكنتش عارف أبدأ منين بس كان لازم أبدأ أفكر من جديد
ربنا هداني اني أحول مع أصحابي اللي جايين ياخدوا امتيازهم هنا في القاهرة
والموضوع مشي سبحان الله وانا مش حاسس لحد ما لاقيت نفسي هنا دلوقتي
والحمد لله مبسوط جدا وفي تلات ايام بس اشتغتلعهم هنا حاسس بنقلة جديد في حياتي
وهو ده اللي خلاني عايز أكتب دلوقتي وأنقللكم شعاع الأمل ده
احنا قابلنا دكاترة ماكانشي ليهم نيابة جامعة ولا غيره
بس هما ماوقفوش عند الحد ده... ماقالوش ان كله محصل بعده
فيه بعد نيابات الجامعة مكانين قبل وزارة الصحة
فيه الأمانة العامة للمستششفيات والمعاهد التعليمية
وفيه الأمانة العامة للمعاهد والمراكز المتخصصة
وربنا ييسر في الأسبوعين اللي فاتوا اني زرت المستشفيات التعليمية واحنا بنقدم فيها
ورحت كمان معهد ناصر لحد قريبي هناك

أماكن نضيفة جدا ودكاترة نضيفة جدا ومستوي تاني في كل حاجة
دكاترة حضروا راسايل وخدوا زمالات وعملوا معادلات
علموا نفسهم من أول جديد وفرضوا نفسهم على كل الأماكن الكويسة هنا وبرة
اول امبارح كانت واقفة بتشرحلنا دكتورة ربنا يحميها ويبارك فيها
معاه دكتوراة وزمالة من برة رغم انها لسة صغيرة
وواقفة على رجلها خمس ساعات بتشرحلنا
وبتعاملنا زي ما نكون اخواتها وكذلك رئيس قسم التخدير اللي أنا بادئ فيه
وكل الناس هنا استفزوا حاجات كتير كان ممكن تموت جوايا
حسسوني ان الموضوع ما انتهاش وان لسة فيه أمل في حاجات كتير
الموضوع بجد مش انت فين الموضوع هتعمل ايه
نايب في الجامعة برة الجامعة مش هتفرق ...اللي هيفرق انت عايز ايه
انا شخصيا بحاول أبدأ حياتي من جديد
جيت هنا عشان اتعلم صح وعشان اعرف
لو عايز أبقى دكتور كويس مش اقل من اي حد اعمل ايه وا روح فين
ونفسي كل الناس اللي أعرفها تحاول من جديد
نحاول نتعلم صح مهما كان المكان اللي احنا فيه...احنا في يوم هنبقى
مسئولين عن حياة انسان وهنتحاسب لو ما قدمناش العلاج
حتى لو مش عارفينه هنتحاسب اكتر لإننا كان المفروض نعرف
خلوا بس النية تكون جوانا ونحاول وان شاء الله ربنا هيكرم
على الاقل عشان لما نقف أدام ربنا نقوله اننا حاولنا نعمل حاجة
....................................
رجاءا معلهشي تكملوا معايا
صاحبي اسلام الشاذلي ربنا يكرمه كلمني عشان فكرة خير جميلة جدا
ومعاه محمد مغاوري وناس تاينة كلهم ناس كويسين جدا جدا
الموضوع انهم عايزين يجمعوا الدوا اللي عند الناس ومش محتاجينه
ومن خلال الناس اللي هنقابلهم ونحس انهم محتاجين الدوا نديهلهم
وكذلك لو حد عنده صيديلة فيها دوا فايض
برضو يجيبه لينا واحنا هنتحمل مسئولية اننا نوديه للحالات اللي تستحق
الفكرة جميلة جدا وبتتعمل في أماكن كويسة كتير وانا شاركت فيها قبل كده
وعرفت أد ايه شريط دوا واحد بيفرق مع الحالة
ده رقم اسلام 0103880858
وده رقم محمد مغاوري0124777838
وده رقمي 0199849267
وبالمناسبة انا خطي الموبينيل ضايع مني واديت الرقم ده لمعظم الحالات
بس فاضل الست بتاع التحاليل معاها الرقم القديم
لو حد من اللي جم معايا قبل كده شافوها بالله عليكم يدوها الرقم ده
عشان انا حاسس جدا بالذنب وخايف انها تكون بتتصل والرقم مش بيرد
ورجاء ماتحرموش اسلام ومحمد وماتحرمونيش انا كمان
اننا نكون سبب في الخير بموضوع الأدوية ده
وقريب كمان هتبقى فكرة الصندوق الخيري هقوللكم على تفاصيلها
بس لما نظبط الموضوع ويبقى واضح أدامنا
وبفكر عشان ما أوجعشي دماغكم على المدونة ان ننعمل جروب على الفيس بوك
نقول من خلاله اللي احنا عايزينه وانتو تقولوا لو أدامكم حد محتاج لأي حاجة
ربنا يكرم باللي فيه الخير ويجعل نيتنا خالصة ليه
..................................
أنا طولت عليكوا
ان شاء الله هحاول من يوم التلات الجاي أرجع للمدونة بقوة
يمكن ماعادشي وقت اني اعمل حاجة بس مش هي دي المشكلة أبدا
المشكلة اني حااس ان فقدت قدرتي على الكتابة
دعواتكم دايما



9 comments:

tareksashah said...

جزاك الله خيراً على هذه الجرعة الرائعة من التفاؤل
و بالنسبة لفكرة الخاصة بالأدوية إن شاء الله نحاول نساعدكم قدر استطاعتنا
و مبروك العودة للمدونة

Anonymous said...

شكرا يا دكتور على الكلام الجميل ده وان شاء الله نكون معاكم في موضوع الأدوية

Soul.o0o.Whisper said...

أولا : ربنا يبارك لك يا دكتور
و أفكار جميلة ما شاء الله

ثانيا : بأقولك بجد أوعى تزعل على حاجة راحت منك
لأن الأكيد الأكيد ان ربنا كاتب لك الخير فى اللى قدرهولك

صحيح أنا صيدلانية مش دكتورة
بس شغالة فى مركز الاورام فى المنصورة
و أهى جامعة أهى
صحيح فرق مستوى المعاملة
لكن بالنسبة للتعليم و انك تلاقى نفسك و تتعلم زى ما انت متخيل ... لا خااااااااالص
حتى الدكاترة
صحيح ميتنج كل يوم و التانى
لكن للأسف بردوا مش حاسة انهم بيعلموا بجد ... مجرد اسم و خلاص

فعلا مفيش غير
self-learning
و كويس ان فى حد معاك يشجعك

الباقى بقى فى اللى مش لاقى حد يشجعه
:(

ربنا مع الجميع
و أهم شئ انك تصدق النية
و أبدء و ملكش دعوة
صدقنى ربنا بييسرها من حيث لا تحتسب


بالتوفيق

محمد عبد الباسط said...

ازيك يا محمود وحشتنا والله اسال الله لك التوفيق
ولا تنسانا من دعائك

Anonymous said...

ربنا يوفقك دايما ولا تنسى كلمة الحمد لله

almaystro12340 said...

واحشنييييييييييييييييييي
والله واحشني

وليد مسعد

marwa abdelfattah said...

ربنا يوفقك يا محمود ويسرلك الخير

Al Bassam said...

اللهم وفق أحبتى لما تحب وترضى

واشرح صدورهم ويسر أمورهم وانفع بهم

الاسلام والمسلمين

===================================
معلش يا حوده اتأخرت عليك المرة دى لكن ماشغلنيش عنك إلا فرح بنت خالتى ،سامحنى ، بس انت ع البال على طول، ربنا معاك ومع زمايلك كلهم ، وبدعيلكم جميعا والله


أعزكم الله بالذل إليه

Anonymous said...

ليس السعيد من تسعده دنياه ولكن السعيد من ينجو من النار.جزاك الله كل خير